E taui ānei te ’Ēkālesia i tāna ha’api’ira’a tumu ’e e fa’ati’a ānei ’oia i te fa’aipoipora’a ta’ata nō tōna iho ’āpeni ?

E mea mure ’ore te ha’api’ira’a tumu nō te fa’aipoipora’a

I te pū mau o te fa’anahora’a a te Atua, ’ua riro te ha’api’ira’a tumu nō ni’a i te fa’aipoipora’a i rotopū i te tāne ’e i te vahine ’ei ha’api’ira’a rahi nā Te ’Ēkālesia ’a Iesu Mesia i te Feiā Mo’a i te mau Mahana Hope’a nei ’e e’ita te reira e taui :

« ’Ei parau tumu niu, fa’atumuhia i ni’a i te mau pāpa’ira’a mo’a, tē ha’apāpū nei te ’Ēkālesia ē e ’ohipa faufa’a tumu te fa’aipoipora’a i rotopū i te tāne ’e i te vahine i roto i te fa’anahora’a a tei Hāmani nō te hope’a mure ’ore o tāna mau tamari’i. Tē ha’apāpū ato’a nei te ’Ēkālesia ē tē fa’ata’a nei te ture a te Atua i te fa’aipoipora’a ’ei tā’atira’a mana i mua i te ture i rotopū i te hō’ē tāne ’e te hō’ē vahine.

« ’O te tāne noa ’e tāna vahine tei fa’aipoipo ti’a i mua i te ture ’ei tāne fa’aipoipo ’e ’ei vahine fa’aipoipo, tē ta’oto te tahi i te tahi. Te tahi atu mau huru aura’a ’āpeni, tae noa atu i rotopū i te mau ta’ata hō’ē ā ’āpeni, e hara ïa ’e e fa’a’ino te reira i te fa’anahora’a hanahana o te ’utuāfare » (« Te fa’aipoipora’a i te ta’ata nō tōna iho ’āpeni », Buka arata’i rahi : Te tāvinira’a i roto i te ’Ēkālesia a Iesu Mesia i te Feiā Mo’a i te Mau Mahana Hope’a nei, 38.6.13).

Fa’a’ite i te ha’api’ira’a tumu ma te here

’Aita e tauira’a i roto i te ti’ara’a o te ’Ēkālesia nō ni’a i te ’ohipa ti’a i te pae mōrare. Terā rā te tauira’a—’e te mea e hina’arohia e taui—’o te tauturura’a ïa i te mau melo o te ’Ēkālesia ’ia pāhono ma te ara ’e ma te feruri i te tahi, ’ia fa’aruru ana’e rātou i te fa’ahina’arora’a ta’ata nō tōna iho ’āpeni i roto i tō rātou iho ’utuāfare, i rotopū i te tahi atu mau melo o te ’Ēkālesia, ’aore rā i te tahi noa atu vāhi (hi’o Dallin H. Oaks, « What Needs to Change [E aha te mea e taui] », ChurchofJesusChrist.org).

’Ua riro te fa’aipoipora’a ’ei tuha’a faufa’a rahi nō te fa’anahora’a a te Atua nō tō tātou ’oa’oa. E mea faufa’a rahi te fa’aipoipora’a mure ’ore i rotopū i te hō’ē tāne ’e i te hō’ē vahine (’ia tae i te hō’ē fāito) i roto i tō tātou haerera’a i mua nō te tāpae i te fa’ateiteira’a, e vaira’a tei fa’ata’ahia ē, mai te te orara’a tā tō tātou nā Metua i te ao ra e fāna’o nei .

« I roto i te hanahana tiretiera tē vai nei ïa e toru a’e ao ’e ’aore rā tufa’a ; ’e ’ia ti’a ’ia noa’a mai i tei teitei a’e ra, ’ia tomo mai te ta’ata i roto i teie ha’apa’ora’a nō te autahu’ara’a e ti’a ai [’oia ho’i, te fafaura’a ’āpī ’e te mea mure ’ore nō te fa’aipoipora’a] ; ’e ’ia ’ore ’oia ’ia nā reira, e ’ore roa e noa’a te reira iāna. E ti’a ïa iāna ’ia tomo atu i roto i te tahi, terā rā, ’o te hope’a te reira nō tōna bāsileia ; e ’ore roa e ti’a iāna ’ia fa’arahihia » (Te Parau Ha’api’ira’a ’e te mau Parau Fafau 131:1–4).