Nāhea vau e nehenehe ai e fāri’i ’aore rā e toro i te rima i te feiā ’o tē nā roto nei i te fa’ahina’arora’a ta’ata nō tō rātou iho ’āpeni i roto i tā’u pāroisa ’aore rā titi ?

Arata’i nā roto i te hi’ora’a maita’i

« ’Ei ’ēkālesia, ’aita atu e ta’ata tei rahi a’e te here ’e te aroha […] E mata na tātou i te fa’a’ite i te here, te aroha ’e te rima tauturu […] ’Eiaha tō tātou mau ’utuāfare e tīahi ’e ’aore rā e fa’atura ’ore i te feiā e mā’iti i te huru orara’a ta’a ’ē, nō tō rātou mana’o nō ni’a i tō rātou iho ’āpeni ».

« Pāpū roa, te ’ohipa fifi roa a’e tā’u i ’ite ’ei peresideni titi… [’o te] taime ïa ’a ’ite mātāmua ai te mau taote i te parau nō te ma’i he’a mate, ’e e rave rahi o tō mātou mau tāne ’o tei ’ite ē e ma’i he’a mate tō rātou. ’Aita te tahi pae i roto i te ’Ēkālesia—te rahira’a o rātou ; e ma’a ta’ata noa rā—’e ’ua ’ite mātou ē 17 tāne e ma’i he’a mate tō rātou. I taua taime ra ’aita e rāve’a rapa’aura’a. I te hope’a, ’ua pohe pauroa nā tāne e 17 i te ma’i he’a mate i te taime e peresideni titi vau.

« ’Ua ’apo mai au i te mau ha’api’ira’a fa’ahiahia nā roto mai i taua mau ’ohipa ra : ’oia ho’i te huira’atira [feiā mo’a i te mau mahana hope’a nei], e huira’atira here ïa ’e te aroha. ’Ua hi’o vau i te mau ’episekōpo ’o tei rave i te mau tūsia rahi nō te ha’apa’o i te tahi o teie nā feiā ’āpī tamāroa e pohe ra. ’Ua hi’o vau ia rātou i te tāmatara’a ma tō rātou pūai ato’a i te fa’atū’ati ia rātou i tō rātou mau ’utuāfare, ’e ’ia ha’apa’o tō rātou mau ’utuāfare ia rātou. Fa’ahou ā, i taua taime ra ’aita e rapa’aura’a ’e ’aita e rāve’a nō te ārai i te reira. ’Ua hi’o vau ia rātou i te aupurura’a te tahi i te tahi. ’E ’ua hi’o vau i te tahi pae o rātou—te hō’ē iho ā rā o rātou tē puta mai i tō’u ferurira’a, ’o te hō’ē misiōnare tei ho’i mai ’e tei pe’ehia teie ma’i nō te hi’ara’a i te hō’ē noa taime, ’e ’ua rave ’oia i ni’a iāna iho ’ia ha’apa’o i te mau vaira’a fifi mau ’e te feiā tei ’ino roa te ma’i, ’e ’o ’oia te ta’ata hope’a tei pohe.

« Tē mana’o nei au ē te ha’api’ira’a ’o tā’u i ’apo mai nā roto i te reira ’oia ho’i ’ei ’ēkālesia, ’aita atu e ta’ata tei rahi a’e te here ’e te aroha. ’Eiaha te hō’ē noa a’e ’utuāfare e ta’ata e tāfifi nei i te fa’ahina’arora’a ta’ata nō tōna iho ’āpeni ’ia tīahihia mai roto atu i te auhoara’a ’utuāfare. Tītauhia ’ia vai rātou i roto i te auhoara’a ’utuāfare » (Quentin L. Cook, « Let Us Be at the Forefront [’Ia vai tātou i mua] », ChurchofJesusChrist.org).

Fa’a’ite i te here, te aroha, ’e te rima tauturu

« Tē ha’api’i rā ānei tātou i te poro’i nō ni’a i te ’utuāfare ? Tē ha’api’i rā ānei tātou i te fa’anahora’a a te Metua i te ao ra ? Tē ha’api’i rā ānei tātou i te pene mātamua o te buka arata’i piti ? ’E, tē nā reira nei tātou. E fa’anahora’a nō te fa’aorara’a tā tātou. ’E te fāri’ira’a i te mau tamari’i i roto i tō tātou orara’a, e tuha’a ïa nō te fa’anahora’a a te Metua i te ao ra. ’Ei mua rā tātou nō te fa’a’ite i te here, te aroha, ’e te rima tauturu ia rātou. ’E ’eiaha tō tātou mau ’utuāfare e tīahi ’e ’aore rā e fa’atura ’ore i te feiā e mā’iti i te huru orara’a ta’a ’ē, nō tō rātou mana’o nō ni’a i tō rātou iho ’āpeni […] E mana’o pūai tō’u nō ni’a i te reira, mai tā ’outou e nehenehe e ’ite. Tē mana’o nei au ē e parau tumu faufa’a roa » (Quentin L. Cook, « Let Us Be at the Forefront [’Ia vai tātou i mua] », ChurchofJesusChrist.org).