E nāhea vau i te aupuru i te « hō’ē », mai te mea e melo LGBTQ ?

Fa’aitoito ’e ha’apūai

« ’Ia fa’atumu ’outou i ni’a i te hō’ē, e nehenehe mau ’outou e fa’ateitei atu ’e e ha’apūai atu. ’Ua rātere au nā te mau fenua rau o te ao nei. ’E ’ua haere mātou i te purera’a i roto i te mau pāroita ’e te mau ’āma’a rau. ’E ’ore noa atu ’oe e ’ite i te mau ta’ata tei ta’a ’ē ia ’oe, i roto i te mau mea huru rau, tē mana’o nei au ē e mea ’ōhie roa ’ia fa’atumu i ni’a i te hō’ē noa tuha’a oaoa roa ’e ’ia feruri ē ’o te reira ana’e. Tē mana’o nei au ē ’ia fā’ao tātou i rāpae’au ia tātou iho, ’ia feruri ana’e tātou ia vetahi ’ē, e tauturu te reira ia tātou ’ia ’ite ē e ’utuāfare tātou pā’āto’a, te ’utuāfare o tō tātou Metua i te ao ra […]

« E parau paha vetahi ē : ‘’Ae, ’aita e faufa’a nō’u te tahi atu mau ta’ata’. Penei a’e paha ïa ’o rātou terā e hina’aro mai ra ia ’outou. ’Ia mā’iti ’oe ’ia fāriu atu, e ha’amaita’i ’oe i tō vetahi ’ē orara’a.

« Tē mana’o nei au ē te hō’ē o te mau mea tā tātou e nehenehe e rave ’o te fa’atumura’a ïa i ni’a i te hō’ē. E nehenehe ānei tā ’oe e hi’o mai i te ta’ata e au roa mai ’ia paraparauhia atu, ’aore rā, ’o tei hina’aro ’ia fa’aro’ohia mai ? E nehenehe ānei tā ’oe e hi’o i te ta’ata e pārahi ra i rāpae, ’o tē parahi ra i te hiti ? E fā ïa tē noa’a mai. E fā nō tātou, ’aita ana’e tātou e au roa i te mau pupu rarahi, e fa’atumu noa rā tātou i ni’a i te hō’ē.

« Te hō’ē o te mau rāve’a maita’i roa a’e nō te fa’atupu i te tā’amura’a au e ’ere ïa i te haerera’a atu ma tō tātou mau mana’ora’a ’aore rā mau mana’o mā’iti-’ē-hia na, ’ia vai matara noa rā te ferurira’a ’e te ’ā’au. I te tahi taime e au ra ē tē mā’iti’iti nei tātou i te mau ta’ata, ’aore rā tē mana’o nei tātou ē mai terā iho ā terā ta’ata, e hi’o na pa’i i tōna orara’a ’e tōna ’utuāfare. ’E e mea māere mau i te mau taime ato’a ; mai te mea e vai matara noa tō ’oe ferurira’a ’e e vai matara noa tō ’oe ’ā’au, e ’ite ’oe e rave rahi mau mea fa’ahiahia nō ni’a i te mau ta’ata ’o tā ’oe paha i ’ore roa i mana’o. ’Ia tāmata ’oe, ’e ’ua ’ite ’oe, ’e ’ua ’īriti ’oe i tō ’oe ’ā’au ia vetahi ’ē, e ’ite ïa ’oe ē hō’ē ā tātou » (Jean B. Bingham, « Focus on the One [’A fa’atumu i ni’a i te hō’ē] », ChurchofJesusChrist.org).

Aupuru i te tā’amura’a i te Mesia

« E mea faufa’a nō te mau ta’ata ato’a ’ia vai te tā’amura’a i te Mesia, nō te mea tei ia ’oe iho, tei te ta’ata hō’ē tōna fa’aorara’a.

« E’ita tātou e fa’aora i te mau ta’ata nā roto i te mau ’āmuira’a. E fa’aorahia tātou iho, hō’ē ta’ata i te taime hō’ē. E tā’amura’a ta’ihō’ē mau teie i te Mesia. Tē hāro’aro’a nei te Fa’aora ia tātou nō te mea e ’ere ’oia i te vaimana’o. Nō te mea e tamaiti ora ’oia, tē huti nei i te aho, ’e e tamaiti mau nā te Atua. Te tamaiti ora a te Atua ora. Te mau ta’ata e mana’o ra ē ’ua hara roa rātou ’e ’aore rā ’ua haere ātea roa ’e ’aore rā ’ua maoro roa te revara’a, e’ita e nehenehe e ho’i mai i roto i te auhoara’a, tē parau nei au ē, ’aita e ta’ata e nehenehe e marua i raro roa atu i te māramarama o te Mesia ’ia ’ana’ana mai. E’ita e nehenehe.

« Tē mana’o nei au ē ’ua riro te ravera’a i te ’ōro’a mo’a, te tāmā’ara’a a te Fatu, ’ei rāve’a hau a’e, i te mau hepetoma ato’a, ’ia ti’a ia tātou ’ia fa’a’ite ē tē hina’aro nei tātou ’ia fa’ahōho’a iāna ’e nō reira, e tao’a ’e e mana nō nā pae e piti ’o tē tae mai nā roto mai i te reira. ’A haere mai ai tātou nō te ’āmui ’e nō te tā’amu maita’i i te Fa’aora i roto i taua ’ohipa ra, e ho’i fa’ahou mai taua tā’amura’a ’e taua fafaura’a ia tātou, ’e e fa’aru’e tātou i terā ’āmuira’a, e fa’aru’e tātou i terā rurura’a, ma te pūai ’e te mana ’e te māramarama nō ’ō mai iāna ra ’aita i nā mua atu. Te tahi tumu nō te reira, nō te mea ïa tē ta’a maita’i atu ra tātou iāna. Te mea mau rā, ’o te mea ïa ē ’ua māramarama ’oia ia tātou. Tō’u iho ’itera’a, ’e tae noa atu tō’u pi’ira’a ’ei ’āpōsetolo, ’o te fa’a’itera’a atu ïa ē ’ua ’ite te Mesia ia tātou. ’Ua haere ’oia nā ni’a i te ’ē’a taratara, te fifi ’e te pa’ari o tō tātou orara’a. ’Ua nāhea ’oia i te ravera’a i te reira, ’aita vau i ’ite. ’Aita vau i ’ite. ’Aita ’oia i ta’a i tāna vahine. Nō reira e nehenehe tā ’outou e parau ē : ‘Nāhea pa’i ’oia i te ’ite i tō’u parau, ’ua ta’a vau ?’ ’Aita vau i ’ite e nāhea. Terā rā mai te mea ’ua ta’a te hō’ē ta’ata, ’ua māramarama ’oia i te reira.

« E mea huru ’ē paha ’ia parau, terā rā, i here te Atua iā’u, e nehenehe e parau ē fātata mai tāna i here i tāna Tamaiti fānau tahi. E nehenehe a’e rā tā’u e parau i teie : ’Ua hōro’a mai ’oia i tāna tamaiti fānau tahi nō’u. E fa’a’itera’a ïa teie nō ni’a i tō’u faufa’a i tāna hi’ora’a ’e tō’u faufa’a i te hi’ora’a a te Fa’aora ’e tōna hina’aro ’ia haere i Getesemane ’e i Kalavaria nō’u. E’ita roa atu vau e tītauhia ’ia rave i te reira. E’ita e tītauhia ’ia tahe tō’u toto. ’E e’ita e tītauhia ’ia pohe au nō te hara a te tahi atu ta’ata. ’E e’ita e tītauhia ’ia vai ’ōtahi roa vau. Terā rā tē māramarama nei au i te reira. ’E ’ua here roa vau i te reira. ’E ’ua māuruuru roa vau nō te reira. ’E te aura’a nō’u, ’o te mea ïa, tē māramarama ra ’oia iā’u, tē here nei ’oia iā’u ’e tē toro mai nei ’oia i tōna rima iā’u. Nō reira e’ita tā’u e nehenehe e ha’amāramarama atu nāhea ra. ’Ua ’ite noa vau ē ’o te reira iho ā » (Jeffrey R. Holland, « The Savior Understands Me [Tē ta’a mai nei te Fa’aora iā’u] », ChurchofJesusChrist.org).