Nāhea vau e tauturu ai i te feiā i roto i tā’u pāroita ’aore rā titi ’ia mana’o ē tē herehia nei rātou, tē ha’afaufa’ahia nei ’e tē hina’arohia nei ?

’Ua hina’aro te ta’ata ’ia ’ite ē tē hina’arohia nei rātou

’Ei mau melo nō te ’Ēkālesia, tei ia tātou pā’āto’a te hōpoi’a ’ia ha’amau i te hō’ē vāhi e pāturuhia ’e e herehia tō tātou mau taea’e ’e mau tuahine ato’a. Nā te reira huru pa’epa’e natira’a e fa’a’ōhie i te orara’a i te ’evanelia ’e te ’imira’a i te Vārua ’a rātere ai i te huru rau o te orara’a tāhuti nei.

« ’Ia mana’o vau, ’aita vau i fārerei a’e nei i te hō’ē ta’ata ’o tei ’ore i hina’aro i te tā’amura’ i te hō’ē mea ’o tē ha’afaufa’a ia rātou, e ’ite ai rātou ē e mea faufa’a rātou.

« ’Ia uiui ana’e te ta’ata ē, tē vai rā ānei te hō’ē pārahira’a nō’u ? ’ua rau te huru te mea i muri mai i te reira uira’a, ’e i teienei, tē ui nei rātou ia rātou iho ē, e tano ānei au ? Nō ’ō nei ānei au ? Tē hina’aro mau rā ānei rātou iā’u ? E hina’aro ïa e parau hua atu ē, ‘’Ē !’

« Tē mana’o nei au i te fa’ahōho’ara’a a Paulo, ’o tā’u e here rahi nei, [te mea ē] e tino te ’Ēkālesia nō te Mesia. ’E tē parau nei ’oia ē ’ua bāpetizohia tātou i roto i taua tino ra. ’E tē parau nei ’oia ē ’o te hō’ē tino teie. E rave rahi melo terā rā hō’ē tino.

« Tē fa’aro’o ra vau i te tahi taime i te mana’o o te mau ta’ata ē, ’aita paha rātou i hina’arohia. ’E i te tahi taime e hapa te tahi pae i te paraura’a ē ’aita mātou e hina’aro i teie ta’ata ; ’aita mātou e hina’aro i terā ta’ata ; e mea maita’i mātou mai te reira. To’opiti e ’ere te reira i te parau mau. E ’ere te reira te haere’a teretetiāno. E ’ere te reira i te mea tā te Mesia e hi’o nei ia tātou. Tē hi’o nei ’oia ia tātou pā’āto’a ma te faufa’a mure ’ore. ’E noa atu te huru o tō tātou orara’a i teienei, tei reira te tino o te Mesia nō te pāturu i te melo tāta’itahi. ’Ia tupu te mana’o ’ōtahi o te hō’ē ta’ata—e ’ere teie parau nō te huna i te vai-mau-ra’a terā mana’o ’e te ’ōhie te reira mana’o ’ia tae mai—nō tātou tāta’itahi rā, ’ia tupu noa atu te reira mana’o, e mea ti’a ia tātou ’ia fa’aea ’e ’ia feruri ē, ’ua pohe Iesu Mesia nō’u. ’Ua mana’o Iesu Mesia iā’u ē, e mea ti’amā vau i tōna toto. ’E ’ua here ’oia iā’u. E tīa’ira’a tāna nō’u. ’E e nehenehe tāna e fa’atupu i te hō’ē mea ta’a ’ē i roto i tō’u orara’a. E nehenehe tōna aroha e taui iā’u. ’E penei a’e e ’ere hō’ē ā mana’o tō terā ta’ata e pārahi ra i pīha’i iho iā’u, ma te tāu’a ’ore iā’u, ’e ’aore rā ma te hina’aro ato’a ’ia fa’anu’u ’ē atu vau. ’Aita rā te reira e taui nei i te pāpū o te mana’o o te Mesia iā’u ’e i te mau rāve’a e vai ra i roto i te Mesia.

« E māuiui roa tō’u ’ā’au mai te mea e haere mai te tahi ta’ata, e ta’ata pāruru ’ore roa, ma te parau ē : ‘Tē hina’aro nei au e tāmata. Tē hina’aro nei au ’ia haere mai i’ō nei’, ’e i muri iho e tapono to’eto’e ’aore rā e ’ana’anatae ’ore tei fa’a’itehia atu. E mea ’oto roa ïa. E mea ’oto rahi mau. ’Ia maita’i atu ā tātou i te reira e ti’a ai.

« Te huru rau tā tātou e ’ite nei i roto i te ’Ēkālesia ’o te ha’amatara’a noa paha. Tē mana’o nei au ē, e ’ite tātou i te rahi-atu-ā-ra’a te raura’a. I roto i te ’Ēkālesia i tahito ra ’ua rahi te raura’a. ’E e ’ere noa te raura’a nō te raura’a, e nehenehe ho’i i te ta’ata ’ia hōro’a mai i te mau hōro’a rau ’e te mau hi’ora’a rau, ’e nā te rahira’a o te mau ’itera’a ’e te mau tāmatara’a tā te ta’ata e fa’aruru nei e fa’a’ite mai ia tātou i te mea faufa’a roa i roto i te ’evanelia a te Mesia. ’E te rahira’a o te toē’a, ’o tei roa’a mai paha nā roto i te tau, tei au a’e i te peu tumu ’ia hi’ohia i te ha’api’ira’a tumu, e nehenehe ïa te reira e mo’e atu ’e e nehenehe mau tā tātou e ha’api’i ’ia riro ’ei mau pipi » (D. Todd Christofferson, « Is There a Place for Me? [Tē vai rā ānei te hō’ē pārahira’a nō’u ?] » ChurchofJesusChrist.org).