Pe maua e faafafine/faafatama ia faamanuiaga folafolaina a le Atua?

O Loo Avanoa Faamanuiaga a le Atua mo Tagata Uma

“O i tatou uma lava e tilotilo i o tatou olaga i nisi taimi ma taumafai e iloilo, O fea o tatou i ai? O fea o o’u i ai i lo’u olaga?’ Ou te fai atu pea lava pea e faapea pe a amata ona e faatusatusa oe lava i le tasi ma le isi, a le o le tau i le lotovaivai o le tau atu i le faamaualuga. E leai se mea o na mea e lelei, ae o le mea lava lena e tupu i le tele o taimi pe a amata e tagata ona faatusatusa. E amata ona latou mafaufau, ‘E sili atu mea ua ou maua i lo’u olaga,’ pe ‘E sili atu ona leaga mea ou te fai i lo‘u olaga.’ Ma o lea e le o se faatinoga faafautuaga mo i tatou e taumafai e faatusatusa o tatou tulaga i se isi. E oo mai faamanuiaga i vaitaimi lata mai; e oo mai foi faamanuiaga i vaitaimi uumi. O nisi taimi e teuina faamanuiaga mo i tatou, ou te talitonu, pe a mavae ona tatou pasi atu i le veli i lo tatou ola pe a mavae le oti. Ma o lea o loo tatou i ai i se va e tapulaa i le taimi nei, ma i lenei va tapulaa, e le aoga le na o le taumafai e faatusatusa puapuaga sa tatou i ai pe taumafai e faatusatusa o tatou faamanuiaga

“Tatou te manatua ina ua tuua e Atamu ma Eva le Faatoaga o Etena, o se tasi o mea sa folasia atu ina ua la tuua o vaotuitui ma le vaotalatala, ma tatou te maua uma i o tatou olaga. Ae e mafai ona tatou maua le talitonuga moni e faapea e mafai ona faatoilalo na mea uma, pe o a lava na mea e tuuina i o tatou luma. Ua ta’u mai e le Alii ia i tatou o le a i ai faigata i luga o le ala, ma ua ia fautuaina foi i tatou e faapea o o tatou puapuaga o le a faapaiaina mo lo tatou lelei. O lenei, o nisi taimi e tatau ona tatou faatalitali mo ni tausaga mo lena mea, ae e iu lava ina mafai ona faamautinoa mai ia i tatou o le folafolaga o le ola e faavavau e mo tagata uma. O le a tauia tutusa ia tagata uma mo lo latou faamaoni. Afai e te tumau e oo i le iuga, o le a faamanuiaina oe. Atonu e faigata i le asō ma a taeao ma le isi masina, ae o le a le faigata pea lava. E mafai ona e faia lenei mea pe a e faaaogaina lou faatuatua ia Iesu Keriso ma Lana Togiola.

“O le a i ai taimi o le a oo mai ai faigata ma tofotofoga ia i tatou e foliga mai e faigata tele ona onosaia. Peitai ona Ia fetalai lea, ‘E ui i lea, ia fiafia, ona o le a Ou taitaia outou i le ala.’ O se folafolaga lena mai le Alii. Ia outou lototetele. I le taulotoaiga o o outou faigata, ia fiafia, ona o le a Ou taitaia outou i le ala. Ma ou te tuuina atu la’u molimau o Iesu Keriso o le a taitaia outou i luga o le ala i soo so outou puapuaga“ (Gary E. Stevenson, “No Blessings Denied the Faithful,” ChurchofJesusChrist.org).