Pe o A’u ea o se Tagata o le Ekalesia?

O loo i ai se Nofoaga mo Oe

Matamata i le vitio a Elder Christofferson “Pe O I Ai Se Nofoaga mo A’u?”

Matou te Mananao ia te Oe Iinei

“Ua tele ni o matou mafaufauga ma le manatu atu i se malamalama sili atu i aafiaga o le tosina atu i le itupa e tasi. Ma le faamautinoaina o tagata taitoatasi ua lagonaina na tosinaga, ma o latou aiga, ia lagona e taliaina i latou ma o se vaega o le aiga lautele i le lalolagi O Le Ekalesia a Iesu Keriso o le Au Paia o Aso e Gata Ai.

“Ou te tautala tuusa’o atu nei i tagata o le Ekalesia ua aafia i le tosina atu i le itupa e tasi pe ua faailoa mai foi o se faafafine, faafatama, pe e tosina atu uma i se alii ma se tamaitai [bisexual]. Matou te mananao ia e iloa matou te alolofa ia te oe. E talia lelei oe. Matou te mananao ia avea o oe o se vaega o a matou faapotopotoga. Ua ia te oe ni taleni ma ni tomai maoae e ofo atu i le malo o le Atua i le lalolagi, ma ua matou aloaia le tele o saofaga taua ua e faia. Afai lava e i ai se tasi o outou e le o manino pe o fea e tu ai le Ekalesia i nei faafitauli, matou te valaaulia outou faamolemole faaalu se taimi e maimoa ai i anomea ua faasalalauina i le [Life Help and Self-Reliance i luga o le ChurchofJesusChrist.org po o le polokalama o le Gospel Library app]. Ia saili ma le agaga tatalo le Agaga e aumaia ai tali o loo e sailia. Ma ia mautinoa e alofa le Atua i Ana fanau” (L. Whitney Clayton, “God Loveth His Children,” ChurchofJesusChrist.org).

E Mafai Faapefea Ona Ou Auai i le Faatinoina?

Ua folafola mai e le Atua afai tatou te usiusitai i Ana tulafono o le a tatou maua le olioli e faavavau, ma Na te tausia i taimi uma Ana folafolaga. O tagata e lagonaina le tosina atu i le itupa e tasi pe ua faailogaina o se faafafine e mafai ona osia ma tausia ni folafolaga i le Atua. E mafai ona latou savavali i Lona malamalama. E mafai ona latou auai atoatoa i le Ekalesia.

“Afai e lagonaina e tagata o le au paia le tosina atu i le itupa e tasi ma ua taumafai malosi e ola i le tulafono o le ola mama, e lagolago e taitai ma faamalosiauina i latou ia latou faaiuga. E mafai e nei tagata o le au paia ona maua ni valaauga o le Ekalesia, umia pepa faataga o le malumalu, ma maua sauniga o le malumalu pe afai e agavaa. E mafai e tama tane o le au paia ona maua ma faaaoga le perisitua” (“Same-Sex Attraction and Same-Sex Behavior,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 38.6.12).

Na taua e Peresitene Gordon B. Hinckley:

“Tatou te alolofa ia i latou o atalii ma afafine o le Atua. Atonu e i ai ni o latou faanaunauga patino e malolosi ma atonu e faigata ona puleaina. O le tele o tagata e i ai o latou faanaunauga i se ituaiga e tasi po o se isi foi mai lea taimi i lea taimi. Afai latou te le faatinoina ia faanaunauga ona mafai lea ona latou agai i luma e pei lava o isi tagata uma o le Ekalesia. Afai latou te solia le tulafono o le ola mama ma tulaga faatonuina o le Ekalesia o le amio mama, ona tatau lea ona faia o latou aoaiga faale-Ekalesia e pei ona faia i isi” (“O A Mea o Tuufesili Ai Tagata e Uiga ia i Tatou?” Liahona, Ian. 1999, 82).

Siitiaina o Isi

Matamata le vitio a Carol F. McConkie “Siitiaina o Isi.”

E tofu Tagata Uma ma Meaalofa

Po o a lava tulaga o se tagata, e mafai lava ona ia saofaga i le galuega a le Alii i le taimi nei ma e mafai ona faamoemoeina o lona faamaoni o le a maua ai faamanuiaga lava e tasi, iinei ma i le olaga a sau, ia ua folafola mai e le Atua i soo se tasi e faamaoni faapena. Sa saunoa Elder D. Todd Christofferson:

“E tofu tagata uma ma meaalofa; e tofu tagata uma ma taleni; e mafai e tagata uma ona saofaga i le tatalaina mai o le fuafuaga paia i tupulaga taitasi. E tele mea e lelei, e tele mea e manaomia—o nisi lava taimi o mea uma e tatau ai mo le taimi nei—e mafai ona ausia i tulaga faatauvaa. Ua toatele naua outou o loo faia le mea silisili tou te mafaia. Ma a outou amoina avega aupito mamafatu o le olaga nei, ia tutulai a’e e puipuia le fuafuaga a le Atua ia faaeaina Lana fanau, ua tatou saunia uma lava e lagolagoina outou. Faatasi ai ma le mautinoa tatou te molimau atu o le Togiola a Iesu Keriso ua faamoemoeina, ma, i le iuga, o le a tauia ai mea uma na le’i mauaina, ma le toilalo o i latou na liliu atu ia te Ia. E leai se tasi na muai fuafuaina faapea e itiiti mea na te maua nai lo mea uma o i le Tama mo Ana fanau” (“Aisea e Faaipoipo Ai, Aisea e Fai ai se Aiga,” Liahona, Me 2015, 52).