Pe faatatau le tulafono o le ola mama ia i latou o e aafia i le tosina atu i le itupa tutusa?

E Faatatau le Ola Mama i Tagata Uma

O feusuaiga mama o se vaega taua o le fuafuaga a le Atua mo lo tatou fiafia. Na tautino mai e le Au Peresitene Sili ma le Korama a Aposetolo e Toasefululua:

“O le uluai poloaiga na tuuina e le Atua ia Atamu ma Eva, e faatatau i lo la agavaa mo le tulaga faamātua, o se tane ma se ava. Matou te ta’utino atu o le poloaiga a le Atua i Lana fanau ia fanafanau ma uluuluola ai le lalolagi, ua faamalosia ma faatumauina. Matou te toe ta’utino atu foi ua poloai mai le Atua, o mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le ava, e tatau ona faaaogaina ai” (“O Le Aiga: O Se Folafolaga i le Lalolagi”).

“O le tulafono a le Alii o le ola mamā o le:

• Aloese mai sootaga feusuai i fafo atu o se faaipoipoga i le va o se alii ma se tamaitai e tusa ai ma le tulafono a le Atua.

• Faamaoni i totonu o le faaipoipoga” (“Chastity and Fidelity,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 38.6.5).

I totonu o le matalalaga o le faaipoipoga i le va o se alii ma se tamaitai, o faiga feusuai o se itu taua o le noataga i le va o ulugalii. Peitai, afai tatou te faaalia faalefeusuai i tatou lava i fafo atu o noataga ua faatuina e le Alii, e le gata ina tatou tauvaleina lo tatou gafatia e filifili lelei ai, ae ua tatou teenaina foi le mamanu ua faatu e le Alii mo lo tatou fiafia e faavavau.

Sa faamalamalama mai e Peresitene Dallin H. Oaks: “O le mana e foafoa ai le ola faaletino o le mana aupito sili lea ona faaeaina na tuuina mai e le Atua i ana fanau. O lona faaaogaaga sa faatonuina mai i le poloaiga muamua, ae sa i ai se isi poloaiga taua sa tuuina mai e faasa ai lona faaaogaina sese. O le faamamafa tatou te tuuina i le tulafono o le ola mama o loo faamatalaina e ala i lo tatou malamalama i le faamoemoega o o tatou mana e foafoa ai fanau i le faataunuuina o le fuafuaga a le Atua. …

“I fafo atu o noataga o le faaipoipoga, o le faaaogaina o le mana foafoa i auala uma lava, o ni faaaogaina sese ia ma agasala inosia o le uiga paia silisili o tane ma fafine,” (“The Great Plan of Happiness,” Ensign, Nov. 1993, 74).

Ola Mamā ma Ponokalafi

“Aua e pei ona manatu o ia i lona loto, ua faapea lava o ia” (Faataoto 23:7).

“E ta’usalaina e le Ekalesia ponokalafi o soo se ituaiga. O le faaaogaina o ponokalafi o soo se ituaiga e faatamaiaina ai olaga o tagata taitoatasi, aiga, ma malo. E aveesea ai foi le Agaga o le Alii. E tatau i tagata o le Ekalesia ona aloese mai ituaiga uma o anomea faaponokalafi ma tetee atu i lona gaosiga, faasalalauina, ma le faaaogaina” (“Pornography,” Tusitaulima Aoao, 38.6.11).

O le matamata i ata faaalia faalefeusuaiga, tusa lava pe ona o le fia iloa, e solia ai foi poloaiga a le Atua. O le faaosofia faalefeusuai e i ai lona aafiaga mamana ia i tatou. Tusa lava pe tilotilo i ata pe mafaufau e uiga i faailoaga faalefeusuai e afua ai ona lagona le naufiafia ma le manao atili. I le faalauiloaina o lenei faaosofia, o ponokalafi e fasimate ai le faautautaga o le tagata i tulafono tatau ai a le Atua. O le mea e aupito sili ona taua, na te faatausuai ai i le Agaga, ma tuua ai le tagata e aunoa ma le taitaiga ma le puipuiga a le Agaga Paia.

Ua saunia e le Ekalesia ia punaoa nei e fesoasoani ai i epikopo ma peresitene o siteki a o latou faufautua atu i tagata o le au paia o e ua aofia ai i ponokalafi:

• Help for Me, ChurchofJesusChrist.org

• Counseling Resources, ChurchofJesusChrist.org

• Addiction Recovery Program, ChurchofJesusChrist.org

• Teuteu Ou Manatu i le Mamā (tamaitusi)

A o tatou faaaogaina lo tatou faitalia e fai ai filifiliga e mulimuli i tulafono a le Atua, e tutupu malolosi o tatou agaga. Afai tatou te iloa ua tatou vaivai faaleagaga—ma e tatou te oo uma lava i ai mai lea taimi i lea taim—io loo i ai Iesu Keriso lo tatou Faaola iina. E ala i le salamo, e mafai ai ona tatou toe foi i se olaga ua faauigaina i le pulea o oe lava.

Salamo

O tagata o soo se sootaga faalefeusuaiga e solia le tulafono o le ola mama e mafai ona faaleleia ma le Atua e ala i le salamo.

E pei ona sa faamatala mai e Elder David A. Bednar:

“O nisi o outou e mauaina lenei savali, e manaomia ona salamo mai agasala feusuai po o isi foi agasala. E tele taimi e faasino atu i le Faaola o le Fomai Sili, ma o lenei faalaniga e taua i se tulaga faa-faatusa ma e sa’olele foi. Ua tatou oo uma lava i le tiga o se lavea po o se manu’a faaletino. A oo ina tatou tiga, e masani lava ona tatou sailia se toomaga ma e faafetai foi mo vailaau ma togafitiga ia e fesoasoani ai e faaitiitia ai lo tatou mafatia. Mafaufau i le agasala o se manu’a faaleagaga e afua ai lagona tausalaina, e pei ona faamatalaina e Alema i lona atalii o Korianetona, o le “faanoanoa o le mafaufau” (Alema 42:18). O le aafiaga o le tausalaina i o tatou agaga e faapei foi o le aafiaga o le tiga i o tatou tino—o se lapataiga i se tulaga matautia ma o se puipuiga mai le faataumaoia. Mai le Togiola a le Faaola e maua mai ai le suauu faamafanafana e mafai ona faamaloloina ai o tatou manu’a faaleagaga ma aveesea ai le tausalaina. Peitai, o lenei suauu e na o mataupu faavae lava o le faatuatua i le Alii o Iesu Keriso e mafai ai ona faaaoga, salamo, ma le usiusitai faifai pea. O taunuuga o le salamo faamaoni o le filemu o le lotofuatiaifo, mafanafana, ma le faamalologa faaleagaga ma le toe faafouga” (“Matou Te Talitonu i le Nofomama,” Liahona, Me 2013, 44).

O le salamo e manaomia ai se suiga o le loto. O meaalofa taua o le salamo ma le faamagalo atu e mafai e le Togiola a Iesu Keriso. E mafai ona solo mama le papamaa ma faamalolosia ai lo tatou gafatia e faaaoga la tatou faitalia mo le lelei.