O ai a’u?

O Oe o se Atalii/Afafine o le Atua

O lou faamatalaina o oe lava e ono suia i le aluga o lou olaga, ae o le mea muamua ma le aupito sili ona taua, o oe o se atalii/afafine faapelepele o le Atua. O Ia o le Tama o lou agaga (tagai i le Numera 16:22; 27:16; Eperu 12:9).

I o tatou olaga faitino, atonu e tuuina mai pe atofa mai foi mo i tatou lava le mau igoa. O nisi igoa e ono faamatalaina ai fegalegaleaiga po o se tulaga o le olaga, ma o isi igoa e ono atagia ai uiga faaletino, e pei o le “umi,” “fitipuu,” “teine,” “ulutula,” pe “ulumumu.”

O igoa e i ai le mana. Na faamatalaina e Peresitene Thomas S. Monson lona aafiaga patino i le mana o igoa.

“O nisi taimi e tauave ai e aai ma malo ni igoa faapitoa o lo latou faasinomaga. O lea ma lea o se aai malulu tele ma tuai i Kanata i sasae. Na faaigoa e faifeautalai i tagata toaaga uma.o le ‘Stony Kingston.’ Sa na o le tasi le tagata liliu mai i le Ekalesia i totonu o le ono tausaga, e ui ina sa matuai tofia ma le faaeteete ia faifeautalai iina i le taimi atoa o le malologa. E leai se tasi na papatiso i Kingstone. …

“A o ou tatalo e uiga ma manatunatu loloto i lenei faaletonu matautia, o lo’u tiutetauave i lena taimi o se peresitene o le misiona na manaomia ai lo’u tatalo ma manatunatu loloto e uiga i mea faapena, sa faitau mai e lo’u toalua ia te au se vaega mai le tusi o le, A Child’s Story of the Prophet Brigham Young, tusia e Deta Petersen Neeley (Salt Lake City: Deseret News Press, 1959, p. 36). Sa ia faitau leotele mai faapea sa ulufale atu Polika Iaga i Kingston, Ontario, i se aso malumalu ma matua tumu i le kiona. Sa ia galue malosi iina pe tusa ma le tolusefulu aso ma papatisoina ai agaga e fasefulu-lima. O le tali lena. Afai na mafai e le faifeautalai o Polika Iaga ona ausia lenei seleselega, e mafai foi la e faifeautalai o aso nei.

“E aunoa ma le tuuina atu o se faamalamalamaga, sa ou aveesea mai faifeautalai mai Kingston, ina ia motusia ai le taamilosga o le toilalo. Ona faasavali lea ma le faaeteete o le upu: ‘E le o toe mamao ae tatala se aai fou mo le galuega faafaifeautalai, le aai lea na talai ai Polika Iaga ma papatiso ai le to‘a fasefulu-lima o tagata i totonu o le tolusefulu aso.’ Na taumatemate ia faifeautalai po o fea le pitonuu. O a latou tusi faalevaiaso sa talosagaina ai ni tofitofiga i lea Shanri-la. Na mavae atu le tele o taimi. Ona filifili ai lea ma le faaeteete o faifeautalai—o le toalua o i latou e fou, toalua o i latou ua i ai le poto masani—na filifilia mo lenei faamoemoega maualuga fou. O tagata o le paranesi laitiiti ua latou folafola mai la latou lagolago. Sa tuuto atu e faifeautalai o latou ola. Sa faamamaluina e le Alii itu uma e lua.

“I le avanoa o le tolu masina, sa avea Kingston ma aai aupito sili ona olaola o le Misiona a Kanata. O loo tu ai pea lava le fale foaga lanu efuefu, e lei fesuia’ia foliga o le aai, ma sa tumau pea le faitau aofai o tagata. O le suiga o uiga faaalia. Na faamatuu atu le igoa o le masalosalo i le igoa o le faatuatua” (“Labels,” Ensign, Nov. 1983, 19–20).

I le aluga o o tatou olaga, e i ai itu o o tatou faasinomaga e suia. E mautnoa lava lo tatou suia mai le talavou i le toeaina. E ono suia a tatou vaaiga, ma, faatasi ai ma na vaaiga, e mafai foi ona suia a tatou fegalegaleaiga.

E ono feliuliuai lo tatou faasinomaga, ae e tasi lava le itu pe o ai i tatou ua mausali e faavavau: o le a avea pea lava i tatou o fanau a le Atua.

Faasinomaga ma Igoa

E tatau ona tatou faaaogaina le faaeteetega pe faapefea ona tatou faaigoaina i tatou lava. E tatau ona faaaoga ma le magafagafa ia igoa ma faatasi ai ma le taitaiga a le Agaga Paia. O igoa e mafai ona aafia ai pe faapefea ona tatou mafaufau ia i tatou lava ma pe faapefea ona taulima e isi i tatou, ma ono faalautele atu ai pe faaitiitia lo tatou gafatia ona mulimuli i le fuafuaga a le Atua mo lo tatou fiafia. O igoa e ono aafia ai a tatou sini, o o tatou lagona o le faasinomaga, ma tagata tatou te ta’ua o uo. Afai e faalavelave ia igoa i lo tatou alualu i luma e faavavau, e mafai ona tatou filifili e suia. Na faamatalaina e Peresitene Dallin H. Oaks:

“Ou te manatu o se faamatalaga sa’o le faapea atu o nisi tagata e manatu i lagona o le tosina atu i le itupa tutusa o se mea moni lea e faauigaina ai lo latou ola ai. … Ua ia i tatou le faitalia e filifili ai pe o a uiga e faauigaina ai i tatou; o na filifiliga e lei tau’ai maia i o tatou luga.

“O le mea moni silisili ona taua mo i tatou uma, o i tatou o fanau a ni Matua Faalelagi, na fananau mai i lenei lalolagi mo se faamoemoega, ma fananau mai ma se taunuuga paia. Soo se taimi lava e faaosofia ai na manatu, e tusa lava po o le a, e faalavelaveina ai lena mea moni taua, o lona uiga o se faalavefau ma o le a taitaiina atu ai i tatou i le ala sese” (faatalanoaga ma Elder Dallin H. Oaks ma Elder Lance B. Wickman: “Same-Gender Attraction” [2006]).

Afai e lagonaina e se tasi le tosina atu i le itupa tutusa, e mafai ona filifili o ia e faaaoga se faailoga o sootaga faalefeusuaiga e faamatala ai oe lava ia. O le faailoaina o oe lava o se faafafine po o se faafatama e le o se faasagatau i aiaiga faavae po o aoaoga faavae a le Ekalesia; peitai, e mafai ona i ai taunuuga e le moomia i le ala e taulima ai lena tagata. E leai se soo faamaoni o Keriso e ta’uamiotonuina i le taofiofia o le alofa ona ua tonu ia te oe e faailoga faapena oe.

Na faamanatu mai e Peresitene Russell M. Nelson ia i tatou: “E i ai se aso o le a fesiligia ai oe pe na e tauaveina i ou lava luga le suafa o Keriso ma pe na e faamaoni i lena feagaiga” (“Identity, Priority, and Blessings,” Ensign, Auk. 2001, 10).

Sa aoao mai e Paulo: “Aua o outou uma lava ua papatisoina ia Keriso, ua outou oofu ia Keriso. “‘E le o i ai se Iutaia po o Eleni, e le o i ai se pologa po o se saoloto, e le o i ai se tane po o se fafine, aua ua tasi lava outou uma ia Keriso Iesu” (Kalatia 3:27–28).

E i ai se aso, i le iuga o lenei malga puupuu i la le tino, o le a tatou toe foi atu ai i le afioaga o o tatou Matua Faalelagi. E i ai se aso, o le a tofatumoanaina ai igoa uma i lo tatou faasinomaga e faavavau o ni fanau a le Atua.