Pe faatatau le ata o le faaolataga i faafafine/faafatama?

E I Ai se Fuafuaga a le Atua mo lo Tatou Fiafia.

O le fuafuaga a le Atua e atoatoa, tusa lava pe le atoatoa lo tatou malamalama o i ai nei i Lana fuafuaga. E ala i le Faaola o Iesu Keriso, e mafai ai ona tatou maua le faamoemoe ma le faamalologa e uiga i le mau luitau o le olaga.

E i ai se fuafuaga a le Atua mo lo tatou fiafia. Na Ia auina mai i tatou i le lalolagi e aoao ai mai o tatou tulaga. Na Ia auina mai i tatou iinei e fai ia filifiliga.

Sa tatou ola faatasi ma le Atua ae tatou te lei fananau mai. Sa tatou iloa o Ia, ma Na Te silafia i tatou. Na te silafia o tatou malosiaga ma vaivaiga, o a tatou miti ma o tatou atuatuvalega. O le olaga faitino o la tatou malaga patino lea o le toe iloaina o le Atua. Na te silafia o tatou gafatia silisili ma tagata e mafai ona latou avea ai. E sili atu i se isi lava mea, e alofa le Atua ia te i tatou (tagai i le 2 Nifae 2:25).

Atonu ua galo ia i tatou le taimi na tatou i ai faatasi ma le Atua, ae Na Te lei faagaloina lava i tatou. Ua Ia tofia perofeta e faamanatu mai ia i tatou le mafuaaga ua tatou i ai iinei ma le ala e avea ai e faapei o Ia (tagai i le Luka 11:49).

Ua tatou i ai iinei mo se faamoemoega poto. Na auina mai i tatou e le Atua i le taimi ma le nofoaga lenei. Sa Ia silafia luitau o le a tatou feagai, o filifiliga o le a manaomia ona tatou faia. O le a le faamalosia lava e le Atua se tasi o Ana fanau e usitai i Ana tulafono. E finagalo o Ia e filifili mo i tatou lava, pe o a lava o tatou tulaga, e aoao mai aafiaga ma avea ai e faapei ona i ai nei o Ia. Peitai, o le a le faamalosia lava e le Atua i tatou e usitai ia te Ia. (Tagai i le 2 Nifae 2:16.)

I le avea ai ma soo o Iesu Keriso, ua tatou aoao ai e faalogo i le Agaga ma savavali i le Malamalama o Keriso. E mafai ona tatou iloatino le mea e sa’o pe sese tusa lava po o a manaoga faaletino ma tofotofoga e feteenai ma mataupu faavae moni. Ma e ala i le filifilia o le mea tonu, tatou te malolosi atili ai. E i ai taimi e foliga mai o loo tatou fetaua’i i tatou lava, ae o le faatoilaloina o le faafeagai o se vaega o le fuafaga ina ia tatou malolosi atili ai. O le faafeagai e le o se mea e taugamalie, ae o se mea e tatau ai.

“E ao lava ina i ai se faafeagai o mea uma.” A leai, … e le mafai ona i ai le amiotonu po o le amioleaga po o le pa’ia po o le pagatia, po o le lelei po o le leaga” (2 Nifae 2: 11).

Pe a tatou agasala—ma e tatou te agasala uma lava—e mafai ona tatou salamo. O le faagasologa o le salamo e fesoasoani e faamama ai o tatou agaga ma e faatagaina ai ona tatou ola latalata i le Atua. O le salamo e le o se faasalaga. O se meaalofa, na faatau mai Ketesemane ma i luga o Kolokota e lo tatou Faaola o Iesu Keriso.

“A ua manuʼa o ia ona o a tatou solitulafono, ua momomo o ia ona o a tatou amio leaga; o le aoaiga sa filemu ai i tatou sa i ona luga lea; o ona faalavalava foi ua malolo ai tatou” (Isaia 53:5).

O le taulaga a lo tatou Faaola—lea tatou te faaigoaina o le Togiola a Iesu Keriso—ua le na o se totogi mo a tatou agasala. E mafai ona tatou liliu atu i le Faaola e faamalolo ai o tatou loto, e faamalolosia ai o tatou agaga, e maua ai le filemu. E mafai ona tatou faataatia a tatou avega i Ona aao, ma o le a Ia amoina. O Ia o lo tatou Faaola. Na te silafia i tatou.

“Na te ave foi o latou vaivai i ona luga, ina ia faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausi a’i lona nuu e tusa ma o latou vaivai” (Alema 7:12).