Afai e lava lo’u faamaoni, pe o le a alu ese ea lo’u tosina atu i le itupa e tasi?

O le malosi o lagona o le tosina atu i le itupa e tasi e le o se fuataga o lou faamaoni. E toatele tagata e tatalo mo tausaga e tele ma faia mea uma latou te mafaia e usiusitai ai, i se taumafaiga e faaitiitia ai le tosina atu pea i le itupa e tasi ae e tosina pea lava i le itupa e tasi. O le tosina atu i le itupa e tasi e eseese vaega o malosiaga e lagonaina ai ma e le tutusa mo tagata uma. O nisi e tosina atu i itupa uma e lua, ae o isi e matua tosina atu lava i le itupa e tasi. Mo nisi, o lagona o le tosina atu i le itupa e tasi, po o le malolosi foi o na lagona, e mafai ona faaitiitia i le aluga o taimi. I soo se tulaga lava, o se taunuuga ina ia suia le tosinaga e le tatau ona faamoemoeina pe poloaiina e matua po o taitai.

O le malosi o lagona o au tosinaga atonu e le mafai ona e puleaina; peitai, e mafai ona e filifili le auala e te tali atu ai. O le ole atu i le Alii po o le a se mea e mafai ona e aoaoina mai lenei aafiaga e mafai ona faataulai atu ai lou faatuatua i se taunuuga e mafai ona e puleaina. O le tuuina atu o lou olaga i le Atua o se faatinoga taua lea o le faatuatua lea e oo mai ai faamanuiaga maoae i le taimi nei ma e oo lava foi i faamanuiaga maoae atu i le lalolagi a sau.