Pe alofa ea le Atua ia te au?

E Alofa Atoatoa le Atua ia Te Outou

Na faamatala mai e Peresitene Dieter F. Uchtdorf le alofa o le Atua:

“E le vaai le Atua i le tino. Ou te talitonu e matua le popole lava o Ia pe tatou te nonofo i se fale tioata po o se faleoo, pe tatou te aulelei pe le aulelei, pe tatou te lauiloa pe le amanaiaina. E ui ina tatou le atoatoa, ae atoatoa le alofa o le Atua ia i tatou. E ui ina i ai o tatou faaletonu, ae e tonu a’ia’i le alofa o le Atua ia i tatou. E ui atonu tatou te lagona ua tatou se ma leai se faasinoala, ae siomia atoa lava i tatou i le alofa o le Atua.

“E alofa o Ia ia te i tatou aua ua tumu o Ia i se fuataga e le uma o le alofa paia, mama, ma le le mafaamatalaina. E taua i tatou i le Atua, e le ona o talaaga o o tatou tomai ae ona o tatou o Ana fanau. E alofa o Ia ia i tatou uma taitoatasi” (“O Le Alofa o le Atua,” Liahona, Nov. 2009, 22–23).

E alofa le Atua ia i tatou uma. E alofa o Ia ia i latou o faatuatuaga eseese ma i latou e aunoa ma se faatuatua. E alofa o Ia ia i latou ua mafatia. E tutusa Lona alofa i e mauoa ma e matitiva. E alofa o Ia i tagata o ituaiga uma ma aganuu, o e ua faaipoipo po o e nofotoatasi, ma i latou ua lagona le tosina atu i le itupa e tasi pe ua faailogaina o se tane e tosina atu i se tane (gay), po o se tamaitai e tosina atu i se tamaitai (lesbian), pe e tosina atu i itupa uma e lua (bisexual). Ma ua faamoemoeina i tatou e le Atua ia mulimuli i Lana faataitaiga.

Na Ofoina Mai e le Atua Lona Alo mo Outou

“Aua ua faapea lava ona alofa mai o le Atua i le lalolagi, ua Ia aumai ai Lona Alo e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16).

E leai se isi mea e sili atu ona faaalia atoatoa ai le loloto ma le lautele o le alofa o le Atua nai lo Lona finagalo ia ositaulagaina Lona Alo ina ia mafai ai e i tatou, o Ana fanau, ona faatoilaloina le oti ma ofo mai ai le ola e faavavau.

E leai se isi mea e sili atu ona faailoa ai le alofa o Iesu Keriso nai lo Lona finagalo ia foai mai Lona soifua e togiola mo agasala a tagata, ia totogi mo mafatiaga ma amioletonu uma, ma motusia ai noataga o le oti mo tagata uma (tagai i le Alema 7:11–13).