Aisea e le tali mai ai e le Atua a’u tatalo?

E Faafofoga le Atua i A’u Tatalo

E ono foliga mai e faapito’au le olaga i nisi taimi. E ono foliga mai e le o taliina a tatou tatalo ma le loto faamaoni. E ono foliga mai e peiseai tatou te le o maua le atoaga o avanoa ma faamanuiaga laualuga a le Atua. Ae e leai se tatalo faamaoni e le o faafofogaina mai. O le a faataunuu e le Alii Ana folafolaga uma lava. E leai se faamanuiaga o le a taofia mai Ana fanau e tutumu i le faatuatua. O lo tatou gafatia paia o le mafai lea ona ola o ni aiga e faavavau ma faapei o o tatou Matua Faalelagi.

O nisi taimi o o tatou masalosaloga, popolega, ma atugaluga e ono foliga mai ua lofituina. E mafai e le olaga ona faatu mai ni fesili faigata ma tuuina mai ni faalavefau matuia. Ina ia i ai le faatuatua e le o le maua uma lea o tali, ae peitai o le filifilia o le faatuatua nai lo le masalosalo, o se filifiliga lea e faalagolago i le Atua. Tatou te filifili e faalagolago i Lana fuafuaga ma Lana lisi o taimi, tusa lava pe o nisi vaega o lo tatou aafiaga faaleolaga nei e leai se uiga ia i tatou i le taimi nei. A tatou tuu lo tatou faatuatua ma le faalagolago i le Atua ma maua le onosai e fausia ai lo tatou faatuatua i lea aso ma lea aso, e iu lava ina tatou vaaia ma le manino mea. (Tagai i le 1 Korinito 13:12.)

O le vaai ma le manino e le o se mea e tupu. O se faagasologa. E atili manino la tatou vaai pe a tatou faataunuuina lo tatou gafatia o ni fanau a le Atua. A o le a foi lo tatou gafatia? Afai tatou te faia le mea aupito sili e tausia Ana poloaiga, ua uma ona Ia folafola mai le olioli e faavavau—le olioli moni, tumau.