Vahe 11
Ko e Ngaahi Koloa Mahuʻinga Lahi ʻo e Temipale Māʻoniʻoní
Te tau lava fēfē ʻo teuteuʻi lelei ange kitautolu ke maʻu ʻa e ngaahi tāpuaki ʻo e temipalé pea ʻoatu e ngaahi tāpuaki ko ʻení ke ʻinasi ai ha niʻihi kehe?
Talateu
ʻI Māʻasi ʻo e 1956, ʻi hono tāpuakiʻi mo fakatapui ʻo e Temipale Losi ʻEniselesi Kalefōniá, naʻe toe fai ai ʻe Palesiteni Hāloti B. Lī ha talanoa ʻa ha tamai ki hano foha ʻa ia naʻe vaheʻi ke ne puna ʻo fai ha ngaahi ngāue faingataʻa lolotonga ʻe taú.
“Naʻe pehē ange [ʻe he] tamaí kiate ia, ʻHoku foha, naʻá ke lava fēfē ʻo toe foki lelei mai ki he feituʻu naʻa mou nofo faka-kautau aí… ?’ Naʻe pehē ange ʻe he tamasiʻí, ʻTangataʻeiki, ko e meʻa faingofua pē ia. Ko ʻeku puna fakatatau pē ki he fakaʻilongá.ʻ Ka naʻe toe fehuʻi atu pē ʻe he tamai ko ʻení, ʻFēfē kapau naʻe ʻikai ke ke ʻiloʻi e fakaʻilonga atú pea fehālaaki ha faʻahinga meʻa he nāunau fakalētioó ʻoku ako ʻa e tokotaha pailaté ke ne ʻiloʻi ai ʻa hono halá.ʻ Naʻá ne pehē ange ʻe ia, ʻTe u fakaʻaongaʻi ʻe au ʻeku kāpasá.ʻ ʻKo e hā e meʻa ʻe hokó kapau ʻe fai atu ha fana ʻo maumau ai ʻa e kāpasá?’
“Naʻe [fakakaukau] fakalelei ʻa e tamasiʻí peá ne toki pehē ange, ‘Tangataʻeiki, te u kamata leva ke fakapuna ke toe mā- ʻolunga ange hoku vaká ke mavahe hake ia mei he ngaahi ʻahu mo e kakapu ʻo e māmaní kae ʻoua leva pē ke u aʻu ki he feituʻu te u lava ke mamata ai ki he ngaahi fetuʻú, pea ko ʻene māʻolunga pehē pē ʻeku puná, te u ngāue ʻaki e ngaahi fetuʻú ke fakahinohino hoku halá. Kuo teʻeki ai ke hala ia pea te u lava pē ʻe au ʻo ʻilo hoku hala ke u foki mai ai ki ʻapí.’ “
Naʻe hoko atu ʻa e lea ʻa Palesiteni Lií: “ʻI he māmaní ʻi lalo heni ʻi tuʻa ia mei Hono ʻafioʻanga māʻoniʻoní, ʻoku ʻi ai e ngaahi meʻa ia ʻoku lava ke fakatau ʻaki ʻa e paʻangá, ʻoku ʻi ai ʻa e ngaahi meʻa ʻoku tau ui ko e ngaahi fakalāngilangi ʻa e tangatá pea mo e ngaahi meʻa ʻoku tau feinga ke maʻu mai pea tau pehē ko e ngaahi meʻa mahuʻinga tahá kinautolu. Ka [ko e temipalé] ʻa e feituʻu ʻoku tau kaka hake ai ʻo mavahe hake mei he ʻahu pea mo e kakapu ʻo e ngaahi meʻa fakamāmani ko ʻ ení pea tau ako ai ke tau ʻilo ʻa e ngaahi fetuʻu te nau fakahinohino ʻa e hala te ne tataki atu kitautolu ke tau toe foki hao atu ai ki ʻapi.”1
Ngaahi Akonaki ʻa Hāloti B. Lií
Ko e hā e ngaahi tāpuaki ʻoku lava ke tau maʻu ʻi he fale ʻo e ʻEikí?
ʻI heʻeku fakakaukau atu ki aí, ʻoku tau haʻu [ki he temipalé] ke maʻu ʻa hono kakato ʻo e ngaahi tāpuaki ʻo e Lakanga Fakataulaʻeikí. …
ʻOku tau haʻu ki he Fale Toputapu ko ʻení ke tau ako ai ke ʻilo ʻa e ʻOtuá ʻi hono totonú, pea mo e founga te tau takitaha lava ai ʻo maʻu maʻatautolu ha hakeakiʻi ʻi hono ʻafioʻangá. …
Ko e feituʻu ʻeni ʻoku tau kamata ai hono fakatoka ʻo e ngaahi makatuʻunga ʻo ha ʻapi fakalangi taʻengata, he ko e Siasi ʻeni ʻoku ʻi ai ʻa e mālohi ke nonoʻo ʻi he māmaní ʻa e meʻa tatau pē ko ia ʻe lava ke fakamaʻu ʻi he Langí.2
Kuo pau pē ke ʻi ai e founga ke tau fakaaʻu ai ki hotau kakaí hono kotoa, ʻa e talavou mo e toulekeleka, ʻoku ʻi hotau ngaahi temipale toputapú ʻa e enitaumeni fakatemipalé ʻa ia ko e fakahinohino pau taha ia ke maʻu ai ʻa e fiefiá ʻi heni pea ʻi he moʻui taʻengata ʻi he maama ka hoko maí.3
Ko e taimi ʻokú ke hū ai ki ha temipale toputapu, ʻokú ke ʻi he hala ai ke ke feohi mo e Kau Māʻoniʻoni ʻi he puleʻanga taʻengata ʻo e ʻOtuá, ʻa ia ʻoku ʻikai ke kei lau ai ʻa e taimí ia. ʻOku ʻikai ngata pē hono fakakoloaʻi kimoutolu ʻi he ngaahi temipale ʻo e ʻOtuá ʻaki ʻa e koloa tukufakaholo fakamāmani lahi, kae ʻaki foki ʻa e ngaahi koloa taʻengata ʻoku taʻe hano tatau hono mahuʻingá.
ʻOku fokotuʻutuʻu ʻa e ngaahi ouau ʻo e temipalé ʻe ha Tamai Hēvani poto ʻa ia kuó Ne ʻosi fakahā mai kia kitautolu ʻa e ngaahi ouaú ni ʻi he ngaahi ʻaho fakaʻosí ni ke hoko ko ha fakahinohino pea mo ha maluʻi ʻi hono kotoa ʻo ʻetau moʻuí, koeʻuhí ke ʻoua naʻá ta taʻe lava ke maʻu ʻa e hakeakiʻi ʻi he puleʻanga fakasilesitialé, ʻa ia ʻoku ʻafio ai ʻa e ʻOtua mo Kalaisi.
ʻOfa ke mou feinga faivelenga pea ke fakahinohino ʻa kimoutolu ke mou teuteu ke maʻu ʻa e ngaahi koloa mahuʻinga lahi ko ʻení ʻi he fale ʻo e ʻEikí.4
ʻOku tau maʻu ha faʻahinga fakahā ʻe ua. ʻOku ʻi ai e ngaahi fakahā ʻe lava pē ke tau pehē ko e ngaahi fakahā ʻoku ʻatā pē, hangē ko e ngaahi fakahā ko ia ʻi he Tokāteline mo e Ngaahi Fuakavá mo e ngaahi feituʻu kehe pē, ʻa ia ʻoku lava ia ke ʻoatu ki he māmaní. Pea ʻoku ʻi ai leva mo e meʻa te tau pehē pē ko e ngaahi fakahā ʻoku ʻikai fakahā holo. Ko e ngaahi fakahā ko ʻení ʻoku toki talanoaʻi pe foaki pē ia ʻi he ngaahi feituʻu toputapu kuo teuteuʻi ki hono fakahā ʻo e ngaahi ouau mahuʻinga taha ʻoku ʻa e Lakanga Taulaʻeiki Faka-ʻĒlone mo e Faka-Melekisētekí, pea ko e ngaahi ouau ko iá ʻoku nau ʻi he fale ʻo e ʻEikí.5
ʻI he konga ki muʻa ʻo e 1841, naʻe fakahā ai ʻe he ʻEikí kia Siosefa Sāmita “ʻoku ʻikai ke ʻiloa ʻi māmani ha potu ke ne haʻu ki ai mo toe fakafoʻou mai kia kimoutolu ʻa e mole naʻe molé, pe ko e meʻa ʻa ia kuó ne ʻavé, ʻa ia ko hono kakato ʻo e lakanga fakataulaʻeikí. …
“He ʻoku ou loto ke fakahā ki hoku siasí ʻa e ngaahi meʻa ʻa ia kuo fufuuʻi talu mei muʻa ʻi he teʻeki ai ke fokotuʻu ʻa māmaní, ʻa e ngaahi meʻa ʻoku kau ki he kuonga ʻo e kakato ʻo e ngaahi kuongá.” T&F 124:28, 41.)
ʻOku maʻu ʻi he ngaahi fakahā ko ʻení, ʻa ia ʻoku tuku fakatatali ke toki akoʻi pē ki he kāingalotu faivelenga ʻo e Siasí ʻi he ngaahi temipalé, ʻa e meʻa ʻoku ui ko e “ngaahi meʻa lilo ʻo e anga faka- ʻOtuá.” Naʻe folofola ʻa e ʻOtuá kuó Ne ʻosi foaki kia Siosefa ʻa e “ngaahi kī ʻo e ngaahi meʻa liló, pea mo e ngaahi fakahā kuo fakamaʻú. …” (T&F 28:7.) Kuo talaʻofa ʻe he ʻEikí ko ha fakapale kia kinautolu ʻoku faivelenga: “Pea te u fakahā kiate kinautolu ʻa e ngaahi meʻa lilo kotoa pē, ʻio, ʻa e ngaahi meʻa lilo fufū kotoa pē ʻo hoku puleʻanga, ʻo fai mai mei he ngaahi ʻaho fuoloá. … (T&F 76:7.)
ʻOku maʻu ʻi he ngaahi meʻa naʻe tohi ʻe he Palōfita ko Siosefa Sāmitá hano fakamatalaʻi ʻo e ngaahi meʻa lilo ko ʻeni ʻoku lau ki aí ʻa ia ʻoku kātoi ia ʻi he meʻa ʻoku lau ki ai ʻa e Palōfitá ko e ʻenitaumeni toputapú. Ko e konga ʻeni ʻo ʻene leá:
“Naʻá ku fakamoleki ʻa e ʻaho ko iá ʻi he loki ki ʻolunga he falekoloá ʻa ia ko hoku ʻōfisí, ʻi ha fakataha alēlea mo [naʻá ne hanga leva ʻo fakalau mai ʻa e ngaahi hingoa ʻo e tokolahi ʻo e kau taki ʻi he kamata ʻa e Siasí], ʻou fakahinohino kinautolu ʻi he ngaahi tefitoʻi moʻoni pea mo e fokotuʻutuʻu ʻo e Lakanga Fakataulaʻeikí, ʻou tokanga ki he fufulú mo e paní, ngaahi ʻenitaumení pea mo e fehokotaki ʻa e ngaahi kī ʻoku kau ki he Lakanga Taulaʻeiki Faka-ʻĒloné, pea hokohoko atu ai ki he fokotuʻutuʻu māʻolunga taha ʻo e Lakanga Taulaʻeiki Faka- Melekisētekí, mo fakahā ange ʻa e fokotuʻutuʻu ʻo kau ki Muʻa ʻi Muʻa ʻi he Ngaahi ʻAhó, pea mo e ngaahi palani mo e ngaahi tefitoʻi moʻoni kotoa ko ia ʻoku lava ai ʻe ha taha pē ke ne maʻu ʻa hono kakato ʻo e ngaahi tāpuaki kuo ʻosi teuteuʻi mai moʻo e Siasi ʻo e ʻUluaki Fānaú, pea ke ne ʻalu hake ai ʻo nofo ʻi he ʻafioʻanga ʻo ʻElohimí ʻi he ngaahi maama taʻengatá.” (Teachings of the Prophet Joseph Smith, p. 237.)
Naʻe toe fakalahi mai ʻe Palesiteni Pilikihami ʻIongi ʻa e fakamaama ko ʻeni ki hono ʻuhinga ʻo e ʻenitaumení pea mo hono taumuʻa ʻo e langa temipalé ʻi heʻene fekauʻaki mo iá, ʻi heʻene fakatoka ʻa e maka-tuliki ʻo e Temipale Sōlekí:
“. …Koho ʻenitaumení ke maʻu kotoa ʻa e ngaahi ouau ko ʻení ʻi he fale ʻo e ʻEikí, ʻa ia ʻoku ʻaonga ia kiate koe hili hoʻo mavahe atu mei he moʻuí ni, ke ke lava ai ʻo toe foki atu ki he ʻafioʻanga ʻo e Tamaí, ʻo ke fakalaka atu ʻi he kau ʻāngelo leʻó. … pea maʻu ʻa ho hakeakiʻi taʻengatá neongo ʻa e māmaní mo heli.” [Discourses of Brigham Young, filifili ʻe John A. Widtsoe (1954), 416.]6
Ko e hā e founga te tau lava ʻo hoko ai ko ha “kau fakamoʻui ki he Moʻunga ko Saioné” maʻanautolu kuo pekiá?
Kapau ʻoku fuʻu mahuʻinga hono tali ʻo e ongoongoleleí ki he lelei ʻa e laumālie taʻengata ʻo e tangatá, te ke fehuʻi mai pe ko e hā koā e meʻa ʻe hoko ki he lau miliona kuo nau pekia teʻeki ai haʻanau ʻilo ki he ongoongoleleí pe ko e palani ʻa e ʻEikí, ʻa ia ʻe ʻaonga kakato ki ai ʻa e fakalelei kuó ne fakahokó. Kapau naʻe fakangatangata pē ʻa e ngāue fakafaifekaú ki māmani, ʻe tokolahi ʻaupito ʻa e ngaahi laumālie ia ʻe fakamalaʻiaʻi taʻe ʻi ai hanau faingamālie. ʻE toe tuʻu ʻa e tokotaha kotoa pē, pe ʻokú ne angalelei pe anga-kovi, koeʻuhi pē ko e fakaleleí, “he ʻoku hangē ʻoku mate kotoa pē ʻia ʻĀtamá, ʻe pehē foki ʻe moʻui kotoa pē ʻia Kalaisi.” (1 Kolinitō 15:22.) Ka ʻe ngata pē ʻiate kinautolu ʻoku fakatomala pea papitaiso ki he fakamolemole ʻo ʻenau ngaahi angahalá ʻe ʻaonga kakato kia kinautolu ʻa e taʻataʻa huhuʻi ʻo ʻene fakaleleí. … Ko e ouau fakamāmani pē ʻa e papitaiso ʻi he fakauku ki he fakamolemole ʻo e ngaahi angahalá, ʻa e founga pē ʻe taha ʻe lava ke tali ai ʻe he tangatá ʻa e ongoongoleleí, ko ia kuo hanga ai ʻe heʻetau Tamaí ʻi he Palani ʻo e Fakamoʻuí ʻo fakakaukauʻi tatau kotoa pē ʻa ʻene fānaú ʻo Ne ʻomai ai ha founga ke hoko ai ʻa e kāingalotu kotoa ʻo hono Siasi mo hono Puleʻanga ʻi he māmaní ko e “kau fakamoʻui ki he Moʻunga ko Saioné” ʻaki ʻenau fakahoko ʻa e ngaahi ngāue fakafofonga maʻanautolu ʻoku nau ʻi he maama ʻo e ngaahi laumālié, ʻa e fale fakapōpulá, ʻa ia ʻoku ʻikai ke nau lava ke fakahoko maʻanautolu peé.
ʻOku hanga ʻe he ngāue ko ʻeni ʻoku fai ʻ e he kāingalotu ʻo e Siasí maʻá e kakai pekiá ʻi he ngaahi temipale toputapú ʻo ngaohi kinautolu ke nau hoko ko e “kau fakamoʻuí” kia kinautolu kuo nau pekia ʻoku teʻeki ai ke nau ʻilo ki he ongoongoleleí, he te nau maʻu ʻa e meʻa-foaki kakato naʻe talaʻofa ʻaki ʻe he Fakamoʻuí ki he faʻahinga ʻo e tangatá ʻo fakafou ʻi heʻene fakaleleí. Naʻá ne lea ʻo kau ki he ngāue tokoni ko ia ʻe lava ke fai maʻanautolu ʻi he maama ʻo e ngaahi laumālié ʻo hangē pē ko e ngāue ko ia naʻe fakahoko ʻe he kāingalotu ʻi he ngaahi ʻaho ʻo e ʻAposetolo ko Paulá pea ʻoku tau lava ke fakahoko he taimí ni maʻa hotau kau pekiá, pea naʻá ne lea ʻaki ʻeni ko e fakamoʻoni ki he toetuʻú. Naʻá ne folofola ʻo pehē: “Kae ʻikai, pea ko e hā ʻe fai ʻe kinautolu kuo papitaiso ki he maté ʻo kapau ʻe ʻikai ʻaupito toe tuʻu ʻa e maté?” (1 Kolinitō 15:29.) Kuo langa ʻa e ngaahi temipalé he ʻahó ni koe- ʻuhí ke toe lava ʻo fakahoko ʻa e ngāue ko ʻeni ʻoku mātuʻaki fuʻu mahuʻinga ki he ngāue ʻo e fakamoʻuí.7
Naʻe folofola [ʻa e ʻEikí] ʻo pehē ʻe ʻikai lavaʻi ʻe he ngaahi matapā ʻo hētesí ʻa e siasi ʻo Kalaisí (Mātiu 16:18). Naʻe mei lavaʻi pē ʻe he ngaahi matapā ia ʻo hētesí ʻa e ngāue ʻa e ʻEikí ʻo kapau naʻe ʻikai foaki mai ʻa e ngaahi ouau ʻoku kau ki hono fakamoʻui ʻo kinautolu kuo nau pekiá. Lolotonga ʻa e ngaahi taimi naʻe ʻikai ke ʻi he funga ʻo māmaní ai ʻa e lakanga fakataulaʻeiki ke fakahoko ʻaki ʻa e ngaahi ouau fakamoʻui ʻo e ongoongoleleí, naʻe lau miliona ʻa e kakai naʻa nau moʻui aí, pea ko honau tokolahi ko e kakai anga-tonu. Kapau naʻe ʻikai ha founga ʻe lava ke fakahoko ai ʻa e ngaahi ouau fakamoʻui ʻo e ongoongoleleí maʻanautolu naʻa nau mate ʻoku teʻeki ke nau ʻiloʻi ʻa e ongoongoleleí, naʻe mei lavaʻi ʻe he ngaahi matapā ʻo hētesí ʻa e palani ʻo e fakamoʻui ʻa ʻetau Tamaí.8
[ʻI heʻetau fekumi fakatohi-hohokó] ʻe ʻikai fakaava ʻe he ʻEikí ia ha matapā kae ʻoua pē kuo tau ʻosi fai kotoa ʻa e ngaahi meʻa te tau lavá. Kuo pau ke tau ʻalu kitautolu ke tau aʻu ki he holisi ʻoku ngata mei aí pea tau maʻu ʻa e tui feʻunga ke tau toki kole ke tokoni mai ʻa e ʻEikí ʻi hono fakaava hake ʻa e holisí ka tau toe hoko atu. Pea ʻoku ʻi ai pē ʻa e ngaahi fakamatala ia ʻe lava ke ke maʻu mei he ngaahi maʻuʻanga tokoni te nau fakahā mai ʻa e foʻi moʻoni ko ia ʻoku ʻikai mamaʻo mei heni ʻa e langí mo māmani.
Kuo moʻui hamou tokolahi ʻo aʻu mai ki ha taimi kuo ʻosi mālōlō atu ai hamou ngaahi ʻofaʻanga. Kuo mou ʻiloʻi fakapapau he taimi ʻe niʻihi ʻa kinautolu kuo nau haʻu ʻo fuʻu ofi mai ʻaupito kia kimoutolu. Pea naʻe ʻi ai e ngaahi taimi ne nau ʻomi ai ha ngaahi fakamatala kia kimoutolu naʻe ʻikai ke mou mei maʻu ʻe kimoutolu mei ha toe feituʻu kehe.9
ʻOku ou ʻiloʻi fakapapau mei ha meʻa ne u aʻusia pea ʻoku ou fakamoʻoni ai ʻoku ʻi ai ʻa e ngaahi ivi mei ha feituʻu ʻoku ʻikai ʻo e māmaní ia ʻoku nau ngāue mo kitautolu. ….
ʻOku ou tui ko e taimi ko ē kuó mou fai ai ʻa e meʻa kotoa pē te mou lavá, ʻo mou fai hoʻomou fakatotoló ke aʻu ki he faingamālie fakaʻosi taha ʻokú mou maʻú, ʻe tokoniʻi kimoutolu ʻe he ʻEikí ke fakaava hake ha ngaahi matapā ke toe hoko atu ki ai hoʻomou ngaahi tohi-hohokó, pea ʻoku ou ʻilo fakapapau ʻe kau mai ai ʻa langi.10
Kapau ʻoku tau fāitaha ʻi heʻetau ngāue fakatemipalé pea ʻi heʻetau fakatotolo fakatohi-hohokó, ʻe ʻikai ke tau fiemālie pē ʻi he ngaahi temipale ʻoku tau lolotonga maʻú, ka te tau maʻu ha ngāue feʻunga ke fai ʻi he ngaahi temipale ko ia ʻoku toe ke langá, ke tau fakaava hake ʻa e ngaahi matapā ʻo e faingamālié kia kinautolu ko hotau kāinga ʻi he tafaʻaki ʻe tahá, ʻo tau hoko ai ko e kau faka moʻui ki he Moʻunga ko Saioné. Kapau ʻe ʻikai ke tau fāitaha ʻe ʻikai lava ke tau fakatolonga ʻa hotau ngaahi ʻapi fakafāmili ʻi he taʻengatá.11
Te tau lava fēfē ʻo toe teuteuʻi lelei ange kitautolu ke tau kau ʻi he ngaahi tāpuaki ʻo e temipalé?
ʻI hono fakahoko ʻo e ngāue fakafofonga ko ʻeni ʻoku fai ʻe hotau niʻihi ko e kau fakamoʻui ki he Moʻunga ko Saioné, ʻoku finangalo ʻa e ʻEikí ke fakahoko ia ʻe kinautolu ʻoku ofi taha ki he ʻikai hanau ʻilá. Naʻe tatau pē ʻa ʻene finangalo ke ʻoua naʻa ʻi ai ha ʻila ʻo e fanga manu ko ia naʻe fai ʻaki ʻa e feilaulaú mo ʻene finangalo ko ia ke tau haʻu kuo tau haohaoa mo maʻa pea taau mo feʻunga ke fakahoko e ngāué, ʻa e ngāue fakafofongá, ko e kau fakamoʻui ki he Moʻunga ko Saioné.
Ko ia ai kuo mau ʻosi faleʻi ʻa hotau kau pīsopé mo hotau kau palesiteni siteikí ke nau mātuʻaki tokanga ʻaupito ʻi hono teuteuʻi ʻa honau kakaí ke nau mateuteu atu ke maʻu ha lekomeni pea ʻoua naʻa tuku ʻa kinautolu ʻoku teʻeki ai ke nau fakatomala mei heʻenau ngaahi angahalá, ʻa kinautolu kuo ʻi ai haʻanau ngaahi fehalākí, ke nau haʻu ki heni ʻoku teʻeki ai ke nau fakatomala, ʻo nau fakaʻuliʻi ai ʻa e fale toputapu ko ʻení. ʻOku ou pehē ʻe ʻikai ha toe meʻa fakamamahi ange ʻi he māmaní ka ko ha taha ʻoku haʻu ki heni ʻo fuʻu ofi ki he ʻafioʻanga ʻo ʻetau Tamaí lolotonga ko iá ʻoku kei ongoʻi pē ʻe he tokotaha ko iá ʻa e loto halaia mo ʻene taʻe maʻá. Ko ha toki meʻa fakatupu maumau mo fakamamahi moʻoni ia.12
Mahalo ko e feituʻu toputapu ofi taha ki he langí ʻi māmaní ko hotau temipalé, pea ʻi heʻene peheé leva ke tau ʻalu ki ai ʻoku ʻikai ke tau ʻuli pea ke vakaiʻi fakalelei ʻe heʻetau kau pīsopé mo ʻetau kau palesiteni siteikí ʻa kinautolu kotoa pē ʻoku fie maʻu haʻanau ngaahi lekomení ke sio ʻoku nau moʻui ʻaki ʻa e ngaahi tuʻunga ʻulungāanga pau [koeʻuhí ke ʻoua naʻa nau haʻu] ki ai ʻoku nau kei ʻuli ʻo ʻuliʻi ai ʻa e laumālie ʻoku tau fakaʻamu ke maʻu ʻi aí.
Mou manatuʻi leva ia he taimi ni. Manatuʻi ʻa hotau ngaahi fatongia toputapú pea mo ʻetau fakaʻamu ange ko ia te tau kamata ke fakapapauʻi ko e taimi kotoa pē ʻoku tau ʻalu ai ki he temipalé ʻoku tau ʻalu atu mo e ngaahi nima ʻoku maʻa pea mo e ngaahi loto ʻoku haohaoa pea ke tau akoʻi foki ʻ eni ki he niʻihi kehé. Vakai ki he Saame 24:3–4.]13
ʻOku ʻi ai hatau niʻihi ʻoku nau loto ke nau hū ʻi he temipalé ʻi he hili pē ha taimi nounou mei honau papitaisó. Ko ha tuʻutuʻuni fuoloa pē ia. … ʻoku tala mai ai ʻoku totonu ke ʻosi ha taʻu ʻe taha. …. Ko hono ʻuhinga ʻoku tau pehē ai ke ʻosi ha taʻu ʻe tahá ko e ʻamanaki ko ia ʻe fakaʻekeʻeke fakalelei ʻe he kau pīsopé mo e kau palesiteni siteikí kinautolu ke fakapapauʻi kuo fuoloa feʻunga ʻenau kau mai ki he Siasí ke nau tuʻu maʻu ʻi he ngaahi tefitoʻi moʻoni ʻo e ongoongoleleí pea nau ʻiloʻi ʻa e ngaahi tefitoʻi tokāteline ʻa e Siasí pea tau toki ʻamanaki atu ʻe mahino kia kinautolu ʻa e ngaahi ouau ʻoku toe māʻolunga angé, ʻa e ngaahi ouau ko ia ʻ o e temipalé. Ko e fehuʻi leva maʻanautolu ʻoku nau hū ki he temipalé, ʻoku ʻikai ngata pē ʻi heʻenau taau mo feʻungá ka ke nau mateuteu atu foki ke maʻu ʻa e ngaahi ouau ʻo e temipalé.14
ʻOku fie maʻu ki hono maʻu ʻo e ʻenitaumení hono fua ʻo e ngaahi fatongiá ʻaki hono fai ʻo e ngaahi fuakava ʻa ia ko hono fakatahaʻi ia pe ko hono fofola mai ʻo e ngaahi fuakava naʻe totonu ke ʻosi maʻu ʻe he tokotaha takitaha ʻi hono papitaisó, ʻo hangē ko hono fakamatalaʻi ʻe he palōfita ko ʻAlamaá ʻo pehē “ko e meʻa ʻi hoʻomou fie hū ki he lotoʻā ʻo e ʻOtuá pea ui ʻa kimoutolu ko hono kakaí, pea ʻoku mou loto ke fefua ʻaki ʻa hoʻomou ngaahi kavengá, koeʻuhi ke nau maʻamaʻa; ʻIo, pea ʻoku mou loto ke tangi fakataha mo kinautolu ʻoku tangí, ʻio, pea fakafiemālieʻi ʻa kinautolu ʻoku ʻaonga ki ai ʻa e fakafiemālié, pea tuʻu ko e kau fakamoʻoni ʻo e ʻOtuá ʻi he kuonga kotoa pē pea ʻi he meʻa kotoa pē, pea ʻi he feituʻu kotoa pē te mou ʻi ai, ʻo aʻu ki he mate” (Mōsaia 18:8–9). Ka ʻi ai ha kakai ʻoku [nau] mateuteu ke fua ʻa e ngaahi fatongia ko ʻeni naʻe lea ki ai ʻa ʻAlamaá pea “ nau fakavaivaiʻi ʻa kinautolu ʻi he ʻao ʻo e ʻOtuá. … ʻo nau ō mai mo e loto mafesifesi mo e loto fakatomala… ʻo nau loto fiemālie ke toʻo kia kinautolu ʻa e huafa ʻo Sīsū Kalaisí, pea kuo fakapapau honau lotó ke tauhi kiate ia ʻo aʻu ki he ngataʻangá” (T&F 20:37), ʻoku ʻikai fie maʻu ke nau toe lotolotoua kinautolu ke hū ki ha temipale toputapu ʻo maʻu ʻa e ngaahi talaʻofa, ʻa ia ʻoku fekauʻaki mo e ngaahi fuakava kuo nau faí, mo e ngaahi tāpuaki mahuʻinga ʻoku makatuʻunga mei hono tauhi ʻo e ngaahi fuakava ko iá.15
Ko e hā leva e founga kuo pau ke tau teuteu ai [ke haʻu ki he temipalé?] Naʻe hiki ʻe ha tangata tā tongitongi ʻi he ngaahi tuʻunga malanga ʻo e Temipale Katisoni ʻAlapetá ʻa e fakamatala mo e fakakaukau naʻe fai ʻe ʻEletā ʻOasoni W. Uitenī kuo pekiá, ʻa ia ʻoku totonu ke tau hanga ʻo manatuʻi. Naʻá ne tohi:
“Kuo pau ke maʻa ʻa e lotó kae toki hū mai ʻi he ngaahi holisí ni,
ʻA ia ʻoku fonu ʻi he meʻakai fakalaumālie ʻoku ʻikai maʻu ʻi he māmaní.
Ke toʻo ʻi he tauʻatāina he ne foaki tauʻatāina ʻe he ʻOtuá
ʻO ʻahiʻahiʻi e fiefia taʻengata ko e tala ʻo langi ná.
Ako heni kiate Ia kuó ne ikunaʻi ʻa e faʻitoká,
Pea foaki ki he tangatá e ngaahi kī ʻo e Puleʻangá;
Kuo nonoʻo heni ʻe he mālohi ʻo e kuohilí mo e lolotongá
Ke haohaoa ʻa e kakai moʻuí mo kinautolu ʻa e kau pekiá.”
Naʻe mahino kia Palesiteni Siosefa F. Sāmita ʻa e fakapulipuli ʻo e tuʻunga haohaoa ko iá ʻi heʻene pehē: “ʻOku ʻikai faingofua ki he tangatá ke tuku ange ʻenau ngaahi fielahí, ke ikunaʻi ʻa ʻenau ngaahi mahalo ne tomuʻa fakakaukauʻí, pea mo tukulolo ʻaki honau lotó mo e laumālié ki he finangalo ʻo e ʻOtuá ʻa ia ʻoku mā- ʻolunga ange maʻu pē ia ʻi heʻenau ngaahi fakakaukaú. … Ko e taimi pē ʻoku ʻiloʻi ai ʻe he kakai tangatá mo e kakai fefiné ʻoku nau aʻu ki ha ngaahi tuʻunga fakatuʻutāmaki ʻe iku ʻo nau tō ai, ʻoku totonu ke nau holomui mei ai, he ko e moʻoni ko e hala ko ia ne nau fou mai aí te ne tataki atu kinautolu ke nau toe mamaʻo ange ai mei he hala ʻoku nau loto ke nau fononga atu aí pea ʻoku ʻikai faʻa faingofua ʻa e toe foki mai ki aí. Ko e maluʻi māʻolunga taha ʻo e Kāingalotu ʻo e Siasí ko e tui fakalotu ʻoku maʻu ʻi he lotó, ʻa e fetuʻutaki haohaoa mo faingofua ko ia ʻoku totonu ke tau fai mo e ʻOtuá.” (Tokāteline ʻo e Ongoongoleleí, p. 9) …
Mo e fakakaukau ko iá. …, ʻoku ou ongoʻi ai ke u fai ʻeku fakamoʻoní kia kimoutolu ʻo fakafou ʻi ha meʻa naʻe hoko kiate au. Ne u maʻu ha misi nāunauʻia moʻoni ʻi he hengihengi he uike pē ʻe fā kuo toki ʻosí. ʻI he misi ko iá ne hā kiate au ne u kau fakataha mo ha kau takimuʻa ʻi hono fakahinohinoʻi kimautolu ʻe he Palesiteni ʻo e Siasí, pea neongo naʻe ʻi ai mo e niʻihi kehe ai, ka naʻe hangē pē kiate au ko e meʻa naʻá ne lea ʻakí naʻe fakataumuʻa ʻataʻatā pē ia kiate au… ʻI he ʻaho ní ʻoku ou toe manatuʻi ia pea ʻoku fuʻu hā mahino mai ʻaupito kiate au ʻa e misi ko iá, he ko e pōpoaki ʻeni naʻe fai maí: “Kapau ʻokú ke fie ako ke ke ʻofa ki he ʻOtuá, kuo pau ke ke ako ke ke ʻofa ʻi Heʻene fānaú pea ke ke manako ke tokoniʻi ʻEne fānaú. ʻOku ʻikai ʻofa ha taha ki he ʻOtuá tukukehe pē kapau ʻokú ne manako he ngāue tokoní pea tuku kehe ʻo ka ne ka ʻofa ʻi he fānau ʻa ʻetau Tamai Hēvaní.”
Pea hangē naʻe hili hono akoʻi mai ʻe he Palesitení ʻa e lēsoni ko iá, ʻa ia naʻe fakatō mamafa ki heʻeku fakakaukaú, naʻá ne toki pehē mai, “ʻE Kāinga, tau tūʻulutui hifo ʻo lotu.” ʻI he ʻosi ʻa ʻene lotú, naʻá ku ʻā hake mo e faʻahinga ongoʻi fakalangi taha kuó u maʻu ʻi ha toe taimi, ʻou fifili ai pe te u lava nai ke hokohoko atu kae ʻoua kuó u aʻusia ʻa e tuʻunga māʻolunga ʻo e manako ke fai ʻa e ngāue tokoni mo ʻofa ki he fānau ʻa e ʻEikí ʻa ia kuo fakatō mamafa [kiate au] ʻi he misi ko iá.16
Fakafetaʻi ki he ʻOtuá koeʻuhi ko e ngaahi fakahā kuo fai mai ʻi he mālohi ʻo e Laumālie Māʻoniʻoní, ʻa ia ʻokú ne fakamoʻoni ki hoku laumālié pea ʻoku ou ʻilo ʻaki ʻa e kotoa ʻo hoku laumālié ʻoku moʻui [ʻa e ʻEikí], pea ko e Fakamoʻui Ia ʻo māmaní. ʻOku ou ʻiloʻi [ko e temipalé] ko ha feituʻu māʻoniʻoni mo toputapu ia ʻe lava ke ʻi ai ʻa Hono fofongá koeʻuhí he ʻoku māʻoniʻoni ia. Fakatau ange ko kimoutolu ʻoku mou haʻu ki hení ke mou haʻu mo e ngaahi loto ʻoku maʻa, mo e mata pea mo e fakakaukau ʻoku hanga taha pē ki he ʻOtuá koeʻuhí ke mou ongoʻi ʻokú Ne ʻafio ai.17
Ngaahi Fokotuʻu ki he Akó mo Hono Aleaʻí
-
Ko e hā e ngaahi founga kuo hoko ai ʻa e temipalé ko ha “fakahinohino pea mo ha maluʻi” kiate koe?
-
Te ke fakafaikehekeheʻi fēfē ʻa e ngaahi koloa fakamāmaní mo e ngaahi koloa taʻengata ʻoku maʻu ʻi he temipalé?
-
Ko e hā hono ʻuhinga ʻoku fie maʻu ai ke tau toutou kau ʻi he lotu he temipalé ʻi he lahi taha te tau lavá?
-
Ko e hā ha ngaahi tāpuaki kuó ke maʻu ko e tupu mei hono fai ʻo e ngāue fakatemipalé mo e hisitōlia fakafāmilí?
-
Ko e hā kuo pau ai ke tau haʻu ki he fale ʻo e ʻEikí mo e nima ʻoku maʻa pea mo e loto ʻoku haohaoá? Ko e hā mo ha toe ngaahi founga kehe te tau lava ʻo teuteu ai ke tau hū ʻi he temipalé, tukukehe ʻa e taau mo feʻungá?
-
Ko e hā ʻoku hoko ai ʻa e ʻofa pea mo e tokoni ki he niʻihi kehé ko ha teuteu mahuʻinga ke kau ʻi he ngaahi tāpuaki ʻo e temipalé?
ʻI heʻetau teuteu atu ko ia ke hū ki he temipalé, ʻoku totonu ke tau manatuʻi ʻa e faleʻi naʻe fai ʻe Palesiteni Hāloti B. Lií: “Fakatau ange ko kimoutolu ʻoku mou haʻu ki hení ke mou haʻu mo ha loto ʻoku maʻa, pea mo e mata mo e fakakaukau ʻoku hanga taha pē ki he ʻOtuá koeʻuhí ke mou ongoʻi ʻokú Ne ʻafio ai.”