Vahe 14

Ko e ʻOfá ʻi ʻApi

ʻE lava fēfē ʻe he ngaahi mātuʻá ke toe fakamālohia ange ʻa e ngaahi haʻi ʻo e ʻofá ʻi honau vaá pea mo ʻenau fānaú?

Talateu

“ʻOku mātuʻaki mahuʻinga ʻaupito ʻa e fāmilí ʻi heʻetau fekumi ko ia ke maʻu ʻa hotau hakeakiʻí ʻi he puleʻanga ʻo ʻetau Tamai Hēvaní,” ko e akonaki ia ʻa Palesiteni Hāloti B. Lī.¹ ʻI heʻene fakakaukau ko ia ki he taumuʻa mahuʻinga ko ʻení, naʻá ne faʻa lea maʻu pē ʻo kau ki he mahuʻinga ʻo e ʻofá ki hono fakamālohia ʻo e ngaahi haʻi fakafāmilí. Naʻá ne fakaʻaiʻai ʻa e ngaahi mātuʻá mo e fānaú ke nau fakaʻaongaʻi ʻa e laumālie ʻo e misiona ʻa ʻIlaisiaá ki he kau mēmipa ʻo honau fāmilí ʻoku kei moʻuí pea fakatafoki honau ngaahi lotó, ʻa e tokotaha ki he tokotaha, ʻi he ʻofa. Naʻá ne pehē:

“Kuo toe fakamanatu atu kia kimoutolu ha meʻa kuo mou faka- ʻaongaʻi pē ki he ngāue fakatemipalé—ʻa e misiona ko ia ʻa e palōfita ko ʻIlaisiaá ʻa ia naʻe lea ʻaki ai ʻe Malakai, pea kuo toutou fakahā mai ʻi he ngaahi fakahā ʻo onopōní: ‘Vakai, te u fakahā kia kimoutolu ʻa e Lakanga Taulaʻeikí, ʻi he nima ʻo ʻIlaisiā ko e palōfitá, ʻi he teʻeki ke hoko ʻa e fuʻu ʻaho lahi mo fakamanavahē ʻo e ʻEikí. Pea te ne tō ʻi he loto ʻo e fānaú ʻa e ngaahi talaʻofa naʻe fai ki he ngaahi tamaí, pea ʻe liliu ʻa e loto ʻo e fānaú ki heʻenau ngaahi tamaí. Ka ne ʻikai ke pehē, ʻe fakaʻauha ʻo ʻosiʻosingamālie ʻa māmani kotoa ʻi heʻene hāʻele maí.’ (T&F2:1–3.)

“ʻOku mahino ʻa e toe ʻuhinga mālie ange ʻa e folofola he ʻaho ní. Kapau ʻe ʻikai ke liliu ʻa e loto ʻo e fānaú ki heʻenau mātuʻá pea liliu ʻa e loto ʻo e ngaahi mātuʻá ki heʻenau fānaú ʻi he ʻahó ni, ʻi he moʻui fakamatelié, ʻe fakaʻauha ʻo ʻosiʻosingamālie ʻa māmani ʻi Heʻene hāʻele maí. Kuo teʻeki ai ha taimi ʻe toe lahi ange ai ʻa e ngaahi meʻa ʻoku fie maʻu ke fai ʻi he ngaahi ʻapi ʻo e kakai Siasí pea mo māmani kotoa pē, ʻo hangē ko e ʻaho ní. Ko e lahi taha ʻo e ngaahi meʻa fakamamahi ʻoku hoko ki he toʻu tupú he ʻaho ní ko e tupu ia mei he maumau ʻoku hoko ʻi he ngaahi ʻapí. Kuo pau ke liliu e loto ʻo e ngaahi tamaí ki heʻenau fānaú, pea mo e fānaú ki heʻenau ngaahi tamaí kapau ʻoku fie maʻu ke fakahaofi ʻa e māmaní pea mateuteu atu mo e kakai ki he hāʻele mai ʻa e ʻEikí.²

Ngaahi Akonaki ʻa Hāloti B. Lií

Te tau lava fēfē ʻo fakaʻaiʻai ha ʻofa pea mo ha fiefia ʻoku toe lahi angé ʻi hotau ngaahi ʻapí?

Naʻá ku monūʻia ke u toutou ʻaʻahi fakataha atu mo ha niʻihi ʻo e Kau Taki Māʻolungá ki he ngaahi ʻapi lelei taha ʻo hotau kakaí, pea ko e ngaahi ʻaʻahi ko ʻení naʻe lava ke u vakai ai ki ha niʻihi. … ʻo e ngaahi ʻuuni meʻa ʻokú ne ʻomi ʻa e mālohí mo e fiefia ki he ʻapí. …

ʻOku ou mamata ki he fefakaʻapaʻapaʻakí ʻi he ngaahi fāmili ko ʻení; ʻa e tamaí ki he faʻeé, pea mo ʻene ʻofa kiate iá, pea mo e faʻeé ki he tamaí; ʻikai ha fekeʻikeʻi, ʻikai ha felauʻaki kae fanongo e fānaú, ko e ngaahi taʻe femahinoʻakí ʻoku talanoaʻi fakalelei pē ia ʻo ʻosi—naʻá ku mamata ʻi ha ʻapi pehē ʻe taha mo ha fānau fakaʻofoʻofa ʻe toko hiva ʻoku fakamoʻoni ai ʻa e fānaú kuo teʻeki ke nau fanongo tuʻo taha kuo kē ʻenau tamaí mo ʻenau faʻeé. Ko hono olá ko e ngaahi ʻapi ʻe hiva ʻo e fānau ko ʻení, hili ia ʻa e vahaʻa taimi naʻe fai ai ʻa e fakahinohinó mo e tā sīpinga lelei ʻa e ongo mātuʻá, ʻoku toe ʻi ai mo e ngaahi fāmili fakaʻofoʻofa mo malu kehe ʻe hiva ʻoku nau nofo fiefia fakataha …

Ko hono kei tauhi maʻu ko ia ʻo e ngaahi fetuʻutaki fakalaumālié, ko hono fakahoko ʻo e ngaahi lotu fakafāmilí, ko e tokanga maʻu pē ki he ngaahi fatongia faka-Siasí, ko ʻeni kotoa ʻa e niʻihi ʻo e ngaahi meʻa naʻe tokoni ke hoko ai ʻa e ngaahi ʻapí ni ko ha ngaahi ʻapi lelei.³

Naʻe ʻi ai ha tamai ʻe taha naʻe haʻu kiate au he ngaahi taʻu siʻi pē kuo ʻosí ko e loto mamahi ʻi hono fāmilí kotoa—ʻa hono kotoa ʻo ʻene fānaú—ʻa ia kuo nau ʻosi mali kotoa pea ʻoku huki tonu ʻi honau ngaahi fāmilí ha ngaahi faingataʻa lahi. Naʻá ne pehē mai kiate au ʻi hono loto mamahí, “Ko e hā nai e meʻa ʻoku fehālaaki ʻi hoku fāmilí ʻo nau faingataʻaʻia pehē aí? ʻOku ʻikai ha taha ʻiate kinautolu ʻe fiefia mo fakalata honau ngaahi ʻapí.” Naʻe ʻikai ke u lea ʻaki ʻe au ʻa e meʻa ko ʻení ka naʻá ku sio atu ki he ʻapi ʻo e tangata ko ʻení ʻi he taimi naʻe kei haʻohaʻo takai ai ʻa e fānaú ʻi he tēpile teʻeki ke nau mali. Naʻá ku mamata atu ki he siokitá, ʻa e taʻe fie feilaulau ke maʻu ai ha lelei ʻa e tokotaha koeé. Naʻá ku mamata atu ki he fehamutakí, fekālangaʻí, tafulú, fuhú, pea mo e longoaʻá. Naʻá ku ʻilo ʻa e meʻa naʻe fafanga ʻaki kinautolu ʻi heʻenau kei īkí. Naʻe ʻikai ke u ofo ʻi he ʻikai ke fiefia honau ngaahi ʻapí.⁴

ʻOku maʻu ʻa e fiefiá mei he ngāue tokoni taʻe siokitá. Pea ko e ngaahi ʻapi fiefiá ʻa e ngaahi ʻapi pē ko ia ʻoku nau feinga fakaʻaho ke fai ha ngaahi feilaulau ke fiefia ai ʻa e tokotaha kotoa pē.⁵

ʻOku ʻikai ke mou maʻu ʻa e ʻofa ʻa e ʻOtuá ʻi hoʻomou kole ʻata- ʻatā pē. Ko Sione naʻa ne pehē, “Kapau ʻe pehē ʻe ha tangata, ʻOku ou ʻofa ki he ʻOtuá, ka ʻoku fehiʻa ki hono tokouá, ko e loi ia; he ko ia ʻoku ʻikai ʻofa ki hono tokouá ʻokú ne mamata ki aí, ʻe fēfē ʻene ʻofa ki he ʻOtuá naʻe ʻikai te ne mamata ki aí? “ (1 Sione 4:20). He ʻikai lava ke ke ʻofa ki he ʻOtuá ka ke fehiʻa ki ho tokouá ʻa ia ʻokú mo feohí. Ka ai ha tangata ʻokú ne pehē ko e tangata fakalaumālie ia ka ʻoku taʻe maau hono ʻapí koeʻuhi ko ʻene taʻe tokanga ki hono uaifí mo ʻene fānaú, ʻoku ʻikai kamata ʻe he tangata ko iá ke tanumaki ha ʻofa ki he ʻOtuá.⁶

ʻOua naʻa tau tuku ke ngalo ʻiate kitautolu ʻa e naʻinaʻi fakapotopoto ʻa Paulá ʻi heʻene pehē ke tau “fakamoʻoniʻi” ʻa ʻetau ʻofá kia kitautolu ʻoku tau feohí, kae tautefito kia kinautolu kuo fōngia hifo ʻi he mamahí (vakai, 2 Kolinitō 2:7–8). Naʻe lea ʻaki ʻe Pita ʻa e meʻa tatau pē ʻi he tohi 1 Pitá, vahe ʻuluakí, ʻi heʻene naʻinaʻi ki he kāingalotú ke ʻoua naʻa ngata pē ʻi heʻenau fakahā ʻa e “ʻofa taʻe [mālualoí]” ka ke “nau feʻofaʻaki ʻaki ʻa e loto ʻoku maʻa mo fakamātoato” (1 Pita 1:22). ʻI he puleʻangá ʻoku fuʻu mahuʻinga ʻaupito ʻa ʻetau malava ko ia ke ʻofá koeʻuhí he ʻoku tau moʻui ʻi ha kuonga “ʻe fakaʻau ʻo momoko ʻa e ʻofa ʻa e kakaí” (T&F 45:27).⁷

Mou fakamālohia ʻa homou ngaahi haʻi fakafāmilí pea tokangaʻi ʻa hoʻomou fānaú … Mou fakapapauʻi ʻoku ngaohi ʻa ʻapi ke hoko ko e feituʻu mālohi ʻe lava ke haʻu ki ai ʻa e fānaú ke maʻu ʻa e taula ʻoku nau fie maʻu ʻi he kuonga faingataʻa mo moveuveu ko ʻeni. Pea ʻe toki hulu ai ʻa e ʻofá pea tupulaki mo hoʻomou fiefiá.⁸

ʻE lava fēfē ʻe he ngaahi tamaí mo e ngaahi faʻeé ʻo fakahā ha ʻofa ʻoku toe lahi angé ki heʻenau fānaú?

Naʻe ʻi ai ha meʻa naʻe hoko kiate aú ʻo ne akoʻi kiate au ha meʻa ʻi heʻeku hoko ko ia ko e kuí. Ko e pō ʻeni naʻe fai ai ʻa e fakaʻali- ʻali hulohula [ʻa e Siasí] ʻi he malaʻe vaʻingá, pea naʻe pehē ʻe hoku ʻofefiné kuo aʻu ia ki he helaʻiá heʻene ongo tamaiki tangata lalahi tahá. … Ko ia naʻa ku pehē ange ai, “Te ke loto ke u ʻave hoʻo ongo tamaikí ki he fakaʻaliʻali hulohulá ʻi malaʻe vaʻinga?”

Naʻá ne pehē mai, “Tangataʻeiki, te u fuʻu fiefia ʻaupito kapau te ke fai ia.”

Naʻe ʻikai ke u ʻilo ʻe au ʻa e meʻa ʻe hokó. … ʻI he kamata ʻa e fakaʻaliʻalí naʻe ʻikai ke u ʻiloʻi ʻe au ʻe fuʻu faikehekehe pehē fau ʻa e tamasiʻi taʻu fitú mo e tamasiʻi taʻu nimá. Naʻe fuʻu tokanga ʻaupito ʻa e tamasiʻi taʻu fitú ia ki he meʻa naʻe fai ʻi he malaʻe vaʻingá. Ka naʻe taimi siʻi pē kuo toʻo e tokanga ia ʻa e taʻu nimá mei ai. Naʻá ne fute takai peá ne loto ia ke ʻalu ʻo ʻomi haʻane foʻi hoti tookí peá ne loto ke ʻalu ʻo ʻomi hano inu peá ne fie ʻalu ki fale-mālōlō, pea ʻoku ʻikai lava ia ke nofo maʻu hifo. Naʻá ku tangutu fakataha mo e Kau Taki Māʻolungá ʻi he ʻotu muʻá pea naʻa nau mamali pē ʻi heʻenau vakai mai ki he meʻa naʻe hokó mo ʻeku feinga ko ia ke fusi holo hoku kiʻi mokopuná mo ʻai ke ne tangutu maʻú. Faifai pē pea tafoki mai ʻa e kiʻi tamasiʻi taʻu nima ko ʻení ʻo kukuʻi hono nima ʻo tukiʻi hoku tafaʻaki matá mo ne pehē mai, “Tuku hono teke aú!” Naʻa ku loto mamahi. Kuo kamata efiafi hifo foki pea hangē pe kiate au naʻe toutou mahū e kau takí ʻi heʻenau mamata mai ki he meʻa naʻe hokó. Ko e ʻuluaki meʻa pē naʻá ku fakakaukau ki aí ke u hanga ʻo hapoʻi; ko hono tuhá ia. Ka naʻá ku sio ki he meʻa naʻe fai ʻe heʻene faʻeé. Ne u sio ki he meʻa naʻá ne fai ʻi he taimi naʻe tangi ai ʻa e kiʻi tamasiʻí ʻo faingataʻa hono taʻofí, pea ko e lea ʻeni ʻa e faʻeé, “ʻOku fie maʻu ia ke ke ʻofa ʻi hoʻo fānaú ʻi he taimi ʻoku faingataʻa taha ai ke te ongoʻi ʻofa kiate iá. Ko ia naʻá ku fakakaukau leva ke u ʻahiʻahiʻi ia. Kuo ʻikai ha ola lelei ia ʻo e founga ʻe tahá.

Ko ia ne u fua hake ia ʻou pehē ange kiate ia, “ʻOku ʻofa ʻaupito ʻa Papa ʻiate koe. ʻOku ou loto ke ke tupu hake ʻo hoko ko ha tamasiʻi lahi mo anga-lelei. ʻOku ou fie maʻu pē ke ke ʻilo ʻoku ou ʻofa ʻiate koe.” Naʻe kamata ke fakamolū hifo hono kiʻi sinó mei heʻene ʻitá peá ne kuku atu au ʻo ʻuma ʻi hoku kouʻahé, pea naʻá ne ʻofa ʻiate au. Ne u lavaʻi ia ʻaki ʻa e ʻofá. ʻIkai ko ia pē, ka naʻá ne ikunaʻi au ʻaki ʻa e ʻofá.⁹

ʻE tala atu ʻe ha faʻē lelei ʻoku ʻi ai ʻene fānau tangata mo fefine ʻoku fie maʻu ʻe he fānau tupú ke ʻofaʻi kinautolu pea ke lahi taha hono ʻofaʻi kinautolú ʻi he taimi ʻoku faingataʻa taha ai ke ʻoange ʻa e ʻofá kia kinautolú. Ngaahi tamai mo e ngaahi faʻē, mou fakakaukau ki ai.¹⁰

ʻOku ou manatu ki he meʻa naʻe hoko ʻi hoku fāmili pē ʻoʻokú ʻi hano fakaangaʻi ha taha ʻo hoku ngaahi makapuna fefine īkí ʻe heʻene tamaí ko e ʻikai ke ne tokangaʻi lelei hono lokí, ngaahi e mohengá, mo e hā fua. Naʻe tafoki hake lea ʻa e kiʻi taʻahine ko ʻeni mo hono lotó ʻo pehē ange, “Tangataʻeiki, ko e hā e meʻa ʻokú ke sio ai pē koe ki he meʻa ke fakaangaʻí kae ʻikai ʻaupito te ke sio ki he ngaahi meʻa lelei ko ia ʻoku ou faí?” Naʻe tupu heni ha nofo hifo ʻa e tamaí ʻo fakakaukau, pea ko e pō pē ko iá, naʻá ne tataʻo ai ʻi hono lalo piló ha kiʻi tohi ʻofa ʻo tala ange ki ai ʻa e ngaahi meʻa kotoa pē ʻokú ne fakaʻofoʻofa heʻene faí, pea naʻe kamata heni hono fakaleleiʻi ʻo e loto mamahi ko ia naʻe fakatupu ʻe he faʻa fakaanga ʻa e tamai ko ʻení kae ʻikai ke ne fakamālōʻia ʻa e ngaahi meʻa leleí.¹¹

ʻOku ou manatuʻi ha meʻa naʻe hoko ʻi heʻeku kei siʻí. Naʻe ʻi ai ʻemau fanga puaka ko ʻenau meʻa naʻe faí ko hono maumauʻi ʻemau ngoué mo fai e maumau lahi ki he fāmá. Naʻe fekau ʻe he Tangataʻeikí ke u ʻalu he maile ʻe ua ki falekoloa ʻo ʻomi e meʻa-ngāue mei ai ke mau tui e ihu ʻo e fanga puaká. Naʻe faingataʻa ʻaupito hono fakateka holo kinautolú mo hono fakahū ki he loto- ʻaá, pea naʻá ku vaʻinga takai holo mo e meʻangāue naʻe fekau ke u ʻalu ʻo fakatau maí ʻou fuʻu lomiʻi lahi ʻe au ʻo motu ia. Naʻe totonu pē ia kapau naʻe tafuluʻi au ʻe he Tangataʻeikí, ko e sio atu ki he ngāue lahi mo e paʻanga naʻe maumauʻí, ka naʻá ne sio mai pē kiate au, malimali, mo ne pehē mai, “Mahalo pē he ʻikai ke tau tui e ihu e fanga puaká he ʻahó ni. Tuku ange kinautolu ka tau toki haʻu ʻapongipongi ʻo feinga foʻou.” ʻOfa lahi moʻoni ʻaʻaku he tamai ko ʻení, ʻi he ʻikai ke ne tafuluʻi au ʻi ha kiʻi fehālaaki siʻisiʻi naʻá ne mei ʻai kimaua ke ma vāmamaʻo ai.¹²

ʻOku lelei ke fakatonutonu ʻe ha tamai ʻene fānaú, ka ʻoku totonu ke ʻoua naʻá ne fai ia ʻi he ʻita. Kuo pau ke ne fakahā ha ʻofa lahi ange hili ʻene fai iá, telia naʻa lau ʻe he tokotaha ʻokú ne valokiʻí ia ko hono fili (vakai, T&F 121:43). Fakatau ange ke ʻoua naʻa tuku ʻe he ʻEikí ha tamasiʻi ke ne ongoʻi ʻi ha taimi ko hono fili ʻa ʻene tamaí pe ko ʻene faʻeé.¹³

Ngaahi mātuʻa, mou manatuʻi ko homou faingamālié ʻeni; mahalo pē te ke ongoʻi hohaʻaʻia ʻi hoʻo fāinga mo ha kiʻi tamasiʻi ʻoku ongongataʻa, ka ʻokú ke lolotonga moʻui ʻi he ngaahi taʻu fakafie-fia taha mo mahuʻinga taha ʻo hoʻo moʻuí. Fakamolemole ka ke fai manavaʻofa kia kinautolu ʻi he taimi ʻokú ke fakamohemohe ai kinautolu he poʻulí. Tuku ke nau ongoʻi ha kiʻi leʻo ʻofa ʻi he lotolotonga ʻo e ngaahi leʻo ʻita mo fakalielia te nau fanongoa ʻi hono kotoa ʻo e moʻuí. Tuku ke ʻi ai ha taula ke tafoki atu ki ai ʻa e kiʻi fānaú ni ʻi he ʻikai ha toe meʻa ʻe tokoní. Ke tokoni atu ʻa e ʻEikí ke ke fai ia.¹⁴

Naʻe haʻu kiate au ha tangata toketā. Ko e toketā ʻuto ʻeni. … Naʻe ʻoange ha saliote sinou maʻa ʻene kiʻi tamasiʻí he Kilisimasí ka naʻe ʻikai ke ʻi ai ha sinou ia. Naʻe toki tō hifo ʻa e sinoú ia he ʻaho ʻe tolungofulu hili ʻa e Kilisimasí he taʻu ko iá. Naʻe pehē mai [ʻe he toketaá] ʻi heʻene fakavave atu ki falemahakí, “Ko ʻeku foki mai pē pea ta ō ʻo heka holo he sinoú,” pea tali atu ʻe he kiʻi tamasiʻí ia, “He ʻikai hoko ia tangataʻeiki, ʻoku ʻikai hao taimi ʻoʻou ia ke fakamoleki kiate au.” Naʻe moʻua pē ʻa e fakakaukau ʻa e toketaá he pongipongí kotoa ʻi he lea ʻa hono kiʻi fohá, he naʻe moʻoni kotoa, naʻe lahi ʻene fakamoleki hono taimí ki heʻene ngāué ʻo ʻikai ke ne fakamoleki hono taimi naʻe totonu ke ne fakataha ai mo ʻene fānaú. Ko ʻene fehuʻí leva ʻeni, “Kiʻi fakamatala mai muʻa pe ko e hā e founga te u lava ke ʻai ai ʻeku moʻuí ke potupotu-tataú? Kuo fakalakalaka foki he ngaahi ʻahó ni ʻa e tafa ʻutó ia pea ʻoku ou femoʻuekina pē au ki ai ʻo ʻikai ke u toe fakakaukau au ki ha meʻa kehe ka ko hono lau ʻo e ngaahi fakamatala foʻou fekauʻaki mo ʻeku ngāué.” ʻI heʻema talanoá, naʻá ma fakaʻosi ʻaki ʻema pehē ʻoku ʻi ai e fatongia ʻo e tangatá kiate ia pē, ʻoku ʻi ai hono fatongia ki hono fāmilí, ʻoku ʻi ai hono fatongia ki he Siasí, pea ʻoku ʻi ai hono fatongia ki heʻene ngāue maʻuʻanga moʻuí; pea koeʻuhi ke potupotu- tatau ʻene moʻuí, kuo pau ke ne feinga ia ke ne kumi ʻa e ngaahi founga ke ne tokoni ai ʻi he ngaahi tafaʻaki takitaha ko ʻení.¹⁵

Kapau ʻoku mālohi ʻa e ʻofa ʻa ha tamai ki hono ngaahi fohá, peá ne fua hake kinautolu mei heʻenau kei valevalé ʻo fāʻofua kia kinautolu ʻi he ʻofa peá ne tuku ke nau ongoʻi ʻa e māfana ʻo ʻene ʻofa kia kinautolú, ʻoku ou tui ʻe tupu pē ʻa e faʻahinga feongoʻaki ia ko ʻení ʻo aʻu ki heʻenau matuʻotuʻa peá ne ofi mai pē ʻi he taimi ʻe fie maʻu ai ʻe he tamasiʻí ʻi heʻene moʻuí ʻa e nima poupou ʻa ha tamai ʻokú ne maʻu ʻa e loto mahinó. Ko e faʻē ko ia ʻokú ne tatali ke foki mai ʻene tama fefiné mei ha hulohula ʻi ha paati ʻoku fai ke ʻuma ki ai, pea ke na talanoa ki he fanga kiʻi meʻa fakafefine ʻoku mahuʻinga ki he fānau fefiné, ko hono palé ko e ʻofa taʻe hano ngataʻanga ʻa ʻene tamá ʻa ia ʻe hoko ia ko ha ʻā maluʻi mei he fai angahalá koeʻuhi pē ko e falala ange ʻene faʻeé kiate iá.

Ko e ngaahi mātuʻa ko ia ʻoku nau fuʻu femoʻuekina pe fuʻu helaʻia ke nau hohaʻa ki he fanga kiʻi fakahohaʻa laulaunoa ʻa e fānaú pea nau leʻei kinautolu ki he tafaʻakí pe tuli ke nau mavahe mei ʻapi ko e manavasiʻi naʻa toe moveuveu ʻa e maau ʻa hono ʻapí, ʻoku nau hanga ʻo ʻai kinautolu ke nau ʻalu ki ha faʻahinga sōsaieti ʻoku pusiakiʻi ai ʻa e fai angahalá, ʻa e fai hiá pea mo e taʻe tui ʻotuá, koeʻuhi pē ko ʻenau taʻe latá. Ko e hā hono ʻaonga ki ha tamai, kapau ʻokú ne taau mo feʻunga ki he Puleʻanga Fakasilesitialé, kapau ʻe mole meiate ia ʻa hono fohá pe ʻofefiné koeʻuhi ko ʻene taʻe tokangá? ʻE ʻikai ʻaupito ke lava ʻe he ngaahi kautaha ʻofa ʻi he māmaní, tatau ai pē pe ko e ngaahi kautaha fakasōsiale pe fakalotu, ke totongi huhuʻi ki he faʻeé ʻa e ngaahi laumālie kuo mole ʻi hono ʻapí lolotonga ko iá ʻokú ne feinga ia ke fakamoʻuí ʻa e faʻahinga ʻo e tangatá pe fai ha faʻahinga ngāue ʻofa ʻi tuʻa ʻi hono ʻapí, neongo pe ko e hā hono lelei ʻo e ngāue ko iá.¹⁶

Kuó u faʻa toutou akonaki ʻaki ʻeni, pea ʻoku ou toe lea ʻaki ia kia kimoutolu kotoa ʻoku mou ʻi hení: “Ko e ngāue mahuʻinga taha ʻa e ʻEikí te mou lava ke faí ʻoku fakahoko ia ʻi loto ʻi he ngaahi holisi ʻo homou ngaahi ʻapí.” Kuo pau ke ʻoua naʻa teitei ngalo ia ʻiate kitautolu.¹⁷

Ko e hā e ivi tākiekina ʻoku lava ke maʻu ʻe he ʻofa ʻa e mātuʻá pea mo hono akoʻi ʻo e ongoongoleleí ki he fānau ko ia ʻoku nau hē atu ki tuʻá?

Naʻe ʻalu ange he ʻaho atú ha ongo mātuʻa mo ʻena palōpalema. ʻOku ʻi ai ʻena taʻahine taʻu hongofulu mā ono pea ko e lahi taha ia ʻi hona fāmilí pea kuo lahi ʻaupito e ngaahi meʻa ʻoku hoko ko e tupu mei ai. Kuó na mei pāhia kinaua. Naʻá ku fai ange ʻa e lea naʻe fai ʻe Māvini J. ʻEsitoní, ʻene pehē ʻoku ʻikai ha taʻe lavameʻa ia ʻi ʻapi lolotonga ko iá ʻoku teʻeki ai ke ne tukulolo [ʻa ʻapi] (vakai ki he Conference Report, ʻEpeleli 1971, p. 15). Ko e moʻoni ia. Kuo pau ke hokohoko atu pē ʻa e ʻofa mo e ngāue ʻa e ʻapí ki he [toʻu tupú], kae ʻoua leva kuo fakalaka atu ʻa e toʻu tupú ʻi he toʻu fakatuʻutāmaki ko iá. ʻOku ʻikai ha ʻapi ia ʻoku taʻe lavameʻa tuku kehe pē kapau kuo foʻi ia ʻi heʻene feinga ke tokoní.¹⁸

Ko e fakaʻaliʻali maʻongoʻonga taha ʻo e mālohi ʻo e ʻOtua Māfimafí ʻoku lava ke tau sio ki ai he ʻaho ní ko hono huhuʻi ko ia ʻo e laumālie ʻo e tangatá mei he fakapoʻuli fakalaumālié ki he maama fakalaumālié. Ne u toki mamata mo fanongo kimuí ni mai pē ʻi he mana pehē ʻi ha tangata naʻe taʻe mangoi ʻi he konga lahi ʻo ʻene moʻuí, pea kuo aʻu hake ʻeni ki he ngaahi taʻu lotoloto ʻo ʻene moʻuí, ʻa ia naʻá ne kole ke ne lea ʻi he meʻa-fakaʻeiki ʻo ʻene faʻeé ne siʻi toulekeleka. Naʻe talangofua ʻa ʻene tamaí mo ʻene faʻeé ki he ngaahi fakahinohino ʻa e ʻEikí ʻo na vilitaki ʻi hono akoʻi ʻo ʻena fānaú, ʻa ia naʻe kau ai ʻa e foha ko ʻení, ka naʻá ne fakafepakiʻi mālohi pea ʻi he anga taʻe fakaʻapaʻapa ʻa ʻena ngaahi feingá. Neongo ʻa e fakafepaki ko ʻení, ka naʻe kei hokohoko atu pē ʻa e tamaí ni ʻi hono fatongiá ʻo hangē ko ia naʻe totonu ke fai ʻe ha tamai faivelengá; naʻe ʻikai ke ngata pē ʻi heʻene akonakí, ka naʻá ne ʻaukai mo lotu ʻi he Sāpate kotoa pē, kae fakatautefito maʻa hono foha talangataʻa ko ʻení. Naʻe mamata ʻa e tamaí ʻi ha misi, hangē pē ko hano fakafiemālieʻi iá, ʻoku luelue atu hono fohá ʻi ha loto kakapu matolu. Naʻá ne mamata ʻi he misí ki hono fohá ʻokú ne hū atu ki tuʻa mei he kakapú ki he maama ʻo e laʻaá, kuo fakamaʻa ia ʻi he fakatomala moʻoni. Kuo mau mamata ki he tamasiʻi ko iá he taimí ni kuó ne liliu pea ʻokú ne lolotonga fiefia ʻi he niʻihi ʻo e ngaahi tāpuaki fakaʻofoʻofa taha ʻa e ʻEikí ʻi he Siasí koeʻuhi pē he naʻe ʻikai ke foʻi ʻa ʻene ongo mātuʻa faivelengá ʻi hono feingaʻi iá.¹⁹

ʻOku ou fie lea atu ʻaki ʻa e meʻá ni kia kimoutolu ngaahi faʻeé: ʻOua naʻa ke fiu ʻi he kiʻi tamasiʻi pe taʻahine [talangataʻá]; ʻe ʻi ai e ʻaho te ne toe foki mai ai ki he ʻapi naʻá ne ʻalu mei aí, hangē ko e Foha Maumau-koloá, ʻo hangē ko ha foki mai ʻa ha vaka ki ha taulanga uú.²⁰

ʻE lava pē ke mavahe ha taha ia ʻi heʻene kei talavoú mei he ivi tākiekina ʻo ha ʻapi lelei peá ne hoko ai ʻo taʻe tokanga mo talangataʻa, ka ʻo kapau kuo fakatō kakano ʻa e ngaahi akonaki ʻa e faʻē leleí ki hono lotó ʻi heʻene kei siʻí, te ne toe foki mai pē ki ai ke malu ai, ʻo hangē ko ha vaka ʻoku lī hono taulá ke malu ai ʻi ha matangi.²¹

ʻOua naʻa mou foʻi hono tokoniʻi ʻo e tamasiʻí pe taʻahiné lolotonga ʻa e vahaʻa taimi ko ʻeni ʻo e loto-hīkisia ʻoku faʻa hoko ki ha niʻihi ʻo e toʻu tupú. ʻOku ou kolea hoʻomou tokoní maʻá e fānau tangata mo e fānau fefine ko ia. ʻOua naʻa mou foʻi hono tokoniʻi ʻo e tamasiʻi pe taʻahine ʻokú ne ʻi he tuʻunga faingataʻa ko ʻeni ʻokú ne pehē ai ʻoku tauʻatāina peá ne taʻe tokaʻi mai ʻa e akonaki ʻa e fāmilí. ʻOua naʻa taʻe tokangaʻi ʻa e tamasiʻí pe taʻahiné ʻi he taimi ʻoku hā mai ai meiate ia ʻa e tōʻonga fakavaʻivaʻingá. ʻOku ʻikai fie maʻu ʻe he tokotaha ia ʻokú ne pehē ʻokú ne ʻosi ʻilo e meʻa kotoá ʻa e akonakí, he kiate ia ko e malanga ʻataʻatā pē ia ʻa ha taha kuo motuʻa ʻo ʻikai ke mahino ki ai ha meʻa ia ʻa e toʻu tupú. …

Naʻe ʻi ai hama mokopuna tangata naʻe ʻalu ʻo ngāue fakafaifekau ʻi he Misiona Pilitānia Noaté. Naʻe ʻikai ke ne fuʻu fuoloa ai mo ʻene fai mai ha tohi mālie moʻoni ʻo ne tala mai ʻa e mālohi lahi ʻo ʻene manatuʻi he taimí ni ʻa e faleʻi naʻe fai ange ʻe heʻene ongo mātuʻá. ʻOku hangē ia ha tohi ʻi ha funga laupapa ʻa ia naʻe hilifaki pē ai ʻi he taʻu ʻeni ʻe hongofulu mā hiva pea kuó ne toki kamata ʻeni ke toʻo hifo ia mo kamata ke ne lau, ʻa ia ko e ʻuluaki taimí ʻeni. Ko homou fohá ʻeni mo homou ʻofefiné. Te mou pehē ʻe kimoutolu ʻoku ʻikai ke nau fakafanongo atu. Te nau pehē pē ʻe kinautolu ʻoku ʻikai ke nau fakafanongo, ka ʻe ʻi ai pē ʻa e taimi te nau toʻo hifo ai hoʻo tohí ʻo toe lau ia ʻi he taimi ʻoku nau fie maʻu lahi taha ai iá.

ʻOku ʻi ai ʻa e ngaahi mālohi ʻoku nau kau mai hili ia hono fai ʻe he ngaahi mātuʻá ʻa e meʻa kotoa ʻoku nau lavá ke akoʻi ʻa ʻenau fānaú. Ko e mālohi peheni naʻá ne tākiekina ʻa ʻAlamā ko e Siʻí, ʻa ia naʻá ne ʻalu atu mo e ngaahi foha ʻo Mōsaiá ke fakaʻauha e ngāue ʻa ʻenau ongo tamaí. ʻOku mou manatuʻi pē naʻe fekauʻi mai ha ʻāngelo, ʻo ne taaʻi ʻa ʻAlamā ʻo ne tō ki lalo. Naʻe tokoto ʻa ʻAlamā hangē pē kuó ne maté ʻi he ʻaho mo e pō ʻe tolu, pea naʻe pehē ange ʻe he ʻāngeló:

“Vakai, kuo ʻafioʻi ʻe he ʻEikí ʻa e ngaahi lotu ʻa hono kakaí, pea mo e ngaahi lotu foki ʻa ʻene tamaioʻeiki, ko ʻAlamaá, ʻa ia ko hoʻo tamaí; he kuó ne lotu ʻi he fuʻu tui lahi koeʻuhi ko koe, koeʻuhí ke lava nai ke fakamahino kiate koe ʻa e moʻoní; ko ia, ko hono ʻuhinga ʻeni kuó u haʻu ai ke fakamahino kiate koe ʻa e māfimafi mo e mafai ʻo e ʻOtuá, koeʻuhi ke lava ke tali ʻa e ngaahi lotu ʻa ʻene kau tamaioʻeikí ʻo fakatatau mo ʻenau tuí.”(Mōsaia 27:14.)²²

Mahalo pē ʻoku ʻikai ha faʻē ia mo ha tamai kuo teʻeki ai ke ne lea ʻo pehē, “Fakatau ange ke tokoniʻi au ʻe he ʻEikí ke u moʻui ʻi he houa ʻe ‘uofulu-mā-nima’ ʻi he ʻaho kotoa pē ke u fakatapui ʻeku moʻuí ki he fatongia fakafaʻeé mo e fatongia fakatamaí koe- ʻuhí ke ʻoua naʻa lea haʻaku tama ʻi ha taimi ʻo ne pehē naʻe ʻikai ke u fai ʻa e meʻa kotoa pē ʻi hoku mālohí ke fakalotoʻi ia ke faka- ʻehiʻehi mei he ngaahi meʻa ʻoku koví.“ ʻOku tuʻu mālohi mo moʻoni ʻa e niʻihi ʻo ʻetau fānaú, ka ʻoku kamata ke hē atu ʻa e niʻihi ia, pea ʻoku ʻikai faʻa mahino kia kitautolu hono ʻuhingá. Ka tau fakapapauʻi muʻa ngaahi mātuʻa he ʻahó ni te tau moʻui ke ofi ki heʻetau fānaú, te tau faleʻi kinautolu, te tau ʻoange kia kinautolu ʻa e tuʻunga ʻo e maka-tuʻu ki he ngaahi tefitoʻi moʻoni ʻo e moʻoni fakaʻotuá.²³

Ngaahi Fokotuʻu ki he Akó mo Hono Aleaʻí

ʻI hoʻomou hoko ko e ngaahi mātuʻá, ko e hā e meʻa kuó ne tokoniʻi kimoutolu ke toe fakamālohia ange ai ʻa e ʻofá ʻi homou vā mo hoʻomou fānaú? ʻE lava fēfē ke tokanga ʻa e mātuʻá ki he ngaahi fiemaʻu makehe ʻa e kiʻi tamasiʻi takitaha?
Ko e hā hono ʻuhinga ʻoku totonu ke fefakaʻapaʻapaʻaki maʻu ai pē ʻa e ngaahi mātuʻá ʻi he ngaahi feituʻu fakapuleʻangá pea ʻi honau ʻapí?
ʻE fakaʻaiʻai fēfeeʻi ʻe he ngaahi mātuʻá ʻi honau ʻapí ʻa e ʻulungāanga taʻe siokitá mo e feilaulau ke maʻu ai ha lelei ʻa e niʻihi kehé?
Ko e hā hono ʻuhinga ʻoku mahuʻinga ai ke ʻofa ʻa e ngaahi mātuʻá ʻi heʻenau fānaú ʻo aʻu pē ki he taimi ʻoku faingataʻa taha ai ke ʻofa ʻiate kinautolú? Ko e hā e ngaahi founga ʻe lava ke fakahā ʻaki ʻe he ngaahi mātuʻá ʻa ʻenau leleiʻia ʻi he ngaahi meʻa lelei ʻoku fai ʻe heʻenau fānaú?
ʻE lava fēfē ʻe he ngaahi mātuʻá ʻo ʻai ke potupotu-tatau ʻa e ngaahi fiemaʻu ʻa e fāmilí, siasí, mo e ngāueʻangá?
ʻOku mou pehē ko e hā e ʻuhinga ʻa Palesiteni Lī ʻi heʻene pehē, “Ko e ngāue mahuʻinga taha ʻa e ʻEikí te mou lava ke faí ʻoku fakahoko ia ʻi loto ʻi he ngaahi holisi ʻo homou ngaahi ʻapí”?
ʻOku tokoniʻi fēfē ʻe he ongoongoleleí ʻa e ngaahi mātuʻá ke nau tokangaʻi ʻenau fānaú mei haʻanau hē atu ki tuʻa? Ko e hā ʻoku mahuʻinga ai ke ʻiloʻi neongo ʻa e ngaahi meʻa kotoa ʻoku tau faí, ʻe kei lava pē ke fai ʻe heʻetau fānaú ʻa e ngaahi fili ʻoku hala? Ko e hā e fakafiemālie ʻoku ʻomi ʻe he ongoongoleleí ki he ngaahi mātuʻa faivelenga ʻoku nau kei hokohoko atu pē ʻi he ʻofa mo nau ngāue mo ʻenau fānaú?

ʻOku ʻiloa ʻa Palesiteni Hāloti B. L ʻi heʻene faleʻi naʻe fai ki he ngaahi mātuʻá: “Ko e ngāue mahuʻinga taha ʻa e ʻEikí te mou lava ke faí ʻoku fakahoko ia ʻi loto ʻi he ngaahi holisi ʻo homou ngaahi ʻapí.”