Vahe 19

ʻAi Ha Taimi Ke Mou Māʻoniʻoni Ai

Te tau lava fēfē ʻo ngāue ʻi he ʻaho takitaha ke fafangaʻi fakalaumālie ai kitautolu?

Talateú

Naʻe faʻa akonaki maʻu pē ʻa Palesiteni Hāloti B. Lī ʻo kau ki hono mahuʻinga ke fafangaʻi fakalaumālie kitautolú. Naʻá ne pehē ʻe lava ke fakatatau ʻa hotau sinó ki ha kolotau ʻa ia kuo pau ke tokonaki maʻu pē ki ai kae lava ke ne mālohi ʻi hano ʻohofi kinautolu ʻe ha fili.

Naʻá ne fakamatala ʻo pehē, “ʻOku fakatuʻasino mo fakalaumā- lie ʻa e ngaahi fili ʻo e “kolotau” ʻo e tangatá. ʻA ia ʻoku lava ke kau ki ai “ha mamahi naʻe taʻe ʻamanekina, ha meʻa fakamā ki he fāmilí, hoko ha meʻa fakatuʻupakē ki hoʻo tuʻunga fakapaʻangá, [taʻe faitotonu] ʻa ho kaumeʻa, pe ko ha angahala fakapulipuli ki he ngaahi fono ʻa e ʻOtuá.” Ko e taimi ʻoku hoko mai ai ha ngaahi meʻa pehē ʻi heʻetau moʻuí, ʻoku tau fie maʻu leva ke “toe fakalahi mai mei he ngaahi maʻuʻanga tokoni fakalaumālié. … Kapau kuo ʻikai ke ke toe fetuʻutaki mo e Siasí ʻi haʻo taʻe tokanga pea faka- ʻau ke siʻi hoʻo tui ki he ʻOtuá, kapau kuo teʻeki ke mahino kiate koe ʻi haʻo lautohi mo ako ʻa e founga ke fakamolemoleʻi ai hoʻo ngaahi angahalá, pe kapau kuo teʻeki ke ke maʻu ʻi haʻo faʻa lotu, ha fakapapau ki ha pale ʻe maʻu ʻi he kahaʻú mei he ngaahi feilaulaú mo e mamahí, ta kuó ke ʻosi fakamavaheʻi pē ʻe koe ʻa koe mei he tataki fakalaumālié pea kuo ʻosi mo e mālohi ʻoku fie maʻu ʻe ho laumālié. … Kuo ʻosi mahino pē hono kapu ʻe he ngaahi mālohi ia ʻo Sētané ʻa ho kolotaú. ʻOkú ke tatau pē koe mo e tangata vale naʻe langa hono falé ʻi he funga ʻoneʻoné, pea ko e taimi pē ʻoku tō mai ai ʻa e matangí, ko e holo lahi ʻe hoko ki aí. [Vakai ki he Mātiu 7:24–27.]

“Ko ia ʻoku ou kole ai kia kimoutolu… ke mou moʻui ʻi he ʻaho taki taha ke mou lava ʻo maʻu mei he tupuʻanga ʻo e māmá [ʻa e] meʻakai mo e mālohi ko ia ʻoku feʻunga mo e fiemaʻu ʻo e ʻaho kotoa peé. ʻAi ha taimi ke mou māʻoniʻoni ai ʻi he ʻaho takitaha ʻo hoʻomou moʻuí.”¹

Ngaahi Akonaki ʻa Hāloti B. Lií

ʻOku tau lava fēfē ke fafanga ʻa hotau laumālié?

ʻOku ʻi loto ʻiate kimoutolu kotoa pē ha laumālie ʻa ia ʻoku ta-tau tofu pē mo homou sino fakamatelié ʻi he taimi kuo tupu ai ʻo fuʻu lahí. Koeʻuhi ke tauhi homou sino fakamatelié ke mālohi mo moʻui leleí, kuo pau ke toutou ʻoange ki ai ha meʻakai mo ha inu. Kuo pau ke fehokotaki ʻa e foʻi neave ʻo e sela (cell) kotoa pē ʻo homou ngaahi sinó kae lava ke hokohoko atu ʻa ʻene moʻuí. Kapau ʻe ʻikai ke tauhi maʻu e ngaahi fehokotaki ko ʻeni ʻa e ngaahi neavé pe ke ʻoange ʻa e meʻakai ki he sino fakamatelié, ʻe ʻau- ʻaunga ia, palangia, puke, pea iku ai pē ʻo mate.

ʻOku fie maʻu ke fafangaʻi homou sino fakalaumālié ʻi ha ngaahi vahaʻa taimi hokohoko kae lava ke fakapapauʻi ʻoku moʻui lelei mo mālohi. ʻOku ʻikai lava ʻe he meʻakai fakatuʻasinó ia ʻo feau e fiemaʻu ko ʻení. Kuo pau ke maʻu e meʻakai ki hoʻomou ngaahi fie-maʻu fakalaumālié mei ha ngaahi maʻuʻanga tokoni fakalaumālie. ʻOku fie maʻu e ngaahi tefitoʻi moʻoni ʻo e moʻoni taʻengatá, hangē ko ia ʻoku ʻi he ongoongoleleí, pehē ki he fakamālohi-sino totonú ʻa ia ko e kau ki he ngaahi ʻekitivitī fakalaumālié ke fakafiemālieʻi homou laumālié. ʻOku pehē pē foki mo e mahuʻinga ke tupulaki e laumālié ʻi he fehokotaki mo e ngaahi tupuʻanga fakalaumālie ʻo e moʻoní. Ko ʻene motu pē ʻa hoʻo fehokotaki mo e uho ʻo e foʻi neave fakalaumālié, ʻa ia ko e Siasi ʻo Sīsū Kalaisí, ko e meʻa pē ʻoku hoko aí ko e puke mo e mate fakalaumālié, ʻa ia ʻoku ʻuhinga ia ki he mavahe mei he tupuʻanga ʻo e maama fakalaumālié.²

ʻOku tau fakatupulaki ʻa hotau laumālié ʻaki ʻetau ngāue. … Kuo pau ke tau akoʻi hotau laumālié ʻaki ʻa e tokanga tatau ʻo kapau ʻoku tau fie maʻu ke tau tupulaki kakato, ʻo hangē pē ko ʻetau akoʻi hotau sino fakamatelié. Kuo pau ke tau fakamā- lohisinoʻi fakaʻaho hotau laumālié ʻaki ʻa e lotú, fai fakaʻaho ʻo ha ngaahi ngāue leleí, pea mo e vahevahe mo e niʻihi kehé. Kuo pau ke tau fafanga fakaʻaho hotau laumālié ʻaki ʻa hono ako ʻo e folofolá ʻi he ʻaho kotoa pē, ʻi he [efiafi fakafāmili ʻi ʻapí], ngaahi fakatahaʻangá pea mo hono maʻu ʻo e sākalamēnití. Kuo pau ke tau fakaʻehiʻehi mei he ngaahi meʻa fakatuʻutāmaki ʻoku hoko ki heʻe-tau moʻuí ʻi he taimi ʻoku tau maumauʻi ai ha taha ʻo e ngaahi fekau ʻa e ʻOtuá. ʻOku fakamate ia ki hotau ngaahi laumālié…

ʻOku fai hotau ngaahi sivi fakalaumālié ʻi he taimi ʻoku tau fe-hangahangai ai mo e kau toketā fakalaumālie ʻa e ʻOtuá –ʻa ʻetau kau pīsopé, kau palesiteni siteikí, pea mo hotau Kau Taki Māʻolungá he taimi ʻe niʻihi ʻi he ngaahi ʻinitaviu ʻoku fai maʻu pē ko e fakataumuʻa ke tokoni ki hono teuteuʻi kitautolu ke tau fakalakalakafakalaumālié. ʻOku ʻi ai ha taimi ʻe niʻihi ʻoku faʻa tupu mei he ngaahi ʻinitaviu ko ʻení ha ngaahi fakaleleiʻi lahi ki hotau laumālié.³

Ko e meʻa kotoa pē ʻoku fepaki mo e finangalo ʻo e ʻOtuá ʻoku kona ia ki hoʻomou moʻui fakalaumālié pea kuo pau ke mou faka-mamaʻo mei ai ʻo hangē ko haʻamou fakaʻehiʻehi mei he ngaahi faitoʻo ʻi hoʻomou ngaahi puha tukuʻanga faitoʻo ʻi homou ʻapí ʻoku tohiʻi ai ʻoku koná.⁴

Ko e tangata ʻoku anga-tonú ʻokú ne feinga ke fakalakalaka ki muʻa ʻene moʻuí ʻi heʻene ʻiloʻi ko ia ʻoku fie maʻu ke ne fakatomala fakaʻaho koeʻuhi ko ʻene ngaahi fehalākí pe ko haʻane taʻe tokangá. ʻOku ʻikai ke fuʻu tokanga ia ki he meʻa ʻoku lava ke ne maʻu maí ka ʻokú ne tokanga lahi ange ki he meʻa te ne lava ke foaki atu maʻá e niʻihi kehé, ʻi heʻene ʻiloʻi ko e hala pē ia te ne lava ke maʻu ai ʻa e fiefia moʻoní. ʻOkú ne feinga ke fai hono lelei tahá ʻi he ʻaho taki taha koeʻuhi ke ʻosi e pō ko iá ʻoku lava ke ne fakamoʻoniʻi ʻi hono laumālié ki hono ʻOtuá ko e meʻa kotoa pē kuó ne fai ʻi he ʻaho ko iá, kuó ne fai ia ki he lelei taha naʻá ne lavá.⁵

ʻOku fafangaʻi fēfē ʻa e laumālié ʻe hono tauhi ʻo e ʻaho Sāpaté ke māʻoniʻoní?

ʻOku ʻikai ko e Sāpaté ko ha ʻaho pē ke mālōlō ai mei he ngaahi ngāue anga-maheni ʻo e uiké. ʻOku ʻikai totonu ke lau ia ko ha ʻaho pē ke fakapikopiko mo nofo noa ai pe fai ai ha ngaahi fakafiefia fakatuʻasino mo e ngaahi meʻa ʻoku mou manako hono faí. Ko ha ʻaho kātoanga maʻu meʻatokoni ia maʻa homou laumālié. Ko e feituʻu ʻo e maʻu meʻatokoni fakalaumālie ko ʻení ko e fale ʻo e lotú. ʻOku mou feohi heni mo kinautolu ʻoku fekumi ki ha meʻakai fakalaumālie ʻo hangē pē ko kimoutolú. ʻOku mou fakataha mo kinautolu ke hiva mo lotu mo hū ki he Fungani Māʻolungá, pea maʻu ʻa e sākalamēniti toputapú ko e fakamanatu homou ngaahi ngafa ʻi hoʻomou hoko ko ha foha mo ha ʻofefine ʻo e ʻOtuá ʻi he moʻui fakamatelié ni, pea mo fakamanatu e fakalelei ʻa e Fakamoʻuí mo toe fuakava ke faitotonu ki hono huafá. …

Tatau ai pē pe ʻoku mou ʻi ʻapi pe ʻi falelotu, ka ʻoku totonu ke fenāpfasi maʻu pē hoʻomou ngaahi fakakaukaú mo homou ʻulu-ngāangá pea mo e laumālie mo e taumuʻa ʻo e ʻaho Sāpaté. Neongo ʻoku feau ʻe he ngaahi feituʻu fakafiefiá ʻa e ngaahi fiemaʻú ʻi honau taimi totonú, ka ʻoku ʻikai ke nau fakatupulekina faka-laumālie pea ʻe ʻikai hanga ʻe he ngaahi feituʻu ia ko ʻení ʻo ngaohi kimoutolu ke mou “maʻa mei māmani” ka te nau taʻofi kimoutolu mei he “mahu ʻo māmaní” ʻa ia kuo talaʻofa ʻaki kia kinautolu ʻoku tauhi ki he fono ʻo e ʻaho Sāpaté. [Vakai ki he T&F 59:9, 16.] Ko kimoutolu ʻoku angaʻaki hono maumauʻi ʻo e ʻaho Sāpaté, ʻikai ke mou “tauhi ia ke māʻoniʻoní,” ʻoku mole meiate kimoutolu ʻa e laumālie ʻoku fonu fiefia ʻi hono fakafetongi ʻaki ha kiʻi fiefia ʻoku siʻisiʻi. ʻOku fuʻu lahi hoʻomou tokanga ki hoʻomou ngaahi holi fakatuʻasinó kae kau kovi ia ki hoʻomou moʻui lelei fakalaumālié. ʻOku hā mei he tokotaha ʻokú ne maumauʻi ʻa e ʻaho Sāpaté ha ngaahi fakaʻilonga ʻo e kamakamata ko ia ke vaivai ʻene tuí ʻaki ene taʻe tokanga ki heʻene ngaahi lotu fakafāmilí, ʻi heʻene faka-angá, ʻikai ke totongi ʻene vahehongofulú mo ʻene ngaahi foakí; pea ko e tokotaha peheé ʻoku kamata ke fakapoʻuli ʻa hono ʻata-maí koeʻuhi ko e fiekaia fakalaumālie ʻoku hokó pea vave ʻa e kamata ke ne toe ongoʻi lotolotoua mo manavahē foki ʻo ʻikai ai ke ne feʻunga ke ako pe tupulaki fakalaumālie ʻi he anga māʻoniʻoní. Ko e ngaahi fakaʻilonga ʻeni ʻo e ʻauʻauha mo e mahamahaki faka-laumālié ʻa ia ʻoku toki lava pē ke faitoʻo ʻaki hano fafangaʻi ʻo e laumālié.

Fakatau ange ke ʻoua naʻa ngata pē ʻi heʻetau fakaʻamu ke faka-lahi atu ki he ngaahi ʻekitivitī fakalotu ʻoku tau fai ʻi he ʻAho ʻo e ʻEikí, ka ke tau toe fakasiʻisiʻi ange foki ʻi he ʻaho ko iá ʻa hono fai ʻo e ngaahi ngāue fakaʻapí, pea ko e ngaahi ngāue pē ʻoku ʻaongá ke fai ʻi tuʻa he ʻapí. ʻAi ke hoko ʻeni ko ha ʻaho ʻo hono ako ʻo e folofolá mo e ngaahi tohi lelei kehé ʻi he faʻa lotu mo e faʻa fakakaukau ki ai. Fai haʻo tohi ki ho kaumeʻá pe ki hao ʻofaʻanga ʻoku mamaʻo mei ʻapi pe ki hao kaungāmeʻa te ne fie maʻu ho mālohi-nga fakalaumālié lolotonga ʻokú ke fonu ʻi he fiefia ʻo e ʻaho Sāpaté. Ngaohi homou ʻapí ke hoko ko ha feituʻu ʻoku hivaʻi mo tā ai ʻa e ngaahi fasi fakaʻofoʻofa ʻoku fenāpasi mo e laumālie ʻo e ʻahó. ʻI he hokosia ʻa e efiafí pea mou fakataha mai mo e fāmilí pe hamou ngaahi kaumeʻa ki homou loto-falé, mou aleaʻi ʻa e ngaahi moʻoni mahuʻinga ʻo e ongoongoleleí pea mou fakaʻosi ʻaki ha lotu fakafāmili. Kuó u ʻiloʻi mei he ngaahi meʻa kuó u aʻusiá ko e ueʻi ko ia ʻoku fai ʻe he konisēnisí ki ha mēmipa faivelenga ʻo e Siasí, ko e fakaʻilonga pau taha ia ki he meʻa ʻoku fepaki mo e lau-mālie ʻo e lotú ʻi he ʻAho Sāpaté.

… Kae ʻoua naʻa mou pehē ʻoku feʻunga ʻataʻatā pē ʻa e tauhi pau ki he fono ʻo e ʻaho Sāpaté ki hono tauhi homou laumālié ke moʻui leleí. Kuo pau ke mou fafangaʻi homou laumālié ʻi he ʻaho kotoa pē ʻo e uiké. ʻOku hoko ʻa e ngaahi lotu fakafāmilí mo e ngaahi lotu liló, lau ʻo e folofolá, ʻofá mo e ngāue tokoni fakaʻaho ki he niʻihi kehé, ko ha mana ia mei langi ke fafangaʻi homou lau-mālié. Ko e ivi mālohi foki ʻe taha ki he anga māʻoniʻoni ʻi ʻapí ko hono fai fakauike ʻo e Efiafi Fakafāmili ʻi ʻApí. …

Ko ia ʻoku ou kole ai kia kimoutolu ke ʻoua naʻa mou taʻofi ʻa e ivi ko ia ʻoku totonu ke maʻu ʻe homou laumālié ʻi hano maumauʻi ʻo e ʻAho Sāpaté, ka ʻoku ou naʻinaʻi fakamātoato atu ke mou mo- ʻui ʻi he ʻaho takitaha ke mou lava ʻo maʻu mei he tupuʻanga ʻo e māmá ʻa e meʻakai mo e ivi feʻunga ki he ngaahi fiemaʻu ʻo e ʻaho kotoa pē.⁶

Ko e hā ha founga ʻoku lelei fakalaumālie ai kia kitautolu ʻa e ʻaukaí mo hono totongi ʻo e ngaahi foaki ʻaukaí?

Naʻá ku fehuʻi loto pē, “Ko e hā e fono ʻo e ʻaukaí?” pea ne u maʻu ʻa hono fakaʻuhingaʻi ʻe Palesiteni Siosefa F. Sāmitá ʻi he ngaahi lea ko ʻení, ʻa ia ne u pehē ko ha fakaʻuhingaʻi fakaʻofoʻofa moʻoni ia:

“Ko ia ai, ko e fatongia ia ʻo e tokotaha Siasi kotoa pē ke ne foaki ki heʻene pīsopé ʻi he ʻaho ʻaukaí ʻa e meʻakai te ne maʻu pe ʻe maʻu ʻe hono fāmilí he ʻaho ko iá, koeʻuhí ke lava ʻo ʻoatu ia ki he masivá ke ʻaonga kia kinautolu pea hoko ko hanau tāpuaki; pea kapau ʻoku ʻikai foaki ha meʻakai pea foaki pē ʻa e mahuʻinga ʻo e meʻakai ko iá, pea kapau ʻoku koloaʻia ʻa e tokotaha ko iá, ke foaki lahi ʻe ia ʻi he paʻanga, ʻa ia kuo tuku fakatatali mo fakatapui maʻá e masivá” [Gospel Doctrine, paaki hono 5 (1939), 243.]

Hili iá ne u fehuʻi loto pē, “Ko e hā e ngaahi tāpuaki kuo tala- ʻofa mai ʻe he ʻEikí te tau maʻu mei he ʻaukaí mo hono totongi ʻo e ngaahi foaki ʻaukaí?“ Naʻe ʻomi ʻa e ngaahi talí ʻe Palesiteni [Hiipa J.] Kalānite ʻi ha fakamatala kuo ʻosi tohi, ʻo pehē: ʻuluakí, ko e tāpuaki fakapaʻangá pea ko hono hokó ko e fakalaumālié. Ko e meʻa ʻeni naʻá ne lea ʻaki ʻo kau ki he ngaahi tāpuaki faka-paʻangá:

“Tuku muʻa ke u palōmesi atu kia kimoutolu ʻi heni he ʻahó ni, kapau ʻe hoko ʻa e Kāingalotú mei he ʻahó ni ʻo fai atu ko ha ka-kai ke nau tauhi anga-tonu mo loto-tōnunga ʻa e ʻaukai fakamā- hiná, ʻo nau totongi ki he nima ʻo ʻenau kau pīsopé ʻa e lahi totonu ʻo e meʻa ne nau mei fakamoleki ki he meʻakai feʻunga mo e houa kai ʻe ua naʻe ʻikai ke nau kai aí … te tau maʻu ʻa e paʻanga kātoa ʻe ʻaonga ki hano tokangaʻi ʻo kinautolu ʻoku nofo noá pea pehē kia kinautolu ʻoku masivá.” [Gospel Standards, fakataha-tahaʻi ʻe G. Homer Durham (1941), 123.]

Ko ʻene lea ʻeni fekauʻaki mo e ngaahi tāpuaki fakalaumālié:

“Ko e tokotaha kotoa pē ʻi he Kāingalotú ʻokú ne ʻaukai ʻi ha houa kai ʻe ua tuʻo taha he māhiná, ʻe lelei ia ki hono laumālié pea ʻe langaki hake ai ʻa ʻene tui ki he ongoongolelei ʻo Sīsū Kalaisí—ʻo lelei fakalaumālie kiate ia ʻi ha founga fakaofo.” [Gospel Standards, 123.]

ʻI heʻeku lau iá, ne u manatu ai ki he lea ʻa e Palōfita ko Isaiá ʻo kau ki he ngaahi tāpuaki ʻe maʻu ʻe ia te ne ʻaukai mo tufaki ʻene maá ki he fiekaiá. … Ko ha ngaahi talaʻofa fakalaumālie fisifisi-muʻa ʻeni ʻe fā naʻe fai ʻe he ʻEikí kia kinautolu ʻe ʻaukai pea tufaki ʻenau maá ki he fiekaiá; ko e ʻuluaki talaʻofá ʻeni ʻo fakatatau ki hono hiki ʻi he tohi ʻa Isaiá:

“ʻE toki ulo atu hoʻo māmá ʻo hangē ko e pongipongí, pea ʻe tupu vave hoʻo moʻui leleí: pea ʻe muʻomuʻa ʻi ho ʻaó ʻa hoʻo mā- ʻoniʻoní; pea ʻe muimui ʻiate koe ʻa e nāunau ʻo [e ʻEikí].“

Hili ko ia naʻe toe talaʻofa ʻa e ʻEikí ʻo pehē:

“Pea te ke toki ui pea ʻe tali ʻe [he ʻEikí]; te ke kalanga, pea te ne pehē, Ko au ʻeni.”

Pea naʻe toe talaʻofa pē ʻe he ʻEikí:

“Pea kapau te ke tangaki ho laumālie ki he fiekaiá, pea fafanga ʻa e laumālie ʻoku mamahí; pea ʻe toki ʻalu hake ho māmá ʻi he fakapoʻulí, pea tatau ʻa e fakapoʻulí mo e hoʻatā mālie.”

Pea fakaʻosi ʻaki ʻa e talaʻofa ko ʻ ení: :

“Pea ʻe fakahinohino koe ʻe [he ʻEikí] maʻu ai pē, pea ʻe fakainu ho laumālié ʻo ka ʻikai ha vai, pea ʻe fakamālohi ho ngaahi huí: pea te ke hangē ko e ngoue ʻoku fakaviviku, pea hangē ko e mata-vai moʻui, ʻoku tupu maʻu ai pe hono vaí.” [Isaia 58:8–11.]

ʻI hono fakafekauʻaki e ngaahi tāpuakí ki he ngaahi meʻa faka- ʻaho mo e ngaahi palopalema ʻo e moʻuí, ʻoku fakatātaaʻi lelei mai ia ʻi ha meʻa naʻe fakamatalaʻi ʻe ha taha ʻo ʻetau kau palesiteni fakamisioná ki he Kau Taki Māʻolungá he ngaahi taʻu siʻi kuo hilí. Naʻe fakamatalaʻi ʻe he tamaí ni ʻa e meʻá ni lolotonga haʻamau talanoa ki he ngaahi ʻaho ʻo e nofo tailiili lolotonga e taú:

Ko ha ʻaho ʻaukai ʻeni. Kuó ne ʻā hengihengia hake, ʻosi fai kotoa e ngaahi ngāue ʻi he fāmá, pea naʻá ne fakaʻaongaʻi ha kiʻi taimi siʻi ʻi heʻene ngoueʻangá kimuʻa pea toki taimi ke ne ʻalu ki he fakataha ʻa e Lakanga Fakataulaʻeikí naʻe fai he pongipongí …

ʻI heʻene ʻalu atu ki he ngoueʻangá he pongipongi ko ʻení, naʻe ʻikai pē haʻane fakakaukau ki hono ongo foha ne na ʻi he malaʻe taú, ka naʻe fakafokifā pē ʻene tuʻu lolotonga ʻene luelué ko haʻane ongoʻi faikehe ʻoku ha meʻa ne hoko ki ha taha ʻo hono ongo fohá. Naʻá ne tafoki ke foki fale. Naʻá ne pehē, “Naʻe ʻikai ke u luelue ka naʻá ku lele, peá u ui hoku fāmilí ki he loki ʻi muʻá ʻo pehē ange, ‘ ʻOku ʻikai ke u toe fie maʻu ha taha ʻi hoku fāmilí ke kai ha meʻi meʻakai he ʻahó ni, ʻoku ou fie maʻu ke mou ʻaukai, mo lotu, pea mou tūʻulutui fakataha hifo ʻo lotu fakafāmili mo au heni he ʻoku ou ongoʻi pē ʻoku ʻi ai ha meʻa ʻoku hoko ki ha taha ʻo ʻetau ongo tamaiki ʻi he taú.’ ”

Ko ia ne nau haʻohaʻo mai ʻo fai ʻenau lotu pongipongí. Naʻa nau ʻaukai pea naʻe ʻikai tuku ʻenau ʻaukaí, ka naʻe toe hoko atu hili e ʻaho ko iá. Naʻe ʻosi mai ha ngaahi ʻaho ʻo e loto-moʻuá pea toki aʻutaki mai ha tala mei he Kolosi Kulá ʻo pehē ko e pongi-pongi ko iá (ko e taimi ko ē naʻa nau fakatonutonu ai ʻenau taimí, ko e taimi totonu pē ia naʻe ongoʻi ai ʻe he tamai ko ʻení ʻa e meʻa naʻe hokó), naʻe molo ai ʻa ʻene tamasiʻí mo hono kaumeʻa ʻi ha “tauhele” ʻa ia naʻe pā ʻeni ʻo movete ai ʻa e sino ʻo hono kaumeʻá kae kafo lahi ʻaupito ʻa e tamasiʻí ni ʻo mei mate.

Ko e ʻaukaí mo e lotú—“Pea te ke toki ui pea ʻe tali ʻe [he ʻEikí]; te ke kalanga, pea te ne pehē, Ko au ʻeni.”⁷

ʻOku ʻomi fēfē kitautolu ʻe he fakalaulaulotó ke tau ofi ange ai ki he ʻEikí?

Naʻe pehē ʻe Palesiteni [Tēvita O. MaKei], “ʻOku ʻikai ke tau tuku ha taimi feʻunga ke tau fakalaulauloto ai.” ʻOku ou ʻā pongi-pongia hake. …, he nimá, ʻi he taimi ʻoku maama mo mālōlō lelei ai hoku ʻatamaí mo hoku laumālié. Hili iá ʻoku ou fakalau-lauloto leva. Te mou lava ke toe ofi ange ki he ʻEikí ʻi he taimi ʻoku mou ako ai ke fakalaulaulotó. Tuku ke akonekina homou laumālié ʻe he Laumālié.⁸

Naʻe toki toʻo leva ʻe he Palesitení ha taimi ke ne fakamatala ai ki ha meʻa naʻe hoko ʻi he moʻui ʻa Pīsope Sione Uēlesí (John Wells), ʻa ia naʻe hoko ki muʻa ko ha mēmipa ʻo e Kau Pīsopeliki Pulé. Naʻe mate ha foha ʻo Pīsope Uēlesini ʻi he Teleʻa ʻImikuleisoní ʻi he halanga lēlué… Naʻe moloki hono fohá ʻe ha lēlue uta koloa. Naʻe ʻikai lava hano fakafiemālieʻi ʻo Sisitā Uēlesi. Naʻa ne tengihia ia ʻi he ʻaho ʻe tolu pea toki fai ʻa e meʻa-fakaʻeikí, ʻikai pē ke ne maʻu ha fiemālie lolotonga e meʻa-fakaʻeikí, pea naʻe lahi ʻaupito ʻa e hohaʻa ʻa hono ʻatamaí. ʻI he ʻaho pē ʻe taha hili ʻa e meʻa-fakaʻeikí, lolotonga ʻene tokoto pē ʻo mālōlō ʻi hono mo-hengá mo e loto mamahí, naʻá ne pehē naʻe hā ange ʻene tama ta-ngatá ʻo pehē ange, “ʻE Faʻē, ʻoua te ke mamahi. ʻOua te ke tangi. ʻOku ou sai pē au.” Naʻá ne tala ange ki he fineʻeikí naʻe ʻikai ma-hino e tupuʻanga ʻo e fakatuʻutāmakí. Naʻá ne fakamatala ange naʻá ne ʻosi fakaʻilonga ange ki he tangata ʻenisiniá ke lele peá ne feinga leva ke ne piki ʻi he ngaahi ukamea he tafaʻaki ʻo e lēlué ʻo hangē ko ia naʻá ne faʻa faí, ka ʻi heʻene feinga ke fai ʻení naʻe ʻefi-hia hono vaʻé ʻi ha akaʻi ʻakau ʻo ʻikai ai ke ne lava ʻo piki ki he uka-meá ʻo homo hifo ai pē hono sinó ʻi he lalo lēlué. Naʻe ʻosi mahino mai pē ko e fakatuʻutāmaki ʻeni ia. Naʻá ne pehē ko e taimi pē ko ia naʻá ne ʻiloʻi ai ʻokú ne ʻi ha feituʻu kehé naʻá ne feinga ke ne sio ki heʻene tamaí ka naʻe ʻikai ke ne aʻu ki ai. Naʻe lolotonga femoʻuekina ʻene tamaí ʻi ha ngaahi fatongia ʻi he ʻōfisí ʻo ʻikai ai ke ne lava ʻo tali ki he ui ʻa hono fohá; ko ia ai, naʻa ne haʻu ki heʻene faʻeé ʻo ne pehē ange ki ai, “Tala ange ki heʻeku tamaí ʻoku ou sai pē. ʻOku ou fie maʻu ke ʻoua naʻá mo toe loto mamahi..“

Naʻe pehē leva ʻe Palesiteni Makei ko e meʻa ko ē naʻá ne feinga ke fakamamafaʻí, ko e taimi ʻoku tau kau mālōlō lelei ai ʻi ha loki ʻoku lōngonoá, ʻoku tau ongoʻingofua ai e ngaahi meʻa ko iá, pea kiate iá, ko e taimi ʻokú ne fakakaukau lelei taha aí ʻa e taimi ʻokú ne ʻā hake ai he pongipongí kuó ne mālōlō lelei pea ʻi heʻene fakakaukauʻi e ngaahi ngafa ʻo e ʻahó, ʻoku hā mahino mai kiate ia e ngaahi fakakaukaú ʻo hangē ka ne ongoʻi ha leʻo ʻe pehē mai ʻoku tonu e ngaahi fakakaukau ko iá. Kapau ʻoku tau hohaʻa ki ha meʻa pea tau ongoʻi ʻita, ʻoku ʻikai leva ke hoko mai e ueʻi faka-laumālié ia. Kapau ʻoku tau moʻui ke ʻataʻatā hotau ʻatamaí mei he hohaʻá, maʻa hotau konisēnisí pea tonu ʻetau feongoʻiʻaki mo e niʻihi kehé, ʻe hoko moʻoni mai leva e ngāue ʻa e laumālie ʻo e ʻEikí ki hotau laumālié ʻo hangē pē ko haʻatau toʻo hake ʻa e telefoní; ka mou fakatokangaʻi ʻeni, ko e taimi ʻe hoko mai aí, kuo pau ke tau loto-toʻa feʻunga ke fai e ngāue ʻokú ne fakahā maí.

Tuku ke hoko ia ko ha meʻa ke manatua—mou fai pehē foki mo kimoutolu. Tuku hamou taimi ke mou fakalaulauloto ai. ʻE lahi e taimi te mou fekuki ai mo ha ngaahi palōpalema, ka te mou lava pē ʻo ʻiloʻi ʻi he laumālié ʻa e founga ke veteki ʻakí.⁹

ʻOua naʻa mou fuʻu femoʻuekina ʻo ʻikai ha taimi ke mou faka-laulauloto ai. Tuku ha mou taimi ke fai ai ia. ʻOku ʻikai maʻu ʻa e fakamoʻoni mahuʻinga tahá ʻi he mamatá pē, ka ʻi he fakamoʻoni ʻi he lotó. Mahalo ʻoku ofi mai ange ʻa Kalaisi ʻi he meʻa ʻoku tau ʻiló. “ʻOku ou ʻi homou lotolotongá pea ʻoku ʻikai te mou lava ke ma-mata kiate au. [ʻOku fakamoʻoni ʻa e Laumālie Māʻoniʻoní ki hono moʻoní]. ʻOku mamata kiate kimoutolu ʻa hoku matá. Ka ʻe vave mai ʻa e ʻaho te mou ʻiloʻi ʻoku ou ʻi ai.” [Vakai ki he T&F 38:7–8.]¹⁰

Ngaahi Fokotuʻu ki he Akó mo Hono Aleaʻí

Ko e hā kuo pau ke tau tuku ai ha taimi ke fafangaʻi fakalau-mālie kitautolú? Ko e hā e meʻa ʻoku tau fai ʻi he ʻaho takitaha ke fakatupulaki ai ʻetau anga fakalaumālié?
Ko e hā e meʻa ʻe lava ke ne taʻofi ʻetau ngaahi feinga ko ia ke fafangaʻi fakalaumālie kitautolú?
Te tau lava fēfē ʻo ngaohi hotau ʻapí ke hoko ko ha feituʻu ʻoku tanumaki ai e tuʻunga fakalaumālie ʻo e tokotaha kotoa pē he fāmilí?
Ko e hā ha ngaahi founga kuo tokoniʻi ai koe ʻe hono faka- ʻapaʻapaʻi ʻo e ʻaho Sāpaté ke ke tupulaki fakalaumālie? Ko e hā ha ngaahi ʻekitivitī ʻi he ʻaho Sāpaté kuo nau tokoniʻi koe mo ho fāmilí ke mou tauhi maʻu ʻa e laumālie ʻo e lotú ʻi he ʻahó ka-kato? Ko e taimi ko ia ʻoku tau maumauʻi ai ʻa e ʻaho Sāpaté, ko e hā ʻoku “mole ai meiate kitautolu ʻa e laumālie ʻo e fiefiá ʻi hono fakafetongi ʻaki ʻo ha kiʻi fiefia ʻoku siʻisiʻí”
Ko e hā e ngaahi tāpuaki ʻoku maʻu ʻe kinautolu ʻoku ʻaukaí? (Vakai ki he Isaia 58:8–11). Ko e hā ha founga kuó ke mamata ai ki hano fakahoko ʻo e ngaahi tāpuaki ko ʻení?
Ko e hā ʻoku tau ako mei he talanoa kia Pīsope Uēlesí ʻo kau ki hono mahuʻinga ʻo hono tuku ha taimi ke fakalaulauloto ai ki he ngaahi meʻa fakalaumālié? Ko e hā ha ngaahi founga kuó ke lava ke fakahoko ai ha fakalaulauloto ki he ngaahi meʻa faka-laumālié ʻi hoʻo moʻuí?

Naʻe akonaki ʻa Palesiteni Hāloti B. Lī ʻo pehē: “Moʻui ʻi he ʻaho taki taha ke mou lava ʻo maʻu mei he tupuʻanga ʻo e māmá [ʻa e] meʻakai mo e mālohi ko ia ʻoku feʻunga mo e fiemaʻu ʻo e ʻaho kotoa peé. ʻAi ha taimi ke mou māʻoniʻoni ai ʻi he ʻaho takitaha ʻo hoʻomou moʻuí.”