Vahe 6
Ke Fanongo ki he Leʻo ʻo e ʻEikí
Te tau lava fēfē ʻo maʻu ha fakahā fakafoʻituitui mei he ʻEikí?
Talateú
Ne pehē ʻe Palesiteni Hāloti B. Lī ʻi ha meʻa ʻe taha: “ʻOku ou maʻu ha loto tui ʻa ia ne kamata ʻaki ha kihiʻi fakamoʻoni mahinongofua ne u maʻu ʻi heʻeku kei siʻí—ʻOku ou tui mahalo ko hoku taʻu hongofulú ia pe hongofulu mā tahá. Ne u ʻi ha faama mamaʻo ai mo ʻeku tamaí, ʻo u feinga ke fakafemoʻuekinaʻi hoku taimí kae ʻoua kuo pehē ʻe heʻeku tamaí ke ma foki. Naʻe ʻi he lotoʻā ʻo e kaungāʻapí ha ngaahi fale holo ʻe tohoakiʻi ki ai ha tokanga ʻa ha tamasiʻi fie ʻilo pē, pea ne u taʻe manonga foki. Ne u kamata leva ke kaka atu he ʻaá, peá u ongoʻi ai ha leʻo mahino ʻo hangē ko hoʻomou fanongo ki hoku leʻó, ʻi heʻene ui au mo pehē mai, ‘ʻOua te ke ʻalu ki ai!’ Ne u tafoki ai ke vakai ki heʻeku tamaí pe ko ʻene lea mai koā kia au, ka naʻe ʻi he tuliki ia ʻe taha ʻo e ngoueʻangá. Naʻe ʻikai ha taha kehe te u toe sio ki ai, peá u ʻilo leva ai, neongo ʻeku kei siʻí, ʻoku ʻi ai mo ha kakai ʻoku ʻikai ke u lava ʻo sio ki ai, he naʻá ku fanongo moʻoni ki he leʻó ni. Talu mei ai, ko e taimi pē ʻoku ou fanongo ai pe lau ʻa e ngaahi talanoa ki he Palōfita ko Siosefa Sāmitá, ʻoku mahino kia au hono ʻuhinga ʻo e fanongo ki ha leʻó, koeʻuhí he naʻe hoko tonu kiate au.”1
Mahalo naʻa ʻikai folofola fakahangatonu mai ʻa e ʻEikí kia kitautolu ʻi hono leʻó, ka ʻi heʻetau feinga ke fakataufolofola kiate Ia mo ʻilo ʻa e founga ʻoku folofola mai ai kia kitautolú, ʻoku kamata ai pē ke tau ʻilo Ia. Naʻe pehē ʻe Palesiteni Lī ko hono “ʻilo ko ia ʻo e ʻOtuá mo Sīsū Kalaisi naʻá ne fekau maí (vakai, Sione 17:3), ʻo hangē ko hono fakamatala ʻe he ʻEikí ki heʻene kau ākongá, ke te kamata ʻi he hala mahino ko ia ʻoku fakatau atu ki he moʻui taʻengata ʻi he ʻao ʻo e ongo tangata nāunauʻiá ni.“2
Ngaahi Akonaki ‘a Hāloti B. Lií
Ko e hā e ngaahi founga ʻoku fetuʻutaki ai ʻa e Tamai Hēvaní mo ʻEne fānaú?
Ne u fanongo ki ha malanga fakalaumālie ʻa Palesiteni [J. Lūpeni] Kalake ʻi he ʻUnivēsiti Pilikihami ʻIongí. … Naʻá e fakamatalaʻi fakaikiiki ai ʻa e ngaahi faʻahinga ʻo e fakahā ʻoku hoko maí. Naʻe ʻuluaki lea kau ki he hā tonu maí, ʻa ia naʻá ne fakamatalaʻi ko ha meʻa ia ʻoku hā hangatonu mai ai ʻa e Tamaí pe ko e ʻAló, pe folofola hangatonu ki ha tangata. Naʻe fefolofolai ʻa Mōsese mo e ʻEikí, ko e mata ki he mata [vakai, Mōsese 1:1–4]; Naʻe maʻu ʻe Taniela ha fakahā pehē (theophany), ʻa ia ko ha hā fakahangatonu mai ki ai [vakai, Taniela 10]. ʻI he hāʻele mai ʻa e ʻEikí kia Sione Papitaiso ke papitaisó, naʻe ongo mai ha leʻo mei he langí ʻo pehē, “Ko hoku ʻAlo ʻofaʻangá ʻeni ʻa ia ʻoku ou fiemālie lahi ai” [Mātiu 3:17]. ʻI hono fakaului ʻo Paulá, … naʻe hoko ai mo ha hā fakahangatonu mai, pea ongona mo ha leʻo [vakai, Ngāue 9:1–6]. ʻI he moʻunga ʻo e liliú, he taimi ko ia ne fononga atu ai ʻa Pita, Sēmisi, mo Sione mo e ʻEikí ki he moʻunga māʻ-olunga ko ia ne hā ai ʻa Mōsese mo ʻIlaisiā kia kinautolú, naʻe toe ongona ai ha leʻo mei he langí ne pehē, “Ko hoku ʻAlo ʻofa-ʻangá ʻeni ʻa ia ʻoku ou fiemālie lahi ai. …” (Mātiu 17:5).
Mahalo ko e maʻongoʻonga taha ʻo e ngaahi hā fakahangatonu ko ʻeni ʻi hotau kuongá ʻa e hā ʻa e Tamaí mo e ʻAló ki he Palōfita ko Siosefa Sāmitá ʻi he vao ʻakaú [vakai, Hisitōlia — Siosefa Sāmita 2:14–17]. Hili iá, ne toe ʻi ai mo ha ngaahi hā kehekehe mai, pea ko e taha ʻo kinautolu ʻoku hiki ia ʻi he vahe 110 ʻo e Tokāteline mo e Ngaahi Fuakavá, ʻi he hā ʻa e Fakamoʻuí kia Siosefa mo ʻŌlivá. …
Ko e founga ʻe taha ʻoku tau maʻu ai ʻa e fakahaá ne fakamatalaʻi ʻe he palōfita ko ʻĪnosí. Naʻá ne hiki ʻa e fakamatala mahuʻinga ko ʻení ʻi heʻene lekooti he Tohi ʻa Molomoná: “Pea ʻi he lolotonga ʻo ʻeku feinga pehē ʻi he laumālié, ʻiloange, naʻe toe ongo mai ʻa e leʻó ʻo e ʻEikí ki hoku lotó. …” [ʻĪnosi 1:10.]
Ko hono fakalea ʻe tahá, ʻoku ʻi ai ha ngaahi taimi ʻoku tau ongona ai ʻa e leʻo ʻo e ʻEikí ʻoku ongo mai ki heʻetau fakakaukaú, pea ʻi he taimi ko ia ʻoku hoko mai aí, ʻoku mālohi pehē fau ʻa e ongo ko iá ʻo hangē pē ia ʻokú Ne ifiʻi ha talupite ʻi hotau telingá. …
ʻI he talanoa he Tohi ʻa Molomoná, ne valokiʻi ai ʻe Nīfai hono ongo taʻoketé, ʻo ne kole ke na fakatomala, mo fakaongo ange ʻa e leʻo tatau pē ʻi heʻene pehē: “… kuó ne folofola kiate kimoua ʻaki ʻa e kihiʻi leʻo siʻi, ka naʻe ʻikai te mo kei lava ke ongo, ʻo ʻikai ai ke mo malava ke ongoʻi ʻene folofolá. …” (1 Nīfai 17:45.)
Ko ia, ʻoku hanga ai ʻe he ʻEikí, ʻi he fakahā, ʻo ʻomi ha ngaahi fakakaukau ki hotau ʻatamaí ʻo hangē ha leʻo ʻoku lea maí. ʻE lava nai ke u fai ha fakamoʻoni ʻi he loto fakatōkilalo ki he moʻoni ko iá? Ne u ʻi ha meʻa ʻe taha ʻa ia ne u fie maʻu tokoni ai. Ne ʻafioʻi ʻe he ʻEikí ʻa ʻeku fie maʻu tokoní, koeʻuhí he naʻá ku ʻi ha ngāue mahuʻinga ke fai. Naʻe fakaʻaaki au ʻi he hengihengí ʻo fakatonutonu au fekauʻaki mo ha meʻa ne u palani ke fakahoko ʻi ha founga naʻe ʻikai totonu, pea naʻe fakahinohino lelei mai kiate au hono foungá ʻi heʻeku kei tokoto he hengihengi ko iá, ʻo hangē tofu pē ne ʻi hoku veʻe mohengá ha taha ʻo ne tala mai ʻa e meʻa ke u faí. ʻIo, ʻoku ongo mai ʻa e leʻo ʻo e ʻEikí ki hotau ʻatamaí pea ʻe lava ke fakahinohinoʻi ai kitautolu.
ʻOku tau toe lava foki ʻo maʻu fakahā ʻi he mālohi ʻo e Laumālie Māʻoniʻoní. Naʻe folofola ʻa e ʻEikí ki he Palōfita ko Siosefa Sāmitá he kamakamata mai ʻo e Siasí, “ʻIo, vakai te u fakahā kiate koe ʻi ho ʻatamaí pea ʻi ho lotó, ʻi he Laumālie Māʻoniʻoní, ʻa ia ʻe … nofoʻia ʻi ho lotó. Ko ʻeni, ko e laumālie ʻeni ʻo e fakahaá. …” (T&F 8:2–3.) ʻOku mou manatuʻi hono fakafiemālieʻi ʻe he ʻEikí ʻEne kau ākongá, ki muʻa ʻi hono tutukí ʻi Heʻene pehē, “… he kapau ʻe ʻikai te u ʻalu, ʻe ʻikai haʻu kiate kimoutolu ʻa e Fakafiemālié. … Ka ʻi he haʻu ʻa e Laumālie ʻo e moʻoní [Laumālie Māʻoniʻoní], ʻe tataki ʻe ia ʻa kimoutolu ki he moʻoni kotoa pē: … pea ʻe fakahā ʻe ia kiate kimoutolu ʻa e ngaahi meʻa ʻe hokó” (Sione 16:7, 13), “[te ne] fakamanatuʻi ʻa kimoutolu ʻi he meʻa kotoa pē. …” (Sione 14:26.) ʻOku tau mamata ai ki he mālohi ʻo e Laumālie Māʻoniʻoní. Ne pehē ʻe he Palōfita ko Siosefa Sāmitá ʻi fekauʻaki mo e meʻá ni, “He ʻikai lava ʻe ha tangata ʻo maʻu ʻa e Laumālie Māʻoniʻoní taʻe maʻu ai mo ha ngaahi fakahā. Ko e Laumālie Māʻoniʻoní ko ha taha fai fakahā ia.” (Teachings of the Prophet Joseph Smith, p. 328.)
Tuku muʻa ke u kiʻi fulihi ia…ʻo pehē, ko e mēmipa kotoa pē ʻo e Siasí kuo ʻosi papitaiso ʻoku ʻosi hilifaki nima ki ai ʻa kinautolu ne nau fai ʻa e ouaú, ʻo fekau ke ne maʻu ʻa e Laumālie Māʻoniʻoní, ka ʻo kapau ʻoku teʻeki ke ne maʻu ha fakahā ʻi he laumālie ʻo e Laumālie Māʻoniʻoní, ʻa ia ʻoku ʻi ai ʻene totonu ki aí. ʻOku ʻi ai ha meʻa mātuʻaki mahuʻinga ʻi he meʻa ko iá. Kau fakaʻaongaʻi muʻa ʻa e lea ʻa e Palōfita ko Siosefa Sāmitá fekauʻaki mo e fakahaá:
“ʻE ʻaonga ki ha taha pē kapau te ne fakatokangaʻi ʻa e ʻuluaki ueʻi ʻa e laumālie ʻo e fakahaá; hangē ko ʻení, ko e taimi te ke ongoʻi ai haʻane hū atu ha fakakaukau maʻa pe haohaoa, te ne lava ke ne ʻoatu ha ueʻi ʻo ha ngaahi fakakaukau, pea ʻi hoʻo fakatokangaʻi iá, te ke fakatokangaʻi ʻoku hoko ia ʻi he ʻaho tatau pē pe ko e ʻaho ka hoko maí; (i.e.) ko e ngaahi meʻa ko ia ne fakahū atu ʻe he Laumālie ʻo e ʻOtuá ki hoʻo fakakaukaú, ʻe hoko ia; ko ia, ʻe lava ʻi hoʻo ako mo mahino kia koe ʻa e Laumālie ʻo e ʻOtuá, ke ke tupulaki ai ʻi he tefitoʻi moʻoni ʻo e fakahaá, kae ʻoua kuó ke hoko ʻo haohaoa ʻia Sīsū Kalaisi.” [History of the Church, 3:381.]
Ko e hā ha ngaahi meʻa te ke lava ʻo maʻu fakahā ki ai? ʻOku fakaʻohovale nai kia koe ke ke fanongo te ke lava pea mo hono kotoa ʻo e kāingalotu ʻo e Siasí ʻa ia kuo nau ʻosi maʻu ʻa e Laumālie Māʻoniʻoní—ʻo maʻu fakahā? ʻO ʻikai maʻae palesiteni ʻo e Siasí, pe ko e founga ke tokangaʻi ai ʻa e ngaahi ngaue ʻo e Siasí, fekauʻaki mo e ngaahi uooti, siteiki, pe misiona ʻokú ke nofo aí; ka ʻoku maʻu ʻe he tokotaha fakafoʻituitui kotoa pē ʻi hono tuʻunga ha totonu ke ne maʻu ha fakahā ʻi he Laumālie Māʻoniʻoní. …
ʻOku maʻu ʻe he tangata kotoa pē ha faingamālie ke ne fakaʻaongaʻi ʻa e ngaahi meʻa-foaki mo e ngaahi faingamālié ni ʻi hono fakahoko ʻene ngaahi ngāué; ʻi hono ohi hake ʻene fānaú ʻi he founga totonú; ʻi hono fakalele ʻene pisinisí, pe ko e hā pē ha meʻa ʻokú ne fai. Ko e totonu ia ʻaʻana ke ne maʻu ʻa e laumālie ʻo e fakahaá mo e ueʻi fakalaumālié ke ne fakahoko ai ʻa e meʻa ʻoku totonú, ke ne poto mo fai fakapotopoto, ke fakamaau totonu mo fai lelei, ʻi he meʻa kotoa pē ʻokú ne fai. ʻOku ou ʻilo ko ha tefitoʻi moʻoni ia ʻoku moʻoni, pea ko e meʻa ia ʻoku ou fakaʻamu ke ʻilo ʻe he Kau Māʻoniʻoni kotoa ʻi he Ngaahi ʻAho Kimui Ní. Ka ko ʻeni, ʻoku totonu ke feinga ʻa e tokotaha kotoa ʻia kitautolu mo talangofua ki he meʻa ʻoku ʻomi kia kitautolú, pea kapau te tau talangofua kia kinautolu mo fakatupulaki ha telinga fie fanongo ki he ngaahi ueʻi ʻa e Laumālié, te tau lava mo kitautolu—hono kotoa—ʻo tupulaki ʻi he laumālie ʻo e fakahaá.
Ka ʻoku ʻi ai mo ha founga ʻe taha ʻe lava ai ʻo hoko mai ʻa e fakahaá, ʻa ia ko e misí. He ʻikai ke u pehē atu au ko e misi kotoa pē ʻokú ke maʻu ko ha fakahā hangatonu ia mei he ʻEikí. … Ka ʻoku ou manavasiʻi ʻi he kuonga fihituʻú ni, ʻoku ʻi ai hatau niʻihi ʻoku anga ʻaki hono fakasītuʻaʻi ʻa e ngaahi misi kotoa pē ʻo lau ʻoku ʻikai hano ʻuhinga, pe ʻi ai hano mahuʻinga ʻe taha. Ka ʻi he folofolá kotoa, ʻoku lekooti ai ha ngaahi meʻa ne fakahinohino ai ʻe he ʻEikí ʻa Hono kakaí ʻi ha ngaahi misi. …
Ko e meʻa ʻoku totonu ke tau feinga kotoa ki aí ke tau moʻui, mo tauhi ʻa e ngaahi fekau ʻa e ʻEikí, ke Ne lava ʻo tali ʻetau ngaahi lotú, mo e ngaahi lotu ʻa hotau ngaahi ʻofaʻangá, pea mo e ngaahi lotu ʻa e Kau Taki Māʻolungá, maʻatautolú. ʻOku tau lotua maʻu pē ʻa e kāingalotu ʻo e Siasí, pea ʻoku tau fakafetaʻi ki he ʻOtuá ʻi heʻetau ʻilo ʻoku nau lotua kitautolú. Ka, kapau te tau moʻui taau, ʻe tataki leva kitautolu ʻe he ʻEikí—ʻaki haʻane hā fakahangatonu mai, pe ʻi Hono leʻó, pe ko ha ongo mai Hono leʻó ki hotau ʻatamaí, pe ko ha ueʻi hotau lotó mo ʻetau moʻuí. ʻIkai ngata ai, hono ʻikai totonu ke tau fakafetaʻi kapau ʻe ʻomi ʻe he ʻEikí ha misi ke lava ai ʻo fakahā mai kia kitautolu ʻa e ngaahi fakaʻofoʻofa ʻo ʻitānití pe ko ha fakatokanga pe fakahinohino ke fakanonga makehe ai kitautolu. ʻIo, kapau te tau moʻui pehē, ʻe fakahinohino kitautolu ʻe he ʻEikí ʻi hotau fakamoʻuí pea ke ʻaonga kia kitautolu.
ʻI heʻeku hoko ko e siʻi taha ʻiate kimoutolú, pea mo ʻeku ʻi he tuʻungá ni, ʻoku ou loto ai ke u fai atu ʻeku fakamoʻoní ʻi he loto māʻulalo, kuó u ʻosi maʻu ʻi he leʻo pea mo e mālohi ʻo e fakahaá ha ʻilo pea mo ha mahino ʻoku moʻui ʻa e ʻOtuá. …
ʻOku ou fakamoʻoni moʻoni atu ʻoku tataki ʻa e Siasí he ʻahó ni ʻe he fakahā. Ko e tokotaha kotoa pē ai kuo ʻosi tāpuekina mo ne maʻu ʻa e Laumālie Māʻoniʻoní, ʻokú ne maʻu ʻa e mālohi ke maʻu ha fakahā. ʻOfa ke tokoni mai ʻa e ʻOtuá kiate koe mo au ke ta mo-ʻui taau maʻu pē ke lava ai ʻe he ʻEikí ʻo tali ʻa e ngaahi lotu ʻa e kakai faivelengá ʻo fakafou mai ʻia kitaua.3
Te tau lava fēfē ʻo lotu ki heʻetau Tamai Hēvaní ke Ne fakahinohino kitautolu?
ʻOku ʻi ai ha faikehekehe lahi ʻi he fai ʻo ha lotú mo e fakataufolofola ki he ʻOtuá. ʻOku tokosiʻi pē ha niʻihi kuó u fanongo ʻi haʻanau lotu ʻoku nau fakataufolofola moʻoni ki he ʻOtuá, pea ko e taha ʻo kinautolu ko [ʻEletā] Sālesi A. Kōlisi (Charles A. Callis). Kuo teʻeki ke u fanongo au ʻi haʻane lotu ʻi he ʻōlita toputapu ʻi he temipalé, pea kuo teʻeki ke u fanongo au ʻi haʻama tūʻulutui fakataha ʻo lotu ʻi ha taimi ʻokú ma ō ai ʻo fakahoko ha ngāue ʻoku faingataʻa, ka ʻoku hangē, ʻi he taimi ʻoku lea aí, ʻoku hū tonu pē ki he ʻafioʻanga ʻo ʻetau Tamaí, ʻo talanoa ai mo ha kakai fakalangi. ʻOua naʻá ke lea ʻaki pē ʻa e lotú, ʻoua naʻá ke lau ʻa e lotú, ka ke feinga ke fakataufolofola ki he ʻOtuá he ko e faʻahinga fakataufolofola ko ia ki he ʻOtuá, ko e faʻahinga lotu ia te u pehē naʻe ʻuhinga ki ai ʻa Molonai ʻi heʻene hiki ʻa e vahe fakaʻosi ʻo e Tohi ʻa Molomoná … :
“ʻOku ou fie naʻinaʻi kiate kimoutolu ke mou kole ki he ʻOtua, ko e Tamai Taʻengatá, ʻi he huafa ʻo Kalaisí, pea ʻoku ʻikai ke moʻoni ʻa e ngaahi meʻá ni; pea kapau te mou kole ʻaki ʻa e loto fakamātoato mo e loto moʻoni, ʻo tui kia Kalaisi, te ne fakahā kiate kimoutolu ʻa hono moʻoní ʻi he ivi ʻo e Laumālie Māʻoniʻoní” [Molonai 10:4].
… Ko e meʻa ʻeni te u pehē ko e lotu ia ʻo e tuí, … ke tui ki he ʻOtuá mo Hono ʻAlo ko Sīsū Kalaisí, he ka ne ʻikai ia he ʻikai ke lava ha taha ʻo fakataufolofola ki he ʻOtuá.4
Ne u maʻu ha meʻa ne hoko ki hotau ʻofaʻanga ko ia ko Lisiate ʻĒveni [ʻo e Kōlomu ʻo e Toko Hongofulu Mā Uá] ʻi ha taha ʻo ʻene ngaahi fefonongaʻakí. … Ne tangutu ʻi ha tafaʻaki ʻo ha tangata ʻi ha maʻu meʻatokoni efiafi ʻi ha taha ʻo e ngaahi efiafi ki muʻa atú, ʻi he tafaʻaki ʻo ha taha ʻiloa mo moʻumoʻua, ʻa ia ne ne fakamatala ange ʻi ha ngaahi kupuʻi lea siʻi a e founga ʻo ʻene fehangahangai mo e ngaahi palopalema faingataʻa ʻo ʻene moʻuí pea mo e founga ʻo ʻene fili ʻoku fakahoko fakaʻahó. Naʻá ne pehē, “ʻI he taimi ʻoku ou ʻā hake ai he pongipongí, ʻoku ou faʻa ongoʻi maʻu pē ʻo hangē he ʻikai ke lava ha meʻa he ʻaho ko iá, ka ʻo kapau te u tūʻulutui pē ʻo pehē, ‘ʻOtua, tokoniʻi muʻa au ke u fakahoko ʻa e meʻa ʻoku totonu ke u fai he ʻaho ní,’ ʻoku haʻu ha ivi, pea ʻoku ou ongoʻi leva te u lavaʻi ʻa e meʻa ʻo e ʻaho ko iá. ʻOku ou lau ai pē Ia ko ʻeku tamai pea ʻoku ou fakataufolofola ʻi he lea mahinongofua kiate ia pea mo fakahangatonu ʻo hangē ko ʻeku faʻa lea ki heʻeku tamaí ʻi he taimi naʻe kei ʻi māmani aí.” …
[Ne pehē ʻe ʻEletā ʻĒveni:] “Ne molū hoku lotó mo u loto māʻulalo tuʻunga ʻi hoku kaungā-meʻa loto fakatōkilalo mo lea tonu ko ia ne ma tangutu fakataha ʻi he efiafi ko iá. Naʻe ʻikai ke ma Siasi tatau, ka ʻoku ou tui moʻoni ʻiate au pē, naʻe ʻikai ke mei lava ia ʻo fakataufolofola fakahangatonu ki he ʻOtuá ʻi ha tuʻunga fiemālie mo pau pehē, ʻo kapau naʻe fakakaukau ʻo pehē ko ha mālohi pē ia, pe ko ha meʻa taʻe malava ke fakamatalaʻi, he ko e anga ia mo e taumuʻa ʻoku ʻikai ke ne ʻilo ai ha meʻá, pea ʻoku ʻikai ha meʻa te ne lava ke ʻomi ki ai ha ongoʻi fakapapau naʻe fefolofolai moʻoni mo ʻene tamaí.“ …
Hangē ko e lea ʻa Sēkope ki hono fāmilí …, “ʻOiauē, hono ʻikai ke lahi ʻa e māʻoniʻoni ʻa hotau ʻOtuá! He ʻokú ne ʻafioʻi ʻa e meʻa kotoa pē, pea ʻoku ʻikai ha meʻa ka ʻokú ne ʻafioʻi ia” (2 Nīfai 9:20). Ko ʻeni, kapau te ke manatuʻi maʻu pē ia, ʻoku ʻi ai ha meʻa ke ke kamata ai, ʻoku ʻi ai haʻo fetuʻutaki mo Ia. Ko Hono ngaahi foha kitautolu, mo Hono ngaahi ʻofefine. ʻOkú Ne ʻafioʻi tonu ʻa e ngaahi meʻa ko iá pea mo e kuonga ne fokotuʻu ʻi muʻá, pea pehē ki he ngaahi feituʻu te tau nofo aí, kae ʻumaʻā ʻa e kuonga te tau moʻui aí. ʻI heʻene peheé te tau lava ʻo falala kakato ai kiate Ia.5
Ko e taha ʻo e ngaahi koloa mahuʻinga taha te tau lava ke maʻú pe ko e ʻilo mahuʻinga taha te tau lava ke maʻú ʻoku ʻafio mai ʻa e ʻEikí mo tali ʻetau ngaahi lotú—pe, ko hono ʻai ʻe tahá, ke tau ako ke fakataufolofola ki he ʻOtuá. Ko e lotú ʻoku ʻikai ko hano lea ʻaki pē ha ngaahi lea, ʻo hangē ko hono akoʻi ʻe ha ngaahi siasi ʻe niʻihi, ka ko hono ʻiloʻi ko e ʻOtua ko ʻetau Tamai Hēvaní, mo Hono ʻAlo ko Sīsū Kalaisí, ʻokú Na Moʻui, ʻokú Na mavahevahe, pea ʻoku tuʻunga ʻi he ngāue ʻa ha mēmipa ʻe taha ʻo e Toluʻi ʻOtuá, ʻa ia ko e Laumālie Māʻoniʻoní (Holy Ghost pe Holy Spirit), te tau lava ai ʻo fetuʻutaki mo Ia, ʻa ʻetau Tamai Hēvaní, pea mo maʻu ha tali ki heʻetau ngaahi fehuʻí pea mo ha ivi ki hotau ngaahi ʻahó.6
ʻOku tonu ke mou mateuteu ʻi he loto māʻulalo ke lea fakataha mo Paula, “ʻEiki, ko ho finangaló ke u fai ʻa e hā?” (Ngāue 9:6). Pea ʻi he loto toʻa taʻe toe ufi, lea fakataha mo e tamasiʻi ko Samuelá, “ʻE [ʻEiki]; folofola mai; he ʻoku ongoʻi ʻe hoʻo tamaio-ʻeikí” (1 Samuela 3:9). Loto māʻulalo, faʻa lotu, pea ʻe takinima koe ʻe he ʻEikí, pea foaki kiate koe ʻa e tali ki hoʻo ngaahi lotú [vakai, T&F 112:10].7
Naʻe akoʻi mai ʻe Palesiteni [Tēvita O. Makei] ʻa e meʻá ni ʻi ha ʻaho ʻe taha he temipalé. … “ʻOku ou fie tala atu ha meʻa: Ko hono fakahā atu pē ʻe he ʻEikí ha meʻa ke ke fai, ʻoku tonu ke ke maʻu ha loto lahi ke fakahoko ia pea ka ʻikai ʻe sai ange ke ʻoua naʻá ke toe kole ki ai.” Kuó u ako ʻa e meʻa ko iá, foki. Taimi ʻe niʻihi, ʻoku fakaʻaaki au ʻi he tuʻuapoó ʻo ʻikai ke u lava ʻo toe mohe kae ʻoua kuó u tuʻu mei hoku mohengá ʻo hiki ha laʻi pepa e meʻa ne u fekuki mo iá. Ka ʻoku fie maʻu foki ha loto toʻa ke fakahoko ia ʻi he taimi ʻoku fakahinohino mai ai ko e tali ia ki ha ngaahi lotú.8
ʻAukai ʻi ha houa kai ʻe ua he ʻuluaki Sāpate ʻo e māhiná pea totongi ʻa e mahuʻinga kakato ʻo e ongo houa kai ne ʻikai ke ke maʻu ai ʻa e meʻatokoní. … Naʻe folofola ʻa e ʻEikí kia ʻĪsaia, ko kinautolu te nau ʻaukai mo tufotufa atu ʻenau maá ki he fiekaiá, te nau ui pea ʻe tali ʻe he ʻEikí, te nau tangi pea ʻe folofola ʻa e ʻEikí, “Ko Au ʻeni.” [Vakai, ʻĪsiai 58:6–9.] Ko e founga ia ʻe taha te te lava ai ke fetuʻutaki lelei mo e ʻEikí. ʻAhiʻahi ia he taʻú ni. Moʻui kakato ʻaki ʻa e fono ʻo e ʻaukaí.9
Ko e taimi ʻoku tau tuʻu ai ʻi ha fetaulakiʻanga ʻo ha fili ke fakahoko, tau manatuʻi muʻa e folofola ʻa e ʻEikí ki he meʻa ʻoku totonu ke tau faí: Fakakaukauʻi kakato ʻa e meʻa ko iá ʻi hotau ʻatamaí ʻo aʻu ki ha tuʻunga; pea ki muʻa ke fai ha meʻá, fehuʻi ki he ʻEikí pe ʻoku tonu ia; hili ia peá ke feinga ke ke ongoʻi ʻa e tali fakalaumālie ki aí—ʻo tatau ai pē pe ko e vela māfana hotau lotó ʻo tau ʻilo ai pe ʻoku tonu ʻetau filí, pe ko ha fakakaukau tulemohe te ne ʻai ke ngalo ʻiate kitautolu ʻa e meʻa ko iá ʻo kapau ʻoku hala [vakai, T&F 9:7–9]. Pea toki hangē ko e talaʻofa ʻa e ʻEikí, “… pea ʻe foaki ʻa e Laumālié kiate [kitautolu] ʻi he lotu ʻo e tuí” (T&F 42:14) …
Kapau te tau fekumi faivelenga, te tau lava ʻo aʻu ki he maama fakalaumālie ʻo e ngaahi tali ko ia ʻe ʻikai ke ngata pē ʻi heʻene fakapapauʻi mai ʻa e ngaahi tāpuaki maʻongoʻongá, kae kau ai mo e fakamoʻoni nāunauʻia ʻi hotau lotó, ko ʻetau ngaahi ngāué, ʻa ʻetau moʻuí, pea mo e ʻetau ngaahi tōkakavá kuo tali ia ʻe he ʻEiki ko e Tupuʻanga ʻo kitautolu kotoá.10
Ko e hā te tau lava ʻo fai ke maʻu ai ha fakahā fakafoʻituitui mei he ʻEikí?
Ko e meʻa mahuʻinga taha te ke lava ʻo faí ko haʻo feinga ke fakataufolofola ki he ʻOtuá. Fakataufolofola kiate Ia ʻo hangē pē haʻo talanoa ki hoʻo tangataʻeikí, he ko hoʻo Tamai ia, pea ʻoku finangalo ke ke fakataufolofola ange ki Ai. ʻOku finangalo ke ke fakatupulaki ha telinga ʻoku fanongo, ʻi he taimi te ne ʻoatu ai ʻa e ngaahi ongo ʻo e Laumālié ke fakahā atu ʻa e meʻa ke ke fakahokó. Kapau te ke feinga ke talangofua ki he ngaahi fakakaukau fakatuʻupakē ʻoku hū ki ho ʻatamaí, te ke fakatokangaʻi ʻoku hoko mai ʻa e ngaahi meʻa ko iá ʻi he taimi ʻo hoʻo faingataʻaʻiá. Kapau te ke fakatupulaki ha telinga ke fanongo ki he ngaahi ueʻi ko iá, te ke ako ai ke ʻaʻeva ʻi he laumālie ʻo e fakahaá.11
ʻE founga fēfē haʻatau fakatupulaki ʻa e ngaahi tuʻunga lelei fakalaumālie ʻi hotau ʻulungāangá ke tau lava ai ʻo fakahoko kakato ange hotau misiona fakamāmaní pea mo tau feongoongoi ai mo e mālohi taʻe fakangatangata ʻo e ʻOtuá … ?
Naʻe tali fakakonga ʻeni ʻe ʻĀmoni: “ʻIo, ʻilonga ia ʻokú ne fakatomala mo ngāue ʻaki ʻa e tuí, ʻo ne fai ʻa e ngaahi ngāue leleí mo lotu maʻu ai pē taʻe tukú—ʻoku tuku ki he faʻahinga peheé ke nau ʻilo ʻa e ngaahi meʻa lilo ʻa e ʻOtuá. …” (ʻAlamā 26:22) …
Naʻe ʻilo ʻe he tangata faʻu saame ko Tēvitá ʻi heʻene kei talavoú ʻa e maʻuʻanga ʻo e mālohi fakalaumālié. Naʻe fanafana ʻa e laumālié, “Longo pē, pea ʻilo ko au ko e ʻOtuá. … Ko e ʻOtua ʻo Sēkope ko hotau hūfanga” (Saame 46:10–11).
Naʻe ʻilo ʻe he kau palōfita ʻo e kuonga muʻá, ʻo hangē ko ia kuo pau ke ʻilo ʻe he taha kotoá, ʻa e founga ke fetuʻutaki ai mo e ʻEikí, ke fakataufolofola ki Ai pea mo maʻu ʻa e talí ʻi he founga pē ʻa e ʻEikí. …
Naʻe fakahā ʻe he ʻEikí ki he palōfita ko ʻIlaisiaá: “Ke ke ʻalu atu, mo ke tuʻu ʻi he funga moʻungá ʻi he ʻao ʻo [e ʻEikí]. Pea vakai naʻe hāʻele atu ʻa [e ʻEikí] pea naʻe [faka] mafahifahi ʻa e moʻungá ʻe he matangi mālohi, peá ne fakamomomomoiki ʻa e ngaahi maká ʻi he ʻao ʻo [e ʻEikí]; ka naʻe ʻikai ʻi he matangí ʻa [e ʻEikí]: pea hili ʻa e matangí pea mofuike; ka naʻe ʻikai ʻi he mofuiké ʻa [e ʻEikí]:
“Pea hili ʻa e mofuiké ko e afi; ka naʻe ʻikai ʻi he afí ʻa [e ʻEikí]: pea hili ʻa e afí naʻe ʻi ai ʻa e kihiʻi leʻo mālie.
“Pea pehē, ʻi he fanongo ki ai ʻa ʻIlaisiaá, naʻá ne fakapūlou hono matá ʻaki hono pulupulú, mo ne ʻalu atu ʻo tuʻu ʻi he hū-ʻanga ʻo e ʻaná. …” (1 Ngaahi Tuʻi 19:11–13).
Kuo tuʻo lahi fau e faʻa folofola mai ʻa e ʻOtuá ʻi ha kihiʻi leʻo siʻi mo vanavanaiki, ʻo hangē ko ia ne ne fakahoko kia ʻIlaisiā he ʻaná, pea mahalo he ʻikai ongoʻi leʻo lahi ki he telinga fakamatelié koe-ʻuhí, he ʻoku faʻa hangē ha letiō maumaú, pea te tau taʻe feongoongoi ai pē mo e taʻe ngatá.
… ʻOku lahi fau he ngaahi ʻahó ni e moʻui mavahe ʻa e kakai tangatá mo e kakai fefiné mei he meʻa fakalaumālié, pea ʻi he hokosia ʻo e folofola mai ʻa e ʻEikí ke nau ongoʻi fakamatelié, pea ki honau ʻatamaí ʻo ʻikai ongona ha leʻó, pe kia kinautolu ʻo fakafou ʻi heʻene kau tamaioʻeiki kuo fakamafaiʻí, ʻi he taimi ʻoku tataki ai ʻe he Laumālié, ʻoku tatau pē ia mo hono leʻo tonu pē ʻoʻoná, ka ʻoku nau fanongo pē kinautolu ki ha faʻahinga longoaʻa ʻo hangē ko ia ne nau ongona ʻi Selusalemá. Ko e meʻa tatau pē, ʻoku ʻikai ke nau maʻu ha poto fakalaumālie, pe ko ha fakapapauʻi ʻi honau lotó, kuo fakahoko mai ʻa e finangalo ʻo e ʻEikí ʻi heʻene kau taki ko e kau palōfita..
… ʻOku ʻomi ʻe ʻĪnosi, ko e mokopuna ʻo Līhaí, ha mahino ki he ʻuhinga ʻoku ala maʻu ai ʻe ha niʻihi ha ʻilo ki he ngaahi meʻa ʻa e ʻOtuá kae ʻikai maʻu ia ʻe ha niʻihi kehé. ʻOku fakamatala ʻe ʻĪnosi ʻa ʻene fāifeinga ko ia ke maʻu ha fakamolemole ʻo ʻene ngaahi angahalá kae lava ke taau mo hono uiuiʻi toputapú.
Naʻá ne fakaʻosi ʻaki ʻene pehē: “Pea ʻi he lolotonga ʻa ʻeku feinga ʻi he laumālié, ʻiloange, naʻe toe ongo mai ʻa e leʻo ʻo e ʻEikí ki hoku lotó, ʻo ne folofola: Teu kau mo ho kāingá ʻo fakatatau ki heʻenau fai velenga ʻi he tauhi ʻa ʻeku ngaahi fekaú. … ” [ʻĪnosi 1:10.]
ʻOkú ke maʻu ai heni ʻi ha lea mahino ngofua, ha tefitoʻi moʻoni maʻongoʻonga: ʻOku ʻikai ko e ʻEikí ʻokú ne taʻofi ʻa Ia meia kitautolú. Ka ko kitautolu ʻoku tau taʻofi kitautolu meiate Iá koeʻuhí ko e ʻikai ke tau lava ʻo tauhi ʻene ngaahi fekaú.12
Ko e taimi ʻoku tau kole ai ha tāpuaki mei he ʻEikí, ʻoku fie maʻu ke tau fakapapauʻi ʻoku tau ʻi ha tuʻunga taau ke maʻu ʻa e meʻa ko ia ʻoku tau lotuá.13
ʻOkú ke fie moʻui pehē nai koeʻuhí ka folofola mai ʻa e ʻOtuá te ke lava ʻo ongoʻi ia, pe ko haʻo lava ʻo moʻui taau ke ʻaʻahi mai ha ʻāngelo kia koe, pe ko haʻo mateuteu ke hū atu ki he ʻafioʻanga ʻo e ʻEikí? Ne ʻosi fakahā mai ʻe he ʻEikí ʻa e founga te tau lava ai ʻo mateuteú. Naʻá ne folofola ʻaki ʻi ha fakahā maʻongoʻonga ʻa e ngaahi lea ko ʻení: “Ko e moʻoni ʻoku folofola ʻe he ʻEikí: ʻE hoko ʻo pehē, ko e tangata kotoa pē ʻe liʻaki ʻene ngaahi angahalá pea haʻu kiate au, ʻo ui ki hoku hingoá, pea talangofua ki hoku leʻó, mo tauhi ʻeku ngaahi fekaú, te ne mamata ki hoku matá pea ʻiloʻi ʻoku ou ʻi ai” (T&F 93:1).
ʻI he taimi ne ongo mai ai ʻa e leʻo mei he langí ki he kakai ʻi he fonua ko Mahú, naʻe ʻikai ke nau ongoʻi ia. Naʻe hangē pē ia kia kinautolu ko ha fuʻu vālau tuʻú, ka ʻi he taimi ne nau fakatonutonu ai honau lotó ne nau lava leva ke ongoʻi ha ngaahi lea ka naʻe ʻikai pē ke mahino kia kinautolu; ka ʻi he taimi ne nau feinga ʻaki ai honau lotó mo honau ʻatamaí ke tokanga ki aí, naʻe toki mahino leva ʻa e leʻó. (vakai, 3 Nīfai 11:3–5)14
Fakatauange ke tuku ʻe he ʻOtuá ke tau taki taha moʻui ʻo maʻu ʻa e feohi ʻa e ʻOtuá ʻo fou ʻi he Laumālie Māʻoniʻoní, pea mo tau ʻilo taʻe ha toe veiveiua ʻoku moʻui, pea mo mateuteu ke hū ha ʻaho ki hono ʻafioʻangá.15
Ngaahi Fokotuʻu ki he Akó mo Hono Aleaʻí
-
Ko e hā ha ngaahi meʻa te tau lava ʻo maʻu fakahā ki ai? Te tau lava fēfē ʻo fakatupulaki ʻetau malava ʻo fanongo ki he leʻo ʻo e ʻEikí pea “tupulaki ʻi he tefitoʻi moʻoni ʻo e fakahaá“?
-
Ko e hā ha ngaahi founga te tau maʻu fakahā ai ʻo fou ʻi he kihiʻi leʻo siʻi mo vanavanaiki ʻo e Laumālié?
-
Ko e hā ha ngaahi faikehekehe ʻo e fai ʻo ha lotú mo e fakataufolofola ki he ʻOtuá? ʻOku ʻuhinga ki he hā ke lotu “i he loto fakamātoato“? (Molonai 10:4).
-
ʻOku tokoni fēfē hoʻo ʻilo ko e foha pe ʻofefine koe ʻo e ʻOtuá hoʻo founga fakataufolofola ki ai ʻi he lotú? ʻOku fakafaingofuaʻi fēfeeʻi koe ʻe he ʻilo ko iá ke ke falala ai kiate Ia?
-
Ko e taimi te ke fehangahangai ai mo ha fili mahuʻinga, ko e hā ʻoku totonu ke ke fakahoko ke ke maʻu ai ha fakahinohino mei he ʻEikí? Ko e hā ʻoku fie maʻu ai ha loto lahi ke fakahoko ʻa e ngaahi ueʻi ʻa e Laumālié?
-
ʻOku anga fēfē ʻetau faʻa “taʻofi kitautolu” he taimi ʻe niʻihi mei heʻetau Tamai Hēvaní? ʻE anga fēfē haʻatau ʻunu maʻu pē ke ofi ange kiate Ia ʻi heʻetau moʻuí pea ʻi hotau ngaahi fāmilí?
Naʻe fekumi ʻa e palōfita ko ʻĪnosí ki he ʻEikí ʻi he lotu tāumaʻu. ʻOku totonu foki ke tau feinga faivelenga mo kitautolu ke “fetuʻutaki mo … ʻetau Tamai Hēvaní, pea mo maʻu ha tali ki heʻetau fehuʻí pea mo ha mālohi ki hotau ngaahi ʻahó.”
Hangē ko e tamasiʻi ko Samuelá, ʻoku totonu ke tau fie pehē, “Folofola mai ʻEiki; he ʻoku fanongo hoʻo tamaioʻeikí” (1 Samuela 3:9) pea tau loto toʻa ʻi he tali ki heʻetau lotú.