Vahe 2
Ko Hai Au?
ʻOku tokoni fēfē ʻetau ʻiloʻi pe ko hai kitautolú ke tau maʻu ai ʻa e moʻui taʻengatá?
Talateú
Naʻe fakamatala ʻe Palesiteni Hāloti B. Lī ki ha haʻofanga ʻo e Kāingalotú ʻo pehē, “Ne haʻu ʻi ha ʻaho ʻe taha ha faiako Lautohi Faka-Sāpate ke fai mai ha fehuʻi mālie moʻoni ne fai ange ki ai ʻi heʻene kalasí he Sāpate atú. Naʻá ne pehē ne nau lolotonga aleaʻi ʻa e moʻui ki muʻa ʻi he māmaní, mo e moʻui ʻi māmaní, pea mo e moʻui ka hoko maí, pea fehuʻi ange ai ʻe ha taha kei siʻi he kalasi Lautohi Faka-Sāpaté, ‘Ne ngata ʻa e moʻui ki muʻá ʻi hono fanauʻi kitautolu ki he moʻui fakamatelié; ʻoku ngata ʻa e moʻui ko ʻení ʻi heʻetau mate fakamatelié; ko e hā ʻa e ngataʻanga ʻo e moʻui ʻi he maama ka haʻú? ʻHe ʻikai toe ʻilo ia?’ Tala mai ʻe he faiako Lautohi Faka-Sāpate kei siʻí ni, ‘ʻOku ʻikai ke u ʻilo ʻe au ʻa e talí.’
“Ne u tala ange ʻi heʻeku fakakaukau ki he meʻá ni, ʻoku tau faʻa fakaʻaongaʻi tavale ʻa e ngaahi foʻi leá ʻi he taimi ʻoku tau talanoa ai ki he ‘moʻui ki muʻa ʻi he māmaní, mo e moʻuí ni, pea mo e moʻui ka haʻú,’ ʻo hangē ia ko ha taha ʻoku moʻui tā-tuʻo-lahí, ka ko hono moʻoní, ʻoku tau moʻui tuʻo taha pē. Ko e moʻui ʻoku tau lau ki aí naʻe ʻikai kamata ia ʻi he fanauʻi fakamatelié. Ko e moʻuí ni he ʻikai ngata ia ʻi he mate fakamatelié. ʻOku ʻi ai ha ngaahi meʻa ia ʻoku ʻikai fakatupu pe naʻe ngaohi. ʻOku ui ia ʻe he folofolá ko e “ʻatamai,’ ko ia ne fokotuʻutuʻu [fakatahatahaʻi] ʻi ha tuʻunga—ʻi he moʻui ki muʻa he māmaní, ʻo hoko ko e laumālie.’ Hili e tupu ʻa e laumālie ko iá ʻo aʻu ki ha tuʻunga ʻe taha, ne ʻoange leva ki ai ha faingamālie, ʻe ha Tamai poto kānokato, ke hoko mai ki ha tuʻunga ʻe taha ke fakalakalaka ai. ʻOku fakalahi atu leva ki ai, pea hili ʻene moʻui ʻi ha vahaʻa taimi mo aʻusia hono taumuʻa ʻi he moʻui fakamatelié, ʻoku hoko leva ha toe liliu ʻe taha. Ko hono moʻoní, ʻoku ʻikai ko haʻatau ʻalu atu ki ha moʻui kehe, ka ki ha tuʻunga pē taha ʻo e moʻui tatau pē. ʻOku ʻi ai ha meʻa naʻe ʻikai fakatupu pe ngaohi, pe ko ha meʻa he ʻikai pē mate ia, pea ko e meʻa ko iá ʻe moʻui ia ʻo taʻengata.”1
ʻOku fakamatalaʻi ʻe he vahé ni hotau tuʻunga taʻengatá pea mo e kaunga ʻo ʻetau ʻilo ki hotau tuʻunga totonú ki heʻetau moʻuí.
Ngaahi Akonaki ‘a Hāloti B. Lií
ʻOku tāpuekina fēfē kitautolu ʻe heʻetau ʻilo ko e ngaahi foha mo e ngaahi ʻofefine fakalaumālie kitautolu ʻo e Tamai Hēvaní?
Ko hai kitautolu? … Naʻe hiki ʻe he ʻAposetolo ko Paulá: “Kae ʻumaʻā, naʻe tautea ʻa kitautolu ʻe he ngaahi tamai ʻo hotau sinó, pea tau fakaʻapaʻapa ki ai: ʻe ʻikai lahi [ange] ʻetau fakavaivai ki he Tamai ʻo e ngaahi laumālié, pea moʻui?” [Hepelū 12:9] ʻo fokotuʻu mai ai ko kinautolu kotoa pē ʻoku moʻui he māmaní, ʻoku ʻi ai ʻenau tamai fakaekakano pea ʻoku pehē pē ʻa e ʻi ai ʻo haʻanau tamai ki honau ngaahi laumālié. … Naʻe folofola ʻa e ʻEikí kia Mōsese mo ʻĒlone, “[Fakamavahe] ʻa kimoua mei he kakaí ni, koeʻuhí ke u fakaʻauha leva ʻa kinautolu.” Naʻe lili ʻa ʻene houhaú ki he kakai taʻe anga-tonú ni, ka naʻe tō foʻohifo ʻa Mōsese mo ʻĒlone ʻi hona matá mo pehē, “ʻE ʻOtua, ko e ʻOtua ʻo e laumālie ʻo e kakai kotoa pē, ʻe angahala [nai] ha toko taha, pea te ke houhau [ai] ki he kakaí kotoa pē?” [Nōmipa 16:21–22.] ʻOku mou fakatokangaʻi ʻa e anga ʻo ʻena fakataufolofola ki aí? Ko e ʻOtua ʻo e ngaahi laumālie ʻo e kakai kotoa pē. …
Ko e taha ʻo e ngaahi folofola motuʻa taha ʻoku tau maʻú ne tau maʻu ia ʻi ha founga fakaofo moʻoni—ʻoku tau ui ia ko e Mataʻi Tofe Mahuʻingá. Ko e taha ʻo e ngaahi tohi maʻongoʻonga ʻo e folofola mahuʻingá ni ʻoku ui ia ko e tohi ʻa ʻĒpalahame. ʻOku tau maʻu ʻeni ʻi he tohi ko iá:
“Ko ʻeni, kuo fakahā ʻe he ʻEikí kiate au, ʻa ia ko ʻĒpalahame, ʻa e kau maʻu ʻatamai ʻa ia naʻe fakatupu ʻi he teʻeki ai ke ʻi ai ʻa e māmaní; pea naʻe ʻi he lotolotonga ʻo kinautolú ni kotoa pē ʻa e tokolahi naʻe ngali ʻeiki mo lahi;
“Pea naʻe ʻafio ʻa e ʻOtuá ki he ngaahi laumālié ni, pea kuo nau lelei, peá ne tuʻu ʻi honau lotolotongá, ʻo ne folofola ʻo pehē: Te u fakanofo ʻa kinautolú ni ko ʻeku kau pule; he naʻá ne tuʻu ʻi he haʻohaʻonga ʻo kinautolu ʻa ia ko e ngaahi laumālié, pea naʻá ne ʻafio kuo nau lelei; peá ne folofola mai kiate au ʻo pehē: ʻE ʻĒpalahame, ko e taha koe ʻo kinautolu; naʻe fili koe ʻi he teʻeki ai ke fanauʻi koé.
“Pea naʻe tuʻu ʻa e tokotaha ʻi honau haʻohaʻongá ʻa ia naʻe tatau mo e ʻOtuá, peá ne folofola ange kiate kinautolu naʻe ʻiate iá: Te tau ʻalu hifo, he ʻoku ʻi hena ha vahaʻa ʻataʻatā, pea te tau toʻo mei he ngaahi meʻá ni pea te tau fakatupu ha maama ʻa ia ʻe lava ke nofo ai ʻa kinautolú ni;
“Pea te tau ʻahiʻahiʻi ʻa kinautolu ʻi he meʻá ni ke [vakaiʻi] pe te nau fai ʻa e ngaahi meʻa kotoa pē ʻe fekau ʻe he ʻEiki ko honau ʻOtuá kia kinautolú;
“Pea ko kinautolu ʻe tauhi ki honau muʻaki tuʻungá, ʻe fakalahi kiate kinautolu; pea ʻe ʻikai maʻu ʻe kinautolu ʻe taʻe tauhi ki honau muʻaki tuʻungá ʻa e nāunau ʻi he puleʻanga tatau mo kinautolu ʻe tauhi ki honau muʻaki tuʻungá; pea ko kinautolu ʻe tauhi ki honau tuʻunga hono uá ʻe fakalahi ʻaki ʻa e nāunau ki honau ʻulú ʻo taʻengata pea taʻengata” [ʻĒpalahame 3:22–26].
ʻOku tau maʻu heni ha ngaahi moʻoni mahuʻinga lahi ʻi he folofola ko iá. ʻI he konga ʻuluakí, ʻoku fakalika mai pē, hangē hano fakaʻali mai pē pe ko e hā ʻa e meʻa ko e laumālie. Ne mou fakatokangaʻi e lea ʻa ʻĒpalahamé, ko e laumālié ko ha ʻatamai kuo maau. Ko e ʻuluaki kamataʻanga ʻeni ʻene mahino kia kitautolu pe ko e hā ʻa e laumālié. Ko ha ʻatamai ia kuo maau pea ne moʻui ko ha laumālie ki muʻa ʻoku teʻeki ʻi ai ʻa e māmaní. ʻOku fōtunga fēfē leva ʻa e laumālié? Ko e hā ha faʻahinga fakakaukau ʻokú ke maʻu fekauʻaki mo e laumālie ko iá? Ne ʻosi fakafou mai ʻe he ʻEikí ʻi he Palōfita ko Siosefa Sāmitá, ha tali fakalaumālie, pea ko hono konga ʻoku peheni ia: “Ko e meʻa ʻoku anga fakalaumālié ʻoku ʻi he tatau ia ʻo e meʻa ʻoku anga fakaemāmani; pea ko e meʻa ʻoku anga fakaemāmaní ʻoku ʻi he tatau ia ʻo e meʻa ʻoku anga fakalaumālie.” Ka ko ʻeni, fanongo, “ko e laumālie ʻo e tangatá ʻoku ʻi he tatau ia ʻo hono sinó, ʻo hangē foki ko e laumālie ʻo e manú, pea mo e meʻa moʻui kehe kotoa pē ʻa ia kuo fakatupu ʻe he ʻOtuá.” [T&F 77:2.]
Sai, ʻoku mou mamata mai kia au ʻi heni, ko ha tangata kuo fuʻu lahi. ʻOku ʻi ai haku konga ʻoku ʻikai ke mou lava ʻo mamata ki ai ʻaki homou mata fakaematelié—ko hoku konga fakalaumālie ko ia ʻoku sio atu ʻo fakafou ʻi hoku matá pea ʻokú ne ʻomi ʻa e mālohi ke ngaue, mo ʻomi ʻa e ʻiló mo e poto fakaʻatamaí. …
Ko e ʻuluaki moʻoni ia ʻoku tau ʻiló—naʻe ʻi ai ha ʻatamai maau naʻe ui ko ha… laumālie. Ko e taimi ʻeni ne hāʻele mai ai ʻa e ʻEikí [Sihova], ʻa ia ko e laumālie lāngilangiʻia lahi hangē ko e ʻOtua [ko e Tamaí], ki he lotolotonga ʻo e ngaahi maʻu ʻatamai maau ko ia ne ui ko e ngaahi laumālié, ʻo Ne folofola ange, Te tau fakatupu ha māmani ke mou nofo ai ʻa kimoutolu ʻoku kei laumālié, pea ʻe lava kimoutolu ʻoku moʻui taau hení ʻo ō hifo ki he māmaní pea ʻe fakalahi atu ai kia kimoutolu. Pea ʻi heʻene peheé, te u pehē, ko e ngaahi laumālie ko ia ne tuʻu maʻu ʻenau tuí, pe ne tāú, ne fakangofua ke omi ki māmani pea kuo fakalahi atu ki honau sino fakalaumālié, ha sino fakamatelie ʻi he māmaní. … ʻOku hoko ʻa e foʻi moʻoni ko ia ʻokú ta ʻi heni he māmaní ʻo ʻi ai ha ta sino fakamatelié ko ha fakamoʻoni ne ta kau ʻia kinautolu ne nau tauhi honau muʻaki tuʻungá; ne ta lavaʻi ʻa e siví pea fakangofua ai ke ta omi ki heni. Kapau naʻe ʻikai ke ta lavaʻi ʻa e siví he ʻikai ke ta ʻi heni; ne ta mei nofo mo Sētane ʻo feinga ke fakatauveleʻi ʻa kinautolu ʻoku ʻi ai honau sinó. …
Ko e hā kuo pau ai ke tau faivelenga ka tau lava ʻo fakakakato ʻi māmani, hotau ngaahi misiona ne tomuʻa fakanofo kitautolu ki aí?
ʻI he hili ko ia ʻetau fakamahinoʻi hotau tuʻunga ʻi he maama fakalaumālié, pe ko hai kitautolú—ko e ngaahi foha mo e ngaahi ʻofefine ʻo ha ʻOtua ki muʻa pea toki fakatupu ʻa e māmaní, pea mo e Tamai ʻa e laumālie ʻo e kakai kotoa pē kuo moʻui ʻi he kakanó he māmaní—ʻoku tau toki mateuteu leva ke hoko atu ki he tali hono ua ʻo e fehuʻí. ʻI he meʻa ko ia ne u lau atu mei he tohi ʻa ʻĒpalahamé, ʻi he veesi hono 23, ne mou fanongo ai ki hono fakahā ange kia ʻĒpalahame naʻe fakanofo ia pe fili ki muʻa ʻoku teʻeki fanauʻí. ʻOku ou fifili pe ne mou fakakaukau ki ai. Naʻe fakahā kia Mōsese ʻa e meʻa tatau pē. …
“Pea ʻi heʻene ui ki he huafa ʻo e ʻOtuá, naʻá ne [Mōsese] toe mamata ki hono nāunaú, he naʻe nofo ia ʻiate ia; peá ne fanongo ki ha leʻo ʻoku pehē: ʻOkú ke monūʻia ʻe Mōsese, he ko au ko e Māfimafí, kuó u fili koe pea ʻe fakamālohi koe ke ke mālohi ange ʻi he ngaahi vai lahí; he ʻe talangofua ia ki hoʻo fekaú ʻo hangē nai ko e ʻOtuá koé” [Mōsese 1:25]. Ko hono misioná ia ke hoko ko ha pule maʻongoʻonga mo mālohi. Naʻe folofola ʻaki ʻe he ʻEikí ʻa e meʻa tatau kia Selemaia, “Naʻá ku ʻilo koe ʻi heʻeki ai te u fakatupu koe ʻi he fatú; pea naʻá ku fakatapuʻi koe, pea tuʻutuʻuni koe, ko e palōfita ki he ngaahi puleʻangá” [Selemaia 1:5]. ʻI hono fakamahino lahi ange ʻe Siosefa Sāmitá, naʻá ne tala mai ai: “Ko e tangata kotoa pē kuó ne maʻu ha uiuiʻi ke ne ngāue ki he kakai o māmaní, naʻe tomuʻa fakanofo ia ki he taumuʻa ko iá ʻi he Fakataha Alēlea Lahi ʻi he langí ki muʻa ʻoku teʻeki fakatupu ʻa e māmaní.” Hili ia peá ne toki pehē, “Te u pehē naʻe tomuʻa faka-nofo au ki he tuʻunga ko ʻení ʻi he Fakataha Alēlea Lahi ko iá.” [History of the Church, 6:364.]
Ko ha fakatokanga mamafa ʻeni. Neongo ʻa e uiuiʻi ko iá, ne fakahū ʻe he ʻEikí ki he fakakaukau ʻa e Palōfita ko Siosefa Sāmitá pea naʻá ne hiki ia …, “Vakai, ʻoku ui ʻa e tokolahi, kae fili ʻa e tokosiʻi.” Ko hono fakalea ʻe tahá, … tuʻunga ʻi heʻetau maʻu ʻi heni ʻetau tauʻatāina ke filí, ʻoku ʻi ai ai ha tokolahi fau ne tomuʻa fakanofo ki ha ngāue ʻoku maʻongoʻonga lahi ange ʻi heʻenau teuteu ʻoku fai ʻi hení. Ka ko ʻeni naʻá ne pehē, “Pea ko e hā ʻoku ʻikai fili ai kinautolú?” Pea ʻokú ne ʻomi ha ʻuhinga ʻe ua ʻoku ʻikai aʻusia ai ʻe he tangatá ʻa e ngaahi tuʻunga ko iá. ʻUluakí, “koeʻuhí he ʻoku mālohi pehē fau hono tuku ʻo honau lotó ki he ngaahi meʻa ʻo e māmaní,” pea ko hono uá, ʻoku nau “holi ki he fakaʻapaʻapa ʻa e kakaí, ʻoku ʻikai ai te nau ʻiloʻi ʻa e moʻoni ʻe taha ko ʻení—ko e ngaahi totonu ʻo e lakanga fakataulaʻeikí, kuo fakamaʻu taʻe lava ke veteki ki he ngaahi mālohi ʻo e langí” [T&F 121:34–36].2
ʻOua naʻa maʻu hala ʻo pehē ʻoku fakapapauʻi mai ʻe he faʻahinga uiuiʻi pe tomuʻa fakanofo ko ʻení ʻa e meʻa kuo pau ke ke fakahokó. Ne lea mahino ha palōfita ʻi he konitinēniti fakahihifó ni ʻo fekauʻaki mo e kaveingá ni: “Naʻe uiuiʻi mo teuteuʻi ʻa kinautolu talu mei he fokotuʻu ʻo māmaní ʻo fakatatau ki he tomuʻa ʻafioʻi [ʻe he] ʻOtuá, tuʻunga ʻi heʻenau fuʻu tui lahi mo e ngaahi ngāue leleí; kuo tomuʻa tuku kiate kinautolu ke nau fili ʻa e leleí pe ko e koví” (ʻAlamā 13:3.) … ʻE lava pē ke uiuiʻi ʻe he ʻOtuá ha kau tangata ʻi he maama fakalaumālié pe ʻi honau muʻaki tuʻungá ke nau fakahoko ha faʻahinga ngāue, ka ko e tuʻunga ki heʻenau tali ʻa e uiuiʻi ko iá ʻi he māmaní mo fakahoko ʻi he faivelenga mo ngāue lelei ʻi heʻenau kei ʻi he moʻui fakamatelié, ko e meʻa ia ʻanautolu ʻo faka-tatau mo ʻenau totonú pea mo honau faingamālie ke fakaʻaongaʻi ʻenau tauʻatāina ke filí ke fili ki he leleí pe koví.3
ʻOku tokoni fēfē ʻetau ʻilo pe ko hai kitautolú ki heʻetau fakaʻaongaʻi ʻetau tauʻatāina ke filí?
Ko e hā mo ha to e meʻa kuo tala mai fekauʻaki mo kitautolu? Ko ha kakai tauʻatāina fakatāutaha kitautolu pea ʻoku pehē ai ʻe ha kakai ʻe niʻihi ke fai ʻetau faʻitelihá, ka ʻoku ʻikai ke fuʻu tonu e meʻa ko iá. Kuo tau maʻu ʻetau tauʻatāina ke filí, kae tuku muʻa ke u lau atu ha meʻa fekauʻaki mo ia. Fakaʻilongaʻi ange muʻa ʻa e 2 Nīfai vahe uá, veesi 15 mo e 16. Te u tala atu pē, te u pehē ko ha meʻa tuʻu fakatuʻutāmaki moʻoni hono fakaʻatā ʻe heʻetau Tamaí ke fekauʻi mai kitautolu mo e faʻahinga monūʻia ko ia ʻo e tauʻatāina ke fai haʻatau filí. Ka koeʻuhí ke tau lava ʻo fai ʻetau filí mo maʻu ai hotau ngaahi fakapale taʻengatá, ʻoku ʻi ai ha meʻa ne hoko kia kitautolu. Kiʻi fakatokangaʻi ʻeni—ko ha tamai ʻeni ʻokú ne fakamatalaʻi ʻa e meʻa tatau pē ko ʻení ki hono fohá: “Pea ko e meʻa ke fakahoko ai ʻa hono ngaahi finangalo taʻengatá ki he ikuʻanga ʻo e tangatá, naʻe hili leva ʻene ngaohi ʻetau ʻuluaki mātuʻá, mo e fanga manu ʻo e ngoué mo e fanga manupuna ʻo e ʻataá, pea mo e ngaahi meʻa kotoa pē kuo ngaohí, pea naʻe totonu ke ʻi ai ha faikehekehe; ʻio, ʻa e fuatapú ʻoku faikehekehe mei he ʻakau ʻo e moʻuí; ko e tahá naʻe melie kae mahi ʻa e tahá” [2 Nīfai 2:15].
Ko e anga ia ʻo ʻene ongó ʻi he taimi lahi, tokua ko e ngaahi meʻa ʻoku tapuí ko e ngaahi meʻa ia ʻoku vivili taha hono fie maʻú, pea ko e ngaahi meʻa ʻoku totonu kia kitautolú ʻoku hangē ia ʻi ha taimi lahi ko ha ngaahi foʻi ʻakau ʻoku tamala ke tau foló, ʻo hangē ko ʻetau laú. Ka ko ʻeni, koeʻuhí ke foaki ki he tangatá ha faingamālie ke ne fili, “Ko ia, naʻe tuku ʻe he ʻEiki ko e ʻOtuá ki he tangatá ke ne faʻiteliha pē maʻana. Ko ia, ʻe ʻikai lava ke faʻiteliha ʻa e tangatá ʻo kapau ʻe ʻikai fakatauveleʻi ia ʻe he meʻa ʻe tahá pe ko e meʻa ʻe tahá” [2 Nīfai 2:16]. Pea koeʻuhí ke tau hoko ko ha tokotaha ʻoku tauʻatāina ke fakakaukau ʻiate ia pē, kuo pau ai ke ʻoua naʻa ngata pē ʻi heʻetau maʻu ʻa e leleí ka kuo pau ke ʻi ai mo e koví koeʻuhí ke tau lava ʻo fili ʻi he ongo meʻá ni ʻe ua. Kiʻi fakakaukau taimi nounou ki ai. Kapau ne lelei ʻa e meʻa kotoa pē he māmaní pea ʻikai ha meʻa ʻe kovi, te ke lava nai ʻo fili ha meʻa kehe mei he leleí? Kapau naʻe kovi ʻa e meʻa kotoa pē he māmaní, pea ʻikai ha lelei ia ke fili, te ke lava nai ʻo fili ha meʻa kehe ka ko e koví pē? ʻI hoʻo kiʻi fakakaukau taimi nounou ki aí, ko e founga pē ke maʻu ai ha tauʻatāina ke fili ʻi he kakai fakafoʻituitui ʻoku moʻui ʻi māmaní ke fakatou ʻi ai ʻa e leleí mo e koví pea tuku mai kia kitautolu fakatāutaha ʻa e faingamālie ke fili maʻatautolú. … Fakatokangaʻi ange, ʻoku kau ʻi he tauʻatāina ke filí ha tuʻunga taʻe ʻiloa. Ka ne hōifua pē ʻa e ʻEikí ke fakahoko kae lava ke tau ʻaʻeva ʻi he tuí pea mo hoko ko ha kakai ʻoku fili ʻa e totonú ʻiate kitautolu pē.4
Ko e hā ha tuʻunga taʻengata te tau lava ke aʻusia ʻi he ʻetau tuʻu ko e fānau ʻa e ʻOtuá?
Ko e taumuʻa ʻo e moʻuí ke fakahoko ʻa e moʻui taʻe mate mo e moʻui taʻengata ʻa e tangatá. Ka ko ʻeni, ʻoku ʻuhinga ʻa e moʻui taʻe maté ko haʻatau aʻusia ʻa e tuʻunga ʻo maʻu ai ha sino he ʻikai toe moʻulaloa ia ki he ngaahi mamahi ʻo e moʻui fakamatelié, ʻikai toe haʻisia ki ha toe mate fakamatelie tuʻo ua, pea ʻikai toe hoholo, ʻo mole kotoa atu ʻa e ngaahi meʻa muʻá. Ko hono maʻu ʻa e moʻui taʻengatá ko ha totonu ia ke moʻui ʻi he ʻafioʻanga ʻo e Tokotaha Taʻengatá, ʻa ia ko e ʻOtuá, ko ʻetau Tamai Hēvaní, pea mo Hono ʻAló, ʻa ia ko Sīsū Kalaisi. Ko e ongo kaveinga ʻeni ʻe ua ne tuku ai kitautolu kotoa ki he funga māmaní. 5
ʻOku tau ʻi heni he ʻahó ni ʻo teuteu ki he moʻui taʻe maté, “ko hano fakalōloa taʻengata ʻo e taimí, pea ko e moʻui moʻoni ia ʻa e tangatá.” Ko ha ngaahi laumālie maʻongoʻonga kotoa kitautolu, koeʻuhí he ne tau fou mai ʻi ha hako fakaʻeiʻeiki. ʻOku tau maʻu ʻa e totonu ke hoko ko ha ngaahi tuʻi mo ha kau pule, tuʻunga ʻi he ngaahi meʻa ne tau fakahoko ʻi he maama fakalaumālié ki muʻa pea tau toki omi ki hení. Naʻe fili kitautolu ke tau omi ʻi he ʻaho mo e kuongá ni, pea ʻoku fakataumuʻa kitautolu ki he moʻui taʻe maté ʻo pehē ki he toʻutupu kotoa ʻo e Siasí. ʻOku totonu mo kitautolu foki ke tau “ʻilo ʻa e ngaahi meʻa kotoa ʻoku ʻikai taʻengata pea mo fuʻu fuonounoú fakataha mo ia kotoa ʻoku ʻikai tuʻuloa mo fuʻu siʻisiʻi” ʻe mole ai hotau lāngilangí. 6
Tuku ke u lau mei he vahe 132 ʻo e Tokāteline mo e Ngaahi Fuakavá. … “Pea ko e tahá, ko e moʻoni ʻoku ou tala kiate koe, kapau ʻe fakamaʻu ʻe ha tangata mo ha fefine ʻi heʻeku leá, ʻa ia ko ʻeku fonó, pea ʻi he fuakava foʻou mo taʻengatá, pea ʻoku fakamaʻu ia kiate kinaua ʻe he Laumālie Māʻoni ʻoni ʻo e talaʻofá,” te u hiki fakalaka heni ʻi ha ngaahi foʻi lea koeʻuhí ke mahino ange, ”ʻe fai kiate kinaua ʻi he ngaahi meʻa kotoa pē ʻa ia kuo hilifaki kiate kinaua ʻe heʻeku tamaioʻeikí ʻi he nofo taimí, pea fai atu ʻi hono kotoa ʻo e nofo taʻengatá; pea ʻe mālohi fakaʻaufuli ia ʻo ka na ma-maʻo mei māmani; pea te na fakalaka hake ʻi he kau ʻāngelo mo e ngaahi ʻotua kuo fokotuʻu ʻi aí, ʻo maʻu hona hākeakiʻí mo e nāunaú.“ Kiʻi fanongo angé ki hení: pea [ʻe] ”hokohoko atu ai pē …[hona] ngaahi hakó ʻo taʻengata pea taʻengata“ [T&F 132:19].
Naʻe pehē ʻe he Palōfita ko Siosefa Sāmitá ʻoku ʻuhinga ʻeni ko kinautolu ne mali ʻi he fuakava foʻou mo taʻengatá mo faipau ki heʻenau ngaahi fuakavá, ka hili ʻenau foua ʻa e toetuʻú te nau lava ʻo toe nofo fakataha ko e husepāniti mo e uaifi pea mo maʻu ʻa e meʻa ko ia naʻá ne ui heni ko e, hokohoko atu ʻo hona ngaahi hakó. Ko e hā leva hono ʻuhinga ʻo iá? Tuku ke u lau atu mei ha potu folofola ʻe taha: …
“ʻI he nāunau [fakasilesitialé] ʻoku ʻi ai ʻa e ngaahi langi pe ngaahi tuʻunga ʻe tolu;
“Pea ko e meʻa ke maʻu ai ʻa e tuʻunga māʻolunga tahá, kuo pau ke kau ʻa e tangatá ʻi he angá ni ʻo e lakanga fakataulaʻeikí [ʻo ʻuhinga ki he fuakava foʻou mo taʻengata ʻo e malí];
“Pea kapau ʻe ʻikai te ne fai ia, ʻe ʻikai te ne lava ke maʻu ia.
“Te ne lava ke hū ki he tuʻunga ʻe tahá, ka ko e ngataʻanga ia ʻo hono puleʻangá”; fakatokangaʻi ʻeni, “he ʻikai te ne lava ke maʻu ha tupulaki” [T&F 131:1–4].
ʻO tupulaki ʻi he hā? Tupulaki ʻi hono hakó. Ko hono fakalea ʻe tahá, ʻi heʻetau talangofua ki Heʻene fekau fakalangí, ʻoku foaki mai ai kia kitautolu ʻi heni ko e faʻahinga ʻo e tangatá ʻa e mālohi ke fengāueʻaki mo e ʻOtuá ʻi hono fakatupu ʻo e moʻui ʻa e tangatá ʻi māmani, pea ʻi he fakalaka atu ʻi he faʻitoká, te tau maʻu ai ha tupulaki taʻengata ʻi he feohi fakafāmili he hili e ngāue ʻo e māmaní.
… ʻI heʻeku lea ko ʻeni ki he kakai toetuʻu ne nau tauhi ʻa e fuakava ʻo e mali māʻoniʻoní pea naʻe fakamaʻu ʻe he Laumālie Māʻoniʻoni ʻo e Talaʻofá: “Te na hoko leva ko e ongo ʻotua, koeʻuhí he ʻoku ʻikai ha na ngataʻanga; ko ia te na ʻi ai mei he taʻengatá ki he taʻengatá, koeʻuhí he ʻokú na hoko atu ai pē; te na māʻolunga ange leva ʻi he ngaahi meʻa kotoa pē, he ʻoku moʻulaloa kiate kinaua ʻa e ngaahi meʻa kotoa pē. Te na hoko leva ko e ongo ʻotua, koeʻuhí kuo ʻiate kinaua ʻa e mālohí kotoa, pea kuo moʻulaloa ʻa e kau ʻāngeló kiate kinaua” [T&F 132:20.] …
… ʻOfa ke tau moʻui taau ke ʻoua naʻa fakatokangaʻi ʻia kitautolu ʻe kinautolu ʻoku tau feohí ʻa hotau angá, ka ko ia ʻoku fakalangi mo haʻu mei he ʻOtuá, pea mo e vīsone ko hai kitautolu pea mo e tuʻunga te tau lava ʻo aʻusiá, ʻofa ke tau maʻu ha ivi ke kaka ʻo māʻolunga ange ki ʻolunga, ʻo hoko atu ki he taumuʻa maʻongoʻonga ʻo e moʻui taʻengatá, pea ʻoku ou lotua ia ʻi he loto fakatōkilalo ʻi he huafa ʻo e ʻEiki ko Sīsū Kalaisí, ʻēmeni.7
Ngaahi Fokotuʻu ki he Akó mo Hono Aleaʻí
-
Ko e hā ha meʻa kuó ne fakamālohia hoʻo fakamoʻoni ko e ʻOtuá ko hoʻo Tamai?
-
Ko e hā ʻoku ʻikai faʻa lava ai ʻo fakahoko ʻe he kakaí he taimi ʻe niʻihi ʻa e ngāue naʻe tomuʻa fakanofo ke nau fai ʻi māmaní?
-
Ko e hā ʻa e tauʻatāina ke fili? Ko e hā ʻoku ʻaonga ai ʻa e faikehekehé ʻi hono fakaʻaongaʻi ʻo ʻetau tauʻatāina ke filí?
-
ʻOku tokonia fēfē ʻe he ʻiloʻi e tuʻunga taʻengata te tau lava ke maaʻusiá ʻa ʻetau tōʻonga fakaʻahó?
-
Ko e hā ha meʻa kuó ne fakaivia koe ʻi haʻo feinga ke “kaka ke māʻolunga ange ki ʻolunga, mo hoko atu ki he taumuʻa maʻongoʻonga ko ia ʻo e moʻui taʻengatá”?
Ko Sīsū Kalaisi mo e fānau ʻo e funga māmaní. Ko ha ngaahi foha mo ha ngaahi ʻofefine fakalaumālie kotoa kitautolu ʻo e Tamai Hēvaní. Kapau te tau tali ʻa e ngaahi tāpuaki kakato ʻo e Fakalelei ʻa e Fakamoʻuí, te tau lava ʻo foki ʻo toe nofo fakataha mo ʻetau Tamaí pea mo hotau Fakamoʻuí.