Akonaki ʻa e Kau Palesitení
Vahe 8: Ko Siosefa Sāmitá, ko ha Palōfita ʻa e ʻOtua Moʻuí

Vahe 8

Ko Siosefa Sāmitá, ko ha Palōfita ʻa e ʻOtua Moʻuí

Ko e hā ʻoku mahuʻinga ai ha fakamoʻoni ki he misiona faka-palōfita ʻa Siosefa Sāmitá ki heʻetau fakamoʻoni ki he ongoongolelei ʻo Sīsū Kalaisí?

Talateu

Naʻe maʻu ʻe Palesiteni Hāloti B. Lī ha fakamoʻoni mālohi ki he Palōfita ko Siosefa Sāmitá pea naʻá ne faʻa fakaʻaongaʻi maʻu pē ʻa e ngaahi lea ʻa e Palōfitá ʻi he taimi naʻá ne akoʻi ai ʻa e ngaahi tefitoʻi moʻoni ʻo e ongoongoleleí. Naʻá ne ʻiloʻi naʻe mahuʻinga ha fakamoʻoni ki he misiona ʻa e Palōfita ko Siosefa Sāmitá, ki hano maʻu ʻo ha fakamoʻoni ki he ongoongolelei ʻo Sīsū Kalaisí. Naʻá ne fetaulaki mo ha kakai tokolahi naʻe ʻikai ke nau maʻu ʻa e fakamoʻoni ko ʻeni ki he Palōfitá. Ko e tokotaha ko haku kaumeʻa ia kuó ne lau ʻa e Tohi ʻa Molomoná peá ne fakamatala ki heʻene “ongoʻi ʻaʻapa ki he ngaahi akonaki ʻoku ʻi aí.” Naʻe fehuʻi ange ʻe Palesiteni Lī kiate ia, “Ko e hā ʻoku ʻikai ke ke fai ai ha meʻa ki aí? … Ko e hā ʻoku ʻikai ke ke kau ai ki he Siasí?” Naʻe kiʻi fakakaukau ʻa e tangatá peá ne tali ange: “Mahalo ko hono ʻuhingá pē ko e ngali fuʻu ofi mai ʻa Siosefa Sāmita kiate aú. Kapau naʻá ne moʻui ʻi he taʻu ʻe uaafe kuohilí, mahalo pē te u tui. Mahalo ko e ʻuhinga ia ʻoku ʻikai ke u tali aí ko ʻene fuʻu ofi kiate aú.” Ko e lau ʻeni ʻa Palesiteni Lī ʻo kau ki he tali ʻa hono kaumeʻá, “Naʻe pehē ʻe he tangatá ni, ʻʻOku ou tui ki he kau palōfita kuo nau pekia ʻa ia ne nau moʻui ʻi he ngaahi taʻu ʻe tahaafe tupu kuohilí, ka ʻoku fuʻu faingataʻa ʻaupito ke u tui ki ha palōfita moʻui.ʻ”1

Naʻe ʻi ai moha taimi ʻe taha naʻe pehē ʻe ha fefine ia, “ʻOkú ke ʻiloʻi koā, te u lava ʻe au ʻo tali ʻa e meʻa kotoa pē ʻi he Siasí tuku kehe ha meʻa ʻe taha. … he ʻikai pē ke u teitei lava ʻo tali ʻa e pehē ko ia ko Siosefa Sāmitá ko ha Palōfita ʻa e ʻOtuá.” Naʻe pehē ʻe Palesiteni Lī, “He ʻikai ʻaupito ke u ʻilo pe ʻe anga fēfē hno tali ʻe ha taha ʻa e Ongoongoleleí taʻe te ne tali mo e tokotaha ne meʻangāue ʻaki ki hono toe fakafoki mai iá.”2

Naʻe pehē ʻe Palesiteni Lī: “Kuo pau ke tau ʻiloʻi fakapapau ʻi hotau lotó pea ʻi hotau ʻatamaí ko e Kalaisí ʻa Sīsū, ko e Fakamoʻui ʻo e māmaní. Kuo pau ke tau ʻiloʻi ko e Siasi moʻoni ʻeni ʻo Sīsū Kalaisí, ko e puleʻanga ʻo e ʻOtuá ʻi he māmaní ʻi he ngaahi ʻaho fakaʻosí ni; pea fakaʻosí, kuo pau ke tau maʻu ha fakamoʻoni ko Siosefa Sāmitá ko ha palōfita ʻa e ʻOtuá.”3

Ngaahi Akonaki ʻa Hāloti B. Lií

Ko e hā kuo pau ai ke tau maʻu ha fakamoʻoni ko Siosefa Sāmitá ko ha palōfita ia ʻa e ʻOtuá?

Ko e hā e ʻulungāanga ʻoku maʻu ʻe ha Palōfita moʻoni ʻa e ʻOtuá? ʻUluakí, ko e tangata lea ia ʻa e ʻOtuá ʻi he kuonga ko iá pea ki he kakai ʻi hono taimí. Uá, ʻokú ne toe fakahā mai ʻa e ngaahi moʻoni mei he kuonga muʻá peá ne feinga ke muimui ʻa e kakaí ki he ngaahi fono taʻe feliuliuaki ʻo e ongoongoleleí. Ko hono tolú, ʻokú ne maʻu mo ha toe ngaahi fakahā kehe mei he ʻEikí ke feau ʻaki e ngaahi palōpalema ʻoku hoko ʻi hono ngāueʻi ʻo e palani ki he fakalakalaká. Ko e ngaahi moʻoni foʻou ʻoku tupu mei he ʻOtuá ʻoku fou ʻataʻatā mai pē ia ʻi he Palōfita ʻo e ʻaho ko iá. Ko e tangata peheni ʻa Siosefa Sāmita, pea ko e tokotaha peheé ko e Palōfita ia ʻa e ʻOtuá. ʻIo, ʻoku moʻoni ʻo hangē ko ia ne lea ʻaki ʻe he Palōfita ko ʻĀmosí, “Ko e moʻoni ʻe ʻikai fai ha meʻa ʻe [he ʻEiki] ko e ʻOtuá, kae taʻe fakahā ia ki heʻene kau tamaioʻeiki ko e kau palōfitá.” [ʻĀmosi 3:7.]4

ʻOku ou.. … ʻiloʻi ʻi he kotoa ʻo hoku laumālié ko Siosefa Sāmitá ko ha palōfita ia ʻa e ʻOtua moʻuí. ʻOku ou ʻilo naʻá ne mo-ʻui peá ne pekia ke fakahoko mai ki he toʻu tangatá ni ʻa e founga ʻe lava ke maʻu ai ʻa e fakamoʻuí. ʻOku ou ʻilo ʻokú ne nofo ʻi ha feituʻu māʻolunga pea ʻokú ne maʻu ʻa e ngaahi kī ʻo e kuonga faka-ʻosi ko ʻení. ʻOku ou ʻilo ʻe ʻikai ikunaʻi ʻe he ngaahi matapā ʻo helí ʻa kinautolu ʻoku muimui ʻiate ia pea fakafanongo ki heʻene ngaahi akonakí pea nau tali ia ko ha palōfita moʻoni ʻa e ʻOtuá, pea ko e ngaahi fakahā naʻá ne maʻú mo ʻene ngaahi akonakí ko e folofola ia ʻa e ʻOtuá. [Vakai ki he T&F 21:4–6.]5

Kuo pau ke tau tali e misiona faka-ʻotua ʻa e Palōfita ko Siosefa Sāmitá ne fakafounga ʻiate ia ʻa hono toe fakafoki mai ʻo e ongoongoleleí mo hono fokotuʻu ʻo e Siasi ʻo Sīsū Kalaisí. Koeʻuhi ke mateuteu ʻa e mēmipa takitaha ʻo e Siasí ki he pule ʻa Kalaisi ʻi he māmaní he taʻu ʻe 1,000, kuo pau ke tau takitaha maʻu ha fakamoʻoni ki hono faka-ʻotua ʻo e ngāue naʻe fokotuʻu ʻe Siosefa Sāmitá. Ko e meʻa ʻeni naʻe mahinongofua hono akoʻi ʻe he Kāingalotú hili hono ʻaloʻi ʻo e Fakamoʻuí ki he māmaní, pea naʻe toe lea ʻaki pē ʻeni ʻe ha taha ʻo e kau taki ʻo e Siasí ʻi hotau ʻahó ni ʻi heʻene pehē, pea ʻoku ou mahalo naʻá ne ʻuhinga heni ki he talanoa fakatātā ʻa e ʻEikí ki he kau tāupoʻou vale ʻe toko nima mo e kau tāupoʻou poto ʻe toko nimá [vakai ki he Mātiu 25:1– 13], “ʻE hokosia e taimi he ʻikai lava ke moʻui ʻaki ai ʻe ha tangata pe ha fefine ha maama ʻa ha tokotaha kehe. Kuo pau ke fakahinohino ʻa e tokotaha takitaha ʻe heʻene tui pe fakamoʻoni pē ʻaʻaná. [Orsoni F. Whitney, Life of Heber C. Kimball, (1945), 450.]6

Ko kimoutolu ko ia kuo mou fekumi fakamātoato ʻi he folofolá, ʻa kimoutolu kuo mou fekumi ke maʻu ha fakamoʻoni ki he fakamoʻoni fakalangi ʻa e Laumālié, ʻoku ʻi ai kotoa pē haʻamou totonu ke fakamoʻoniʻi atu ʻe he Laumālie Māʻoniʻoní, ʻe lava ke nofoʻia ʻi homou lotó … ha taha ʻo e ngaahi meʻa fakafiefia taha ke hoko kia kimoutolu ʻi he taimi te mou lava ai ke pehē ʻi homou lotó, “ʻOku ou ʻiloʻi ʻaki e kotoa ʻo hoku lotó he taimí ni ʻo hangē ko ia ne teʻeki ai ke u ʻilo ʻi ha toe taimi, ko Sīsuú ko e ʻEikí ia, ko e Fakamoʻui ia ʻo e māmaní, pea ko Siosefa Sāmita naʻe fakapōngí, ko e palōfita ia naʻe ngāue ʻaki ʻe he ʻEikí ke fokotuʻu ʻa Hono Siasí ʻi he kuongá ni.”7

Ko e hā ha founga ne teuteuʻi ai ʻa Siosefa Sāmita ki hono uiuiʻi ke hoko ko e Palōfita ke Toe Fakafoki mai ai ʻa e Ongoongoleleí?

Ko Siosefa Sāmita ʻa e tokotaha naʻe ʻohake ʻe he ʻEikí mei heʻene kei siʻí pea fakakoloa ʻaki ia ʻa e mafai faka-ʻotua mo akoʻi kiate ia ʻa e ngaahi meʻa ko ia naʻe ʻaonga ke ne ʻiló pea ke ne maʻu ʻa e lakanga fakataulaʻeikí mo fakatoka ʻa e fakavaʻe ki he pule- ʻanga ʻo e ʻOtuá ʻi he ngaahi ʻaho fakaʻosí ni.8

ʻI he vakai atu ko ia ki he hisitōliá, naʻe fili ʻa e kau palōfita ke nau hoko ko e kau takí mei he kakai māʻulalo pē kae ʻikai ko ha niʻihi naʻe ʻosi ako ʻi ha ngaahi akoʻanga fakalotu. Fakakaukau angé ki ha tokolahi ʻo e kau palōfitá. Naʻá ku kiʻi nofo hifo au ʻo sio ki mui ki he anga ʻo e hisitōliá: Ko ʻIlaisá ko ha tangata faama tuʻumālie ia; ko ʻĀmosí ko ha tangata tauhi-sipi ia ʻi Siutea; ko ʻĪsaiá ko ha tangataʻi fonua Selūsalema ia; ko Maiká ko ha tangata pē ia mei Siutea; ko Selemaiá ko ha talavou ia naʻe haʻu mei ha fāmili ʻo e kau taulaʻeiki he kuonga muʻá; ko ʻIsikelí ko ha taula-ʻeiki ia ʻi he temipalé; ko e kau tangata toutai ʻa Pita, ʻAnitelū, Sēmisi mo Sione; ko e ongo tangata tufunga pē ʻa Sīsū ia mo ʻene tamai ko Siosefá. Mahalo ko hono ʻuhinga ia naʻe hanga ai pē ʻe he ʻEikí ʻo fili [ʻa e Palōfita ko Siosefa Sāmitá ke ne hoko] ko e palōfita ke taki ʻi he kuonga ko ʻení … Naʻá Ne fili ha tokotaha ʻe lava ke akoʻi ke ne ʻilo ʻa e ngaahi meʻa ʻa e ʻOtuá—ʻa e ngaahi meʻa ko ia ʻe ngali laulaunoa pē nai kia kinautolu kuo akoʻi ʻi he ngaahi meʻa pē ʻo e māmaní.9

ʻI he moʻui ʻa e tamasiʻi palōfita ko Siosefa Sāmitá, kimuʻa ʻeni pea toki foaki kiate ia ʻa e ongo fakahā ʻe ua mei he ngaahi fakahā mahuʻinga taha kuo foaki ki he tangatá, naʻe muʻomuʻa ʻi he ongo fakahā fakatouʻosi ko ʻení ʻa hono fakaʻaliʻali mai ʻa e mālohi ʻo e tēvoló—ʻi he Vao ʻAkau Tapú pea ʻi he Moʻunga Komolá foki. Hangē naʻe fie maʻu ia ke mahino ki he Palōfitá ʻa e tōʻonga pea mo e mālohi ʻo e faʻahinga ivi ko iá kae lava ke ne mateuteu atu ke fakafepakiʻi mo ikunaʻi ia.10

ʻOku ʻikai hoko ha palōfita ia ko ha taki fakalaumālie ʻaki pē haʻane lau mo ako ha ngaahi tohi fekauʻaki mo e tui fakalotú, pe te ne hoko ko ha palōfita ʻaki ʻene ʻalu ki ha kalasi ako fakalotu … ʻOku hoko ha tokotaha ia ko ha palōfita pe ko ha taki fakalotu ʻi heʻene aʻusia tonu ha ngaahi fetuʻutaki fakalaumālié. Ko ia, ʻoku maʻu fakahangatonu pē ʻe he tokotaha poto fakalaumālie moʻoní ia ʻa ʻene tohi fakamoʻoni akó (diploma) mei he ʻOtuá.11

Ko e hā e ngaahi meʻa mahuʻinga kuo fokotuʻu ʻe he ʻEikí ʻo fakafou mai ʻi he Palōfita ko Siosefa Sāmitá?

Naʻe ʻosi ʻiloʻi pē ʻa e misiona ia ʻa e Palōfita ko Siosefa Sāmitá … ʻi he ngaahi taʻu ʻe 2,400 kimuʻa pea toki fanauʻi iá. Naʻe ʻosi hiki ʻi he ngaahi peleti palasá ʻa e ngaahi kikite. … fekauʻaki mo Mōsese pea mo Siosefá pea naʻe maʻu mai ia meia Lēpani ʻe he ngaahi foha ʻo Līhaí ʻo hangē ko ia ʻoku mou manatuʻí. Naʻe hā ʻi he ngaahi peleti palasa ko iá ʻa e kikite ko ʻeni ʻa ia naʻe ʻikai toe ʻuhinga ia ki ha taha kehe ka ko e Palōfita pē ko Siosefa Sāmitá.

“ʻIo, ko e moʻoni naʻe pehē ʻe Siosefa [ʻoku ʻuhinga ʻeni kia Siosefa ko ē naʻe fakatau ki ʻIsipité]: ʻOku folofola peheni kiate au ʻe he ʻEikí: Te u hiki hake mei he hako ʻo ho tengá ha tangata kikite mahuʻinga; … pea te u foaki kiate ia ʻa e mālohi ke ne ʻomi ʻa ʻeku ngaahi leá ki he hako ʻo ho tengá— kae ʻikai ke ʻomi pē ʻa ʻeku ngaahi leá, ʻoku folofola ʻe he ʻEikí, ka ke fakatupu ʻenau tui ki heʻeku ngaahi leá, ʻa ia kuo ʻosi ʻalu atu ʻiate kinautolu. … Vakai, ʻe tāpuakiʻi ʻa e tangata kikite ko iá ʻe he ʻEikí; pea ʻilonga ʻa kinautolu ʻe feinga ke fakaʻauha iá, ʻe taʻofi ʻa kinautolu. … Pea ko hono hingoá ʻe ui ia kiate au; pea ʻe tatau ia mo e hingoa ʻo ʻene tamaí. Pea te ne tatau pē mo au; koeʻuhí ʻe fakamoʻui ʻa hoku kakaí ʻi he māfimafi ʻo e ʻEikí ʻe he meʻa ʻa ia ʻe fakahoko ʻe he ʻEikí ʻi hono nimá.” [Vakai ki he 2 Nīfai 3:7, 11, 14–15].12

ʻI he kuonga ko ʻení, ʻo hangē pē ko ia naʻe hoko ʻi he māmaní he ngaahi kuonga fakakōsipeli ki muʻá, naʻe foaki ʻo fakafou mai ʻi he palōfita ʻo e ʻaho ní, ʻia Siosefa Sāmita, ʻa e ʻilo moʻoni ʻo kau ki he ʻOtuá pea mo hono ʻAló, ʻa hotau Fakamoʻuí, ʻi heʻena fefolofolai mo ia, ʻo hangē ko ia naʻe lava ke fepōtalanoa ʻaki mo fehāʻaki ʻa e tangatá mo ha kau tangata kuo nau maʻu ʻa e sino nāunauʻia, ke fakaʻaliʻali mai ai ko e moʻoni ʻokú na maʻu ha sino, ʻi he kamataʻanga ko ʻeni ʻo e kuonga ʻo e kakato ʻo e ngaahi kuongá, ko e teuteu atu ki he hāʻele ʻanga ua mai ʻa e ʻEikí ke pule ko e ʻEiki ʻo e ngaahi ʻeiki mo e Tuʻi ʻo e ngaahi tuʻi ʻi he kamata-ʻanga ʻo e nofotuʻí.13

Ko e taimi pē kuo tau fakaholomui ai ʻi heʻetau tui mo ʻetau ʻiloʻi ʻa e ʻEikí, kuó Ne hanga ʻi Heʻene ʻaloʻofá ʻo toe fakafoki kakato mai ʻa e ʻilo ki he ʻOtuá pea mo Hono ʻAló, pea ko e taimi pē kuo lilingi hifo ai ʻo lahi ʻa ʻetau ʻilo ki he Tamaí mo e ʻAló, ʻoku tau pehē leva kuo tau aʻusia ha kuonga foʻou. Pea naʻe pehē pē ʻi he taimi ʻo ʻĀtamá; pea pehē ʻi he taimi ʻo ʻĒpalahamé; ʻi he taimi ʻo Mōsesé; ʻi he taimi naʻá Ne haʻu ai ki he kakai Nīfaí; ki he kakai ʻo ʻĪnoké; ko ia naʻe hāʻele mai ai ʻa e Fakamoʻuí ki he lotolotonga ʻo e tangatá, ke akoʻi kinautolu ki he anga ʻo e fetuʻutaki ʻa e ʻOtuá pea mo e ʻAlo ʻo e ʻOtuá. …

ʻI heʻene mahuʻinga ko ia ki he kamataʻanga ʻo e kuonga ʻo e ka-kato ʻo e ngaahi kuongá, ko e hā e meʻa naʻe fakahoko ke kamata ʻakí? Ko hano fakahā ki he palōfita kei talavou ko Siosefa Sāmitá ʻa e ʻulungāanga ʻo e ʻOtua ko e Tamaí pea mo e ʻAló.14

“Kuo fai ha meʻa lahi ange ʻe Siosefa Sāmita ko e Palōfita mo e Tangata Kikite ʻa e ʻEikí, ki hono fakamoʻui ʻo e faʻahinga ʻo e ta-ngatá ʻi māmani, tuku kehe ʻa Sīsū pē, ʻi ha toe tangata ʻe toko taha ʻa ia naʻe moʻui ʻi ai ʻi ha kuonga” (T&F 135:3). ʻE pehē ʻe ha niʻihi ia ko ha fakamatala ʻeni ʻoku taʻe moʻoni, ka [ʻoku ʻikai] he ko e taimi ko ia ʻoku tau fakakaukau atu ai ki he meʻa kuó Ne foaki mai kia kitautolu ʻo fakafou mai ʻi he talavou fakaofo ko ʻení, ʻa ia naʻe taʻu pē ʻe ua pea ne tuku mai ha tohi folofola ʻa ia ko ha fakamoʻoni ia hono ua ki he misiona ʻo e ʻEikí, ko e Tohi ʻa Molomoná. … ʻA e talavou ko ʻeni naʻe ʻikai ke ne maʻu ʻa e ngaahi poto ʻa ha tangata naʻe ako, ka naʻe ueʻi ia ʻe he mālohi ʻo e ʻOtua Māfimafí ke ne liliu ʻa e lekooti ko iá mei ha faʻahinga lea naʻe ʻikai ʻiloʻi ʻe ha taha ki he lea ʻoku tau maʻu ai ia he ʻaho ní, ʻa ia ʻoku ʻi ai ʻa hono kakato ʻo e ongoongolelei taʻengatá.15

Ko Siosefa Sāmitá, ʻa e talavou ko ia naʻe ʻikai ke akoʻi ʻi he ngaahi meʻa fakalotu ʻo e taimi ko iá, ʻikai ke ako ʻi he ngaahi ako- ʻanga māʻolunga ʻi hono taimí. …ko ha tokotaha ia naʻe lava ke ne fakaongoongo ki he ngaahi akonaki pea mo e ngaahi fanafana ʻa e Laumālié. Naʻe ʻikai mei lava ʻe Siosefa Sāmita ia ke fokotuʻu ʻa e siasí ni. Naʻe ʻikai ke ne mei lava ʻo fakahoko mai ʻa e ngāue ʻa e ʻEikí, ʻa e Tohi ʻa Molomoná. Naʻe ʻikai ke mei lava ʻe Siosefa Sāmita, ko e tangatá, ʻo fai ʻeni, ka naʻe lava ʻe Siosefa pea naʻá ne fakahoko, ʻi heʻene ngāue ʻaki ʻa e mālohi ʻo e ʻOtua Māfimafí, ʻa e ngāue fakaofo ko ia ʻo hono ʻomi ʻo e puleʻangá mei he kakapú pea mei he fakapoʻulí, ʻi he ongoongolelei ʻo Sīsū Kalaisi kuo toe fakafoki maí.16

Naʻe fakahā [ʻe Molonai] ki he Palōfitá. … kuo ofi ʻa e taimi ke malangaʻi ai ʻa e ongoongoleleí ʻi hono kakató ʻi he mālohi ki he ngaahi puleʻanga kotoa pē. Ko hono fakahoko ʻeni ʻo e talaʻofa naʻe fai kia Sioné ʻi he taimi ʻe puna ai ʻa e ʻāngeló ʻi he loto langí, “kuo ʻiate ia ʻa e [kakato ʻo e] ongoongolelei taʻengatá ke malanga ʻaki kiate kinautolu ʻoku nofo ʻi he māmaní” (Fakahā 14:6). Naʻe fakakakato ʻa hono toe fakafoki mai ʻo e kakato ʻo e ongoongo-leleí ʻi he taimi naʻe toe fakafoki mai ai ʻa e Tohi ʻa Molomoná ki he māmaní ʻo fakafou mai ʻi he Palōfita ko Siosefa Sāmitá, ʻa ia naʻe fakahā ʻo pehē ko ha lekooti ia ʻe ʻi ai ʻa hono kakato ʻo e ongoongoleleí.17

ʻI he ʻaho 21 ʻo Sepitema 1823 [naʻe hā mai ai ʻa Molonai kia Siosefa Sāmita ʻo ne fakahā fakakonga pē,] “ʻoku vave ʻene kamata ʻa e ngāue ko e teuteu ki he hāʻele ʻanga ua mai ʻa e Mīsaiá; kuo hokosia ʻa e taimi ke malanga ʻaki ai ʻa e Ongoongoleleí ʻi hono kakató ʻi he mālohi ki he ngaahi puleʻanga kotoa pē. … ke teuteuʻi ai ha kakai ki he Nofotuʻí,” ʻa ia ʻoku ʻuhinga ʻeni ki he hāʻele mai ʻa e ʻEikí (History of the Church, 4:537). ʻI hono fakalea ʻe tahá, ko e tefitoʻi taumuʻa pē ʻo hono toe fakafoki mai ʻo e ongoongoleleí ke teuteuʻi ha kakai ʻa ia te nau mateuteu atu ke tuʻu ʻi he ʻao ʻo e ʻEikí ʻi he taimi te Ne hāʻele mai aí; he ka ʻikai,. … ʻe ʻikai ke tau lava ʻo matuʻuaki ʻa e nofo ʻi Hono ʻaó.18

ʻI he ʻaho ní ʻoku hoko ʻa e ngāue ʻa e puleʻanga ʻo e ʻOtuá ʻi he māmaní ko ha maka fakamanatu ia ki he hingoa ʻo e Palōfita ko Siosefa Sāmitá. Kuo lau miliona ʻa e kakai kuo nau tali lelei ʻa e nāunauʻia ʻo hono misioná ʻi heʻene fakamafola mo tataki ia ʻi he māmaní hono kotoa. Ko kitautolu ʻoku tau maʻu ʻa e mataʻitofe mahuʻinga ko iá, ʻa e ongoongolelei ʻo Sīsū Kalaisí, ʻa ia naʻe toe fakafoki ʻo fakafou mai ʻiate ia ko ha meʻangāue ʻa e ʻOtuá, ke tau moʻui, pea tau mate ʻo ka ʻaonga ke hoko, koeʻuhí ke tau mateuteu atu ʻi he taimi totonú ki he Nofotuʻi ko iá. ʻOku totonu ke ʻoua ʻaupito naʻa teitei ngalo ʻeni ʻiate kitautolu. Ko e taimi ʻeni kiate kitautolu, lolotonga ʻoku tau kei maʻu ʻa e taimí, ke tau teuteu ai ke feʻiloaki mo hotau ʻOtuá.19

Ngaahi Fokotuʻu ki he Akó mo Hono Aleaʻí

  • Te tau lava fēfē ke takitaha fakamālohia ʻetau ngaahi fakamoʻoni ki he misiona ʻa e Palōfita ko Siosefa Sāmitá? Ko e hā ha meʻa kuó ne fakamālohia ʻa hoʻo fakamoʻoni ki he Palōfitá?

  • Te tau lava fēfē ke muimui ki he faʻifaʻitakiʻanga ʻa e Palōfita ko Siosefá ke fakatupulaki ai ʻa hotau potó pea mo hotau tuʻunga fakalaumālié? Ko e hā ha ngaahi ʻulungāanga fakaKalaisi ʻoku hā mahino mai ʻi he moʻui ʻa e Palōfita ko Siosefa Sāmitá?

  • Ko e hā ha niʻihi ʻo e ngaahi moʻoni ʻo e ongoongoleleí naʻe fakahā mai ʻo fakafou ʻi he Palōfita ko Siosefa Sāmitá?

  • Ko e hā e meʻa kuo fai ʻe Siosefa Sāmita ʻo kau ki hono faka-moʻui ʻo e fānau kotoa ʻa e ʻOtuá? Ko e hā ha ngaahi founga ʻoku kehe ai ʻa hoʻo moʻuí ko e tupu mei he ngaahi fakahā ko ia naʻe maʻu ʻe he Palōfita ko Siosefa Sāmitá?

  • Te ke vahevahe fēfē mo ha niʻihi kehe ʻa hoʻo fakamoʻoni ki he Palōfita ko Siosefa Sāmitá?

Maʻuʻanga Fakamatalá

  1. “The Place of the Living Prophet, Seer, and Revelator,” lea naʻe fai ki he kau faiako semineli mo e ʻinisititiutí, ʻUnivēsiti ko Pilikihami ʻIongí, 8 Siulai 1964, ʻĀkaivi ʻa e Potungāue ki he Ngaahi Meʻa Fakahisitōliá, Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 2–3

  2. “He Lived Great, Died Great in Eyes of God and His People,” Church News, 10 Tīsema 1955, 4.

  3. The Teachings of Harold B. Lee, ʻātitaʻi ʻe Clyde J. Williams (1996), 371

  4. “He Lived Great,”13.

  5. The Teachings of Harold B. Lee, 371.

  6. ʻI he Conference Report, ʻOkatopa 1956, 62.

  7. “Two Great Commemorations,” Pōpoaki faka-Kilisimasi ki he kau ngāue kotoa ʻi he ʻÕfisi ʻo e Siasí, 14 Tīsema 1972, ʻĀkaivi ʻa e Potungāue ki he Ngaahi Meʻa Fakahisitōliá, Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 6.

  8. ʻI he Conference Report, ʻOkatopa 1972, 18; pe Ensign, Sānuali 1973, 23.

  9. “A Man among Men—A Man of Inspiration,” lea naʻe fai ʻi hono Fā ʻo e ʻAho Fakalāngilangi Fakataʻu ʻo Tēvita O. Makeí, 29 Sepitema 1968, ʻĀkaivi ʻa e Potungāue ki he Ngaahi Meʻa Fakahisitōliá, Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 12

  10. The Teachings of Harold B. Lee, 372.

  11. “He Lived Great,” 5.

  12. “He Lived Great,” 5.

  13. ʻI he Conference Report, ʻEpeleli 1969, 132–33; pe Improvement Era, Sune 1969, 105.

  14. The Teachings of Harold B. Lee, 373–74.

  15. The Teachings of Harold B. Lee, 372.

  16. The Teachings of Harold B. Lee, 372.

  17. The Teachings of Harold B. Lee, 374.

  18. The Teachings of Harold B. Lee, 375.

  19. ʻI he Conference Report, Konifelenisi Fakaʻēlia ʻa Miuniki Siamane 1973, 7.

Naʻe fakamoʻoni ʻa Palesiteni Hāloti B. Lī ʻo pehē: “ʻOku ou. … ʻiloʻi ko Siosefa Sāmitá ko e palōfita ia ʻa e ʻOtua moʻuí. ʻOku ou ʻiloʻi naʻá ne moʻui pea mālōlō ke ʻomi ki he toʻu tangatá ni ʻa e founga ʻe lava ke maʻu ai ʻa e fakamoʻuí.”

ʻI he ʻUluaki Mata-meʻa-hā-maí, ko hono kamata ia ʻo e kuonga ʻo e kakato ʻo e ngaahi kuongá ʻaki “hano fakahā mai ʻo e ʻulungāanga ʻo e ʻOtua ko e Tamaí pea mo e ʻAló” ki he palōfita kuo fili ʻa e ʻEikí.