Vahe 13
Ko Hono Akoʻi ʻo e Ongoongoleleí ʻi ʻApí
ʻE lava fēfē ʻe he ngaahi mātuʻá ʻo ngaohi honau ʻapí ke hoko ko ha hūfangaʻanga pea mo ha teuteuʻanga ki he moʻui taʻengatá?
Talateu
Naʻe meʻa ʻa Palesiteni Hāloti B. Lī fekauʻaki mo e mahuʻinga ʻo hono akoʻi ʻo e ongoongoleleí ʻi ʻapí ʻo ne pehē :
“ʻI heʻetau lau mei he ngaahi meʻa kuo tohi ʻe he kau palōfita motuʻá, ʻoku tau ʻilo ai ʻa e meʻa hangehangē ko e tefitoʻi kovi ia naʻá ne fakatupu ʻa e fai angahala ko ia naʻe tupu ai ʻa e tutulu ʻa e ʻOtuá, ʻa ia naʻá ne fakatupu ʻa e faʻahinga ʻo e tangatá. ʻI he fakahā naʻe fai ʻe he ʻOtuá ki heʻene palōfita faivelenga ko ʻĪnoké, naʻá ne fakahā ange ʻoku ʻikai ha ʻofa ʻa e toenga ʻo ʻene fānaú pea nau fehiʻa ki honau toto ʻonautolú pē, ʻa ia naʻe ʻuhinga pē ʻeni ki heʻenau fānaú.
“ʻI he tali ʻa e ʻOtuá ki he fehuʻi ʻa ʻĪnoke ki hono ʻuhinga ʻo ʻene tutulú, naʻá Ne folofola ange ʻkuo teʻeki ai ʻi hono kotoa ʻo e meʻa kuo fakatupu ʻe hoku nimá ha angahala lahi pehē fau ʻo hangē ko ia ʻoku ʻi he lotolotonga ʻo ho kāingá.’
“Pea naʻá ne toe hoko atu pē: ‘ … vakai, ʻe ʻi he ʻulu ʻo ʻenau ngaahi tamaí ʻa ʻenau ngaahi angahalá. … .’ (Mōsese 7:36–37.) ʻOku mahino lelei mai naʻe fakahoko ʻe he ngaahi mātuʻa ʻo e toʻu tangata ko iá ʻa e angahala lahi ʻo e ʻikai ke nau tauhi ki he fekau naʻe ʻoange ki he ngaahi mātuʻa kotoa talu mei he kuonga ʻo ʻĀtama ʻo aʻu mai ki hotau kuongá ni. Kuo ʻikai ke nau akoʻi ʻa e ngaahi tokāteline ʻo e fakamoʻuí ki heʻenau fānaú.
“Kuo fakatokanga mai ʻa e ʻEikí kia kitautolu, ʻo hangē pē ko ia naʻá ne fai ʻi he kuonga ʻo Noá, pea ko ia pē ʻe hoko ʻi he hāʻele mai ʻa e Foha ʻo e Tangatá. ʻOku tuku mai ʻe he ʻOtuá ki he kakaí ni ke nau tokanga ki he ui ʻoku haʻu mei hotau kau taki ko e kau palōfitá pea ke nau akoʻi ʻa ʻenau fānaú ʻo hangē ko ia kuo fekau mai ʻe he ʻEikí koeʻuhí ke nau hao mei he tautea ʻi he toʻukupu ʻo e ʻOtua Māfimafí.”1
ʻE aleaʻi ʻi he vahe ko ʻení ʻa e ngaahi fatongia mamafa kuo tuku ki he ngaahi mātuʻá ke nau akoʻi ʻa e ongoongoleleí ki heʻenau fā- naú pea ke teuteuʻi kinautolu ke nau moʻui anga-tonu.
Ngaahi Akonaki ʻa Hāloti B. Lií
Ko e hā nai ʻoku hoko ai ʻa e ʻapí ko e feituʻu mahuʻinga taha ia ke akoʻi ai ʻa e ongoongoleleí?
Kuo pau ke ʻoua naʻa ngata pē ʻa e hoko ʻa hotau ngaahi ʻapí ko ha ngaahi hūfangaʻangá kae hoko foki ko ha ngaahi feituʻu teuteuʻanga ke ʻalu atu mei ai hoʻomou toʻutupú mo e loto falala ke nau taki pea ke nau fehangahangai mo ha māmani moveuveu. ʻOku tau ʻosi ʻilo kotoa pē ko e meʻa ko ia ʻoku ako ʻi ʻapí ʻoku faka-ofo ʻene tolongá; ko e ngaahi meʻa ko ia ʻoku sio ki ai mo hoko ʻi ʻapí, ka ʻikai pē ke ne tokoniʻi ʻa hotau toʻutupú, ko ʻene muimui ʻiate kinautolu mo fakatupu ʻa e maumau ʻi he ngaahi taʻu ka hoko maí. ʻOku lava pē ke hoko ʻa hotau ngaahi ʻapí ko ha ngaahi sīpinga ia maʻá e faʻahinga kotoa ʻo e tangatá, ka kuo pau ke tau toe fuʻu tokanga fakamātoato ange ki he faleʻi ʻa e kau taki ʻo e Siasí fekauʻaki mo e tefito ko ʻení ʻo lahi ange ia ʻi ha toe taimi. Kuo hoko maʻu pē ia ko ha tukupā makehe, ka ʻoku hoko ia ʻo toe lahi ange he taimí ni koeʻuhi ko e lahi ʻa e ngaahi maumau ʻoku hoko ʻi he ngaahi ʻapi ʻo hotau kuongá ni. ʻOku lava pē ke “ongoʻi pea mamata” ʻa e fānaú ki he ngāue ʻa e ongoongoleleí ʻi ʻapí. ʻOku lava ke nau mamata tonu ki hono moʻoní pea mo hono mālohí; ʻoku lava ke nau mamata ki heʻene feau e ngaahi fiemaʻu ʻa e fakafoʻituituí.2
Kuo ʻosi toutou tala tuʻo lahi ko e ʻapí ʻoku makatuʻunga ai ʻa e moʻui anga-tonú. … ʻOku fakatou fakahā mai ʻe he ngaahi fakahā ʻa e ʻOtuá pea mo e poto ʻoku ako ʻe he tangatá kia kitautolu ʻa hono mahuʻinga ʻo e ʻapí ʻi hono fakafōtunga ʻo e moʻui kakato ʻa e fakafoʻituituí.3
Kuo fakaʻau pē ke lahi ange ʻa ʻene mahino mai ko ia ko e ʻapí mo e fāmilí ko e kī ia ki he kahaʻu ʻ o e Siasí. Ko e kiʻi tamasiʻi ko ia ʻoku ʻikai ke ʻofaʻí, ʻa e kiʻi tamasiʻi kuo teʻeki ai pē ke ne ʻiloʻi ʻe ia ʻa e meʻa ko e akonaki, ngāue, pe ko e fatongia, ʻe faʻa tukulolo ia ki he ngaahi meʻa ʻa e tēvoló ke fetongi ʻaki ʻa e fiefiá—ki he ngaahi faitoʻo kona tapú, ʻahiʻahiʻi ʻo e ngaahi tōʻonga fakaseki-sualé, pea mo e fakafepakí, ʻo tatau ai pē pe ʻoku hā ia ʻi heʻene ngaahi fakakaukaú pe ʻi hono ʻulungāangá. …
ʻOku ʻikai mo ha toe feituʻu lelei ange ka ko ʻapi ke akoʻi mo ako ai ʻo kau ki he nofo malí, ki he ʻofá, mo e tuʻunga tangata pe fefiné koeʻuhí he ʻoku lava ke fakatahaʻi totonu ʻa e ngaahi meʻá ni ʻi ha mali temipale kuo ʻosi fakatoputapuʻi. ʻOku ʻikai ha toe fei-tuʻu lelei ange ke tokoniʻi ai ʻa e ngaahi loto veiveiua ʻo ʻetau toʻu tupú ka koe feituʻu ko ia ʻoku ʻi ai ʻa e ʻofá—ʻi ʻapi. ʻE lava ʻe he ʻofá ʻo fakatauʻatāinaʻi ʻa hoʻomou toʻu tupú ke nau fakafanongo kia ki-nautolu ʻoku nau ʻilo te nau lava ʻo falala ki aí. …
ʻE lava nai ke ʻofa ha tamasiʻi ki hono kaungāʻapí taʻe te ne fuo-fua ʻilo ʻe ia ʻa e ʻofá? ʻE lava ʻe ha tokotaha kei siʻi ʻa ia kuo teʻeki ai falala ange ha taha ki ai ʻo ako ke ne falala ki ha taha? ʻE lava ʻe ha tamasiʻi kuo teʻeki ai ke ne ʻilo ʻa e meʻa ko e ngāué pe ko e fatongiá ʻo sio ki hono fie maʻu ʻo e ngaahi ʻulungāanga mahu- ʻinga ko iá ke ne hanga ʻo pukepuke fakataha ʻa e anga ʻo ʻetau nofó? ʻE lava ʻe ha taʻahine kuo teʻeki ai ke ne kau ʻi hano aleaʻi ʻo e ngaahi tefitoʻi moʻoni ʻo e ongoongolelei ʻi hono ʻapí, ʻi hono aleaʻi fakamātoato pea fakakata he taimi ʻe niʻihi, ʻo matuʻuaki ʻa e ngaahi fakaanga ʻa māmaní pea mo e ngaahi fakakaukau fakafe-paki ki heʻene tui fakalotú? … Kapau ʻoku teʻeki ai ke aʻusia ʻe ha taha hono ngāueʻi ʻo ha tefitoʻi moʻoni ʻo e ongoongoleleí, ʻoku toe fuʻu faingataʻa ange ia ke ne tui ki he tefitoʻi moʻoni ko iá. ….
ʻI ha taimi kuo fakahā mai ʻe tatau tofu pē mo e ngaahi ʻaho ʻo Noá, kuo pau ke tau hanga ai ʻe kitautolu ʻo tokoniʻi ʻa ʻetau toʻu tupú ke nau ako ke fai ʻa e ngaahi fili totonú, ke nau tupulaki ʻi he mahuʻingaʻia pē ʻiate kinautolu, kae fakatautefito ʻeni ki he taimi ʻoku lava ke tākiekina lelei ai kinautolu ʻi he ʻapí, ʻa e feituʻu ʻoku lava ai ʻe he ʻofa ʻa e fāmilí ʻo ʻai ke lava ʻo fakahoko mo ʻuhinga mālie ai ʻa e fakatomalá. Ko e taimi lahi ko e ʻātakai ko ia ʻoku ʻi ai ʻetau toʻu tupú ʻi tuʻa mei he ʻapí mo e Siasí ʻoku ʻikai ke faʻa maʻu ai ʻa e ngaahi tuʻunga ʻulungāanga leleí ia, pe ko hono maʻu ai ʻo e ngaahi fakakaukau ʻoku fakafepaki ki he ngaahi tefi-toʻi moʻoni ʻo e ongoongoleleí.4
ʻOku hilifaki ki he ngaahi mātuʻá ʻi ʻapi pea ki he Siasí ʻa e fato-ngia mamafa ke akoʻi ʻa e ngaahi moʻoni ʻo e ongoongoleleí koe- ʻuhí ke lava ʻo ʻi ai ha taula maʻá e tangata takitaha. He kapau ʻe ʻikai ha taula peheni, ʻe “felīlīʻaki, mo feʻaveʻaki fano ʻe he ma-tangí” ʻa e tangatá, ʻo puhiʻi atu ia ʻe he akonaki kotoa pē ʻoku ʻikai ʻilo pe ko ʻene kamatá mei fē, ʻo ne hanga ʻe ia ʻo ʻai ke puputuʻu ʻa ʻene fakakaukaú ki he meʻa ʻoku hala ʻi he ʻao ʻo e ʻOtuá [vakai, ʻEfesō 4:14; Sēmisi 1:6]. ʻOku totonu ko e kakai ako lelei taha pē kitautolu ʻi he funga ʻo e māmaní ʻo kapau te tau tokanga ki he ngaahi fekau ʻa e ʻEikí.
Kapau ʻe maluʻi peheni ʻa ʻetau toʻu tupú, ʻe ʻikai faʻa ueʻi ʻa ʻenau tui fakalotú ʻi he taimi ʻoku nau fetaulaki ai mo e ngaahi faka-kaukau fakaako taʻe moʻoni ko ia ʻoku nau fakafepakiʻi e ngaahi moʻoni ʻo e ongoongoleleí. Kuo ʻosi maluʻi kinautolu ia mei he ngaahi ngahau kona ʻo e lauʻikoviʻí mo e mālualoí.
Ko e kau talavou. … ʻoku tataki ʻenau fakakaukaú ʻe he moʻoni kuo hoko ko e “maka tuʻú” ʻe ʻikai ke nau tukulolo kinautolu ʻi ha momeniti te nau kiʻi vaivai ai ki ha faʻahinga ʻahiʻahi ʻa ia ʻe hoko ko ha maumau fakaeangamaʻa ʻi hono kotoa ʻo ʻenau moʻuí. …
Ko e kau talavou mo e finemui faikaumeʻa ʻoku nau hanga atu ki he malí, kapau pē ʻe tataki mo fakahinohino kinautolu ʻe he ngaahi fakakaukau ʻoku ʻomi ʻe he moʻoni ʻo e ongoongoleleí, te nau fakamāʻoniʻoniʻi pē ʻe kinautolu kinautolu ʻaki ʻenau tauhi ʻa e lao ʻo e mali fakasilesitialé ke nau maʻu ai ʻa e fiefia taʻengatá.5
Naʻe folofola ʻe he ʻEikí ʻo pehē naʻe ʻikai ʻoange ʻa e mālohi ia kia Sētane ke ne fakataueleʻi ʻa e fānau īkí “kae ʻoua ke nau faka- ʻau ke feʻunga ʻi hoku ʻaó ke ʻekeʻi ʻenau angahalá” (T&F 29:47). ʻOku hoko atu ai pē ʻa e lea mahuʻinga ko ʻení: “Koeʻuhí ke ʻekeʻi ʻa e ngaahi meʻa lalahi ʻi he nima ʻo ʻenau ngaahi tamaí” (T&F 29:48). ʻOku ʻuhinga ʻeni ki he ngaahi mātuʻá. Ko e hā hono ʻuhinga ʻoku ʻikai fakangofua ai ʻe he ʻEikí ʻa Sētane ke ne fakatau-eleʻi ʻa e fānau īkí kae ʻoua kuo nau feʻunga ke ʻekeʻi meiate ki-nautolu ʻenau angahalá? ʻOku ʻuhinga ia ke maʻu ʻe he ngaahi mātuʻa ʻa e faingamālie ke nau fakatō ki he loto ʻo e fānau īkí ʻa e ngaahi meʻa mahuʻinga ʻoku fie maʻu ke fakatō ki honau lotó ki-muʻa pea nau toki aʻusia ʻa e taimi ʻoku nau feʻunga ai ke ʻekeʻi ʻenau ngaahi angahalá meiate kinautolú, he ka ʻikai ʻe fuʻu tōmui ia ke fakatō ki he loto ʻo ʻenau fānaú ʻa e ngaahi meʻa mahuʻinga ko iá.6
ʻOku tau maʻu ʻe kitautolu ko e ngaahi tamaí, kau faiakó, ngaahi faʻeé, [ha fatongia] mamafa ki hono langa hake ʻa e lau-mālie ʻo e tangatá. Ko e moʻoni, ʻoku ʻikai lava ke fakataueleʻi ʻe Sētane ʻa e fānau īkí kae ʻoua kuo nau feʻunga ke ʻekei meiate ki-nautolu ʻenau angahalá; ka ʻoku fai ʻe Sētane ia ʻa e meʻa kotoa ʻokú ne lavá ʻaki ʻene feinga ke ʻai kitautolu kuo fakafalala mai ki ai honau tokangaʻí mo honau akoʻí ke tau taʻe tokanga pea tuku pē kinautolu ke nau faʻufaʻu ʻa e fanga kiʻi ʻulungāanga ko ia te nau hē aí, ʻo tupu ai ʻa e ʻikai ke nau feʻunga ki he taimi te nau fe-paki ai mo Sētané, pea ʻikai ke nau lava ʻo maluʻi kinautolu ʻi he taimi kuo nau taʻu feʻunga ai ke ʻekeʻi meiate kinautolu ʻenau angahalá.7
Kuo pau ke mau fakatō mamafa ki he tamai kotoa pē ʻe ʻekeʻi meiate ia ʻa e lelei taʻengata ʻa hono fāmilí: ʻoku ʻuhinga ia ki heʻene kau mo hono fāmilí ki he Siasí; ʻoku ʻuhinga ia ki heʻene ʻalu mo hono fāmilí ki he houalotu sākalamēnití; ʻoku ʻuhinga ia ki heʻene fakahoko ʻa e efiafi fakafāmili ʻi ʻapí ke pukepuke faka-taha mai hono fāmilí; ʻoku ʻuhinga ia ki heʻene teuteuʻi ia ke ne ʻave kinautolu ki he temipalé koeʻuhí ke lava ʻo teuteuʻi ai kinau-tolu ʻi he ngaahi sitepu ko ia te ne faʻu ha ʻapi maʻa ha fāmili taʻe-ngata.8
Siʻi ngaahi faʻē, mo kimoutolu ko e ngaahi tamaí, ʻoku ou tapou atu ke mou foki muʻa ʻo fakakakato ʻa homou fatongia ki he ngaahi laumālie mahuʻinga ko iá. Kapau ʻoku ʻikai ke mou teuteuʻi kinautolu ki he ʻaho ko ia ʻoku hoko maí, ko hai te ne toe fai iá? ʻA e ʻaho ko ia ʻe hoko mai ai [ʻa e ʻEikí] ʻo hangē ha kaihaʻa ʻi he poó, ka ʻokú ke teuteuʻi nai kinautolu ke nau tuʻu ʻi Hono ʻaó? Ko e taimi ko ia ʻoku nau ʻi he malaʻe ai ʻo e taú, ʻa e taimi ʻoku nau fehangahangai ai mo e faingataʻá, pea nau fehangahangai mo e ʻahiʻahí, ʻoku kakau atu nai hoʻo ʻofa fakafaʻeé ʻi he ngaahi maile ko ia ʻe lauafé ʻo pukepuke ʻa ho fohá pe ʻofefiné ke ne tuʻu maʻu?9
Ko e hā ʻa e ngaahi tefitoʻi moʻoni ʻo e ongoongoleleí ʻoku totonu ke tau akoʻi ki heʻetau fānaú?
Naʻe tohi ʻe he palōfita ko ʻĪnosí ʻo kau ki he ngaahi akonaki ʻa ʻene tamaí. Naʻá ne pehē ʻe ia, “Ko au ʻĪnosi, ʻi heʻeku ʻilo ko e ta-ngata anga-tonu ʻa ʻeku tamaí—he naʻá ne akoʻi au … mo e ako-naki mo e ngaahi enginaki ʻa e ʻEikí—pea fakafetaʻi ki he huafa ʻo hoku ʻOtuá koeʻuhí ko ia” (Īnosi 1:1). Kuó u fakakaukau-loto ki he lea ko iá, “He naʻá ne akoʻi au ʻi he akonaki.” ʻOku ʻuhinga ia ki he hā” ʻOku ʻuhinga ʻa e akonakí ki he founga ʻo e akoʻí mo e akonakiʻí. ʻOku ʻuhinga ki he hā ʻa e enginakí? ʻOku ʻuhinga ia ki he valoki, fakatokanga pe fakamanatu ʻi he anga-vaivai pe founga fakakaumeʻa. Fakafetaʻi ki he huafa ʻo e ʻOtuá koeʻuhi ko e tamai mo e faʻē ʻokú na akoʻi ʻi he akonaki pea mo e enginaki ʻa e ʻEikí!10
Kuo ʻosi folofola mahino mai pē ʻa e ʻEikí ʻo kau ki he teuteu ko ʻeni ke maluʻi e toʻu tupú mei he ngaahi tōʻanga fakatuʻutāmaki te ne fakaʻauha kinautolú. Kuó ne ʻosi tuku mai ha fatongia ma-mafa ki he ngaahi ʻapi ʻo e fonuá ni. Ko ʻeni ʻa ʻene folofolá:
“Pea ko e tahá, kapau ʻoku maʻu ha fānau ʻe ha ongo mātuʻa ʻi Saione pe ʻi ha taha ʻo hono ngaahi siteikí ʻa ia kuo fokotuʻú, ʻa ia ʻoku ʻikai ke nau akoʻi ʻa kinautolu ke mahino ʻa e akonaki ʻo e fakatomalá mo e tui kia Kalaisi ko e ʻAlo ʻo e ʻOtua moʻuí, pea mo e papitaisó mo e foaki ʻo e Laumālie Māʻoniʻoní ʻi he hilifaki ʻo e nima ʻo ka nau ka taʻu valu, ʻe ʻi he ʻulu ʻo e mātuʻá ʻa e anga-halá. …
“Pea ke nau akoʻi foki ʻenau fānaú ke lotu, pea ke ʻaʻeva ʻo anga-tonu ʻi he ʻao ʻo e ʻEikí.” [T&F 68:25, 28.]11
Ko e mahafu tau mālohi taha ʻoku tau maʻu ke tauʻi ʻaki ʻa e koví ʻi he māmaní he ʻaho ní, ʻo tatau ai pē pe ko e hā ʻa e ngaahi kovi ko iá, ko ha fakamoʻoni taʻe toe ueʻia ki he ʻEiki mo e Fakamoʻui ko Sīsū Kalaisí. Akoʻi ʻa hoʻomou fānau īkí lolotonga ʻoku nau kei īkí pea te nau tupu hake ʻo mālohi. ʻE lava pē ke nau hē atu, ka ʻe toe fakafoki mai kinautolu ʻe hoʻomou ʻofá mo hoʻomou tuí.12
ʻOku totonu ke manatuʻi ʻe he ngaahi mātuʻá ʻa ʻenau ngaahi ngāué ʻi he ala falalaʻanga kakato, ke nau sio ʻoku ʻikai ha nofo noa koeʻuhí ke ʻoua naʻa tupu hake ʻenau fānaú ʻi he fai angahala, ka ke akoʻi kinautolu ke nau fekumi fakamātoato ki he ngaahi ko-loa ʻo e nofo taʻengatá, ke ʻoua naʻa fonu honau matá ʻi he mānu-manu (vakai, T&F 68:30–31). Ko e fatongia ia ʻo e tamaí mo e faʻeé. ʻOku tuku mai ʻe he ʻEikí ʻa e fatongia ʻuluaki ʻo hono akoʻi ʻo e ngaahi fāmilí ki he ngaahi mātuʻá.13
Kuo pau ke akoʻi ʻa e kiʻi tamasiʻi pe taʻahine takitaha ke ne ʻiloʻi ko ha fānau ia ʻa ha ongo mātuʻa fakalangi pea ko e meʻa ia ʻa e tamasiʻi mo e taʻahine takitaha ke ne ngāue ʻo fakatatau mo ha foha pe ʻofefine ʻo e ʻOtuá koeʻuhí ka hoko mai ʻa e taimi ʻo e fai-ngataʻá ʻokú ne lava pē ke lotu pea tali ʻa ʻene ngaahi kolé ʻo hangē ko ia ʻoku taau ke maʻu ʻe ha fānau anga-tonu.
Kuo pau ke akoʻi ki he tamasiʻi pe taʻahine kotoa pē ko hono sinó ko e temipale ia ʻo e ʻOtuá pea ko ia ia ʻokú ne fakaʻuliʻi ʻa e temipale ʻo e ʻOtuá, ʻe fakaʻauha ia ʻe he ʻOtuá [vakai, 1 Kolinitō 3:16–17].
Kuo pau ke ako ʻe he tamaiki pe taʻahine takitaha ʻoku toki lava pē ke maʻu ʻa e tui feʻunga ke aʻusia ai ʻa e haohaoá ʻi he feilaulau, pea kapau he ʻikai ke ne ako ke ne feilaulauʻi ʻa hono ngaahi uʻá pea mo ʻene ngaahi holi fakakakanó ʻo talangofua ki he ngaahi fono ʻo e Ongoongoleleí, ʻe ʻikai lava ke fakamaʻa ia pea ngaohi ke māʻoniʻoni ʻi he ʻao ʻo e ʻEikí.
Kuo pau ke akoʻi ʻa e tamasiʻi pe taʻahine kotoa pē ke ne anga ʻapasia ki he ngaahi fakaʻilonga ʻo e ngaahi meʻa ʻoku toputapú ʻi ʻapi, ʻi he Siasí, pea ʻi he koló.
Kuo pau ke akoʻi totonu ʻa e tamasiʻi pe taʻahine kotoa pē ʻi hono fakaʻaongaʻi ʻo hono nimá mo hono ʻulú pea ʻai ke mahino kiate ia ko e ngaahi ongo kotoa pē ʻoku maʻu ʻe he tangatá ko e foaki mai ia ʻe he ʻOtuá pea ki ha taumuʻa ʻoku faka-ʻotua ʻo kapau ʻe mapuleʻi lelei ia.
Kuo pau ke akoʻi ʻa e tamasiʻi pe taʻahine kotoa pē ke ne ngāue ʻaonga ʻaki ʻa hono taimi ʻataá pea ko e vaʻingá ʻoku ʻikai ko e vaʻinga ʻataʻatā pē ka ʻoku ʻi ai hono taumuʻa. Ko ha taimi ia ʻokú ne akoako ai ʻa e konga te ne fakahoko ʻi he taimi te ne matuʻo-tuʻa aí.
Kuo pau ke tuku ke aʻusia ʻe he tamasiʻi pe taʻahine kotoa pē ha ngaahi meʻa feʻunga ke nau ako ai ʻo ʻiloʻi ʻoku ʻomi ʻe he ngāue tokoni taʻe siokitá ʻa e fiefiá pea ʻoku maʻu ʻa e fiefia lahi tahá ʻi he ngāue ko ia ʻoku ʻikai ke totongí.14
ʻOku totonu ke fanongo ʻa ʻetau fānaú ʻi ʻapi ki he ngaahi faka-moʻoni ʻa ʻenau mātuʻá. Toki tamai pe kui tangata fakapotopoto moʻoni ia ʻoku ʻai pē peá ne fai fakatāutaha ʻene fakamoʻoni faka-foʻituituí ki heʻene fānaú!15
ʻOku lava fēfē ke tokoni ʻa e ngaahi efiafi fakafāmili ʻi ʻapí ki he ngaahi mātuʻá ʻi hono fakahoko ʻo honau ngaahi fatongia ki hono akoʻi ʻo e ongoongoleleí?
Naʻe fakahoko mai ha toe fakamamafa ʻoku lahi angé ʻi he polokalama efiafi fakafāmili ʻi ʻapí ki hono akoʻi ʻo e fānaú ʻi ʻapi ʻe he mātuʻá. Naʻe ʻikai ko ha meʻa foʻou ʻeni. … ʻIhe tohi faka-muimui taha naʻe fai ʻe Palesiteni Pilikihami ʻIongi mo hono Ongo Tokoní ki he Siasí, naʻá nau tapou ai ki he ngaahi mātuʻá ke nau faʻa fakatahatahaʻi mai ʻenau fānaú ʻo akoʻi kia kinautolu ʻa e ongoongoleleí ʻi ʻapi. Ko ia naʻe fakamamafaʻi mai pē ʻa e efiafi fakafāmili ʻi ʻapí ia talu mei he taimi naʻe fokotuʻu ai ʻa e Siasí ʻi he kuonga ko ʻení.16
Kapau ʻoku tau taʻe tokanga heni ki hotau ngaahi fāmilí ʻi hono fai ʻo e efiafi fakafāmili ʻi ʻapí pea taʻe tokanga heni ki hotau fato-ngiá, ʻe hā fēfē nai ʻa hēvani ʻo kapau ʻe mole meiate kinautolu ha-nau niʻihi ko e tupu mei heʻetau taʻe tokangá? ʻE ʻikai ke hēvani ʻa hēvani ia kae ʻoua pē kuo tau fai ʻa e meʻa kotoa pē ʻoku tau lavá ke fakamoʻui ʻa kinautolu kuo tuku mai ʻe he ʻEikí ki hotau hoko-hoko fakafāmilí. Ko ia, kuo pau ke liliu ʻa homou ngaahi loto ʻo kimoutolu ngaahi tamaí mo e ngaahi faʻeé ki hoʻomou fānaú he taimí ni pē ʻo kapau ʻoku mou maʻu ʻa e Laumālie moʻoni ʻo ʻIlaisiaá, pea ʻoua naʻa mou fakakaukau ʻo pehē ʻoku ʻuhinga pē ia kia kinautolu ʻi he tafaʻaki ʻe taha ʻo e veilí. Fakatafoki homou lotó ki hoʻomou fānaú, pea mou akoʻi ʻa hoʻomou fānaú; ka kuo pau ke mou fai ia ʻi he taimi ʻoku nau kei iiki feʻunga ai ke akoʻi ki-nautolú. Pea kapau ʻoku mou fakaliʻeliʻaki ʻa hoʻomou efiafi faka-fāmili ʻi ʻapí, ʻoku mou fakaliʻeliʻaki ai pē ʻa e kamataʻanga ʻo e ngāue ʻa ʻIlaisiaá ʻo hangē pē ko haʻamou fakaliʻeliʻaki ʻa e ngāue fakatohi- hohokó.17
ʻOku tau ngāue maʻu pē nai mo ʻetau fānaú mo e ngaahi maka-puná ʻi he lotoʻi siakale ʻo hotau ʻapí? ʻOku tau fekumi nai ki heʻe-tau fanga sipi ʻoku nau ʻi ha tuʻunga fakatuʻutāmaki ke hē atu mei he tauhí pe mei he lotoʻaá? ʻOku tau akoʻi nai hotau ngaahi fāmilí [ʻi he] efiafi fakafāmili ʻi ʻapí? ʻOku tau kau nai ʻi he efiafi fakafā- milí pe ʻoku tau lea pē ʻo pehē, “ʻOku ʻikai ke ʻaonga ʻa e ngaahi lēsoni ia ko ʻení kia kitautolu, pea ko au pē mo e Fineʻeikí toko ua, pea ko e ngaahi lēsoni pē ʻeni ia maʻá e ngaahi fāmili ʻoku ʻi ai ʻenau fanga kiʻi fānau īkí”?18
Tuku ke u fai atu muʻa ha fehuʻi. Kapau naʻá ke ʻiloʻi ʻokú ke moʻua ʻi ha faʻahinga mahaki ʻe ʻikai toe sai pea ʻoku fakangata-ngata pē ho taimi ʻi he māmaní pea ʻoku ʻi ai hoʻo fanga kiʻi fānau iiki ʻoku nau fakafalala atu kiate koe ke ke faleʻi, mo fakahino-hino, mo tataki, ko e hā leva e meʻa te ke fai ke teuteuʻi ai kinau-tolu ki ha taimi te ke mālōlō ai? Kuó ke kiʻi tuʻu hifo nai ʻi ha taimi ʻo fai hifo pē kiate koe ʻa e faʻahinga fehuʻi ko ʻení?
Tuku ke u lau atu. … mei ha tohi [ʻa ha faʻē] ʻe taha: “ʻI he taimi ko ē ne u fuofua kau mai ai ki he Siasí, naʻá ku faʻa nofo pē ʻo fakakaukau loto ki he kalasi ʻapi naʻá ku fakaʻamu te u maʻu ʻi ha ʻahó. Naʻá ku fakakaukau loto atu ki he tuʻunga ʻo e ʻapi faka- ʻofoʻofa mo fakafiemālie taha ne u lava ʻo sio loto atu ki aí. Naʻá ma ʻai ke hoko ʻo moʻoni ʻa e fakakaukau ko iá mo hoku husepā- nití ʻi he taimi naʻá ma fakatahaʻi mai ai ʻema fānaú ʻo akoʻi kia ki-nautolu ʻa e ongoongoleleí. … Ko e meʻa ʻe taha naʻá ma fakatou ʻohovale mo fiefia aí ko e ako ko ia ʻa ʻema fānau hono kotoa ke nau manako ʻi heʻemau ngaahi efiafi fakafāmili ʻi ʻapí … Kuo ʻosi kamata ʻeni ke lahi ange ʻene mahino kiate au ʻa e vave ʻo e tupu hake ʻa ʻema fānaú pea mo e nounou ʻa e taimi ʻokú ma maʻu ʻe kimaua ongo mātuʻá ke akoʻi ai kinautolú. …
“Naʻá ku puke lahi ʻaupito he faʻahitaʻu fakatōlau kuo ʻosí. ʻOku ou fakatau ange pē he ʻikai ngali laulaunoa ʻeni, ka ko e toki fuo-fua taimi ʻeni naʻá ku fakatokangaʻi ai hoku mahuʻinga ki heʻeku fānaú. … ʻI heʻeku tokoto ko ʻeni taʻe te u toe lava ke fai ha meʻa maʻanautolú, naʻá ku ʻiloʻi kuo ngata ʻa e taimi ia ke u toe lava ai ʻo tākiekina kinautolu ʻi he moʻui ko ʻení ka ne taʻe ʻoua pē ʻa e kei kau mai ʻa ʻeku Tamai Hēvaní, ʻa e toki mahuʻinga ʻo e ngaahi houa mo e ngaahi uike mo e ngaahi māhina pea mo e ngaahi taʻu ʻoku hanga mai mei muʻá.
“Naʻá ku fakapapauʻi leva ha ngaahi meʻa lahi he taimi ko iá fe-kauʻaki mo hono fakaʻaongaʻi ʻo e taimi ko iá, ʻo kapau ʻe tuku mai ha taimi moʻoku. Ko e taha ko ʻeku ngaohi ha kiʻi konga siʻi pē ʻo hēvani ʻi māmani, ke u fakamoleki haku taimi ʻi he pō kotoa pē ke u laukonga ai mo talanoa mo e fānaú … Kuó u ʻosi lau e konga lahi ʻo e Tohi ʻa Molomoná kia kinautolu mei he ngaahi tohi tala-noa ʻa e fānaú. … tuku kehe ʻa e ngaahi meʻa kehe naʻa nau fie maʻu ke lau angé … ʻOku ou ʻiloʻi pau ʻoku mahuʻingamālie pē kia kinautolu ʻeku fanongo ki hono fai ʻe heʻeku kiʻi tamasiʻi taʻu valú ʻa ʻene lotu fakafetaʻi koeʻuhi ko e kau palōfita ne nau tauhi ʻa e ngaahi tohi lekōtí, pe ko e taimi ʻoku fakamālō ai ʻeku kiʻi tama-siʻi taʻu nimá ʻi he hao ʻa Nīfai mo kinautolu naʻe anga-tonú ki he feituʻu maomaonganoá ʻi hono kumi ia ʻe Leimana mo Lēmiuela ke tāmateʻí. Ko e meʻa ʻeni kuó ma ʻiloʻí, ko e taimi pē ʻokú ma maʻu ai ha faingamālie ke tokoniʻi ʻema fānaú ke nau tupulaki ʻi heʻenau ʻofa mo e mahino ki he ongoongoleleí pea mo e Tamai naʻá ne fakatupu kinautolú, ʻoku toe tupulaki ai pē foki mo ʻema feʻofaʻakí pea ʻoku kau lelei ʻaupito ʻeni ki he tuʻunga ʻoku ʻi ai ho-mau fāmilí ʻi ha founga ʻoku ʻuhinga mālie ʻaupito. Ko hono ʻuhinga ʻeni ʻoku mātuʻaki fuʻu mahuʻinga ai kia kimaua ʻa e efiafi fakafāmili ʻi ʻapi ʻoku fai fakauiké.19
ʻOku ou lotua ke mou lea ʻaki ʻi homou ngaahi ʻapí ʻa e ngaahi lea naʻe fai ʻe Siosiua ʻi he kuonga fuoloá: “Ka ko au mo hoku falé te mau tauhi ʻa [e ʻEikí]” (Siosiua 24:15). Mou akoʻi homou ngaahi fāmilí ʻi hoʻomou efiafi fakafāmili ʻi ʻapí; akoʻi kinautolu ke nau tauhi e ngaahi fekau ʻa e ʻOtuá, ko ia pē ʻa hotau maluʻanga he ngaahi ʻaho ní. Kapau te nau fai ia, ʻe malingi hifo ʻa e ngaahi mālohi ʻo e ʻOtua Māfimafí kia kinautolu ʻo hangē ko e hahau mei langi, pea ʻe ʻiate kinautolu ʻa e Laumālie Māʻoniʻoní.20
Ngaahi Fokotuʻu ki he Akó mo Hono Aleaʻí
-
Ko e hā hono ʻuhinga ʻoku fuʻu mahuʻinga ai ʻa ʻapi ki hono fakafōtunga ʻo e “moʻui kakato” ʻa ʻetau fānaú? Ko e hā kuo pau ai ke ʻai ʻe he ngaahi mātuʻá ʻa hono akoʻi ʻo e ongoongoleleí ki heʻenau fānaú ko ha meʻa mahuʻinga taha ʻo kamata pē mei he taimi ʻoku nau kei iiki aí?
-
Te tau ngaohi fēfē hotau ngaahi ʻapí ke hoko ko e ngaahi hū- fangaʻanga mei he ngaahi anga taʻe māʻoniʻoní pea mo e ngaahi faingataʻa ʻo e māmaní?
-
ʻOku lava fēfē ʻe he ngaahi mātuʻá ke akoʻi ʻa e ngaahi tefitoʻi moʻoni ʻi he Tokāteline mo e Ngaahi Fuakava 68:25–28 ki heʻe-nau fānaú? ʻOku lava fēfē ke tokoniʻi ʻe he ngaahi mātuʻá ʻa ʻenau fānau ke nau “ako ʻo ʻiloʻi ʻoku ʻomi ʻe he ngāue tokoni taʻe sio kitá ʻa e fiefiá”?
-
Ko e hā hono ʻuhinga ʻoku mahuʻinga ai ke fanongo ʻa e fānaú ki hono fakamoʻoniʻi ʻe heʻenau ngaahi mātuʻá ʻa e ngaahi tefi-toʻi moʻoni ʻo e ongoongoleleí?
-
Ko e hā e ngaahi founga ʻoku fekauʻaki ai ʻa e ngāue (pe misiona) ʻa ʻIlaisiaá mo hono ʻohake ʻe he ngaahi mātuʻá ʻa ʻenau fānaú?
-
Ko e hā ʻoku mahuʻinga ai ke fai ʻa e ngaahi efiafi fakafāmili ʻi ʻapí? Ko e hā ha founga kuó ke fai ke toe lelei ange ai hoʻomou ngaahi efiafi fakafāmili ʻi ʻapí?
Naʻe enginaki ʻe Palesiteni Hāloti B. Lī ʻo pehē, “Mou akoʻi homou ngaahi fāmilí ʻi hoʻo-mou efiafi fakafāmili ʻi ʻapí; akoʻi kinautolu ke nau tauhi e ngaahi fekau ʻa e ʻOtuá, he ko ia pē hotau maluʻanga he ngaahi ʻaho ní.”