Vahe 24
Faifai Peá u Aʻu Lelei ki ʻApi
ʻOku tau malu nai ʻi he hala ʻoku taki atu ai kitautolu ki hotau ʻapi taʻengatá pea nofo ʻi he ʻafioʻanga ʻo e Tamaí?
Talateú
ʻI hono kotoa e taimi naʻe ngāue ai ʻa Hāloti B. Lií, naʻá ne faka-mamafaʻi e akonaki ko ʻení: “Ko e meʻa ʻoku tau feinga ki aí ke tau tokangaʻi kitautolu mo tau moʻui ʻi he founga ke ʻi ai ha ʻaho te tau toe lava ai ʻo foki atu ki ʻapi ki he ʻOtua ko ia naʻá ne foaki ʻa e moʻuí kia kitautolú ke tau foki atu ki he ʻafioʻanga ʻo e Tamai Taʻengata ko iá.“1
Naʻá ne fakamatala ki ha meʻa naʻe hoko: “Naʻá ku lau ʻi ha taimi ʻe taha ha fakamatala naʻe fai ʻe ha tokotaha faiongoongo nusi-pepa ʻiloa naʻe fakamatala ai ki heʻene aleaʻi ke fai ha fepōtala-noaʻaki lelei mo ha taha naʻá ne loto ke ʻinitaviu. Te ne fai ha fehuʻi ʻoku meimei tatau pē mo ʻeni: “Te ke loto fiemālie ke ke tala mai e meʻa te ke fie maʻu ke tohi ho maka fakamanatu ʻi faʻi-toká?ʻ Naʻá ne pehē ʻe ʻi ai ha tokolahi te nau fai mai ha ngaahi tali peheni, ‘ maʻu ha taimi fakafiefia,’ ‘ ʻalu ki ha fakatahaʻanga ʻe taha,’ mo e hā fua. Naʻe fehuʻi ange leva ki he tangata faiongo-ongó pe ko e hā e meʻa te ne loto ke tohi ʻi hono maká. Naʻá ne tali leʻo-siʻi mo fakamātoato ʻo pehē, ‘ Faifai peá u aʻu lelei ki ʻapi.’
“ʻI he taimi ʻoku tō kakano ai kia kitautolu ʻa e ʻuhinga kakato ʻo e kupuʻi leá ni, ʻoku totonu pē ke tau fehuʻi loto, ‘ ʻI he ʻosi hono fakakaukauʻi ʻo e ngaahi meʻá hono kotoa, ko e hā e tau-muʻa ʻo e moʻuí, pea ko e hā e ʻamanaki kia kitautolu hili ʻa e mo- ʻui ko ʻení, ʻi heʻetau tui ko ia ʻoku hoko atu e moʻuí hili ʻení?’ Meimei ʻoku hanganaki atu e tokotaha kotoa pē, tatau ai pē pe ko e hā ʻene tui fakalotú, ki ha moʻui ʻe lava ke fakaʻuhingaʻi ʻi ha ngaahi founga kehekehe. Pea kapau ʻoku tonu ʻeku mahaló, ta te tau fakaʻamu kotoa pē ke tohi ʻi he maka fakamanatu hotau faʻi- toká kuo ʻfaifai pea [tau] aʻu lelei ki ʻapi,’ ke fakamanatu ʻaki ʻetau ngāue ʻi he moʻui ní.”2
Ngaahi Akonaki ʻa Hāloti B. Lií
Ko e hā e taumuʻa ʻo ʻetau moʻui ʻi he māmaní?
Ko e hā e taumuʻa ʻo e moʻuí … ? Ko e tali ki aí ʻoku lava ke maʻu ia ʻi he potu folofola ʻe taha ʻokú ne fakahā mai e taumuʻa ʻa e ʻOtuá ki hono foaki mai ʻo e moʻuí, pea naʻe fakamatalaʻi ʻa e tau-muʻa ko iá ʻi ha fakahā naʻe fai ki he palōfita ko Mōsesé: “He ko ʻeku ngāué ʻeni mo hoku nāunaú—ke fakahoko ʻa e moʻui taʻe-mate mo e moʻui taʻengata ʻa e tangatá.” [Mōsese 1:39.] Kapau ʻe mānava pē ha taha ʻi he moʻui fakamatelié ʻi ha kiʻi miniti siʻi pea mate, pe ko haʻane moʻui fuoloa tatau mo e moʻui ʻa ha fuʻu ʻakau, ʻe kei fakahoko pē ʻa e taumuʻa ia ʻa ʻetau Tamaí ki hono maʻu ʻo e moʻui taʻematé. Pea ko e meʻa ʻoku ui ko e moʻui taʻengatá, ko e moʻui ia ʻi ha founga ʻe lava ke lau ai e tokotaha ko iá ʻokú ne taau ke maʻu e moʻui taʻengatá ʻi he ʻafioʻanga ʻo e ʻOtua ko e Tamaí pea mo e ʻAló. 3
Naʻe hoko pē e tangatá ʻi he maama fakalaumālié ko e fānau ʻa e ʻOtuá. Naʻe fakatupu e māmaní mo fokotuʻutuʻu ke hoko ko e nofoʻanga ʻo e ngaahi laumālie naʻe fanauʻi ʻi he langí ka kuo nau maʻu ha sino fakamatelie ke “ʻahiʻahiʻi ʻakinautolu ʻi he meʻá ni ke vakai pe te nau fai ʻa e ngaahi meʻa kotoa pē ʻe fekau ʻe he ʻEiki ko honau ʻOtuá kiate kinautolú.” [Vakai ki he ʻĒpalahame 3:25.] Ko e taumuʻa ʻa e ʻOtuá ki hono fai ʻo e meʻá ni “ke fakahoko ʻa e mo- ʻui taʻematé mo e moʻui taʻengatá“ pe, ʻi hono fakalea ʻe tahá, ke fakafoki e laumālie takitaha ki he ʻafioʻanga ʻo e ʻOtua ko ia naʻá ne foaki ʻa e moʻuí kiate iá, pea mo ha sino toetuʻu ʻoku ʻikai moʻu-laloa ki he maté pea kuo fakahaohaoaʻi, ke nofo taʻengata ʻi he ʻafioʻanga ʻo hotau ʻEikí pea mo e Tamai ʻatautolu hono kotoá, ko e ola ʻo e moʻui lavameʻa ʻi he māmaní. 4
Naʻe fai ʻe [Palesiteni Siaosi F. Lisiate] ʻa e talanoa ko ʻení, ko ha talanoa ki ha talavou naʻe fakaʻamu lahi ke ako. Naʻe ʻikai lava ʻe heʻene ongo mātuʻá ke totongi ʻene akó ʻi he kolisí, ko ia naʻá ne lue lalo ai ki he kolo naʻe tuʻu ai e kolisí, pea ʻi he hili haʻane fakaʻekeʻeke takai holo naʻá ne maʻu ha feituʻu ke nofo totongi ai. Naʻe ʻoange ʻe ha taha ʻo e kau palōfesa he kolisí ki mui mai haʻane ngāue ko e tā fefie ke totongi ʻaki ʻene akó. ʻI he fanongo ʻa e niʻihi kehé ki he lelei ʻene tā fefié, naʻa nau totongi ia ke ne tā ʻenau fefié. Taimi nounou pē mei ai kuó ne fakatokangaʻi ʻoku ʻikai toe ʻi ai hano taimi ke ʻalu ai ki he akó, pea nofo fiemālie ai pē ia ʻi he ola lelei ʻene tā fefié.
ʻOku fakafofongaʻi mai heni ha tuʻunga moʻui ʻoku moʻua ai ho-tau tokolahi. Naʻa tau haʻu ki he māmaní koeʻuhí ko ha taumuʻa pau—ʻa ia ko ʻetau ngāueʻi ʻa hotau fakamoʻuí, pe ko hono faka-lea ʻe tahá, ke tau teuteu ki he moʻui hoko maí, ʻa ia ʻoku taʻe-ngatá. Hangehangē kuo ngalo ʻi hotau tokolahi ʻa e taumuʻa naʻa tau hanga ki aí, pea kuo tau fiemālie pē ʻi he fekumi ko ia ʻoku tau fai ke maʻu ʻa e koloá mo e ongoongó, ʻi hono fakalea ʻe tahá, tau ʻoku fiemālie pē ʻi he “tā fefié.“5
Fakatau ange ke tau tangi ʻa kitautolu ʻoku ʻi ai ʻetau fakamoʻoni [kia Sīsuú] … ki heʻetau Tamaí mei hotau lotó ʻo pehē: “ʻEiki, ko ho finangaló ke u fai ʻa e hā?“ [Ngāue 9:6.]
Pea kapau te tau lotu moʻoni ʻi he fakamātoato mo e tui, ʻe toe foki mai kia kitautolu e tali ki he fehuʻi ko iá mei he folofolá. Kuo toutou ʻomi e tali ki aí, ʻa ia ko e meʻa kotoa pē ʻoku totonu ke tau fai, ke fai ʻaki ia ʻa e “mata ʻoku hangataha ki hono fakalāngi-langiʻi ʻo e ʻOtuá [T&F 82:19.] Ko e hā ʻa e nāunau ʻo e ʻOtuá? Naʻe fakahā ʻe he ʻEikí kia Mōsese:
“… ko ʻeku ngāué ʻeni mo hoku nāunaú—ke fakahoko ʻa e moʻui taʻemate mo e moʻui taʻengata ʻa e tangatá.” (Mataʻitofe Mahuʻingá, Mōsese 1:39.)
ʻE toe lahi ange e poto ʻi he ngaahi meʻa lahi ʻo e moʻuí kapau te tau fokotuʻu ʻa e taumuʻa ko iá ke ʻi muʻa maʻu pē ʻiate kitau-tolu, ʻo tau vakai atu ki he ngaahi ngāue kotoa pē ʻoku tau fai ʻi heʻetau moʻuí, pea fakataumuʻa ʻa e fili kotoa pē ʻoku tau faí ke ne fakatupulaki ʻa e tōʻonga moʻui te tau lava ai ke hū atu ki he ʻafio- ʻanga ʻo e ʻEikí mo ʻetau Tamai ʻi he Langí, ʻo maʻu ʻa e moʻui taʻe-ngatá.6
ʻI he ngaahi fakamatala mei he folofolá, ngaahi tohi ʻa e kau taki ʻo e Siasí ʻi hono ueʻi kinautolu ʻe he Laumālié, pea mei he ngaahi fakamatala fakamāmaní pē, ʻoku lava ke fakaʻuhingaʻi ai ʻa e moʻui taʻengatá ʻo pehē ko ha moʻui ʻi he ʻafioʻanga ʻo e Ongo Tangata taʻengatá, ʻa e ʻOtua ko e Tamaí mo Hono ʻAlo ko Sīsū Kalaisí. Ke fakanounouʻi ʻa hono fakaʻuhingaʻí, te tau pehē pē ko e moʻui taʻengatá ko e moʻui ia ʻa e ʻOtuá.…
ʻOku totonu ke hoko e feinga ke maʻu ʻa e lelei fakasilesitiale ko ʻení ko ha meʻa ke fekumi taʻe tūkua ki ai ʻa e kakai kotoa pē ʻoku moʻui ʻi he māmaní.7
ʻOku tau mateuteu nai ke tau tuʻu ʻi he ʻao ʻo e nofoʻanga fakamaau ʻo e ʻOtuá?
Kuo pau ke tuʻu ʻa e tokotaha kotoa pē ʻo kimoutolu.… ʻi he ʻao ʻo e “nofoʻanga-fakamāu ʻo e Tokotaha Māʻoniʻoni ʻo ʻIsilelí …pea kuo pau ke toki … fakamāuʻi kinautolu ʻo hoa mo e faka-maau māʻoniʻoni ʻa e ʻOtuá.“ (2 Nīfai 9:15.) Pea fakatatau mo e mamata meʻa hā mai ʻa Sioné ”Pea mo e folahi ʻo e ngaahi tohí: pea folahi mo e tohi ʻe taha, ʻa ia ko e tohi ʻo e moʻuí: pea naʻe fakamāuʻi ʻa e pekiá mei he ngaahi meʻa naʻe tohi ʻi he ngaahi tohí, ʻo fakatatau ki heʻenau ngaahi ngāué.“ (Fakahā 20:12.) ʻOku ʻuhinga ʻa e “ngaahi tohi” ʻoku lau ki aí ki he “ngaahi lekooti [ʻo hoʻomou ngaahi ngāué] ʻa ia ʻoku tauhi ʻi he māmaní.… Ko e tohi ʻo e moʻuí ko e lekooti ia ʻoku tauhi ʻi he langí. (T&F 128:7.) Ko kimoutolu ko ia naʻa mou moʻui anga-tonu pea mou mate kuo teʻeki ai ke mou hoko ko ha kau pōpula ki he angahalá, pe kuo mou ʻosi fakatomala moʻoni mei hoʻomou ngaahi angahalá, te mou hū ki he “mālōlōʻanga ʻo e ʻEikí,” pea ko e mālōlōʻanga ko iá ko “hono fakakakato ia ʻo e nāunau ʻo e ʻEikí.“ [Vakai ki he T&F 84:24.]8
ʻOku tala mai ʻe he ngaahi tohi naʻe fai ʻi he ueʻi ʻa e laumālié “ʻe fakahalaiaʻi kitautolu ʻe heʻetau ngaahi leá, (pe ko ʻenau hake-akiʻi kitautolu), ʻe fakahalaiaʻi kitautolu ʻe heʻetau ngaahi ngāué (pe ko ʻenau hiki hake ʻakitautolu).… [vakai ki he ʻAlamā 12:14], ʻi heʻetau fehangahangai mo hotau Fakamaau Tuʻukimuʻá, mo e ʻamanaki ke maʻu e fakamālō ʻa e ʻEikí: “Mālō, ko e tamaioʻeiki lelei mo anga-tonu.” [Mātiu 25:21.] ʻOku fakahā mai kia kitautolu “ko e tauhi ʻo e matapaá ko e Tokotaha Māʻoniʻoni ʻo ʻIsilelí; pea ʻoku ʻikai te ne nō ha tamaioʻeiki ʻi ai” (2 Nīfai 9:41)9 ʻa ia ʻoku kehe ia mei he fakakaukau ʻoku maʻu ʻe he ngaahi tui fakalotu kehé, ʻo nau pehē ʻe kinautolu ko e ʻAposetolo ko Pitá ʻa e tauhi matapā ki he moʻui hili ʻa e moʻui ní.
Ko e heli lahi taha ʻe lava ke mamahi ai ha tahá ko e vela ko ia ʻo hono konisēnisí. ʻOku pehē ʻe he folofolá ʻe fakahalaiaʻi ia ʻe heʻene ngaahi fakakaukaú, te ne manatuʻi lelei ʻa e meʻa kotoa naʻe hoko ʻi heʻene moʻuí (vakai ki he ʻAlamā 12:14; 11:43). Te mou manatuʻi ʻoku lau ʻi he folofolá ʻo kau ki he tohi ʻo e moʻui ʻa e Lamí, ko e lekooti ʻo e moʻui ʻa e tangatá pea ʻoku tauhi ia ʻi he langí.… ʻE fakamāuʻi ʻa e tangatá ʻo fakatatau ki he ngaahi leko-oti ko ia ʻo ʻetau moʻuí naʻe tauhí. (Vakai ki he T&F 128:6–7.) ʻI he taimi ʻoku ʻikai ke tau aʻusia ai e tuʻunga māʻolunga taha ʻo e nāu-naú mo tau ʻiloʻi e meʻa kuo mole meiate kitautolú, ʻe ʻi ai ha vela ʻo e konisēnisí pea ʻoku ou mahalo ʻe kovi ange ia ʻi ha toe faʻa-hinga vela ʻe ongoʻi ʻe ha taha ʻi he māmaní.10
ʻI heʻetau fakalaka atu ʻi he ngaahi matapā ʻo e maté … te Ne pehē mai kia kitautolu, “ʻAkimoutolu naʻa mou toʻo kiate kimou-tolu ʻa hoku hingoá. Ko e hā e meʻa naʻa ke fai ʻaki hoku hingoá? Kuo ʻi ai ha taimi naʻá ke fakamaaʻi ai e huafa ʻo e ʻEiki ko Sīsū Kalaisí lolotonga hoʻo hoko ko e mēmipa ʻo hoku siasí?” Fakakaukau loto atu angé ki Haʻane fofonga mamahi, fakakaukau atu ki ha kalokalo Hono fofongá peá Ne tafoki ʻo ʻalu.… Pea mou fakakaukau atu angé kapau te tau feʻiloaki mo Ia pea mali-mali Hono fofongá. ʻOku ala mai Hono toʻukupú kia kitautolu peá Ne folofola mai,“ʻE hoku foha, hoku ʻofefine, naʻá ke moʻui anga-tonu ʻi māmani. Kuó ke tauhi ʻa e tuí. Kuó ke lavaʻi hoʻo ngāué. Kuo teuteu ʻi hoku puleʻangá ha kalauni moʻonautolu ʻoku hangē ko koé.” [Vakai ki he 2 Tīmote 4:7–8.] ʻOku ʻikai ke u lava ʻo fakakaukau atu ki ha toe fiefia ʻi he māmaní hono kotoa ʻe laka hake ʻi he talitali ko ia ʻe fai ʻi he hū ki he ʻafioʻanga ʻo e ʻOtua Māfimafí he maama ka haʻú.11
Ko e hā e founga ʻoku tau teuteu ai ke feʻiloaki mo e ʻEikí?
Kuo ʻosi tuku mai ʻe he ʻEikí ha ngaahi ʻaho, pe uike pe ha taʻu lahi ange ʻi heʻetau moʻuí—ʻoku ʻikai mahuʻinga ia pe ko e hā hono lōloá—he ʻi he lau taimi ʻa e ʻOtua Māfimafí, ʻoku mahuʻinga lahi ʻa e ʻaho kotoa pē ʻoku fai ai ʻa e teuteú. Naʻe pehē ʻe ha palō- fita ʻe taha, “Ko e moʻuí ni ko e kuonga ia ki he tangatá ke teuteu ke feʻiloaki mo e ʻOtuá; ʻio, vakai ko e kuonga ʻo e moʻuí ni ko e kuonga ia ke fai ʻe he kakaí ʻa ʻenau ngaahi ngāué.…He vakai, kapau kuo mou fakatoloi ʻa e ʻaho ʻo hoʻomou fakatomalá ʻo aʻu ki he maté,. … [ʻe maʻu ʻe he] tēvoló.… ʻakimoutolu maʻana.” (ʻAlamā 34:32, 35.) 12
ʻOku fie maʻu ke tau manatuʻi ʻoku ʻikai hano kehekehe ʻoʻona kapau ʻoku tau mate kei siʻi pe motuʻa, he ʻoku ʻikai ko e meʻa mahuʻingá ʻa e taimi ʻoku tau mate aí, ka ko ʻetau mateuteu ko ia ʻi he taimi ʻoku tau mate aí. Ko e ʻaho ʻeni ʻo e teuteu ki he tangatá ke nau feʻiloaki mo honau ʻOtuá. Hono ʻikai lahi ʻEne anga-leleí mo ʻEne ʻaloʻofá ke ne tuku mai ha vahaʻa taimi ʻahiʻahiʻanga ke fakahaohaoaʻi ai ʻe he tangatá ia. 13
Ko e ʻaho ní ko e ʻaho ia ke kamata ai ʻetau fekumi ʻi hotau ngaahi laumālié. Kuó ke ʻiloʻi ʻa e mahuʻinga taha ʻi he ngaahi fe-kaú kiate koe he ʻaho ní? … Te ke kamata ngāue ki ai he ʻahó ni? Pe te ke tatali pē kae ʻoua kuo tōmui? ʻOku pehē ʻe he kiʻi tama-siʻi siʻí, “Ko ʻeku fuʻu lahi pē te u fai ē mo ē.” Pea ko e hā e meʻa ko iá? Ko ʻene ʻalu hake ko ia ʻo fuʻu lahí,.… te ne pehē, “Ko ʻeku mali pē te u fai ē mo ē.” Pea ka hili ʻene malí, kuo liliu e meʻa kotoa ia, peá ne pehē, “Ko ʻeku mālōlō pē mei he ngāué.“ Pea hili ʻene mālōlō mei he ngāué, kuo angi mai ha matangi momoko kiate ia pea fakafokifā ʻene toki ʻiloʻi tōmui kuo mole meiate ia e meʻa hono kotoa. Pea kuo tōmui. Lolotonga ko iá naʻá ne maʻu ʻa e taimi lahi lolotonga ʻene moʻuí. Ko e ʻikai pē ke ne fakaʻaongaʻí. Ko e taimí ni, ʻa e ʻahó ni, ko e ʻaho ʻeni ke tau kamata fai ha meʻa ki ai telia naʻa tōmui.14
[ʻOku ou manatu ai] ki ha talanoa naʻe fai mai kiate au ʻi he ʻOtu Motu Hauaiʻí ʻi he faʻahitaʻu māfana kuo ʻosí ʻo kau ki ha kiʻi taʻahine naʻá ne ʻave hono kaumeʻá ki hono ʻapí. Naʻá na vaʻinga holo pē, pea lolotonga ʻena ʻi aí naʻe fakamoleki ʻe heʻene kui fe-finé, ʻa ia kuó ne toulekeleká, ha taimi lahi ʻi hono lau e Tohi Tapú. Ko e taimi kotoa pē naʻe haʻu ai ʻa e kiʻi taʻahine ko ʻeni mei he kaungāʻapí, ʻoku fai pē lau Tohi Tapu ia ʻa e fineʻeikí, faifai peá ne pehē ange ki he mokopuna ko ʻeni ʻo e fineʻeikí, “Ko e hā ʻoku fakamoleki ai ʻe hoʻo kuí ha taimi lahi ki hono lau ʻo e Tohi Tapú?” Ko e tali ʻeni ʻa e kiʻi taʻahiné, “Ko e ako fakavavevave pē ʻa ʻeku Kuí ki he sivi fakaʻosí.”
Naʻe ʻikai fuʻu mamaʻo ʻene talí mei he tonú. Pea ʻoku ou pehē ʻe lelei kapau te tau toe tokanga ange ki hono mahuʻinga ʻo e ako fakavavevave ki he sivi fakaʻosí.15
Ko e hā hono fuoloa hoʻo fakatoloi mai e ʻaho ʻo hoʻo faka-tomala mei hoʻo ngaahi fehalākí? Ko hotau fakamāuʻí ʻe fai ia ʻi he ʻao ʻo e Fakamaau Māʻoniʻoní ʻa ia te ne fakafuofuaʻi mei he ngaahi meʻa ʻoku tau lavá mo e ngaahi meʻa ʻikai ke tau lavá, hotau ngaahi faingamālié pea mo hotau ngaahi faingataʻaʻiá. Ko e toko-taha ko ia ʻoku fai angahala peá ne fakatomala pea fai hokohoko atu mei ai hono fakafonu ʻene moʻuí ʻaki e ngāue ʻaongá, he ʻikai lahi e meʻa ʻe mole meiate ia ʻi he ʻaho ʻo e fakamaau māʻoniʻoní ʻo hangē ko ha tokotaha, neongo ʻoku ʻikai ke ne fai ha angahala mamafa, ka ʻokú ne tō ko e tupu mei he ʻikai ke ne fai ʻa e meʻa ko ia naʻá ne lava ke faí pea mo e faingamālie ke ne fai ai ia kae ʻikai ke ne faí.16
ʻI heʻetau tangutu heni he ʻahó ni ʻo fakalaulauloto atu ki heʻe-tau moʻuí, tau pehē ʻe hoko ha meʻa ʻi heʻetau mavahe atu mei he haʻofangá ni, pea ʻoku taʻofi leva ʻetau moʻuí ʻo ʻikai toe hoko atu. ʻOku ʻi ai nai ha faʻahinga meʻa ʻoku teʻeki ai ke ʻosi ka ʻoku fie maʻu ke ke fai pea toki hoko mai ʻa e taimi ko iá kia koe?.…ʻOku ʻi ai nai ha ngaahi fehālaaki ʻoku totonu ke ke fakaleleiʻi pea toki hoko mai e taimi ko iá? ʻOku ʻi ai nai ha niʻihi ʻi he tafaʻaki ʻe tahá ʻoku nau tatali mai kiate koe ʻa ia te ke laukau haʻamou feʻiloaki ʻo kapau te ke fai ha fanga kiʻi meʻa pau ʻoku teʻeki ai ke ʻosi ka ʻoku fie maʻu ke ke fai he ʻahó ni? ʻOkú ke mateuteu nai ke feʻilo-aki mo e kakai aí hili haʻo fai e meʻa kotoa ʻokú ke lavá ke nau fie-fia ʻi heʻenau ʻamanaki ki he kahaʻú? ʻOku ʻi ai haʻo ngaahi angahala ʻoku fie maʻu ke fakatomalaʻi kimuʻa peá ke toki ʻalu ki ʻapi kiate Ia naʻá Ne foaki ʻa e moʻuí kiate koé?17
ʻI heni pea ʻi he taimí ni ʻi he māmaní, ʻoku maʻu ʻe he tokotaha takitaha ʻiate kitautolu ha faingamālie ke fili ʻa e faʻahinga fono ke talangofua ki aí. Ko e taimi ní ʻoku tau lolotonga moʻui mo tala-ngofua ki ha ngaahi fono fakasilesitiale te nau ngaohi kitautolu ke tau feʻunga mo e nāunau fakasilesitialé, pe ʻoku tau moʻui ʻaki ʻa e ngaahi fono fakatelesitiale te ne ngaohi kitautolu ke feʻunga mo e… nāunau fakatelesitialé, pe fono fakatilesitialé. ʻE faka-papauʻi mai e feituʻu te tau nofo ai ʻi he ngaahi maama taʻengatá ʻe heʻetau talangofua ki he ngaahi fono ʻo e ngaahi puleʻanga kehekehe ko ʻení lolotonga e taimi ʻoku tau moʻui fakamatelie ai ʻi he māmaní.18
ʻOkú ke teuteu fēfē ke feʻiloaki mo e ʻEikí? … Naʻe folofola ʻa e ʻEikí ʻo pehē, “Ko ia, ke mou fakamāʻoniʻoniʻi ʻa kimoutolu koe- ʻuhí ke hoko ʻo hangataha ʻa homou lotó ki he ʻOtuá, pea ʻe hoko-sia e ngaahi ʻaho te mou mamata ai kiate ia; … pea ʻe hoko ia ʻi hono taimi ʻoʻona, pea ʻi heʻene founga ʻaʻana, pea fakatatau ki hono finangalo ʻoʻona..” (T&F 88:68.) Ko e founga ʻeni naʻá ne ʻomi kia kitautolu ʻi he fakahaá …, “Ko e moʻoni, ʻoku folofola ʻe he ʻEikí: ʻE hoko ʻo pehē, ko e tangata kotoa pē ʻe liʻaki ʻene ngaahi angahalá pea haʻu kiate au, ʻo ui ki hoku hingoá pea tala-ngofua ki hoku leʻó mo tauhi ʻeku ngaahi fekaú, te ne mamata ki hoku matá pea ʻiloʻi ʻoku ou ʻi ai.” [T&F 93:1.]19
Ko e hā ʻa e fakapale ki he tokotaha ʻokú ne moʻui “taau mo ha fakamoʻoni ʻoku moʻui ʻa e ʻOtuá pea ko e Kalaisí ʻa Sīsū”?
Ko langí, hangē ko ia ʻoku tau fakakaukau atu ki aí, ko e nofo- ʻanga ia ʻo e kakai māʻoniʻoní hili ʻenau mavahe mei he moʻui ʻi he māmaní, pea ko e feituʻu ia ʻoku ʻafio ai e ʻOtuá mo Kalaisí. Naʻe lea ʻa e ʻAposetolo ko Paulá ʻo kau ki he tuʻunga fakafiefia ko ʻení ʻo pehē, “ʻOku teʻeki ai mamata ʻe he mata, pe fanongo ʻe ha telinga, pea ʻoku teʻeki ai hū ki he loto ʻo ha tangatá ʻa e ngaahi meʻa ʻa ia ʻoku teuteu ʻe he ʻOtuá maʻanautolu ʻoku ʻofa ʻiate iá” (1 Kolinitō 2:9).20
Ki he kakai tokolahi, ko e lavameʻá ko ha ngaahi meʻa ia ʻoku lahi, ka ki he fānau kotoa pē ʻa e ʻOtuá ko hano maʻu ia ʻo ha tofiʻa ʻi hono ʻafioʻangá pea nofo fiemālie ai mo ia.21
ʻOku taha pē ʻa e taumuʻa ʻo e ngāue ʻa ʻetau Tamaí, ʻa ia ko ʻene aʻu ko ē ki he ngataʻangá, ki he taimi ʻe ʻosi ai ʻetau ngāue ʻi he mā- maní, ʻo tatau ai pē pe naʻe taimi lōloa pe taimi siʻi pē, te tau iku-naʻi foki ʻe kitautolu ʻa māmani pea kuo tau ʻosi maʻu ʻa e totonu ki he feituʻu ko ia ʻoku ui ko e Puleʻanga fakasilesitialé.22
Ko e tokotaha ko ia ʻokú ne moʻui … taau ke maʻu haʻane faka-moʻoni ʻoku moʻui ʻa e ʻOtuá pea ko e Kalaisí ʻa Sīsū, pea ko e tokotaha ko ia ʻokú ne loto fiemālie ke lotu kiate Ia ʻo toutou fe-huʻi ke ne ʻiloʻi pe ʻokú Ne hōifua ki hono halá, ko e tokotaha ia ʻokú ne moʻui ki he taupotu tahá pea ʻokú ne teuteu atu ki he maama fakasilesitialé, ʻa ia ko e nofo taʻengata mo ʻene Tamai Hēvaní.23
Tuku ke u fakamanatu atu ke mou fakalaulauloto ki he talaʻofa fakaofo naʻe fai ʻe he ʻEikí kia kinautolu kotoa pē ʻoku anga-tonú:
“Pea kapau ʻe hanga taha ʻa homou matá ki hoku nāunaú, ʻe fakafonu ʻa homou sinó kotoa ʻaki ʻa e maama, pea ʻe ʻikai ke ʻiate kimoutolu ha fakapoʻuli; pea ko e sino ko ia ʻa ia ʻoku fonu ʻi he māmá ʻokú ne ʻiloʻi ʻe ia ʻa e meʻa kotoa pē.” (T&F 88:67.)
Ko ia ʻoku fekumi fakamātoató, te ne maʻu maʻana ha faka-moʻoni taʻe toeueʻia te ne fokotuʻu maʻu hono vaʻé ʻi he hala ʻoku fakatau ki he taumuʻa nāunauʻia ʻo e moʻui taʻematé mo e moʻui taʻengatá, ko ʻeku lotú ia ʻi he loto-fakatōkilalo.24
Ngaahi Fokotuʻu ki he Akó mo Hono Aleaʻí
-
Ko e hā ha ngaahi founga ʻoku tau faʻa tatau ai he taimi ʻe niʻihi mo e talavou ko ia naʻe tā fefié?
-
Ko e hā ha meʻa ʻe lava ke tokoni kia kitautolu ke tukutaha ai ʻetau tokangá ʻi he ʻaho kotoa pē ki he taumuʻa ko ia ko e foki lelei atu ki heʻetau Tamai Hēvaní?
-
Ko e hā e ngaahi founga ʻokú ke fili ʻaki he taimí ni ʻa e feituʻu te ke nofo ai ʻi he ngaahi maama taʻengatá? Ko e hā e ngaahi nunuʻa ʻo hono fakatoloi ʻo hoʻo teuteu ke tuʻu ʻi he ʻao ʻo e fakamaauʻanga ʻo e ʻOtuá?
-
Ko e hā ha meʻa te tau lava ke fai ʻi he ʻaho ʻe taha ʻoku tau ma-maʻo ʻaki mei he ʻOtuá?
-
ʻOku ʻuhinga ki he hā ʻa e moʻui mo e mata ʻoku hangataha ki hono fakalāngilangiʻi ʻo e ʻOtuá? (Vakai ki he T&F 88:67–68.)
-
Ko e hā ʻene ʻuhinga kiate koe ke toʻo kiate koe ʻa e huafa ʻo e ʻEiki ko Sīsū Kalaisí? Ko e hā e meʻa te tau lava ʻo fai ke fakalā- ngilangiʻi ʻaki Hono huafá?
-
Ko e hā e meʻa kuo akoʻi kiate koe ʻe hoʻo ako e ngaahi akonaki ʻa Palesiteni Hāloti B. Lií ʻo kau ki he founga ke ke foki ʻo aʻu lelei ai ki he ʻOtuá ʻi ʻapí?
Naʻe akonaki ʻa Palesiteni Hāloti B. Lī ʻo pehē ʻoku totonu ke hangataha pē ʻetau ngaahi ngāue ʻi he māmaní ki he “moʻui ki hono fonu ʻo iá ʻi heni pea …. teuteu atu ki he maama fakasilesitialé.”