Kapitulo 21

Pagpaningkamot alang sa Kahingpit

Sa unsa nga paagi kita makapaningkamot aron pagtuman sa sugo nga “Kamo kinahanglan magmahingpit”?

Pasiuna

Si Presidente Harold B. Lee mitudlo sa kamahinungdanon sa pagsunod sa ehemplo sa Manluluwas samtang naningkamot kita alang sa pagkahingpit:

“Ako nagtuo nga ang Magtutudlo wala lamang maghunahuna sa pagtandi sa kahingpitan sa diha nga siya miingon, ‘Busa kamo kinahanglan magmahingpit ingon nga hingpit ang inyong Amahan nga langitnon.’ [Mateo 5:48.] … Motuo ba kamo nga ang Manluluwas nagsugyot og usa ka tumong nga dili mahimo nga kab-uton ug sa ingon mobiay-biay kanato sa atong mga paningkamot sa pagpuyo aron makakab-ut nianang pagkahingpit? Imposible alang kanato dinhi sa mortalidad nga moabut niana nga kahimtang sa pagkahingpit nga gisulti sa Magtutudlo, apan niini nga kinabuhi gipahiluna nato ang pundasyon diin atong gitukod didto sa kahangturan; busa, kinahanglan gayud nga sigurohon nato nga ang atong pundasyon gipahimutang sa kamatuoran, sa pagkamatarung ug sa hugot nga pagtuo. Aron makab-ut nato kana nga tumong kinahanglan gayud nga huptan nato ang kasugoan sa Dios ug magmatinuoron hangtud sa katapusan sa atong mga kinabuhi dinhi, ug dayon lapas sa lubnganan magpadayon diha sa pagkamatarung ug sa kahibalo hangtud nga mahimo kita nga sama sa atong Amahan sa Langit. …

“… [Ang Apostol nga si Pablo] mitudlo sa paagi diin ang kahingpitan moabut. Nagsulti kabahin ni Jesus, siya miingon, ‘Ug bisan tuod siya Anak, siya nakakat-on sa pagkamasinugtanon pinaagi sa mga butang nga iyang giantus; ug sa nahimo siyang hingpit siya nahimong tuburan sa dayong kaluwasan alang sa tanang magasugot kaniya.’ (Mga Hebreohanon 5:8–9.) …

“… Busa ayaw palabya ang adlaw nga walay makat-unan gikan sa mahinungdanon nga basahon sa leksyon kabahin sa kang [Kristo] nga paagi sa kinabuhi ngadto sa usa ka hingpit nga kinabuhi ug maglakaw diha niana paingon sa atong mahangturon nga tumong.”¹

Mga Pagtulun-an ni Harold B. Lee

Sa unsa nga paagi nga ang pagkasabut sa unsay atong kulang makatabang kanato nga mahimong hingpit?

[Adunay mga] tulo ka mga kinahanglanon nga gikinahanglan aron sa pagdasig sa usa ka tawo nga magpuyo og usa ka Kristohanon nga kinabuhi––o, sa pagsulti og labaw pa ka tukma sa pinulongan sa mga kasulatan, ang magpuyo og mas labaw pa ka hingpit sama sa pagpuyo sa Magtutudlo. Ang unang kinahanglanon nga akong hinganlan aron makasarang mao: Kinahanglan gayud nga adunay pagkahigmata sa indibidwal kinsa pagatudloan o kinsa magpuyo sa hingpit nga paagi og pagkaamgo sa iyang mga panginahanglan.

Ang adunahan nga batan-ong tigmando wala magkinahanglan nga tudloan sa paghinulsol tungod sa pagbuno ni tungod sa mabunuon nga mga hunahuna. Dili kinahanglan siya nga magtuon unsaon sa paghinulsol tungod sa pagpanapaw, ni tungod sa papangawat, pamakak, pangilad, o sa pagkapakyas sa pagtahud sa iyang inahan. Tanan niini siya miingon nga iyang gisunod gikan sa iyang pagkabatan-on; apan ang mga pangutana mao, “Unsa pa may akong kulang?” [Tan-awa sa Mateo 19:16–22.]

Ang Magtutudlo, uban sa Iyang mahait nga panabut ug sa gahum sa usa ka Halangdong Magtutudlo, misusi sa kahimtang sa batan-ong tawo sa hingpit: Ang iyang panginahanglan ug ang iyang kakulangan mao ang pagbuntog sa iyang gugma alang sa kalibutanon nga mga butang, ang iyang kahilig sa pagsalig sa mga bahandi. Ug dayon si Jesus mitudlo sa epektibo nga sulbad: “Kon buot ikaw nga mamahingpit, lumakaw ka, ibaligya ang imong kabtangan ug ang halin ihatag sa mga kabus, ug makabaton kag bahandi didto sa langit: ug unya umari ka ug sumunod kanako.” (Mateo 19:21.)

Diha sa madulaon nga pagkakabig ni Apostol Pablo, sa diha nga pisikal siya nga nabuta pinaagi sa kahayag samtang nagpaingon ngadto sa Damasco…, nakadungog siya og tingog nga nagsulti ngadto kaniya: “Saulo, Saulo, nganong ginalutos mo ako?” [Mga Buhat 9:4.] Ug gikan sa kinahiladman niining napaubos nga kalag ni Saulo dihay miabut nga pangutana nga kanunay nga gipangutana sa usa ka tawo kinsa nakaamgo nga nagkinahanglan siya sa usa ka butang: “Ginoo, unsay gusto nimo nga akong buhaton?” [Mga Buhat 9:6.] …

Si Enos, ang apo ng lalaki ni Lehi, nagsulti kabahin sa iyang pakigbisog diha sa atubangan sa Dios sa wala pa niya madawat ang kapasayloan sa iyang mga sala. Wala kita sultihi kon unsa ang iyang mga sala, apan sa dayag iyang gikumpisal kini sa dakong kasayon. Ug dayon siya miingon, “Ug ang akong kalag gigutom….” [Enos 1:4.] Nakita ninyo, kana nga pagkaamgo ug pagbati sa dakong panginahanglan, ug kana nga pagsiksik sa kalag, midala kaniya uban sa iyang kakulang ug sa iyang panginahanglan.

Kini nga kinaiya sa pag-ila sa panginahanglan sa usa ka tawo gipahayag diha sa mahinungdanon nga Wali sa Bukid sa diha nga miingon ang Magtutudlo, “Bulahan ang mga kabus sa espiritu: kay ila ang gingharian sa langit.” (Mateo 5:3.) Ang kabus sa espiritu, sa dayag, nagpasabut niadtong kinsa nanginahanglan sa espirituhanon nga paagi, kinsa mibati sa hilabihan ka kabus sa espirituhanon nga paagi nga sila naningkamot uban sa dakong pangandoy alang sa panabang. …

Ang matag usa kanato, kon moabut kita sa kahingpitan, kinahanglan gayud nga sa usa ka higayon mangutana sa atong mga kaugalingon niini nga pangutana, “Unsa pa may akong kulang?” kon kita magsugod sa atong pagsaka paingon sa dakong dalan sa kahingpitan. …

Sa unsa nga paagi ang pagkatawo pag-usab makatabang kanato nga mahimong hingpit?

Ang ikaduha nga kinahanglanon alang sa kahingpitan nga akong hinganlan makita diha sa panagsultihanay sa Magtutudlo uban ni Nicodemus. Siya nakamatngon sa pagduol ni Nicodemus nganha Kaniya nga siya nagtinguha sa pagkuha sa tubag sa unsay gipangutana sa kadaghanan nganha Kaniya: “Unsa ang akong kinahanglan nga buhaton aron maluwas?” Ug ang Magtutudlo mitubag, “Sa pagkatinuod, sa pagkatinuod, magaingon ako kanimo gawas kon ang tawo igaanak pag-usab, dili siya makasulod sa gingharian sa Dios.” Dayon si Nicodemus miingon, “Unsaon niana pagkahimo nga igaanak ang tawo sa tigulang na siya?” … Si Jesus mitubag, “Sa pagkatinuod, sa pagkatinuod, magaingon ako kanimo gawas kon ang tawo igaanak sa tubig ug espiritu, dili siya makasulod sa gingharian sa Dios.” (Juan 3:3–5.)

Ang tawo kinahanglan gayud nga “matawo pag-usab” kon modangat siya sa kahingpitan, aron makakita o makasulod sa gingharian sa Dios. Ug sa unsa nga paagi ang usa ka tawo matawo pag-usab? Mao kana ang sama nga pangutana nga si Enos nangutana. Ug kamo nahinumdom sa yanong tubag nga mibalik: “Tungod sa imong hugot nga pagtuo kang Kristo, si kinsa ikaw wala gayud sukad makadungog ni makakita. Ug daghan nga mga katuigan ang molabay una siya mopakita sa iyang kaugalingon diha sa lawas, busa, makalakaw ka na, ang imong hugot nga pagtuo nakahimo kanimo nga hinlo.” [Enos 1:8.]

Si Brother Marion G. Romney ug ako naglingkod sa opisina usa ka adlaw niana sa diha nga usa ka batan-on nga tawo misulod. Nangandam siya aron magmisyon, ug human na siya mainterbyu sa kasagaran nga paagi ug nakakumpisal sa pipila ka mga kalapasan sa iyang pagkabatan-on. Apan siya miingon ngari kanamo, “wala ako matagbaw pinaagi lamang sa pagkumpisal. Unsaon nako sa pagkahibalo nga ako napasaylo?” Sa lain nga pagkasulti, “Unsaon nako sa pagkasayud nga natawo ako pag-usab?” Gibati niya nga dili siya makaadto sa misyon sa iya karon nga pagkabutang.

Samtang nagsultihanay kami, si Brother Romney miingon: “Anak, nahimundom ka ba unsa ang gisulti ni Hari Benjamin? Nagsangyaw siya ngadto sa pipila kinsa gisakitan sa ilang mga kasingkasing tungod sa ilang kaugalingong kalibutanon nga kahimtang, gani ubos pa kay sa abug sa yuta. Ug silang tanan misinggit og kusog uban sa usa ka tingog, nga nag-ingon: O kaloyi, ug dihugi sa maulaon nga dugo ni Kristo nga kami makadawat sa kapasayloan sa among mga sala, ug ang among mga kasingkasing mahimo nga putli; kay kami mituo kang Jeuskristo, ang Anak sa Dios, kinsa milalang sa langit ug sa yuta, ug sa tanan nga mga butang; kinsa manaog nganhi taliwala sa mga katawhan. Ug nahinabo nga human sila makapamulong niini nga mga pulong ang Espiritu sa Ginoo midangat kanila, ug sila napuno sa hingpit nga kalipay, ingon nga nakadawat sa usa ka kapasayloan sa ilang mga sala, nga nagbaton sa kalinaw sa ilang konsyensya, tungod sa naghingapin nga hugot nga pagtuo diin sila aduna diha kang Jesukristo. … ’”(Mosiah 4:2–3.)

Si Brother Romney miingon ngadto kaniya, “Akong anak, maghulat ug mag-ampo ka hangtud nga makabaton ka og kalinaw sa konsyensya tungod sa imong hugot nga pagtuo sa pag-ula ni Kristo, ug ikaw masayud nga ang imong mga sala napasaylo.” Gawas niana, ingon sa gipasabut ni Elder Romney, bisan kinsa kanato kabus, ug kita naglaaglaag diha sa gabon hangtud nga maangkon nato kana nga pagkatawo pag-usab. …

Dili kamo makaangkon sa Kristohanon nga kinabuhi … nga dili matawo pag-usab. Ang usa ka tawo dili gayud malipay diha sa atubangan sa Usa nga Balaan sa Israel kon wala kini nga paghinlo ug pagputli. …

Sa unsa nga paagi nga ang pagsunod sa kasugoan labaw ka bug-os nga makatabang kanato nga mahimong hingpit?

Ug dayon sa katapusan ang ikatulo nga kinahanglanon: aron pagtabang sa nagkat-on nga makahibalo sa ebanghelyo pinaagi sa pagsunod sa ebanghelyo. Ang espirituhanong kasiguroan nga gikinahanglan sa kaluwasan kinahanglan gayud nga pagaunhan uban sa labing dakong paningkamot sa indibidwal. Ang grasya, o ang walay bayad nga gasa sa maulaon nga gahum sa Ginoo, kinahanglan gayud nga pagaunhan sa personal nga paningkamot. Pagbalik pag-usab unsa ang gisulti ni Nephi, “Pinaagi sa grasya … kami maluwas, human sa tanan namong mabuhat.” [2 Nephi 25:23.] …

… Karon, [kini] mao ang usa sa mga kinahanglanon kon kamo magpuyo sa hingpit nga kinabuhi. Ang usa ka tawo kinahanglan gayud nga “mohukom diha sa iyang hunahuna” sa pagsunod sa mga kasugoan.

Ang Magtutudlo mitubag sa usa ka pangutana sa mga Judeo kon sa unsa nga paagi sila makapiho kon ang Iyang misyon sa Dios ba o kon Siya usa lamang ka laing tawo. Siya miingon: “Kon tuyuon ni bisan kinsa ang pagbuhat sa kabubut-on sa Dios, nan iyang mahibaloan kon ang akong gitudlo gikan ba sa Dios, o nagsulti ba lamang ako sa kinaugalingon kong pagbulot-an.” (Juan 7:17.)

Ang papamatuod sa kamatuoran dili gayud moabut ngadto kaniya kinsa adunay dili limpyo nga tabernakulo. Ang Espiritu sa Ginoo ug ang pagkadili limpyo dili makapuyo sa samang panahon sa usa ka indibidwal. “Ako, ang Ginoo, mapugos sa pagtuman kon kamo mobuhat sa unsa nga ako misulti, apan kon kamo dili mobuhat sa unsa nga ako misulti, kamo dili makaangkon og saad.” (D&P 82:10.) “… Gawas kon kamo mosunod sa akong balaod kamo dili makakab-ut niini nga himaya.” (D&P 132:21.) Gibalik-balik kana nga kamatuoran diha sa mga kasulatan.

Ang tanan nga mga baruganan ug mga ordinansa sa ebanghelyo kon sabton mga pagdapit sa pagkat-on sa ebanghelyo pinaagi sa paggamit sa mga pagtulun-an niini. Walay tawo nga masayud sa baruganan sa ikapulo hangtud nga siya mobayad sa ikapulo. Walay usa nga masayud sa baruganan sa Pulong sa Kaalam hangtud nga siya maghupot sa balaod sa Pulong sa Kaalam. Mga bata, o mga hingkod alang nianang butanga, wala makabig sa ikapulo, sa Pulong sa Kaalam, sa paghupot sa Igpapahulay nga adlaw nga balaan, o sa pag-ampo pinaagi sa pagpaminaw sa usa ka tawo nga nagsulti kabahin niini nga mga baruganan. Kita nakakat-on sa ebanghelyo pinaagi sa pagsunod niini. …

Mahimo ba nga akong isulti agi og katingbanan: Sa tinuod dili gayud kita makahibalo bisan unsa kabahin sa mga pagtulun-an sa ebanghelyo hangtud kita makasinati sa mga panalangin nga moabut tungod sa pagsunod sa matag baruganan. “Ang moral nga mga pagtulun-an mismo,” usa ka tawo nagsulti, “adunay taphaw lamang nga epekto diha sa espiritu gawas kon kini giabagan pinaagi sa mga buhat.” Ang labing mahinungdanon sa tanang mga kasugoan diha sa ebanghelyo nganha kaninyo ug ngari kanako mao kana nga linain nga sugo nga niini nga higayon nagkinahanglan sa matag usa kanato sa labing dako nga pagpamalandong sa kaugalingon aron sa pagtuman. Ang matag usa kanato kinahanglan gayud nga motuki sa iyang mga panginahanglan ug mosugod karon sa pagbuntog, kay pinaagi lamang sa atong pagbuntog nga mahatagan kita og usa ka dapit diha sa gingharian sa atong Amahan.²

Sa unsa nga paagi nga ang mga Kabulahanan mao ang “katukuran sa hingpit nga kinabuhi”?

Buot kamo nga masayud sa “mga lakang” diin ang usa ka tawo makahimo sa iyang kinabuhi nga isunod ngadto niana nga kahingpitan nga makahimo kaniya nga usa ka takus nga lungsuranon o “santos” sa gingharian sa Dios. Ang labing maayo nga tubag mahimo nga makita pinaagi sa pagtuon sa kinabuhi ni Jesus diha sa mga kasulatan. … Si Kristo wala lamang moanhi sa kalibutan aron sa pag-ula alang sa mga sala sa katawhan apan sa paghatag og ehemplo sa atubangan sa kalibutan sa sumbanan sa kahingpitan sa balaod sa Dios ug sa pagkamasulundon ngadto sa Amahan. Sa iyang Wali sa Bukid ang Magtutudlo naghatag kanato ingon og usa ka pagpadayag sa iyang kaugalingong kinaiya, nga hingpit, … ug sa pagbuhat sa ingon naghatag kanato sa usa ka sundanan alang sa atong kaugalingon nga mga kinabuhi. …

Nianang dili ikatandi nga Wali sa Bukid, si Jesus mihatag kanato og walo ka tataw nga mga paagi diin mahimo nga atong madawat … hingpit nga kalipay. Ang matag usa sa iyang pamahayag gisugdan sa pulong nga “Bulahan.”… Kini nga mga pamahayag sa Magtutudlo nailhan diha sa literatura sa Kristyanos nga kalibutan isip ang Mga Kabulahanan. … Kini sa pagkatinuod naglangkob sa katukuran sa hingpit nga kinabuhi.

Hunahunaon nato kini sulod sa pipila ka mga gutlo. Upat niini adunay kalabutan sa atong indibidwal nga mga kaugalingon, ang pagpuyo sa atong kaugalingong sulod, personal nga mga kinabuhi, kon kita mahingpit ug makakaplag sa kabulahanan nianang hingpit nga kalipay sulod sa kaugalingon.

Bulahan ang mga kabus sa espiritu.

Bulahan ang mga nagamasulub-on.

Bulahan ang mga gigutom ug giuhaw sa pagkamatarung.

Bulahan ang mga maputli og kasingkasing. [Tan-awa sa Mateo 5:3–4, 6, 8.]

Ang pagkahimong kabus sa espiritu

Ang pagkahimong kabus sa espiritu mao ang pagbati sa inyong mga kaugalingon isip ang nanginahanglan sa espirituhanon nga paagi, kanunay nga nagsalig sa Ginoo alang sa inyong mga sinina, sa inyong mga pagkaon ug sa hangin nga inyong gihanggap, sa inyong kahimsog, sa inyong kinabuhi; nakaamgo nga kinahanglan walay adlaw nga molabay nga walay mainiton nga pag-ampo sa pagpasalamat, alang sa paggiya ug pagpasaylo ug kalig-on igo alang sa matag adlaw nga panginhanglan. Kon ang usa ka batanon makaila sa iyang espirituhanon nga panginahanglan, kon anaa sa peligro nga mga dapit diin ang iya gayud nga kinabuhi anaa sa kuyaw, mahimo siya nga madala paduol sa tuburan sa kamatuoran ug madasig sa Espiritu sa Ginoo diha sa takna sa iyang labing dako nga pagsulay. Tinuod usa kini ka masulub-on nga butang alang sa usa ka tawo, tungod sa bahandi o kinaadman o sa kalibutanon nga katungdanan, sa paghunahuna sa iyang kaugalingon nga wala magsalig niining espirituhanon nga panginahanglan. [Ang pagkakabus sa espiritu] mao ang kaatbang sa garbo o pagkamapahitas-on sa kaugalingon. … Kon diha sa inyong pagpaubos makamatikod kamo sa inyong espirituhanon nga panginahanglan, kamo giandam alang sa pagsagop ngadto sa “Simbahan sa Unang Natawo, ug mahimong pinili sa Dios.” [Tanawa sa D&P 76:54, 84:34.]

Sa pagbangutan

Ang pagbangutan, ingon nga ang leksyon sa Magtutudlo dinhi motudlo, ang usa ka tawo kinahanglan gayud nga mopakita niana nga “diosnon nga kasubo nga mosangput sa paghinulsol” ug maghatag sa nagpinitensya og kapasayloan sa mga sala ug magdili sa pagbalik ngadto sa mga binuhatan diin siya nagbangutan. [Tan-awa sa 2 Mga Taga-Corinto 7:10.] Kini aron makakita, sama sa gibuhat ni Apostol Pablo, sa “nagakalipay bisan sa mga kasakit … : sanglit nasayud nga ang kasakit mohimog pagkamainantuson; ug pagkamainantuson, kasinatian; ug kasinatian, paglaum.” (Mga Taga-Roma 5:3–4.) Kinahanglan gayud nga andam kamo sa “pagtambayayong sa usag usa nga alantuson, nga sila mahimo nga magaan.” Kinahanglan gayud nga andam kamo sa pagbangutan uban niadto nga nagbangutan ug sa paghupay niadto nga nagkinahanglan sa paghupay. (Mosiah 18:8–9.) Kon ang usa ka inahan nagbangutan diha sa iyang kamingaw alang sa pagpauli sa nahisalaag nga anak nga babaye, kamo uban sa kapuangod kinahanglan gayud nga dili ang una nga manaway. … Ang inyong pagbangutan uban sa mga tigulang, sa biyuda ug sa nailo kinahanglan mogiya kaninyo sa pagdala sa hinabang nga ilang gikinahanglan. Sa usa ka pulong, kinahanglan gayud nga kamo sama sa maniningil sa buhis ug dili sama sa Pariseo. “O Dios kaloy-i ako nga makasasala.” [Tan-awa sa Lukas 18:10–13.] Ang inyong ganti sa pagbuhat [niini] mao ang kabulahanan sa paghupay sa inyong kaugalingong kalag pinaagi sa pagpasaylo sa inyong kaugalingong mga sala.

Sa pagkagutom ug pagkauhaw

Gigutom ba kamo sukad og pagkaon o giuhaw og tubig sa diha nga usa ka kabhang sa bahaw nga pan o usa ka suyop sa tubig lamang matag adlaw aron sa paghupay sa mga kahapdos nga naghasol kaninyo nahimong ingon og mao ang labing bililhong ganti sa tanan nga mga kabtangan? Kon kamo miagi og hilabihang kagutom niana magsugod kamo sa pagsabut giunsa sa Magtutudlo pagpasabut nga kita kinahanglan nga gutumon ug uhawon sa pagkamatarung. Kana nga kagutom ug kauhaw ang naggiya niadtong nahilayo gikan sa panimalay sa pagpangita og pakigsuod uban sa mga santos diha sa mga serbisyo sa sakrament ug kana nagdani sa pagsimba sa adlaw sa Ginoo bisan asa kita. Mao kana ang nag-aghat sa mainiton nga pag-ampo ug nagdala sa atong mga tiil ngadto sa balaan nga mga templo ug nag-agda kanato sa balaanon nga pagtahud dinha niana. Ang usa ka tawo kinsa nagsunod sa Igpapahulay nga Adlaw nga balaan mapuno uban sa usa ka mahangturong hingpit nga kalipay nga labaw pa sa gitinguha kay sa lumalabay nga mga kalipay nga nagagikan sa mga kalihokang gipakatagbawan nga supak sa sugo sa Dios. Kon kamo mangutana sa “kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa … kamatuoran … nganha kaninyo, pinaagi sa gahum sa Espiritu Santo,” ug pinaagi sa gahum kamo “mahimo nga masayud sa kamatuoran sa tanan nga mga butang.” (Moroni 10:4–5.) …

Ang pagkaputli sa kasingkasing

Kon kamo makakita sa Dios, kinahanglan gayud nga kamo putli. … Pipila sa mga kauban ni Jesus nagtan-aw lamang kaniya isip usa ka anak ni Jose nga panday. Ang uban naghunahuna kaniya isip usa ka palainom o palahubog tungod sa iyang mga pulong. Ang uban pa gayud naghunahuna nga siya gisudlan og mga yawa. Ang mga matarung lamang ang nagtan-aw kaniya isip usa ka anak sa Dios. Diha lamang kon kamo ang putli og mga kasingkasing nga makakita kamo sa Dios, ug usab sa usa ka mas ubos nga kahimtang mahimo ninyong makit-an ang “Dios” o sa kaayo sa tawo ug nahigugma kaniya tungod sa kaayo nga inyong nakita diha kaniya. Timan-i og maayo kana nga tawo kinsa manaway ug modaut sa tawo sa Dios o sa dinihugan sa Ginoo nga mga lider sa iyang Simbahan. Kana nga tawo nagsulti gikan sa usa ka dili putli nga kasingkasing.

Apan aron makasulod ngadto sa Gingharian sa Langit kita kinahanglan gayud nga dili lamang maayo apan kita gikinahanglan nga mobuhat og maayo ug magminaayo alang sa usa ka butang. Busa kon kamo maglakaw kada adlaw ngadto niana nga tumong sa kahingpitan ug kabuhong sa kinabuhi, kamo kinahanglan gayud nga pagatudloan sa nahibilin nga upat ka “mga artikulo” diha sa Katukuran sa Magtudtudlo alang sa hingpit nga kinabuhi. Kini nga mga kabulahanan may kalabutan sa sosyal nga pakigdait sa tawo ngadto sa uban:

Bulahan ang mga maaghop.

Bulahan ang mga maloloy-on.

Bulahan ang magbubuhat og kadaitan.

Bulahan ang mga ginalutos. [Tan-awa sa Mateo 5:5, 7, 9–10.]

Ang pagkamaaghop

Ang usa ka maaghop nga tawo gipasabut isip usa ka tawo nga dili dali nga masuko o maglagot ug mapailubon ubos sa pagdaut o paghasol. Ang pagkamaaghop dili sama og kahulugan sa kahuyang. Ang maaghop nga tawo mao ang kusgan, ang gamhanan, ang tawo nga hingpit nga makapugong sa kaugalingon. Siya ang usa ka tawo kinsa adunay kaisug sa iyang moral nga mga baruganan, bisan pa sa pamugos sa kaubanan o sa kapunongan. Sa lantugi ang iyang paghukom mao ang katapusan nga desisyon ug ang iyang ligdong nga tambag mopuypoy sa pagkamapangahason sa mga manggugubot. Siya mapainubsanon sa hunahuna; dili siya hambug. “Kadtong mahinay sa kasuko labi pang maayo kay sa tawong gamhanan.” (Mga Proverbio 16:32.) Usa siya ka tiunay nga lider ug mao ang pinili sa army ug sa navy, sa negosyo ug sa simbahan sa pagpangulo diin ang uban nga mga tawo mosunod. Siya mao ang “asin” alang sa yuta ug makapanunod niini.

Ang pagkamaloloy-on

Ang atong kaluwasan nag-agad sa kalooy nga atong ipakita sa uban. Ang dili maloloy-on ug sakit nga mga pulong, o walay pagpugong nga mga buhat sa pagkawalay kalooy ngadto sa tawo o hayop, bisan og maingon nga pagbalos, makapawala sa tigbuhat sa iyang mga pag-angkon alang sa kalooy sa panahon nga siya nagkinahanglan na og kalooy sa adlaw sa paghukom diha atubangan sa yutan-on ug langitnong mga hukmanan. Wala ba dihay usa nga wala gayud masamari sa pagpakaulaw sa lain kinsa iyang gihunahuna nga iyang higala? Nahinumdom ba kamo sa pakigbisog nga inyong gihimo aron pagpugong sa panimalos? Bulahan kamong tanan kinsa maloloy-on tungod kay kamo makadawat og kalooy!

Ang pagkamagbubuhat og kadaitan

Ang mga magbubuhat og kadaitan pagatawgon og mga anak sa Dios. Ang mga tigpasiugda og kasamok, ang mga nagwelga batok sa balaod ug kahusay, ang lider sa mga manggugubot, ang tiglapas sa balaod mga giaghat pinaagi sa mga katuyoan sa dautan ug gawas kon sila mohunong pagailhon isip mga anak ni Satanas kay sa Dios. Pugngi ang inyong mga kaugalingon gikan kaniya kinsa magdala og makasamok nga mga pagduda pinaagi sa paghimo og taphaw nga sagrado nga mga butang tungod kay wala siya magtinguha sa kalinaw apan sa pagsabwag sa kalibug. Kanang usa ka tawo kinsa palaaway o maki-bingkilon, ug kansang mga argumento alang sa ubang mga katuyoan kay sa pagsulbad sa kamatuoran, naglapas sa sukaranan nga baruganan nga gihan-ay sa Magtutudlo isip usa ka kinahanglanon diha sa pagtukod sa usa ka puno sa ka buhong nga kinabuhi. “Sa yuta panagdait sa mga tawo” mao ang kanta sa anghel nga nagpahibalo sa pagkatawo sa Prinsipe sa Kalinaw. [Tan-awa sa Lukas 2:14.] …

Ang paglahutay sa pagpanggukod alang sa katuyoan sa pagkamatarung

Ang pagagukuron tungod sa pagkamatarung diha sa usa ka dakong kawsa diin namiligro ang kamatuoran ug hiyas ug dungog usa ka diniyos. Sa kanunay adunay mga martir sa matag dako nga kawsa. Ang dakong kadaut nga mahimong moabut tungod sa pagpanggukod dili gikan sa pangpanggukod mismo apan gikan sa posible nga epekto diha sa gigukod kinsa pinaagi niana mahimo nga mapugngan ang ilang dakong tinguha sa katarung sa ilang katuyoan. Ang kadaghanan niana nga pagpanggukod nagagikan sa kakulang sa pagsabut, kay ang mga tawo hilig sa pagsupak nianang wala nila masabti. Ang pipila niini gikan sa mga tawo nga nagtinguha sa dautan. Apan gikan sa bisan unsa nga hinungdan, ang pagpanggukod ingon og tibuok gayud kalibutan batok niadtong nagbuhat sa matarung nga katuyoan nga ang Magtutudlo nagpahimangno kanato, “Alaut kamo kon ang tanang mga tawo nagasultig maayo mahitungod kaninyo! kay ang mga mini nga propeta gibuhatan man sa ingon nga paagi sa mga ginikanan.” (Lucas 6:26.)

… Hinumdumi kana nga pahimangno kon kamo gisutsutan sa walay pag-uyon ug gibiay-biay tungod kay kamo midumili sa pagpaubos sa inyong mga sumbanan, sa dili paggamit og alkohol, tabako, tsa, o kape, sa pagkamatinuuron, ug sa moralidad aron makuha ang pagdayeg sa mga tawo. Kon kamo hugot nga mobarug alang sa katarung bisan sa pagbugal-bugal sa mga tawo o gani sa pisikal nga pagdagmal, pagapurong-purongan kamo uban sa kabulahanan sa mahangturong hingpit nga kalipay. Kinsay nasayud nga usab sa atong panahon pipila sa mga santos o gani mga apostoles, sama sa nanglabay nga mga adlaw, gikinahanglan nga mohalad sa ilang mga kinabuhi agig panalipod sa kamatuoran? Kon kana nga panahon moabut, ang Dios motugot nga dili sila mapakyas!

Sa inanay samtang mainampoon kita nga mamalandong niining tanan nga mga pagtulun-an, atong himoon ang butang nga alang sa pipila makapakurat nga pagkaplag nga human sa tanan, ang sukod sa Dios sa atong katakus diha sa iyang gingharian dili ang taas nga mga katungdanan nga atong gihuptan dinhi taliwala sa mga tawo ni sa iyang Simbahan, ni ang mga pasidungog nga atong nadaog, apan hinoon ang mga kinabuhi nga atong gigiyahan ug ang kaayo nga atong nabuhat, sumala nianang “Katukuran alang sa Hingpit nga Kinabuhi” nga gipadayag diha sa kinabuhi sa Anak sa Dios.

Unta himoon ninyo ang Kabulahanan nga Katukuran alang sa inyong kaugalingong mga kinabuhi ug sa ingon modawat sa kabulahanan nga gisaad niini.³

Mga Sugyot alang sa Pagtuon ug Panaghisgutan

Sa unsa nga paagi kita makakat-on sa matag adlaw gikan sa “mahinungdanon nga basahon sa leksyon” sa kinabuhi ni Kristo?
Samtang naningkamot kita nga mahimong Kristohanon, ngano nga importante alang kanato nga kanunay mangutana sa atong kaugalingon unsa ang nagkulang kanato?
Unsa nga mga kasinatian ang nakatabang kaninyo sa pagsabut nga makakat-on kita sa mga pagtulun-an sa ebanghelyo pinaagi sa pagsunod niini?
Kon kita makaamgo nga nagsalig kita diha sa Ginoo alang sa tanan nga mga panalangin sa atong mga kinabuhi, sa unsa nga paagi naapektohan ang atong mga kinaiya ug mga pamatasan?
Unsa ang pipila sa mga kahulugan sa pamahayag, “Bulahan ang mga nagmasulub-on”?
Sa unsa nga paagi nga ang gugma sa kalibutanon nga mga butang nagluya sa atong kagutom ug kauhaw alang sa espirituhanon nga mga butang?
Sa unsa nga paagi nga ang pagkaputli sa kasingkasing makatabang kanato nga makakita sa kaayo sa uban?
Sa unsa nga paagi ang kaaghup nagtabang kanato nga malig-on?
Sa unsa nga mga paagi kita makapakita og kalooy ngadto sa uban diha sa atong matag adlaw nga mga pagpakabuhi?

Diha sa Wali sa Bukid, ang Manluluwas mihatag kanato sa “katukuran alang sa hingpit nga kinabuhi.”