Kapitulo 17

Pagsunod sa Balaod sa Kaputli

“Ang lagda sa langit sa moral para sa mga lalaki ug babaye mao ang hingpit nga kaputli sa dili pa makasal ug hingpit nga pagkamaunungon human sa kasal.”

Gikan sa Kinabuhi ni Ezra Taft Benson

Daghan na og nabiyahe isip lider sa relihiyon ug politika, si Presidente Ezra Taft Benson nakamatikod gayud sa pagkunhod sa moral sa tibuok kalibutan, ilabi na sa balaod sa kaputli. Kusganon siyang nakigbatok niini nga pagkunhod, nagtudlo nga ang “balaod sa kaputli usa ka baruganan nga adunay mahangturong importansya.”¹ Siya mipahayag nga “diha sa Simbahan ug sa gingharian sa Dios, ang kaputli ipatuman gayud sa tanang panahon, bisan unsa pa ang buhaton o isulti sa kalibutan.”² Dugang niyang gipasabut: “Kita maanaa sa imoral nga kalibutan, … apan dili iya niini. Unta makatulog kita nga wala nay kabalaka sa imoral nga mga butang.”³

Aron sa paghulagway sa kaimportante nga magpabiling limpyo sa imoral nga mga impluwensya sa kalibutan, si Presidente Benson mipakigbahin sa mosunod nga istorya:

“Nakahinumdom ko sa istorya sa usa ka batan-ong babaye, uban sa iyang ka-date, miadto sa lugar nga dili gyud angay, supak sa tambag sa iyang ginikanan. Kini ang iyang pangutana, ‘Unsay may ngil-ad kon mosulod aron motan-aw unsay panghitabo didto?’ Miuyon na lang ang iyang ginikanan ug misugyot nga sul-ubon niya ang iyang nindot nga puti nga sinina para sa okasyon. Sa wala pa moabut ang batan-ong lalaki, ang amahan sa babaye miingon, ‘Mahimo bang aduna koy pabor nga ipabuhat nimo sa dili pa ka molakaw ug mahimo ba nga moadto ka sa smokehouse [sama sa lutuanan og tinapa] ug dad-i ko og gamayng bacon?’

“Natingala ang babaye sa iyang hangyo ug miingon, “Sul-ob ang akong pinakanindot nga sinina? Motaput gyud ang baho sa aso ngari nako.’ Ang iyang inahan miingon, ‘Sakto kana, dili ka makasulod sa smokehouse nga dili maapektuhan. Naghunahuna mi nga kasabut ka na nganong dili angay nga moadto ka sa dapit diin sa imong paggawas maibanan ang imong kaanyag ug kaputli.’ Tungod niadtong maalamong tambag, kining batan-ong babaye mihimo sa hustong desisyon nga dili mahugawan ug magpabiling limpyo gikan sa dautang mga impluwensya sa kalibutan.”⁴

An Hispanic couple with temple bags walking outside the Los Angeles California Temple. — Ang pagkamasulundon sa balaod sa kaputli makahimo og “dakong pagbati sa hingpit nga kalipay.”

Mga Pagtulun-an ni Ezra Taft Benson

Ang Dios miestablisar sa sumbanan sa kaputli para sa Iyang mga anak.

Karong dispensasyon gisubli sa Ginoo ang sugo nga gihatag didto sa Sinai sa dihang Siya miingon, “Dili kamo … manapaw, … ni magbuhat sa bisan unsa nga butang nga sama niini” (D&P 59:6, empasis gidugang). Sukad sa sinugdanan sa panahon, ang Ginoo mihan-ay og klaro ug hingpit nga sumbanan sa sekswal nga kaputli. Kaniadto pa, karon, ug sa kanunay kini walay pagkausab. Ang sumbanan mao ang balaod sa kaputli. Kini para sa tanan—para sa mga lalaki ug mga babaye, para sa tigulang ug batan-on, para sa mga datu ug kabus.⁵

Ang Simbahan walay doble nga sumbanan sa moralidad. Ang lagda sa moral gikan sa langit para sa mga lalaki ug babaye mao ang hingpit nga kaputli sa dili pa makasal ug hingpit nga pagkamaunungon human sa kasal.⁶

Sa Basahon ni Mormon, si propetang Jacob nagsulti kanato nga ang Ginoo nahimuot sa kaputli sa Iyang mga anak (tan-awa sa Jacob 2:28). Inyo ba kining nadungog, mga kaigsoonan? Ang Ginoo dili lang kay malipay ra kon kita putli; Siya mahimuot sa kaputli. Si Mormon mitudlo sa samang butang ngadto sa iyang anak nga si Moroni sa dihang siya misulti nga ang kaputli ug hiyas mao ang “labing mahal ug bililhon labaw sa tanan nga mga butang” (Moroni 9:9).⁷

Ang natural nga tinguha para sa mga lalaki ug mga babaye nga magkauban nagagikan sa Dios. Apan kining panag-uban gilimitahan sa iyang mga balaod. Kining butanga angay nga itagana sa kaminyoon, kon kini pagabuhaton sulod sa kaminyoon, kini husto ug makapahimuot sa Dios ug usa ka katumanan sa sugo sa pagdaghan ug pagpuno sa yuta. Apan kon kining mga butanga buhaton gawas sa kaminyoon kini mahimong tunglo.⁸

Adto sa altar sa kaminyoon nga putli ug limpyo. Ireserba kadtong nindot ug pribadong kasuod diha sa kaminyoon nga gituyo sa Dios sa Langit nga mahimong kabahin sa kaminyoon ug dili buhaton nga gawas sa pakigsaad sa kaminyoon. Dili nako igsapayan kon unsay isulti sa kalibutan, apan kini ang mga sumbanan sa gingharian sa Dios.⁹

Ang mikatap nga sala niining henerasyon mao ang sekswal nga imoralidad.

Ang mikatap nga sala niining henerasyon mao ang sekswal nga imoralidad. Miingon si Propeta Joseph nga kini mao ang tinubdan sa mas daghang tintasyon, away, ug kalisud sa mga elder sa Israel kay sa uban pa nga butang.¹⁰

Ang sekswal nga imoralidad usa ka pwersa sa dautan nga wala lang makaapekto sa kalibutan karon, apan sa Simbahan usab. Ang dili pag-angkon niini usa ka delikadong pagpasagad o pagbaliwala niini. Sumala sa kategoriya sa mga sala, ang pagpatay ug paglimod sa Espiritu mas grabe kaysa ginadili nga sekswal nga relasyon, nga atong gitawag og pakighilawas sa dili minyo kon wala pa maminyo ang tawo nga mibuhat niini, o ang mas grabe nga sala sa pagpanapaw kon ang tawo minyo na. Nasayud ko nga ang pagkadili putli wala maseryuso sa pagkonsiderar sa balaod sa yuta kay sa Dios, o grabing mosilot sama sa Dios, apan kana wala makausab sa pagkasalawayon niini. Sa mga mata sa Dios adunay usa lang ka sumbanan sa moral para sa mga lalaki ug mga babaye. Sa mga mata sa Dios ang kaputli ipatuman gayud kanunay. …

Walay sala nga mas nakapawala sa Espiritu sa Ginoo sa atong katawhan karon kaysa pagpatuyang sa sekswal nga relasyon. Kini makahimo sa atong mga tawo nga masugamak, mapugngan ang paglambo, makahinay sa ilang espiritwal nga gahum, ug makabuhat nila og laing mga sala.¹¹

Adunay dakong kakuyaw kon ang inyong panag-uban sa dili pa maminyo natukod lang tungod sa pisikal. … Ang makadaut nga epekto niining gidili nga panag-uban madala ngadto sa kinabuhi sa kaminyoon, makawala sa kadasig, makahatag og kasubo, ug kahuyang sa pundasyon sa panimalay.¹²

Ang kaputli sa moral usa ka mahangturong baruganan. Ang Espiritu sa Dios “dili mopuyo sa dili balaan nga mga templo” [tan-awa sa Helaman 4:24]. Ang kaputli makahatag og kinabuhi; ang pagkadili putli makalaglag. Ang mosupak sa sagradong mga balaod sa Dios masilutan gayud. Ang bantugang mga nasud nangagun-ob dihang sila nakasala sa moral nga paagi, tungod kay ang mga sala sa imoralidad nakahimo sa ilang katawhan nga dautan kinsa wala makasagubang sa hagit sa ilang panahon.¹³

Ang pagkadili putli mao ang pinakadautan, samtang ang kaputli sa moral maoy usa sa pinakalig-ong pundasyon sa malipayong panimalay. Ang malipayon ug malampusong panimalay dili matukod pinaagi sa pagka-imoral.¹⁴

Ang uban mangatarungan sa ilang pagkaimoral gamit sa rason nga ang pagpugong niini, mga balaod lang sa relihiyon, mga balaod nga walay kahulugan tungod kay sa tinuoray walay Dios. Inyong maila nga kini walay kamatuorang pagpangrason nga gituyo aron ikapangatarungan ang gana sa pagkakalibutanon, kahigal, ug kainit sa pagbati sa tawo. Ang balaod sa Dios dili mausab. Kini para sa tanan, nagtuo man sila sa Dios o wala. Ang tanan pagasilutan, bisan unsaon pa niya sa pagpangatarungan o pagbaliwala niini.

Ang imoralidad … moresulta kanunay sa pagmahay. Ang tawo dili mahimong anaa sa imoral nga relasyon nga dili makasinati sa dautang mga epekto niini. Dili siya mahimong mobuhat og sayop ug mobati nga eksakto—imposible kini. Kon ang balaod sa Dios supakon, iya kining pagabayaran og kasubo, kaguol, kahasol, kakulang sa pagtahud sa kaugalingon, ug mahilayo sa Espiritu sa Dios.¹⁵

Aron magpabiling limpyo sa moral nga paagi, kinahanglang andamon nato ang atong kaugalingon sa pagbuntog sa tintasyon.

Kadaghanan sa mga tawo makasinati og sekswal nga sala tungod sa sayop nga panghunahuna aron lang pagtagamtam sa nag-unang panginahanglan sa tawo. Kitang tanan adunay panginahanglan nga mobati nga gihigugma ug adunay bili. Kitang tanan nagtinguha og kalipay sa atong kinabuhi. Tungod niini, linglahon ni Satanas ang mga tawo nga mobuhat og imoral pinaagi sa pagpahimulos sa ilang nag-unang panginahanglan. Siya mosaad og lingaw-lingaw, kalipay, ug katagbawan.

Apan kini, usa ka panglingla. Sama sa giingon sa tigsulat sa Proverbio: “Siya nga makapanapaw sa usa ka babaye maoy tawong walay salabutan: siya nagabuhat niini aron sa paglaglag sa iyang kaugalingong kalag” (Mga Proverbio 6:32). Si Samuel ang Lamanite mitudlo sa samang butang sa dihang miingon siya, “Gipangita ninyo ang kalipay sa pagbuhat sa kadautan, mga butang nga sukwahi sa kinaiya niana nga … pagkamatarung” (Helaman 13:38). Mas yano ang pagkasulti ni Alma niini: “Ang pagkadautan dili mahitabo nga mahimo nga kalipay” (Alma 41:10).¹⁶

Adunay karaang panultihon nga nag-ingon: Mas maayo nga mapangandaman ug mapugngan kaysa ayuhon ug hinulsulan. Tinuod gayud kini sa balaod sa kaputli. Ang unang depensa aron limpyo ang atong kaugalingon sa moral nga paagi mao ang pag-andam sa atong kaugalingon sa pagbuntog sa tintasyon ug pagpugong sa atong kaugalingon nga makasala.¹⁷

Limpyo nga hunahuna

Kontrolaha ang inyong hunahuna. Walay mobuhat og imoralidad nga wala maghunahuna. Ang imoralidad magsugod sa hunahuna. Kon kita maghunahuna og malaw-ay o imoral nga mga butang, nahimo na ang unang lakang padulong sa dalan sa imoralidad. Pasidan-an ko kamo sa kadautan niini nga pornograpiya. Balik-balik natong madunggan niadtong nasugamak sa sala nga ang sinugdanan sa ilang pagpakasala nagsugod diha sa mga materyal sa pornograpiya. Ang Manluluwas nagtudlo nga kon ang lalaki motan-aw nga may kaibog sa babaye, o sa laing pagkasulti, kon dili niya makontrolar ang iyang hunahuna, siya nakahimo og panapaw sa iyang kasingkasing (tan-awa sa Mat. 5:28; D&P 63:16).¹⁸

Kadtong limpyo og hunahuna dili makabuhat og dautan. Dili lang mo responsable sa atubangan sa Dios sa inyong mga buhat apan sa pagkontrolar usab sa inyong hunahuna. Busa, pagpakabuhi nga dili mo maulawan kon ang inyong hunahuna i-flash sa screen diha sa simbahan. Tinuod gihapon ang karaang panultihon nga magtanom mo og hunahuna ug inyong maani buhat, magtanom mo og buhat ug inyong maani pamatasan, magtanom mo og pamatasan ug inyong maani kinaiya, ug ang inyong kinaiya mao ang modeterminar sa inyong mahangturong destinasyon. “Nga siya nagahunahuna sa sulod sa iyang kaugalingon, sa ingon niana mao man siya.” (Tan-awa sa Prov. 23:7.)¹⁹

Ikonsiderar og maayo ang mga pulong ni Propetang Alma ngadto sa iyang badlungon nga anak, si Corianton, “[Biyai ang] imong mga sala, ug ayaw na pagsunod sa mga tinguha nga dautan sa imong mga mata.” (Alma 39:9.)

“Mga tinguha nga dautan sa imong mga mata.” Sa atong panahon, unsay ipasabut niini?

Mga salida sa sine, mga programa sa telebisyon, ug mga rekording sa video nga makadaut sa hunahuna ug malaw-ay.

Mga magasin ug basahon nga binastos.

Kami motambag kaninyo … ayaw hugawi ang inyong hunahuna niniing makadaut nga butang, kay ang hunahuna nga naagian niining hugaw dili na susama pagkahuman.²⁰

Pagmalimpyo. Pagmahiyason diha sa inyong hunahuna ug aksyon. Basa og maayong mga basahon. Ayaw tuguti nga ang inyong hunahuna makontrolar sa pornograpiya. … Sumala sa mga pulong sa Ginoo, “Himoa ang hiyas nga modayan-dayan sa inyong mga hunahuna nga walay paghunong; unya ang imong pagsalig mosamot pagkalig-on diha sa atubangan sa Dios. Ang Espiritu Santo mao ang inyong kauban sa kanunay.” (D&P 121:45–46.)²¹

Mga pag-ampo para sa kalig-on

Kanunay mag-ampo para sa gahum sa pagbuntog sa tintasyon. Ang tintasyon moabut kanatong tanan. Kini daghan og porma ug magtakuban, apan gihatag kanato sa Ginoo ang yawe aron pagbuntog niini. Siya miingon kang Propeta Joseph Smith: “Pag-ampo kanunay, aron ikaw mahimo nga magmadaugon; oo, nga ikaw makabuntog ni Satanas, ug nga ikaw makalingkawas sa mga kamot sa mga sulugoon ni Satanas nga nagpatunhay sa iyang buhat” (D&P 10:5). Kinahanglang kabahin sa atong matag adlaw nga pag-ampo ang pagpangayo sa Ginoo og kanunayng kalig-on sa pagbuntog sa tintasyon, ilabi na sa mga tintasyon nga may kalabutan sa balaod sa kaputli.²²

Walay tintasyon nga inyong masinati nga dili ninyo mabuntog. Ayaw ipahimutang ang inyong kaugalingon sa dapit nga daling mapukan. Paminawa ang mga aghat sa Espiritu. Kon kamo nagbuhat og mga butang diin dili mo ganahang mag-ampo ug mangayog mga panalangin sa Ginoo sa inyong gibuhat, nan kamo anaa sa sayop nga matang sa kalihokan.²³

Paglikay sa dili hustong mga sitwasyon

Ang mga minyong lalaki ug babaye usahay moparayeg ug mosungog-sungog sa opposite sex [laing babaye o lalaki]. Kini gitawag og walay malisyang panagkita nga gikasabutan, o sobrang panahon ang gigahin nga mag-uban. Niining mga sitwasyuna, ang mga tawo mangatarungan pinaagi sa pag-ingon nga kini natural lang nga pagpahayag sa panaghigalaay. Apan kining morag walay malisya nga pagsungogay o yanong gamay nga kalingawan uban sa opposite sex daling mopadulong ngadto sa mas seryusong panag-uban ug sa katapusan pagbudhi.

Ang nindot nga pangutana para sa atong kaugalingon mao kini: Malipay ba kaha ang akong kapikas kon siya masayud nga kini akong gibuhat?²⁴

Kon kamo minyo, likayi nga mag-uban sa opposite sex nga kamo ra kutob sa mahimo. Daghang trahedya sa imoralidad nagsugod dihang ang lalaki ug babaye ra ang naa sa opisina, o sa simbahan, o sa sakyanan. Sa sinugdanan dili tuyo o gani wala sa hunahuna ang pagpakasala. Apan ang kahimtang nindot nga kahigayunan para sa tintasyon. Magsunod-sunod na ang panghitabo, ug diha-diha dayon ang trahedya mahitabo. Mas sayon ra unta ang paglikay niining sirkumtansya kon gilikayan na kini sa sinugdanan pa lang aron dili makapadayon ang tintasyon.²⁵

Pagkaligdong

Magmaligdong. Ang pagkaligdong sa sininaan ug pinulongan ug pamatasan mao ang tinuod nga timaan ug karakter sa mahiyasong Santos sa Ulahing mga Adlaw. … Likayi ang linihokan nga bati, binastos ug makadaot sa hunahuna.²⁶

Young adults in San Diego, California. — “Alang niadtong single ug nag-date, planoha sa mabinantayong paagi ang positibo ug makapalambo nga mga kalihokan.”

Maayo, positibong mga kalihokan.

Buntuga ang dautan pinaagi sa maayo. Mabuntog ninyo ang daghang dautang mga pagbati pinaagi sa maayong pisikal nga paningkamot ug maayo nga mga kalihokan. Ang himsog nga kalag, lawas ug espiritu nga walay dautang impluwensya sa alkohol ug tabako, mas makabuntog sa dautan.²⁷

Alang niadtong single ug nag-date, planoha sa mabinantayong paagi ang positibo ug makapalambo nga mga kalihokan aron dili mo magpabiling kamo-kamo lang nga walay laing buhaton gawas sa pagpakita og pisikal nga kasuod. … Kini ang baruganan sa pagpuno sa kinabuhi og positibong mga kalihokan aron wala nay kahigayunan ang negatibo.²⁸

Pun-a ang inyong kinabuhi sa positibong mga tinubdan sa gahum. Dili paigo ang yano lang nga pagbuntog sa dautan o maglikay nga makasala. Kinahanglan sab natong pun-on ang atong kinabuhi sa pagkamatarung. Kinahanglang moapil ta sa mga kalihokan nga makahatag og espirituhanong gahum.

Naghisgot ko niining kalihokan sama sa pagtuon og maayo sa mga kasulatan. Adunay gahum nga mabati sa atong kinabuhi kon kita mobasa ug magtuon sa kasulatan matag adlaw nga dili nato makaplagan sa laing paagi. Ang pag-ampo matag adlaw maoy laing tinubdan sa dakong gahum. Ang pagpuasa alang sa piho nga kalig-on o sa espesyal nga mga panalangin makapalig-on nato labaw pa sa atong normal nga abilidad. Ang Kristohanong pagserbisyo, pagsimba, pagserbisyo sa gingharian—makadugang sa atong panudlanan sa kalig-on ug gahum.

Mas magkugi pa kita kaysa yanong pagtangtang sa negatibong mga impluwensya sa atong kinabuhi. Ato kining ilisan og matarung nga mga kalihokan nga mopuno kanato og kalig-on ug determinasyon sa pagpakabuhi nga angay kanato.²⁹

Pinaagi sa paghinusol, kadtong nalambigit sa sekswal nga sala mahimong malimpyo pag-usab.

Adunay pipila diin ang tambag sa pag-andam ug paglikay ulahi na. Mahimong kamo nalambigit na og maayo sa seryuso nga sala. Kon kini ang sitwasyon, wala nay kapilian gawas sa pagbag-o sa inyong kinabuhi ug paghinulsol sa inyong mga sala. Para kaninyo mosugyot ko og lima ka importante nga mga butang nga inyong mahimo aron mabalik ang kaputli sa moral. Palayo diha-diha dayon sa bisan unsang sitwasyon nga maghatud kaninyo sa pagpakasala. Pangamuyo sa Ginoo og gahum sa pagbuntog. Patabanga ang inyong mga lider sa priesthood sa pagsulbad sa kalapasan ug makabalik sa hingpit nga pakigdait sa Ginoo. Pangamuyo sa balaanong tabang ug pun-a ang inyong kinabuhi sa positibong mga kapanguhaan sa gahum. Hinumdumi nga pinaagi sa hustong paghinulsol, malimpyo mo pag-usab.

Alang niadtong tinuoray gayud nga naghinulsol, ang saad sigurado. Malimpyo kamo pag-usab. Mawala ang kasubo. Ang matam-is nga kalinaw sa pagpasaylo mabati sa inyong kinabuhi. Niini nga dispensasyon ang Ginoo namulong uban sa kaklaro sa dihang miingon siya, “Tan-awa, siya kinsa naghinulsol sa iyang mga sala, ang mao gipasaylo, ug Ako, ang Ginoo dili na mahinumdom [niini]” (D&P 58:42).³⁰

Ang mga ginikanan kinahanglang motudlo sa ilang mga anak nga sundon ang balaod sa kaputli.

Ang mga ginikanan kinahanglang mohatag sa ilang mga anak og pihong mga instruksyon kabahin sa kaputli sa sayo nga edad, alang sa pisikal ug moral nga proteksyon.³¹

Kon ang mga ginikanan mohigugma ug motahud sa usag usa, ug kon sa ilang sagradong panag-uban adunay hingpit nga suporta ug pagkamaunungon, kining mahinungdanong mga butang maanaa usab sa panimalay sa umaabut nga henerasyon. Sa laing bahin, kon adunay panagbingkil, panag-away, ug kakulang sa panag-uyon diha sa panimalay, ug kon moapil sa delikadong pagpamarayeg kon lagyo sa kaparis, nan ang panimalay sa umaabut nga henerasyon mahimong huyang. …

… Ang atong panimalay mahimong pundasyon sa kalig-on pinaagi sa pagsilsil sa pagkamatarung ug pagdala og kalinaw, panaghiusa, ug paghunahuna sa uban nga mamugna pinaagi sa personal nga kaputli, hingpit nga pagkamaunungon, ug yanong debosyon sa pamilya. Ang mga ginikanan kinahanglang modawat sa kaminyoon isip sagradong institusyon, ug mopasidungog sa pagkaginikanan. Ang mga anak kinahanglang madasig pinaagi sa lagda ug ehemplo sa pagpangandam sa kaminyoon, nga manalipod batok sa pagkadili putli sama sa pakigbatok sa grabe nga sakit, ug sa pagbuhat sa ubang mahinungdanong Kristohanon nga mga hiyas.³²

A father sitting on a stone fence with his teenage son. The father and son are looking at each other as they counsel together. Posed by models. — Si Presidente Ezra Taft Benson mitambag sa mga ginikanan nga tudloan ang ilang mga anak kabahin sa balaod sa kaputli.

Ang Dios mihatag kanato sa balaod sa kaputli aron kita hingpit nga malipay.

Walay laing tinguha ang Langitnong Amahan kanato gawas sa atong kalipay. Siya mosulti kanato niadtong mga butang nga makahatag kanato og kalipay. Ug usa sa pinakasiguradong mga baruganan nga gihatag sa Dios aron kita makakaplag og kalipay mao ang balaod sa kaputli. Kinasingkasing kong nag-ampo nga seryusohon ninyo sa pagkonsiderar ang makalipay nga sangputanan sa pagsunod niini nga balaod, ug ang makadaut nga sangputanan sa pagsupak niini.³³

Usa ka rason sa hiyas—nga naglakip sa personal nga kaputli, limpyo nga panghunahuna ug mga buhat, ug integridad—mao nga gikinahanglan nato ang Espiritu ug ang gahum sa Dios sa atong kinabuhi sa paghimo sa buhat sa Dios. Kon wala kana nga gahum ug impluwensya wala ra tay kalainan sa ubang organisasyon. Kana nga hiyas modan-ag ug moimpluwensya sa uban paingon sa mas maayong kinabuhi ug moresulta nga ang mga dili miyembro mangutana bahin sa atong tinuohan.³⁴

Magmatinud-anon sa sagradong mga balaod sa Dios. Hinumdumi, ang mosupak niini masilutan gayud. Kon gusto ninyo nga magmalipayon ug magmalampuson sa inyong panag-uban, sa paghinalaray sa gugma, ug pagtukod og panimalay sa yuta, ipahaum ang inyong kinabuhi ngadto sa mahangturong balaod sa langit. Walay laing paagi.³⁵

Walay molungtad nga kalipay sa imoralidad. Walay kalipay nga makaplagan sa pagsupak sa balaod sa kaputli. Sama nga ang katugbang tinuod. Tingali adunay temporaryong kalipay. Sa mubong panahon ang tanan daw nindot kaayo. Apan kadali lang mongil-ad ang relasyon. Mopuli ang kahasol sa konsensya ug kaulaw. Kita mahadlok nga ang atong mga sala madiskobrehan. Kita kinahanglang moipsot ug motago, mamakak ug manlimbong. Ang gugma maghinay-hinay og kawala. Ang kapungot, kasina, kalagot, ug gani kayugot maghinay-hinay sa pagtumaw. Kining tanan natural nga mga sangputanan sa sala ug kalapasan.

Sa laing bahin, kon kita mosunod sa balaod sa kaputli ug magpabiling limpyo sa moral nga paagi, kita makasinati sa panalangin sa dugang gugma ug kalinaw, mas dakong pagsalig ug pagtahud sa atong kaparis, mas mapasaligon sa usag usa, ug anaa ang mas dakong pagbati sa hingpit nga kalipay.³⁶

Mga Sugyot alang sa Pagtuon ug Pagtudlo

Mga Pangutana

Si Presidente Benson miingon nga ang sumbanan sa Ginoo sa sekswal nga kaputli “klaro ug hingpit” (seksyon 1). Sa unsang paagi kining sumbanan lahi sa mga mensahe sa kalibutan?
Unsa ang mga sangputanan sa pagsupak sa balaod sa kaputli? (Para sa pipila ka ehemplo, tan-awa ang seksyon 2.)
Unsa ang piho nga mga butang nga atong mahimo aron mapanalipdan ang atong kaugalingon ug atong pamilya gikan sa sekswal nga tintasyon? (Para sa pipila ka ehemplo, tan-awa ang seksyon 3.)
Ribyuha ang tambag ni Presidente Benson kabahin sa “seryuso nga sala” (seksyon 4). Unsa ang inyong hunahuna ug pagbati samtang kamo namalandong sa saad nga dawaton kadtong naghinulsol “balik sa hingpit nga pakigdait”?
Sa inyong hunahuna nganong importante sa mga ginikanan nga “mohatag sa ilang mga anak og pihong mga instruksyon kabahin sa kaputli sa sayo nga edad”? Sa unsang paagi nga ang ilang pagkamatinud-anon sa usag usa makaimpluwensya sa mga pagbati sa ilang mga anak kabahin sa kaminyoon ug sa balaod sa kaputli? (Tan-awa sa seksyon 5.)
Unsa ang pipila sa “makalipay nga mga sangputanan” sa pagsunod sa balaod sa kaputli? (Para sa pipila ka ehemplo, tan-awa ang seksyon 6.)

May Kalabutan nga mga Kasulatan

Genesis 39:7–21; 1 Mga Taga-Corinto 6:18–20; Mga Taga-Galacia 5:16; Alma 38:12; 39:3–5; 3 Nephi 12:27–30; D&P 42:22–25

Tabang sa Pagtudlo

“Awhaga kadtong imong gitudloan nga mosulod sa klase nga andam sa pagkat-on ug sa pag-apil. Kon indibidwal silang maningkamot sa pagkat-on sa ebanghelyo, mas motabang sila sa kahimtang sa pagkat-on atol sa mga leksyon” (Pagtudlo, Walay Labaw Ka Mahinungdanong Tawag [1999], 80).