Kapitulo 7
Joseph Smith, usa ka Instrumento diha sa mga Kamot sa Ginoo
“Si Joseph Smith, ang Propeta sa ulahing mga adlaw, usa ka instrumento diha sa mga kamot sa Ginoo sa pag-abli sa bag-ong dispensasyon sa ebanghelyo, ang katapusan ug ang labing mahinungdanon sa tanang mga dispensasyon sa ebanghelyo.”
Gikan sa Kinabuhi ni Ezra Taft Benson
Sa dihang si Elder Ezra Taft Benson miserbisyo isip usa ka full-time nga misyonaryo sa England sa sayo sa mga 1920, siya ug ang iyang mga kauban nakasinati sa unsay gitawag niya og “dakong oposisyon ngadto sa Simbahan.” Sa kaulahian siya miasoy:
“Ang mga pahayagan, mga magasin, gani ang anti-Mormon nga mga salida [pelikula] nagkatag sa tibuok Great Britain.” Tungod kay ang oposisyon hilabihan ka grabe, pipila ka matang sa misyonaryong buhat, sama sa mga pagmiting diha sa kadalanan ug pagpanghatag og mga pamphlet, gipahunong. “Apan didto sa amihanang England diin kami naghago,” miingon siya, “kami dunay grupo sa mga tawo didto sa South Shields Branch kinsa mga matinud-anon kaayo ug mahalaron kaayo ug maunungon kaayo, ug ilang gidapit ang akong kauban ug ako sa pag-adto ug pagpamulong diha sa ilang sakrament miting. Miingon sila, ‘Daghan sa among mga silingan wala motuo sa mga bakak nga giimprinta. Kon kamo moari, pun-on namo ang gamay nga chapel.’
“Ug busa among gidawat ang imbitasyon ug misugod kami sa pagpangandam ug ako misugod sa pagtuon mahitungod sa apostasiya. Usa kini ka hilisgutan nga akong gusto, ug nagtuo ako nga nagkinahanglan sila niini; ug ako nagtrabaho ug nagtuon, ug naghunahuna ko nga makapamulong og kinse minutos kalabut sa hilisgutan.
“Miadto kami sa gamay nga chapel ug kini puno. Ang tanan malipayon. Ug human sa pambukas nga mga kalihokan ang akong kauban namulong, dayon ako namulong nga may kagawasan nga sukad wala nako matagamtami sa tibuok nakong kinabuhi. Ug sa dihang ako milingkod ug mitan-aw sa akong relo, nakapamulong ako og baynte singko minutos, ug wala nako mahisguti ang apostasiya, ako wala gani makahunahuna kabahin sa apostasiya. Nakapamulong ako mahitungod ni Joseph Smith, ug ako nagsaksi nga siya usa ka propeta sa Dios ug ako nasayud niini. Misulti ako mahitungod sa pagtungha sa Basahon ni Mormon isip bag-ong saksi alang ni Kristo, ug ako nagpamatuod. Sa dihang ako nakaamgo unsay nahitabo, dili nako kapugngan ang mga luha.
“Sa katapusan sa miting, daghan sa mga Santos ang miduol ug mipahayag sa ilang pasalamat nga may butang nga nasulti mahitungod ni Joseph Smith. Miingon sila, “Kadaghanan sa among mga silingan miingon, “Makadawat kami sa tanan mahitungod sa Simbahan gawas ni Joseph Smith.”’ Ug unya pipila niadtong mao nga mga silingan ang miduol ug miingon, ‘Kami andam na karon. Kami andam karong gabii. Among nadawat ang pagsaksi nga si Joseph Smith propeta sa Dios.’”1
Si Presidente Benson mipadayon sa pagpangita og mga oportunidad sa tibuok niyang kinabuhi sa pagpakigbahin sa iyang pagsaksi sa calling ni Joseph Smith. Sama pananglit, sa dihang siya miserbisyo isip secretary sa agrikultura sa Estados Unidos, usa ka estasyon sa radyo ang midapit kaniya sa pagpili og paboritong bersikulo sa kasulatan nga pagabasahon sa sibya, ug gipili niya ang bahin sa Joseph Smith—Kasaysayan diha sa Perlas nga Labing Bililhon.2
Labaw sa tanan, kanunay siyang naghatag og lig-on ug gamhanang pagpamatuod ngadto sa iyang kaubang mga Santos. “Si Joseph Smith usa ka propeta sa Buhing Dios,”gipahayag niya, “usa sa labing halangdong mga propeta nga sukad nagpuyo sa yuta. Siya mao ang instrumento diha sa mga kamot sa Dios sa pagdala sa importanting dispensasyon sa ebanghelyo, ang labing importante sukad, ug ang katapusan sa tanan sa pagpangandam alang sa ikaduhang pag-anhi sa Agalon.”3
Ang mensahe sa Unang Panan-awon “gihimo alang sa tanan nga mga anak sa atong Amahan nga nagpuyo dinhi sa yuta.”
Mga Pagtulun-an ni Ezra Taft Benson
1
Ang Unang Panan-awon ni Joseph Smith mao ang labing dako nga hitabo dinhi niini nga kalibutan sukad sa Pagkabanhaw ni Jesukristo.
Isip usa ka batan-ong lalaki, si Joseph Smith tigpangita sa kamatuoran. Ang kalibug diha sa mga simbahan migiya kaniya sa pagpangutana sa Dios kon hain niini ang tinuod. Agi og tubag niana nga pag-ampo, gipamatuod niya nga usa ka gilis sa kahayag mitungha. Kini mao ang iyang mga pulong:
“Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (JS—K 1:17.)
Gipangutana ni Joseph ang ikaduhang personahe, kinsa mao si Jesukristo, kon hain sa Kristiyanong mga tinuohan ang husto. Gisultihan siya nga siya dili gayud mopasakop sa bisan hain niini, kay walay usa nga husto.4
Sa dihang ang Dios nga Amahan ug ang iyang Anak nga si Jesukristo mianhi sa yuta, sama sa ilang gihimo niadtong 1820 sa dihang sila mipakita ngadto sa batang lalaki nga propeta, si Joseph Smith, kini dili usa ka butang nga kalabut lamang sa diyutay nga mga tawo. Kini usa ka mensahe ug pagpadayag nga gihimo alang sa tanan nga mga anak sa atong Amahan nga nagpuyo dinhi sa yuta. Kadto ang labing dako nga hitabo nga sukad nahitabo dinhi niining kalibutan sukad sa pagkabanhaw sa Agalon. Usahay maghunahuna ko nga kita naanad na kaayo niini nga dili na nato hingpit nga madayeg ang kahulugan niini ug ang importansya ug ang gidak-on niini.5
Ang unang panan-awon ni Propeta Joseph Smith maoy sukaranang doktrina sa Simbahan.6
Ang labing klarong kamatuoran nga migula gikan sa kasinatian sa Propeta niadtong 1820 mao ang katinuod nga adunay Dios ug ang kamatuoran nga si Jesukristo sa tinuod nabanhaw. Nakita niya sila isip bulag, lahi, nahimaya nga mga Personahe kinsa misulti ngadto kaniya ingon nga ang usa ka tawo nakigsulti ngadto sa lain.7
Mapainubsanon akong nagpasalamat alang sa kahibalo nga akong naangkon nga ang Dios nga Amahan ug ang iyang Anak, si Jesukristo, isip nahimaya nga mga binuhat mianhi pag-usab niini nga yuta sa atong panahon, niini nga dispensasyon; nga sila sa pagkatinuod gayud mipakita ngadto sa batang lalaki nga propeta. … Kini mao ang labing mahimayaong pagpakita sa Dios nga Amahan ug sa Anak nga kita adunay rekord.8
2
Nauyon sa panagna sa Bag-ong Tugon, si Joseph Smith nakadawat og bag-ong pagpadayag ug mga pagduaw sa anghel.
Kini sa kinatibuk-an masabtan nga ang hugot nga pagtuo sa mga miyembro sa Ang Simbahan ni Jesukristo sa mga Santos sa Ulahing mga Adlaw nag-agad diha sa pamahayag nga si Joseph Smith usa ka propeta sa Dios, ug nga siya usab mipadayag nga ang pagtungha sa Basahon ni Mormon mao ang resulta sa mga pagbisita sa anghel kaniya tali sa mga tuig 1823 ug 1827.
Sa pagkahibalo kalabut niini nga pamahayag, ang pipila ka mga tawo milalis nga kini ingon og binuang nga ang mga anghel mobisita sa yuta niining moderno nga panahon.
Ang Biblia naglangkob og pagpamatuod nga ang Dios naggiya sa mga kalihokan sa Iyang simbahan dinhi sa yuta labaw sa upat ka libo ka tuig pinaagi sa pagpadayag ug, kon gikinahanglan, pinaagi sa langitnong mga pagpangalagad.
Sa paghulagway sa kondisyon sa katapusang mga adlaw kalabut sa ikaduhang pag-anhi ni Jesukristo, si Juan nanagna diha sa Bag-ong Tugon nga sa dili pa ang pagbalik sa Manluluwas, ang kalibutan makadawat og pahimangno nga ang takna sa paghukom sa Dios duol na. Kana nga pahimangno moabut pinaagi sa anghel gikan sa langit nga namahayag og “mahangturong ebanghelyo.” Paminaw sa iyang mga pulong:
“Nakita ko ang laing manulonda nga naglupad sa taliwala sa kalangitan, ug kini siya may gidalang walay katapusang ebanghelyo aron imantala ngadto sa nanagpuyo sa yuta, ug sa tanan nga kanasuran, ug kabanayan, ug pinulongan, ug katawhan,
“Sa makusog nga tingog siya nag-ingon, Kahadloki ninyo ang Dios ug kaniya ihatag ninyo ang himaya kay nahiabut na ang takna sa iyang paghukom: ug simbaha ninyo siya nga maoy nagbuhat sa langit ug sa yuta, sa dagat ug sa mga tuburan sa tubig.” (Pin. 14:6–7.)
Kon ang usa ka tawo modawat sa pagpamatuod ni Juan nga Tigpadayag, ang bag-ong pagpadayag ug pagbisita sa usa ka langitnong mensahero nganhi sa yuta kinahanglan nga paabuton.
Ang atong ligdong nga pagpamatuod mao nga kining mensaherong anghel mipakita ngadto ni Propeta Joseph Smith sayo sa ika-desinuybe nga siglo. Kining pahibalo nga usa ka anghel gikan sa Dios mipakita ngadto sa usa ka propeta sa atong mga panahon sa kinatibuk-an nauyon sa mga panagna diha sa Bag-ong Tugon ug busa kinahanglan nga kahatagan og interes sa matag matinguhaon nga tigpangita sa kamatuoran.9
Sa gabii sa ika-21 sa Septyembre 1823, usa ka anghel ang mipakita ngadto ni Propeta Joseph Smith. Ang pangalan sa anghel mao si Moroni. Siya ang katapusan sa taas nga linya sa karaang mga propeta sa duha ka dagkong mga sibilisasyon kinsa mipuyo … sa Kontinente sa Amerika gatusan ka tuig na ang milabay.10
Miadto si Moroni ni Joseph Smith agi og katumanan sa panagna.
3
Ang Basahon ni Mormon mao ang labing dako nga ebidensya kabahin sa calling ni Joseph Smith isip usa ka propeta.
Ang labing dako nga ebidensya agi og suporta sa pamahayag ni Joseph Smith nga maoy tigpama-ba alang sa Labawng Makagagahum nga Dios mao ang pagmantala sa usa ka rekord sa kasulatan, ang Basahon ni Mormon.
Ang Basahon ni Mormon maoy usa ka rekord sa karaang mga lumulupyo sa kontinente sa Amerika ug nagrekord sa pagbisita ug pagpangalagad ni Jesukristo ngadto sa katawhan niini nga kontinente sa wala pa ang Iyang pagsaka sa langit didto sa Jerusalem. Ang labing dako nga katuyoan sa rekord mao ang pagkombinser sa usa ka ulahing henerasyon nga si Jesus mao ang Kristo, ang Anak sa Dios. Busa, ang Basahon ni Mormon, naglangkob og dugang nga saksi, uban sa Biblia, sa pagkabalaan ni Jesukristo.
Nakuha ni Joseph Smith kining karaan nga rekord gikan sa usa ka langitnong mensahero, sama gayud sa gipanagna ni Juan. Kini nga anghel mipakita kaniya ug mipadayag sa nahimutangan sa karaang mga rekord nga gisulat diha sa mga palid nga metal ug gilubong diha sa usa ka tipiganan nga hinimo sa bato [stone vault]. Sa takda nga panahon, ang batan-ong propeta gihatagan sa mga palid ug sa paagi nga kini hubaron. Ang basahon gimantala dayon ngadto sa kalibutan isip usa ka giilang talaan sa mga kasulatan.
Usab, agi og pag-uyon sa pagpamatuod ni Juan, ang basahon naglangkob “sa walay katapusang ebanghelyo.” Kini karon gisangyaw sa atong mga misyonaryo ngadto sa kalibutan.
Nagdapit kami kaninyo sa pagsulay sa katinuod sa among pagsaksi mahitungod sa gigikanan sa Basahon ni Mormon. Makahimo kamo niini pinaagi sa pagbasa niini ug sa pagpangayo sa atong Langitnong Amahan kon kini tinuod ba. Nagsaad ako kaninyo, kon kamo sinsero, makadawat kamo og panghimatuod sa kamatuoran pinaagi sa Espiritu Santo. Minilyon, uban sa kaligdong ug kasinsero, nagpamatuod nga sila nahibalo nga kini gikan sa Dios.11
Kon ang Basahon ni Mormon tinuod, nan si Jesus mao ang Kristo, si Joseph Smith mao ang Iyang propeta, Ang Simbahan ni Jesukristo sa mga Santos sa Ulahing mga Adlaw tinuod, ug kini gipangulohan karon pinaagi sa usa ka propeta nga nagdawat og pagpadayag.12
4
Gitukod pag-usab sa Dios ang Iyang gingharian dinhi sa yuta pinaagi ni Propeta Joseph Smith.
Ang mga denominasyong Kristiyano sa tibuok kalibutan nag-ampo sulod sa mga siglo nga ang gingharian sa Dios moabut [tan-awa sa Mateo 6:10].13 Kami dako og tinguha ug sa dayag namahayag: kana nga adlaw karon ania na!
Ang pag-ampo sa katorse anyos nga batang lalaki, diha sa Sagradong Kakahoyan, miabli og usa ka bag-ong dispensasyon sa ebanghelyo.14
Ang Dios mitukod na usab sa iyang gingharian dinhi sa yuta agi og katumanan sa panagna. …
… Si Joseph Smith gi-call sa Dios sa pagtukod og usab niana nga gingharian—Ang Simbahan ni Jesukristo sa mga Santos sa Ulahing mga Adlaw. Ako mopamatuod nga iyang gituman kini nga buhat, nga siya mipahimutang sa mga pundasyon ug nga iyang gitugyan ngadto sa Simbahan ang mga yawe ug mga gahum sa pagpadayon sa dakong buhat sa Ulahing mga Adlaw, nga iyang gisugdan ubos sa paggiya sa Labawng Makagagahum nga Dios.15
Ngadto ni Joseph Smith mipakita ang uban nga mga binuhat, lakip ni Juan Bautista ug Pedro, Santiago, ug Juan, kinsa mi-orden kaniya og awtoridad sa paglihok diha sa pangalan sa Dios (tan-awa sa JS—K 1:68–72; D&P 27:5–13). Ang simbahan ug ang gingharian sa Dios gipahiuli niini nga ulahing mga adlaw, gani Ang Simbahan ni Jesukristo sa mga Santos sa Ulahing mga Adlaw, uban sa tanang mga gasa, mga katungod, mga gahum, ug mga doktrina, mga pangulo, ug mga panalangin sa Simbahan sa nahaunang adlaw. (Tan-awa sa D&P 65; 115:3–4.)16
Si Propeta Joseph gimandoan sa pagpadayon isip instrumento diha sa mga kamot sa Dios ug sa pagtukod sa Simbahan, sa pagmantala ngadto sa kalibutan isip dugang nga pagpamatuod sa pagkabalaan ni Jesukristo, sa Basahon ni Mormon nga gikuha gikan sa sagrado nga mga rekord. …
Kining pagpahiuli sa ebanghelyo, ang pagdala og balik sa kahayag ug sa kamatuoran, gihatag alang sa kaayohan ug panalangin sa tanang anak sa Dios. Ug busa, mapainubsanon ug mapasalamaton, ang atong mga misyonaryo nga molakaw ngadto sa kalibutan sa pagsangyaw nga dihay apostasiya gikan sa kamatuoran, apan pinaagi sa kaayo sa Dios ang langit giablihan na pag-usab ug ang ebanghelyo gipadayag ngadto sa tawo pinaagi ni Joseph Smith, ang Propeta.17
5
Si Joseph Smith usa ka maunungon ug matinuoron bisan ngadto sa kamatayon.
Dungan sa sayong paglambo sa Simbahan mao ang espiritu sa oposisyon ug pagpanggukod. Bisan asa ang gamay nga “liso sa mustasa” gitanom, mga pagsulay gihimo sa pagpugong sa pagtubo niini.18
Ang katorse anyos nga batang lalaki mibarug nga matinuoron batok sa kalibutan. Ang Dios nakaila sa iyang anak sa dihang siya gipili. Siya nahibalo nga siya magmaunungon ug magmatinuoron bisan ngadto sa kamatayon.19
Ang pipila mitagad sa pagpamatuod [ni Joseph Smith] uban sa dakong pagbiaybiay ug misugod sa paghulhog og bakak nga mga istorya ug pagpanggukod batok kaniya. Ang batan-ong propeta, sama ni Apostol Pablo sa karaan, dili molimud sa iyang pagpamatuod, apan gipanalipdan ang iyang pamahayag niini nga mga pulong:
“Ako nakakita og usa ka panan-awon; ako nasayud niini, ug ako nasayud nga ang Dios nasayud niini, ug ako dili makalimud niini, ni ako mangahas sa pagbuhat niini, gani ako nasayud nga ang pagbuhat sa ingon ako makasala sa Dios, ug mahimutang ubos sa kalaglagan.” (JS—K 1:25.)20
Si Joseph Smith ang Propeta andam sa iyang kamatayon. Gisilyohan niya ang iyang pagpamatuod uban sa iyang kinabuhi—sa iyang kaugalingong dugo. Nianang mahinungdanong adlaw sa Nauvoo, Illinois, samtang gitan-aw niya og balik ang iyang siyudad ug katawhan kinsa iyang gihigugma, sa iyang pagpaingon sa Bilanggoan sa Carthage ug sa iyang pagkamartir, siya namahayag: “Kini mao ang labing nindot nga dapit ug ang labing maayo nga katawhan ubos sa kalangitan; wala kaayo sila masayud sa mga pagsulay nga naghulat kanila”. [History of the Church, 6:554].
Wala madugay ang Propeta miingon nga may pagbati, apan sa malinawon ug walay kahadlok nga paagi, “Ako moadto sama sa usa ka karnero ngadto sa ihawanan; apan ako malinawon ingon sa kabuntagon sa ting-init. Ako adunay tanlag nga walay sala ngadto sa Dios ug ngadto sa tanan nga mga tawo. Kon sila mohunos sa akong kinabuhi, ako mamatay nga walay sala, ug ang akong dugo mangamuyo gikan sa yuta alang sa usa ka panimalos, ug kini ikasulti pa mahitungod kanako, ‘Siya gituyo pagbuno sa walay kalooy’” [Historyof the Church, 6:555].21
Busa gitapos ang kinabuhi dinhi sa yuta ni Joseph Smith ug gituman ang mortal nga bahin sa iyang balaang tinudlo nga misyon. Kining mortal nga misyon, iyang gitataw, dili unta matapos hangtud dili hingpit nga mahuman. Sama sa misyon sa Manluluwas, “usa ka kordero nga gipatay sa wala pa matukod ang kalibutan” [tan-awa sa Pinadayag 13:8], si Joseph tinuod gayud nga gitawag nang daan ngadto sa iyang dakong misyon.22
6
Si Joseph Smith nagbarug karon isip pangulo niining katapusan ug labing importante sa tanang mga dispensasyon sa ebanghelyo.
Ako nahibalo nga si Joseph Smith, bisan tuod gipatay isip usa ka martir sa kamatuoran, buhi gihapon ug nga isip ang pangulo niini nga dispensasyon—ang labing importante sa tanang mga dispensasyon sa ebanghelyo—siya mopadayon sa pagbarug sa tibuok nga mga kahangturan nga moabut.23
Ang mensahe ni Joseph Smith—ang mensahe sa Ang Simbahan ni Jesukristo sa mga Santos sa Ulahing mga Adlaw, ang mensahe sa Mormonismo—mao ang labing importanting mensahe niining kalibutan. Ug si Joseph Smith ang Propeta, kinsa buhi karon, nagpadayon sa pagbaton og importanting bahin sa paggiya niini dinhi sa yuta.24
Aron sa pagsabut sa gidak-on sa yutan-ong misyon sa Propeta kinahanglan gayud nga atong tan-awon kini sa panan-aw sa kahangturan. Siya usa sa “mga halangdon ug bantugan” kinsa gihulagway ni Abraham ingon sa mosunod:
“Karon ang Ginoo mipakita ngari kanako, Abraham, sa mga espiritu nga binuhat sa wala pa matukod ang kalibutan; ug taliwala niining tanan dihay daghan sa mga halangdon ug bantugan;
“Ug nakita sa Dios nga kini nga mga kalag mga maayo, ug siya mitindog diha sa taliwala kanila, ug siya miingon: Kini sila Ako mohimo nga akong mga magmamando; kay siya nagtindog uban niadto nga mga espiritu, ug siya nakaamgo nga sila mga maayo; ug siya miingon ngari kanako: Abraham, ikaw usa kanila; ikaw napili sa wala pa ikaw matawo.” (Abraham 3:22–23.)
Mao usab kini ni Joseph Smith. Siya usab didto. Milingkod usab siya sa konseho uban sa halangdon ug dugganang mga tawo. Nag-okupar og importanting dapit sa pagkadungganan ug pagkainila, siya sa walay pagduha-duha mitabang sa pagplano ug paghimo sa dakong buhat sa Ginoo sa “pagpahinabo sa pagka-imortal ug sa kinabuhi nga dayon sa tawo,” ang kaluwasan sa tanang mga anak sa Amahan [tan-awa sa Moises 1:39]. Ang iyang misyon adunay epekto, ug unta makabaton, og epekto sa tanan kinsa mianhi sa yuta, sa tanan kinsa nagpuyo sa yuta, ug sa minilyon nga wala pa matawo.
Si Propeta Joseph Smith mihimo niining mahangturong kamatuoran nga tataw niini nga mga pulong: “Ang matag tawo kinsa adunay calling sa pagpangalagad ngadto sa mga lumulupyo sa kalibutan gi-orden ngadto niini gayud nga katuyoan didto sa dakong konseho sa langit sa wala pa ang kalibutan mahimo. Ako nagtuo nga ako gi-orden ngadto niini gayud nga katungdanan didto niana nga dakong konseho. Kini ang pagpamatuod nga akong gusto nga ako sulugoon sa Dios, ug kini nga mga katawhan Iyang mga katawhan” [tan-awa sa History of the Church, 6:364]. …
Ang labing dako nga kalihokan dinhi niining kalibutan o sa kalibutan nga umaabut direkta nga may kalabutan ngadto sa buhat ug misyon ni Joseph Smith—tawo nga gitakda na, propeta sa Dios. Kana nga trabaho mao ang kaluwasan ug kinabuhing dayon sa tawo. Alang nianang dakong katuyoan kini nga yuta gilalang, ang mga propeta sa Dios gipang-call, mga langitnong mensahero gipadala, ug diha sa sagrado ug importanting mga okasyon gani ang Dios, ang Amahan kanatong tanan, nagpaubos nga moanhi sa yuta ug sa pagpaila sa iyang pinalanggang Anak.
Si Propeta Joseph Smith dili lamang usa sa mga halangdon ug bantugan,” apan siya mihatag ug mipadayon sa paghatag og atensyon sa importanting mga butang dinhi sa yuta bisan karon gikan sa gingharian sa kahitas-an. Kay sa mga mata sa Ginoo, ang Dios niini nga kalibutan ubos sa Amahan, kini usa ka dakong mahangturong tulumanon diin si Propeta Joseph nagdala og importanting tahas, tanan ngadto sa mahangturong priesthood ug awtoridad sa Dios.25
Magpamatuod ako kaninyo nga si Joseph Smith kaniadto ug karon usa ka propeta sa Dios, usa sa tinuod nga bantugang mga propeta sa tanang panahon, usa ka tawo nga gitakda na, tawo nga may baruganan, tawo nga walay kahadlok, tawo nga may lawom nga pagka-espirituhanon, usa ka sama sa Dios nga propeta sa Ginoo, tinuod nga halangdon ug bantugan sa tanang panahon.26
Oo, si Joseph Smith, ang Propeta sa ulahing mga adlaw, usa ka instrumento diha sa mga kamot sa Ginoo sa pag-abli sa bag-ong dispensasyon sa ebanghelyo, ang katapusan ug ang labing mahinungdanon sa tanang mga dispensasyon sa ebanghelyo.27
Mga Sugyot alang sa Pagtuon ug Pagtudlo
Mga Pangutana
-
Ngano sa inyong hunahuna ang Unang Panan-awon ni Joseph Smith ang “labing dako nga hitabo … sukad sa pagkabanhaw sa Agalon”? (Tan-awa sa seksyon 1.) Sa unsa nga mga paagi kini nga hitabo nakaimpluwensya sa inyong kinabuhi?
-
Giunsa niini pagtabang kaninyo nga mahibalo nga si Juan nga Tigpadayag nanagna sa pagbisita ni Moroni ngadto ni Joseph Smith? (Tan-awa sa seksyon 2.)
-
Si Presidente Benson miingon nga ang Basahon ni Mormon mao “ang labing dako nga ebidensya” nga si Joseph Smith usa ka propeta (tan-awa sa seksyon 3). Sa unsa nga paagi nga ang inyong pagtuon sa Basahon ni Mormon nakaimpluwensya sa inyong pagpamatuod kabahin sa misyon ni Joseph Smith?
-
Pamalandunga ang mga pulong sa pagpamatuod ni Presidente Benson diha sa seksyon 4. Unsa ang pipila ka mga panalangin nga miabut nganha kaninyo ug sa inyong pamilya tungod sa Pagpahiuli sa ebanghelyo?
-
Unsa ang inyong nakat-unan gikan sa seksyon 5 mahitungod sa pag-atubang og pagpanggukod? Unsa ang atong makat-unan gikan sa ehemplo ni Joseph Smith nga makatabang kanato kon ang mga tawo mohagit sa atong mga pagpamatuod?
-
Kalabut sa pagka-orden nang daan ni Joseph Smith, si Presidente Benson miingon, “Ang iyang misyon adunay epekto, ug unta makabaton, og epekto sa tanan kinsa mianhi sa yuta, sa tanan kinsa nagpuyo sa yuta, ug ang minilyon nga wala pa matawo” (seksyon 6). Giunsa pag-apekto sa misyon ni Joseph Smith ang tanan kinsa nakapuyo sa yuta. Giunsa niini pag-apekto kaninyo sa personal?
May Kalabutan nga mga Kasulatan
Isaias 29:13–14; 2 Nephi 3:3–15; 3 Nephi 21:9–11; D&P 5:9–10; 135; Joseph Smith—Kasaysayan
Tabang sa Pagtudlo
“Hangyoa ang mga partisipante sa pagpakigbahin sa unsay ilang nakat-unan gikan sa ilang personal nga pagtuon sa kapitulo. Makatabang tingali ang pagkontak og pipila ka mga partisipante nianang semanaha ug sa paghangyo kanila sa pag-anha sa klase nga andam nga mopakigbahin sa unsay ilang nakat-unan” (pahina x niini nga basahon).