Kapitulo 8
Ang Gahum sa Pulong
“Ang pulong sa Dios, ingon nga makaplagan diha sa mga kasulatan, sa mga pulong sa buhing mga propeta, ug sa personal nga pagpadayag, adunay gahum sa paglig-on sa mga Santos ug pagsangkap kanila uban sa Espiritu aron sila makasagubang sa dautan, makagunit og hugot ngadto sa maayo, ug makakaplag og hingpit nga kalipay dinhi niini nga kinabuhi.”
Gikan sa Kinabuhi ni Ezra Taft Benson
Sa dihang si Presidente Thomas S. Monson miserbisyo isip Ikaduhang Magtatambag ni Presidente Ezra Taft Benson diha sa Unang Kapangulohan, iyang na-obserbahan: “Si Presidente Benson dali nga makasabut og mga butang nga moabut sa iyang atensyon. Dili siya magkinahanglan nga maghunahuna og dugay sa usa ka butang sa dili pa siya makakuha sa inspirasyon sa Ginoo nga naggiya kaniya sa pagdesisyon. Uban sa mauswagong kahimtang karon sa Simbahan, sa tibuok kalibutan, ug sa daghan kaayo nga mga butang nga moabut sa atubangan sa Unang Kapangulohan, kini nga abilidad sa pagproseso sa impormasyon ug pagsabut sa labing importanting detalye mahinungdanon kaayo sa pagtuman sa administratiba nga buhat sa Simbahan.”1
Niadtong Abril 4,1986, kalabut sa iyang unang kinatibuk-ang komperensya isip Presidente sa Simbahan, gidumala ni Presidente Benson ang usa ka espesyal nga miting alang sa mga lider sa priesthood. Ang mga kaigsoonan nga nanambong nakakita sa iyang abilidad sa “pagproseso sa impormasyon ug pagsabut sa labing importanting detalye.” Sa iyang pagpamulong diha sa kongregasyon, mihisgot siya og daghan nga mga hagit nga giatubang sa mga Santos sa Ulahing mga Adlaw—sama sa tintasyon, mga pakigbisog sa pamilya, ug mga kalisud sa pagsunod sa mga sugo ug pagtuman sa mga katungdanan diha sa Simbahan—ug gipakigbahin niya unsay iyang nakita nga solusyon niini nga mga hagit.
Mihatag lamang si Presidente Benson og bahin sa iyang pakigpulong diha niana nga miting sa pagpangulo sa priesthood, busa gihangyo niya nga ang tibuok wali i-apil diha sa isyu sa komperensya sa magasin sa Simbahan. Kini nga kapitulo naglangkob sa tibuok niana nga pakigpulong. Bisan tuod si Presidente Benson midirekta sa iyang mga komentaryo ngadto sa mga lider sa priesthood, mitudlo siya og mga baruganan nga magamit sa tanang mga miyembro sa Simbahan.
Mga Pagtulun-an ni Ezra Taft Benson
1
Samtang kita nag-atubang sa dakong mga hagit sa atong panahon, kinahanglan kitang mogunit og hugot sa pulong sa Dios.
Minahal kong mga kaigsoonan, unsa ka nindot nga talan-awon kining pundok sa pagpangulo sa priesthood ug ang mahibalo pila ka liboan sa mga Santos ang inyong naserbisyohan ug unsa nga dedikasyon ug pagkamatinud-anon ang girepresentar kaninyong tanan. Walay laing grupo sa mga katawhan bisan asa sa kalibutan karon nga nagpundok alang sa samang matarung nga katuyoan sama niini nga grupo, ni adunay lain nga grupo—politikal, pang-relihiyon o militar—nga naghupot sa gahum nga inyong gihuptan dinhi karong gabhiona.
Nagpuyo kita sa adlaw nga may dakong hagit. Nagpuyo kita sa panahon nga gipamulong sa Ginoo sa dihang miingon siya, “Ang kalinaw pagakuhaon gikan sa yuta, ug ang yawa makabaton og gahum ibabaw sa iyang kaugalingon nga ginsakupan.” (D&P 1:35.) Kita nagpuyo niana nga adlaw nga nakita nang daan ni Juan nga Tigpadayag sa dihang “ang dragon nasuko batok sa babaye, ug miadto siya sa pagpakiggubat batok sa tanan nga uban pang mga kaliwat sa babaye, sa mga nanagbantay sa mga sugo sa Dios, ug naghupot sa panghimatuod mahitungod kang Jesus.” (Pin. 12:17.) Ang dragon mao si Satanas, ang babaye nagrepresentar sa Simbahan ni Jesukristo. Si Satanas nakiggubat batok sa mga miyembro sa Simbahan kinsa adunay mga pagpamatuod ug naningkamot sa pagsunod sa mga sugo. Ug samtang daghan sa atong mga miyembro ang nagpabiling matinud-anon ug malig-on, ang pipila nagduha-duha. Ang pipila nawala. Ang pipila nagtuman sa panagna ni Juan nga diha sa gubat batok ni Satanas, ang pipila sa mga Santos mabuntog. (Tan-awa sa Pin. 13:7.)
Si propeta Lehi nakakita usab sa atong adlaw diha sa iyang damgo sa dakong panan-awon sa kahoy sa kinabuhi. Iyang nakita nga daghang mga tawo ang nahisalaag nga nabuta sa mga gabon sa kangitngit, nga nagsimbolo sa mga tintasyon sa yawa. (Tan-awa sa 1 Ne. 12:17.) Iyang nakita ang pipila nga nangawala “sa gidili nga mga dalan,” ang uban nangalumos sa mga suba sa kahugaw, ug ang uban pa gyud nahisalaag sa “katingalahan nga mga dalan.” (1 Ne. 8:28, 32.) Kon atong mabasa ang nagkaylap nga tunglo sa mga druga, o mabasa ang kabahin sa makalaglag nga bul-og sa pornograpiya ug imoralidad, may usa ba kanato nga magduda nga kini ang gidili nga mga dalan ug mga suba sa kahugaw nga gihulagway ni Lehi?
Dili tanan niadtong nakita ni Lehi nga nangahanaw mga kalibutanon. Ang pipila miduol sa kahoy ug mikaon sa bunga. Sa lain nga pagkasulti, ang pipila sa mga miyembro sa Simbahan karon kauban niadtong mga kalag nga nakita ni Lehi nga nangawala.
Si Apostol Pablo nakakita usab sa atong adlaw. Gihulagway niya kini isip usa ka panahon nga ang mao nga mga butang sama sa panimpalas, pagkadili matinuoron, kabangis, dili natural nga pagbati, garbo, ug nagtinguha sa kahilayan modaghan. (Tan-awa sa 2 Tim. 3:1–7.) Nagpasidaan usab siya nga “mosamot pa sa pagkadautan ang mga tawo nga dautan ug ang mga tigpahisalaag, ang mga limbongan, ug ang mga gilimbongan.” (2 Tim. 3:13.)
Ang ingon nga makahahadlok nga mga panagna sa mga propeta sa karaan mao ang hinungdan sa dakong kahadlok ug pagkawala sa kadasig kon kadtong mao nga mga propeta wala, sa samang higayon, magtanyag og solusyon. Sa ilang dinasig nga tambag atong makaplagan ang tubag sa espiritwal nga krisis sa atong panahon.
Sa iyang damgo, si Lehi nakakita og gunitanang puthaw nga mipadulong ngadto sa gabon sa kangitngit. Nakita niya nga kon ang mga tawo hugot nga mogunit ngadto niana nga gunitanan, makalikay sila sa mga suba sa kahugaw, makapalayo sa gidili nga mga dalan, mahunong sa pagkahisalaag sa katingalahang mga dalan nga nagpadulong ngadto sa kalaglagan. Sa kadugayan ang iyang anak nga si Nephi sa tataw mipasabut sa simbolismo sa gunitanang puthaw. Sa dihang nangutana si Laman ug si Lemuel, “Unsa ang gipasabut sa gunitanan nga puthaw?” Mitubag si Nephi, “Mao kadto ang pulong sa Dios; ug [timan-i kini nga saad] si kinsa kadto nga mopatalinghug sa pulong sa Dios, ug hugot nga mogunit niini, dili gayud sila malaglag; ni ang mga pagtintal ug ang nagdilaab nga mga panâ sa kaaway makabuntog kanila ngadto sa pagkabuta, sa pagdala kanila sa kalaglagan.” (1 Ne. 15:23–24; mga italic gidugang.) Dili lamang nga ang pulong sa Dios naggiya kanato ngadto sa bunga nga madanihon labaw sa tanan, apan diha sa pulong sa Dios ug pinaagi niini atong makaplagan ang gahum sa pagsagubang sa tintasyon, ang gahum sa pagsumpo sa buhat ni Satanas ug sa iyang mga sulugoon.
Ang mensahe ni Pablo sama sa kang Lehi. Human ipakita ang grabe nga pagkadautan sa umaabut nga panahon—umaabut alang kaniya, apan karon alang kanato!—miingon siya niini ngadto ni Timoteo: “Apan ikaw magpadayon ka diha sa mga butang nga imong nahikat-onan. …
“Sukad sa imong pagkabata ikaw nakasabut na sa balaan nga kasulatan, nga makagagahum sa pagtudlo kanimo ngadto sa kaluwasan.” (2 Tim. 3:14–15; mga italic gidugang.)
Minahal kong mga kaigsoonan, kini tubag ngadto sa dakong hagit sa atong panahon. Ang pulong sa Dios, ingon nga makaplagan diha sa mga kasulatan, diha sa mga pulong sa buhing mga propeta, ug diha sa personal nga pagpadayag, adunay gahum sa paglig-on sa mga Santos ug pagsangkap kanila uban sa Espiritu aron sila makasagubang sa dautan, makagunit og hugot ngadto sa maayo, ug makakaplag og kalipay dinhi niini nga kinabuhi.2
Si Presidente Ezra Taft Benson kanunay nga mipamatuod sa gahum sa pulong sa Dios.
2
Kon ang indibidwal nga mga miyembro ug mga pamilya makugihong mobasa sa mga kasulatan, ang uban nga mga bahin sa kalihokan sa Simbahan diha-diha moabut.
Karon nganha kaninyo nga mga lider sa priesthood kami moingon, hinumdumi ang propetikanhong tambag ni Lehi ug Pablo ug uban nga sama kanila. Diha niana nga tambag inyong makita ang solusyon sa mga hagit nga inyong giatubang sa pagpabilin sa inyong mga panon nga luwas gikan sa “mga lobo nga manonukob” nga naglibut kanila. (Tan-awa sa Mat. 7:15; Mga Buhat 20:29.) Nahibalo kami nga kamo usab adunay dagko nga mga kabalaka alang sa mga miyembro sa inyong mga ward ug mga stake ug naghatag og dakong oras ug paningkamot alang kanila. Adunay daghan nga among gihangyo kaninyo kinsa napili alang sa pagpangulo. Kami nagbutang og daghang palas-anon diha sa inyong mga abaga. Gihangyo kamo sa pagpadagan sa mga programa sa Simbahan, pag-interbyu ug pagtambag sa mga miyembro, pagbantay nga ang pinansyal nga mga kalihokan sa mga stake ug mga ward husto ang paggamit, pagdumala sa mga proyekto sa welfare, pagtukod og mga building, ug pag-apil sa ubang nagkinahanglan og oras nga mga kalihokan.
Samtang wala niadtong mga kalihokan nga mahimong ibaliwala ug kalimtan, kini dili ang labing importanting butang nga inyong mabuhat alang niadtong inyong giserbisyohan. Sa bag-ohay nga mga katuigan, gibalik-balik namo kamo pagtambag nga piho nga mga kalihokan nagdala og mas dakong espiritwal nga kaayohan kay sa uban. Ingon ka sayo sa 1970, si Presidente Harold B. Lee misulti sa mga regional reprensentative:
“Nakumbinsir kita nga ang atong mga miyembro dako og tinguha alang sa ebanghelyo, lunsay, uban ang buhong nga mga kamatuoran ug mga pasabut niini. … Aduna niadto kinsa ingon og nakalimot nga ang labing gamhanang mga hinagiban nga gihatag sa Ginoo kanato batok sa tanan nga dautan mao ang Iyang kaugalingong mga pamahayag, ang yano, sayon nga mga doktrina sa kaluwasan ingon nga makaplagan diha sa mga kasulatan. (Sa Regional Representatives’ Seminar, ika-1 sa Okt. 1970, p. 6.)
Dagko nga mga panalangin ang moabut “kon ang indibidwal nga mga miyembro ug mga pamilya makugihong mobasa sa mga kasulatan.”
Diha sa mensahe sa Unang Kapangulohan niadtong 1976, si Presidente [Spencer W. Kimball] miingon:
“Kombinsido ako nga kada usa kanato, sa ubang panahon sa atong mga kinabuhi, kinahanglang gayud nga modiskobre sa mga kasulatan alang sa atong kaugalingon—ug dili kay modiskubre niini sa makausa lamang, apan modiskobre niini og balik-balik. …
“Ang Ginoo wala magtiaw kanato sa dihang siya naghatag kanato niining mga butanga, kay ‘kaniya kinsa gikahatagan og daghan, pagapangayoan og daghan.’ (Lucas 12:48.) Ang pagkaaduna niining mga butanga nagpasabut og responsibilidad alang kanila. Kinahanglan gayud kitang magtuon sa mga kasulatan sumala sa sugo sa Ginoo (tan-awa sa 3 Ne. 23:1–5); ug kinahanglan gayud nga tugutan nato kining modumala sa atong mga kinabuhi.” (Ensign, Sept. 1976, pp. 4–5.)
Niadtong Abril 1982, si Elder Bruce R. McConkie namulong ngadto sa mga regional representative mahitungod sa prayoridad sa mga kasulatan nga kinahanglan anaa sa atong mga paghago. Miingon siya: “Kita hilabihan ka nalinga sa mga programa ug estatistika ug palakat, sa mga kabtangan, mga yuta ug mga bahandi, ug sa pagtuman sa mga tumong nga mopakita sa kahingpit sa atong trabaho, nga atong ‘nakalimtan ang mas importanting mga butang sa balaod.’ … Bisan unsa ka makamao ang mga tawo sa administratibang mga butang; bisan unsa ka maayong mosulti nila sa pagpahayag sa ilang mga panan-aw; bisan unsa nila ka maalamon tingali sa kalibutanong mga butang—sila dili pagatugutan sa malumo nga mga hagawhaw sa Espiritu nga maangkon unta nila gawas kon sila mobayad sa bili sa pagtuon, pagpamalandong, ug pag-ampo mahitungod sa mga kasulatan.” (Sa Regional Representatives’ Seminar, ika-2 sa Abr. 1982, pp. 1–2.)
Nianang sama nga adlaw, si Elder Boyd K. Packer namulong ngadto sa mga presidente sa stake ug mga regional representative. Miingon siya: “Ang mga building ug mga badyet, ug mga report ug mga programa ug mga pamaagi importante kaayo. Apan, kon kini lang, wala dad-a niini kanang importanting espiritwal nga pag-amuma ug dili matuman unsay gihatag kanato sa Ginoo nga buhaton. … Ang hustong mga butang, kadtong may tinuod nga espiritwal nga pag-amuma, gisentro diha sa mga kasulatan. (Sa Meeting with Stake Presidents and Regional Representatives, ika-2 sa Abr. 1982, pp. 1–2.)
Idugang ko ang akong tingog ngadto niining maalamon ug dinasig nga mga kaigsoonan ug moingon nganha kaninyo nga usa sa labing importanting mga butang nga inyong mahimo isip mga lider sa priesthood mao ang makugihong pagbasa sa mga kasulatan. Pagsiksik niini nga makugihon. Pagbusog sa mga pulong ni Kristo.Pagkat-on sa doktrina. Pagpakabatid sa mga baruganan nga makaplagan diha niana. Adunay pipila pa ka mga paninguha nga modala og mas dakong mga kaayohan sa inyong mga calling. Adunay pipila pa ka mga paagi sa pag-angkon og mas dakong inspirasyon samtang kamo nagserbisyo.
Apan kon kana lamang, bililhon man kini, dili pa igo. Kinahanglan usab nga han-ayon ninyo ang inyong mga paningkamot ug ang inyong mga kalihokan ngadto sa makapadasig nga makahuluganong pagtuon sa kasulatan taliwala sa mga miyembro sa Simbahan. Kasagaran naggahin kita og dakong paningkamot sa pagpadaghan sa mga matang sa kalihokan sa atong mga stake. Nagtrabaho kita og maayo sa pagpasaka sa mga porsyento niadtong nanambong sa mga sakrament miting. Naghago kita sa pagkuha og mas taas nga porsyento sa atong batan-ong mga lalaki nga nagmisyon. Naninguha kita sa pagpausbaw sa gidaghanon niadtong magminyo sa templo. Ang tanan niini dalayegon nga mga paningkamot ug importante sa pagtubo sa gingharian. Apan kon ang indibidwal nga mga miyembro ug mga pamilya makugihong mobasa sa mga kasulatan sa kasagaran ug sa kanunay, kining uban nga mga bahin sa kalihokan diha-diha moabut. Ang mga pagpamatuod motubo. Ang pasalig malig-on. Ang mga pamilya malig-on. Ang personal nga pagpadayag modagayday.3
3
Samtang kita nagtuon sa pulong sa Dios, atong madawat ang paggiya sa atong inadlaw nga mga kinabuhi, pag-ayo sa kalag, ug gahum sa paglikay sa paglingla ug pagsagubang sa tintasyon.
Si Propeta Joseph Smith miingon nga “ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon.” (Basahon ni Mormon, Pasiuna, mga italic gidugang.) Dili ba kana mao ang atong gusto alang sa mga miyembro sa atong mga ward ug mga stake? Dili ba kita matinguhaon nga sila mas mopaduol sa Dios? Nan awhaga sila sa matag paagi nga mahimo nga makugihong mobasa niining katingalahan nga saksi ni Kristo sa ulahing mga adlaw.
Kinahanglan gayud nga kamo motabang sa mga Santos nga makahibalo nga ang pagtuon ug pagsiksik sa mga kasulatan dili kabug-at nga gipapas-an diha kanila sa Ginoo, apan usa ka katingalahan nga panalangin ug oportunidad. Timan-i unsay gisulti sa Ginoo Mismo mahitungod sa mga kaayohan sa pagtuon sa Iyang pulong. Ngadto sa halangdong propeta-lider nga si Josue, siya miingon:
“Ayaw pag-ibulag kining basahon sa kasugoan sa imong ba-ba; hinonoa magpalandung ka niana sa adlaw ug sa gabii, aron himatngonan mo sa pagbuhat sumala sa tanan nga gisulat diha kay sa ingon niana ikaw magmauswagon sa imong panaw, ug unya makab-ot mo ang kauswagan.” (Jos. 1:8 mga italic gidugang.)
Ang Ginoo wala magsaad kang Josue og materyal nga katigayunan ug dungog, apan ang iyang kinabuhi mouswag diha sa pagkamatarung ug nga siya makabaton og kalampusan diha niana nga labing importante sa kinabuhi, nga mao ang pagpangita sa tinuod nga hingpit nga kalipay. (Tan-awa sa 2 Ne. 2:25.)
Kamo ba adunay mga miyembro sa inyong mga stake kansang mga kinabuhi naguba sa sala o trahedya, kinsa naglisud og maayo ug walay paglaum? Nangandoy ba kamo og pipila ka paagi sa pag-adto kanila ug tambalan ang ilang mga samad, hupayon ang ilang nasamok nga mga kalag? Si propeta Jacob nagtanyag gayud niana uban niining talagsaong saad: “Sila mianhi dinhi aron sa pagpamati sa makapahimuot nga pulong sa Dios, oo, ang pulong nga makapaalim sa samaran nga kalag.” (Jacob 2:8; mga italic gidugang.)
Karon ang kalibutan puno sa makabihag ug makadani nga mga ideya nga makagiya bisan sa labing maayo sa atong mga miyembro ngadto sa sayop ug paglingla. Ang mga estudyante sa mga unibersidad usahay puno kaayo sa mga doktrina sa kalibutan nga sila nagsugod sa pagpangutana sa mga doktrina sa ebanghelyo. Unsaon ninyo isip usa ka lider sa priesthood sa pagtabang og lig-on sa inyong mga miyembro batok sa maong malimbungon nga mga pagtulun-an? Ang Manluluwas mihatag sa tubag diha sa Iyang makahuluganong pakigpulong didto sa Bungtod sa mga Oliba sa dihang Siya misaad, “Ug kinsa kadto nga magmahal sa akong pulong, dili malingla.” (JS—M 1:37; mga italic gidugang.)
Ang mga kasulatan puno sa samang mga saad mahitungod sa bili sa pulong. Kamo aduna bay mga miyembro kinsa nangandoy alang sa direksyon ug paggiya sa ilang mga kinabuhi? Ang Salmo nagsulti kanato, “Ang imong mga pulong maoy lamparahan sa akong mga tiil, ug kahayag sa akong mga alagianan” (Sal. 119:105), ug si Nephi nagsaad nga ang pagbusog diha sa mga pulong ni Kristo “magtug-an kaninyo sa tanan nga mga butang nga inyong buhaton” (2 Ne. 32:3.)
Aduna bay mga sakop sa inyong panon kinsa nalubong sa sala ug nagkinahanglan nga motindog sa ilang mga kaugalingon og balik? Ang saad ni Helaman alang kanila: “Oo, kita makakita nga bisan kinsa ang motinguha mahimo nga mosagop diha sa pulong sa Dios, diin buhi og gamhanan, nga mobuak sa kinahiladman sa tanan nga mga kaigmat ug sa mga laang ug sa mga pagpanghaylo sa yawa.” (Hel. 3:29.)
Ang kalampusan sa pagkamatarung, ang gahum nga makalikay sa pagpanglingla ug ang pagsagubang sa tintasyon, ang giya sa matag adlaw sa atong mga kinabuhi, ang pag-ayo sa kalag—kini mao lamang ang pipila sa mga saad sa Ginoo nga ihatag niadtong kinsa modawat sa Iyang pulong. Ang Ginoo nagsaad ba ug dili motuman? Sa pagkatinuod kon Siya mosulti kanato nga kining mga butanga moabut kanato kon kita mohupot diha sa Iyang pulong, niana ang mga panalangin maato. Ug kon kita dili mohimo, niana ang mga panalangin mahimong mawala. Bisan unsa kita ka kugihan sa ubang bahin, ang piho nga mga panalangin makit-an lamang diha sa mga kasulatan, diha lamang sa pagbaton sa pulong sa Ginoo ug paggunit og maayo niini samtang kita nagpadulong sa gabon sa kangitngit ngadto sa kahoy sa kinabuhi.4
4
Ang pulong sa Ginoo usa ka bililhong gasa, ug kinahanglan gayud nga dili kini nato ibaliwala.
Ug kon kita mobaliwala sa unsay gihatag sa Ginoo kanato, mahimong mawala kanato ang mao gayud nga gahum ug panalangin nga atong gipangita. Sa usa ka ligdong nga pasidaan ngadto sa unang mga Santos, ang Ginoo miingon niini kabahin sa Basahon ni Mormon: “Ang inyong mga hunahuna sa mga panahon nga nangagi nangitngit tungod sa walay pagtuo, ug tungod kay kamo mibaliwala sa mga butang nga kamo nakadawat—
“Kansang garbo ug walay pagtuo midala sa tibuok simbahan ubos sa paghukom.
“Ug kini nga panghimaraut anaa diha sa mga anak sa Zion, gani sa tanan.
“Ug sila magpabilin ubos niini nga panghimaraut hangtud nga sila maghinulsol ug mahinumdom sa bag-o nga pakigsaad, gani ang Basahon ni Mormon.” (D&P 84:54–57.)
O, akong mga kaigsoonan, dili nato ibaliwala ang mahinungdanon nga mga butang nga atong nadawat gikan sa kamot sa Ginoo. Ang Iyang pulong maoy usa sa labing bililhon nga mga gasa nga Iyang gihatag kanato. Giawhag ko kamo sa pagpasalig og usab ngadto sa pagtuon sa mga kasulatan. Makugihong mobasa kada adlaw aron makabaton kamo og gahum sa Espiritu nga motabang kaninyo diha sa inyong mga calling. Basaha kini sa inyong mga pamilya ug tudlo-i ang inyong mga anak sa paghigugma ug pagmahal niini. Dayon sa mainampoon nga paagi ug diha sa pakigtambag sa uban, siksika ang matag paagi nga mahimo sa pag-awhag sa mga miyembro sa Simbahan sa pagsunod sa inyong ehemplo. Kon kamo mohimo sa mao, inyong makita, sama ni Alma, nga “ang pulong [adunay] dakong kalagmitan sa pagdala sa mga katawhan sa pagbuhat niana nga [diin] makiangayon —oo, kini [adunay] labaw nga gamhanan nga sangputanan diha sa mga hunahuna sa mga katawhan kay sa espada, o sa bisan unsa pa, diin [na]hitabo ngadto kanila.” (Alma 31:5.)
Sama ni Alma, ako moingon kaninyo, “Kinahanglan nga [kamo] mosulay sa hiyas sa pulong sa Dios” (Alma 31:5).5
Mga Sugyot alang sa Pagtuon ug Pagtudlo
Mga Pangutana
-
Hunahunaa unsay gisulti ni Presidente Benson nga mao “ang tubag ngadto sa dakong hagit sa atong panahon” (seksyon 1). Sa unsa nga mga paagi kini nga tubag makatabang kanato sa pag-atubang sa mga hagit nga atong giatubang?
-
Ribyuha ang mga resulta nga gisulti ni Presidente Benson nga moabut “kon ang indibidwal nga mga miyembro ug mga pamilya makugihong mobasa sa mga kasulatan sa kasagaran ug sa kanunay” (seksyon 2). Ngano sa inyong hunahuna ang pagtuon sa kasulatan naggiya ngadto sa maong mga resulta?
-
Misulti si Presidente Benson nga ang pagtuon sa kasulatan usa ka panalangin, dili kabug-at (tan-awa sa seksyon 3). Unsa nga mga panalangin ang miabut kaninyo ug sa inyong pamilya pinaagi sa pagtuon sa kasulatan? Unsa nga tambag ang mahimo ninyong ihatag ngadto sa usa ka tawo kinsa mibati nga ang pagtuon sa kasulatan usa ka palas-anon?
-
Unsa ang pipila ka mga kakuyaw sa pagbaliwala sa pulong sa Dios? (Tan-awa sa seksyon 4.) Unsa ang pipila ka mga butang nga atong mahimo sa paghatag sa pulong sa Dios og mas dakong atensyon?
May Kalabutan nga mga Kasulatan
Mga Buhat 17:11; 2 Timoteo 3:16–17; 1 Nephi 19:23–24; Alma 32:21–43; D&P 18:33–36; 21:4–6; 68:1–4
Tabang sa Pagtuon
“Daghan ang nakabantay nga ang labing maayo nga takna sa pagtuon mao ang buntag human sa gabiing pagpahulay. … Ang uban gusto nga magtuon diha sa hilom nga mga oras human sa trabaho ug ang mga kasamok sa adlaw natapos. … Tingali unsay mas importante kay sa oras sa adlaw mao nga ang usa ka regular nga takna igahin alang sa pagtuon” (Howard W. Hunter, “Reading the Scriptures,” Ensign, Nob. 1979, 64).