Kapitulo 9

Ang Basahon ni Mormon—Sukaranang Bato sa Atong Tinuohan

“Wala bay usa ka butang sulod sa atong mga kasingkasing nga nangandoy nga mas maduol ngadto sa Dios? … Kon mao, nan ang Basahon ni Mormon motabang kanato sa pagbuhat niini kay sa uban pang basahon.”

Gikan sa Kinabuhi ni Ezra Taft Benson

Niadtong Enero 5, 1986, si Presidente Ezra Taft Benson midumala og komperensya sa stake sa Annandale, Virginia, —ang iyang unang komperensya sa stake isip Presidente sa Simbahan. Ang mga Santos sa Ulahing mga Adlaw nga nanambong “tataw nga natandog” samtang sila naminaw kaniya nga namulong. Sa iyang wali, “mipamatuod siya sa gahum sa Basahon ni Mormon sa pag-usab sa mga kinabuhi ug sa paggiya sa mga katawhan ngadto ni Kristo.” Mihatag siya og usa ka gamhanang hagit [sa] pagtuon niini nga basahon sa kasulatan.”¹

Kini nga mensahe dili bag-o sa pagpangalagad ni Presidente Benson. Isip sakop sa Korum sa Napulog Duha ka mga Apostoles, kanunay siyang nag-awhag sa mga Santos sa Ulahing mga Adlaw sa pagtuon sa Basahon ni Mormon ug sa pagsunod sa mga pagtulun-an niini.² Apan isip Presidente sa Simbahan, nadasig siya sa paghatag pa og gibug-aton sa mensahe. Miingon siya: “Ang Ginoo midasig sa Iyang sulugoon nga si Lorenzo Snow sa paghatag pag-usab og gibug-aton sa baruganan sa ikapulo aron sa pagtubos sa Simbahan gikan sa pinansyal nga pagkaulipon. … Karon, sa atong panahon, ang Ginoo nagpadayag sa panginahanglan sa paghatag pag-usab og gibug-aton sa Basahon ni Mormon.”³ Si Presidente Benson mipamatuod kabahin sa Basahon ni Mormon bisan asa siya moadto: sa mga miting sa misyonaryo, mga komperensya sa stake ug rehiyon, kinatibuk-ang mga komperensya, ug mga miting sa mga General Authority.⁴

Diha sa iyang unang pakigpulong sa kinatibuk-ang komperensya isip Presidente sa Simbahan, si Presidente Benson, mipakigbahin og usa ka rason alang sa pagkadinalian niini nga mensahe. “Hangtud kita mobasa sa Basahon ni Mormon ug mohatag og pagtagad sa mga pagtulun-an niini,” mipahimangno siya, “ang Ginoo nagpahayag diha sa seksyon 84 sa Doktrina ug mga Pakigsaad nga ang tibuok Simbahan anaa ubos sa panghimaraut. ‘Ug kini nga panghimaraut anaa diha sa mga anak sa Zion, gani sa tanan’ [D&P 84:56]. Ang Ginoo nagpadayon: ‘Ug sila magpabilin ubos niini nga panghimaraut hangtud nga sila maghinulsol ug mahinumdom sa bag-o nga pakigsaad, gani ang Basahon ni Mormon ug ang kaniadto nga mga sugo diin Ako mihatag ngadto kanila, dili lamang sa pag-ingon, apan sa pagbuhat sumala ngadto niana nga Ako misulat’ [D&P 84:57].”⁵

Ang mosunod nga mga kinutlo, tanan gikan sa mga wali ni Presidente Benson nga gipamulong isip Presidente sa Simbahan, naghatag og sanglitanan sa iyang mga pahimangno ug mga saad kalabut sa Basahon ni Mormon:

“Karon dili lamang kita kinahanglan nga mosulti pa og dugang mahitungod sa Basahon ni Mormon, apan kinahanglan kita nga mobuhat pa og dugang kabahin niini. Ngano? Ang Ginoo mitubag: ‘Nga sila unta makadala og bunga nga angay alang sa gingharian sa ilang Amahan; kon dili adunay magpabilin nga hampak ug paghukom nga ibu-bu diha sa mga anak sa Zion’ [D&P 84:58]. Atong gibati kana nga hampak ug paghukom!

“… Ang Basahon ni Mormon wala sukad, ni kini nahitabo, nga sentro sa atong personal nga pagtuon, pagtudlo sa pamilya, pagsangyaw, ug misyonaryong buhat. Kabahin niini kita kinahanglan gayud nga maghinulsol.”⁶

“Wala nato magamit ang Basahon ni Mormon ingon nga kita gikinahanglan. Ang atong mga panimalay dili malig-on hangtud kita mogamit niini sa pagdala sa atong mga anak ngadto ni Kristo. Ang atong mga pamilya mahimong matakdan sa kalibutanong mga hilig ug mga pagtulun-an hangtud kita mahibalo unsaon sa paggamit sa basahon aron sa pagpakita ug pagkigbatok sa mga bakak. … ang atong mga misyonaryo dili ma-epektibo hangtud sila [magtudlo] uban niini. Ang sosyal, moral, sa kultura o sa edukasyon nga mga kinabig dili mabuhi ubos sa pagsulay sa ilang hugot nga pagtuo hangtud dili sila mogamot sa kahingpitan sa ebanghelyo nga gilangkob diha sa Basahon ni Mormon. Ang atong mga klase sa Simbahan dili sama ka puno sa Espiritu hangtud kita mopataas niini isip usa ka sumbanan.”⁷

“Panalanginan ko kamo og nagtubo nga pagsabut sa Basahon ni Mormon. Mosaad ako kaninyo nga gikan niini nga higayon hangtud sa unahan, kon kita kanunay nga mobasa gikan sa mga pahina niini ug mosunod sa mga lagda niini, ang Dios mobu-bu og panalangin diha sa matag anak sa Zion ug sa Simbahan nga wala pa sukad makita —ug kita mohangyo ngadto sa Ginoo nga Siya mosugod sa pagkuha sa panghimaraut—ang hampak ug paghukom. Kabahin niini ako ligdong nga mosaksi.”⁸

“Ako hingpit nga wala mahibalo ngano nga ang Dios mipatunhay sa akong kinabuhi hangtud niini nga edad, apan kini ako nahibalo: Nga sa karon nga oras nagpadayag Siya kanako sa hingpit nga panginahanglan alang kanato sa pagpauswag sa Basahon ni Mormon karon sa katingalahan nga paagi. Kinahanglan gayud nga kamo motabang niini nga palas-anon ug niini nga panalangin nga Iyang gibutang diha sa tibuok Simbahan, gani sa tanang anak sa Zion.

“Si Moises wala gayud makasulod sa yuta sa saad. Si Joseph Smith wala gayud makakita sa Zion nga natubos. Ang pipila kanato mahimong dili mabuhi og dugay igo nga makakita sa panahon nga ang Basahon ni Mormon mopuno sa yuta ug sa panahon nga ang Ginoo mokuha sa Iyang panghimaraut. (Tan-awa sa D&P 84:54–58.)Apan, itugot sa Dios, buot kong igahin ang nahibilin kong mga adlaw diha nianang mahimayaong paningkamot.”⁹

Mga Pagtulun-an ni Ezra Taft Benson

Ang Basahon ni Mormon mao ang sukaranang bato sa atong tinuohan.

Unsa kaimportante ang Basahon ni Mormon? Si Joseph Smith mitawag niini og “ang sukaranang bato sa atong tinuohan.” (History of the Church, 4:461.) “Kuhaa ang Basahon ni Mormon ug ang mga pagpadayag,” miingon siya, “ug hain ang atong tinuohan? Kita walay tinuohan.” (History of the Church, 2:52.)¹⁰

Ang sukaranan nga bato mao ang tunga-tunga nga bato sa usa ka arko. Kini ang nagpugong sa ubang mga bato sa lugar niini, ug kon tangtangon, ang arko malumpag.

… Sama nga ang arko malumpag kon tang-tangon ang sukaranang bato, mao usab ang tanan diha sa Simbahan mobarug o mapukan uban sa kamatuoran sa Basahon ni Mormon. Ang mga kaaway sa Simbahan klarong nakasabut kaayo niini. Mao kini nganong sila naningkamot pag-ayo sa pagpawala sa kamatuoran sa Basahon ni Mormon, kay kon kini mapamatud-an nga dili tinuod, malakip usab si Propetang Joseph Smith. Mao usab ang atong pag-angkon sa mga yawe sa priesthood, ug sa pagpadayag, ug sa pagpahiuli sa Simbahan. Apan sa sama nga paagi, kon ang Basahon ni Mormon tinuod—ug minilyon karon ang nagpamatuod nga sila adunay saksi sa Espiritu nga kini gayud tinuod—nan ang tawo kinahanglan nga modawat sa mga pag-angkon sa Pagpahiuli ug sa tanan nga nag-uban niini.¹¹

Tingali walay lain nga nagpamatuod nga mas klaro sa importansya niini nga basahon sa kasulatan kay sa unsa ang gisulti sa Ginoo Mismo mahitungod niini.

Sa Iyang kaugalingong ba-ba Siya mipamatuod (1) nga kini tinuod (D&P 17:6), (2) nga kini naglangkob sa kamatuoran ug sa Iyang mga pulong (D&P 19:26), (3) nga kini gihubad pinaagi sa gahum sa kahitas-an (D&P 20:8), (4) nga kini naglangkob sa kahingpitan sa ebanghelyo ni Jesukristo (D&P 20:9; 42:12), (5) nga kini gihatag pinaagi sa pagpadayag ug gisiguro pinaagi sa pagpangalagad sa mga anghel (D&P 20:10), (6) nga kini naghatag og ebidensya nga ang balaang mga kasulatan tinuod (D&P 20:11), ug (7) nga niadtong kinsa modawat nga may hugot nga pagtuo makadawat og kinabuhi nga dayon (D&P 20:14).¹²

Ang Basahon ni Mormon nagpamatuod ni Jesukristo ug nagdala kanato nga mas maduol sa Dios.

Ang dako kaayo nga misyon sa Basahon ni Mormon, ingon nga narekord diha sa ulohan nga pahina, mao “ang pagpamatuod ngadto sa Judeo ug sa Hentil nga si Jesus mao ang Kristo, ang Dios sa kahangturan, nagpaila sa iyang kaugalingon ngadto sa tanan nga mga nasud.”

Ang matinuoron nga tigpangita sa kamatuoran makaangkon og pagpamatuod nga si Jesus mao ang Kristo samtang siya magmainampoon sa pagpamalandong sa dinasig nga mga pulong sa Basahon ni Mormon.¹³

Ato bang nahinumduman ang bag-o nga pakigsaad, gani ang Basahon ni Mormon? Sa Biblia kita adunay Daang Tugon ug Bag-ong Tugon. Ang pulong nga tugon mao ang Iningles nga hubad sa pulong nga Griyego nga mahimong hubaron usab nga pakigsaad. Mao ba kini ang gipasabut sa Ginoo sa dihang Iyang gitawag ang Basahon ni Mormon nga “bag-o nga pakigsaad”? Kini sa tinuoray mao ang lain nga tugon o saksi ni Jesus. Kini mao ang usa sa mga rason nganong bag-ohay lamang natong gidugang ang mga pulong “Lain nga Tugon ni Jesukristo” ngadto sa ulohan sa Basahon ni Mormon. …

Ang Basahon ni Mormon mao ang sukaranang bato sa atong pagsaksi kang Jesukristo, kinsa Siya Mismo mao ang bato sa pamag-ang sa tanan nato nga buhaton. Kini nagsaksi sa Iyang pagkatinuod uban sa gahum ug katataw. …Dili sama sa Biblia, nga miagi og mga henerasyon nga mga tigkopya [copyists], mga tighubad, ug malimbungon nga mga relihiyonista kinsa miusab sa teksto, ang Basahon ni Mormon naggikan sa tigsulat ngadto sa tigbasa sa usa lang ka dinasig nga paagi sa paghubad. Busa, ang pagpamatuod sa Agalon klaro, lunsay, ug puno sa gahum. Apan kini maghimo og mas daghan pa. Kadaghanan karon sa Kristiyanong kalibutan nagsalikway sa kabalaan sa Manluluwas. Ilang gikwestyon ang Iyang milagroso nga pagkatawo, Iyang hingpit nga kinabuhi, ug ang katinuod sa Iyang mahimayaong pagkabanhaw. Ang Basahon ni Mormon nagtudlo sa yano ug dili sayop nga mga pulong kabahin sa kamatuoran sa tanan niadtong mga butanga. Kini naghatag usab sa labing kompleto nga pagpasabut sa doktrina sa Pag-ula. Sa tinuoray, kining balaanong dinasig nga basahon mao ang sukaranang bato sa pagpamatuod ngadto sa kalibutan nga si Jesus mao ang Kristo.¹⁴

Diha sa Basahon ni Mormon, ang pagpamatuod ni Jesukristo “klaro, lunsay, ug puno sa gahum.”

Si Propeta Joseph Smith … miingon “Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranang bato sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon.” [History of the Church, 4:461].… Wala bay usa ka butang sulod sa atong mga kasingkasing nga nangandoy nga mas maduol ngadto sa Dios, mas mahisama Kaniya sa atong matag adlaw nga pagpakabuhi, mobati sa Iyang presensya nga uban kanato kanunay? Kon mao, ang Basahon ni Mormon motabang kanato sa pagbuhat niini kay sa uban pang basahon. …

Ang atong minahal nga igsoon, si Presidente Marion G. Romney, … kinsa nahibalo mismo sa gahum nga anaa niini nga basahon, mipamatuod sa mga panalangin nga moabut sa mga kinabuhi niadtong kinsa mobasa ug motuon sa Basahon ni Mormon. Siya miingon:

“Akong gibati ang kasigurado nga kon, sa atong mga panimalay, ang mga ginikanan mainampoon ug kanunay nga mobasa gikan sa Basahon ni Mormon, silang duha ug kauban sa ilang mga anak, ang diwa nianang gamhanan nga basahon moabut aron mopuno sa atong mga panimalay ug sa tanan nga nagpuyo niana. Ang diwa sa balaan nga pagtahud motubo; pagtinahuray ug ang konsiderasyon sa usag usa molambo. Ang diwa sa panagbingkil mopalayo. Ang mga ginikanan motambag sa ilang mga anak uban sa mas dakong gugma ug kaalam. Ang mga anak mas mosanong ug manunuton sa tambag sa ilang mga ginikanan. Ang pagkamatarung modaghan. Ang hugot nga pagtuo, paglaum, ug gugma nga putli—ang tiunay nga gugma ni Kristo—maanaa sa atong mga panimalay ug mga kinabuhi, magdala diha sa ilang pagmata og kalinaw, ug hingpit nga kalipay, ug kamaya” (Ensign, Mayo 1980, p. 67).

Kini nga mga saad—nagtubo nga gugma ug panagsinabtanay diha sa panimalay, mas dakong pagtahud tali sa ginikanan ug anak, paglambo sa pagka-espirituhanon ug pagkamatarung—dili kawang nga mga saad, apan sama gayud sa gipasabut ni Propeta Joseph Smith sa dihang siya miingon nga ang Basahon ni Mormon motabang kanato nga mas maduol ngadto sa Dios.¹⁵

Ang Basahon ni Mormon nagtudlo og tinuod nga doktrina, nagbuntog sa sayop nga doktrina, ug nagbutyag sa mga kaaway ni Kristo.

Ang Ginoo Mismo nagpahayag nga ang Bashon ni Mormon naglangkob sa “kahingpitan sa ebanghelyo ni Jesukristo” (D&P 20:9). Kana wala magpasabut nga kini naglangkob sa tanang pagtulun-an, sa tanang doktrina nga sukad gipadayag. Hinoon, kini nagpasabut nga diha sa Basahon ni Mormon atong makit-an ang kahingpitan niadtong mga doktrina nga gikinahanglan sa atong kaluwasan. Ug kini gitudlo sa yano ug sayon nga paagi aron bisan ang mga bata makakat-on sa mga pamaagi sa kaluwasan ug kahimayaan. Ang Basahon ni Mormon nagtanyag og daghan kaayo nga makapalapad sa atong pagsabut sa mga doktrina sa kaluwasan. Kon wala kini, kadaghanan sa unsay gitudlo sa ubang mga kasulatan dili hapit mahimong yano ug bililhon.¹⁶

Kalabut sa pagsangyaw sa ebanghelyo, ang Basahon ni Mormon naglangkob sa labing klaro, labing mubo, ug kompleto nga pagpasabut. Walay lain nga rekord nga ikakomparar niini. Sa unsa nga rekord kamo makakuha sa ingon ka hingpit nga pagsabut sa kinaiyahan sa Pagkapukan, sa kinaiyahan sa pisikal ug espirituhanon nga kamatayon, sa doktrina sa Pag-ula, sa doktrina sa kaangayan ug kalooy ingon nga kini may kalabutan sa Pag-ula, ug ang mga baruganan ug mga ordinansa sa ebanghelyo?¹⁷

Ang Basahon ni Mormon … nagmatuod ug nagtino sa Biblia. Kini nagkuha sa mga babag, gipahiuli niini ang daghang yano ug bililhon nga mga butang. Kami mopamatuod nga kon gamiton og dungan, ang Biblia ug ang Basahon ni Mormon mobuntog sa sayop nga mga doktrina, mohunong og mga panagbingkil, ug mopahiluna og kalinaw. (Tan-awa sa 2 Ne. 3:12.)¹⁸

Kita … kinahanglan nga mas makahibalo sa Basahon ni Mormon kay sa uban nga basahon. Dili lamang kita kinahanglan nga mahibalo unsay kasaysayan ug makapalambo sa pagtuo nga mga istorya ang gilangkob niini, apan kinahanglan kita nga makasabut sa mga pagtulun-an niini. Kon kita magtuon gayud ug isipon ang Basahon ni Mormon sa doktrinal nga paagi, kita makapakita sa mga sayop ug makakita sa mga kamatuoran aron sa pakigbatok sa daghang bag-o nga bakak nga mga teyoriya ug mga pilosopiya sa mga tawo.

Akong namatikdan sulod sa Simbahan ang kalainan sa pag-ila, panglantaw, konbiksyon, ug espiritu tali niadtong kinsa nahibalo ug nahigugma sa Basahon ni Mormon ug niadtong kinsa wala. Kana nga basahon usa ka dakong ayagan.¹⁹

Ang Basahon ni Mormon nagbutyag sa mga kaaway ni Kristo. Kini nagbuntog sa bakak nga mga doktrina ug mohunong og panagbingkil. (Tan-awa sa 2 Ne. 3:12.) Kini naglig-on sa mapainubsanong mga sumusunod ni Kristo batok sa dautang mga disenyo, mga taktika, ug mga doktrina sa yawa sa atong panahon. Ang matang sa mga mibiya sa kamatuoran diha sa Basahon ni Mormon sama sa matang nga kita aduna karon. Ang Dios, uban sa iyang walay kinutubang kahibalo, miumol pag-ayo sa Basahon ni Mormon aron kita makakita sa sayop ug mahibalo unsaon sa pakigbatok sa sayop nga mga konsepto sa edukasyon, sa politika, relihiyon, ug sa pilosopiya sa atong panahon.²⁰

Ang Doktrina ug mga Pakigsaad mao ang sumpay nga nagbugkos tali sa Basahon ni Mormon ug sa nagpadayong buhat sa Pagpahiuli.

Buot akong mamulong ilabi na sa Basahon ni Mormon ug sa Doktrina ug mga Pakigsaad. Kining duha ka importanting mga basahon nga kasulatan sa ulahing mga adlaw naghiusa isip mga pagpadayag gikan sa Dios sa Israel alang sa katuyoan sa pagpundok ug sa pag-andam sa Iyang katawhan alang sa ikaduhang pag-anhi sa Ginoo. …

Ngadto ni Propeta Joseph Smith ang Ginoo miingon, “Kini nga kaliwatan makabaton sa akong pulong pinaagi kanimo” (D&P 5:10). Ang Basahon ni Mormon ug ang Doktrina ug mga Pakigsaad kabahin sa katumanan niana nga saad. Naghiusa, kining duha ka mahinungdanong mga buhat sa kasulatan nagdala og dagko nga mga panalangin ngadto niini nga henerasyon. …

Matag usa niining duha ka importanting mga kasulatan sa ulahing mga adlaw nagdala og gamhanan ug makapatandog nga saksi ni Ginoong Jesukristo. Hapit matag pahina sa Doktrina ug mga Pakigsaad ug sa Basahon ni Mormon nagtudlo mahitungod sa Agalon—sa Iyang dakong gugma alang sa Iyang mga anak ug sa Iyang maulaong sakripisyo—ug nagtudlo kanato unsaon sa pagpuyo aron kita makabalik ngadto Kaniya ug sa atong Langitnong Amahan.

Matag usa niining importanting mga basahon sa kasulatan sa ulahing mga adlaw naglangkob sa kahibalo ug sa gahum sa pagtabang kanato sa pagpuyo og mas maayong kinabuhi sa panahon sa dakong kadautan ug kayawan-on. Niadtong kinsa mabinantayon ug mainampoon nga nagsiksik sa mga pahina niini nga mga basahon makakaplag og kahupayan, tambag, paggiya, ug hilom nga gahum sa pagpalambo sa ilang mga kinabuhi.²¹

Ang Doktrina ug mga Pakigsaad mao ang bugkos nga nagsumpay tali sa Basahon ni Mormon ug sa nagpadayong buhat sa Pagpahiuli pinaagi ni Propeta Joseph Smith ug sa iyang mga sumusunod.

Diha sa Doktrina ug mga Pakigsaad atong makat-unan ang buhat sa templo, mahangturong mga pamilya, ang mga ang-ang sa himaya, organisasyon sa Simbahan, ug daghan pang mahinungdanong mga kamatuoran kabahin sa Pagpahiuli. …

Ang Basahon ni Mormon mao ang “sukaranang bato” sa atong relihiyon, ug ang Doktrina ug mga Pakigsaad mao ang ulohang bato, uban sa nagpadayong pagpadayag sa ulahing mga adlaw. Ang Ginoo nagbutang sa Iyang selyo sa pagtugot diha sa sukaranang bato ug sa ulohang bato.²²

Ang Doktrina ug mga Pakigsaad usa ka mahimayaong basahon sa kasulatan nga direktang gihatag ngadto sa atong henerasyon. Kini naglangkob sa kabubut-on sa Ginoo alang kanato niining ulahing mga adlaw nga nag-una sa ikaduhang pag-anhi ni Kristo. Kini naglangkob og daghang mga kamatuoran ug mga doktrina nga wala sa hingpit ipadayag diha sa ubang kasulatan. Sama sa Basahon ni Mormon, kini molig-on niadtong kinsa mabinantayon ug mainampoon nga magtuon gikan sa mga pahina niini.

Kita ba, isip mga Santos sa Labing Halangdong Dios, nagmahal sa pulong nga Iyang gipatunhay alang kanato sa dako kaayo nga bili? Naggamit ba kita niini nga mga basahon sa ulahing mga adlaw nga pagpadayag sa pagpanalangin sa atong mga kinabuhi ug sa pagsagubang sa mga gahum sa dautan? Kini mao ang katuyoan nga kini gihatag. Unsaon nga dili kita ipanghimaraut sa atubangan sa Ginoo kon ato kining ibaliwala pinaagi sa pagpaabug niini diha sa atong mga estante?

Minahal kong mga kaigsoonan, ako mohatag og ligdong nga pagpamatuod nga kini nga mga basahon naglangkob sa hunahuna ug kabubut-on sa Ginoo alang kanato niining mga adlaw sa pagsulay ug kasakit. Kini nagbarug uban sa Biblia aron sa paghatag og saksi sa Ginoo ug sa Iyang buhat. Kini nga mga basahon naglangkob sa tingog sa Ginoo ngari kanato niining ulahing mga adlaw. Unta mobasa kita niini uban sa tibuok katuyoan sa kasingkasing ug gamiton kini sa paagi nga ang Ginoo nanghinaut niini nga gamiton.²³

Mga Sugyot alang sa Pagtuon ug Pagtudlo

Mga Pangutana

Samtang kamo nagbasa sa mga pagtulun-an ni Presidente Benson mahitungod sa Basahon ni Mormon ingon nga maoy sukaranang bato sa atong tinuohan (tan-awa sa seksyon 1), pamalandunga ang dapit niini diha sa inyong kinabuhi. Unsay atong mabuhat sa paghimo sa Basahon ni Mormon nga mas importante sa atong mga paningkamot sa pagsunod sa ebanghelyo?
Miingon si Presidente Monson nga ang Basahon ni Mormon nagpamatuod ni Jesukristo ug nagdala kanato nga mas maduol ngadto sa Dios (tan-awa sa seksyon 2). Unsa ang pipila ka mga butang nga inyong nakat-unan mahitungod sa Manluluwas sumala sa inyong natun-an sa Basahon ni Mormon? Giunsa sa Basahon ni Mormon pagdala kaninyo ug sa inyong pamilya nga mas maduol ngadto sa Dios?
Nganong kinahanglan nga kita “mas makahibalo sa Basahon ni Mormon kay sa uban nga basahon”? Giunsa sa mga doktrina diha sa Basahon ni Mormon paglig-on kaninyo batok sa “mga doktrina sa yawa sa atong panahon”? (Tan-awa sa seksyon 3.)
Sa unsa nga mga paagi ang Basahon ni Mormon ug ang Doktrina ug mga Pakigsaad naghiusa sa paglig-on kanato? (Tan-awa sa seksyon 4.)

May Kalabutan nga mga Kasulatan

Isaias 29:9–18; 1 Nephi 13:35–41; 2 Nephi 25:23, 26; 29:6–9; D&P 1:17–29

Tabang sa Pagtudlo

“Kadaghanan sa mga manwal adunay mga pangutana aron pagsugod sa mga panaghisgutan ug pagpadayon niini. Mahimo nimong gamiton kini nga mga pangutana ug mag-andam og imong kaugalingong pangutana. Gamit og mga pangutana nga makaawhag og makapanghunahuna nga mga komentaryo ug makatabang sa mga indibidwal nga tinud-anay nga mamalandong sa ebanghelyo” (Pagtudlo Walay Labaw Ka Mahinungdanon nga Tawag [1999], 63).