Kapitulo 10

Ang mga Kasulatan—Ang Pinakamapuslanon sa Tanan nga Pagtuon

“Unta kitang tanan … magpaduol sa atong Amahan sa Langit ug sa Hinigugma niya nga Anak pinaagi sa makanunayon nga pagtuon sa balaang mga kasulatan.”

Gikan sa Kinabuhi ni Howard W. Hunter

Si Presidente Howard W. Hunter dunay dakong gugma sa mga kasulatan ug mapahinunguron siya nga tigtuon niini. Kini nga paghigugma ug pagtuon makita diha sa iyang mga pagtulun-an, nga puno sa mga sugilanon ug ubang tudling nga gikan sa mga kasulatan. Kasagaran kon magtudlo og usa ka baruganan sa ebanghelyo, labi na sa kinatibuk-ang komperensya, mopili siya og labing minus usa ka sugilanon gikan sa mga kasulatan, isugilon kini nga detalyado, ug mokuha og mga pagtulun-an nga magamit gikan niini.

Sama pananglit, dihang nagtudlo mahitungod sa pasalig ngadto sa Dios, iyang giasoy ang sugilanon ni Josue; ni Shadrach, Meshach, ug Abednego; ug sa uban pa diha sa Daang Tugon kinsa mipakita og ingon nga pasalig (tan-awa sa kapitulo 19). Dihang nagtudlo mahitungod sa pagserbisyo, gigamit niya ang mga ehemplo gikan sa Basahon ni Mormon aron ipakita nga kadtong nakadawat og gamay nga pagdayeg “sama kamaalagaron” sa uban kansang pag-alagad mas dayag (tan-awa sa kapitulo 23). Dihang nagtudlo kon unsaon sa pag-angkon og kalinaw sa kaugalingon sa mga panahon sa kagubot, gigamit na sab niya ang mga tudling gikan sa mga kasulatan, lakip ang sugilanon ni Pedro nga naglakaw sa dagat (tan-awa sa kapitulo 2). Dihang nagtudlo mahitungod sa sakrament, mipasabut siya sa kinatibuk-ang kahulugan pinaagi sa pagribyu sa istorya sa mga anak sa Israel ug sa Pagpalabay (tan-awa sa kapitulo 15).

Nahibalo si Presidente Hunter sa kaimportante sa mga kasulatan sa pagtabang sa usa ka tawo nga makaangkon og pagpamatuod ni Jesukristo. Mao nga, sagad siyang nanudlo gikan sa mga asoy sa kasulatan mahitungod sa pagpangalagad sa Manluluwas, paglansang, ug pagkabanhaw. Siya miingon:

“Mapasalamaton ko sa mga kasulatan diin ang mas daghang kahibalo bahin ni Jesukristo makat-unan pinaagi sa mapahinungurong pagtuon. Mapasalamaton ko nga agig dugang sa Daan ug sa Bag-ong mga Tugon, ang Ginoo, pinaagi sa mga propeta sa Simbahan ni Jesukristo sa mga Santos sa Ulahing mga Adlaw, midugang og ubang pinadayag nga kasulatan isip dugang saksi kang Kristo—ang Basahon ni Mormon, Doktrina ug mga Pakigsaad—ug ang Perlas nga Labing Bililhon—tanan akong nahibaloan nga pulong sa Dios. Nagsaksi kini nga si Jesus mao ang Kristo, ang Anak sa buhi nga Dios.”¹

pamilya nga nagtuon sa mga kasulatan — “Nanghinaot mi nga nagbasa ug nagtuon kamo sa mga kasulatan matag adlaw sa tinagsa ug sa pamilya.”

Mga Pagtulun-an ni Howard W. Hunter

Ang pagtuon sa mga kasulatan mao ang pinakamapuslanon sa tanang pagtuon nga atong mahimo.

Ang mahinungdanon sa tanang kamatuoran mao ang pagpamatuod nga si Jesus nga Nazaretnon mao ang Kristo, ang Talagsaong Jehovah, ang Manluluwas sa Kalibutan, ug Bugtong Anak sa Buhi nga Dios. Kini ang mensahe sa mga kasulatan. Sa matag usa niini nga balaang mga kasulatan adunay hangyo nga tuohan ug mabatunan ang pagtuo sa Dios nga Mahangturong Amahan ug sa Iyang Anak, si Jesukristo; ug sugod sa sinugdanan ngadto sa katapusan niini nga mga basahon mao ang tawag sa paghimo sa kabubut-on sa Dios ug pagtuman sa iyang mga sugo.²

Kon sundon nato ang tambag sa atong mga lider sa pagbasa ug pagtuon sa mga kasulatan, ang mga benipisyo ug panalangin sa tanang matang moabut kanato. Kini ang pinakamapuslanon sa tanang pagtuon nga atong mahimo. …

Ang mga kasulatan naglangkob sa rekord sa kaugalingong pagpadayag sa Dios, ug pinaagi niini ang Dios mamulong sa tawo. Asa ka man makakita og mas mapuslanon nga paggamit sa panahon kay sa pagbasa gikan sa library sa kasulatan sa literatura nga nagtudlo nato sa pagkaila sa Dios ug pagsabut sa atong relasyon kaniya? Ang panahon kanunay nga bililhon alang sa busy nga mga tawo, ug makawat gikan kanato ang bili niini kon ang mga oras mausikan sa pagbasa o pagtan-aw sa mga butang nga walay hinungdan o gamay ra og bili.³

Manghinaot mi nga nagbasa mo ug nagtuon sa mga kasulatan sa matag adlaw sa tinagsa ug sa pamilya. Kinahanglang dili nato ibaliwala ang sugo sa Ginoo, “Kamo nagasusi sa mga kasulatan kay nagahunahuna man kamo nga pinaagi niini makakaplag kamo sa kinabuhing dayon; ngani kini mao ang nagapanghimatuod mahitungod kanako” (Juan 5:39). Ang Espiritu modayon sa inyong panimalay ug sa inyong kinabuhi kon mobasa mo sa gipadayag nga mga pulong.⁴

Gikinahanglan nga ang atong Simbahan mapuno sa kababayen-an ug kalalakin-an kinsa may kinatibuk-ang kahibalo sa kasulatan, kinsa maka-cross reference ug maka marka niini, kinsa makahimo og mga leksyon ug pakigpulong gikan sa Giya ngadto sa mga Kasulatan [Topical Guide], ug kinsa hanas na sa mga mapa, sa Bible Dictionary, ug ubang mga tabang nga anaa niining talagsaong hugpong sa sumbanan nga mga basahon. Dayag kaayo nga anaay daghan nga dali ra natong ipakahanas. Klaro kaayo nga ang mga umahan sa kasulatan “puti ug andam na sa pag-ani” [tan-awa sa D&P 4:4]. …

Dili dinhi nga dispensasyon, siguradong dili sa bisan unsang dispensasyon, nga ang mga kasulatan—ang malungtaron, nagdan-ag nga pulong sa Dios—maanaa dayon ug gihan-ay sa pagtabang aron magamit sa mga lalaki, babaye, ug sa mga bata nga mosiksik niini. Ang nahisulat nga pulong sa Dios anaa na sa porma nga dali ra kaayong mabasa ug ma-anaa nga sukad wala mahimo alang sa mga miyembro sa kasaysayan sa kalibutan. Sigurado nga manubag kita kon dili nato kini basahon.⁵

Ang pagtuon sa mga kasulatan makatabang nato sa pagkat-on ug pagsunod sa kabubut-on sa Dios.

Aron magmasulundon sa balaod sa ebanghelyo ug magmasulundon sa mga pagtulun-an ni Jesukristo, kinahanglan nga unahon nato sa pagsabut ang balaod ug kat-unan ang kabubut-on sa Ginoo. Mas matuman kini pinaagi sa pagsiksik ug pagtuon sa mga kasulatan ug sa pulong sa mga propeta. Niini nga paagi atong mapamilyar ang unsay gipadayag sa Dios ngadto sa tawo.

Diha [sa] Mga Artikulo sa Hugot nga Patuo gipahayag nga, “Kami nagtuo sa tanan nga gipadayag sa Dios, sa tanan nga gipadayag niya karon, ug kami nagtuo nga siya mopadayag pa og daghan nga dagko ug mahinungdanon nga mga butang kalabut sa Gingharian sa Dios.” (Mga Artikulo sa Hugot nga Pagtuo 1:9).

Ang kabubut-on sa Dios gipadayag diha sa mga kasulatan, ug tungod niini gisugo kita sa pagbasa niini aron sa pagkaplag sa kamatuoran. Ang Ginoo mipasabut kang Oliver Cowdery unsaon sa pagsiguro nga kini mga tinuod. Miingon siya, “Tan-awa, Ako mohatag nganha kanimo og sugo, nga ikaw mosalig niana nga mga butang nga nahisulat; kay diha kanila anaa ang tanan nga mga butang nga nahisulat mahitungod sa katukuran sa akong simbahan, akong ebanghelyo, ug akong lig-on nga sukaranan” (D&P 18:3–4).

Si Pablo misulat ngadto sa buotan niyang higala nga si Timoteo, nag-awhag kaniya sa pagbasa sa mga kasulatan, ug ang iyang sulat nag-ingon, “Sukad sa imong pagkabata ikaw nakasabut na sa balaan nga kasulatan nga makagagahum sa pagtudlo kanimo ngadto sa kaluwasan pinaagi sa pagtuo kang Kristo Jesus.” Dayon gidugangan pa niya, “Ang tibuok nga kasulatan gituga sa Dios ug may kapuslanan alang sa pagpanudlo, alang sa pagpamadlong, alang sa pagpanul-id ug alang sa pagmatoto sa pagkamatarung” (2 Timoteo 3:15–16). …

Ang mga lider sa atong Simbahan mipasabut gayud sa kaimportante sa pagbasa sa mga kasulatan ug sa pulong sa mga propeta, sa karaan ug sa moderno. Ang mga amahan ug mga inahan gihangyo sa pagbasa sa mga kasulatan aron maayo ang ilang pagtudlo sa ilang mga anak. Ang atong mga anak mobasa sa mga kasulatan tungod sa ehemplo nga gipakita sa mga ginikanan. Nagtuon kita sa mga kasulatan sa atong mga family home evening, ug ang ubang pamilya nagbasa sa kasulatan sayo sa buntag. … Mao kini ang paagi nga kita makahibalo sa kabubut-on sa Ginoo, aron kita magmasulundon.⁶

Ikonsiderar ang pagkahan-ay diha sa kasulatan nga nagsugod sa makugihon nga pagsunod sa pulong sa Dios ug mipadayon ngadto sa saad nga kon atong himoon, kita makabalik gayud sa iyang presensya:

“Ug Ako karon mohatag nganha kaninyo og sugo. … sa paghatag og makugihon nga pagsunod sa mga pulong sa kinabuhi nga dayon.

“Kay kamo mabuhi pinaagi sa matag pulong nga mogula gikan sa ba-ba sa Dios.

“Kay ang pulong sa Ginoo mao ang kamatuoran, ug bisan unsa nga mga kamatuoran mao ang kahayag, ug bisan unsa nga kahayag mao ang Espiritu, gani ang Espiritu ni Jesukristo. …

“Ug matag usa nga nagpatalinghug ngadto sa tingog sa Espiritu moduol ngadto sa Dios, gani ang Amahan” (D&P 84:43–45, 47).

Usa kana ka talagsaon nga panaw nga gipasiugdahan pinaagi sa pulong sa Dios ug motapos didto sa kahimayaan. “Ang mga pulong ni Kristo magtug-an kaninyo sa tanan nga mga butang nga inyong buhaton” (2 Nephi 32:3).⁷

Ako mosugyot nga inyong gamiton ang pagpadayag sa Dios isip sumbanan nga maoy atong gikinahanglan sa pagpakabuhi ug diin kita mosukod sa atong matag desisyon ug matag buhat. Mao nga, kon kamo adunay mga kabalaka ug mga hagit, atubanga kini pinaagi sa pagdangup ngadto sa mga kasulatan ug mga propeta.⁸

batan-ong lalaki nga nagbasa sa kasulatan — Ang pagtuon sa kasulatan “mao ang pinakamapuslanon sa tanan nga pagtuon nga atong mahimo.”

Ang pagsabut sa mga kasulatan nagkinahanglan og mapahinunguron, makanunayon, ug mainampuong pagtuon.

Moawhag mi sa matag usa kaninyo nga hunahunaa pag-ayo kon unsa kataas ang oras nga inyong gigahin karon alang sa mainampuong pagpamalandong sa mga kasulatan.

Isip usa sa mga sulugoon sa Ginoo, hagiton ko kamo sa paghimo sa mosunod:

1 Mobasa, mamalandong, ug mag-ampo sa mga kasulatan kada adlaw matag usa isip mga miyembro sa Simbahan.

2 Regular nga magbasa sa kasulatan uban sa tibuok pamilya. Magpasalamat mi niadtong nanaghimo na niini ug moawhag niadtong wala pa makasugod sa pagsugod niini sa walay langay. …

Unta ang matag usa kanato magpadayon uban sa hugot nga desisyon nga mas magmainampuon; magtinguha nga magpakabuhi nga inubanan sa Espiritu; ug mas maduol sa Amahan nga Langitnon ug sa iyang Hinigugma nga Anak pinaagi sa makanunayon nga pagtuon sa balaang mga kasulatan.⁹

Ang kinaiya sa pagbasa managlahi kaayo. Dunay paspas nga mobasa ug dunay hinay nga mobasa, ang uban mobasa lang og ginagmay ug ang uban dili mohunong hangtud mahuman og basa ang libro. Katong may tinguha gayud sa pagbasa sa kasulatan, hinoon, makabantay nga ang pagsabut nagkinahanglan og labaw kay sa pagpakli-pakli o pagsuhid lang—gikinahanglan nga anaa ang konsentrasyon sa pagtuon. Makita gayud nga kadtong nagtuon matag adlaw sa kasulatan mas daghan og mahimo kay sa tawo nga mogahin lang og gamayng panahon nianang adlawa ug dayon labyan pa og pipila ka adlaw una masundan. Dili lamang kay magtuon kita matag adlaw, apan gikinahanglan ang paggahin og regular nga oras diin kita maka-focus gayud nga dili mabalda.

Walay laing makatabang kay sa pag-ampo aron maabli ang atong panabut sa mga kasulatan. Pinaagi sa pag-ampo atong madirekta ang atong hunahuna sa pagpangita sa tubag sa atong mga pagsiksik. Ang Ginoo miingon: “Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan” (Lucas 11:9). Dinhi gisaad ni Kristo nga kon kita mangayo, mangita, ug manuktok, ang Espiritu Santo mogiya sa atong panabut kon kita andam ug matinguhaong makadawat.

Daghan ang nakabantay nga pinakamaayong panahon sa pagtuon ang sayo sa buntag human sa pagkatulog nga nahupay na ang hunahuna sa daghang butang nga mobalda sa paghunahuna. Ang uban mas ganahang magtuon sa hilum nga mga oras human sa trabaho ug tapos na ang mga kabalaka sa adlaw ug gaan ang hunahuna, sa ingon motapos sa adlaw uban sa kalinaw ug kahupayan nga moabut pinaagi sa pagbasa sa mga kasulatan.

Tingali ang mas importante kay sa unsang orasa ka magbasa mao ang pagtakda og regular nga oras alang sa pagtuon. Mas maayo kon usa ka oras ang magahin matag adlaw; apan kon dili gyud makaabut niana, ang tunga sa oras matag adlaw dako na og kahimoan. Ang kinse minutos gamay ra nga panahon, apan makatingala ang ikahatag nga panabut ug kahibalo gikan sa usa ka butang nga makahuluganon kaayo. Ang importante mao ang dili pagtugot nga dili kita makatuon.

Ang uban ganahan nga magtuon nga siya ra, apan mapuslanon usab ang pagtuon nga may kauban. Mapanalinginan og dako ang mga pamilya kon ang maalamong amahan ug inahan mopundok sa ilang mga anak, magbasa sa mga kasulatan, ug dayon maghisgot sa matahum nga mga sugilanon ug pagtulun-an sa paagi nga masabtan sa tanan. Kasagaran ang mga batan-on ug ang mga bata dunay makatingala nga mga hunahuna ug pagdayeg sa yano nga hilisgutan sa relihiyon.

Kinahanglang dili pataka ang atong pagbasa apan maghimo kita og maayong sistema sa pagtuon. Dunay uban nga naka-iskedyul nga mobasa og pipila ka pahina o motakda og pipila ka kapitulo matag adlaw o sa semana. Maayo kaayo kini ug makalingaw kon nagbasa lang ta aron malingaw, apan dili kini makahuluganon nga pagtuon. Mas maayo nga magtakda og pila ka oras sa pagtuon sa kasulatan matag adlaw kay sa magtakda og pila ka kapitulo ang basahon. Usahay atong mabantayan nga ang pagtuon sa usa ka bersikulo mohurot sa tibuok oras.¹⁰

Ang pagpamalandong sa mubo nga asoy sa kasulatan kabahin ni Jairo nagdala og dako kaayong panabut ug kahulugan.

Ang kinabuhi, mga buhat ug mga pagtulun-an ni Jesus dali nga basahon. Ang mga sugilanon yano sa kadaghanang higayon ug ang mga sugilanon yano ra ang pagkasugilon. Ang Magtutudlo migamit og pipila lang ka pulong sa iyang mga pagtulun-an, apan ang matag usa mubo og klaro ang ipasabut nga kini naghulagway og klaro nga imahe diha sa tigbasa. Usahay, hinoon, daghang oras ang magahin sa pagpamalandong sa lagwom nga hunahuna nga gipahayag sa yano nga mga pulong.

Dunay sitwasyon sa kinabuhi sa Manluluwas nga gihisgutan ni Mateo, Marcos ug Lucas. Usa ka makahuluganon nga bahin sa sugilanon gisulti ni Marcos sa duha lamang ka mubo nga bersikulo ug sa lima ka pulong sa misunod nga bersikulo. …

“Ug miabut ang usa sa mga punoan sa sinagoga, nga ginganlan si Jairo; ug sa iyang pagkakita kang Jesus, mihapa siya sa tiilan niya,

“Ug kaniya nangamuyo siya sa hilabihan gayud nga nag-ingon, Ang akong batang babaye himalatyon. Adtoa ug itapion ang imong mga kamot diha kaniya, aron mamaayo ug mabuhi siya.

“Ug siya miuban kaniya” (Marcos 5:22–24).

Ang pagbasa niana nga porsyon sa sugilanon mga traynta segundos ra. Mubo ra kini ug dili komplikado. Ang larawan nga mahanduraw klaro ug bisan ang usa ka bata makasubli sa pagsulti niini nga dili maglisud. Apan kon atong gahinan og panahon sa paghunahuna ug pagpamalandong, usa ka dako nga panabut ug kahulugan ang moabut kanato. …

… Si Jesus ug kadtong miuban kaniya nakatabok na og balik sa Pula nga Dagat, ug ang panon sa katawhan nga nanaghulat misugat kaniya sa baybayon duol sa Capernaum. “Ug miabut ang usa sa mga punoan sa sinagoga.” Ang mas dagkong mga sinagoga nianang mga panahona gipangulohan sa usa ka pundok sa mga tawo nga may awtoridad ubos sa direksyon sa usa ka dako-dako o usa ka tigmando. Usa kini ka tawo nga anaa sa katungdanan ug talahuron diin ang mga Judeo dako og pagtahud.

Si Mateo wala mohatag sa ngalan niining dako-dako nga elder, apan si Marcos miila kaniya sa pagdugang sa iyang titulo sa mga pulong, “nga ginganlan si Jairo.” Walay laing dapit sa kasulatan nga kining tawhana o ang ngalan niya nasulat gawas lang niini nga okasyon, bisan pa ang panumduman bahin niya nagpabiling buhi sa kasaysayan tungod sa usa ka daklit nga pakigkita kang Jesus. Daghan, daghan kaayong kinabuhi ang nahimong halandumon nga sa laing bahin napapas na lang unta kon dili pa tungod sa pakig-uban sa Magtutudlo nga maoy naghimo sa mahinungdanong kausaban sa hunahuna ug buhat ug sa usa ka bag-o ug mas maayong kinabuhi.

“Ug sa iyang pagkakita kang Jesus, mihapa siya sa tiilan niya.”

Dili kini kasarangan nga hitabo sa usa ka tawo nga naa sa katungdanan ug talahuron, usa ka tigmando sa sinagoga, nga moluhod sa tiilan ni Jesus—sa tiilan sa tawo nga giisip nga usa ka biyahero nga magtutudlo nga dunay gasa sa pagpang-ayo. Adunay daghang uban nga maalamon ug talahuron nga nakakita usab kang Jesus apan mibaliwala kaniya. Sarado ang ilang mga hunahuna. Ang panahon karon walay kalainan; ang mga ali nagbabag sa daghang tawo sa pagdawat kaniya.

“Ug kaniya nangamuyo siya [Jairo] sa hilabihan gayud nga nag-ingon, Ang akong batang babaye himalatyon.” Sagad kini nga mahitabo diin ang tawo moduol kang Kristo, dili alang sa iyang kaugalingon, apan sa dako kaayong panginahanglan sa usa ka minahal. Ang nagkurog nga tingog ni Jairo dihang miingon siya nga “Ang akong batang babaye” makatandog sa atong kalag samtang maghunahuna kita niining tawhana nga may taas nga katungdanan sa sinagoga nga nagluhod atubangan sa Manluluwas.

Dayon miabut ang talagsaong pag-ila sa hugot nga pagtuo: “Adtoa ug itapion ang imong mga kamot diha kaniya, aron mamaayo ug mabuhi siya.” Dili lamang kini mga pulong sa pagtuo sa usa ka amahan nga nasubhan sa kaguol apan usa sab kini ka pahinumdom kanato nga bisan unsa ang tapionan ni Jesus sa iyang mga kamot mabuhi. Kon si Jesus motapion sa iyang mga kamot diha sa usa ka kaminyoon, kini magmalamboon. Kon tugutan siyang motapion sa iyang mga kamot diha sa pamilya, kini magmahangturon.

Misunod ang mga pulong nga, “ug [si Jesus] miuban kaniya”. Dili nato hunahunaon nga kining hitaboa naapil sa mga plano para nianang adlawa. Ang Magtutudlo mitabok og balik sa dagat diin ang panon sa katawhan nanaghulat sa baybayon aron magpatudlo kaniya. … Nabalda siya tungod sa pangamuyo sa usa ka amahan. Mahimo ra unta niyang pasagdan ang maong hangyo kay adunay daghang tawo nga nanaghulat. Mahimo ra unta niyang ingnon si Jairo nga adtoon lang niya ang iyang anak ugma, apan “si Jesus miuban kaniya.” Kon atong sundon ang mga tunob sa Magtutudlo, pasagdan lang ba nato ang panginahanglan sa atong isigkatawo tungod kay daghan pa ta og buhaton?

Wala na kinahanglana ang pagbasa og hurot sa sugilanon. Dihang nangabut sila sa balay sa tigmando sa sinagoga, gigunitan ni Jesus ang batang babaye ug gipabangon siya gikan sa kamatayon. Sa samang paagi, siya moalsa ug mobayaw sa matag tawo ngadto sa usa ka bag-o ug mas maayong kinabuhi kinsa motugot nga ang Manluluwas mogunit kaniya.¹¹

Ang Basahon ni Mormon ug ang Doktrina ug mga Pakigsaad modala kanato paduol kang Kristo.

Ang Basahon ni Mormon

Usa sa pinakamakahuluganong kapanguhaan nga gihatag sa Ginoo sa pagtabang nato nga matuman kining balaan nga buhat mao ang Basahon ni Mormon, nga may subtitle nga “Lain nga Tugon ni Jesukristo.” [Si Presidente Ezra Taft Benson] walay lipud-lipod nga mipahimangno kanato sa dili paghikalimot sa pagbasa ug sa pagsunod sa mga pagtulun-an niining sagrado nga kasulatan. “Ang talagsaong misyon,” siya mitudlo kanato, “mao ang pagdala sa katawhan ngadto kang Kristo [ug ngadto sa Amahan], ug ang uban pang mga butang tanan ikaduha lamang niini.” (Ensign, Mayo 1986, p. 105.) Manghinaot kami nga kamo mga kaigsoonan magpabaskog sa inyong mga espiritu pinaagi sa regular nga pagbasa sa Basahon ni Mormon ug sa ubang kasulatan ug paggamit niini sa inyong pagpangalagad.¹²

Ang Basahon ni Mormon pulong sa Dios. Dapiton namo kamo sa pagbasa niining talagsaon nga rekord. Kini ang labing talagsaon nga basahon nga ania karon. Basaha kini og maayo ug sa kamainampoon, ug kon kini inyong buhaton, ang Dios mohatag kaninyo og pagpamatuod sa katinuod niini sumala sa gisaad ni Moroni (tan-awa sa Moroni 10:4).¹³

Pinaagi sa pagbasa ug pagtuon sa Basahon ni Mormon, ug mainampuong pagtinguha nga mapamatud-an ang katinuod niini, kita makadawat og pagpamatuod nga si Joseph Smith propeta sa Dios ug nga ang Simbahan ni Jesukristo napahiuli dinhi sa yuta.¹⁴

Ang pagbasa [sa Basahon ni Mormon] maghatag og dakong impluwensya sa inyong kinabuhi. Mopalambo kini sa inyong kahibalo bahin sa pamaagi sa Dios sa pagpakig-uban sa tawo ug maghatag ninyo og mas dakong tinguha sa pagpakabuhi nga nahiuyon sa mga pagtulun-an sa iyang ebanghelyo. Makahatag usab kini ninyo og lig-ong pagpamatuod bahin ni Jesus.¹⁵

Ang Doktrina ug mga Pakigsaad

Ang Doktrina ug mga Pakigsaad usa ka talagsaon nga basahon. Bugtong basahon kini dinhi sa tibuok yuta nga dunay pasiuna nga hinimo sa Tiglalang mismo. Dugang pa, kini nga basahon sa kasulatan naglangkob og daghang direkta nga mga kinutlo gikan sa Ginoo kay sa ubang anaa nga mga basahon sa kasulatan.

Dili kini usa ka hinubad gikan sa karaan nga dokumento, apan gikan sa usa ka moderno nga tinubdan. Usa kini ka basahon sa pagpadayag sa atong kapanahunan. Usa kini ka talagsaon ug balaanong dinasig nga pagpili sa mga pinadayag nga naggikan sa mga propeta sa Dios sa atong kapanahunan agi og tubag sa mga pangutana, kabalaka, ug mga hagit nga ilang giatubang ug sa uban. Naglangkob kini sa balaanon nga tubag sa mga problema sa tinuod nga kinabuhi nga naglakip og tinuod nga mga tawo. …

Nasabtan ba ninyo nga sa pagbasa sa Doktrina ug mga Pakigsaad inyong mabati ang tingog sa Ginoo pinaagi sa kasulatan? [tan-awa sa D&P 18:33–36]. … Kana nga tingog nga naghatag og kahayag sa kasagaran moabut sa inyong hunahuna isip “mga hunahuna” ug sa inyong kasingkasing isip “mga pagbati” (tan-awa sa D&P 8:1–3). Ang saad bahin niana nga pagsaksi … anaa sa matag takus nga lalaki, babaye, ug bata kinsa mainampuong nagtinguha sa ingon niana nga saksi. Dili ba angay nga ang matag usa kanato mohukom na sa pagbasa, pagtuon, pagpamalandong, ug pag-ampo bahin niining sagrado nga mga pagpadayag?¹⁶

Mga Sugyot alang sa Pagtuon ug Pagtudlo

Mga Pangutana

Unsa nga mga kasinatian ang nakatabang kanimo sa pagkat-on nga ang pagtuon sa mga kasulatan “mao ang pinakamapuslanon sa tanan nga pagtuon”? (Tan-awa sa seksyon 1.) Unsaon man nato sa paglig-on ang atong pasalig nga mamahimong mga “kababayen-an ug kalalakin-an kinsa may kinatibuk-ang kahibalo sa mga kasulatan”?
Sa unsang paagi ang pagtuon sa mga kasulatan makatabang nato nga mahimong mas masulundon? (Tan-awa sa seksyon 2.) Sa unsang paagi imong nakita nga “ang mga pulong ni Kristo magtug-an kanimo sa tanan nga mga butang nga imong buhaton”? (2 Nephi 32:3).
Unsa nga mga aspeto sa tambag ni Presidente Hunter kon unsaon sa pagtuon ang mga kasulatan ang makatabang kanimo? (Tan-awa sa seksyon 3.) Sa unsang paagi ang pagkamakanunayon, mainampuong pagtuon sa mga kasulatan mipanalangin kanimo?
Unsa nga mga pagtulun-an ang atong makuha gikan sa asoy ni Presidente Hunter bahin sa pag-ayo sa Manluluwas sa anak nga babaye ni Jairo? (Tan-awa sa seksyon 4.) Sa unsang paagi nga ang pagpamalandong sa pipila lang ka bersikulo nga sama niini makapalambo sa imong pagtuon sa kasulatan?
Sa unsang paagi nga ang Basahon ni Mormon ug ang Doktrina ug mga Pakigsaad nakatabang nimong mas maduol sa Manluluwas? (Tan-awa sa seksyon 5.) Unsa ang pipila ka mga paagi nga kining sagrado nga mga kasulatan miimpluwensya kanimo? Ikonsiderar ang pagpaambit sa imong pagpamatuod bahin niini nga mga kasulatan diha sa mga sakop sa pamilya ug sa uban.

May Kalabutan nga mga Kasulatan

Josue 1:8; Mga Proverbio 30:5; 1 Nephi 15:23–24; 2 Nephi 3:12; Alma 31:5; 37:44; Helaman 3:29–30; D&P 98:11

Tabang sa Pagtuon

“Ang pagbasa, pagtuon, ug pagpamalandong dili managsama. Mobasa ta sa mga pulong ug dayon makakuha ta og mga ideya. Magtuon kita ug dayon atong madiskubrihan ang mga pattern ug koneksyon sa kasulatan. Apan kon mamalandong kita, nagdapit kita sa pagpadayag pinaagi sa Espiritu. Ang pagpamalandong, alang kanako, mao ang paghunahuna ug pag-ampo nga akong buhaton human sa mainampingon nga pagbasa ug pagtuon sa mga kasulatan” (Henry B. Eyring, “Pagserbisyo uban sa Espiritu,” Ensign o Liahona, Nob. 2010, 60).