Vahe 1
Ko ʻEtau Tamai ʻi Hēvaní
“Ko ʻeku fakaʻamú ia ke u fakamanatu atu e natula mo e ʻulungaanga ʻo e ʻOtuá, ke mou lava ʻo hū kiate ia ʻi he laumālie mo e moʻoni pea maʻu ai e ngaahi tāpuaki kotoa ʻo ʻene ongoongoleleí.”
Mei he Moʻui ʻa Siosefa Filitingi Sāmitá
Naʻe ofo ʻa Palesiteni Siosefa Filitingi Sāmita ʻi he fakalakalaka fakatekinolosia ʻo hono kuongá. Naʻá ne pehē, “Kuo ʻi ai ha fakalakalaka lahi ʻi he tafaʻaki fakamīsiní, fakakemí, fīsikí, tafá mo ha ngaahi meʻa kehe pē. Kuo faʻu ʻe he tangatá ha fuʻu telesikoupi lalahi ʻo tau mamata ai ki he ngaahi pupunga fetuʻu ne pulipuliá. Pea fakafou he tokoni ʻa e telesikoupí, kuo lahi ai e fanga kiʻi manu iiki (microorganisms) kuo lava ʻo ʻiloʻí. … Kuo nau ʻiloʻi e ngaahi founga ke taʻotaʻofi ʻaki e mahakí. … Kuo nau faʻu ha ngaahi mīsini ʻoku pelepelengesi ange ia he ala ʻa e tangatá, pea mamaʻo ange ʻene sió ʻaʻana ʻi he meʻa ʻe lava ke sio ki ai e tangatá. Kuo nau faʻu ha ngaahi meʻa mo ha mīsini te nau lava ʻo hiki e ngaahi moʻungá mo ha ngaahi meʻa kehe lahi kuo nau faʻu ka ʻoku fuʻu lahi ke fakalau. ʻIo, ko ha kuonga fakaʻofoʻofa ʻeni.” Ka neongo ia, naʻá ne tokanga ki ha meʻa ʻe taha ʻoku hehema ki ai ʻa e māmaní. Naʻá ne tangilāulau ʻo pehē: “Kuo ʻikai hanga ʻe he ngaahi meʻa foʻou kotoa ko ʻeni kuo ʻiloʻi mo faʻú ʻo tohoakiʻi mai ʻa e tangatá ke toe ofi ange ki he ʻOtuá! Pe ʻikai fakatupu ʻi honau lotó ha loto fakatōkilalo mo e laumālie ʻo e fakatomalá, ka ko e fakamalaʻiá. … Kuo ʻikai tupulaki ʻi he māmaní ʻa e tuí pe ko e angamāʻoniʻoní pe ko e talangofua ki he ʻOtuá.”1
Neongo e tupulaki e taʻetokanga ʻa e māmaní ki he ʻOtuá, naʻe hanga ʻe Palesiteni Sāmita ia ʻo fakahaaʻi ʻa ʻene vāofi mo ʻene Tamai ʻi Hēvaní. Naʻe manatu ha taha ʻo hono ngaahi makapuna tangatá ʻo pehē: “Ko ha fefine feimeʻatokoni ifo ʻeku faʻeé pea naʻe faʻa kai ʻeku kuitangatá ʻi homau ʻapí. Ne tuʻo lahi hono fakaafeʻi ia ʻe heʻeku tamaí ke ne tāpuakiʻi e meʻatokoní. Naʻe fakatāutaha maʻu pē ʻene lotú —ʻo hangē haʻane talanoa ki hano kaungāmeʻá.”2
Ngaahi Akonaki ʻa Siosefa Filitingi Sāmitá
1
Kuo toe fakafoki mai ʻi hotau kuongá ʻa e ʻilo totonu kau ki he ʻOtuá, ʻo kamata pē mei he ʻUluaki Mata-Meʻa-Hā-Mai ʻa Siosefa Sāmitá.
ʻOku ou fakamālō loto houngaʻia koeʻuhí ko e ʻuluaki meʻa-hā-maí, ʻa ia ne hā ai ʻa e Tamaí mo e ʻAló ki he palōfita kei talavoú mo toe fakafoki mai ai ki he tangata ʻa e ʻilo totonu kau ki he ʻOtuá.3
Naʻe toe fakafoki mai “ʻa e ʻilo totonu fekauʻaki mo e ʻOtuá” ʻi he ʻUluaki Mata-meʻa-hā-mai ʻa Siosefa Sāmitá.
ʻOku totonu ke manatua naʻe mole mei he māmani faka-Kalisitiané kotoa ʻi he 1820, ʻa e tokāteline totonu fekauʻaki mo e ʻOtuá. Ko e foʻi moʻoni faingofua ko ia naʻe mahino lelei ki he kau ʻaposetoló mo e kāingalotu he kuonga muʻá, ne mōlia ia ʻi he ngaahi meʻa fufū ʻo ha māmani kuo hē mei he moʻoní. Naʻe maʻu ʻe he kau palōfita mo e kau ʻAposetolo ʻa Sīsū Kalaisi he kuonga muʻá ha mahino kakato ko e Tamaí mo e ʻAló ʻokú na sino mavahevahe, ʻo hangē ko ia ʻoku akoʻi mahino ʻe heʻetau ngaahi tohi folofolá. Naʻe mole ʻa e ʻilo ko ʻení ʻi he hē mei he moʻoní. … Naʻe hoko e ʻOtuá ko ha misiteli pea lau leva ʻa e Tamaí mo e ʻAló fakatouʻosi ko ha laumālie pē ʻe taha, ʻikai ha sino, kongokonga pe ngaahi ongo. Naʻe hanga ʻe he hāʻele mai ʻa e Tamaí mo e Fohá ʻo fokotuʻu ʻi māmani ha fakamoʻoni fakalangi pea fakafoki mai ki he māmaní ʻa e ʻilo ki he natula totonu ʻo e ʻOtuá.4
Naʻe hanga ʻe he [ʻuluaki] meʻa-hā-mai ʻa Siosefa Sāmitá ʻo fakamahinoʻi mai e sino mavahevahe ʻa e Tamaí mo e ʻAló peá ne maʻu ha sino ʻoku tatau mo e sino ʻo e tangatá. Naʻe toe fakahā mai foki ko e Laumālie Māʻoniʻoní ko e Laumālie pē ia, ʻoku mavahe mo kehe mei he natula ʻo e Tamaí mo e ʻAló [vakai, T&F 130:22]. Naʻe hanga ʻe he moʻoni mahuʻinga kakato ko ʻení ʻo luluʻi e māmaní; ka ʻi heʻetau fakakaukau atu ki hono fakamahinoʻi mai ʻi he tohi māʻoniʻoní, ko ha foʻi moʻoni fakaofo mo fisifisimuʻa ia ne mei hē mei ai ʻa e tangatá. Naʻe folofola ʻa e Fakamoʻuí, “ʻOku lahi ʻeku Tamaí ʻiate Au;” [Sione 14:28] pea naʻá ne fakaafeʻi ʻene kau ākongá, hili ʻene toetuʻú, ke nau ala kiate ia mo vakai ko ia tonu pē ia, peá ne folofola, “He ʻoku ʻikai kakano mo hui ha laumālie, ʻo hangē ko ia ʻoku mou ʻiló ni ʻiate au.” [Luke 24:39.] Naʻe mahino lelei ki he kau ʻaposetoló ʻa e sino mavahevahe ʻa e Tamaí, ʻAló mo e Laumālie Māʻoniʻoní he naʻa nau toutou lave ki ai ʻi heʻenau ngaahi tohí; naʻe fakahā ʻe Paula ki he kakai Kolinitoó ʻa e foʻi moʻoni ko ia ko e taimi ʻoku fakavaivai ai e meʻa kotoa pē ki he Tamaí, “[ʻe] toki anganofo ʻa e Fohá kiate ia naʻá ne tuku ʻa e ngaahi meʻa kotoa pē ki lalo ʻiate iá, koeʻuhí ke tāfataha pē ʻa e ʻOtuá, ʻi he meʻa kotoa pē.” [1 Kolinitō 15:28.]
Naʻe mamata ʻa Siosefa Sāmita ki he Tamaí mo e ʻAló; ko ia ʻe malava ke ne fakamoʻoni ai ʻi he ʻiloʻi fakatāutaha naʻe moʻoni ʻa e folofolá ʻi heʻene hā ai: “Ko ia naʻe ngaohi ʻa e tangatá ʻe he ʻOtuá ʻi hono tataú, naʻá ne ngaohi ia ʻi he tatau ʻo e ʻOtuá, naʻá ne ngaohi ʻa kinaua ko e tangata mo e fefine.” [Sēnesi 1:27.] Ko ha meʻa ʻeni ia naʻe pau pē ke mahino lelei kae ʻikai ʻi ha founga ngalikehe pe ʻi he fakatātā.5
2
Kuo pau ke tau maʻu ha mahino ki Hono ʻulungāngá, ka tau fakaʻaongaʻi ʻetau tui ki he ʻOtuá pea tau hū kiate ia.
ʻOku tala mai ʻe he taha ʻo ʻetau ngaahi fakahaá kapau ʻe fakalangilangiʻi ʻa kitautolu ʻia Kalaisi, ʻo hangē ko ia ʻi he Tamaí, kuo pau ke tau ʻilo mo mahino ʻa e fakatouʻosi ʻa e founga ke hū mo ia ʻoku tau hū ki aí. (Vakai, T&F 93:19–20.)
ʻOku ou fakaʻamu ke fakamanatu atu ʻa e natula mo e ʻulungāanga ʻo e ʻOtuá, ke mou lava ʻo hū kiate ia ʻi he laumālie mo e moʻoni pea maʻu ai e ngaahi tāpuaki kotoa pē ʻo ʻene ongoongoleleí.
ʻOku tau ʻiloʻi ʻoku ʻiloʻi ʻa e ʻOtuá ʻi he fakahā, pea ʻokú ne tuʻu ke fakahā mai ha ngaahi meʻa pe taʻeʻiloa ʻo lauikuonga. Kuo pau ke tau ō ki he folofolá—kae ʻikai ko e kau mataotao he saienisí pe kau filōsefá—kapau ʻoku tau fie ʻilo e moʻoni fekauʻaki mo e ʻOtuá. Ko e moʻoni, ʻoku talamai ʻe he kikite maʻongoʻonga ʻa Sione ʻo kau ki hono toe fakafoki mai ʻo e ongoongoleleí ʻe ha ʻāngelo ʻe puna ʻi he lotolotonga ʻo e langí, ʻe pau ke hoko ia kae lava ke ʻiloʻi ʻe he tangatá ʻa e ʻOtua moʻoní mo akonekina kinautolu: “Manavahē ki he ʻOtuá, pea ʻoatu ʻa e fakamālō kiate ia … pea hū kiate ia naʻá ne ngaohi ʻa e langí mo e māmaní pea mo e tahí, mo e ngaahi matavai ʻo e ngaahi vaí.” (Fakahā 14:7.) Ko hono fakalea ʻe tahá, ne kamata ʻi hono toe fakafoki mai ʻo e ongoongoleleí ʻi he kuonga fakakōsipelí ni ʻa hono toe ui ʻo e kakaí ke nau hū mo tauhi ki honau Tupuʻangá, kae ʻikai ko e ngaahi fakakaukau hala ʻa e māmaní ʻo fekauʻaki mo e ʻOtuá.
Kuo ui ʻe he ʻEiki ha kau palōfita he kuonga kotoa pē ke nau fakafepakiʻi ʻa e lotu ki he ʻotua loí pea mo talaki e moʻoní fekauʻaki mo e ʻOtuá. ʻI ʻIsileli ʻo e kuonga muʻá, naʻe ʻi ai ha niʻihi ne nau hū ki ha ngaahi fakatātā mo ha ʻotua tamapua, pea fehuʻi ai ʻe ʻĪsaia: “Pea te mou fakatatau kia hai ʻa e ʻOtuá? Pe ko e hā ha fakatātā te mou fakatatau kiate iá?
“ʻIkai naʻá ke ʻilo? ʻIkai naʻá ke fanongo ko Sihova ko e ʻOtua taʻengata ia, ko e tupuʻanga ʻio e ngaahi ngataʻanga ʻo māmaní, ʻoku ʻikai pongia ia, pea ʻoku ʻikai vaivai? ʻOku taʻe faʻa ʻiloʻi ʻa ʻene ʻiló.” (ʻĪsaia 40:18, 28.)
ʻOku ʻi ai ha tokolahi he māmaní he ʻahó ni ʻoku ʻikai ke nau maʻu e ʻilo ko ʻeni ki he ʻOtuá, pea ʻoku ʻi ai foki mo ha kakai [ʻi he Siasí] ʻoku teʻeki ai ke haohaoa ʻenau ʻilo ki heʻetau Tamai Taʻengatá. ʻE lava ke tau pehē ki he niʻihi ʻoku ʻikai ke nau maʻu e ʻilo ko ʻení: “Ko e hā ʻokú ke fakangatangata ai e nāunau ʻo e ʻOtuá? Pe ko e hā ʻoku pehē ai ʻokú ne maʻulalo ange he meʻa ʻokú ne ʻi aí? Kuo teʻeki ai nai ke ke ʻilo? Kuo teʻeki ai nai ke ke fanongo ko e ʻOtua taʻengatá, ʻa e ʻEikí mo e Tupuʻanga ʻo e ngataʻanga ʻo e māmaní, ʻoku ʻikai hano ngataʻanga pea taʻengata: ʻokú ne kātoi e mālohi kotoa pē, mafeia e meʻa kotoa pē mo aoniu ʻi he meʻa kotoa pē; ʻokú ne ʻafioʻi nai e meʻa kotoa pē mo hangaifofonga mai ki he meʻa kotoa pē?”
ʻI he vahe 20 ʻo e Tokāteline mo e Ngaahi Fuakavá, ʻa ia ne fakahinohinoʻi ai e Palōfita ko Siosefa Sāmitá ke ne toe fokotuʻu e Siasí ʻi he kuonga fakakōsipelí ni, ʻoku ʻomi kongokonga lalahi ai ha niʻihi ʻo e ngaahi tefitoʻi tokāteline ʻo e fakamoʻuí. ʻOku pehē ai ʻe he fakahaá ʻo kau ki he ʻOtuá: “… ʻoku ʻi ai ha ʻOtua ʻi he langí, ʻa ia ʻoku taʻe fakangatangata mo taʻengata, ʻoku mei he taʻengatá ki he taʻengata ʻa ia ko e ʻOtua tatau ʻoku taʻe-faʻa-liliu, ko e tupuʻanga ʻo e langí mo e māmaní mo e meʻa kotoa pē ʻoku ʻi aí.” (T&F 20:17.) …
Ko e ʻOtuá ʻetau Tamaí; ko hono tataú ʻoku faʻu e tangatá ʻo fakatatau ki aí. ʻOkú Ne maʻu ʻa e sino kakano mo e hui ʻo hangē pē ko e tangatá (T&F 130:22), pea ko e tamai totonu mo fakatāutaha ia ʻo e laumālie ʻo e kakai kotoa pē. ʻOkú ne mafeia mo aoniu; ʻokú ne maʻu e mālohi mo e poto kotoa pē; pea ʻoku kau ʻi heʻene haohaoá ʻa e ʻilo kotoa pē, tui pe mālohi kotoa pē, fakamaau totonu kotoa pē, ʻaloʻofa kotoa pē, moʻoni kotoa pē pea mo hono kakato ʻo e ngaahi ʻulungāanga fakaʻotua kotoa pē. … Kapau te tau maʻu e tui haohaoa ko ia te tau maʻu ʻaki ʻa e moʻui taʻengatá, kuo pau ke tau tui ʻoku maʻu ʻe he ʻOtuá ʻa hono kakato ʻo e ngaahi ʻulungāanga mo e tōʻonga moʻui kotoa ko ʻení. ʻOku ou pehē foki ko ha tokotaha taʻefaʻalaua mo taʻengata ia, pea ʻoku ʻikai ke ne feliliuaki, ʻokú ne maʻu e ngaahi mālohi mo e ʻulungāanga haohaoa ko ʻení mei he lauikuongá ki he lauikuongá, ʻa ia ko hono ʻuhingá mei he taʻengatá ki he taʻengatá. 6
ʻOku tau ʻiloʻi ko ʻetau Tamai Hēvaní ko ha tokotaha nāunauʻia mo hakeakiʻi ʻokú ne maʻu e mālohi, ivi mo e pule kotoa pē pea ʻokú ne ʻafioʻi e meʻa kotoa pē. ʻOku tau fakamoʻoni ko ia ʻa e Tupuʻanga ʻo e māmaní mo e ngaahi māmani taʻe faʻalaua, ʻo fakafou ʻi Hono ʻAlo Tofu pē Taha Naʻe Fakatupú.7
3
Ko e ʻOtuá ko ha tokotaha fakatāutaha pea mo e Tamai ʻo hotau ngaahi laumālié.
Ko e fānau fakalaumālie kitautolu ʻa e ʻOtua ko ʻetau Tamai Hēvaní. … Ko ha mēmipa kitautolu ʻo hono fāmilí. … Naʻa tau nofo fuoloa mo ia ʻo laui kuonga ʻi he maama fakalaumālié. … Naʻá ne ʻomi ha palani ʻo e fakalakalaká mo e fakamoʻuí ʻe malava ai ke tau fakalakalaka mo laka kimuʻa kae ʻoua ke tau hoko ʻo hangē ko iá, ʻo kapau te tau faivelenga mo faitotonu ʻi he meʻa kotoa pē.8
ʻOku akoʻi kitautolu ʻi he Folofolá ko e ʻOtuá ko ʻetau Tamai Taʻengata moʻoní ia, kae ʻikai ʻi ha founga fakatātā pē. Ko e ngaahi lea ko ia ne folofola ʻaki ʻe hotau Huhuʻí kia Mele ʻi he veʻe faʻitoka kuó ne toetuʻu mei ai mo ne ikunaʻi ai ʻa e maté, ko e ngaahi lea fakaʻeiʻeiki mo nāunauʻia tahá ia: “ʻOua naʻa ala kiate au; he ʻoku teʻeki ai te u ʻalu hake ki heʻeku Tamaí: ka ke ʻalu ki hoku kāingá, ʻo tala kiate kinautolu ʻoku ou ʻalu hake ki heʻeku tamaí, mo hoʻomou Tamaí; pea ki hoku ʻOtuá, mo homou ʻOtuá.” [Sione 20:17.] ʻI he ngaahi leá ni, ʻoku fakahaaʻi taʻetoeveiveiua ai ʻa e moʻoni fekauʻaki mo e tuʻunga Fakatamai ʻo e ʻOtuá ʻe hono ʻAlo pē taha naʻe fakatupú, ʻa ia kuó ne tala ko hotau Taʻoketé ia pea ʻoku tau Tamai taʻengata pē ki he tokotaha tatau.9
ʻOku ou fakafetaʻi ki hono toe fakafoki mai e ʻilo fekauʻaki mo e ʻOtuá mo ʻene ngaahi fonó ʻi hotau kuongá pea ʻoku tau ʻiloʻi ʻe kitautolu kāingalotu ʻo e Siasí ko ha tokotaha fakatāutaha ia kae ʻikai hangē ko e lau ʻa ha kau lotu ʻe niʻihi, “ko ha falukunga fono [taʻemaau] ʻoku tētē hangē ha kakapu ʻi he ʻunivēsí.” ʻOku ou fakafetaʻi heʻetau ʻiloʻi ko ia ʻetau Tamai ʻi hēvaní, ko e Tamai hotau ngaahi laumālié pea naʻá ne ʻomi e ngaahi fonó ke tau lava ʻo fakalakalaka mo tupulaki ai kae ʻoua ke tau hoko ʻo hangē ko iá. Pea ʻoku ou fakafetaʻi ke ʻiloʻi ko ha tokotaha taʻefakangatangata mo taʻengata ia ʻokú ne ʻafioʻi e meʻa kotoa pē pea ne mafeia e meʻa kotoa pē pea ʻoku kau ʻi heʻene fakalakalaká ʻa hono maʻu ha ʻilo mo e mālohi ʻoku lahi angé, ʻo ʻikai ke toe fakahaohaoaʻi ʻaki hono ngaahi ʻulungāanga fakaʻotuá, ka ʻi hono fakalahi mo fakatupulaki hono ngaahi puleʻangá.10
4
ʻOku ʻofeina kitautolu ʻe he Tamai Hēvaní pea ʻokú ne tokanga mai kiate kitautolu fakatāutaha.
ʻOku ou manatu ki ha kupuʻi lea ʻi he Mataʻitofe Mahuʻingá, ʻi he mata-meʻa-hā-mai ʻa Mōsesé ʻa ia naʻe hoko he taimi naʻe ʻave ai ʻa Mōsese ki ha moʻunga māʻolunga ʻo ne fetalanoaʻaki mata-ki he-mata mo e ʻOtuá. Naʻe fakahā ʻe he ʻEikí kia Mōsese ʻa e “ngāue ʻa [Hono] nimá,” pea naʻe mamata ʻa Mōsese ki he māmaní pea mo e fānau kotoa ʻa e tangatá ʻo aʻu ki he toʻu tangata fakamuimuitahá. [Vakai, Mōsese 1:1–8, 27–29.]
Pea folofola ʻa e ʻEikí kia Mōsese:
“He vakai ʻoku ʻi ai ʻa e ngaahi māmani lahi kuo mole atu ʻi he folofola ʻo hoku mālohí. Pea ʻoku ʻi ai ʻa e ngaahi māmani lahi ʻoku kei tuʻú ni, pea ʻoku nau taʻefaʻalaua ki he faʻahinga ʻo e tangatá; ka ʻoku malaua ʻa e ngaahi meʻa kotoa pē kiate au he ʻoku ʻaʻaku ʻa kinautolu peá u ʻiloʻi ʻa kinautolu.
“Pea naʻe hoko ʻo pehē naʻe fakatau folofola ʻa Mōsese ki he ʻEikí ʻo pehē: Ke ke ʻaloʻofa ki hoʻo tamaioʻeikí, ʻe ʻOtua, pea fakahā kiate au ʻo kau ki he māmani ko ʻení, pea mo hono kakai ʻo iá, kae ʻumaʻā ʻa e ngaahi langí pea ʻe fiemālie ʻa hoʻo tamaioʻeikí.
“Pea naʻe folofola ʻa e ʻEiki ko e ʻOtuá kia Mōsese ʻo pehē: Ko e ngaahi langí, ʻoku lahi, pea ʻoku ʻikai lava ke faʻa lau ia ʻe he tangatá; ka ʻoku malaua ia kiate au he ʻoku ʻaʻaku ia.” [Mōsese 1:35–37.]
… ʻOku ou manatu ki he ʻikai lava ke malaua e lahi ʻo e māmaní pea mo hono lahi faufauá pea ʻikai hano ngataʻanga pea ʻikai ko e ngataʻangá ia. ʻOku faʻu ʻe he Tamaí e ngaahi māmaní ko e fakataumuʻa ke fakakakai—peá ne tuku ki ai hono ngaahi fohá mo e ʻofefiné. ʻOku talamai ʻi he vahe 76 ʻo e Tokāteline mo e Ngaahi Fuakavá naʻe fakafou ʻi he ʻAlo ʻo e ʻOtuá “e ngaahi māmá pea ko hono kakai ʻo iá, ko e ngaahi foha mo e ngaahi ʻofefine kuo fakatupu ki ha ʻOtua.” [T&F 76:24.]
ʻOku tau ako mei he folofola ne u toki lau atú pea mo ha ngaahi fakahā kehe mei he ʻEikí, ko e tangatá ʻa e fakatupu mahuʻinga taha ʻa ʻetau Tamaí. ʻI he meʻa-hā-mai tatau ne fai kia Mōsesé, naʻe folofola ai e Tamaí: “Pea ʻi he mole atu ʻa e māmani ʻe tahá pea mo hono ngaahi langi ʻo iá, ʻe pehē pē ʻene hoko mai ha toe māmani ʻe taha; pea ʻoku ʻikai hano ngataʻanga ʻo ʻeku ngaahi ngāué pe ko ʻeku ngaahi leá. He vakai ko ʻeku ngāué ʻeni mo hoku nāunaú —ke fakahoko ʻa e moʻui taʻe-faʻa-maté mo e moʻui taʻengata ʻa e tangatá.”[Mōsese 1:39.]
ʻOku ou pehē, mei he potu folofolá ni mo e ngaahi folofola kehé, ʻoku tau ako ai ko e ngāue maʻongoʻonga ʻa e Tamaí ko hono fakahoko ʻa e fakamoʻui ʻo ʻene fānaú pea foaki ki he taha kotoa pē ʻa e pale ko iá ʻo fakatatau mo ʻene ngaahi ngāué. ʻOku ou ongoʻi loto fakapapau ʻoku tokanga lahi ange ʻetau Tamai ʻi hēvaní ki he laumālié —ʻo ʻene fānaú—ʻo laka ange ia ʻi he tokanga ʻa ha tamai fakaemāmani ki heʻene fānaú. ʻOku mahulu ange ʻene ʻofa kiate kitautolú ʻi he ʻofa ʻoku maʻu ʻe ha mātuʻa fakaemāmani ki haʻane fānau.11
Ko Mōsese, ʻokú ne vakai heni ki he fonua ʻo e talaʻofá, naʻá ne maʻu ha meʻa-hā-mai ʻo ne ʻilo ai ki he ngāue mo e nāunau ʻo e ʻOtuá.
5
ʻOku tangi e Tamai Hēvaní koeʻuhí ko ʻEne fānau talangataʻá.
ʻOku fakahā mai kiate kitautolu ko e taimi naʻe folofola ai e ʻEikí kia ʻĪnoke mo fakahaaʻi kiate ia ʻa e ngaahi puleʻanga ʻo e māmaní mo fakamatalaʻi ange ʻa e natula ʻo e tautea ʻe tō kiate kinautolu koeʻuhí ko ʻenau maumauʻi ʻene ngaahi fonó mo e fekaú, naʻe tangi ʻa e ʻEikí mo fakahaaʻi ʻene loto mamahí ʻi heʻene tangi koeʻuhí ko ʻenau talangataʻá. ʻI he meʻá ni, naʻe ofo ai ʻa ʻĪnoke mo ne fakakaukau ko ha meʻa ngali kehe ia ke lava ʻa e ʻEikí ʻo tangi.
Ko e potu folofolá ʻeni:
“Pea naʻe hoko ʻo pehē naʻe ʻafio hifo ʻa e ʻOtua ʻo e langí ki hono toe ʻo e kakaí pea naʻá ne tangi; pea naʻe fakamoʻoni ki ai ʻa ʻĪnoke ʻo pehē: Ko e hā ʻa e meʻa ʻoku tangi ai ʻa e ngaahi langí, pea mokulu hifo honau loʻimatá ʻo hangē ko e ʻuha ki he ngaahi moʻungá?
“Pea naʻe pehē ʻe ʻĪnoke ki he ʻEikí: Ko e hā ʻa e meʻa ʻokú ke lava ai ke tangí, ka ʻokú ke māʻoniʻoni pea ʻokú ke ʻi ai, mei he taʻengatá kotoa ki he taʻengatá kotoa?
“Pea ka ne lava ʻe he tangatá ʻo lau ʻa e ngaahi momoʻi meʻa ʻo e māmaní, ʻio, ʻo e ngaahi māmani ʻe lau miliona ʻo hangē ko ʻení, ʻe ʻikai hoko ia ko hano kamataʻanga ʻo e lahi ʻo hoʻo ngaahi fakatupú; pea ʻoku kei fofola atu ai pē ʻa ho ngaahi puipuí; ka neongo iá ka ʻokú ke ʻi hena pē, pea ʻoku ʻi hena ʻa ho fatafatá; pea ʻokú ke angatonu foki; ʻokú ke ʻaloʻofa mo angaʻofa ʻo taʻengata.” [Vakai, Mōsese 7:28–30.]
Pea tali ange ʻe he ʻEikí: “…Vakai ki he faʻahingá ni ko ho kāingá; kuó u fakatupu ʻa kinautolu ʻaki hoku nima pē ʻoʻokú, pea naʻá ku foaki kiate kinautolu ʻa honau potó, ʻi he ʻaho naʻá ku fakatupu ai ʻa kinautolú, pea ʻi he Ngoue ʻo ʻĪtení naʻá ku foaki ai ki he tangatá ʻa ʻene tauʻatāina ke filí;
“Pea kuó u pehē ki ho kāingá, pea kuó u fai foki ʻa e fekau ke nau feʻofaʻaki ʻiate kinautolu, pea ke nau fili au ʻa ia ko ʻenau Tamaí; kae vakai ʻoku ʻikai haʻanau ʻofa, pea nau fehiʻa ki honau toto ʻonautolú pē.” [Mōsese 7:32–33.]
Ko e ngaahi ʻuhinga ʻeni naʻe tangi ai ʻa e ʻEikí pea mo e ngaahi langí.
Ne fehuʻi mai ʻe ha tangata he ʻaho ʻe taha, pe ʻe lava ke haohaoa e fiefia ʻa ha tangata ʻi he puleʻanga silesitialé ʻo kapau he ʻikai fakangofua ha taha ʻo ʻene fānaú ke hū ki ai. Ne u talaange, ki ai ʻoku ou tui pē kapau ʻe ʻi ai ha tangata ʻe taʻofi ha taha ʻo ʻene fānaú mei he puleʻanga fakasilesitialé, te ne ongoʻi loto mamahi ai; pea ko e tuʻunga pē ia ʻoku ʻi ai ʻetau Tamaí. ʻOku ʻikai taau kotoa ʻene fānaú ke maʻu ha nāunau fakasilesitiale, pea ʻoku ʻi ai ha tokolahi kuo pau ke nau aʻusia e haʻahaʻa ʻo ʻene houhaú koeʻuhí ko ʻenau maumaufonó, pea ʻe tupu ai ha lotomamahi mo e tangi ʻa e Tamaí mo e langí kotoa. ʻOku ngāue ʻa e ʻEikí ʻo fakatatau mo e lao fakanatulá. Kuo pau ke huhuʻi ʻa e tangatá ʻo fakatatau mo e laó pea ko hono palé kuo pau ke fakatatau ia mo e fono ʻo e fakamaau totonú. Pea ʻi he meʻá ni, he ʻikai foaki ai ʻe he ʻEikí ki he tangatá ha meʻa ʻoku ʻikai taau ke nau maʻu, ka ne fakapaleʻi ʻa e tangatá ʻo fakatatau mo ʻenau ngaahi ngāué.
… ʻOku ou ongoʻi fiemālie kapau ne malava, ke hanga ʻe heʻetau Tamai ʻi hēvaní ʻo fakahaofi ʻa e kakai kotoa pē pea foaki kiate kinautolu ʻa e nāunau fakasilesitialé, ʻa e kakato ʻo e hakeakiʻí. Ka kuó ne foaki ki he tangatá ʻa ʻene tauʻatāina ke filí pea ʻoku fie maʻu ai ke talangofua ʻa e tangatá ki he moʻoní ʻo fakatatau mo ia kuo fakahā maí kae lava ke ne aʻusia ʻa hono hakeakiʻi ʻo e kau angatonú.12
6
Kuo ʻomi ʻe he Tamai Hēvaní ʻa e hala ʻo e huhuʻí ke tau lava ʻo foki mai ki Hono ʻaó.
ʻI he taimi naʻe nofo ai ʻa ʻĀtama ʻi he Ngoue ko ʻĪtení, naʻá ne ʻi he ʻao ai ʻo e ʻOtua ko ʻetau Tamaí. … Hili hono kapusi ia mei he Ngoue ko ʻĪtení, naʻe liliu e meʻa ne hokó. Naʻe motuhi ʻa ʻĀtama mei he ʻao ʻo e Tamaí koeʻuhí ko ʻene maumaufonó. ʻOku pehē ʻe he folofolá naʻá ne mate fakalaumālie —ʻa ia naʻe motuhi mei he ʻao ʻo e ʻOtuá.13
ʻOku ou ʻilo ko Sīsū Kalaisi ʻa e ʻAlo ʻo e ʻOtuá pea naʻá ne maʻu mei heʻene Tamaí ʻa e mālohi ke veteange ʻa e tangatá mei he mate fakalaumālie mo fakaesinó naʻe hoko mai ki he māmaní tuʻunga ʻi he Hinga ʻa ʻĀtamá.14
Naʻe taha pē ʻa e founga ki he huhuʻí, ʻa ia ko ha founga ʻe lava ke fai ai ha fakalelei, pea toe fakafoki ʻa e laumālié ki he sinó; pea naʻe fakafou ia ʻi he fakalelei taʻefakangatangatá, pea naʻe pau ke fai ia ʻe ha tokotaha taʻengata, ko ha taha naʻe ʻikai moʻulaloa ki he maté ka naʻá ne maʻu e mālohi ke ikunaʻi e maté. Ko ia ne fekauʻi mai ai ʻe heʻetau Tamai ʻi hēvaní ʻa hono ʻAlo ko Sīsū Kalaisí ki he māmaní ke foaki ʻene moʻuí. Pea koeʻuhí naʻá ne [Sīsū Kalaisi] maʻu ha faʻē naʻe fetāfeaki e totó ʻi hono kālavá, naʻá ne maʻu ai e mālohi ke mate. Naʻe lava ke ne moʻulaloa ki he maté peá ne toe tuʻu hake mei ai. Tuku muʻa ke u lau atu ʻene folofolá: “Ko ia ʻoku ʻofa ai ʻa ʻeku Tamaí kiate au, ko e meʻa ʻi heʻeku tuku hifo ʻeku moʻuí, ka u toe toʻo hake iá.
“ʻOku ʻikai ke toʻo ia ʻe ha taha ʻiate au, ka ʻoku ou tuku hifo ia ʻe au pē. ʻOku ou mafai ke tuku hifo ia, pea ʻoku ou mafai ke toe toʻo ia. Ko e fekaú ni kuó u maʻu mei heʻeku Tamaí.” (Sione 10:17–18.)15
Naʻe ʻikai ʻaupito fakataumuʻa ʻetau Tamai ʻi hēvaní ʻatautolu ke tuku pē kakaí ke nau taufā holo he fakapoʻulí taʻe ʻi ai ha maama ke ne tataki kinautolu mo ne ʻamanaki mai he tuʻunga ko iá ke nau takitaha kumi honau hala ke toe foki ange ai ki hono puleʻangá pea mo hono ʻafioʻanga māʻoniʻoní. ʻOku ʻikai ko e founga ia ʻa e ʻEikí. Talu mei he kamataʻangá mo hono fakahaaʻi ʻe heʻetau Tamaí ʻi hēvaní ʻene angaʻofa ki heʻene fānaú mo ʻene loto fiemālie ke fakahinohinoʻi kinautolú. Talu mei he kuonga muʻa mo e fakaava mai ʻa e ngaahi langí pea fekauʻi mai ʻe he ʻEikí ha kau talafekau mei hono ʻaó ke nau fili fakalangi ha kau tamaioʻeiki, ko ha kau tangata ke nau maʻu e mafai ʻo e lakanga fakataulaʻeikí pea kuo fakamafaiʻi ke nau akoʻi ʻa e ngaahi tefitoʻi moʻoni ʻo e Ongoongoleleí, ke fakatokanga ki he kakaí mo akoʻi kiate kinautolu ʻa e angamāʻoniʻoní; pea kuo maʻu ʻe he kau tangatá ni ʻa e ʻilo ko ʻení, ʻa e ueʻi fakalaumālie mo e tataki mei he kau talafekau ko ʻeni mei he ʻao ʻo e ʻOtuá. ʻOku moʻoni ʻeni ʻi hotau kuonga fakakōsipelí ni. ʻOku ʻikai fie maʻu ke kuikui ʻa e kakaí pea nau ongoʻi ʻoku ʻikai ha maama tukukehe kapau ʻoku nau fakafalala pē ki heʻenau takitaha fakaʻuhinga, he kuo loto fiemālie maʻu pē ʻa e ʻEikí ke ne tataki mo fakahinohinoʻi pea mo fakahā mai ʻa e halá. Hangē ko ʻeku laú, kuó ne fekau mai ha kau talafekau mei hono ʻaó. Kuó ne ʻomi ha fakahā. Kuó ne fekau mai ke tohi ʻene ngaahi leá pea pulusi ke lava ʻo ʻiloʻi ia ʻe he kakai kotoa pē.16
ʻOku ou tala kiate kimoutolu mo e Siasí fakakātoa, pea mo e māmaní kotoa ʻi he meʻa ko iá, kuo folofola mai ha Tamai mohu ʻaloʻofa mo angaʻofa ʻi he ngaahi ʻaho fakaʻosí ni mei he langí ki heʻene kau tamaioʻeiki ko e kau palōfitá.
Kuo ongo mai hono leʻó ʻo fakaafeʻi ʻa e kakai kotoa pē ke nau haʻu ki hono ʻAlo ʻOfaʻangá ʻo ako ʻiate ia, mo ʻinasi ʻi heʻene ngaahi leleí, pea toʻo kiate kinautolu ʻa ʻene haʻamongá pea ngāueʻi honau fakamoʻuí ʻaki ʻenau talangofua ki he ngaahi fono ʻo e ongoongoleleí. Ko hono leʻó ko ha leʻo ia ʻo e nāunau mo e lāngilangi, ʻo e melino ʻi he moʻuí ni pea mo e moʻui taʻengatá ʻi he maama ka hoko maí.17
Ngaahi Fokotuʻu ki Hono Ako mo Akoʻí
Ngaahi fehuʻi
-
ʻOkú ke pehē ko e hā ha meʻa ʻokú ne tataki ha taha ke ne lava ʻo lotu ki he ʻOtuá ʻo hangē pē “haʻane talanoa ki hano kaungāmeʻá”? (“Mei he Moʻui ʻa Siosefa Filitingi Sāmitá”). Fakakaukau ki ha ngaahi founga ʻe lava ke mou fakamālohia ai homou vā mo e Tamai Hēvaní.
-
Naʻe fakahaaʻi ʻe Palesiteni Sāmita ʻene houngaʻia ʻi he ʻUluaki Mata-meʻa-hā-mai ʻa Siosefa Sāmitá, ʻa ia ne toe fakafoki mai ai ʻa e “ʻilo totonu ʻo fekauʻaki mo e ʻOtuá” (vakai ki he konga 1). Ko e hā ha ngaahi moʻoni ʻokú ke ʻiloʻi fekauʻaki mo e ʻOtua ko e Tamaí pea mo Sīsū Kalaisi tuʻunga ʻi he ʻUluaki Mata-meʻa-hā-maí?
-
ʻI he ngaahi ʻulungaanga ʻo e ʻOtuá ne fakamatalaʻi ʻe Palesiteni Sāmita ʻi he konga 2, ko e fē ʻiate kinautolu ʻoku mahuʻinga mālie taha kiate koe? Ko e hā hono ʻuhingá? ʻI hoʻo fakahaaʻi ʻa e tui ki hoʻo Tamai Hēvaní, ʻoku tokoniʻi fēfē koe ʻi hoʻo ʻilo ki Hono ngaahi ʻulungāngá?
-
Naʻe fakamoʻoni ʻa Palesiteni Sāmita ʻo pehē: “Ko e fānau fakalaumālie kitautolu ʻa e ʻOtua ko ʻetau Tamai Hēvaní. … Ko e mēmipa kitautolu ʻo hono fāmilí” (konga 3). Kuo tākiekina fēfē koe ʻe he moʻoni ko ʻení?
-
ʻI he konga 4 mo e 5, ko e hā ha ngaahi kupuʻi lea ʻokú ne tokoniʻi koe ke ke ongoʻi e ʻofa ʻoku maʻu ʻe he Tamai Hēvaní kiate koé? Ko e hā ʻoku mahuʻinga ai ke mahino ʻoku ʻofeina mo tokanga fakatāutaha mai ʻa e ʻOtuá kiate kitautolú? Ko e hā ha founga te tau lava ai ʻo tokoniʻi ʻa e kau mēmipa ʻo e fāmilí mo e kaungāmeʻá ke nau ongoʻi ʻEne ʻofá?
-
Fakakaukau angé ki he meʻa kuo fai ʻe he Tamai Hēvaní ke tokoni atu ke ke toe foki ange ai ki Hono ʻaó (vakai ki he konga 6). Ko e hā e ngaahi ongo ʻokú ke maʻu ʻi hoʻo fakakaukau atu ki hono fekauʻi mai ʻe he Tamai Hēvaní ʻa Hono ʻAlo ʻOfaʻangá? Ko e hā ha ngaahi founga kuo fekauʻi mai ai ʻe he Tamai Hēvaní ha “maama ke tataki [koé]”?
Potu Folofola Fekauʻakí
Tokoni Fakafaiako
“ʻOku lahi ha akoʻi ʻoku fai ʻi he Siasí ʻi he founga fefeka, ko ha malanga. ʻOku ʻikai ke tau faʻa tali lelei ʻa e malanga ʻi lokiakó. ʻOku tau tali ia ʻi he houalotu sākalamēnití mo e konifelenisí, ka ʻe lava ʻa e akoʻí ke tafaʻaki ʻe ua ke ke lava ʻo fai ha ngaahi fehuʻi. ʻE faingofua pē hono kamataʻi ʻo ha ngaahi fehuʻi ʻi he kalasí” (Boyd K. Packer, “Principles of Teaching and Learning,” Ensign, June 2007, 87).