Vahe 18
Ko Hono Moʻuiʻaki e Folofola Kotoa pē ʻoku Tō mei he Fofonga ʻo e ʻOtuá
“Ko e ngāue māʻolunga taha ʻo e lotú ke tauhi ʻa e ngaahi fekaú, ke molomolo-muivaʻe ʻi he ʻAlo ʻo e ʻOtuá, ke fai ʻa e ngaahi meʻa kotoa pē ʻoku fakahōifua ki aí.”
Mei he Moʻui ʻa Siosefa Filitingi Sāmitá
Naʻe fakahā ʻe Palesiteni Siosefa Filitingi Sāmita, “ʻOku ou feinga ki hoku fakamoʻuí, pea ʻoku ou ʻilo te u toki maʻu pē ia ʻi he talangofua ki he ngaahi fono ʻa e ʻEikí ʻi he tauhi ʻo e ngaahi fekaú, ʻi hono fakahoko e ngaahi ngāue ʻo e māʻoniʻoní, ʻo molomolo-muivaʻe ʻi hotau takí, ʻa Sīsū, ko e faʻifaʻitakiʻanga pea mo e ʻulu ki he taha kotoa pē” 1
Makehe mei heʻene feinga ki hono fakamoʻuí, naʻe toe ngāue faivelenga ʻa Palesiteni Sāmita ke tokoniʻi ʻa e niʻihi kehé ke nau fai e meʻa tatau. Naʻe pehē ʻe ʻEletā Falanisisi M. Kīponi, ʻa ia naʻe hoko ko ha sekelitali ki he Kau Palesitenisī ʻUluakí, naʻe lau ʻe Palesiteni Sāmita “ko hono fatongia ke fai ha leʻo ʻo e fakatokangá ʻi he taimi ʻoku kamata ai ʻa e kakaí ke hē atu mei he hala kuo ʻosi fakaʻilongaʻi ʻe he ngaahi folofolá. Pea naʻe ʻikai haʻane fakakaukau ke liʻaki e fatongia ko iá, tatau ai pē pe ko e hā ha lau ʻa ha taha. Naʻe ʻai ia ʻe heʻene leá ke taʻe-manakoa ʻi ha ngaahi haʻofanga ʻe niʻihi ka naʻe hangē naʻe ʻikai ke ne uesia iá; naʻe ʻikai ko ʻene taumuʻá ke manakoa pe ʻiloa ʻi he mata ʻo e kakaí. Ka, naʻá ne lau hono fatongiá ʻoku tatau mo ha tangata leʻo ʻi he funga tauá ʻa ia ko hono fatongiá ke fakaongo atu ʻa e fakatokangá kiate kinautolu ʻi lalo ʻoku ʻikai ke nau lava ʻo mamata ki he fākaofi mai ʻa e fakatuʻutāmakí.”2
Naʻe vahevahe ʻe Palesiteni Sāmita ʻi ha meʻa ʻe taha ha aʻusia naʻá ne fakafōtungaʻi ʻa e liliu ʻo e lotó, ʻe lava ke hoko ki ha taha ʻoku talangofua ki he leʻo ʻo e fakatokangá:
“Naʻá ku ʻalu ki ha konifelenisi fakasiteiki ʻi he ngaahi taʻu lahi kuo hilí ʻo lea ʻi he Lea ʻo e Potó. … Ko e taimi naʻá ku ʻalu ai ki he konga ki mui ʻo e falé [ʻi he ʻosi ʻa e konifelenisí,] kuo mei ʻosi kotoa he mātuku, ka naʻe mono mai ʻe ha tangata hono nimá mo pehē mai:
“‘Misa Sāmita, ko e fuofua malanga ʻeni ʻi he Lea ʻo e Potó kuo faifaiangé peá u saiʻia ai.’
“Naʻá ku pehē ange leva: ‘Kuo teʻeki ke ke fanongo koe ʻi he ngaahi malanga kehe ʻi he Lea ʻo e Potó?’
“Talamai ʻe ia: ‘ʻIo, ka ko e fuofua malanga ʻeni kuo faifaiangé peá u saiʻia ai.’
“Ne u pehē ange leva: ‘ʻO anga fēfē?’
“Talamai ʻe ia: ‘ʻOkú ke ʻilo, ʻoku ou tauhi ʻa e Lea ʻo e Potó he taimí ni.’”3
Ngaahi Akonaki ʻa Siosefa Filitingi Sāmitá
1
ʻOku puleʻi ʻe he ʻOtuá e ʻunivēsí ʻaki e fonó, pea ʻoku tau moʻulaloa ki he fono ko iá.
ʻOku totonu ke tali ʻe he kakai kotoa pē, koeʻuhí ʻoku puleʻi ʻe he Fungani Māfimafí ʻa e ʻunivēsí fakakātoa ʻaki ha fono taʻe-faʻaliliua, kuo pau leva ke fakamoʻulaloaʻi ʻe he tangatá ia, ʻa ia ko e lelei taha ʻi heʻene ngaahi fakatupú kotoa, ki he faʻahinga fono ko iá. Kuo ʻosi fakahā fakapatonu mo mahino ʻe he ʻEikí ʻa e foʻi moʻoni ko ʻení ʻi ha fakahā ki he Siasí:
“ʻOku tuku ha fono ki he ngaahi puleʻanga kotoa pē;
“Pea ʻoku lahi ʻa e ngaahi puleʻangá; he ʻoku ʻikai ke ʻi ai ha ʻataʻatā ʻa ia ʻoku ʻikai ke taʻe-ʻi ai ha puleʻanga; pea ʻoku ʻikai ke ʻi ai ha puleʻanga ʻa ia ʻoku ʻikai ke ʻi ai ha ʻataʻatā, pe ko ha puleʻanga lahi ange pe siʻi ange.
“Pea ʻoku tuku ki he puleʻanga kotoa pē ha fono; pea ʻoku ʻi he fono kotoa pē ha ngaahi ngataʻanga mo ha ngaahi tuʻunga foki.
“Ko e kakai kotoa pē ʻoku ʻikai nofo maʻu ʻi he ngaahi tuʻunga ko iá, ʻoku ʻikai fakatonuhiaʻi ʻa kinautolu.” (T&F 88:36–39.)
ʻOku mahino ʻa e foʻi moʻoni ko ʻení ʻiate ia pē. Ko ia, ʻoku ʻuhinga lelei leva ke tau fie maʻu e puleʻanga ʻo e ʻOtuá ke puleʻi ʻe he fonó pea mo kinautolu kotoa ʻoku nau holi ke hū ki ai ʻo moʻulaloa ki he fonó. “Vakai, ko hoku falé ko ha fale ia ʻo e maau, ʻoku folofola ʻe he ʻEiki ko e ʻOtuá, pea ʻoku ʻikai ko ha fale ʻo e moveuveu.” (T&F 132:8.)
Kuo ʻosi foaki ʻe he ʻEikí ki he tangatá ha ngaahi fono ʻa ia ʻoku tau ui ko e ongoongolelei ʻo Sīsū Kalaisi. Koeʻuhí ko e siʻi ʻo e fakahā mo e fakahinohino fakalaumālié, ʻe ala kehe ai ʻa e fakafeangainga ʻa e tangatá ki he ngaahi fono ko ʻení pea mo honau fakaʻaongaʻí, ka ʻe siʻisiʻi ke toe ʻi ai ha fakakikihi fekauʻaki mo e foʻi moʻoni ko ia ʻoku ʻi ai e faʻahinga fono ko iá, pea ko kinautolu kotoa ʻoku feinga ke hū ki he puleʻangá ʻoku nau moʻulaloa ki ai.4
ʻOku tau maʻu ʻa e moʻoni, tokāteline, fono pea mo e fiemaʻu, ngāue pea mo e ouau kotoa pē ʻoku fie maʻu ke fakahaofi mo hākeakiʻi ai kitautolu ʻi he langi taupotu ʻo e maama fakasilesitialé.5
2
Ko hono tauhi ʻo e ngaahi fekaú ko hano fakahaaʻi ia ʻo ʻetau ʻofa ki he ʻEikí.
Ko hotau fatongia ʻi he Siasí ke hū ki he ʻEikí ʻi he laumālie pea ʻi he moʻoni, pea ʻoku tau feinga ʻi he meʻá ni ke fakahoko ʻaki hotau lotó, iví, mo e mālohi kotoa. Naʻe pehē ʻe Sīsū: “Ke ke hū ki he ʻEiki ko ho ʻOtuá, pea ko ia pē te ke tauhí.” (Mātiu 4:10.)
ʻOku tau tui ʻoku mahulu hake ʻa e huú ʻi he lotú mo hono malangaʻí pea mo e muimui ki he ongoongoleleí. Ko e ngāue māʻolunga taha ʻo e huú ke tauhi ʻa e ngaahi fekaú, ke molomolo-muivaʻe ʻi he ʻAlo ʻo e ʻOtuá, ke fai ʻa e ngaahi meʻa kotoa pē ʻoku fakahōifua ki aí. Ko ha meʻa kehe ʻa e tokoni pē ʻi he leá ki he ʻEikí; ka ko ha toe meʻa kehe pē ke fakaʻapaʻapaʻi hono finangaló ʻaki e muimui ʻi he sīpinga kuó ne tā maʻatautolú. … ʻOku ou fiefia ʻi he faingamālie ke molomolo-muivaʻe ʻiate iá. ʻOku ou fakafetaʻi ʻi he ngaahi lea ʻo e moʻui taʻengatá kuó u maʻú, pea ʻoku ou mātuʻaki fiefia ke pehē, ʻi he māmani ko ʻení, pea mo e ʻamanaki ki he moʻui taʻengata ʻoku ʻaʻaku ʻi he maama ka hoko maí kapau te u faivelenga mo moʻoni ki he ngataʻangá.6
“Kapau ʻoku mou ʻofa kiate au, fai ʻeku ngaahi fekaú” (Sione 14:15).
Ko e fono ʻeni ki he kāingalotu ʻo e Siasí, ʻi he folofola ʻa e Fakamoʻuí: “Ko ia ʻokú ne maʻu ʻeku ngaahi fekaú, ʻo fai ki aí, ko ia ia ʻoku ʻofa kiate aú. …” (Sione 14:21.) Pea naʻe toe folofola ʻa e Fakamoʻuí: “Kapau ʻoku mou ʻofa kiate au, fai ʻeku ngaahi fekaú.” (Sione 14:15.) …
Naʻe ʻikai ke teitei fakahoko ʻe he Fakamoʻuí ha angahala pe maʻu ha konisēnisi halaia. Naʻe ʻikai haʻisia ia ke fakatomala ʻo hangē ko koe mo aú; ka ʻoku ʻi ai ha founga ʻoku ʻikai mahino kiate au, naʻá ne fuesia ʻa e mamafa ʻo ʻeku ngaahi maumau-fonó mo haʻaú. … Naʻá ne hāʻele mai ʻo ne foaki ia ko ha feilaulau ke totongi e moʻua ʻo kitautolu kotoa pē ʻoku fie fakatomala mei heʻene ngaahi angahalá pea foki kiate ia mo tauhi ʻene ngaahi fekaú. Fakakaukau ki ai, kapau te ke lava. Naʻe fuesia ʻe he Fakamoʻuí ʻa e kavenga ko iá ʻi ha faʻahinga founga ʻoku mahulu atu ʻi heʻetau mahinó. ʻOku ou ʻiloʻi ia, koeʻuhí he ʻoku ou tali ʻene folofolá. ʻOkú ne fakahā mai ʻa e mamahi naʻá ne fouá; naʻe tōtuʻa ʻa e mamahí ʻo ne tautapa ai ki heʻene Tamaí kapau ʻoku malava ke oua naʻa inu ʻi he ipú pea holomui: “… kae ʻoua naʻa fai hoku lotó, ka ko e finangalo ʻoʻoú.” (Luke 22:42.) Ko e tali naʻá ne maʻu mei heʻene Tamaí, “Kuo pau ke ke inu ia.”
ʻE lava ʻo taʻofi ke ʻoua te u ʻofa ai? ʻIkai, he ʻikai ke u lava. ʻOkú ke ʻofa ai? Pe tauhi ʻene ngaahi fekaú.7
3
Kapau te tau sītuʻa mei he ngaahi fekau ʻa e ʻEikí, ʻoku ʻikai totonu ke tau ʻamanaki te tau maʻu ʻEne ngaahi tāpuakí.
Ko e taimi ʻoku tau sītuʻa ai mei he ngaahi fekau kuo foaki ʻe he ʻEikí kiate kitautolu ko hotau fakahinohinó, ʻoku ʻikai haʻatau totonu ke ʻekeʻi ʻene ngaahi tāpuakí.8
Ko e hā hano lelei kiate kitautolu ke tau kole ki he ʻEikí, kapau ʻoku ʻikai haʻatau taumuʻa ke tauhi ʻEne ngaahi fekaú? Ko e faʻahinga lotu peheé ʻoku hoko ko ha manuki noa pē pea mo ha fakatupu houhau ʻi he ʻao e taloni ʻo e ʻaloʻofá. He toki meʻa taʻe-mīngao ʻa ʻetau fie maʻu ha tali lelei kapau ko e angá ia? “Mou kumi ki [he ʻEikí] ʻi he lolotonga ʻoku faʻa ʻilo iá, ui kiate ia ʻi he ʻene kei ofí: Tuku ke liʻaki ʻe he angahalá hono halá, mo e tangata taʻe-māʻoniʻoní ʻene ngaahi mahaló: pea tuku ke ne foki [ki he ʻEikí], pea te ne ʻaloʻofa kiate ia; pea ki hotau ʻOtuá, he te ne fakamolemole ʻo lahi ʻaupito.” Ko e lau ia ʻa ʻĪsaiá (ʻĪsaia 55:6–7). Ka ʻoku ʻikai ʻapē ofi maʻu pē ʻa e ʻEikí ʻi he taimi ʻoku tau lotu ai kiate Iá? Ko e moʻoni ʻoku ʻikai! Kuó ne ʻosi folofola, “Naʻa nau fakatuai ke tokanga ki he leʻo ʻo e ʻEiki ko honau ʻOtuá; ko ia, naʻe fakatuai ʻe he ʻEiki ko honau ʻOtuá ke ʻafio ki heʻenau ngaahi lotú, ke tali kiate kinautolu ʻi he ʻaho ʻo ʻenau faingataʻaʻiá. ʻI he ʻaho ʻo ʻenau nofo melinó, naʻa nau meʻavaʻinga ʻaki ʻeku ngaahi akonakí; ka, ʻi he ʻaho ʻo ʻenau faingataʻaʻiá, ʻoku nau taufā mai kiate au” [T&F 101:7–8]. Kapau ʻoku tau ʻunuʻunu ʻofi kiate Ia, te ne ʻunuʻunu ofi mai kiate kitautolu, pea he ʻikai ke tau tuēnoa; ka kapau he ʻikai ke tau ʻunuʻunu ofi kiate Ia, ʻoku ʻikai haʻatau talaʻofa te Ne tali mai ʻi heʻetau angatuʻú.9
He ʻikai ke tau lava ʻo lotu ki he ʻEikí ʻo pehē: “ʻAfio mai ki heʻemau fiemaʻú, ʻomi ke mau ikuna, fai e meʻa ʻoku mau loto ke faí, kae ʻoua te ke kole mai ke mau fai e meʻa ʻokú ke finangalo ke mau faí.”10
ʻOku fie maʻu ke tau ʻaʻeva ʻi he maama kakato ʻo e moʻoní, ʻo ʻikai fakakonga pē ʻi he moʻoní. ʻOku ʻikai ʻaʻaku ha totonu ke siʻaki ha niʻihi ʻo e ngaahi tefitoʻi moʻoni ʻo e ongoongoleleí kae tui ki ha ngaahi meʻa kehe, pea ongoʻi ʻoku ʻi ai haʻaku totonu ki he ngaahi tāpuaki ʻo e fakamoʻuí mo e hākeakiʻi ʻi he puleʻanga ʻo e ʻOtuá. Kapau ʻoku tau fie maʻu ʻa e hakeakiʻí, kapau ʻoku tau fie maʻu ʻa e potu kuo teuteu ʻe he ʻEikí maʻanautolu ʻoku faivelenga mo moʻoní, pea tā kuo pau ke tau loto fiemālie ke ʻaʻeva ʻi he maama kakato ʻo e ongoongolelei ʻo Sīsū Kalaisí, mo tauhi kotoa e ngaahi fekaú. He ʻikai ke tau lava ʻo pehē ʻoku iiki hanau niʻihi mo ʻikai mahuʻinga pea he ʻikai leva tokanga ʻa e ʻEikí kapau te tau maumauʻi kinautolu. Kuo fekauʻi kitautolu ke tau moʻui fakatatau mo e meʻa kotoa pē ʻoku haʻu mei he fofonga ʻo e ʻOtuá [vakai, Teutalōnome 8:3; T&F 98:11]. “Pea ko e hā ʻoku mou ui ai au, ʻEiki, ʻEiki, kae ʻikai fai ʻa e ngaahi meʻa ʻoku ou talá?” [Vakai, Luke 6:46.]11
ʻE lava ʻa e mātuʻá ʻo tokoniʻi ʻenau fānaú ke nau “ʻaʻeva ʻi he maama kakato ʻo e moʻoní.”
4
ʻOku tau ʻi he hala ki he haohaoá ʻi he taimi ʻoku tau tauhi ai ʻa e ngaahi fekau ʻa e ʻEikí.
ʻOku finangalo ʻa e ʻEikí ke tau tui ange kiate ia, ke tau tali ʻene ongoongolelei taʻengatá, pea ke tau moʻui fakatatau mo ʻene ngaahi fiemaʻú. ʻOku ʻikai ʻatautolu ke fili mo talangofua pē ki he ngaahi tefitoʻi moʻoni ʻo e ongoongoleleí ʻoku matamata-lelei kiate kitautolú kae liʻaki ʻa e toengá. ʻOku ʻikai totonu ke tau pehē ʻoku ʻi ai ha ngaahi tefitoʻi moʻoni ʻoku ʻikai toe kaunga ia ki hotau ngaahi tuʻunga fakasosialé mo e anga fakafonuá.
Ko e ngaahi fono ʻa e ʻEikí ʻoku taʻengata, pea kuo tau maʻu ʻa e kakato ʻo ʻene ongoongolelei taʻengatá mo tau haʻisia ke tui ki he kotoa ʻo ʻene ngaahi fonó mo e moʻoní pea ʻaʻeva fakatatau mo kinautolu. ʻOku ʻikai ha meʻa ia ʻe toe mahuʻinga ange ki ha taha fakafoʻituitui ka ko hono tauhi e ngaahi fekau ʻa e ʻEikí. ʻOku finangalo ke tau pīkitai ki he tefitoʻi-moʻoni moʻoni kotoa pē, ke fakamuʻomuʻa ʻi heʻetau moʻuí ʻa e ngaahi meʻa ʻo hono puleʻangá, ke tuiaki atu ʻi he mateakiʻi ʻo Kalaisí, pea mo tauhi kiate ia ʻaki hotau ivi, ʻatamai, mo e mālohi kotoa. Tau fanongo muʻa ki he fakalea ʻa e folofolá, ki hono fakaʻosinga ʻo e meʻa kotoa pē ko ʻení: “Ke ke manavahē ki he ʻOtuá, peá ke fai ki heʻene ngaahi fekaú: he ʻoku kātoa ʻi he ngaahi meʻá ni ʻa e ngāue totonu ʻa e tangatá.” (Tangata Malanga 12:13.)12
ʻOku ou faʻa fakakaukau, pea ʻoku ou tui ʻoku pehē mo kimoutolu foki, ki he malanga maʻongoʻonga mo fakaofo ko iá—ʻa e maʻongoʻonga taha kuo faifaiangé pea malangaʻi, ʻo fakatatau mo ʻetau ʻiló—ʻa ia ʻoku tau ui ko e Malanga ʻi he Moʻungá. … Kapau te tau tokanga ki he ngaahi akonaki ko iá, te tau lava ʻo toe foki ki he ʻao ʻo e ʻOtua ko e Tamaí, mo Hono ʻAlo ko Sīsū Kalaisí.
ʻOku ou faʻa fakakaukau ki ai he ko hono moʻoní ko e aofangatuku:
“Ko ia ke haohaoa ʻa kimoutolu he ʻoku haohaoa ʻa hoʻomou Tamai ʻoku [ʻi] he langí.” Mātiu 5:48
… ʻOku ou tui ko e fakamātoato ʻa e ʻEikí ʻi he meʻa kuó Ne folofolaʻakí, ʻoku totonu ke tau haohaoa, he ʻoku haohaoa ʻa ʻetau Tamai ʻi he langí. He ʻikai ke lava ʻo hoko fakaʻangataha ia, ka ʻi he ʻotu lea ki he ʻotu lea mo e akonaki ki he akonaki, ʻi he sīpinga ki he sīpinga, pea naʻa mo ia, he ʻikai lava ʻi heʻetau nofo ʻi he moʻui fakamatelie ko ʻení, he kuo pau ke tau fakalaka atu ʻi he faʻitoká ki muʻa pea tau toki aʻu ki he haohaoa ko iá pea tau toki hangē ko e ʻOtuá.
Ka ʻi hení, ʻoku tau fokotuʻu ai ha fakavaʻe. Ko e feituʻu ʻeni ʻoku akoʻi ai kitautolu ʻi he ngaahi moʻoni mahinongofua ko ʻeni ʻo e Ongoongolelei ʻo Sīsū Kalaisí, ʻi he tuʻunga siviʻiʻanga ko ʻení, ke teuteuʻi kitautolu ki he haohaoa ko iá. Ko hoku fatongia, ko homou fatongia, ke lelei ange ʻi he ʻahó ni mei hoku tuʻunga ʻi he ʻaneafí, mo kimoutolu ke mou lelei ange ʻi he ʻahó ni mei homou tuʻunga he ʻaneafí, pea lelei ange ʻa e ʻapongipongí ʻi homou tuʻunga he ʻaho ní. Koeʻuhí ko e hā? Koeʻuhí he ʻoku tau ʻi he hala ko iá, kapau ʻoku tau tauhi e ngaahi fekau ʻa e ʻEikí, ʻoku tau ʻi he hala ki he haohaoá, pea ʻe toki lava pē ke maʻu ia ʻi he talangofuá mo ha holi ʻi hotau lotó ke ikunaʻi ʻa e māmaní. …
… Kapau ʻoku ʻi ai haʻatau tōnounou, kapau ʻoku ʻi ai hatau vaivaiʻanga, ko e meʻa ia ʻoku totonu ke tau tokanga ki aí, ke tau maʻu ha holi ke ikunaʻi, kae ʻoua kuo tau mapuleʻi mo ikunaʻi. Kapau ʻoku ongoʻi ʻe ha tangata ʻoku faingataʻa ke ne totongi ʻene vahehongofulú, ta ko e meʻa ia ʻoku totonu ke ne faí, kae ʻoua kuo poto he totongi ʻene vahehongofulú. Kapau ko e Lea ʻo e Potó, ko e meʻa ia ʻoku totonu ke ne faí, kae ʻoua kuo ako ke saiʻia ʻi he fekau ko iá.13
5
ʻOku fakafiemālieʻi mo tāpuakiʻi kitautolu ʻe he ʻEikí ʻi heʻetau tauhi e ngaahi fekaú pea mo fakamālohia kitautolu ke tau hoko ko ha kau tangata mo ha kau fefine taau mo e hakeakiʻí.
Koeʻuhí ke hōifua [ʻa e ʻEikí], kuo pau ke ʻoua naʻa tau hū ʻataʻatā pē kiate ia ʻi he fakafetaʻi mo e fakalāngilangi, ka ke tau talangofua ʻi he loto moʻoni ki heʻene ngaahi fekaú. ʻI heʻetau fai iá, ʻoku haʻisia leva ke foaki ʻene ngaahi tāpuakí; he ʻoku ʻi he tefitoʻi moʻoni ko ʻení (ʻo e talangofua ki he fonó) ʻoku makatuʻunga ai ʻa e meʻa kotoa pē [vakai, T&F 130:20–21].14
Kuo ʻosi fai mai ʻe he ʻOtuá ha [ngaahi fekau] kiate kitautolu ke tau lava ʻo tupulaki ʻo ofi ange kiate Ia pea mo langaki hake ʻi he tuí mo fakamālohia. Kuo teʻeki ai ha fekau, ʻi ha faʻahinga taimi, kuó ne foaki mai kiate kitautolu, naʻe taʻe-fakataumuʻa ke tau fiemālie ai mo maʻu e tāpuakí ai. ʻOku ʻikai foaki mai pē kinautolú ke fakahōifuaʻi ʻa e ʻEikí, ka ke ʻai kitautolu ke tau hoko ko e kakai tangata mo e kakai fefine lelei ange, mo taau mo e fakamoʻui pea mo e hakeakiʻi ʻi Hono puleʻangá.15
Kapau ʻoku tau hū ki he temipalé, ʻoku tau hiki hotau nimá mo fuakava te tau tauhi ki he ʻEikí mo fai ki heʻene ngaahi fekaú pea mo tauhi kitautolu ke taʻe-ha-mele mei māmani. Kapau ʻoku tau ʻiloʻi ʻa e meʻa ʻoku tau faí pea tā ʻe hoko ʻa e ʻenitaumení ko hatau maluʻi he kotoa ʻetau moʻuí—ko ha maluʻi ʻoku ʻikai maʻu ia ʻe ha taha ʻoku ʻikai ʻalu ki he temipalé.
Ne u fanongo ki ha pehē ʻe heʻeku tangataʻeikí ko e houa ʻo e faingataʻá, ʻi he houa ʻo e ʻahiʻahí, ʻoku fakakaukau ki he ngaahi talaʻofá, ki he ngaahi fuakava naʻá ne fai ʻi he Fale ʻo e ʻEikí, pea naʻa nau hoko ko e maluʻi kiate ia. … Ko e maluʻi ko ʻení, ko ha konga ia ʻo e taumuʻa ʻo e ngaahi ouau ko ʻení. ʻOku nau fakahaofi kitautolu he taimí ni mo hakeakiʻi kitautolu ʻi he hili e moʻui ko ʻení, kapau te tau tauhi kinautolu. ʻOku ou ʻilo ʻoku foaki mai ʻa e maluʻi ko ʻení he kuó u fakatokangaʻi ʻe au foki, ʻo tatau mo ha lauiafe kehe ne nau manatuʻi honau fatongiá.16
ʻOku tau fuakava ʻi he temipalé ke “tau tauhi ki he ʻEikí mo fai ki heʻene ngaahi fekaú pea mo tauhi kitautolu ke taʻe-ha-mele mei māmani.”
ʻE foaki mai ʻe he ʻEikí ha ngaahi meʻafoaki. Te Ne fakaakeʻi hotau ʻatamaí. Te ne foaki mai ha ʻilo te ne huʻi atu ʻa e ngaahi faingataʻa kotoa mo ʻai ke tau fenāpasi mo e ngaahi fekau kuó ne foaki maí; te ne foaki mai ha ʻilo ʻe mātuʻaki tō-kakano ki hotau laumālié he ʻikai toe lava ia ke toʻo, kapau te tau fekumi ki he maama mo e moʻoni pea mo e mahino naʻe talaʻofa mai kiate kitautolú pea te tau lava ʻo maʻu ia kapau te tau tuʻu maʻu mo faivelenga ki he fuakava mo e fatongia kotoa fekauʻaki mo e ongoongolelei ʻo Sīsū Kalaisí.17
Ko e talaʻofa maʻongoʻonga kuo fai ki he kāingalotu ʻo e Siasí ʻoku loto fiemālie ke talangofua ki he fonó mo tauhi e ngaahi fekau ʻa e ʻEikí he ʻikai ngata pē ʻi haʻanau maʻu ha potu ʻi he puleʻanga ʻo e ʻOtuá, ka te nau toe ʻi he ʻao foki ʻo e Tamaí mo e ʻAló; pea ʻoku ʻikai ko hono kotoá ia, he kuo ʻosi talaʻofa ʻa e ʻEikí ko e meʻa kotoa pē ʻoku ʻaʻaná ʻe foaki ia kiate kinautolu [vakai, T&F 84:33–39].18
Te tau maʻu ʻa e moʻui taʻe-faʻamaté, nāunaú, moʻui taʻengatá, mo nofo ʻi he ʻao ʻo e ʻOtua ko e Tamaí mo hono ʻAlo ko Sīsū Kalaisí, ʻa ia te tau ʻiloʻi moʻoni ai kinaua, tuʻunga ʻi he talangofua ki he ngaahi fekau ko ia kuo ʻomi ʻi he Ongoongolelei ʻo Sīsū Kalaisí, mo hokohoko atu aí.19
Kapau te tau ʻaʻeva ʻi he hala ʻo e angatonú mo e māʻoniʻoní, ʻe lilingi mai ʻe he ʻEikí ʻene ngaahi tāpuakí kiate kitautolu ʻo aʻu ki ha tuʻunga ne ʻikai ke tau teitei ʻamanaki ʻoku malava. ʻOku totonu ke tau hoko ʻi he tapa kotoa, ʻo hangē ko hono fakamatalaʻi ʻe Pitá, “ko e kakai kuo fili, ko e kau taulaʻeiki fakaʻeiʻeiki, ko e kakai māʻoniʻoni, ko e [kakai makehe].” (1 Pita 2:9.) Pea te tau makehe koeʻuhí he ʻikai ke tau tatau mo e kakai kehe ʻoku ʻikai ke nau moʻui fakatatau mo e ngaahi tuʻunga ko ʻení. …
Ko ʻetau taumuʻa ʻi heʻetau hoko ko e kau tamaioʻeiki ʻa e ʻEikí ke fononga ʻi he hala kuó ne fokotuʻu maʻatautolú. ʻOku ʻikai ke tau holi ke fai e meʻa pē ʻoku fakahōifua ki aí, ka ʻoku tau feinga ke moʻui ke tatau ʻetau moʻuí mo ʻene moʻuí.
Naʻá ne fehuʻi ki he kau ākonga Nīfaí: “… ko e hā ʻa e anga ʻoku taau mo kimoutolú?” peá ne toki tali: “Ko e moʻoni ʻoku ou pehē kiate kimoutolu, ke mou hangē pē ko aú.” (3 Nīfai 27:27.)
ʻOku tau kau ʻeni ʻi he ngāue maʻongoʻonga taha he māmaní. Ko e lakanga fakataulaʻeiki ʻoku tau maʻú ko e mālohi mo e mafai tonu pē ia ʻo e ʻEikí; pea kuó ne ʻosi talaʻofa kapau te tau fakahoko hotau ngaahi uiuiʻí mo ʻaʻeva ʻi he māmá, hangē ko ʻene ʻi he māmá, te tau maʻu ʻa e nāunau mo e lāngilangi fakataha mo ia ʻo taʻengata ʻi he puleʻanga ʻo ʻene Tamaí.
Te tau lava nai ʻi he ʻamanaki nāunauʻia ko ia ʻoku tau maʻú ke fai ha toe meʻa siʻi ange ʻi hono siʻaki e ngaahi founga kovi ʻa e māmaní? He ʻikai ʻapē ke tau fakamuʻomuʻa ʻi heʻetau moʻuí ʻa e ngaahi meʻa ʻo e puleʻanga ʻo e ʻOtuá? He ʻikai ʻapē ke tau feinga ke moʻui fakatatau mo e folofola kotoa pē ʻoku tō mei hono fofongá?20
ʻOku ou fakamoʻoni kuo folofola ʻa e ʻEikí ʻi hotau kuongá; ko ʻene pōpoakí ko ha pōpoaki ʻo e ʻamanaki lelei mo e fiefia pea mo e fakamoʻui; pea ʻoku ou palōmesi atu kiate kimoutolu kapau te mou ʻaʻeva ʻi he maama ʻo e langí, fai-pau ki he falala ʻoku fai atú, mo tauhi ʻa e ngaahi fekaú, te mou maʻu ʻa e nonga mo e fiefia ʻi he moʻuí ni pea mo e moʻui taʻengatá ʻi he maama ka haʻú.21
Tauhi e ngaahi fekaú. ʻAʻeva ʻi he māmá. Kātaki ki he ngataʻangá. Fai-pau ki he fuakava mo e fatongia kotoa pē, pea ʻe tāpuakiʻi kimoutolu ʻe he ʻEikí ʻo mahulu atu ʻi hoʻo ngaahi fakaʻānauá.22
Ngaahi Fokotuʻu ki Hono Ako mo Akoʻí
Ngaahi fehuʻi
-
Toe fakamanatu ʻa e fakamatala ʻi he ngataʻanga ʻo e “Mei he Moʻui ʻa Siosefa Filitingi Sāmitá.” Ko e hā ʻoku liliu ai ʻetau ongo fekauʻaki mo e ongoongoleleí ʻi he taimi ʻoku tau feinga ai ke tauhi e ngaahi fekaú?
-
Ko e hā kuó ke ako mei he ngaahi fakamatala folofola ʻoku hā ʻi he konga 1?
-
ʻOku founga fēfē hoko ʻetau talangofua ki he ngaahi fekaú ko hano fakahaaʻi ʻo e ʻofa kia Sīsū Kalaisí? ʻOku hoko fēfē ia ko hano fakahoungaʻi ʻo ʻEne feilaulau fakaleleí? ʻOku hoko fēfē ia ko hano fakahaaʻi ʻo e mōihuú? (Vakai, konga 2.)
-
Fakakaukau ki he ngaahi akonaki ʻi he konga 3. Ko e hā ʻoku hala ai ke tau ʻamanaki ʻe tāpuakiʻi kitautolu ʻe he ʻEikí kapau ʻoku ʻikai ke tau feinga ke talangofua?
-
ʻOku ʻaonga fēfē kiate koe ke ke ʻilo ʻoku ʻikai totonu ke ke ʻamanaki te ke hoko ʻo haohaoa fakaʻangataha pea naʻa mo e moʻui ko ʻení? (Vakai, konga 4.) Fakakaukau ki ha meʻa te ke lava ʻo fai ʻi he ʻaho takitaha, ke “nofo maʻu ai ʻi he hala ki he haohaoá” fakataha mo e tokoni ʻa e ʻEikí.
-
ʻOku fokotuʻu ʻe Palesiteni Sāmita ʻi he konga 5, ha ngaahi founga nai ʻe 10 ʻe tāpuakiʻi ai kitautolu ʻe he ʻEikí ʻi heʻetau tauhi e ngaahi fekaú. Ko e hā ha meʻa ne ke aʻusia te ke lava ʻo vahevahe, ʻa ia ne ke maʻu ai ha niʻihi ʻo e ngaahi tāpuaki ko ʻení?
Ngaahi Potufolofola Fekauʻaki
Mātiu 4:4; 2 Nīfai 31:19–20; ʻAmenai 1:26; T&F 11:20; 82:8–10; 93:1; 130:20–21; 138:1–4
Tokoni Fakafaiako
“Kole ki he kau akó ke vahevahe ʻa e meʻa ne nau ako mei heʻenau ako fakatāutaha e vahé. ʻE tokoni ke fetuʻutaki ki ha niʻihi ʻo e kau akó lolotonga e uiké ʻo kole ange ke nau ō maí kuo nau mateuteu ke vahevahe ʻa e meʻa ne nau akó” (mei he peesi vii ʻo e tohi ko ʻení).