Talateú

Kuo fokotuʻu ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻū tohi ko e Ngaahi Akonaki ʻa e Kau Palesiteni ʻo e Siasí ke tokoni atu ke ke toe ofi ange ai ki Hoʻo Tamai Hēvaní pea mo fakaloloto hoʻo mahino ki he ongoongolelei ʻo Sīsū Kalaisi kuo toe fakafoki maí. ʻI he toe tānaki atu ʻe he Siasí ha ʻū tohi ki he hokohoko ko ʻení, te ke tātānaki leva ia hoʻo ʻū tohi ʻo e ongoongoleleí ki ho ʻapí. ʻOku fakataumuʻa e ʻū tohi ko ʻení ke fakaʻaongaʻi ki he ako fakatāutahá pea mo e lēsoni ʻo e Sāpaté. ʻE lava ke nau tokoni atu ki hoʻo teuteu lēsoni kehé mo tali ha ngaahi fehuʻi fekauʻaki mo e tokāteline ʻo e Siasí.

ʻOku ʻoatu ʻi he tohi ko ʻení ʻa e ngaahi akonaki ʻa Palesiteni Siosefa Filitingi Sāmitá, ʻa ia naʻe hoko ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mei he ʻaho 23 ʻo Sānuali 1970, ki he ʻaho 2 ʻo Siulai 1972.

Ako Fakatāutahá

ʻI hoʻo ako fakatāutaha e ngaahi akonaki ʻa Palesiteni Siosefa Filitingi Sāmita, fekumi ʻi he faʻa lotu ke maʻu e tataki ʻa e Laumālie Māʻoniʻoní. ʻE tokoni e ngaahi fehuʻi ʻi he konga fakaʻosi ʻo e vahe takitaha ke mahino kiate koe e ngaahi akonaki ʻa Palesiteni Sāmitá mo ke fakaʻaongaʻi kinautolu ʻi hoʻo moʻuí. ʻI hoʻo ako e ngaahi akonakí ni, te ke lava ʻo fakakaukau ki ha founga ke vahevahe ai kinautolu ki he kau mēmipa ʻo e fāmilí pe kaungāmeʻá. ʻE fakamālohia ai e mahino kiate koe ʻa e meʻa ʻokú ke laú.

Ko e Faiako mei he Tohi Ko ʻEní

Kuo fakataumuʻa e tohí ni ke fakaʻaongaʻi ʻi ʻapi mo e lotú. ʻI he kulupu ʻa e kau taulaʻeiki lahí mo e kōlomu ʻa e kaumātuʻá pea mo e Fineʻofá, ʻe akoʻi ai ʻi ha Sāpate ʻe ua, ha ongo lēsoni mei he ngaahi vahe ʻi he tohí ʻi he māhina takitaha. Koeʻuhí ʻoku lahi ange ngaahi vahe he tohí ʻi he lēsoni ʻe lava ʻo akoʻi ʻi he māhina ʻe 12, ko ia ʻe fili ai ʻe he kau taki ʻo e uōtí mo e siteikí pe ko e fē ngaahi vahe te nau feau lelei taha e ngaahi fie maʻu ʻa e kāingalotu ʻoku nau tokoniʻí.

ʻE lava ke tokoni atu e ngaahi fakahinohino ko ʻení ki hoʻo faiako mei he tohí:

Teuteu ke Faiakó

Fekumi ki he tataki ʻa e Laumālie Māʻoniʻoní ʻi hoʻo teuteu atu ke faiakó. Ako ʻi he faʻa lotu ʻa e vahe kuo filí ke mahino lelei kiate koe ʻa e ngaahi akonaki ʻa Palesiteni Sāmitá. Te ke faiako ʻi he loto fakamātoato mo mālohi ange he taimi kuo tākiekina fakatāutaha ai koe ʻe heʻene ngaahi leá (vakai, T&F 11:21).

Kapau ʻokú ke akoʻi ha lēsoni ʻa e Lakanga Taulaʻeiki Faka-Melekisētekí pe Fineʻofá, ʻoku totonu ke ʻoua naʻá ke tuku e tohí ni ki he tafaʻakí pe teuteu ha lēsoni mei ha toe nāunau kehe. Filifili ʻi he faʻa lotu mei he vahé, ʻa e ngaahi akonaki ko ia ʻokú ke ongoʻi ʻe ʻaonga taha ki hoʻo kalasí. ʻOku ʻi ai ha ngaahi vahe ʻe niʻihi ʻoku hulutuʻa e nāunau ia aí ke lava ʻo akoʻi lolotonga e taimi kalasí.

Poupouʻi e kalasí ke nau ako ʻa e vahé kimuʻa pea fai ʻa e lēsoní pea ke nau omi mo ʻenau tohí. ʻI heʻenau fai ia, te nau mateuteu lelei ange ai ke kau atu ki he fealēleaʻakí pea mo nau fefakamaamaʻaki.

ʻI hoʻo teuteu ke faiakó, fai ha tokanga makehe ki he konga “Ngaahi Fokotuʻu ki Hono Ako mo Akoʻí” ʻi he fakaʻosinga ʻo e vahe takitaha. ʻI he konga ko ʻení, te ke maʻu ai ha ngaahi fehuʻi, ngaahi potu folofola fekauʻaki pea mo ha ngaahi akonaki ʻe tokoní. ʻOku fekauʻaki tonu pē ʻa e ngaahi fehuʻí mo e potu folofola fekauʻakí, pea mo e vahe ʻoku ʻasi aí. ʻE lava ke tokoni e ngaahi tokoni fakafaiakó ke ne tataki koe ʻi hoʻo feinga ke tokoniʻi e niʻihi kehé ke nau fiefia ʻi hono ako mo moʻuiʻaki ʻo e ongoongoleleí.

Fakafeʻiloaki e Vahé

ʻI hoʻo fakafeʻiloaki ʻa e vahé pea ʻi he kotoa ʻo e lēsoní, ngāue ke fokotuʻu ha ʻātaki ʻe lava ke ongo ai e Laumālié ki he loto mo e ʻatamai ʻo e kalasí. Ke kamata e lēsoní, tokoniʻi ʻa e kalasí ke tukutaha ʻenau tokangá ʻi he ngaahi akonaki he vahé. Fakakaukauʻi ʻa e ngaahi meʻa ko ʻení:

Lau pea aleaʻi e konga ʻi he kamataʻanga ʻo e vahé ko e “Mei he Moʻui ʻa Siosefa Filitingi Sāmitá.”
Aleaʻi ha fakatātā pe potufolofola mei he vahé.
Hiva fakataha ha himi ʻoku fekauʻakí.
Vahevahe nounou mo kinautolu ha meʻa naʻá ke aʻusia fakatāutaha fekauʻaki mo e tefitó.

Tataki ha Fealēleaʻaki kau ki he Ngaahi Akonaki ʻa Palesiteni Sāmitá

ʻI hoʻo faiako mei he tohí ni, fakaafeʻi ʻa e niʻihi kehé ke nau ʻoatu ʻenau ngaahi fakakaukaú, fai ha ngaahi fehuʻi pea mo feakoʻiʻaki. ʻI he taimi ʻoku nau kau longomoʻui atu aí, te nau toe mateuteu ange ai ke ako mo maʻu ha fakahā fakatāutaha. Tuku ke hokohoko atu e ngaahi fealēleaʻaki ʻoku leleí kae ʻoua naʻá ke feinga pē ke akoʻi kotoa e ngaahi akonakí. Ke poupouʻi ʻa e fealēleaʻakí, fakaʻaongaʻi e ngaahi fehuʻi ʻi he fakaʻosinga ʻo e vahe takitaha. ʻE lava ke ke faʻu pē ʻe koe haʻo ngaahi fehuʻi, ʻo fakafeʻunga ki he niʻihi ʻokú ke akoʻí.

ʻE ʻoatu ʻe he ngaahi meʻa ko ʻeni ke fili mei aí ha toe ngaahi fakakaukau kehe:

Kole ki he kau akó ke vahevahe ʻa e meʻa ne nau ako mei heʻenau ako fakatāutaha e vahé. ʻE tokoni ke fetuʻutaki ki ha niʻihi ʻo e kau akó lolotonga e uiké ʻo kole ange ke nau ō maí kuo nau mateuteu ke vahevahe ʻa e meʻa ne nau akó.
Vahe ki he niʻihi ʻe fie kaú, ha ngaahi fehuʻi kuo filifili mei he fakaʻosinga ʻo e vahé (fakatāutaha pe fakakulupu). Kole ange ke nau kumi hake ha ngaahi akonaki ʻi he vahé ʻoku fekauʻaki mo e ngaahi fehuʻí. Pea fakaafeʻi kinautolu ke vahevahe ʻenau ngaahi fakakaukaú mo e ʻiló ki he toenga ʻo e kulupú.
Lau fakataha ha ngaahi fakamatala ʻa Palesiteni Sāmita kuo filifili meí he vahé. Kole ki he kau akó ke nau vahevahe ha ngaahi sīpinga mei he folofolá pe ngaahi meʻa naʻa nau aʻusia ke fakatātaaʻi ʻaki e meʻa naʻe akonaki ʻaki ʻe Palesiteni Sāmitá.
Kole ki he kau akó ke nau fili ha konga ʻe taha pea nau lau fakalongolongo ia. Fakaafeʻi kinautolu ke nau fakakulupu ʻo tautau toko ua pe toko tolu mo e kakai ne nau fili ʻa e vahe tatau pea nau aleaʻi e meʻa kuo nau akó.

Poupouʻi e Fevahevaheʻakí mo hono Fakahokó

ʻE toe mahuʻingamālie ange ʻa e ngaahi akonaki ʻa Palesiteni Sāmitá ki he niʻihi te nau vahevahe mo fakaʻaongaʻi kinautolu heʻenau moʻuí. Fakakaukau ki he ngaahi meʻá ni:

Fehuʻi ki he kau akó pe ko e hā ʻa e founga ʻe lava ke nau fakaʻaongaʻi ai e ngaahi akonaki ʻa Palesiteni Sāmitá ʻi honau ngaahi fatongia ʻi ʻapí pea mo e siasí. Hangē ko ʻení, ʻe lava ke ke tokoni ke nau fakalaulauloto mo aleaʻi e founga ʻe lava ke nau fakaʻaongaʻi ai ʻene ngaahi akonakí ʻi heʻenau hoko ko e husepānití, uaifí, mātuʻá, fohá, ʻofefiné, faiako fakaʻapí pe faiako ʻaʻahí.
Poupouʻi e kau akó ke nau vahevahe ha niʻihi ʻo e ngaahi akonaki ʻa Palesiteni Sāmitá ki honau fāmilí mo e kaungāmeʻá.
Fakaafeʻi e kau akó ke nau fakahoko e meʻa kuo nau akó pea nau vahevahe ʻenau nagahi aʻusiá ʻi he kamataʻanga ʻo e kalasi hokó.

Fakaʻosi e Fealēleaʻakí

Fakamāʻopoʻopo nounou pē ʻa e lēsoní pe kole ki ha toko taha pe toko ua ke nau fakahoko ia. Fakamoʻoni ange ʻo kau ki he ngaahi akonaki kuo mou aleaʻí. ʻE lava foki ke ke fakaafeʻi e niʻihi kehé ke nau vahevahe ʻenau fakamoʻoní.

Fakamatala ki he Ngaahi Maʻuʻanga Fakamatala ʻOku Hā ʻi he Tohi Ko ʻení

Ko e ngaahi akonaki ʻi he tohí ni ko e toʻo hangatonu ia mei he ngaahi malanga, fakamatala, ʻū tohi, faitohi mo e tohinoa ʻa Palesiteni Siosefa Filitingi Sāmitá. Ko e ngaahi lea ne toʻo fakahangatonu mei he ʻū tohi kuo pulusí, ʻoku kei tauhi maʻu pē ʻa e fakaʻilonga leá, sipelá, mataʻitohi lahí mo e fokotuʻutuʻu fakapalakalafi ʻo e maʻuʻanga tokoni totonú tukukehe kapau naʻe fie maʻu ke fai ha ngaahi liliu fakaʻētita pe fakatonutonu e sipelá ke toe faingofua ange ai hono laú. ʻI he ʻuhingá ni, ʻe lava ke ke fakatokangaʻi ʻoku ʻikai fenāpasi kotoa e ʻasi e ʻū fakamatalá. Hangē ko ʻení, ko e foʻi lea ko ia ko e ongoongolelei ʻoku mataʻitohi siʻi ia ʻi ha ngaahi lea ʻe niʻihi pea mataʻitohi lahi ia ʻi ha niʻihi.

ʻIkai ngata aí, naʻe faʻa fakaʻaongaʻi foki ʻe Palesiteni Sāmita ha ngaahi kupuʻi lea hangē ko e kau tangata, tangata, pe faʻahinga ʻo e tangatá ko e ʻuhinga ki he kakai kotoa pē, ʻo tatau pē tangata mo e fefine. Naʻá ne faʻa fakaʻaongaʻi foki ʻa e takinauna ko e ʻaʻana, ʻene, pea mo e ia ko e ʻuhinga ki he tangata mo e fefine fakatouʻosi. Naʻe angamaheni ʻaki pē ʻeni ʻi hono taimí. Neongo e ngaahi faikehekehe ʻi he ngaahi fetalanoaʻakí mo e anga hono fakaʻaongaʻí, ka ʻoku kaungatonu pē ʻa e ngaahi akonaki ʻa Palesiteni Sāmitá ia ki he houʻeiki fafiné mo e houʻeiki tangatá fakatouʻosi.