Vahe 5
Tuí mo e Fakatomalá
“Ko e meʻa ʻoku tau fie maʻu ʻi he lotoʻi Siasí, pea pehē ʻi tuʻa mei aí, ko e fakatomala. ʻOku tau fie maʻu ha tui lahi ange mo ha lotoʻaki lahi ange ke tokoni ki he ʻEikí.”
Mei he Moʻui ʻa Siosefa Filitingi Sāmitá
Naʻe akoʻi ʻe Palesiteni Siosefa Filitingi Sāmita, “ʻOku hoko mai ʻa e fakamolemole ʻo e ngaahi angahalá ʻi he tui mo e fakatomala fakamātoato.”1 Naʻá ne pehē “ʻoku fie maʻu, ke ʻoua naʻa tau tui pē, ka ke tau fakatomala,” pea naʻá ne toe akoʻi foki ko e taimi ʻoku tau fai ai ha ngaahi ngāue lelei ʻi he tuí ʻo aʻu ki he ngataʻangá, te tau “maʻu ʻa e pale ʻo e kau angatonú pea mo ha potu ʻi he puleʻanga Fakasilesitiale ʻo e ʻOtuá.”2 Naʻá ne fakamoʻoniʻi ʻa Sīsū Kalaisi mo malangaʻi ʻa e fakatomalá ʻi heʻene ngāué kotoa, ʻi heʻene fakaʻamu ke maʻu ʻe he kakai kotoa ʻa e pale ko ʻení.
Naʻá ne pehē ʻi he konga ki muʻa pē ʻo ʻene hoko ko e ʻAposetoló: “Te u pehē, ʻi he anga ʻo ʻeku fakakaukaú mo ʻeku ongoʻí, kuo hoko ko hoku misiona, ʻi he Laumālie ʻo e ʻEikí pea ʻi heʻeku ngaahi fefonongaʻaki ʻi he ngaahi siteiki ʻo Saioné, ke u tala ki he kakaí ko e ʻaho ʻeni ʻo e fakatomalá pea mo ui ʻa e Kau Māʻoniʻoni ʻi he Ngaahi ʻAho Kimui Ní ke nau manatuʻi ʻenau ngaahi fuakavá, ʻa e ngaahi palōmesi ne nau fai mo e ʻEikí, ke tauhi ʻene ngaahi fekaú, mo muimui ʻi he ngaahi akonaki mo e ngaahi lea ʻa e kaumātuʻa ʻo ʻIsilelí —ʻa e kau palōfita ʻa e ʻOtuá—hangē ko ia kuo ʻosi lekooti ʻi he ngaahi folofola māʻoniʻoni ko ʻení. ʻOku totonu ke tau ʻaʻeva ʻi he ngaahi meʻa kotoa pē ʻi he loto fakatōkilalo mo tokanga ʻi he ʻao ʻo e ʻEikí koeʻuhí ke tāpuekina kitautolu mo tataki ʻe hono Laumālie Māʻoniʻoní. Teu pehē ko e ʻaho ʻeni ʻo e fakatokangá. Kuo hoko ko ha kuonga ʻo e fakatokanga talu mei he ʻaho ne ʻuluaki maʻu ai ʻe he palōfitá ʻa e fakahā mei he langí kuo pau ke fakafoki mai ʻa e ongoongoleleí.”3
Naʻe fakahā ʻe Palesiteni Sāmita ki he kāingalotú ʻi ha houalotu sākalamēniti ʻi ha ʻaho Sāpate ʻe taha, ʻa e ʻuhinga ʻokú ne leaʻaki ai ha leʻo ʻo e fakatokangá. Naʻe toki hiki ki mui ʻe Siosefa, ko hono fohá, ʻa ia naʻe ʻi he lotú ʻo pehē: “ʻOku ou manatuʻi lelei ha niʻihi ʻo e ngaahi lea naʻe fai ʻe [heʻeku tangataʻeikí] ʻi he meʻa ko iá. Naʻá ne fehuʻi ki he fakatahaʻangá, ‘Ko hai ho kaumeʻá, pe ko hai ʻoku ʻofa lahi taha ʻiate koé? Ko e taha ʻokú ne talaatu ʻoku lelei ʻa e meʻa kotoa pē ʻi Saioné, pea ʻoku teu hoko mai ʻa e tuʻumālié pe ko e taha ʻoku fakatokanga atu fekauʻaki mo e ngaahi meʻa fakamamahi mo e ngaahi faingataʻa ʻoku fakapapauʻi, tukukehe ka moʻui ʻaki e ngaahi tefitoʻi moʻoni ʻo e ongoongoleleí? ʻOku ou fie maʻu ke mou ʻilo ʻoku ou ʻofa ʻi he kāingalotu ʻo e Siasí, pea ʻoku ʻikai ke u loto ke tuhu mai ha taha ʻo tukuakiʻi au ʻi he taimi te tau hū atu ai ʻi he veili ʻo e moʻui fakamatelié mo pehē mai, “Kapau pē naʻá ke kiʻi fakatokanga mai he ʻikai ke u ʻi he tuʻunga fakamamahi ko ʻení.” Pea ko ia ʻoku ou hiki hake ai ha leʻo ʻo e fakatokanga ʻi he ʻamanaki ʻe mateuteu hoku ngaahi tokouá mo e tuofāfiné ki he puleʻanga ʻo e nāunaú.’”4
Naʻe fakamatalaʻi ʻe Palesiteni Siosefa Filitingi Sāmita ʻene ʻuhinga ki hono ui ʻo e Kau Māʻoniʻoni ʻi he Ngaahi ʻAho Kimui Ní ke fakatomalá: “ʻOku ou ʻofa ʻi he kāingalotu ʻo e Siasí.”
Naʻe ʻilo ʻe kinautolu naʻe ngāue vāofi mo Palesiteni Sāmitá naʻe ʻi he tuʻa ʻo ʻene ngaahi fakatokanga fefeká ha tangata naʻe tokanga mamae ki he kakai naʻe fefaʻuhi mo e angahalá. Naʻe faʻa ʻi ai maʻu pē ʻa ʻEletā Falanisisi M. Kīponi (Francis M. Gibbons), ʻa ia naʻe hoko ko ha sekelitali ki he Kau Palesitenisī ʻUluakí, ʻi he taimi naʻe fakakaukauʻi ai ʻe Palesiteni Sāmita ha ngaahi meʻa ʻi ha fakatonutonu faka-Siasi. Naʻe manatuʻi ʻe ʻEletā Kīponi ʻo pehē: “Naʻe fai maʻu pē ʻene ngaahi tuʻutuʻuní ʻi he angaʻofa mo e ʻofa pea ʻi he tuʻunga māʻolunga taha ʻo e ʻaloʻofá ʻe lava ke taukaveʻi ʻe he ngaahi tūkungá. Naʻe ʻikai ko ha meʻa foʻou ke ne pehē ʻi haʻane ʻilo e ngaahi tūkunga ʻo ha meʻa faingataʻa, ‘Ko e hā ʻoku ʻikai fai ai ʻe he kakaí e meʻa totonú?’ Naʻe ʻikai fai ʻeni ʻi he tukuakiʻi pe ʻi ha founga ʻo e fakaangaʻi ka ʻi he loto mamahi mo e fakameʻapangoʻia.”5 Naʻe pehē ʻe Palesiteni Sipenisā W. Kimipolo, ʻa ia naʻe ngāue fakataha mo Palesiteni Sāmita ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá, “Naʻa mau faʻa pehē tā-tuʻolahi koeʻuhí ʻe hoko ʻa e Toko Hongofulu Mā Uá ko e kau fakamaau ʻo ʻIsileli, ʻe fiefia ha taha ʻiate kimautolu te ne hanga ʻo fakamāuʻi, he ko ʻene fakamāú ʻe angaʻofa, fonu ʻaloʻofa, mo māʻoniʻoni.”6 Ko e taimi naʻe fakanofo ai ʻe Palesiteni Sāmita ʻa e kau pīsopé, naʻá ne faʻa faleʻi ange: “Manatuʻi, ʻoku ʻi ai e ngaahi vaivai ʻo e taha kotoa, pea ʻoku ʻi ai ha tafaʻaki ʻe ua ki he meʻa kotoa pē. Kapau ʻe fehālaaki hoʻo fakamāú, fakapapauʻi ʻokú ke fehālaaki ʻi he tafaʻaki ʻo e ʻofá mo e ʻaloʻofá.”7
Ngaahi Akonaki ʻa Siosefa Filitingi Sāmitá
1
Ko e ʻuluaki tefitoʻi moʻoni ʻo e ongoongoleleí ko e tui ki he ʻEiki ko Sīsū Kalaisí.
ʻOku fakatefito ʻetau tuí ʻi he ʻEiki ko Sīsū Kalaisí, pea fou ʻiate ia ki he Tamaí. ʻOku tau tui kia Sīsū Kalaisi, tali ia ko e ʻAlo ʻo e ʻOtuá, pea mo ʻai kiate kitautolu hono huafá ʻi he vai ʻo e papitaisó.8
Tuku ke mahuʻinga taha ia ʻi homou ʻatamaí, ʻi he taimí ni pea ʻi he taimi kotoa pē, ko Sīsū ʻa e Kalaisí, ko e ʻAlo ʻo e ʻOtua moʻuí, naʻe hāʻele mai ki māmani ke tuku hifo ʻene moʻuí kae lava ke tau moʻui. Ko e foʻi moʻoní ia, pea ʻoku mahuʻinga. ʻOku langa ai ʻetau tuí. He ʻikai ke lava ia ʻo fakaʻauha. Kuo pau ke tau muimui ki heʻene ngaahi akonakí neongo ʻa e ngaahi akonaki ʻa e māmaní, pea mo e ngaahi fakakaukau ʻa e tangatá; he ʻoku maʻolunga taha ʻeni, ʻoku mahuʻinga ʻeni ki hotau fakamoʻuí. Kuo huhuʻi ʻe he ʻEikí kitautolu ʻaki hono taʻataʻá, naʻá ne foaki mai ʻa e fakamoʻuí, kapau—pea ʻoku ʻi ai ha tuʻunga heni kuo pau ke ʻoua naʻa ngalo ʻiate kitautolu —ke fakapapauʻi ʻoku tau tauhi ʻene ngaahi fekaú, pea manatu maʻu ai pē kiate ia. Kapau te tau fai ia pea ʻe fakahaofi kitautolu, ka ko e ngaahi fakakaukau mo e vale ʻo e tangatá, ʻe ʻauha mei māmani.9
ʻI he tuí ʻoku tau omi ai ki he ʻOtuá. Kapau ʻoku ʻikai ke tau tui ki he ʻEiki ko Sīsū Kalaisí, kapau ʻoku ʻikai haʻatau tui kiate Ia pe ki Heʻene fakaleleí, he ʻikai ueʻi kitautolu ke tau talangofua ki Heʻene ngaahi fekaú. ʻOku tuʻunga ʻi heʻetau maʻu ʻa e tui ko iá ʻa ʻetau taau mo ʻEne moʻoní mo maʻu e holi ʻi hotau lotó ke tauhi kiate Iá. …
… Ko e ʻuluaki tefitoʻi moʻoni ʻo e ongoongoleleí ko e tui ki he ʻEiki ko Sīsū Kalaisí; ko e moʻoni foki he ʻikai ke tau maʻu ha tui ki he ʻEiki ko Sīsū Kalaisí kae ʻikai tui ki Heʻene Tamaí. Pea kapau ʻoku tau maʻu ha tui ki he ʻOtua ko e Tamaí mo e ʻAló mo tataki kitautolu, ʻo hangē ko ia ʻoku totonu ke tau maʻú, ʻe he Laumālie Māʻoniʻoní, te tau maʻu ʻa e tui ki he kau tamaioʻeiki ʻa e ʻEikí ʻa ia kuó Ne folofola mai aí.10
2
ʻOku ʻuhinga e tuí ke ngāue.
“Ko e tuí ko e tupuʻanga ia ʻo e ngāue kotoa pē.” [Lectures on Faith, lea 1.] Kapau te ke kiʻi fakakaukauʻi taimi siʻi ia, ʻoku ou tui te ke tui ʻoku mātuʻaki moʻoni ia ʻi he ngaahi meʻa fakatuʻasinó pea pehē ʻi he ngaahi meʻa fakalaumālié. ʻOku moʻoni ia ʻiate kitautolu ʻi heʻetau ngaahi ngāué, pea pehē ʻi he ngaahi ngāue ʻa e ʻOtuá. …
[Ko e] “tui taʻe ʻi ai ʻa e ngaahi ngāué ʻoku mate” [Sēmisi 2:26]—ko hono fakalea ʻe tahá, ʻoku ʻikai ke ʻi ai. Te u pehē ko e ʻuhinga moʻoni ʻa Sēmisí, “Fakahā mai kiate au hoʻo tui taʻe [ʻi ai] ha ngaahi ngāué, pea he ʻikai maʻu ha meʻa; pea te u fakahā kiate koe ʻa ʻeku tuí ʻaki ʻeku ngaahi ngāué, pea ʻe lavaʻi ha faʻahinga meʻa.” [Vakai, Sēmisi 2:18.] ʻOku ʻuhinga e tuí ke ngāue. … ʻI heʻene peheé, ʻoku mālohi ange ʻa e tuí ʻi he falalá. …
Ko e tuí ko ha meʻaʻofa ia ʻa e ʻOtuá. Ko e meʻa lelei kotoa pē ko ha meʻaʻofa ia ʻa e ʻOtuá. Ko e akonaki ia ʻa e folofolá ʻoku maʻu ʻi he vahe hono 11 ʻo e tohi Hepeluú—ʻoku hoko e vahe ko iá ko ha fakamatala mātuʻaki lelei ʻo e tuí—[pea] ʻi he ngaahi fakahā kuo foaki mai ʻe he ʻEikí kiate kitautolu ʻi he Tokāteline mo e Ngaahi Fuakavá, mo e ngaahi folofola kehé. He ʻikai lava ke maʻu ʻa e tuí ʻi he fakaʻaloʻalongauá pe talatalakehé pe tui ʻoku ʻikai ngāué. He ʻikai ke lava ʻe he kihiʻi holi pē ke maʻu ʻa e tuí ʻo ʻomi ʻa e tuí ʻo toe kehe mei he fakaʻamu ke poto ʻi he mūsiká pe tāvalivalí ʻo ʻomai ʻa e poto ʻi he ongo meʻá ni taʻe kau ai hano ngāueʻi fakalelei. Ko e feituʻu ia ʻoku tupu ai ʻetau palopalemá. ʻOku tau maʻu ha fakamoʻoni ki he Ongoongoleleí, ʻoku tau tui kia Siosefa Sāmita, ʻoku tau tui kia Sīsū Kalaisi, ʻoku tau tui ki he ngaahi tefitoʻi moʻoni ʻo e Ongoongoleleí, ka ko e hā e lahi ʻetau ngāueʻi kinautolú?
… Kapau ʻoku tau fie maʻu ke maʻu haʻatau tui ʻoku moʻui, mo tuʻuloa, kuo pau ke tau longomoʻui ʻi hono fakahoko e fatongia kotoa ʻi heʻetau hoko ko e kau mēmipa ʻo e Siasi ko ʻení. …
ʻOi, kapau pē ā ne tau maʻu e tui naʻe fakahaaʻi ʻe Nīfaí! Lau ʻi he vahe 17 ʻo e 1 Nīfaí, ʻi hono fakafepakiʻi ia ʻe hono ongo tokouá mo manukiʻi koeʻuhí ko ʻene teu foʻu ha vaká, ʻo pehē:
“Ko e tangata vale ʻa hota tokouá, he ʻokú ne pehē te ne lava ʻo foʻu ha vaka; ʻio, pea ʻokú ne pehē te ne lava ʻo ʻalu ki he kauvai ʻe taha ʻo e ngaahi fuʻu vai lahi ko ʻení.” [1 Nīfai 17:17.]
Naʻe tali ange ʻe Nīfai kiate kinaua:
“Kapau naʻe fekau kiate au ʻe he ʻOtuá ke u fai ʻa e meʻa kotoa pē, pehē te u lava ʻo fai ia. Ka ʻo ka ne ka fekau kiate au ke u pehē ki he vaí ni, ke ke hoko ko e kelekele, ʻe hoko ia ko e kelekele; pea kapau te u lea ʻaki ia, ʻe fai ia.” [1 Nīfai 17:50.]
Ko ʻene tuí ia.11
ʻOku ʻikai ke tau ʻaʻeva he taimí ni ʻi he mamatá, hangē ko ia ne tau fai ki muʻa pea tau toki ōmai ki māmaní, ka ʻoku fie maʻu ʻe he ʻEikí ke tau ʻaʻeva ʻi he tuí [vakai, 2 Kolinitō 5:7]; pea ʻi heʻetau ʻaʻeva ʻi he tuí te tau maʻu ai ʻa e pale ʻo e kau angatonú, kapau te tau muimui ki he ngaahi fekau ko ia ʻoku foaki mai maʻa hotau fakamoʻuí.12
Kapau he ʻikai talangofua ha taha ki he tokāteliné mo ʻaʻeva ʻi he tuí, ʻo tali ʻa e moʻoní mo tauhi e ngaahi fekaú he kuo foaki mai kinautolu, he ʻikai ke ne lava ʻo maʻu ʻa e moʻui taʻengatá, tatau ai pē pe ko e hā hano lahi e fakahā ʻe hono loungutú ko Sīsū ʻa e Kalaisí, pea tui naʻe fekauʻi mai ia ʻe heʻene Tamaí ki māmani ke huhuʻi ʻa e tangatá. ʻOku tonu ai ʻa Sēmisi ʻi heʻene pehē ko e kau tēvoló ʻoku nau “tui pea tetetete,” ka ʻoku ʻikai ke nau fakatomala [vakai, Sēmisi 2:19].13
3
Ko e fakatomalá ko e tefitoʻi moʻoni ia hono ua ʻo e ongoongoleleí pea ʻoku mahuʻinga ia ki hotau fakamoʻuí mo e hakeakiʻí.
Ko e fakatomalá ko e tefitoʻi moʻoni mahuʻinga hono ua ia ʻo e ongoongoleleí pea mo e ola ʻo e tuí.14
Ko e meʻa ʻoku tau fie maʻu ʻi he lotoʻi Siasí, pea pehē ʻi tuʻa mei aí, ko e fakatomala. ʻOku tau fie maʻu ha tui lahi ange mo ha lotoʻaki lahi ange ke tokoni ki he ʻEikí.15
ʻOku moʻoni koā ʻoku fakakaukau ha niʻihi ʻiate kitautolu ʻoku ʻikai mahuʻinga ia pe ʻoku tau faiangahala kehe pē ke ʻoua ko ha angahala mamafa, pe angahala fakamate, he ʻe kei fakahaofi pē kitautolu ʻi he puleʻanga ʻo e ʻOtuá? Naʻe mamata ʻa Nīfai ki hotau kuongá. Naʻá ne pehē ʻe lea pehē ʻa e kakaí [vakai, 2 Nīfai 28:7–9]. Ka ʻoku ou pehē kiate kimoutolu, he ʻikai ke tau lava ʻo tafoki mei he hala ʻo e moʻoní mo e angatonú mo kei maʻu ʻa e fakahinohino ʻa e Laumālie ʻo e ʻEikí.16
ʻOku ʻikai ha potu ia ʻi Saione moʻó e taha angahala loto fie faiangahalá. ʻOku ʻi ai ha potu moʻó e taha angahala ʻoku fakatomalá, ki he tangata ʻoku tafoki mei he angahalá pea fekumi ki he moʻui taʻengatá mo e maama ʻo e Ongoongoleleí. ʻOku ʻikai totonu ke tau sio ki he angahalá ʻo momoʻi fakaʻatuʻi, ʻo toe kehe mei he meʻa ʻoku lava ke fai ʻe he ʻEikí, ka ke tau ʻaʻeva angatonu mo haohaoa ʻi he ʻao ʻo e ʻEikí.17
ʻE toki lava pē ke fakahaofi mo hākeakiʻi ʻa e tangatá ʻi he puleʻanga ʻo e ʻOtuá ʻi he māʻoniʻoni; ko ia, kuo pau ke tau fakatomalaʻi ʻetau ngaahi angahalá pea ʻaʻeva ʻi he māmá he ʻoku ʻi he māmá ʻa Kalaisi [vakai, 1 Sione 1:7], ke lava ʻe hono taʻataʻá ʻo fakamaʻa kitautolu mei he ngaahi angahala kotoa pē pea ke tau lava ʻo feohi mo e ʻEikí mo maʻu mei hono nāunaú mo e hakeakiʻí.18
ʻOku tau fie maʻu e fakatomalá, pea ʻoku fie maʻu ke talamai ke tau fakatomala.19
4
ʻOku fakahaaʻi e ʻaloʻofa ʻa e Tamai Hēvaní mo Sīsū Kalaisí, ʻi he tefitoʻi moʻoni ʻo e fakatomalá.
Ko e fakatomalá ko e taha ia ʻo e ngaahi tefitoʻi moʻoni fakafiemālie mo nāunauʻia taha ʻoku akoʻi ʻi he ongoongoleleí. Mahalo ʻoku fakahaaʻi mālohi ange ʻi he tefitoʻi moʻoni ko ʻení ʻa e ʻaloʻofa ʻetau Tamai Hēvaní mo hono ʻAlo pē Taha Ne Fakatupu ko Sīsū Kalaisí, ʻo laka ange ʻi ha toe tefitoʻi moʻoni. Ko ha toki meʻa fakamanavahē kapau naʻe ʻikai ke ʻi ai ha fakamolemole ʻo e angahalá pea ʻikai ha toe founga ki he fakamolemole ʻo e angahala ʻa kinautolu ʻoku fakatomala ʻi he loto fakatōkilaló! Te tau lava pē ʻo fakakaukau fakakonga atu ki he manavahē te ne lōmekina kitautolu, kapau te tau foua ʻa e tautea ʻo ʻetau ngaahi maumaufonó ʻo taʻengata pea taʻengata ʻo ʻikai ha toe ʻamanaki ki ha faʻahinga fakafiemāie. ʻOku maʻu fēfē ʻa e fakafiemālie ko iá? ʻOku ala maʻu ia meia hai?
Kuo ʻosi folofola hotau ʻEikí:
“He naʻe ʻofa pehē ʻa e ʻOtuá ki māmani, naʻá ne foaki hono ʻAlo pē taha naʻe fakatupú, koeʻuhí ko ia kotoa pē ʻe tui kiate iá ke ʻoua naʻa ʻauha, kae maʻu ʻa e moʻui taʻengatá.
“He naʻe ʻikai fekau ʻe he ʻOtuá hono ʻAló ki māmani ke fakamalaʻiaʻi ʻa māmani; ka koeʻuhí ke moʻui ʻa māmani ʻiate ia.” [Sione 3:16–17; vakai foki, veesi 18–21.]
Kapau ne ʻikai ke fekau mai ʻe he Tamaí ʻa Sīsū Kalaisi ki māmani, pea ta ne mei ʻikai lava ke ʻi ai ha fakamolemole ʻo e ngaahi angahalá pea he ʻikai lava ke ʻi ai ha fakatauʻatāinaʻi mei he angahalá ʻo fou he fakatomalá.20
“Ko e fakatomalá ko e taha ia ʻo e ngaahi tefitoʻi moʻoni fakafiemālie mo nāunauʻia taha ʻoku akoʻi ʻi he ongoongoleleí.”
Kapau ʻoku mahino moʻoni kiate kitautolu mo ongoʻi ʻo aʻu ki he kihiʻi tuʻunga siʻisiʻi, ʻa e ʻofa mo e loto āfeitaulalo ʻa Sīsū Kalaisi ke mamahi maʻa ʻetau ngaahi angahalá, te tau loto fiemālie ke fakatomala mei heʻetau ngaahi maumaufono kotoa pē pea tauhi kiate ia.21
5
ʻOku kau ʻi he fakatomalá ha loto mamahi fakamoʻomoʻoni koeʻuhí ko e angahalá pea tafoki fakaʻaufuli mei he angahalá.
ʻOku pehē ʻe he folofolá:
“Ke ke ʻatu ha feilaulau ki he ʻEiki ko ho ʻOtuá ʻi he māʻoniʻoni, ʻa ia ko e loto mafesifesi mo e laumālie fakatomala.” [T&F 59:8.]
ʻOku ʻuhinga ia ke fakatomala.
… Ko e fakatomalá, ʻo fakatatau mo e fakaʻuhinga ʻi he tikisinalé, ko e loto mamahi fakamoʻomoʻoni koeʻuhí ko e angahalá ʻo fakahalaiaʻi pē ʻe kita ʻa kita, pea tafoki fakaʻaufuli mei he angahalá. … He ʻikai lava ke ʻi ai ha fakatomala moʻoni ʻo ʻikai ke ʻi ai ha mamahi mo ha holi ke fakatauʻatāinaʻi mei he angahalá.
Ko e loto mamahí ko e fakafōtunga ia ʻo e laumālie mafesifesí, pe loto fakatōkilaló, koeʻuhi ko e angahalá pea mo ha ongoʻi moʻoni e fulikivanu ʻo e angahalá mo hono fakatokangaʻi ʻo e ʻaloʻofa mo lelei ʻa e ʻOtuá kuo foaki ki he taha angahala kuo fakatomalá. … ʻOku pehē ʻe he ʻEikí ʻi he ʻuhinga ko iá, hangē ko ia kuó u ʻosi lau atú, kuo pau ke tau fai ha feilaulau, “ʻi he māʻoniʻoni, ʻa ia ko e loto mafesifesi mo e laumālie fakatomala.” …
Ko e fakatomalá ko ha meʻaʻofa ʻa e ʻOtuá. … ʻOku ʻikai fuʻu faingofua ki ha kakai ʻe niʻihi ke fakatomala, ka ʻe foaki ʻa e fakatomalá mo e tuí ki he kakai kotoa pē ʻoku nau fekumi ki aí.22
Kuó u ako mei he meʻa kuó u aʻusiá ko e taimi ʻokú ke fie maʻu ai ke liliú, ʻo fie maʻu moʻoni ke liliú, te ke lava ʻo fai ia. ʻOku talamai ʻe hotau konisēnisí mo e ngaahi folofolá ʻa e meʻa ke tau moʻui ʻakí —pea ʻoku nau talamai ʻa e ʻulungaanga ʻoku totonu ke tau liliu koeʻuhí ko ʻetau lelei mo ʻetau fakalakalaka taʻengatá.23
6
Ko e taimi ʻeni ke fakatomala aí.
He ʻikai fakahaofi ʻe he ʻOtuá ia ʻa e tangata mo e fefine kotoa pē ʻi he puleʻanga fakasilesitialé. Kapau ʻokú ke fie aʻu ki ai, ka ʻoku ʻi ai haʻo ngaahi tōnounou, kapau ʻokú ke fai ha ngaahi angahala, kapau ʻokú ke maumauʻi ʻa e ngaahi fekau ʻa e ʻEikí pea ʻokú ke ʻiloʻi ia, ko ha taimi lelei ʻa e taimí ni ke fakatomala mo liliu, kae ʻoua naʻa maʻu e fakakaukau ko ha kiʻi meʻa siʻi pē pea ʻe fakamolemoleʻi koe ʻe he ʻEikí, ʻi ha ngaahi tā siʻisiʻi, ʻaki ha kiʻi tautea siʻisiʻi pē pea ʻe fakamolemoleʻi leva kitautolu; he ʻe lī ʻa kimoutolu ki tuʻa, kapau te ke kei taʻe-ʻunua mo vilitaki ʻi he faʻahinga hala peheé.24
Ko e fakatoloí, ʻi heʻene fekauʻaki mo e ngaahi tefitoʻi moʻoni ʻo e ongoongoleleí, ko e taha ia ʻokú ne kaihaʻasi e moʻui taʻengatá, ʻa ia ko e moʻui ʻi he ʻafioʻanga ʻo e Tamaí mo e ʻAló. ʻOku ʻi ai ha tokolahi ʻi hotau lotolotongá, kau ai e kau mēmipa ʻo e Siasí, ʻoku nau ongoʻi tokua ʻoku ʻikai fie maʻu ia ke fakavavevaveʻi hono tauhi e ngaahi tefitoʻi moʻoni ʻo e ongoongoleleí pea mo hono tauhi ʻo e ngaahi fekaú. …
ʻOua naʻa tuku ke ngalo ʻiate kitautolu e ngaahi lea ʻa [ʻAmulekí]: “He vakai, ko e moʻuí ni, ko e taimi ia ki he tangatá ke teuteu ai ke feʻiloaki mo e ʻOtuá; ʻio, vakai ko e ʻaho ʻo e moʻui ní, ko e ʻaho ia ke fai ai ʻe he kakaí ʻa ʻenau ngaahi ngāué.
“Pea ko ʻeni, hangē ko ʻeku pehē kiate kimoutolu ʻi muʻá, ko e meʻa ʻi hoʻomou maʻu ha ngaahi fakamoʻoni lahi pehē, ko ia ʻoku ou kole ai kiate kimoutolu ke ʻoua naʻa mou toloi ʻa e ʻaho ʻo hoʻomou fakatomalá ʻo aʻu ki he ngataʻangá; he ka hili ange ʻa e ʻaho ʻo e moʻui ní, ʻa ia kuo tuku mai kiate kitautolu ke teuteu ki he taʻengatá; vakai, kapau ʻoku ʻikai te tau fakaʻaongaʻi hotau ngaahi ʻaho ʻi he moʻui ní, ʻe toki hoko mai ʻa e pō ʻo e fakapoʻulí, ʻa ia ʻe ʻikai lava ke fai ai ha ngāue.
“ʻE ʻikai te mou lava ke pehē, ʻo ka ʻomi ʻa kimoutolu ki he taimi fakamanavahē ko iá, te u fakatomala, pea te u tafoki ki hoku ʻOtuá. ʻIkai, ʻe ʻikai te mou lava ke leaʻaki ʻeni; he ko e laumālie pē ko ia ʻokú ne puleʻi homou sinó ʻi he taimi ʻoku mou fononga atu ai mei he moʻui ní, ʻe maʻu ha mālohi ke puleʻi homou sinó ʻe he laumālie pē ko iá ʻi he maama taʻengatá.” [ʻAlamā 34:32–34.]25
7
ʻOku tau moʻua ki māmani ke hiki hake ha leʻo ʻo e fakatokanga.
ʻOku fakataumuʻa ʻa e ʻEikí ke fiefia ʻa e tangatá—ko ʻene taumuʻá ia—ka ʻoku fakafisi ʻa e tangatá ke fiefia mo ʻai kinautolu ke nau mamahi, koeʻuhí he ʻoku nau fakakaukau ʻoku lelei ange honau ngaahi halá ʻi he ngaahi hala ʻo e ʻOtuá, pea koeʻuhí ko e siokitá, mānumanú, pea mo e angahala ʻi honau ngaahi lotó; pea ko ʻetau palopalema ia ʻi he ʻaho ní.26
ʻI he anga ʻemau sio ʻi heʻemau fefonongaʻaki mei he feituʻu ki he feituʻu pea mo e meʻa ʻoku mau lau ʻi he ngaahi nusipepá, ʻoku fie maʻu ke tau tui ʻoku mātuʻaki mahuʻinga ʻa e fakatomala mei he angahalá ʻi he māmaní kotoa he ʻahó ni.27
ʻOua naʻa fakakaukau kuo tau aʻu ki ha tuʻunga he ʻikai ke toe kovi ange ai. Ka ʻikai ha fakatomala ʻe toe kovi ange. Pea ko ia ʻoku ou kalanga ʻaki ai ʻa e fakatomalá ki he kakaí, ki he Kau Māʻoniʻoni ʻi he Ngaahi ʻAho Kimui Ní, … pea mo e ngaahi puleʻanga ʻo e māmaní ʻi he feituʻu kotoa pē.28
ʻOku tau moʻua ki māmani ke hiki hake ha leʻo ʻo e fakatokanga, pea tautautefito ki he kāingalotu ʻo e Siasí [vakai, T&F 88:81].29
Ko hotau fatongia ke fetauhiʻaki, ke femaluʻiʻaki, ke fefakatokangaʻaki ʻi he ngaahi meʻa fakatuʻutāmakí, ke feakoʻiʻaki e ngaahi tefitoʻi moʻoni ʻo e Ongoongolelei ʻo e puleʻangá, pea ke tuʻu fakataha ʻi he uouangataha ʻo fakafepakiʻi ʻa e ngaahi angahala ʻo e māmaní.30
ʻOku ʻikai ke u ʻilo ha meʻa ʻe toe mahuʻinga ange pe ʻe fie maʻu he taimí ni ka ke kalangaʻaki ʻa e fakatomalá, pea naʻa mo e lotolotonga ʻo e Kau Māʻoniʻoni ʻi he Ngaahi ʻAho Kimui Ní, pea ʻoku ou kalanga ai kiate kinautolu pea pehē kiate kinautolu ʻoku ʻikai ko e kau mēmipa ʻo e Siasí, ke nau tokanga ki he ngaahi folofola ko ʻeni ʻa hotau Huhuʻí. Kuó ne ʻosi fakahā mahino ʻeni he ʻikai ha meʻa taʻe-maʻa ʻe lava ʻo hū ki hono ʻaó. Ko kinautolu pē ʻoku nau fakamoʻoniʻi ʻoku nau faivelenga pea mo ʻosi fō honau ngaahi kofú ʻi hono taʻataʻá ʻi heʻenau tui mo fakatomalá—he ʻikai ha toe taha te ne maʻu ʻa e puleʻanga ʻo e ʻOtuá.31
“Kae vakai, ko e ngaahi puleʻanga, mo e ngaahi faʻahinga, mo e ngaahi lea mo e kakai kotoa pē ʻe nofo malu ʻi he Tokotaha Māʻoniʻoni ʻo ʻIsilelí ʻo kapau te nau fakatomala.” [1 Nīfai 22:28.] Pea ʻoku ou fakaʻamu te nau fakatomala. ʻOku ou fie maʻu ke nau nofo malu. ʻOku ou fie maʻu ke nau tui ki he Tokotaha Māʻoniʻoni ʻo ʻIsilelí, ʻa ia naʻe hāʻele mai ki māmani mo fai e fakalelei maʻa ʻetau ngaahi angahalá, maʻá e ngaahi angahala ʻa e faʻahinga ʻo e tangatá, ʻa ē naʻá ne foaki kiate kitautolu ʻa e huhuʻi mei he maté, ʻa ē naʻá ne talaʻofa mai kiate kitautolu ʻa e fakamoʻuí mo e fakamolemole ʻo ʻetau ngaahi angahalá kapau te tau fakatomalá.
ʻOi, pehē ange mai ʻe au ʻe tui ʻa e faʻahinga kotoa ʻo e tangatá kiate ia, te nau hū kiate ia mo ʻene Tamaí, pea mo tauhi ki he ʻEiki ko hotau ʻOtuá ʻi he huafa ʻo e ʻAló, pea ʻe hoko mai ʻa e melinó, ikuna mo e māʻoniʻoní, pea ʻe toki fokotuʻu ʻe he ʻEikí hono puleʻangá ʻi he māmaní.32
ʻOku ou kole ki māmani ke nau fakatomala mo tui ki he moʻoní, ke tuku ke ulo ʻa e maama ʻa Kalaisí ʻi heʻenau moʻuí, ke tauhi ʻa e tefitoʻi moʻoni lelei mo moʻoni kotoa pē ʻoku nau maʻú, pea tānaki atu ki he maama mo e ʻilo ko ʻeni naʻe maʻu ʻi he fakahā ʻi he kuonga ní. ʻOku ou kole kiate kinautolu ke nau kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo utu ʻa e ngaahi tāpuaki ʻo e ongoongoleleí.
ʻOku ou kole ki he kāingalotu ʻo e Siasí ke nau fakahoko ʻa e ngaahi ngāue ʻo e māʻoniʻoní, ke tauhi e ngaahi fekaú, ke fekumi ki he Laumālié, ke ʻofa ʻi he ʻEikí, ke fakamuʻomuʻa ʻi heʻenau moʻuí ʻa e ngaahi meʻa ʻo e puleʻanga ʻo e ʻOtuá, pea nau lava ai ʻo ngāueʻi honau fakamoʻuí ʻi he manavahē mo e tetetete ʻi he ʻao ʻo e ʻEikí [vakai, Filipai 2:12].33
Ngaahi Fokotuʻu ki Hono Ako mo Akoʻí
Ngaahi fehuʻi
-
Toe fakamanatu ʻa e ngaahi fakamatala ʻa Palesiteni Sāmita ʻi he “Mei he Moʻui ʻa Siosefa Filitingi Sāmitá,” fekauʻaki mo e ʻuhinga naʻá ne fie maʻu ai ke “hiki hake ʻa e leʻo ʻo e fakatokangá.” ʻOku hoko fēfē ʻa e ui ke fakatomalá ko hano fakahaaʻi ʻo e ʻofá?
-
Ko e hā ʻene ʻuhinga kiate koe ke fakatefito hoʻo tuí ʻi he Tamai Hēvaní mo Sīsū Kalaisí? (Vakai, konga 1.)
-
Ko e hā ʻoku fakaiku maʻu ai pē ʻa e tui moʻoní ki he ngāué? (ke maʻu ha ngaahi sīpinga, vakai, konga 2.) Ko e hā ha ngaahi founga te tau lava ai ʻo fakahaaʻi ʻetau tuí ʻaki ʻetau ngaahi ngāué?
-
ʻOku hoko fēfē fakatomalá ko ha “ola ʻo e tuí”? (Vakai, konga 3.)
-
Fakakaukau fakalongolongo ki ha taimi naʻá ke fakatomala ai pea ongoʻi e ʻaloʻofa mo e ʻofa ʻa e Tamai Hēvaní mo Sīsū Kalaisí (vakai, konga 4). Ko e hā te ke lava ʻo vahevahe fekauʻaki mo hoʻo houngaʻia ʻi he Fakalelei ʻa e Fakamoʻuí?
-
Ko e hā ʻoku ʻikai ke lava ai ʻa e fakatomalá “ʻo [ka] ʻikai ke ʻi ai ha mamahi mo ha holi ke fakatauʻatāinaʻi mei he angahalá”? (Vakai, konga 5.) ʻE foaki fēfē ʻe he ongo palakalafi fakaʻosi ʻi he konga 5 ʻo ʻomi e ʻamanaki leleí ki ha taha ʻoku ongoʻi lotomamahi koeʻuhí ko e angahalá?
-
Ko e hā ha ngaahi founga ʻoku hoko ai e fakatoloí “ko e taha ʻokú ne kaihaʻasi ʻa e moʻui taʻengatá”? (Vakai, konga 6.) Ko e hā ha ngaahi fakatuʻutāmaki ʻo e toloi e fakatomalá?
-
ʻI hoʻomou fakamanatu ʻa e konga 7, fakakaukauʻi hono ʻuhinga ʻo e “hiki hake ha leʻo ʻo e fakatokangá.” Te tau lava fēfē ke angaʻofa mo ʻofa ʻi heʻetau feinga ke fakatokanga ki he niʻihi kehé?
Ngaahi Potu Folofola Fekauʻakí
Hepelū 11:1–6; Mōsaia 4:1–3; ʻAlamā 34:17; ʻEta 12:4; Molonai 7:33–34; T&F 18:10–16; Ngaahi Tefito ʻo e Tuí 1:4
Tokoni Fakafaiako
“[Ko e taha akó kuo pau ke ʻai ke ngāué. Ko e taimi ʻoku tuʻu ai ha faiako ʻi muʻa, ʻoku hoko ia ko e taha mahuʻinga ʻo e ngāué, ʻokú ne fai kotoa e leá, pea aʻu ʻo ne puleʻi kotoa e ngaahi ʻekitivitií, ʻoku meimei ke fakapapauʻi ʻokú ne fakahohaʻasi e ako ʻa e kau mēmipa ʻo e kalasí]” (Asahel D. Woodruff, Teaching the Gospel [1962], 37; ʻi he Virginia H. Pearce, “The Ordinary Classroom—A Powerful Place for Steady and Continued Growth,” Ensign, Nōvema 1996, 12).