Fakamatala Fakahisitōlia Nounou

ʻOku ʻoatu ʻe he fakahokohoko ʻo e ngaahi meʻa naʻe hokó, ha fakamatala fakahisitōlia nounou ki he ngaahi akonaki ʻa Palesiteni Siosefa Filitingi Sāmitá ʻi he tohi ko ʻení.

19 Siulai 1876	Fāʻeleʻi ʻi Sōleki Siti, ʻIutā kia Sulina Lamisoni Sāmita pea mo Siosefa F. Sāmita.
19 Siulai 1884	Papitaiso pea hilifakinima heʻene tamaí. Maʻu ʻene fuofua tatau ʻo e Tohi ʻa Molomoná mei heʻene tamaí.
6 ʻEpeleli 1893	ʻAlu ki hono fakatapui ʻo e Temipale Sōlekí.
1896	Maʻu ʻa e Lakanga Taulaʻeiki Faka-Melekisēteki pea mo e ʻenitaumeni fakatemipalé.
26 ʻEpeleli 1898	Mali mo Louī ʻEmelī Setilifi ʻi he Temipale Sōlekí.
Mē 1899 ki Siulai 1901	Hoko ko ha faifekau taimi kakato ki ʻIngilani.
1901 ki he 1910	Lahi e ngaahi uiuiʻi faka-Siasi ne ngāue aí, ʻo kau ai ʻene hoko ko e palesiteni ʻo e kōlomu lakanga fakataulaʻeikí, mēmipa ʻi he poate lahi ʻa e Kautaha Fakalakalaka ʻo e Mutuale ʻa e Kau Talavoú, hoko ko ha aleaʻanga māʻolunga pea mo ha mēmipa ʻo e kōmiti pule ʻa e Siasí ne vahe ke nau teuteuʻi e nāunau ke taukapoʻi ʻaki e Siasí.
ʻOkatopa 1901	Kamata ngāue ʻi he ʻōfisi Faihisitōlia ʻa e Siasí.
1902	Pulusi ha tohi hisitōlia fakafāmili ne ui ko e Asael Smith of Topsfield, Massachusetts, with Some Account of the Smith Family. Ko ʻene fuofua tohi ʻeni ne pulusi ʻi ha ngaahi tohi lahi, kau ai ha tohi ʻe 25 mo ha ngaahi fakamatala lahi maʻá e makasini ʻa e Siasí.
8 ʻEpeleli 1906	Hikinimaʻi he konifelenisi lahí ke hoko ko ha Tokoni Faihisitōlia ʻa e Siasí, pea naʻá ne ngāue ai ʻo aʻu ki Māʻasi 1921.
30 Māʻasi 1908	Mālōlō ʻa Louī Setilifi Sāmita hili haʻane puke lahi ʻi heʻene feitama hono tolú.
2 Nōvema 1908	Mali mo ʻĪteli Siosina Leinolo ʻi he Temipale Sōlekí.
7 ʻEpeleli 1910	Fakanofo ko ha ʻAposetolo ʻe heʻene tamaí.
ʻOkatopa 1918	Hiki ha fakahā fekauʻaki mo e huhuʻi ʻo e kau pekiá ʻi hono fakahaaʻi ange ʻe heʻene tamaí, ko e Palesiteni ʻo e Siasí he taimi ko iá. ʻOku maʻu e fakahā ko ʻení he taimí ni ʻi he Tokāteline mo e Ngaahi Fuakava 138.
6 Sānuali 1919	Fili ko ha tokoni ʻi he kau palesitenisī ʻo e Temipale Sōlekí, ʻo ne ngāue ai ʻo aʻu ki he 1935.
17 Māʻasi 1921	Fili ko e Faihisitōlia ʻo e Siasí, ʻo ne ngāue ai ʻo aʻu ki he 1970.
1934	Hoko ko e palesiteni ʻo e Kautaha Tohihohoko ʻa ʻIutaá, ʻo ne ngāue ai ʻo aʻu ki he 1961.
26 ʻAokosi 1937	Mālōlō ʻa ʻĪteli Leinolo Sāmita hili haʻane puke ʻi ha taʻu ʻe fā.
12 ʻEpeleli 1938	Mali mo Sesi ʻEla ʻĒveni ʻi he Temipale Sōlekí.
Mē ki Nōvema 1939	Fakahoko mo Sesi ha ngāue makehe ki ʻIulope, ʻo ʻaʻahi ki ʻIngilani, Sikotilani, Hōlani, Pelesiume, Falanisē, Suisalani, ʻĪtali, Sueteni, Noaue, Tenimaʻake, Sekisolovākia, ʻAosituliá pea mo Siamane. Tataki ʻa hono fetukutuku e kau faifekau ʻAmelika kotoa pē mei ʻIulope hili e kamata ʻa e Tau Lahi ʻa Māmani Hono II.
8 Sune 1945	Ui ke hoko ko e palesiteni ʻo e Temipale Sōlekí, ʻo ne ngāue ai ʻo aʻu ki he 1949.
6 ʻOkatopa 1950	Vaheʻi ke hoko ko e Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá.
9 ʻEpeleli 1951	Hikinimaʻi ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá.
Siulai ki ʻAokosi 1955	Fakahoko mo Sesi ha ngāue makehe ki ʻĒsia. Fakatapui ʻa Kuamu, Kōlea, ʻOkinaua pea mo e ʻOtu Filipainí ke malangaʻi ai e ongoongoleleí.
Sepitema 1958	ʻAlu ki hono fakatapui ʻo e Temipale Lonitoni ʻIngilaní.
ʻOkatopa 1960 ki Sānuali 1961	ʻAʻahi fakataha mo Sesi ki he kau taki faka-Siasi mo e kau faifekau ʻi ʻAmelika Lotoloto mo ʻAmelika Tongá.
Mē 1963	Fakahoko ʻa hono fakatoka ʻo e makatuliki ʻo e Temipale ʻOakalani Kalefōniá.
Sepitema 1963	Fakatapui e Maka Fakamanatu ʻo e Kau Paioniá ʻi Kenisasi Siti, Mīsulí pea mo e Feituʻu Fakahisitōlia ko e Falefakapōpula Lipetií, ʻi Mīsuli.
29 ʻOkatopa 1965	Ui ke hoko ko ha Tokoni ʻi he Kau Palesitenisī ʻUluakí, ʻi he fakahinohino ʻa Palesiteni Tēvita O. Makei.
18 Sānuali 1970	Hoko ko e ʻAposetolo pulé pea mo e takimuʻa ke ne puleʻi e Siasí ʻi he pekia ʻa Palesiteni Tēvita O. Makeí.
23 Sānuali 1970	Vaheʻi ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
6 ʻEpeleli 1970	Hikinimaʻi lolotonga e konifelenisi lahí ke hoko ko e Palesiteni ʻo e Siasí.
3 ʻAokosi 1971	Mālōlō ʻa Sesi ʻĒveni Sāmita.
27–29 ʻAokosi 1971	Puleʻi e fuofua konifelenisi fakaʻēlia ʻa e Siasí, ne fai ʻi Menisesitā, ʻIngilani.
18 Sānuali 1972	Fai e lotu fakatapui ʻo e Temipale ʻOkiteni ʻIutaá.
9 Fēpueli 1972	Puleʻi ʻa hono fakatapui ʻo e Temipale Polovo ʻIutaá. Hili ʻene tohi e lotu fakatapuí, naʻá ne vahe leva kia Palesiteni Hāloti B. Lī ke ne fai ʻa e lotú.
2 Siulai 1972	Pekia ʻi Sōleki Siti, ʻIutā, ʻi he toe ha ʻaho ʻe 17 pea hoko hono taʻu 96.