Pene 13
Te bapetizoraa
« Te bapetizoraa… o te tauiraa ïa, e aore râ, te ti‘a-faahou-raa mai roto mai i te hoê oraraa haere ti‘a’tu i roto i te tahi—mai roto mai i te oraraa hara i roto i te oraraa o te oraraa pae varua ».
No roto mai i te oraraa o Joseph Fielding Smith
I roto i te amuiraa rahi no eperera 1951, ua parau te peresideni Joseph Fielding Smith no ni‘a i te ohipa tei tupu i ni‘a ia’na e 67 matahiti na mua’tu, a bapetizohia ai oia i te 8 o to’na matahiti. Te parau ra oia e, i te mahana o to’na bapetizoraa, ua tupu te mana‘o i roto ia’na e, « e mea viivii ore oia, e te mâ i mua i te Fatu ». Tera râ, ua haapii mai oia e, ua titauhia ia’na ia rohi i roto i to’na oraraa taatoa no te tape‘a tamau noa ia’na i roto i taua huru ra. Te faahaamana‘o ra oia e : « Te vai ra to’u hoê tuahine maitai roa, mai to’u mau tuahine atoa, tei haaputapû i roto i to’u feruriraa i te titauraa ia tape‘a ia’u ia vai porao ore noa i te mau mea o te ao nei. Ta’na mau haapiiraa ia’u i te mahana a bapetizohia ai au, ua vai noa ïa i roto ia’u i te mau mahana atoa o to’u oraraa ».1
Ma te haapa‘o i te mau haapiiraa a to’na tuahine, ua faaitoito te peresideni Smith i te mau melo o te Ekalesia ia haapa‘o i ta ratou fafauraa no te bapetizoraa—ia vai noa « i roto i [te] oraraa pae varua » ta ratou i farii i te taime a bapetizohia ai ratou.2 Ua parau oia e :
« Aita e parau a‘o e ti‘a ia horo‘ahia i te hoê melo no te Ekalesia hau atu i te faufaa i te parau a‘o ia haapa‘o i te mau faaueraa i muri a‘e i te bapetizoraa. E horo‘a mai te Fatu ia tatou i te faaoraraa mai te mea e, e tatarahapa tatou e e haapa‘o i ta’na mau ture ».3
Te mau haapiiraa a Joseph Fielding Smith
1
Te bapetizoraa utuhi ua hoho‘a ïa i te fanauraa, te poheraa e te ti‘a-faahou-raa.
Te bapetizoraa, te toru o te parau tumu e te oro‘a matamua o te Evanelia, e mea titauhia ïa no te faaoraraa e no te faateiteiraa i roto i te basileia o te Atua. A tahi, te bapetizoraa, o te rave‘a ïa e roaa ai i te taata tatarahapa te matararaa o te mau hara. A piti, o te uputa ïa no te tomo i roto i te basileia o te Atua. Ta te Fatu ïa e parau mai nei ia tatou, a paraparau ai oia ia Nikodemo i roto i te Ioane 3:1–11…
E ravehia te bapetizoraa na roto i te utuhiraa i raro i te pape… Eita roa te bapetizoraa e ravehia na roto i te tahi atu huru raveraa maori râ, na roto i te utuhiraa i te tino taatoa i raro i te pape, no teie mau tumu i muri nei :
(1) E faahoho‘araa te reira i te poheraa, te hunaraa e te ti‘a-faahou-raa o Iesu Mesia, e o te tahi atu mau taata atoa tei farii i te ti‘a-faahou-raa.
(2) Te bapetizoraa o te hoê atoa ïa fanauraa e mai te au i te fanauraa o te hoê tamarii i te fenua nei.
(3) Te bapetizoraa, tei faahoho‘a-atoa-hia i te ti‘a-faahou-raa, o te tauiraa ïa, e aore râ, te ti‘a-faahou-raa mai roto mai i te hoê oraraa haere ti‘a’tu i roto i te tahi—mai roto mai i te oraraa hara i roto i te oraraa o te oraraa pae varua ».
Te hinaaro nei au e tape‘a mai i te tumu piti : Te bapetizoraa o te hoê atoa ïa fanauraa e mai te au i te fanauraa o te hoê tamarii i te fenua nei… I roto i te Mose 6:58–60 te tai‘o nei tatou :
« No reira te horo‘a’tu nei au i te hoê faaueraa ia oe, ia haapii atu i teie mau mea i ta outou mau tamarii ma te tapeapea ore, i te na ôraa e :
« No te ofatiraahia te ture i tae mai ai te hi‘araa, e no te hi‘araa i tae mai ai te pohe. No te mea ua fanauhia oe i roto i te ao nei na roto i te pape e te toto, e te varua o ta’u i hamani ra, e no te reira i riro mai ai te repo fenua ei taata ora, e na reira atoa, ia fanau-faahou-hia oe i roto i te basileia o te ao ra e ti‘a‘i, na roto i te pape, e te Varua, e ia tamâhia e te toto, oia te toto o ta’u ra Fanau Tahi ; ia ti‘a ia outou ia haamo‘ahia i te mau hara atoa ra, e ia oaoa i te mau parau o te ora mure ore i roto i teie nei ao, e te ora mure ore i te ao a muri atu, oia te hanahana tahuti ore ;
« Na roto i te pape e haapa‘o ai outou i te faaueraa ; na roto i te Varua e faatiahia ai outou, e na roto i te toto e haamo‘ahia ai outou »…
Te tamarii atoa e tae mai i roto i teie ao, i roto oia i te pape e amohia ai, e fanau oia i roto i te pape, e i te toto e i te varua. No reira, ia fanau-ana‘e-hia tatou i roto i te basileia o te Atua, e fanauhia ïa tatou mai te reira te huru e ti‘a ai : na roto i te bapetizoraa tei fanauhia i te pape ; na roto i te maniiraa te toto o te Mesia ua tamâhia e ua haamo‘ahia ; e ua faati‘ahia na roto i te Varua o te Atua, no te mea, aita te bapetizoraa i hope mai te mea e, aita te bapetizoraa o te Varua Maitai. Te ite ra outou i te tu‘atiraa i rotopu i te fanauraa i roto i te ao nei, e te fanauraa i roto i te basileia o te Atua…
Ia haere tatou i ni‘a i te toru o te tumu : Te bapetizoraa, tei faahoho‘a-atoa-hia, o te tauiraa ïa, e aore râ, te ti‘a-faahou-raa mai roto mai i te hoê oraraa haere ti‘a’tu i roto i te tahi—mai roto mai i te oraraa hara i roto i te oraraa o te oraraa pae varua »…
Ua titauhia te mau tane e te mau vahine atoa… ia tatarahapa… Tei roto ratou i te pohe pae varua. Nahea ratou i te ho‘i faahou ? Na roto i te hunaraa i raro i te pape. Ua pohe ratou, e ua hunahia i raro i te pape e ua ti‘afaahou mai i roto i te ti‘a-faahou-raa o te varua i roto i te oraraa pae varua. Tera te auraa o te bapetizoraa.4
Te faaite nei teie hoho‘a peni i te hoê taata e bapetizohia ra i roto i te anavai no Dnieper River i piha‘iho ia Kyiv, Ukraine.
2
Te mau tamariirii tei ore i tae‘a i te matahiti e mana‘o papû to ratou, aita ïa e titauhia ia bapetizo ia ratou no te mea ua faaorahia ratou na roto i te Taraehara a Iesu Mesia.
Ua ite au e, te mau tamariirii tei ore i tae‘a i te matahiti e mana‘o papû to ratou, e no reira, aita ïa ta ratou e hara, e… faaorahia ïa ratou na roto i te toto o te Mesia, e ua riro ïa ei faaooraa rahi ia marô e, ua titauhia ia bapetizo ia ratou, ma te huna roa i te parau-ti‘a e te aroha o te Atua [a hi‘o Moroni 8:20–23].5
I roto i te Tuhaa 29 o Te Parau Haapiiraa e te Mau Parau Fafau, te na ô ra te Fatu e (irava 46–47) :
« Tera râ inaha, te parau atu nei au ia outou e, ua faaorahia mai te mau tamarii rii mai te faatumuraahia mai o te ao nei na roto i to’u Fanau Tahi ra ;
« No reira, aita e ti‘a ia ratou ia rave i te hara, no te mea aita te mana i horo‘ahia’tu ia Satani ia faahema i te tamarii rii, e tae noa’tu i te taime e riro ai ratou ei feia mana‘o papû i mua ia’u nei ».
Aita atu ai ïa ta‘iraa parau navenave. « Ua faaorahia mai te mau tamarii rii mai te faatumuraahia mai o te ao nei ». Eaha te auraa o te reira No’na ? Te auraa ra, oia ho‘i, hou te faatumuraahia o te ao nei, teie faanahoraa no te ora, teie faanahoraa no te faaoraraa tei titauhia ia tatou ia haapa‘o i roto i teie oraraa tahuti nei, ua oti pauroa ïa i te faaineinehia, e no te ite o te Atua i te hopea mai te omuaraa mai ra, ua faanaho ihora Oia i te faaoraraa o te mau tamarii rii na roto i te taraehara o Iesu Mesia…
Ia hi‘o ana‘e outou i roto i te hoho‘a mata o te hoê aiu, e ia hi‘o mai oia ia outou e ia ataata mai, ua nehenehe anei ta outou e ti‘aturi e, ua tafetafetahia teie tamarii rii i te tahi huru hara o te faaere ia’na i te aro o te Atua ia pohe ana‘e oia ?…
Te haamana‘o nei au i te taime tei roto vau i te misioni i te fenua Peretane, te vai ra i reira hoê utuafare taata marite… I to [te tane] faarooraa i te mau « Elders » i te pororaa i roto i te mau aroa, ua ani manihini oia ia ratou ia haere mai i to’na fare no te mea, no to’na fenua mai ratou. E ere te evanelia ta’na i anaanatae ; o ratou ra ta’na i anaanatae no te mea, no te mau Hau Amui no Marite atoa mai ratou. E, te rave atoa ra vau na te reira mau vahi. E ere o vau te taata matamua ta’na i faaroo i te haapiiraa, tera râ, i muri a‘e, ua anihia vau ia haere i to’na fare…
Ua mana‘o vau e, e haere matou i to’na fare no te paraparau i te ta‘iri popo e i te faahoro popo e te tahi atu mau mea, e no te faaau i te mau mea i te mau Hau Amui no Marite i te mau mea no Peretane—te mau mea i auhia e a‘na. Te reira te ohipa ta maua i rave, e i te haamataraa aita maua i paraparau hoê noa a‘e parau no ni‘a i te haapa‘oraa. Ua ho‘i maua i to’na fare e rave rahi taime, e ua feruri oia e, e mau taata maitai roa maua no te mea, aita maua i tamata i te haapuunena ia’na i ta maua haapa‘oraa. Tera râ, i muri mai, ua haamata ratou i te ui i te tahi mau uiraa—ua ite ihoa maua e, e na reira ratou—e i te hoê ahiahi a parahi ai maua i roto i to ratou fare, ua fariu maira te vahine a teie taata i ni‘a ia’u e na ô mai nei e : « Elder Smith, te hinaaro nei au e ui ia oe i te hoê uiraa ». Hou a ui mai ai oia i ta’na uiraa ua haamata oia i te ta‘i. Aita vau i ite eaha râ te fifi. Ua ta‘i noa oia, e i te mărûraa oia no te ui i te uiraa, ua faati‘a maira oia i teie aamu :
I to ratou fanoraa mai i Peretane ua pohe to raua aiû… Ua haere raua e farerei i te orometua [o ta raua Ekalesia] e ua hinaaro raua ia hunahia ta raua aiû mai te Keresetiano te huru… Na ô mai nei te orometua ia’na e : « Eita ta matou e nehenehe e huna i ta orua aiû mai te Keresetiano te huru no te mea aita oia i bapetizohia. Ua mo‘e ta orua aiû ». E mea huru teimaha teie parau, tera râ, tera te aamu ta’na i faati‘a mai, e ua mauiui te aau o teie vahine e piti e aore râ e toru matahiti. No reira, ua ui maira oia ia’u i te uiraa : « ua mo‘e anei ta’u aiû ? Eita anei au e ite faahou ia’na ? » Ua tai‘o atura vau ia’na i roto i te Buka a Moromona i te mau parau a Moromona i ta’na tamaiti ia Moroni [a hi‘o Moroni 8]. Na ô atura vau : « Aita ta oe aiû i mo‘e. Eita te aiû e mo‘e. E faaorahia te mau aiû atoa i roto i te basileia o te Atua ia pohe ratou ».
… « E ua ite atoa vau e, e ua faaorahia te mau tamarii atoa o tei pohe i roto i te basileia o te ao ra, oia o ratou paatoa o tei pohe na mua a‘e i te tae‘a-raa-hia te faito tano no to ratou matahiti a taa ai ia ratou to ratou iho mana‘o ». [PH&PF 137:10] Tera ta te Fatu i parau i te peropheta Iosepha Semita i roto i te hoê heheuraa e aore râ, i te hoê orama ta’na i farii i roto i te hiero no Keterani. E ere anei teie i te ta‘iraa parau navenave ? E ere anei i te mea tano ? E ere anei i te mea ti‘a ?… E ere te hape na te [hoê aiû] te hara a Adamu, e ere na’na te hape no te mau huru hara atoa, na te aroha o te Atua e rave i te reira, e e faaore i te reira.
I teie nei râ, mai te aha te huru no outou e no’u ? I ô nei tatou, ua ti‘a ia tatou ia maramarama, e ua parau te Fatu e : « O vai ratou o tei noaa te ite ra, ta’u i ore i faaue atu ho‘i ia tatarahapa ? [PH&PF 29:49.] Ua faauehia tatou ia tatarahapa, ua faauehia tatou ia bapetizo, ua faauehia tatou ia tamâ i ta tatou mau hara i roto i te pape o te bapetizoraa, no te mea ua ti‘a ia tatou ia maramarama e ua hara tatou paatoa. Tera râ, aita vau i bapetizohia e aita outou i bapetizohia no te hoê a‘e ohipa i ravehia e Adamu. Ua bapetizohia vau ia tamâhia vau i te mau mea ta’u iho i rave, e mai te reira atoa no outou, e ia ti‘a ia’u ia haere i roto i te basileia o te Atua
… Ua faaineine te Fatu i te hoê faanahoraa no te feia aore e ture, e no reira aita te mau tamarii i raro a‘e i te ture no te tatarahapa. Nahea outou i te haapii i te hoê tamarii rii ia tatarahapa ? Aore hoê mea ta’na e tatarahapa.
Ua tuu te Fatu—mai Ta’na iho i faaoti ra—i te matahiti no te mana‘o papû i te va‘u matahiti. Ia tae‘ahia to tatou matahiti i te va‘u, mai te huru e, ua nava‘i to tatou maramarama i te reira area taime, no reira, ua ti‘a ia tatou ia bapetizohia. Na te Fatu e haapa‘o i te feia i raro mai i taua matahiti ra.6
3
Te mau taata atoa tei bapetizohia i roto i teie Ekalesia, ua rave ïa i te hoê fafauraa i mua i te Fatu.
Ia tomo te hoê taata i roto i te pape o te bapetizoraa, e rave oia i te hoê fafauraa i ni‘a ia’na iho.
« E teie faahou â, na roto i te faaueraa i te ekalesia no ni‘a i te rave‘a no te bapetizoraa—O ratou ato‘a o te faahaehaa ia ratou iho i mua i te Atua, e ua hinaaro ia bapetizohia ra, e ia haere mai ma te aau tae e te varua mărû, e ua faaite mai i mua i te ekalesia e ua tatarahapa mau â ratou i ta ratou ra mau hara ato‘a, e ua ti‘a ïa ia ratou ia rave i te i‘oa o Iesu Mesia i ni‘a iho ia ratou ra, ma te hinaaro mau ia tavini atu ia’na e tae noa’tu i te hopea ra, e ia faaite papû roa mai na roto i ta ratou ra mau ohipa e ua noaa iho â ia ratou te Varua o te Mesia i te haamatararaa i ta ratou ra mau hara, e fariihia ratou na roto i te bapetizoraa i roto i ta’na ekalesia » [PH&PF 20:37.] 7
« Te mau taata atoa tei bapetizohia i roto i teie Ekalesia, ua rave ïa i te hoê fafauraa e te Fatu ia haapa‘o i Ta’na mau faaueraa ».
E tai‘o atu vau i te tuhaa 59 o Te Parau Haapiiraa e te Mau Parau Fafau :
« No reira, te horo‘a’tu nei au i te hoê faaueraa ia ratou ra [oia ho‘i, te mau melo o te Ekalesia] i te na oraa’tu e : E here oe i te Fatu ra o to oe Atua mai to aau atoa, e i to puai atoa, te mana‘o, e te itoito ; e na roto i te i‘oa o Iesu Mesia oe e tavini atu ai ia’na ra.
« E here oe i to oe taata tupu mai ta oe i here na ia oe iho. Eiaha oe e eiâ ; eiaha atoa e faaturi, eiaha atoa e taparahi, eiaha atoa e rave i te hoê mea mai te reira te huru.
« E haamaitai atu oe i te Fatu ra o te Atua i roto i te mau mea atoa ra ». [PH&PF 59:5–7.]
Te mau taata atoa tei bapetizohia i roto i teie Ekalesia, ua rave ïa i te hoê fafauraa e te Fatu ra ia haapa‘o i Ta’na mau faaueraa, e i roto i teie faaueraa, mai tei faahiti-faahou-hia mai i roto i teie tau tuuraa ta tatou e ora nei, ua parauhia mai ia tatou e, e tavini tatou i te Fatu ma to tatou aau atoa e to tatou mana‘o atoa, e ma to tatou puai atoa, e te reira, na roto atoa i te i‘oa o Iesu Mesia. Te mau mea atoa ta tatou e rave, e ti‘a ïa ia ravehia na roto i te i‘oa o Iesu Mesia.
I roto i te pape o te bapetizoraa ua fafau tatou e, e haapa‘o tatou i teie mau faaueraa ; e tavini tatou i te Fatu ; e haapa‘o tatou i teie faaueraa matamua e tei hau i te rahi i te mau faaueraa atoa, e e here tatou i te Fatu to tatou Atua ; e haapa‘o tatou i te piti o te faaueraa rahi, e here tatou i to tatou taata tupu mai ia tatou iho nei ; e ma to tatou puai atoa, to tatou aau atoa, e faaite papû tatou Ia’na e, e ora tatou « na roto i te mau parau atoa na roto mai i te vaha o te Atua ; » [PH&PF 84:44] e riro tatou ei feia haapa‘o e te haehaa, te itoito i roto i Ta’na ohipa, ma te hinaaro ia haapa‘o, ia faaroo i te mau a‘o a te feia e peresideni ra i ni‘a ia tatou, e ia rave i te mau mea atoa ma te mata rotahi i ni‘a i te hanahana o te Atua.
Eiaha tatou e haamo‘e i teie mau mea, no te mea, ua riro teie faaueraa ei mea taamuhia i ni‘a ia tatou, i roto i to tatou ti‘araa ei melo no te Ekalesia.8
4
No te farii hope roa i te mau haamaitairaa o te evanelia, e ti‘a ia tatou ia vai haehaa noa, ia vai tatarahapa noa, e ia vai haapa‘o noa i muri a‘e i to tatou bapetizoraa.
Te hoê o te mau opuaraa rahi a te ekalesia mau, o te haapii ïa i te taata i te ohipa ta ratou e rave i muri a‘e i te bapetizoraa no te farii hope roa i te mau haamaitairaa o te evanelia.9
Te varua atoa i bapetizohia, tei bapetizo-mau-hia, ua faahaehaa ïa ia’na iho ; e aau oto to’na ; e varua haehaa to’na ; ua rave oia i te hoê fafauraa i mua i te Atua e, e haapa‘o oia i ta’na mau faaueraa, e ua faaru‘e oia i ta’na mau hara atoa. E ia ô mai oia i roto i te Ekalesia, e ti‘a anei ia’na ia rave i te hara i muri a‘e i to’na tomoraa mai ? E nehenehe anei ta’na e faaru‘e ? E nehenehe anei ta’na e rave i te tahi mau mea ta te Fatu i parau eiaha oia e rave ? Aita. E mea faufaa ia vai ia’na tera varua haehaa, tera aau oto i muri a‘e i to’na bapetizoraa, mai na mua mai i te bapetizoraa.10
Ua faaroo a‘enei au i te tahi pae o ta tatou feia apî, e te tahi e ere i te mea apî roa, i te paraparauraa no ni‘a i te bapetizoraa. Te parau ra ratou e, inaha ho‘i ua faataahia te bapetizoraa no te haamatararaa i te hara, aita ratou e taa ra e, no te aha aita hoê taata e bapetizohia i te mau taime atoa e rave oia i te hara. Te ite ra anei outou i te tumu ? Ia rave te hoê taata i te hara ma te parahi noa i roto i te oraraa pae varua, ua ora ïa oia, ua nehenehe ta’na e tatarahapa e e farii i te faaoreraa hapa. Aita e titauhia ia’na ia bapetizohia no te faaho‘i faahou mai ia’na i te vahi tei reira a‘ena oia.11
O vai, i rotopu i te Feia Mo‘a i te Mau Mahana Hopea Nei, o te titau nei i te hoê parahiraa i roto i te basileia tiretia ? O vai, i rotopu i te Feia Mo‘a i te Mau Mahana Hopea Nei, o te titau nei i te hoê parahiraa i roto i te basileia teretetiera ? Eiaha roa to tatou hinaaro ia tae i ni‘a i te reira mau basileia ; e ere te mana‘o o te taata i bapetizohia i roto i te Ekalesia, e eiaha ihoa ia riro mai, ia ora i te hoê oraraa e ore ai e itehia ia’na te hoê parahiraa i roto i te basileia tiretiera o te Atua ; no te mea, o te bapetizoraa ho‘i te e‘a no te tomo i roto i te reira basileia. E piti parau to te bapetizoraa ; te matamua, no te haamatara ïa i te hara, e i muri iho, no te tomo i roto i te basileia o te Atua, eiaha te basileia tiretia, eiaha i roto i te basileia teretetiera, no te tomo râ i roto i te basileia tiretiera, i reira ho‘i te Atua e parahi ai. Tera ïa te tumu o te bapetizoraa ; tera ïa te tumu o te horo‘araa i te Varua Maitai, na roto i te tuuraa rima—no te faaineine ia tatou ia ti‘a ia tatou, na roto i te haapa‘o, ia haere tamau noa i mua, ma te haapa‘o i te mau faaueraa a te Fatu, e tae roa’tu i te taime e roaa ai ia tatou te îraa i roto i te basileia tiretiera.12
Te mau mana‘o tauturu no te tuatapaparaa e te haapiiraa
Uiraa
-
A tai‘o ai outou i te mau haamana‘oraa a te peresideni Smith i roto i te « No roto mai i te oraraa o Joseph Fielding Smith », a feruri i to outou bapetizoraa. E mea nahea to outou haro‘aro‘a i te parau no te bapetizoraa i te tupuraa i te rahi mai te reira mahana ra ? Nahea e ti‘a ai ia tatou ia tauturu i te mau melo o te utuafare e aore râ, te mau hoa o te faaineine ra ia bapetizohia ?
-
Eaha te mau iteraa no ni‘a i te bapetizoraa e roaa ia outou mai roto mai i te mau haapiiraa a te peresideni Smith i roto i te tuhaa 1 ? Nahea ta’na mau haapiiraa no ni‘a i te tapa‘o o te bapetizoraa i te faarahiraa i to tatou ite no ni‘a i te fafauraa o te bapetizoraa ?
-
Eaha ta te aamu i roto i te tuhaa 2 e haapii mai nei no ni‘a i te here o te Metua i te Ao ra no Ta’na mau tamarii ? A feruri i te mau taata ta outou i mâtau o te ti‘a ia fana‘o i te haapiiraa tumu i haapiihia i roto i teie aamu.
-
A feruri i ta outou mau tautooraa no te haapa‘o i te fafauraa o te bapetizoraa (a hi‘o i te tuhaa 3). Nahea teie fafauraa i te faaûru i ta outou mau autaatiraa e te mau melo o te utuafare e o vetahi ê ?
-
A feruri i te faahitiraa parau a te peresideni Smith i te omuaraa o te tuhaa 4. I to outou mana‘o, eaha te mea e ti‘a ia haapiihia i te taata i muri a‘e i to ratou bapetizoraahia ? Nahea e ti‘a ai ia tatou ia tauturu te tahi i te tahi ia haapa‘o i te fafauraa o te bapetizoraa ?
Te mau papa‘iraa mo‘a
Mataio 3:13–17 ; 2 Nephi 31:5–13 ; Mosia 18:8–13 ; 3 Nephi 11:31–39 ; PH&PF 68:25–27 ; Hiroa Faaroo 1:4
Tauturu haapiiraa
« E nehenehe outou e haapii i ta outou mau piahi ia ti‘aturi i to ratou mau taleni no te faaô i roto i te hoê aparauraa mai te mea e pahono outou ma te maitai i te mana‘o papû tata‘itahi. Ei hi‘oraa, e nehenehe outou e parau: ‘Mauruuru no ta oe pahonoraa maitai. Aue te maitai o to oe mana‘o ‘… e aore râ ‘E hi‘oraa maitai te reira’ e aore râ ‘Ua mauruuru vau i te mau mea atoa o ta oe i parau i teie mahana’ » (Te Haapiiraa, Aita e Piiraa Teitei A‘e, [1999], 64).