Pene 3
Te faanahoraa no te faaoraraa
« Ua haamau to tatou Metua i te Ao ra i te hoê faanahoraa no te faaoraraa no ta’na mau tamarii varua… ia ti‘a ia ratou ia nuu e ia haere i mua e tae roa ia roaa te ora mure ia ratou ».
No roto mai i te oraraa o Joseph Fielding Smith
I te 29 no eperera 1901, ua pohe te tuahine o Joseph Fielding Smith, o Alice, 18 matahiti, i muri a‘e i te hoê ma‘i maoro. Ua fatata roa te misioni rave tamau a Joseph i Peretane i te hope. Na ta’na pahonoraa i te parau apî no te poheraa o Alice i faaite i to’na here i to’na utuafare e i to’na iteraa papû no ni‘a i te faanahoraa no te faaoraraa. Ua papa‘i oia i roto i ta’na buka aamu, « E ohipa fifi mau teie no matou paatoa ». « Aita vau i mana‘o e, e ma‘i rahi mau to’na, noa’tu e, ua ite au e, ua ma‘ihia oia. Ua mana‘o vau e, e farerei faahou vau i te taatoaraa o te utuafare i roto i te tahi tau hebetoma rii noa i muri nei, tera râ, ia haapa‘ohia te hinaaro o te Atua. I roto i taua mau taime ra e farii-poupou-hia ai te mau tia‘iraa ta te evanelia e horo‘a mai ia tatou. E farerei faahou â tatou paatoa i te tahi atu pae no te fana‘o i te oaoa e i te mau haamaitairaa o te iteraa i te tahi e te tahi, i reira ho‘i te mau taamuraa utuafare e ore ai e mutu faahou, i reira râ tatou paatoa e ora ai no te farii i te mau haamaitairaa, e no te ite i te aroha mărû o to tatou Metua i te Ao ra. Ia ti‘a ho‘i ia’u ia haere tamau noa na te e‘a o te parau mau, e ia faatura i te i‘oa ta’u e mau nei, ia riro ho‘i te mau farereiraa i to’u utuafare ei mau farereiraa hau roa i te oaoa e te mure ore ho‘i, o ta’u ïa pure haehaa ».1
A tavini ai oia ei Aposetolo e i muri a‘e, ei Peresideni o te Ekalesia, ua faaite tamau noa te peresideni Joseph Fielding Smith i te tia‘iraa e tae mai na roto i te hoê maramaramaraa o te evanelia. Ua haapii oia e, « Tei ia tatou nei te faanahoraa no te faaoraraa ; te faaohipa nei tatou i te evanelia ; e ua riro te evanelia ei tia‘iraa hoê roa no to te ao nei, te rave‘a hoê roa o te horo‘a mai i te hau i ni‘a i te fenua nei, e i te faatitiaifaroraa i te mau hape e vai nei i roto i te mau nunaa atoa ».2
Te mau haapiiraa a Joseph Fielding Smith
1
I roto i te ao varua hou te tahuti nei, ua oaoa tatou i te iteraa i te faanahoraa no te faaoraraa a te Metua i te Ao ra.
E melo tatou paatoa no te utuafare o to tatou Metua i te Ao ra. I ora na tatou e i parahi na tatou i piha‘iho Ia’na hou a haamauhia ai te tumu o te fenua nei. Ua ite tatou i To’na hoho‘a mata, ua ite tatou i To’na here, e ua faaroo tatou i Ta’na mau haapiiraa, e ua haamana oia i te mau ture e ti‘a ai ia tatou ia nuu atu e ia haere i mua e ia noaa to tatou iho utuafare mure ore.3
« I ora na tatou e i parahi na tatou i piha‘iho [i to tatou Metua i te Ao ra] hou a haamauhia ai te tumu o te fenua nei.
Ua haamau to tatou Metua i te Ao ra i te hoê faanahoraa no te faaoraraa no ta’na mau tamarii varua. Ua faataahia teie faanahoraa no te faati‘a ia ratou ia nuu atu e ia haere i mua e tae roa ia noaa ia ratou te ora mure ore, te i‘oa ïa o te huru oraraa e orahia nei e to tatou Metua i te Ao ra. Ua riro teie faanahoraa no te faati‘araa i te mau tamarii a te Atua ia riro mai ia’na ra te huru, e ia noaa te mana e te paari e te ite i mauhia e a‘na.4
Te haapii nei tatou i roto i te buka Poe Tao‘a Rahi e, ua faatupuhia te hoê apooraa i te ra‘i ra, i reira te Fatu i ti‘aoro ai i te mau varua o ta’na mau tamarii ia haere mai i mua ia’na, e ua hohora’tura i mua ia ratou i te hoê faanahoraa e ti‘a ai ia ratou ia haere mai i ni‘a i teie fenua, ia farii i te ora tahuti e i te tino, ia tomo na roto i te tamataraa o te tahuti, e ia haere i roto i te faateiteiraa teitei a‘e na roto i te ti‘a-faahou-raa o te faatupuhia na roto i te taraehara o ta’na Tamaiti Fanau Tahi, o Iesu Mesia [a hi‘o Mose 4:1–2 ; Aberahama 3:22–28]. Ua î ratou i te varua oaoa e ua « pii noa i te oaoa » i mua i te mana‘o e tomo i roto i te tahuti, e e farii i te mau haafifiraa atoa o te oraraa i te fenua nei, i reira ratou e farii ai i te mau ite na roto i te mauiui, te pe‘ape‘a, te oto, te mau faahemaraa e te mau ati, e tae noa’tu i te mau mea oaoa o te oraraa i roto i te tahuti nei, e i muri iho, mai te mea e, ua haapa‘o, e tomo, na roto i te ti‘a-faahou-raa, i roto i te ora mure ore i roto i te basileia o te Atua, ia riro mai ia’na te huru [a hi‘o 1 Ioane 3:2]. [A hi‘o Ioba 38:4–7.] Te iteraa e te ite e noaa i roto i teie oraraa tahuti nei, e ore roa ïa e noaa na roto i te tahi atu rave‘a, e e mea faufaa te fariiraa i te hoê tino tahuti no to ratou faateiteiraa.5
2
E tuhaa te Hi‘araa o Adamu e o Eva no te faanahoraa a te Metua i te Ao ra.
Ua fariihia te faanahoraa no te faaoraraa e aore râ, te buka ture, tei parauhia e, te evanelia a Iesu Mesia, i te ra‘i ra, hou a haamauhia ai te tumu o te fenua. Ua faataahia i reira e, e haere mai o Adamu to tatou metua tane i ni‘a i teie fenua e e ti‘a i te upoo o te utuafare taata taatoa. E tuhaa atoa no teie faanahoraa ia amu oia i te hotu i rahuihia e ia hi‘a, na roto ho‘i i te reira te mauiui e te pohe e tae mai ai i te ao nei, no te maitai hope o ta’na mau tamarii.6
Ua riro te hi‘araa ei tuhaa faufaa no te tamataraa tahuti o te taata nei… Ahiri aita o Adamu e o Eva i amu, aita ïa te horo‘a rahi o te tahuti e tae mai i ni‘a ia raua. Hau atu i te reira, eita raua e farii i te huaai, e aita atoa ïa e tupu te faaueraa rahi ta te Fatu i horo‘a ia raua.7
Ua hopoi mai te hi‘araa o Adamu e o Eva i « te mauiui, ua hopoi mai i te oto, ua hopoi mai i te pohe ; tera râ… ua hopoi atoa mai te reira i te mau haamaitairaa ».
Na te hi‘araa o Adamu e hopoi mai i te mau haafifiraa atoa o te tahuti nei. Ua hopoi mai te reira i te mauiui, ua hopoi mai i te oto, ua hopoi mai i te pohe ; tera râ eiaha ia mo‘ehia ia tatou e, ua hopoi atoa mai te reira i te mau haamaitairaa… Ua hopoi mai te reira i te haamaitairaa o te ite e o te maramarama e o te oraraa tahuti.8
3
Ua pûpû Iesu Mesia Ia’na iho ei tusia no te faaora ia tatou i te Hi‘araa e i ta tatou mau hara.
Ua hopoi mai te ofatiraa ture a Adamu i teie na pohe e piti, pae varua e pae tino—ua tapu-ê-hia te taata i te aro o te Atua, e ua riro mai ei taata tahuti e ua farii i te mau ma‘i atoa o te tino nei. No te faaho‘i faahou mai ia’na, titauhia te hoê faatitiaifaroraa o te ture i ofatihia. Na te parau-ti‘a i titau i te reira.9
E mea tano roa‘e e te ti‘a ho‘i e, te taata tei rave i te hapa e aufau atoa ïa i te utu‘a—e tara ê i ta’na mau ohipa hape. No reira, a riro ai o Adamu ei taata ofati i te ture, ua titau te parau-ti‘a ia’na, eiaha te tahi atu taata, ia pahono no te hara e ia aufau i te utu‘a i to’na ora. Tera râ, a ofati ai Adamu i te ture, ua topa ïa oia iho i roto i te faahaparaa, e no te mea tei raro a‘e oia i te faahaparaa, eita ïa ta’na e nehenehe e tara ê, e aore râ, e tatara i te ohipa ta’na i rave. Eita atoa e nehenehe i ta’na mau tamarii, no te mea tei raro a‘e atoa ratou i te faahaparaa, e ua titauhia hoê taata aita i topa i raro a‘e i te faahaparaa no te tara ê no taua hara matamua ra. Hau atu i te reira, no te mea ho‘i e, tei raro a‘e tatou paatoa i te faahaparaa, aita atoa to tatou e mana no te tara ê i ta tatou iho mau hara. Ua titauhia a‘era i te Metua ia tono mai i ta’na Tamaiti Fanau Tahi, tei ti‘amâ i te hara, no te tara ê i ta tatou mau hara e i te ofatiraa ture a Adamu, mai ta te parau-ti‘a i titau ia ravehia. E no reira, ua pûpû ihora oia iho i te hoê tusia no te mau hara, e na roto i to’na pohe i ni‘a i te satauro, ua rave oia i ni‘a ia’na iho i te ofatiraa ture a Adamu e i ta tatou mau hara tata‘itahi, e na roto i te reira, ua faaora ia tatou i te hi‘araa, e i ta tatou mau hara, maoti te tatarahapa.10
E ohipa na tatou ia haapii atu i te misioni a Iesu Mesia. No te aha oia i haere mai ai ? Eaha ta’na i rave no tatou ? Nahea tatou e fana‘o ai ? Eaha ta’na i aufau no te raveraa i te reira ? No te aha i titauhia ai te hoo o to’na ora, oia ïa, hau atu i to’na ora ! Eaha ta’na i rave taa ê atu i to’na patitiraahia i ni‘a i te satauro ? No te aha oia i patitihia i reira ? Ua patitihia oia i reira ia ti‘a i to’na toto ia manii, no te faaora ia tatou i teie utu‘a ri‘ari‘a, o te ore roa e tae mai, oia te tapu-ê-raa-hia tatou i te aro o te Atua. Ua pohe oia i ni‘a i te satauro no te faaho‘i faahou ia tatou, ia tahoê-faahou-hia to tatou tino e to tatou varua. Ua horo‘a mai oia ia tatou i taua haamaitairaa ra. Ahiri e ti‘aturi noa tatou ia’na, e e haapa‘o ho‘i i ta’na mau faaueraa, ua pohe oia no tatou, ia ti‘a ia tatou ia farii i te faaoreraa o ta tatou mau hara, e ia ore ia piihia mai ia aufau i te utu‘a. Ua aufau oia i te hoo…
Aore e taata e nehenehe e rave i te ohipa o ta’na i rave no tatou. Aita i titauhia ia’na ia pohe, e nehenehe ta’na e pato‘i. Ua rave Oia ma to’na hinaaro mau. Ua rave Oia no te mea, e faaueraa te reira na to’na Metua. Ua ite oia eaha te mamae e tupu mai ; noa’tu râ, no to’na here ia tatou, ua hinaaro oia ia rave i te reira…
Te putaraa te mau naero i roto i to’na na rima e i roto i na avae o te Faaora, te tuhaa iti roa a‘e ïa te reira o to’na mamae. Te feruri nei au e, ua mâtau noa tatou i te feruri, e aore râ, i te mana‘o e, to’na mamae rahi, o to’na ïa patitiraahia i ni‘a i te satauro e te vaiihoraahia ia tarere noa i reira. Ia ite tatou, e pu‘e tau te reira i roto i te aamu o te ao nei a mamae ai te rahiraa tauatini taata mai te reira te huru. No reira, to’na mamae, e parau noa tatou no te reira, aita ïa i taa ê atu i to te tahi atu mau taata tei faasatauro-atoa-hia mai te reira te huru. No reira, eaha ïa to’na mamae rahi ? Te hinaaro nei au ia tatou ia tamau i teie parau i roto i te feruriraa o te melo tata‘itahi o teie Ekalesia : Ua tupu to’na mamae rahi hou a haere ai oia i ni‘a i te satauro. Tei roto i te ô i Getesemane, ta te mau papa‘iraa mo‘a ïa e parau mai nei ia tatou, i tahe mai ai te toto na roto i te mau poa atoa o to’na tino ; e i roto i te mauiui rahi o to’na varua, ua ti‘aoro atura oia i to’na Metua. E ere te puta o te mau naero i roto i to’na rima e te avae. I teie nei, eiaha outou e ani mai ia’u e mea nahea te reira i te tupuraa no te mea aita vau i ite. Aore taata i ite. Ta tatou noa i ite maori râ, na roto i te tahi raveraa, ua rave oia i ni‘a ia’na i taua utu‘a rahi ra. Ua rave oia i ni‘a ia’na i ta tatou mau ofatiraa ture, e ua aufau i te hoo, e hoo no te ahoaho.
A feruri na i te Faaora i te amoraa i te taatoaraa o te teimaha a te taata tata‘itahi—te ahoaho—mai ta’u i parau ra, aita vau e maramarama ra ; ta’u noa, o te fariiraa ïa—e na te reira i faatupu i te mauiui rahi pohe i roto ia’na, te puta o te naero i roto i to’na rima e te avae, e mea ha‘iha‘i roa ïa. Ua ti‘aoro oia i roto i To’na mauiui rahi, i to’na Metua, « Ia ti‘a ia oe ra, e hopoi ê atu i teie nei au‘a ! » e aita i ti‘ahia [a hi‘o Mataio 26:42 ; Mareko 14:36 ; Luka 22:42]. E tai‘o atu vau ia outou i te tahi noa parau e aore râ, e piti i ô nei no ni‘a i te parau ta te Fatu i parau no ni‘a i te reira :
« No te mea inaha, ua faaoroma‘i au, o te Atua, i teie nei mau mea no te taato‘a, ia ore ratou ia roohia i te mamae mai te mea e e tatarahapa ratou ;
« Tera râ mai te mea e aita ratou e tatarahapa ia roohia ratou i te mamae rahi e tia‘i ia au i ta’u i faaoroma‘i ;
« Na te reira mamae rahi i faatupu i roto ia’u, oia o te Atua, o tei hau a‘e i te mau mea atoa ra, i te rurutaina no te mauiui, e ua tahe mai ra te toto na te mau poa’toa, e ua mauiui i te tino e te varua atoa hoi—e ua hinaaro ho‘i ia ore au ia inu i te au‘a maramara e oriorio atu—
« Area râ, ei hanahana to te Metua, e ua inu vau e ua faaoti ho‘i i ta’u mau faaineineraa i te tamarii a te taata nei » (PH&PF 19:16–19).
Ia tai‘o ana‘e au i te reira, e tupu te haehaa i roto ia’u. No te rahi o to’na here i te taata nei, i to te ao nei, ua farii oia ia amo i te hoê teimaha o te ore roa e ti‘a i te hoê taata tahuti ia amo, e ia aufau i te hoê hoo e ore roa e ti‘a i te tahi atu taata ia aufau, ia ora tatou.11
« To tatou Faaora o Iesu Mesia te taata tumu i roto i teie faanahoraa rahi no te haereraa i mua e no te faaoraraa ».
[Ua parau] te Tamaiti a te Atua : « E haere au i raro e aufau i te hoo. E riro vau ei Faaora e e faaora vau i te taata i te ofatiraa ture a Adamu. E rave au i ni‘a ia’u te mau hara a to te ao nei, e e faaora vau i te mau varua atoa i ta ratou iho mau hara o te tatarahapa ».12
E faahoho‘a na tatou : Te haere ra te hoê taata na ni‘a i te purumu, topa’tura oia i roto i te hoê apoo hohonu e te poiri, eita ta’na e nehenehe e ta’uma mai i rapae e ia ti‘amâ faahou. Nahea e ti‘a ai ia’na ia faaora ia’na iho i teie fifi ? Eiaha na roto i ta’na iho mau tautooraa, i te mea e, aore roa e rave‘a e ora ai oia i roto i teie apoo. Ua ti‘aoro oia i te tauturu, e ua faaroo te tahi mau varua maitai ia’na i te tuôraa no te ani i te tauturu, ua horo maira no te tauturu ia’na, ua tuu maira i te e‘a, ua horo‘a ia’na i te rave‘a ia ti‘a ia’na ia ta’uma mai i rapae. Tera mau ïa te ohipa ta Adamu i faatupu no’na iho e no to’na huaai, a amu ai oia i te hotu i rahuihia ra. I te mea ho‘i e, tei roto te mau taata atoa i te apoo, aore roa hoê taata e tae i rapae e ia tauturu i te tahi. Te apoo, o te ti‘avaruraa ïa mai te aro mai o te Fatu, e te pohe tino, te mouraa ïa o te tino. E no te mea e pohe te mau taata atoa, aore roa hoê taata e nehenehe e horo‘a mai i te rave‘a e ora ai.13
Ua haere maira te Faaora, aore oia i raro i taua apoo ra, e ua tuu maira i te e‘a. Ua pou mai oia i roto i te apoo e ua faati‘a ia tatou ia faaohipa i te e‘a e ora ai tatou.14
I roto i to’na aroha hope ore, ua faaroo te Metua i te mau ti‘aororaa a ta’na mau tamarii e ua tono mai i ta’na Tamaiti Fanau Tahi, aore ho‘i oia i raro a‘e i te mana o te pohe, aore atoa no te hara, no te horo‘a mai ra i te rave‘a e ora ai. Ua rave oia i te reira na roto i to’na taraehara hopea ore e te evanelia mure ore.15
E ti‘a i to tatou aau mehara ia î roa i te here e i te haapa‘o no te aroha rahi e te mărû o te [Faaora]. Eiaha roa tatou e haafaufaa ore ia’na no te ohipa ta’na i rave. Ua hoo oia ia tatou i te hoê hoo, te hoo o to’na mamae rahi e te maniiraa to’na toto ei tusia i ni‘a i te satauro.16
4
E rohi tatou i te tahuti nei no to tatou faaoraraa ma te patu i ni‘a i te niu o te Taraehara a Iesu Mesia.
To tatou Faaora o Iesu Mesia te taata tumu i roto i teie faanahoraa rahi no te haereraa i mua e no te faaoraraa.17
Ma te paturaa i ni‘a i te niu o te taraehara, teie te mau mea i roto i te faanahoraa no te faaoraraa :
A tahi, ei faaroo to tatou i te Fatu ra ia Iesu Mesia ; ia farii tatou ia’na ei Tamaiti na te Atua ; ia tuu tatou i to tatou ti‘aturiraa i roto ia’na, ma te ti‘aturi i ta’na parau e ma te hinaaro ia noaa te mau haamaitairaa o te tae mai na roto i te haapa‘oraa i ta’na mau ture.
A piti, ia tatarahapa tatou i ta tatou mau hara ; ia faaru‘e tatou i mau mea o te ao ; ia faaoti tatou i roto i to tatou aau, ma te otia ore e, e ora tatou ma te faaroo e te parau-ti‘a.
A toru, ia bapetizohia tatou i roto i te pape, i raro a‘e i te rima o te hoê ti‘a mana, tei mau i te mana no te taamu i ni‘a i te fenua nei e no te taati i ni‘a i te ra‘i ; ia ti‘a ia tatou, na roto i teie oro‘a mo‘a, ia tomo i roto i te hoê fafauraa ia tavini i te Fatu e ia haapa‘o i ta’na mau faaueraa.
A maha, ia farii tatou i te horo‘araa i te Varua Maitai ; ia fanau-faahou-hia tatou ; ia tutu‘ihia ta tatou hara e te ino i te auahi i rapae i to tatou varua ; ia riro tatou ei taata apî na roto i te mana o te Varua Maitai.
A pae, ia faaoroma‘i noa tatou e tae noa’tu i te hopea ; ia haapa‘o tatou i te mau faaueraa i muri a‘e i te bapetizoraa ; ia rohi tatou no to tatou faaoraraa ma te măta‘u e te rurutaina i mua i te Fatu ; ia ora tatou i te oraraa e roaa ai ia tatou te mau huru o te Atua, e ia riro ei mau taata o te fana‘o i te hanahana e i te mau mea faahiahia o te basileia tiretiera.18
I teie nei, te faaite papû nei au e, teie mau ture tei titauhia i te taata ia haapa‘o no te farii i te faaoraraa, e tei riro ei evanelia na Iesu Mesia, ua heheuhia mai ïa i teie anotau i te mau peropheta e i te mau aposetolo, e o te faaohipahia nei i teie nei e ta’na Ekalesia, ta’na i faati‘a faahou i ni‘a i te fenua nei.19
Tatou paatoa i roto i teie ao tahuti nei, tei roto tatou i te tamataraa. Ua tonohia mai tatou i ô nei, na mua roa, no te farii i te sekene [tino] no to tatou mau varua mure ore ; a piti, ia tamatahia tatou, ia farii i te mau ati e i te poupou e te oaoa rahi atoa o te roaa na roto i te hoê fafauraa mo‘a ia haapa‘o i te mau parau tumu mure ore o te evanelia. Te tahuti, mai ta Lehi i faaite i ta’na mau tamarii, o te « tamataraa » ïa. 2 Nephi 2:21 I ô nei tatou e tamatahia ai e e hi‘opo‘ahia ai ia itehia e, mai te mea e hinaaro tatou e, ia tuu-ê-hia tatou i rapae i te aro o to tatou Metua Mure ore, ma te haapii-tamau-noa-hia râ i te parau no te ora mure ore, te here e te haamori ia’na, e ia vai haapa‘o noa i ta’na Tamaiti Here o Iesu Mesia,20
Ua haere mai tatou i ô nei ia tamatahia tatou, na roto i te tuuraa ia tatou i mua i te ino e i te maitai… Ua faati‘a te Metua ia Satane e i to’na nahoa ia faahema ia tatou, tera râ, na roto i te arata‘iraa a te Varua o te Fatu e te mau faaueraa i horo‘ahia mai na roto i te heheuraa, ua faaineinehia tatou no te rave i ta tatou ma‘itiraa. Mai te mea e, e rave tatou i te ino, ua fafauhia ia tatou e, e faautu‘ahia tatou ; mai te mea e, e rave tatou i te maitai, e farii tatou i te utu‘a mure ore no te parau-ti‘a.21
Teie tamataraa tahuti, e pu‘e tau poto ïa, te tahi rii noa taime iti no te tu‘ati i te tau mure ore i ma‘iri, i te tau mure ore a muri a‘e. E taime faufaa rahi râ… O teie oraraa te pu‘e tau faufaa rahi roa a‘e i roto i to tatou oraraa mure ore.22
5
E farii te mau taata atoa i te haamaitairaa o te ti‘a-faahou-raa na roto i te Taraehara a Iesu Mesia.
Ua tae mai tatou i teie nei ao no te pohe atu ai. Ua maramarama-maitai-hia te reira hou a haere mai ai tatou i ô nei. E tuhaa te reira no te faanahoraa, tei tau‘aparauhia e tei faanaho-atea-hia hou a tuuhia mai ai te taata i ni‘a i te fenua nei… Ua ineine tatou e ua hinaaro ho‘i ia rave i taua tere ra, mai mua mai i te aro o te Atua i roto i te ao varua ra, haere ti‘a mai i te ao tahuti nei no te mamae i te mau mea atoa o teie nei oraraa, to’na mau oaoaraa e to’na mau otoraa, e pohe atu ai ; e mea titauhia te pohe mai te fanauraa atoa.23
Te pohe tino, e aore râ, te pohe o te taata tahuti, e ere ïa i te hoê taa-ê-raa tamau o te varua e te sekene i‘o, noa’tu e, e ho‘i faahou te tino i te natura ra, e taa-ê-raa tau poto noa râ o te hope i te mahana o te ti‘a-faahou-raa, i te taime a piihia ai te tino ia haere mai i rapae i te repo e ia ora faahou i te varua. E tae mai teie haamaitairaa i te mau taata atoa na roto i te taraehara a te Mesia, a taa noa’tu to ratou huru maitai anei e aore râ, huru ino anei, a ora ai ratou i te tahuti nei. Te na ô ra Paulo e, e ti‘a-faahou-raa to tei pohe, te feia parau-ti‘a e te feia parau-ti‘a ore (Te Ohipa 24:15), e ua parau te Faaora e, o ratou atoa tei roto i to ratou menema, e faaroo ratou i to’na reo e e haere mai ratou i rapae « te feia i mau na i te parau maitai ra, e ti‘a mai ïa e rave i te ora ; e te feia ho‘i i mau na i te parau ino ra, e ti‘a mai ïa e rave i te pohe » (Ioane 5:29).24
E faaho‘ihia te mau tuhaa atoa o te tino i to ratou ra vahi mau i roto i te ti‘a-faahou-raa, a taa noa’tu te ohipa i tupu i ni‘a i te tino i te poheraa. Mai te mea e, ua paapaa i te auahi, ua amuhia e te ma‘o, noa’tu te huru. E faaho‘ihia te mau tuhaa atoa o te tino i to ratou ra vahi mau.25
E ore te mau varua e maitai roa ia ore te tino i‘o e te ivi. E hopoihia teie tino e to’na varua i roto i te tahuti ore e i roto i te mau haamaitairaa o te faaoraraa, na roto i te ti‘a-faahou-raa. I muri a‘e i te ti‘a-faahou-raa aita e taa-ê-raa faahou, e taatihia te tino e te varua, e e ore e taa ê faahou ia ti‘a i te taata ia farii i te îraa o te oaoa. Aita e rave‘a ê atu, maoti râ te fanauraa i roto i teie oraraa e te ti‘a-faahou-raa, e ti‘a ai i te mau varua ia riro mai to tatou Metua mure ore te huru.26
6
E farii te feia haapa‘o maitai i te ora mure ore i piha‘iho i to ratou mau utuafare i mua i te aro o te Metua i te Ao ra.
E farii te tahi mau taata i te tao‘a rahi na roto i te ohipa a to ratou mau metua. E roaa i te tahi mau taata, na roto i te faturaa ai‘a, te mau terono o teie ao, te mana, e te ti‘araa, i rotopu i to ratou mau taata. E imi te tahi ia fatu i te ite o te ao nei e i te roo teitei na roto i te faaohiparaa i to ratou iho itoito e te tamau maite ; tera râ, te vai ra hoê faturaa faufaa a‘e i te mau faturaa atoa, te faturaa ïa i te faateiteiraa mure ore.
Te parau ra te mau papa‘iraa mo‘a e, te ora mure ore—oia te ora i fatuhia e to tatou Metua Mure Ore e ta’na Tamaiti o Iesu Mesia—o te horo‘a rahi a‘e ïa a te Atua [a hi‘o PH&PF 14:7]. O ratou ana‘e tei mâ i te mau hara atoa o te farii i te reira. Ua fafauhia te reira i te feia « o tei upootia ho‘i na roto i te faaroo, e ua taatihia’tu ho‘i e te Varua Mo‘a no te fafauraa, o ta te Metua i ninii mai i ni‘a ia ratou atoa o tei parau-ti‘a e tei haapa‘o maitai ho‘i. O ratou ïa o te ekalesia a te Matahiapo ra. O ratou ïa o ta te Metua i horo‘a’tu i te mau mea atoa ra ». [PH&PF 76:53–55 ; a hi‘o atoa irava 52.]27
Ua faatumuhia teie faanahoraa no te faaoraraa i ni‘a i te utuafare… Ua faataahia [te reira] no te faati‘a ia tatou ia faatupu i te taatiraa utuafare mure ore no tatou iho.28
O ratou o te farii i te faateiteiraa i roto i te basileia tiretiera e farii ïa ratou i te « faatupu-noa-raa o te huaai e a muri e a muri noa’tu ». E ora ratou i roto i te taamuraa utuafare.29
Ua haapiihia tatou i roto i te evanelia a Iesu Mesia e, ia au i te faateiteiraa tiretiera, e riro te faanahoraa utuafare, tei ti‘a maitai, ei faanahoraa tei nati i te metua tane e te metua vahine e te mau tamarii o te hoê u‘i i ni‘a i te metua tane e te metua vahine e te mau tamarii o te u‘i no muri iho, e na reira noa te aano e te parare e tae roa’tu i te hopea o te tau.30
Eita teie mau haamaitairaa hanahana o te faturaa mure ore… e tae mai maori râ na roto i te hinaaro mau ia haapa‘o i te mau faaueraa e tae noa’tu i te mamaeraa o te Mesia ra, mai te mea e titauhia. Oia ho‘i, no te mau taata e titau i te ora mure ore—te horo‘a rahi a‘e a te Atua—ua titauhia ïa ia ratou ia tuu i te mau mea atoa na ratou i ni‘a i te fata, mai te mea e titauhia, e ahiri noa’tu, e titauhia ia ratou ia horo‘a i to ratou ora no’na, eita roa’tu ta ratou e nehenehe e aufau ia’na no te mau haamaitairaa rahi i fariihia e i fafauhia ia au i to ratou haapa‘o i ta’na mau ture e ta’na mau faaueraa.31
A haere mai ai tatou i rapae au i te ao nei, e a farii ai tatou i te evanelia i roto i to’na îraa, ua riro tatou ei taata titau i te hanahana tiretiera ; e ere râ, ua hau atu tatou i te taata titau, mai te mea e, e feia haapa‘o maitai tatou, no te mea, ua horo‘a mai te Fatu ia tatou i te ite-papû-raa e, na roto i to tatou haapa‘o maitai, e tomo tatou i roto i te basileia tiretiera…
E mata na tatou i te ora i te huru oraraa e ite papû ai tatou i to tatou parahiraa, ei reira tatou e ite ai, na roto i te huru oraraa ta tatou e ora e, e tomo tatou i mua i To’na aro e e parahi i piha‘iho Ia’na, ma te farii i te îraa o te mau haamaitairaa tei fafauhia na. O vai i rotopu i te Feia Mo‘a i te Mau Mahana Hopea Nei, o te farii i te hoê mea i iti mai i te îraa o te faaoraraa tei fafauhia ia tatou ?… E mea titauhia no tatou, i roto i to tatou haehaa, e i roto i te varua tatarahapa, ia haere tamau noa i mua ; ma te haapa‘o i te mau faaueraa e tae noa’tu i te hopea, i te mea e, ta tatou tia‘iraa e ta tatou opuaraa, o te ora mure ore ïa, oia ho‘i, te ora i mua i te aro o te Metua e o te Tamaiti ; « Teie ho‘i te ora mure ore », na reira maira te Fatu, « ia ite ho‘i ratou ia oe i te Atua mau ra, e ia Iesu i te Mesia i ta oe i tono mai ». [Ioane 17:3.]32
I teie nei, tei roto vau i te mea o ta’u e nehenehe e parau e, te taperaa o te oraraa, ma te ite e, tau mahana rii toe noa e piihia mai au no te hohora i ta’u parau faaite no ta’u tiaauraa tahuti nei…
Ua papû ia’u e, ua here tatou paatoa i te Fatu. Ua ite au e, te ora nei oia, e te tia‘i nei au i taua mahana ra e ite ai au i to’na hoho‘a mata, e mea maitai e, e faaroo vau i to’na reo ia parau mai ia’u e : « A haere mai outou, e te feia i faaorahia e tau Metua, e parahi i te basileia i haapa‘ohia no outou mai te hamaniraa mai o te fenua nei ra ». Mataio 25:34
E te pure nei au ia riro teie ei ohipa oaoa no tatou paatoa, i to tatou tau mau ra.33
Te mau mana‘o tauturu no te tuatapaparaa e te haapiiraa
Uiraa
-
Ia tai‘o outou i te papa‘iraa o te buka aamu i roto i te « No roto mai i te oraraa o Joseph Fielding Smith », a haamana‘o na i te hoê taime ua itehia ia outou te mahanahana i roto i to outou iteraa papû no ni‘a i te faanahoraa no te faaoraraa. Nahea e ti‘a ai ia outou ia tauturu i te hoê melo o te utuafare e aore râ, i te hoê hoa ia farii i te reira huru mahanahana ?
-
Nahea te mau haapiiraa a te peresideni Smith no ni‘a i te apooraa i te ra‘i ra, e nehenehe ai e tauturu ia tatou ia farerei ana‘e tatou i te mau tamataraa ? (A hi‘o i te tuhaa 1.)
-
Ua haapii mai te peresideni Smith e « eiaha râ ia mo‘ehia ia tatou e, ua hopoi mai [te hi‘araa o Adamu e o Eva] i te mau haamaitairaa » (tuhaa 2). I to outou mana‘o, no te aha e mea faufaa ia haamana‘o i teie parau mau ? Eaha te tahi mau haamaitairaa ta outou i farii na roto mai i te Hi‘araa ?
-
I roto i te tuhaa 3, nahea te faahi‘oraa a te peresideni Smith, no te hoê taata tei topa i roto i te apoo, e faaau nei i to tatou oraraa ? A feruri na e mea nahea to te Faaora faaoraraa ia outou na roto i Ta’na Taraehara.
-
Eaha ta te mau parau a te peresideni Smith i roto i te tuhaa 4 e faahiti nei no ni‘a i te tumu o to tatou oraraa i ni‘a i te fenua nei ? Eaha ta te Fatu i horo‘a mai ia tatou no te tauturu ia tatou ia ratere ma te hau i roto i teie pu‘e tau tamataraa ?
-
Nahea e ti‘a ai ia outou ia tauturu i te hoê taata ia maramarama i te faahitiraa parau a te peresideni Smith i roto i te tuhaa 5 tei na ô e, « e mea titauhia te pohe mai te fanauraa atoa » ? E mea nahea to te haapiiraa tumu o te ti‘a-faahou-raa i te faaûruraa i to outou oraraa ?
-
Eaha te mau vahi i taa ê ai te tao‘a rahi o te ao nei i te « faturaa mure ore » o te ti‘a ia tatou ia farii na roto i te faanahoraa no te faaoraraa ? (a hi‘o i te tuhaa 6.) Nahea te haro‘aro‘araa i teie mau taa-ê-raa e nehenehe ai e tauturu ia tatou ia faaineine no te ora mure ore ?
Te mau papa‘iraa mo‘a
Ioba 38:4–7 ; 2 Nephi 2:15–29 ; 9:5–27 ; Alama 12:20–35 ; PH&PF 19:16–19 ; Mose 5:10–12
Tauturu haapiiraa
« No te tauturu ia tatou ia haapii i te mau papa‘iraa mo‘a e i te mau parau a te mau peropheta o teie tau hopea nei, ua nene‘i te Ekalesia i te mau buka haapiiraa e i te tahi atu mau buka. Aita e titau-roa-hia te tahi atu mau tuatapaparaa mana‘o, e aore râ, i te tahi atu mau buka faahororaa » (Haapiiraa, Aita e Piiraa Teitei A‘e : Hoê Rave‘a Tauturu no te Haapiiraa Evanelia [1999], 52).