Pene 26
Faaineine no te taeraa mai o to tatou Fatu
« A faaineine na outou i te e‘a no te Fatu, e a faaafaro na i to’na mau e‘a, no te mea ua fatata mai nei te hora no to’na taeraa mai » (PH&PF 133:17).
No roto mai i te oraraa o Joseph Fielding Smith
I te hoê taime ua parau te peresideni Joseph Fielding Smith i te hoê pŭpŭ Feia Mo‘a i te Mau Mahana Hopea Nei e, « te pure ra [oia] no te hopea o te ao nei ». Ua parau oia e, « mai te mea e, e tae mai ananahi e oaoa oia ». Ei pahonoraa i taua parau ra, ua parau maira te hoê vahine, ma te puai ia faaroo te tahi atu mau taata. « A, mea maitai e, eita », ta’na ïa parau.
Ua faaite oia i te reira ohipa i muri a‘e ra, e ua haapii mai te peresideni Smith e :
« Aita outou e hinaaro ia tae mai te hopea o te ao nei ?
« Te rahiraa o te taata e mana‘o hape to ratou no ni‘a i te auraa o te parau ra i te hopea o te ao nei…
« … Ia tae mai te Mesia e hope atoa ïa te ao nei… Aita e tama‘i faahou, aita e aehuehu, aita e nounou, aita e haavare ; aita e ino. E haapii te taata i te here i te Fatu e ia haapa‘o i Ta’na mau faaueraa, ia ore ana‘e, eita ratou e parahi i ô nei. Tera te hopea o te ao nei, e tera ïa ta te Faaora i pure a haere mai ai Ta’na mau pĭpĭ ia’na ra e a na ô mai ai, ‘a haapii mai ia matou i te pure’. Eaha Ta’na i rave ? Ua haapii atura Oia ia ratou, ‘E to matou Metua i te Ao ra, ia raa to Oe i‘oa, ia tae to Oe ra basileia, ia haapa‘ohia to oe hinaaro i te fenua nei mai tei te ra‘i atoa na’. [A hi‘o Luka 11:1–2.]
« Ta‘u ïa e pure atoa nei. Ua pure te Fatu no te hopea o te ao nei, ta’u atoa ïa e pure nei ».1
I roto i te mau a‘oraa e te mau papa‘iraa, pinepine te peresideni Smith i te faahiti i te mau parau tohu no te papa‘iraa mo‘a no ni‘a i te mau mahana hopea nei, te ohipa a Iosepha Semita no te faaineine i te e‘a o te Fatu, e te taeraa mai o te Faaora i ni‘a i te fenua nei ma te hanahana. Ua faaite oia i to’na mau mana‘o hohonu no ni‘a i teie mau parau tohu i roto i te pure haamaitairaa o te hiero no Ogden Utah :
« Mai ta oe i ite, e to matou Atua e, te ora nei matou i te mau mahana hopea nei i reira te mau tapa‘o o te mau tau e faaitehia ai ; i reira oe e rû ai i ta oe ohipa i to’na ra tau ; e i reira matou i faaroo a‘ena i te reo o te hoê i te tiaororaa i roto i te medebara : E haamaitai outou i te e‘a o te Fatu, e faatitiaifaro i to’na haerea [a hi‘o Mataio 3:3]…
« E to matou Metua e, te tia‘i nei matou i te mahana e tae mai ai te Arii o te Hau, ia faaea ho‘i i te fenua nei e ia ite-faahou-hia te parau-ti‘a i ni‘a iho ra ; e te pure nei matou, ma te aau haehaa e te oto, ia ti‘a ia matou ia haamahu i taua mahana ra e ia ite-parau-ti‘a-hia no te ora i piha‘iho ia’na ta oe i faataa ia riro ei Arii no te mau arii e ei Fatu no te mau fatu, no’na ho‘i te hanahana e te tura e te mana e te puai mai teie nei e a muri noa’tu ».2
« Te tia‘i nei matou i te mahana e tae mai ai te Arii o te Hau ».
Te mau haapiiraa a Joseph Fielding Smith
1
Te fatata mai nei te taeraa mai o te Fatu.
Te fatata oi‘oi nei tatou i te mahana rahi o te Fatu, taua anotau « haumarû » ra, i reira oia e haere mai ai i roto i te mau ata o te ra‘i ra no te tahoo i te feia paieti ore e no te faaineine i te fenua nei no te tau o te hau no te feia atoa ua hinaaro i te haapa‘o i ta’na ture [a hi‘o Te Ohipa 3:19–20].3
E rave rahi mau mea tei tupu… no te faaite i te mau melo haapa‘o maitai o te Ekalesia e, te fatata mai nei te taeraa mai o te Fatu. Ua faaho‘i-faahou-hia mai te evanelia. Ua faanahonaho-hope-roa-hia te Ekalesia. Ua horo‘ahia mai te autahu‘araa i te taata nei. Ua heheuhia mai te mau tau tuuraa rau mai te haamataraa, e ua horo‘ahia mai to ratou mau taviri e te mau mana i te Ekalesia nei. Ua haaputuputuhia e te haaputuputuhia nei o Iseraela i te fenua no Ziona ra. Te ho‘i nei te mau Ati Iuda i Ierusalema. Te porohia nei te evanelia i te ao atoa nei ei faaiteraa i te mau nunaa atoa. Te patuhia nei te mau hiero, e te ravehia nei te mau oro‘a no tei pohe e no tei ora atoa nei, i reira. Ua fariu te aau o te mau tamarii i to ratou mau metua, e te imi nei te mau tamarii i to ratou mau taata i pohe. Te mau fafauraa ta te Fatu i fafau ia rave e o Iseraela i te mau mahana hopea nei, ua heheuhia mai ïa, e e rave rahi tauatini o Iseraela i haaputuputuhia tei tomo i roto i te reira mau fafauraa. No reira te haere nei te ohipa a te Fatu i mua, e e tapa‘o teie mau mea atoa no te fatataraa mai o to tatou Fatu…
Te tupu oi‘oi nei te mau parau a te mau peropheta, tera râ, te tupu nei te reira ia au i te mau ture au maite, e aita te rahiraa o tatou e ite nei i te reira.
Ua fafau o Ioela e, e ninii mai te Fatu i to’na varua i ni‘a i te tino i‘o nei : e tohu ho‘i te mau tamaiti e te mau tamahine, e taotootohia te ruhiruhia i te moemoea, e e ite te feia apî i te mau orama [a hi‘o Ioela 2:28–29]…
I roto i te mau tapa‘o o te mau mahana hopea nei, te vai ra te maraaraa o te ite. Ua faauehia ia Daniela « … ia opani i teie nei mau parau, e tapiri atu i te buka [o ta’na parau tohu], e tae noa’tu i te tau hopea ra : [e i taua mahana ra] e rave rahi ho‘i te horo i ni‘a e i raro », te na reira ra oia « e tupu atura te ite i te rahiraa ». (Daniela 12:4.) Aita anei te taata e « horo nei i ni‘a e i raro » i teie mahana aita â ho‘i i na reira a‘enei i roto i te aamu o te ao nei ?
Aita anei te ite i tupu i te rahi ? Ua vai anei te hoê tau i roto i te aai o te ao nei, ua niniihia mai te ite rahi i ni‘a i te taata nei ? Tera râ, mea pe‘ape‘a ia parau e, ua ti‘a te mau parau a Paulo—te tamau noa nei te taata « i te haapii, aore roa râ i noaa te ite i te parau mau ». (2 Timoteo 3:7.)
Aita anei tatou i faaroo i te roo tama‘i e rave rahi ? [A hi‘o PH&PF 45:26.] Aita anei i tupu a‘enei te tama‘i, te tama‘i aita â te ao nei i ite a‘enei ? Aita anei e vai nei i teie mahana te arepurepu i rotopu i te mau nunaa, aita anei to ratou mau tavana e pe‘ape‘a nei ? Aita anei te mau basileia i faataahurihia, aita anei i tupu te mau tauiraa rahi i rotopu i te mau nunaa ? Te arepurepu nei te ao taatoa nei. Te faaitehia nei i te mau mahana atoa te aueueraa fenua i tera vahi e i tera vahi [a hi‘o PH&PF 45:33]…
Noa’tu râ i te reira, te haapa‘o noa nei te taata i ta ratou ohipa ma te ore e tau‘a rahi roa i te mau mea atoa ta te Fatu i parau ra, e i te mau tapa‘o e te mau faaiteraa atoa tei horo‘ahia mai. Te faaetaeta nei te taata i to ratou aau ma te parau e « te haamaoro nei te Mesia i to’na taeraa mai e tae noa’tu i te hopea roa o te ao nei ». (PH&PF 45:26.)4
Aita i maoro a‘enei ua uihia mai ia’u e, e nehenehe anei ta’u e faaite e, ahea te Fatu e tae mai ai. Ua pahono atu vau e, « E », e te pahono nei au e, « E » i teie nei. Ua ite au ahea oia e tae mai ai. E tae mai oia ananahi. Tera ta’na parau. E tai‘o atu vau i te reira :
« Inaha, ua parauhia i teie nei o teie mahana e tae noa’tu i te taeraa mai o te Tamaiti a te Taata, e oia mau ïa ei mahana ïa no te tusia, e ei mahana aufauraa i te tufaa ahuru no ta’u mau taata ; no te mea o oia o tei aufau i te tufaa ahuru ra e ore oia e ama i to’na taeraa mai.
I teie nei te vai ra hoê a‘oraa au maitai no ni‘a i te tuhaa ahuru.
« No te mea i muri a‘e i teie nei a mahana e tae mai ai te amaraa te parau atu nei ho‘i mai te au i te parau a te Fatu no te mea oia mau ta’u e parau atu nei, ananahi te feia te‘ote‘o atoa e o ratou atoa o te rave i te ohipa ino e riro ai mai te aihere ra te huru ; e e haapau roa’tu vau ia ratou i te auahi, no te mea o te Fatu Sabaota vau ; e e ore roa vau e faaherehere i te hoê o te faaea i Babulonia ra ». [PH&PF 64:23–24.]
No te reira, te parau nei au, te tae mai nei te Fatu, ananahi. E faaineine ana‘e ïa tatou.5
« Te fatata oi‘oi nei tatou i te mahana rahi o te Fatu, taua anotau ‘haumarû’ ra, i reira oia e haere mai ai i roto i te mau ata o te ra‘i ra ».
2
E tupu te haavâraa ia tae mai te Mesia.
Ua haapii mai te Fatu i te parabole no te sitona e te zizania ei faahoho‘araa i te parau no te mau mahana hopea nei. Ia au i te aamu, ua ueue te taata ueue i te huero maitai i roto i ta’na aua, ia taoto râ oia, haere mai nei te enemi e ua ueue ihora i te zizania i roto i te aua. Ia tupu a‘era te raau rii e ia hotu a‘era, hinaaro ihora te mau tavini e haere e vaere i te zizania, ua faaue atura râ te Fatu ia ratou, eiaha, oi pee atoa te sitona apî ra ia vaere ratou i te zizania, e vaiiho noa râ ia tupu apipiti noa na te sitona e te zizania e tae noa’tu i te tau auhune ra. E ia tae i te hopea o te ootiraa, e haere ratou e haaputuputu i te sitona, e e rave i te zizania e ruuruu no te auahi. I roto i te tatararaa o teie parabole, na ô atura te Fatu i ta’na mau pĭpĭ, « te auhune ra, o te hopea ïa o teie nei ao ; e te feia ooti ra o te mau melahi ïa ». [A hi‘o Mataio 13:24–30, 36–43 ; PH&PF 86.]6
Te tupu apipiti nei te zizania e te sitona, e ua tupu i roto i te hoê â aua i te roaraa o teie mau matahiti, tera râ, te fatata mai nei te mahana i reira te sitona e haapu‘ehia ai, e haaputu-atoa-hia te zizania no te auahi, ei reira e faataa-ê-hia ai te feia paieti i te feia iino, e tei ia tatou te hopoi‘a no te haapa‘oraa i te mau faaueraa a te Fatu, ia tatarahapa i ta tatou mau hara, ia fariu i roto i te mau mea paieti, mai te mea e, ua titauhia te tatarahapa i roto i to tatou aau.7
A haapaari e a haapuai i te mau melo o te Ekalesia i roto i te faaroo i te Atua ; titauhia ho‘i ia tatou ia na reira. Ua rau ho‘i te mau faaûruraa e ohipa nei no te faaamahamaha ia tatou, i rotopu roa i te mau melo o te Ekalesia, e te vai ra te mahana, e ere i te mea atea roa, ei reira e tupu ai te faataa-ê-raa te sitona i te zizania, e e riro tatou ei sitona e aore râ, ei zizania. E ti‘a tatou i te tahi pae e aore râ, i te tahi pae.8
Te vai ra te mahana eita tatou e ite faahou i teie nei ao. E tauihia te reira. E farii tatou i te hoê ao maitai a‘e. E farii tatou i te hoê ao parau-ti‘a, no te mea, ia haere mai te Mesia, e tamâ oia i te fenua nei.
A tai‘o i te mau mea i papa‘ihia i roto i ta tatou mau papa‘iraa mo‘a. A tai‘o i te mau mea ta’na iho i parau na. Ia haere mai oia, e tamâ oia i teie fenua i to’na mau ino atoa ra, e, no ni‘a i te Ekalesia, ua parau oia e, e tono mai oia i ta’na mau melahi e na ratou e haaputuputu i rapae i to’na basileia, oia ho‘i te Ekalesia, i te mau mea ino atoa ra [a hi‘o Mataio 13:41].9
[Te] mahana rahi e te ri‘ari‘a, e ere ïa te tahi atu taime maori râ, o te taeraa mai ïa o Iesu Mesia no te faati‘a i to’na basileia ma te mana i rotopu i te feia paieti i ni‘a i te fenua nei no te tamâ i te fenua i te mau ino atoa. E ere ïa i te mahana măta‘u e o te faatupu i te ri‘ari‘a i roto i te aau o te feia paieti, e riro râ ei mahana măta‘u rahi e te ri‘ari‘a no te feia paieti ore. Ua haapii mai tatou i teie parau mai roto mai i te mau parau a to tatou iho Faaora, a haapii ai oia i ta’na mau pĭpĭ [a hi‘o Mataio 24 ; Iosepha Semita—Mataio 1].10
E tupu te haavâraa ia tae mai te Mesia. Ua faaitehia ia tatou e, e iritihia te mau buka, e haavâhia tei pohe ia au i te mau mea i papa‘ihia i roto i te mau buka, e i rotopu i taua mau buka ra, te vai ra te buka ora [a hi‘o Apokalupo 20:12]. E ite tatou i to te reira mau api. E ite tatou ia tatou iho mai te au i to tatou huru mau, e e ti‘a ia tatou ia ite ia au i te hoê iteraa ti‘a e, te mau haavâraa e tuuhia mai i ni‘a ia tatou e mau haavâraa ti‘a ïa e te parau mau, noa’tu e, te haere ra tatou i roto i te Basileia o te Atua… no te farii i teie mau haamaitairaa hanahana e aore râ, e ti‘avaruhia tatou.11
Te taparu nei au i te Feia Mo‘a i te Mau Mahana Hopea Nei ia ti‘a ma te mau maite e te haapa‘o maitai i te raveraa i te mau hopoi‘a atoa, ma te haapa‘o i te mau faaueraa a te Fatu, ma te faatura i te autahu‘araa, ia ti‘a mai ho‘i tatou ia tae mai te Fatu—te ora ra tatou e aore râ, ua pohe a‘ena, aita ïa to te reira e faufaa—no te rave i teie hanahana.12
3
No te faaineine no te taeraa mai o te Fatu, titauhia ia tatou ia ara e ia pure e ia faanahonaho i to tatou fare.
E rave rahi te mau ohipa e tupu nei i roto i te ao nei i teie mahana o te faaite mai nei e, te fatata mai nei te mahana rahi o te Fatu i reira ho‘i te Faaora e fâ faahou mai ai no te faati‘a i to’na basileia i roto i te parau-ti‘a ei faaineineraa no te faatereraa mileniuma. A tia‘i noa’tu ai i te reira taime, e ohipa na te mau melo o te Ekalesia ia imi i te ite e ia faaineine ia ratou iho, na roto i te tuatapaparaa e te faaroo, no te omuaraa o taua mahana rahi e te hanahana ra.13
Aita e titauhia ia tatou ia haape‘ape‘a no te taime e te pu‘e tau e tae mai ai te Mesia, e titauhia râ ia tatou ia ara e ia pure e ia vai ineine.14
E tapitapi rii to’u mana‘o i te tahi taime no to tatou mau taea‘e peresibutero, ia paraparau ana‘e ratou, e parau ratou e, e ho‘i mai te Fatu i te taime ua nava‘i to tatou paatoa parau-ti‘a no te farii ia’na. Eita te Fatu e tia‘i ia riro tatou ei feia parau-ti‘a. Ia ineine ana‘e oia no te haere mai, e haere mai oia—ia î te au‘a o te ino—e mai te mea e, aita tatou i riro ei feia parau-ti‘a i taua taime ra, e mea fifi roa ïa no tatou i te mea e, e tuuhia tatou i rotopu i te feia paieti ore, e e riro tatou mai te aihere e purumuhia i rapae i te tino o te fenua nei, inaha, te na ô maira te Fatu e, e ore te feia iino ra e ti‘a mai.15
E taotooto anei tatou i roto i te hiro‘a ore e te tau‘a ore i te mau mea atoa ta te Fatu i horo‘a mai no te faaara ia tatou ? Te parau atu nei au ia outou, « E teie nei, e ara, aore ho‘i outou i ite i te hora e tae mai ai to outou Fatu.
« Ua ite râ outou e, ahiri te taata fare i ite i te hora e tae mai ai te eiâ, e riro oia i te ara, e ore e vaiiho noa i to’na fare ia vavahi-noa-hia na.
« Ia parahi ineine noa outou : ei te hora mana‘o-ore-hia e outou na e tae mai ai te Tamaiti a te taata nei ». (Mataio. 24:42–44.)
E mata na tatou i te haapa‘o i teie faaararaa tei horo‘ahia mai e te Fatu, e ia faanahonaho i to tatou fare e ia faaineine no te taeraa mai o te Fatu.16
4
E nehenehe i te Feia Mo‘a i te Mau Mahana Hopea Nei ia riro ei mauhaa i roto i te rima o te Atua no te faaineine i te taata i te taeraa mai o te Fatu.
E ere anei e ohipa maere rahi roa ino mai te mea e, e tae mai te Fatu e e haamata i ta’na faatereraa hau, e tahoo i te feia iino, e e tamâ i te fenua nei i te hara ma te ore e tono mai i te mau ve‘a no te faaineine i te e‘a i mua ia’na ? E tia‘i anei tatou i te Fatu ia haere mai no te haavâ i te ao nei ma te ore na mua roa e horo‘a mai i te faaararaa e ma te ore e faaineine i te mau rave‘a no te faaora i te feia atoa e tatarahapa ?
Ua tonohia mai Noa i to te ao nei no te faaara ia ratou i te tiluvi. Ahiri te taata i faaroo ua ora ïa ratou. Ua tonohia mai Mose no te arata‘i i ia Iseraela i roto i te fenua i parauhia ra, no te faati‘a i te mau fafauraa i horo‘ahia ia Aberahama ra. Ua tonohia mai Ioane Bapetizo no te faaineine i te e‘a no te taeraa mai o te Mesia. I tera e tera hi‘oraa, ua tae mai te piiraa na roto i te matararaa te mau ra‘i. Ua tonohia mai Isaïa, Ieremia e te tahi atu mau peropheta no te faaara ia Iseraela e ia Iuda hou te haapurararaa e te faatîtîraa i tae mai i ni‘a ia ratou. Ahiri ratou i haapa‘o, e aamu ê ïa o te papa‘ihia. Ua horo‘ahia ia ratou te ma‘itiraa ia faaroo ; ua faaarahia ratou e ua horo‘ahia te rave‘a no te horo ê, e ua pato‘i ratou i te reira.
Ua fafau mai te Fatu e, e na reira atoa oia i ni‘a i te taata na mua a‘e i to’na tae-piti-raa mai.17
Ua tonohia mai Iosepha Semita no te faaineine i te e‘a no to’na tae-piti-raa mai, na roto i te pororaa i te îraa o te Evanelia e te horo‘araa i te mau taata atoa te mau rave‘a no te horo ê i te ino e i te ofatiraa ture.18
I te haereraa mai te melahi Moroni e farerei i te tamaiti ra ia Iosepha Semita, ua tohu oia i te tae-piti-raa mai o te Faaora (a hi‘o Iosepha Semita—Aamu 1:36–41).
I Patemo ua ite Ioane i roto i te hoê orama i te mau mahana hopea nei e te « hoê melahi i te maueraa na ropu i te reva nei, ma te evanelia e ti‘a i te vairaa ra ei pororaa’tu i te feia e parahi i te ao nei ra i te mau fenua atoa, e te mau opu atoa, e te mau reo atoa, e te mau nunaa atoa ». [Apokalupo 14:6.]
Ei tupuraa i teie fafauraa, ua parau Iosepha Semita e, o Moroni, te hoê peropheta tahito i ni‘a i teie fenua (Amerika), ua ti‘afaahou i teie nei, tei haapii mai ia’na i te evanelia, ma te horo‘a mai ia’na i te haapiiraa no ni‘a i te faaho‘i-faahou-raa mai o te mau mea atoa na mua a‘e i te taeraa mai o te Mesia. E ua na ô atoa te Fatu : « No te mea inaha, ua tono atura te Fatu o te Atua i te melahi i te ti‘aororaa’tu i ropu i te reva i te na ôraa’tu e : A faaineine na outou i te e‘a no te Fatu, e a faaafaro na i to’na mau e‘a, no te mea ua fatata mai nei te hora no to’na taeraa mai ». [PH&PF 133:17.]
Ma te farii i teie parau ei parau mau, te ti‘aturi nei te Feia Mo‘a i te Mau Mahana Hopea Nei e, ua haamauhia te aparauraa i te ra‘i i teie nei anotau, e i teie nei te tonohia nei « te Evanelia o te Basileia » i rapae au ei ite i mua i teie nei ao hou te Mesia e tae mai ai [a hi‘o Mataio 24:14].19
E maere paha te Feia Mo‘a i te Mau Mahana Hopea Nei ia ti‘aturi e, ua ti‘aorohia ratou ia faatupu i teie papa‘iraa [Mataio 24:14], tera râ, ua parau mai te Fatu ma te papû maitai e, te tono itoito nei ratou i te mau misionare i te mau tuhaa atoa o te fenua nei. A taa noa’tu te reira, ia hope ana‘e te mau fenua atoa i te faaroo i te parau poro‘i mai tei heheuhia mai i teie mau mahana hopea nei, ei reira tatou e tia‘i ai i te taeraa mai o to tatou Fatu e Faaora o Iesu Mesia, no te mea i taua mahana ra e hope ai te mau fenua atoa i te faaarahia e te mau ve‘a tei tonohia’tu ia ratou ra mai te au i te fafauraa a te Fatu ra.20
No te mau taata atoa te evanelia, e e faati‘ahia te Ekalesia i te mau vahi atoa, i roto i te mau fenua atoa, e tae roa’tu i te hopea o te fenua nei, hou te tae-piti-raa mai o te Tamaiti a te Taata nei…
… Ua faatoro oia i to’na rima no te piti o te taime no te haaputuputu ia Iseraela i roto i te Ekalesia, e i teie taime, e faatupu oia i te mau amuiraa o to’na ra feia mo‘a i roto i te mau fenua atoa.21
No roto mai i te pure haamaitairaa i te Hiero no Ogden Utah :
E te Metua e, a haapeepee na i te mahana e upooti‘a ai te parau-ti‘a ra ; e iriti ai te mau tavana o te mau fenua i to ratou mau oti‘a fenua i te pororaa o te evanelia ; e matara aano ai te uputa o te faaoraraa no te feia haavare ore e te parau-ti‘a e te maitai i rotopu i te mau nunaa atoa.
Te pure atu nei matou no te parareraa o te parau mau ; te pure atu nei matou no te ohipa misionare ; te imi nei matou i te puai e i te mau rave‘a rau no te poro atu i ta oe mau parau mau mure ore i te tahi atu mau tamarii na oe i roto i te mau fenua atoa, i roto i te mau opu atoa, e te mau huru reo atoa…
Te hinaaro nei matou ia riro ei mau mauhaa i roto i to oe na rima no te faaineine i te hoê nunaa taata no te taeraa mai o ta oe Tamaiti.22
5
E riro te Mileniuma ei tau no te hau e ei tau no te haa i roto i te ohipa o te Fatu.
E oaoa te paieti i to’na taeraa mai, no te mea i reira te hau e tae mai ai i te fenua nei, te parau-ti‘a i te taata nei, e taua varua atoa ra no te hau e no te oaoa e no te popou tei vai na i ni‘a i teie fenua (Amerika) i te roaraa e piti hanere matahiti [a hi‘o 4 Nephi 1:1–22] e haamau-faahou-hia ïa i rotopu i te taata nei, e i te mau vahi atoa, e e faatere arii te Mesia ei Fatu no te mau Fatu ei Arii no te mau arii no te roaraa hoê tauatini matahiti. Te tia‘i nei tatou i taua taime ra.23
E vai ho‘i taua tau oaoa no te hau ra hoê tauatini matahiti te maoro, e i te tau mau ra e hopoihia mai ai te mau taata atoa o te fenua nei i roto i te Ekalesia.24
E haapii-u‘ana-hia’tu â te evanelia e ma te mana rahi i roto i [te] mileniuma, e hope noa’tu te mau taata atoa o te fenua nei i te farii i te reira.25
E ere te Mileniuma i te hoê tau faafaaearaa, e taime râ no te raveraa te mau taata atoa i te ohipa. Aita e itehia te faatau, e faaohipahia te mau rave‘a maitai a‘e, aita e taime rahi roa e horo‘ahia i roto i te mau ohipa o te mahana hoê, e horo‘ahia râ te taime rahi i roto i te mau mea o te Basileia. E ohipa tamau te feia mo‘a i roto i te mau hiero o te patuhia i roto i te mau tuhaa atoa o te fenua. No te rahi ta ratou ohipa, e tere noa ïa te mau hiero i te rahiraa o te taime.26
E vai noa te tahuti i ni‘a i te fenua nei i roto i tera roaraa hoê tauatini matahiti no te ohipa rahi o te ti‘a ia ravehia, no te faaoraraa i te feia tei pohe. I roto i taua tauatini matahiti no te hau ra, te ohipa rahi a te Fatu tei roto ïa i te mau hiero, e i roto i te reira mau hiero e haere ai te taata e rave i te ohipa no te feia i pohe e o te tia‘i nei ia ravehia no ratou teie mau oro‘a no to ratou faaoraraa, na te mau taata e ora noa nei â i te tahuti nei i ni‘a i te fenua nei.27
E hopoi‘a na tatou ia faaora i tei pohe e e tamau â te reira ohipa i roto i te Mileniuma e hope roa’tu te mau taata atoa i te farii i te oro‘a hiero e i te taatihia, ratou o te ti‘a ia farii i teie haamaitairaa.28
Te feia atoa i pohe i roto i te Mesia, e ti‘a mai ïa mai te pohe mai, i To’na ra taeraa mai, e e parahi ratou i ni‘a i te fenua nei mai te Mesia e parahi i ni‘a i te fenua nei i roto i te mileniuma. Eita ratou e faaea i ô nei i te roaraa atoa o na tauatini matahiti, e amuihia râ ratou i te feia tei roto noa â i te oraraa tahuti. Teie Feia Mo‘a tei ti‘afaahou, e te Faaora Iho, e haere mai ratou no te horo‘a mai i te haapiiraa e te arata‘iraa ; no te heheu mai ia tatou i te mau mea o te ti‘a ia tatou ia ite ; no te horo‘a mai ia tatou i te haamaramaramaraa no ni‘a i te ohipa i roto i te mau hiero o te Fatu, ia ti‘a ho‘i ia tatou ia rave i te ohipa e titauhia no te faaoraraa o te taata paieti.29
Ua parau mai te Fatu na roto i to’na mau tavini e, i roto i te Mileniuma, o ratou o tei pohe e ua tae ratou i te ti‘a-faahou-raa, e heheu tino mai ratou i te feia tei roto noa â i te tahuti, i te mau haamaramaramaraa atoa i titauhia no te faati‘a roa i te ohipa a teie feia tei faaru‘e mai i teie nei oraraa. Ei reira to tei pohe e ti‘a ai ia faaite mai i te mau mea ta ratou e hinaaro, e o te ti‘a ia ratou ia farii. Na roto i te reira, aore roa hoê varua e mo‘ehia, e ei reira e maitai roa ai te ohipa a te Fatu.30
Te pure nei au i te mau mahana atoa o to’u nei oraraa ia haapeepee te Fatu i Ta’na ohipa… Te pure nei au no te hopea o te ao nei no te mea te hinaaro nei au i te hoê ao maitai a‘e. Ua hinaaro vau ia tae mai te Mesia. Ua hinaaro vau i te faatereraa o te hau. Ua hinaaro vau ia tae mai te tau i reira te mau taata atoa e ora ai i roto i te hau e i roto i te varua o te faaroo, te haehaa e te pure.31
Te mau mana‘o tauturu no te tuatapaparaa e te haapiiraa
Uiraa
-
Nahea te aamu i roto i te « No roto mai i te oraraa o Joseph Fielding Smith » i te faaûru i to outou mau mana‘o no ni‘a i te hopea o te ao nei ?
-
Nahea te mau parau tohu i roto i te tuhaa 1 e nehenehe ai e tauturu ia tatou ia faaineine no te taeraa mai o te Fatu ?
-
I roto i te tuhaa 2, a tai‘o faahou i te mau haapiiraa a te peresideni Smith no ni‘a i te parabole no te sitona e te zizania. Eaha ta tatou e nehenehe e rave ia riro tatou ei « sitona » ? Eaha te ti‘a ia tatou ia rave no te tauturu i to tatou utuafare e ia vetahi ê ?
-
A faaineine ai tatou no te taeraa mai o te Fatu, i to outou mana‘oraa eaha te auraa no te parau ra « ia ara e ia pure » ? I to outou mana‘oraa eaha te auraa o te mau parau ra, « faanahonaho i to tatou fare » ? (A hi‘o i te tuhaa 3.)
-
Ua pure te peresideni Smith e, « Te hinaaro nei matou ia riro ei mau mauhaa i roto i to oe na rima no te faaineine i te hoê nunaa taata no te taeraa mai o ta oe Tamaiti » (tuhaa 4). Nahea e ti‘a ai ia tatou ia tauturu ia vetahi ê ia faaineine no te taeraa mai o te Fatu ?
-
A hi‘o faahou i te tuhaa 5. Nahea e ti‘a ai ia tatou ia fana‘o i teie nei i te iteraa i te parau no ni‘a i te mau mea e tupu i roto i te Mileniuma ?
Te mau papa‘iraa mo‘a
Salamo 102:16 ; Isaïa 40:3–5 ; Iakobo 5:7–8 ; PH&PF 1:12 ; 39:20–21 ; 45:39, 56–59
Tauturu haapiiraa
« E ite papûhia te mana hau a‘e, te haaputaraa i te mana‘o, te faafariuraa o te haapiiraa evanelia, ia parau te hoê orometua i faaurûhia e, ‘Ua ite au na roto i te mana o te Varua Maitai, na roto i te mau heheuraa a te Varua Maitai i to‘u nei varua e, e parau mau te mau parau haapiiraa o ta‘u i haapii a‘enei’ » (Bruce R. McConkie, faahitihia i roto i Te Haapiiraa, Aita e Piiraa Teitei A‘e, [1999], 43).