Pene 23
Te hopoi‘a a te taata hoê
« Te hinaaro nei matou i to tatou mau melo i te mau vahi atoa ia haapii mai i te mau parau tumu ti‘a e ia faatere ia ratou iho ».
No roto mai i te oraraa o Joseph Fielding Smith
Te haere ra te Taea‘e D. Arthur Haycock i te Fare Faatereraa Ohipa a te Ekalesia i te hoê mahana, ite atura oia i te peresideni Joseph Fielding Smith e tatara ra i te opani i te hiti. No te mea te hinaaro atoa ra oia e tomo i roto i te fare, i reira ho‘i oia e rave ai i te ohipa ei papa‘i parau no te Pŭpŭ no te Tino Ahuru Ma Piti Aposetolo, « ua ta’uma vitiviti » te taea‘e Haycock « na ni‘a i te e‘a, e piti e aore râ, e toru taahiraa i te taime hoê, no te patia i to’na avae i roto i te opani hou a piri ai te opani. Faatata roa aita e roaahia ia’na. A tae ai oia i roto i te fare, ua haavitiviti faahou â oia i te tapapa i te peresideni Smith no te haere i te afata ta’umaraa uira na muri iho ia’na. Na ô atura oia ia’na, ‘Mea maitai e, e manuïa atoa vau mai teie te huru ia tomo i roto i te ra‘i na roto i te opani ta oe e iriti’ ». Aita te peresideni Smith i parau noa a‘e i te hoê parau, e ua haape‘ape‘a rii te taea‘e Haycock, no to’na hinaaro e parau i te parau arearea, e riro paha ua parau oia i te hoê parau hape. Tera râ, « i to raua taeraa i piha‘iho i te afata ta’umaraa uira ua parau a‘era te peresideni Smith, ma te tiori, ‘I teie nei, e te taea‘e, eiaha roa’tu oe e ti‘aturi i te reira !’ »1
Na roto i te a‘oraa e te ohipa, ua haapii tamau noa te peresideni Smith i te parau tumu ta’na i faaite i te taea‘e Haycock : Ua haapapû maite oia e, noa’tu e, ua titauhia i te Feia Mo‘a i te Mau Mahana Hopea Nei ia tauturu itoito ia vetahi ê ia farii i te mau haamaitairaa o te evanelia, are‘a te faaoraraa ra, e hopoi‘a ïa na te taata tata‘itahi. Ua faaitoito atoa oia i te Feia Mo‘a ia amo i te hopoi‘a no te faarava‘iraa ia ratou iho e ia haa itoito noa i roto i te mau titauraa pae tino. « Tera ïa te tumu o te oraraa », ta’na ïa parau, « ia faahotu i to tatou puai, e ia roaa ihoa râ te haavîraa ia tatou iho ».2
Ua haapii o Joseph Fielding Smith i te rave i te ohipa i to’na apî-roa-raa. Pinepine to’na metua tane i te revareva, no reira « ua pau te rahiraa taime o to’na tamariiraa i te rave i te ohipa a te hoê taata paari ». No to’na ho‘i itoito rahi i te rave i te ohipa, « ua topa roa i ni‘a ia’na te hoê ohipa hou te taime i titauhia, e na roto i to’na faahua tamarii, inaha, ua faate huna noa oia i te û o te hoê o te mau puaatoro a te utuafare no te faaite e, ua nehenehe ta’na e rave i te reira ohipa, e na roto i te reira, ua faatumu-roa-hia na’na te reira ohipa ».3
Ua tamau noa te reira hinaaro rave ohipa to’na i te taime a tavini ai oia ei misionare rave tamau i Peretane. Teie ta ta’na vahine o Louie i papa‘i atu ia’na i taua taime ra : « Ua ite au e, ua hau a‘e to oe au i te ohipa i te arearea, e no reira, ua rahi roa ino to’u here e to’u ti‘aturi, e ua tae roa to’u aau i te mana‘o e, ua fatata roa oe i te riro ei taure‘are‘a maitai roa ».4 Taa ê noa’tu ta’na hopoi‘a no te haapiiraa i te evanelia ia vetahi ê, ua rave itoito oia i te ohipa no te haapii mai ia’na iho i te evanelia. I roto i te hoê rata ta’na i papa‘i mai i te fare, ua faati‘a oia i ta’na mau tautooraa no te tamau aau i te hoê tuhaa papa‘iraa mo‘a : « Ua tamata vau i te mahana taatoa ia tamau aau i te hoê tuhaa papa‘iraa mo‘a, e aita â i mau atura. Tera râ, ua papû to’u mana‘o e tamau roa i te reira hou a faaoti ai au ».5
Ua horo‘a te peresideni Smith i to’na huru mana‘ona‘o i te ohipa i ni‘a i ta’na mau tamarii. Ua parau oia ia ratou : « E pohe te taata i roto i te ro‘i. Mai te reira atoa ïa te opuaraa rahi ». Ia au i teie parau tumu, ua haapapû oia e ta’na vahine ia ti‘a te mau tamarii i ni‘a i te mau po‘ipo‘i atoa e ia rave i ta ratou tuhaa ia vai mâ noa te fare e te nahonaho. Te faahaamana‘o ra te hoê o ta’na mau tamaiti e, « Mai te huru ra e, e ohipa ino roa no papa ia taravarava noa matou i roto i te ro‘i i muri a‘e i te hora ono ». « Hoê noa iho taime to’u tamataraa. Ua haapa‘o mai ihoa papa i te reira ».6 Ua tauturu atoa te peresideni Smith i te raveraa i te ohipa na rapae i te fare. I te omuaraa o to raua o Louie faaipoiporaa, ua rave puai oia i te ohipa no te hamani i to raua fare matamua. I roto i te roaraa o te mau matahiti, na’na iho i rave i te rahiraa o te ohipa tataîraa i te fare, ua tauturu i roto i te fare tûtu, e ua tauturu i te pafa‘iraa i te mau hotu i te mau tau hoturaa e ia faaherehere i te reira i roto i te mau mohina.7
I muri a‘era, ua riro mai te taea‘e Haycock, taua taata nei â tei rû i te hoê taime no te pee i te peresideni Smith i roto i te Fare Faatereraa Ohipa a te Ekalesia, ei papa‘i parau no na Peresideni o te Ekalesia e pae, tai‘o atoa i te peresideni Smith. Na roto i te reira taatiraa, ua ite oia i te mau tautooraa tamau a te peresideni Smith no te haamaitai ia’na iho i te pae varua. Te parau ra oia e, pinepine oia i te tomo i roto i te piha ohiparaa a te peresideni Smith e ia ite i te peropheta te tuatapapa ra i te mau papa‘iraa mo‘a e aore râ, te tai‘o ra i te tahi atu buka.8
Te mau haapiiraa a Joseph Fielding Smith
1
Te hinaaro nei te Fatu ia vai tatou ei feia haa itoito noa i roto i te imiraa i te mau haamaitairaa pae tino e pae varua.
Ua na ô te Fatu ia [Adamu] : « E amu oe i ta oe maa ma te hou i ni‘a i to rae » [Genese 3:19 ; a hi‘o atoa Mose 4:25], e i te roaraa o te tau ua ti‘aoro te Fatu i to’na mau taata ia itoito, ia tavini ia’na ma te haapa‘o maitai, ia rave i te ohipa…
I te mau mahana matamua o te Ekalesia i roto i teie mau afaa [i Utah], ua faaitoito u‘ana te peresideni Brigham Young e te tahi atu mau taea‘e i te parau no te rave-itoito-raa i te ohipa, e ua riro te reira ei mea titau-roa-hia i te mea e, ua haere mai to tatou hui metua i ô nei ma te tao‘a ore. E ti‘a ia ratou ia rave i te ohipa. E ti‘a ia ratou ia riro ei feia haa itoito noa. E mea faufaa ia faahotu ratou i te mau mea i hinaarohia e ratou, e no reira, ua horo‘a-tamau-hia te parau a‘o e te arata‘iraa ia ratou, ia riro ratou ei feia haa itoito noa. Ua haapiihia ia ratou eiaha te aau teitei. Ua haere mai ratou i ô nei ia ti‘a ia ratou ia haamori i te Fatu to ratou Atua e ia haapa‘o i ta’na mau faaueraa. Ua parauhia ia ratou ia faahaehaa e ia faaitoito… Ahiri pai ua nehenehe ta tatou e haamana‘o noa i te reira. Ua oto vau i te mea e, ua mo‘ehia te reira ia tatou…
… Ua parau te Fatu e, « Eiaha e faaea ohipa ore noa no te mea e ore roa oia o te faaea ohipa ore noa e amu i te faraoa e aore râ e oomo i te ahu o te feia rave ohipa ra ». [PH&PF 42:42.] E feruriraa paari mau te reira, e ere anei ? No te aha e ti‘a ai i te hoê taata faaea ohipa ore noa e fana‘o i te ohipa a te taata e haa itoito noa nei—mai te mea ihoa râ e, e tino maitai to teie taata faaea ohipa ore noa, e e nehenehe ta’na e rave i te ohipa ? Aita roa’tu vau e au i te mau pŭpŭ taata e imi nei i te rave‘a ia haamou i te itoito mau o te tane na roto i te faaitoitoraa i te mau tane ia faaea ohipa ore noa, noa’tu eaha te matahiti, aita vau e haapa‘o i te reira. Aita e parauraa ehia matahiti to’na, mai te mea e, e tino puai to te hoê tane, e e nehenehe ta’na e rave i te ohipa, e ti‘a ia’na ia utuutu ia’na iho ; tera ta te Fatu e hinaaro nei ia’na ia rave.
Ua parau mai te Fatu i roto i te tahi atu heheuraa :
« E teie faahou â, oia mau ta’u e parau atu nei ia outou na, o te taata atoa o te titauhia ia imi i te faufaa no to’na iho utuafare ra, a tuu atu ia’na ia imi ra, e e ore ho‘i oia e ere i to’na korona ; e a tuu atu ho‘i ia’na ia rave i te ohipa i roto i te ekalesia. Ia itoito noa ho‘i te taata atoa i te raveraa i te mau mea atoa. E ore ho‘i te taata faaea noa e noaa te vahi i roto i te ekalesia, maori râ ia tatarahapa oia e ia faaafaro ho‘i i to’na haereraa ». [PH&PF 75:28–29.]
Te reira atoa te parau a‘o ta te Fatu i horo‘a mai i to te Ekalesia i teie mahana. E ere te reira parau no te arote noa i te faaapu, e aore râ, no te ooti noa e no te raveraa i te ohipa, te titauhia nei râ te taata ia haa itoito noa i roto i te mau mea pae varua atoa e i te mau mea no te pae tino o to’na oraraa.9
Tei ô nei tatou no te hoê opuaraa rahi. Te reira opuaraa, e ere ïa i te oraraa 100 matahiti, e aore râ, i raro mai, e ia faaapu, e ia ooti i ta tatou mau maa, ia haaputu i te hotu, ia ora i roto i te mau fare, e ia faaati ia tatou i te mau materia o te oraraa tahuti nei. E ere te reira te opuaraa o te oraraa. E mea faufaa te reira mau mea no to tatou oraraa i ô nei, e o te reira te tumu i titauhia ai ia tatou ia haa itoito noa. Teie noa râ, ehia rahiraa taata e feruri nei e, aita’tu e ohipa i roto i te oraraa nei maori râ, te haaputuraa i te mau mea o teie nei ao, te oraraa i roto i te maitai, e te haaatiraa ia ratou i te mau mea tao‘a rahi, e te mau fana‘oraa, e te mau faaanaanataeraa e vai nei i roto i te oraraa tahuti nei, ma te feruri ore i te mau mea no a muri a‘e ?
No te aha, teie mau mea taatoa, e mau haamaitairaa taime poto ana‘e ïa. E tamaa tatou no te ora. E ahu tatou i te ahu no te tamahanahana e no te tapo‘i ia tatou. Te ora nei tatou i roto i te fare no to tatou maitai e te au maite, tera râ, e ti‘a ia tatou ia faariro i teie mau haamaitairaa atoa ei mau haamaitairaa taime poto, titau-roa-hia ho‘i no to tatou tere i roto i teie oraraa nei. Ti‘a râ’tu ai to ratou maitai no tatou. Eita ta tatou e nehenehe e hopoi i te hoê noa a‘e o te reira na muri iho ia tatou ia reva ana‘e tatou. Te auro, te moni, e te mau ofa‘i faufaa rahi, tei parauhia e tao‘a rahi, aita to te reira e faufaa no te taata maori râ, no te aupuru noa ïa ia’na e no te pahono i to’na mau titauraa i ô nei.10
Te hinaaro nei te Fatu… ia roaa to tatou ite no ni‘a i te mau mea no te pae tino nei, no to tatou oraraa maitai i te tahuti nei ; ia ti‘a ho‘i ia tatou ia tavini i to tatou mau taata tupu ; e ia ti‘a ho‘i ia tatou ia hopoi atu i te parau poro‘i o te evanelia i te tahi atu mau tamarii ta’na na te ao atoa nei.11
« Te hinaaro nei te Fatu… ia roaa to tatou ite no ni‘a i te mau mea no te pae tino nei ».
Te tumu no to tatou taeraa mai i ô nei, o te raveraa ïa i te hinaaro o te Metua mai te ravehia i te ra‘i ra, no te faatupu i te parau-ti‘a i te fenua nei, no te haavî i te ino e ia tuu i te reira i raro a‘e i to tatou avae, no te upooti‘a i ni‘a i te hara e i te enemi o to tatou varua, no te ti‘a i ni‘a a‘e i te mau hapehape e i te mau paruparu o te taata hara nei, na roto i te faaûruraa a te Fatu e te faaiteraa a to’na mana, ia riro mai tatou ei feia mo‘a e ei mau tavini no te Fatu i ni‘a i te fenua nei.12
2
I te hopea, na tatou e amo i te hopoi‘a i mua i te Fatu no ta tatou haapa‘oraa i te hopoi‘a.
Tei mua tatou i to tatou faaroo e to tatou hiro‘a ; aita outou i mua i to’u aro, aita atoa i mua i to te Peresideniraa o te Ekalesia, i to te Fatu râ. Aita vau i mua i te aro o te taata ia faatura vau i ta’u tuhaa ahuru—tei mua ta’u mau ohipa i te aro o te Fatu ; te auraa ra, ta’u iho mau raveraa i roto i te Ekalesia e to’u haapa‘oraa i te tahi atu mau ture e te mau arata‘iraa a te Ekalesia. Ia ore noa’tu vau e haapa‘o i te mau ture a te Ekalesia, na’u te hopoi‘a i mua i te Fatu, e na’u te pahonoraa i mua ia’na araua‘e, no to’u iho haapa‘o ore i te ohipa, e e riro atoa paha vau i te pahono atu i mua i te Ekalesia no ta’u aupururaa i te taata. Mai te mea e, e rave au i ta’u hopoi‘a, mai te au i to’u iteraa i te mau titauraa ta te Fatu i titau mai ia’u, ia vai ïa to’u hiro‘a ma te hape ore e ti‘a’i. E oaoa to’u varua i te mea e, ua haapa‘o vau i ta’u hopoi‘a mai ta’u i maramarama, e e farii au i te mau hopearaa. No’u nei, tei rotopu ïa ia’u e te Fatu ; mai te reira te huru no te mau taata atoa.
Oia o tei tono mai i ta’na Tamaiti Fanau Tahi i roto i te ao nei, no te faaoti i te misioni ta’na i rave, ua tono atoa mai oia i te mau varua atoa e faaroo mai nei i to’u reo, e oia atoa te mau tane e te mau vahine atoa i roto i te ao nei, no te faaoti i te hoê misioni, e eita taua misioni ra e nehenehe e faaotihia ma te tau‘a ore, ma te tapetepete, eita atoa e nehenehe ia faaotihia ma te ite ore.
E ti‘a ia tatou ia ite i ta tatou titauraa i mua i te Fatu e i te tahi e te tahi ; e mea faufaa teie mau mea, e eita tatou e manuïa i roto i te mau mea pae varua, eita tatou e tupu i te rahi i roto i te ite i te Fatu e aore râ, i roto i te paari, ma te ore e horo‘a i to tatou mau mana‘o e ta tatou mau tautooraa i ni‘a i to tatou iho maitai, i ni‘a i te tupuraa o to tatou paari e to tatou ite i te mau mea a te Fatu.13
E mea ohie roa i te taata ia faahapa i te tahi atu mau taata no to ratou mau hape, e e mea ohie roa no tatou, no to tatou huru taata nei, ia faariro i te hoê mea ei maitai no tatou mai te mea e, te ohipa i ravehia, e mea au e te apî no tatou. Eita râ tatou e au ia amo i te hoê hopoi‘a no te mau hape o te ore e auhia, e no reira, e imi tatou i te mau rave‘a atoa no te huri atu i te reira huru hopoi‘a i te tahi atu vahi e i ni‘a i te tahi atu mau taata… Ia amo tatou i ta tatou iho mau hopoi‘a, e eiaha e tautoo ia tuu atu i te reira i te tahi atu vahi.14
3
Ua horo‘a mai te Atua i te ti‘amâraa ia tatou nei, e te hinaaro nei oia ia rave tatou i te mau mea atoa e ti‘a ia tatou ia rave no tatou iho.
Ua riro te ti‘amâraa ei horo‘a rahi ta te Fatu i tuu mai i ni‘a i te mau varua no te raveraa i te ohipa no’na iho, no te rave i ta’na iho faaotiraa, no te riro ei ti‘a ma te mana no te ti‘aturi e no te farii i te parau mau ma te farii i te ora mure ore, e aore râ, no te pato‘i i te parau mau e no te farii i te oto o te aau. Teie te hoê o te mau horo‘a rahi roa a‘e a te Atua. Eaha ïa te huru ahiri e, aita te reira, ahiri e, e faahepohia tatou mai te tahi mau taata e hinaaro ia faahepo i to ratou taata tupu ia haapa‘o i to ratou hinaaro ? Aita ïa e faaoraraa ; aita ïa e haamauruururaa no te parau-ti‘a ; aita ïa hoê taata e faautu‘ahia no te haapa‘o ore no te mea, aita ïa ta te taata e amoraa utu‘a i mua i Tei Hamani ia ratou ra.15
Ua anihia ia Iosepha Semita e mea nahea ta’na ia faatere i te hoê nahoa taata rahi e te taa ê te tahi i te tahi mai te Feia Mo‘a i te Mau Mahana Hopea Nei. Ua pahono oia e : « E haapii au ia ratou i te mau parau tumu ti‘a, e e faatere ratou ia ratou iho ».
Teie te haapiiraa ta tatou e faaohipa nei i roto i te Ekalesia. Te hinaaro nei matou i to tatou mau melo i te mau vahi atoa ia haapii mai i te mau parau tumu ti‘a e ia faatere ia ratou iho.16
« Aore e taata, na roto i te hoê noa a‘e ture na te Metua, tei faahepohia ia rave i te maitai… E rave te taata tata‘itahi i te ohipa no’na iho ».
Teie horo‘a rahi no te ti‘amâraa, oia ho‘i, te haamaitairaa i horo‘ahia i te taata ia rave i ta’na iho faaotiraa, aita ïa i faaorehia, e eita roa’tu e faaorehia. E ture mure ore ïa, o te horo‘araa i te ti‘amâraa no te mana‘o e te ohipa i te mau varua atoa. Aore e taata, na roto i te hoê noa a‘e ture na te Metua, tei faahepohia ia rave i te maitai ; aore e taata tei faahepohia ia rave i te ino. E rave te taata tata‘itahi i te ohipa no’na iho. Na satane te faanahoraa ia haamou i te ti‘amâraa e ia faahepo i te taata ia haapa‘o i to’na hinaaro. Aore roa e oraraa oaoa mai te mea e, aita teie horo‘a rahi. E ti‘a i te taata ia farii i te haamaitairaa no te ma‘iti, noa’tu e ma‘iti ratou ia pato‘i i te mau ture a te Atua. Oia ïa, e roaa te faaoraraa e te faateiteiraa na roto i te ti‘amâraa e te faahepo ore, e na roto i te maitai o te taata hoê, ia ti‘a i te mau utu‘a maitai ia horo‘ahia, e te faautu‘araa tano ia faautahia i ni‘a i te taata ofati ture.17
Te ti‘aturi nei tatou e, no te aroha e ora ai tatou hope noa’tu to tatou itoito atoa, e ma te patu i ni‘a iho i te niu o te taraehara a te Mesia, e ti‘a i te mau taata atoa ia rave papû i to ratou iho ora ma te măta‘u e te rurutaina i mua i te Fatu [a hi‘o 2 Nephi 25:23 ; Moromona 9:27].18
E mea faufaa roa, mai tei faaite-afaro-hia e te mau ohipa e mai te ite-atoa-hia i roto i te mau papa‘iraa mo‘a, te mea ta te Atua i rave no te taata nei i te mau mea atoa o te ore e ti‘a i te taata ia rave noratou iho no te faaoraraa, tera râ, te hinaaro nei oia ia rave te taata no ratou iho i te mau mea atoa e maraa i to ratou puai.
Na roto i teie ture, eita ïa e au i te faanahoraa o te ra‘i tei haamauhia hou te hamani-raa-hia te fenua nei, ia haere mai te mau ve‘a mo‘a tei tomo i roto i te ti‘a-faahou-raa, e aore ra, te mau ve‘a no roto i te ao tiretiera, ia haere mai i te fenua nei e ia rave i te ohipa no te taata o te ti‘a i te taata ia rave no ratou iho…
E hape ino mau ia ti‘aturi e, ua rave Iesu i te mau mea atoa no te taata nei, maoti noa te fa‘iraa to ratou utu ia’na, ti‘ara’tu ai te ohipa ta ratou e rave. E ohipa ta te taata e rave mai te mea e, e hinaaro ratou ia roaa te faaoraraa. Na roto i teie ture mure ore i tono ai te melahi ia Korenelio ia Petero ra [a hi‘o Te Ohipa 10], e i tonohia ai o Anania ia Paulo ra [a hi‘o Te Ohipa 9:1–22]. Mea na roto atoa i te haapa‘oraa i te reira ture i ore ai o Moroni, tei maramarama i te mau papa‘iraa i ni‘a i te papaa parau a te Ati Nephi, i rave i te iritiraa, tera râ, i raro a‘e i te arata‘iraa a te Fatu, ua horo‘a’tu ia Iosepha Semita ra i te Urima e te Tumima i ti‘a ai ia’na ia faaoti i taua ohipa faufaa ra na roto i te horo‘a e te mana o te Atua.19
4
Ta tatou na hopoi‘a rahi e piti o te imiraa ïa i to tatou iho faaoraraa, e te rave-papû-raa i te faaoraraa o vetahi ê.
Tera ta tatou na hopoi‘a rahi e piti… A tahi, ia imi i to tatou iho faaoraraa ; e a piti, ta tatou ohipa no to tatou mau taata tupu. I teie nei, te mana‘o nei au e, ta’u ohipa matamua, no ni‘a ia’u iho, o te imiraa ïa i to’u iho faaoraraa. Tera ta outou hopoi‘a matamua, e mai te reira atoa no te mau melo atoa o teie Ekalesia.20
Ta tatou mana‘ona‘oraa matamua, o to tatou iho ïa faaoraraa. E ti‘a ia tatou ia imi i te mau haamaitairaa atoa o te evanelia no tatou iho. E ti‘a ia tatou ia bapetizohia e ia tomo i roto i te faanahoraa o te faaipoiporaa tiretiera ia riro mai ho‘i tatou ei mau fatu ai‘a i roto i te îraa o te basileia o to tatou Metua. I muri iho, e feruri tatou i to tatou utuafare, ta tatou mau tamarii, e to tatou hui tupuna.21
E ohipa… na tatou ia faaora i to te ao nei, tei pohe e tei ora. E faaora tatou i tei ora o tei tatarahapa, na roto i te pororaa i te evanelia i roto i te mau nunaa, e na roto i te haaputuputuraa i te mau tamarii no Iseraela, te aau parau-ti‘a. Te faaora nei tatou i tei pohe na roto i te haereraa i roto i te fare o te Fatu e te raveraa i teie mau oro‘a—te bapetizoraa, te tuuraa rima, te haamauraa, e te tahi atu â mau ohipa ta te Fatu e titau nei ia tatou—ei mono no ratou.22
E hopoi‘a na’u, e na outou atoa teie hopoi‘a, e to’u mau taea‘e e to’u mau tuahine atoa—no te mea e, ua tuu-atoa-hia te hopoi‘a i ni‘a ia outou—ia rave maitai roa i tei roto i to tatou mana, eiaha e fariu ê, e rohi râ ma to tatou varua atoa no te faateitei i te mau piiraa ta te Fatu i horo‘a mai ia tatou, no te rave papû i te faaoraraa o to tatou iho utuafare, tatou tata‘itahi, e no te faaoraraa o to tatou mau taata tupu, te faaoraraa o te feia i te fenua ĕê.23
Te mau mana‘o tauturu no te tuatapaparaa e te haapiiraa
Uiraa
-
Eaha te mea ta outou i faahiahia i roto i te mau tautooraa a te peresideni Smith no te haapii i ta’na mau tamarii ia rave i te ohipa ? (A hi‘o « No roto mai i te oraraa o Joseph Fielding Smith ».) Eaha ta tatou e nehenehe e rave no te tauturu i te mau tamarii ia rahi a‘e to ratou aau tiaau ?
-
Nahea te mau haapiiraa i roto i te tuhaa 1 i te faarahiraa i to outou haro‘aro‘araa i te parau no te ti‘aturi i ni‘a ia’na iho ? A feruri i ta outou e nehenehe e rave no te faarahi atu i to outou huru faarava‘iraa ia outou iho.
-
A hi‘o faahou i te parau a‘o i roto i te tuhaa 2. Eaha te auraa no outou i te parau « na’u te hopoi‘a i mua i te Fatu » ?
-
Ua haapii te peresideni Smith e, « Te hinaaro nei matou i to tatou mau melo i te mau fenua atoa ia haapii mai i te mau parau tumu ti‘a e ia faatere ia ratou iho » (tuhaa 3). Nahea teie haapiiraa e faufaahia ai no te mau utuafare ? Nahea te reira i te arata‘i i te mau pŭpŭ autahu‘araa e te mau Sotaiete Tauturu ?
-
I roto i ta tatou mau tautooraa no te tavini ia vetahi ê, no te aha e, « ta tatou mana‘ona‘oraa matamua, o to tatou iho ïa faaoraraa » ? (A hi‘o i te tuhaa 4.)
Te mau papa‘iraa mo‘a
Tauturu haapiiraa
« A haapii ai outou i teie buka, a ani ia vetahi ê ia faaite mai i to ratou mau mana‘o, a ui i te mau uiraa, e a haapii te tahi i te tahi. Mai te mea e, e amui mai ratou i roto i te aparauraa, e hau atu â ïa to ratou ineine i te haapii mai e i te farii i te heheuraa no ratou iho » (mai te api v–vi i roto i teie buka).