Pene 7
Iosepha Semita e o Hairamu Semita, na ite no Iesu Mesia
« Te faateitei nei tatou i to tatou reo no te haamauruuru i te oraraa e i te tau ohiparaa o te peropheta Iosepha Semita, o Hairamu Semita te patereareha, e o te mau peropheta e te mau aposetolo e te mau tane e te mau vahine parau-ti‘a tei patu i ni‘a i te niu ta ratou i haamau ».
No roto mai i te oraraa o Joseph Fielding Smith
Mai to’na apî-roa-raa, ua ite o Joseph Fielding Smith e, e taamuraa taa ê to to’na utuafare i te peropheta Iosepha Semita. Ua faaûruhia oia e te hi‘oraa o to’na papa ruau o Hairamu Semita, te tuaana e e hoa rahi no te peropheta Iosepha. Ua tavini o Hairamu ma te haapa‘o i piha‘iho i to’na taea‘e ei taata faatere i roto i te Ekalesia. Ua tauturu atoa oia i te nene‘iraa o te Buka a Moromona, e ua piihia ei hoê o na ite toova‘u o te buka. I te 27 no tiunu 1844, ua taparahi-pohe-hia o Iosepha e o Hairamu i Carthage, Illinois, ma te titiro roa i to raua iteraa papû no ni‘a i te Faaora e Ta’na evanelia. « Aita raua i amaha i roto i te oraraa, e aita i faataa-ê-hia i roto i te pohe ! » PH&PF 135:3
Aita o Joseph Fielding Smith i ite i to’na na tupuna metua Smith. Ua taparahi-pohe-hia to’na papa ruau o Hairamu hou roa oia a fanauhia mai ai. E mea apî roa atoa te vahine a Hairamu o Mary Fielding Smith i te poheraa. Ua parau o Joseph Fielding Smith e : « Aita roa’tu vau i ite i to’u mama ruau Smith. Ua oto rii au i te reira, no te mea, oia te hoê o te mau vahine hanahana roa‘e tei ora na, ua mâtau râ vau i to’na tuahine maitai, to’u Mama fetii o Mercy Thompson, e i to’u tamariiraa e haere noa vau e farerei ia’na i roto i to’na fare e e parahi i ni‘a i to’na turi, i reira oia e faati‘a mai ai ia’u i te mau aamu no ni‘a i te peropheta Iosepha Semita, e, auê to’u mauruuru no taua iteraa ra ».1
Ua apo atoa mai Joseph Fielding Smith i te mau mea mai roto mai i te hi‘oraa o to’na metua tane, o Joseph F. Smith, tei ite tino roa i te peropheta Iosepha Semita. Teie te parau ta Joseph Fielding Smith no ni‘a i to’na metua tane : « Aita roa hoê mea tapitapi e aore râ, papû ore i roto i to’na iteraa papû. I te taime ihoa râ a paraparau ai oia no ni‘a i te hanahana o to tatou Faaora e aore râ, te misioni a te peropheta Iosepha Semita ».2
Na teie mau hi‘oraa e teie mau haapiiraa i arata‘i ia Joseph Fielding Smith ia farii i te hoê iteraa papû no ni‘a i te evanelia i faaho‘ihia mai i roto i to’na tamariiraa ra. « Aita vau e haamana‘o nei i te taime a ore ai au i ti‘aturi i te misioni a to tatou Fatu e Faaora o Iesu Mesia, aita atoa no ni‘a i te misioni a te peropheta Iosepha Semita »,3 ta’na ïa parau i muri a‘e. A haapii ai oia i te evanelia, ua faaite oia i te tahi mau taime i to’na iteraa papû i roto i te tahi mau parau matarohia : « Ua here anei au i te peropheta Iosepha Semita ? Oia mau, mai to’u metua tane na mua ia’u. Ua here au ia’na no te mea o oia te tavini o te Atua, e no te faaho‘iraahia mai te evanelia, e no te mau maitai e te mau haamaitairaa tei tae mai i ni‘a ia’u e i to’u iho, e i ni‘a ia outou e i to outou iho, na roto i te mau haamaitairaa tei tuuhia mai i ni‘a i teie taata e i ni‘a atoa ia ratou tei apiti mai ia’na ra ».4
Noa’tu te mauruuru o te peresideni Smith i te mau haapiiraa e te faufaa ai‘a a to’na utuafare, no’na iho to’na iteraa papû. Ua parau oia e, « Ua mauruuru tamau noa vau no te iteraa papû tei roaa ia’u na roto i te Varua o te Fatu e, ua piihia o Iosepha Semita, te peropheta na te Atua, ia ti‘a i te upoo o te tau tuuraa no te îraa o te mau tau ».5 I te tahi atu taime ua faaite papû oia e : « O to’u nei iteraa e, na roto i te horo‘a a te Atua, ua ite Iosepha Semita i te matahiti 1820 ra i te Metua e te Tamaiti ; e ua faaite maira te Metua i ta’na Tamaiti ; e ua paraparau mai te Tamaiti ia’na, ma te ani eaha te mea ta’na e hinaaro ia ite, e ua horo‘a mai ia’na i te a‘o ; e ua parau mai ia’na i te ohipa e rave, ma te fafau mai e, i te hopea ra e tae mai te tahi atu maramarama, e e faaho‘ihia mai te îraa o te evanelia, tei ore â ho‘i i vai i ni‘a i te fenua i taua taime ra. I muri iho ua faaite oia i te hoê haapapûraa e, e ti‘a i te mau taata atoa ia farii i taua iteraa papû ra : « Pauroa te mau varua i ni‘a i te fenua nei tei hinaaro ia ite i te reira, e farii ïa i te haamaitairaa, no te mau varua atoa e faahaehaa ia’na iho, e e haere ho‘i i mua i te Fatu ma te haehaa rahi e te faaroo, ma te aau oto, e farii ïa i taua iteraa ra ma te papû maitai ».6
Te mau haapiiraa a Joseph Fielding Smith
1
E piti tumu parau rarahi e matara mai : E Tamaiti Iesu Mesia na te Atua e e peropheta Iosepha Semita.
E nati tatou i na i‘oa o Iesu Mesia e o Iosepha Semita. O te Mesia te Fatu ; ua faatupu oia i te tusia taraehara ; oia te ti‘a-faahou-raa e te ora ; na roto ho‘i ia’na e faati‘ahia ai te mau taata atoa i roto i te tahuti ore, e o tei faaroo e tei haapa‘o i ta’na ra mau ture e noaa atoa ïa te ora mure ore.
E peropheta Iosepha Semita, tei piihia i teie mau mahana hopea nei no te farii na roto i te heheuraa i te mau parau mau faaora o te evanelia e no te ti‘a ei tavana mana, ma te mana no ni‘a mai, no te faatere i te mau oro‘a o te evanelia.
No te mea e, o teie te mau parau mau tei heheuhia na roto ia’na o te haere atu i te mau nunaa atoa hou te Tae-piti-raa mai, eita ihoa ïa tatou e maere roa i te mea e, e ite tatou ia Moroni i te parauraa ia Iosepha Semita e, « E itehia to’na i‘oa no te maitai e no te ino i rotopu i te mau nunaa atoa, te mau opu atoa e te mau reo atoa, e aore râ, e parauhia te reira i te maitai e i te ino i rotopu i te mau taata atoa ». (Iosepha Semita—Aamu 1:33.]
Eita atoa ïa tatou e maere roa, i te iteraa i te Fatu i te parauraa i te peropheta i muri mai : « E uiui mai to te mau hopea no te ao nei i to oe i‘oa, e e parau amuamu ho‘i te feia maamaa ia oe, e e faatupu o hade i te riri rahi ia oe ;
« A titau noa‘i te feia mâ i te aau, e te feia paari, e te feia mana, e te feia taiata ore hoi, i te a‘oraa, e te mana, e te mau haamaitairaa i te mau taime atoa i raro a‘e i to oe rima na ». PH&PF 122:1–2
Te haamata nei te mau hopea o te fenua i teie nei i te imi i te i‘oa o Iosepha Semita, e e rave rahi te taata i roto i te mau nunaa e rave rahi o te oaoa nei i roto i te evanelia tei faaho‘ihia mai na roto ia’na ra.
Mai te omuaraa o teie tau tuuraa, ua porohia te iteraa papû no ni‘a ia Iesu, mai tei heheuhia mai ia Iosepha Semita ra, i roto i te mau Hau Amui no Marite, i Canada, i te fenua Peretane, i te pae rahi o Europa, e i roto i te mau motu no Patifita.
Na matahiti i ma‘iri a‘enei ua itehia te hoê tupuraa rahi maere o te ohipa i Mexico, i Amerika Ropu, e i Amerika Apatoa.
E i teie nei [i te matahiti 1971] te matara ra Asia i te parau poro‘i o te evanelia hau atu i te mau mea atoa i tupu na i tahito ra. Te haamauhia nei te Ekalesia i te fenua Tapone e i Korea, i Taiwan e i Hong Kong, e te haamata nei tatou i Thailand, Singapore, e i Inidonesia.
Te vai ra te mahana, ia au i te maitai rahi o te Fatu, na roto i te tahi atu mau nunaa ua opani ratou i te parau mau, e iritihia te mau uputa no tatou, ei reira te mau peresibutero no Iseraela e tomo ai i reira no te faaite i te aau parau-ti‘a no taua mau nunaa ra no ni‘a i te Mesia e i te evanelia o to’na basileia tei tae mai i ni‘a i te fenua nei i teie anotau na roto i te peropheta Iosepha Semita.7
O Iosepha Semita te heheu parau i to te ao nei e i teie mahana e i teie ho‘i u‘i, no te ite no ni‘a i te Mesia e no ni‘a i te faaoraraa.8
E piti tumu parau rarahi e vai tamau noa i roto i to’u feruriraa. E Tamaiti Iesu Mesia na te Atua, tei faasataurohia no te hara a to te ao nei, e o Iosepha Semita te peropheta tei piihia e tei ma‘itihia no te iriti i te e‘a i roto i te tau tuuraa no te îraa o te mau tau. Teie ta’u parau poro‘i i to te ao nei.9
2
Ua pii te Fatu ia Iosepha Semita no te ti‘a i te upoo o teie tau tuuraa hanahana.
Ua tae mai… Iosepha Semita e i raro a‘e i te arata‘iraa a te mau ve‘a mo‘a, ua haamau oia i te niu no te basileia o te Atua e no teie ohipa umerehia e te maere ia faaineinehia ho‘i te ao nei no te taeraa mai o te Fatu.10
O Iosepha Semita te peropheta tei piihia e tei ma‘itihia no te iriti i te e‘a i roto i te tau tuuraa no te îraa o te mau tau ».
Ua ite au e, ua piihia oia [Iosepha Semita], ua faataahia e to tatou Metua i te ao ra ; e ua farii oia i te heheuraa e te arata‘iraa no ô mai i te Tamaiti a te Atua ra o te riro ei maitai e ei haamaitairaa no te mau taata atoa mai te mea e farii ratou i te reira.11
Aita e feaa i roto i to’u feruriraa e, ua faati‘a mai te Fatu i te peropheta Iosepha Semita e ua horo‘a ia’na i te heheuraa, te faaueraa, ua iriti i te mau ra‘i no’na, e ua faataa ia’na no ti‘a mai i te upoo o teie tau tuuraa hanahana. Ua ite papû vau i roto i to’u feruriraa e, i to’na apîraa, a haere ai oia e pure, ua ite e ua ti‘a oia i mua i te aro o te Atua te Metua e ta’na Tamaiti o Iesu Mesia ; i roto i to’u feruriraa, aita roa e mana‘o feaa—ua ite au e parau mau teie. Ua ite au e, ua farii oia i te mau fâraa o Moroni, ua farii i te Autahu‘araa a Aarona i raro a‘e i te rima o Ioane Bapetizo, ua farii i te Autahu‘araa a Melehizedeka i raro a‘e i te rima o Petero, Iakobo e Ioane, e ua faati‘ahia Te Ekalesia a Iesu Mesia i te Feia Mo‘a i te Mau Mahana Hopea Nei i te ono no eperera 1830, na roto i te faaueraa hanahana.12
I to’na ma‘itiraa i te hoê ti‘a no te ti‘a i te upoo o teie « ohipa rahi e te maere e fatata nei i te tupu i rotopu i te mau tamarii a te taata nei », [a hi‘o PH&PF 4:1] aita te Fatu i ma‘iti i te hoê taata tei î i te ite e i te mau mea matarohia o te ao nei. E ere To’na mau haerea i to te taata haerea, e ere atoa to’na mau mana‘o i to te taata mau mana‘o [a hi‘o Isaïa 55:8]. Ahiri e taata tei haapiihia i te haapiiraa a to te ao nei, ua ohipa rahi atura ïa no te faaore i te mau peu e te mau mana‘o paari o te taata. I roto i to’na paari rahi ua ma‘iti te Fatu i te hoê tamarii aau mâ—e tamaiti ahuru ma maha matahiti. Ua heheu atura te Fatu i teie tamaiti apî te îraa o te evanelia, ta te ao e ore e farii no to ratou ti‘aturi ore. Na roto i te mau matahiti arata‘iraa a te ra‘i ra—inaha, na te mau ve‘a no ô mai i te Fatu ra i haapii ia’na—ua faaineinehia teie tamaiti apî, o Iosepha Semita, no te arata‘i i te ohipa o te faaho‘i-faahou-raa mai o te Evanelia e o te paturaa i te Basileia o te Atua.13
3
Ua parau te Fatu e, e roaa Ta’na parau i teie u‘i na roto mai i te peropheta Iosepha Semita.
I te mau anotau atoa a vai ai te evanelia i ni‘a i te fenua nei, e heheuhia mai ïa te reira i te mau peropheta a te Fatu, e e piihia ratou ia ti‘a ei mau faatere mana no te rave e no te arata‘i i te faatupuraa o te mau oro‘a no te faaoraraa o to ratou mau taata tupu.
O Iosepha Semita te peropheta ta te Fatu i pii i teie anotau no te faaho‘i mai i te mau parau mau no te faaoraraa e no te farii i te mau taviri e te mau mana no te faatere i teie mau parau mau faaora.
Ua na ô te Fatu ia’na : « … e ite râ teie nei u‘i i ta’u nei parau na roto ia oe ». (PH&PF 5:10.) I muri iho, no ni‘a i te evanelia tei faaho‘ihia mai na roto ia Iosepha Semita, na ô a‘era te Fatu e : « E porohia teie Evanelia no te Basileia i te ao atoa nei, ei faaiteraa i to te mau nunaa atoa, ei reira e tae mai ai te hopea ra, e aore râ, te haamouraa o te feia iino ». [Iosepha Semita—Mataio 1:31.]14
Te parau nei au i teie nei e—
O Iosepha Semita ta te mau taata atoa e ti‘a ia hi‘o i teie anotau no te apo mai i te parau no ni‘a i te Mesia e i ta’na evanelia ;
Ia tae mai ho‘i te tau mau ra e itehia ai te i‘oa o teie peropheta i na poro e maha o te fenua nei, e i rotopu i te mau taata atoa ;
Ei reira te aau parau-ti‘a ra e farii ai ia’na ei peropheta ma te haamori ho‘i i taua Fatu ra ta’na i heheu mai ;
Ia ti‘a ho‘i i te Ekalesia ta’na i faanahonaho na roto i te faaueraa hanahana ra ia ruperupe i te mea e, te pee nei oia i te mau heheuraa i horo‘ahia mai na roto ia’na ;
E ia roaa i te feia atoa e ti‘aturi i te mau haapiiraa a Iosepha Semita e o te rave i te ohipa i roto i te faanahoraa ta’na i faataa, te iteraa e, e Tamaiti Iesu Mesia na te Atua tei faasataurohia no te mau hara a to te ao nei.
Ia au ho‘i te rave‘a no to’u iteraa e, o Iesu te Mesia—oia ho‘i, na roto i te heheuraa no ô mai i te Varua Mo‘a ra—ua ite au e, ua riro na e te riro nei e e riro a muri noa’tu o Iosepha Semita ei peropheta na te Atua…
I roto i te varua no te iteraa papû e no te mauruuru, te [faaite nei] au i teie mau parau faaûru no roto mai i Te Parau Haapiiraa e te Mau Parau Fafau : « Ua rahi a‘e Iosepha Semita, te Peropheta e te Hi‘o a te Fatu, i rave, maori râ ia Iesu ana‘e, no te faaoraraa i te taata nei i roto i teie nei ao, i tei ravehia e te hoê taata ê atu o tei ora na i ni‘a iho i te reira ». (PH&PF 135:3.)15
4
Ua hoê Iosepha Semita e to’na taea‘e o Hairamu i roto i te oraraa e i roto i te pohe.
Ua mauruuru roa vau no te faaho‘iraahia mai te parau mau mure ore i roto i teie tau tuuraa evanelia hopea ; no te misioni e te ohipa a Iosepha Semita, te peropheta, e no to’u papa ruau, o Hairamu Semita, te patereareha ; e no te mea ho‘i e, ua horo‘a-faahou-hia mai te mau taviri o te basileia o te Atua i te taata nei i ni‘a i te fenua nei.16
Iosepha e Hairamu Semita : « Aita raua i amaha i roto i te oraraa, e aita i faataa-ê-hia i roto i te pohe ! » PH&PF 135:3
« E teie faahou â, oia mau ta’u e parau atu nei ia oe na, e ao to ta’u tavini ra o Hairamu Semita : no te mea ua here au, o te Fatu, ia’na no te tiamauraa no to’na aau, e no te mea ua here oia i tei ti‘a i mua ia’u nei, te na reira mai nei te Fatu ». [PH&PF 124:15.]
O vai te taata eita e oaoa i teie huru parau faateniteniraa no to’na ti‘aturi e teie arue, no ô mai ho‘i i te Fatu ra ? O Hairamu Semita te hoê o te mau taata matamua tei bapetizohia i roto i teie tau tuuraa. I roto i to’na oraraa ua ti‘a oia i piha‘iho i to’na taea‘e o Iosepha e ua haapuai ia’na na roto i te faaitoitoraa, te faaroo e te here mau. E taata aau here rahi o Hairamu. Tei roto ia’na te haehaa rahi e ua here oia i to’na taea‘e hau atu i to’na iho ora. Ua itehia te reira i roto i to’na pohe i reira ho‘i i roaa ai ia’na te korona no te pohe maratiri. Ua paruru oia i te parau mau ma te măta‘u ore. Oia mau, ua « here oia i te ohipa ti‘a ».
Ua fanauhia o Hairamu Semita i te 9 no fepuare 1800, e fatata e ono matahiti hau atu i te paari i te peropheta. Aore e tura i roaa ia Iosepha Semita o ta Hairamu i fana‘o ore, oia tei oaoa na e to’na ra taea‘e i roto i te mau haamaitairaa atoa ta te Fatu i tuu mai i ni‘a ia’na. Ua ite-atoa-hia teie huru here taea‘e i roto i te peropheta Iosepha no to’na taea‘e o Hairamu. Hoê â huru oto e te oaoa tei faaruruhia e raua. Hoê â mau hamani-ino-raa i ravehia i ni‘a ia raua. Hoê â piha tape‘araa to raua no te here o te Evanelia, e ia tae maira te tau e titiro ai raua i to raua iteraa papû, ua hoê ana‘e to raua korona no te pohe maratiri. « I roto i te oraraa nei aita raua i amaha atu te tahi i te tahi, e i roto i te poheraa aita ho‘i raua i faataa-ê-hia’tu ». [PH&PF 135:3]…
Teie te hoê parau faateniteniraa ti‘a no roto mai i te peropheta : « E te taea‘e Hairamu, auê ïa mafatu faaroo to oe ! Ia faahei mai o Iehova Mure Ore i te mau haamaitairaa mure ore i ni‘a i to oe upoo, ei utua maitai no to oe haapa‘oraa i to‘u nei varua ! Auê ra hoi rahiraa oto o ta maua i farii amui ; e faahou teie â maua i roto i te rima faaea ore o te enemi. E Hairamu, e papa‘ihia to oe i‘oa i roto i te buka ture a Iehova, ia hi‘o te feia o te haere mai i muri ia oe, e ia faaau ratou i ta ratou mau ohipa i ni‘a i ta oe mau ohipa ».
Ua parau faahou â te peropheta e : « E nehenehe ia‘u ia pure i roto i to‘u nei aau e ia riro to‘u mau taea‘e ato‘a mai to‘u nei taea‘e here o Hairamu, tei mau i te mărû o te hoê arenio, e te parau-ti‘a o Ioba, ei haapotoraa, te mărû e te haehaa o te Mesia; e te here nei au ia’na i taua here ra tei puai a‘e i te pohe, i te mea e, aore hoê taime au i faahapa ia’na, na reira atoa oia i ni‘a ia’u ».17
5
Ua titiro Iosepha e o Hairamu Semita i to raua iteraa papû i to raua toto.
Ua piihia to’u papa ruau, te patereareha Hairamu Semita, no te mau i te mau taviri no teie tau tuuraa ma te apitihia mai e te peropheta Iosepha, to’na taea‘e teina. Ua parau te Fatu e, tei te vaha o na ite toopiti e haamauhia te mau mea’toa [a hi‘o 2 Korinetia 13:1]…
Eita e ti‘a ia Iosepha Semita ia vai oia ana‘e, ia ore ana‘e, ua manuïa ore ïa ta’na ohipa, mai te ohipa a te Faaora i titau i te haapapûraa a te tahi atu ite, o te ti‘a ia faaite papû no te Mesia, taa ê atu i to’na ra Metua ? [A hi‘o Ioane 8:12–18.] E no reira ua pii te Fatu i te tahi atu taata no te ti‘a i piha‘iho ia Iosepha Semita e no te mau i te mau taviri no te faaoraraa i roto i teie tau tuuraa ei ite e ana ra…
Aita o [Hairamu] i pii-noa-hia ia riro ei patereareha no te Ekalesia, noa’tu e no’na te reira ti‘araa matahiapo, tera râ ua parau atoa te Fatu ia’na i taua taime ra e :
« E mai teie taime atu â te faataa’tu nei au ia’na ia riro oia ei peropheta, ei hi‘o, e ei heheu parau i ta’u ekalesia, mai ta’u tavini nei o Iosepha atoa ra ;
« Ia ti‘a ia’na ia rave tahoê atoa i te ohipa i piha‘i iho i ta’u tavini nei o Iosepha ; e ia farii ho‘i oia i te a‘oraa a ta’u tavini nei o Iosepha o te faaite atu ia’na te mau taviri na roto i te reira e ti‘a ai ia’na ia ani mai e ia farii hoi, e ia faakoronahia‘i i te haamaitairaa, e te hanahana, e te tura, e te autahu‘araa, e te mau horo‘a no te autahu‘araa iho, o tei tuuhia’tu i mutaa iho ra i ni‘a ia’na ra o tei riro ei tavini na’u ra o Olive Kaudere ;
« Ia ti‘a i ta’u tavini ra o Hairamu ia faaite i te parau no te mau mea ta’u e faaite atu nei ia’na, ia haamana‘o-noa-hia to’na i‘oa ma te tura mai tera u‘i e tae noa’tu i tera u‘i ra, e a muri e a muri noa’tu ». [PH&PF 124:94–96.]
Ei tu‘atiraa i teie nei piiraa e teie faaueraa, ua horo‘a te peropheta Iosepha Semita i ni‘a ia Hairamu Semita i te mau taviri atoa, te mana e te mau horo‘a no te autahu‘araa, ta’na, te peropheta, i mau, e tei mauhia na mua a‘e e Olive Kaudere. Ua heheu atoa te Fatu ia Hairamu Semita i te mau mea atoa i titauhia no te faariro hope roa ia’na ei ite i piha‘iho i to’na taea‘e Iosepha, ei peropheta, ei hi‘o, ei heheu parau e ei peresideni no te Ekalesia, e ia ti‘a i te mau taime atoa e i te mau tau mure ore atoa i te upoo o teie tau tuuraa i piha‘iho i to’na taea‘e Iosepha, ei ite no Iesu Mesia.18
Ua titiro [Iosepha Semita] e to’na taea‘e, to’u papa ruau, te patereareaha Hairamu Semita, i to’na iteraa papû i to’na toto i roto i te fare tape‘araa no Carthage. E no’u nei, te hinaaro nei au ia riro ei mauhaa i roto i te rima o te Fatu no te faaite i te mau hopea o te ao nei e, e roaa faahou te faaoraraa no te mea, ua faati‘a te Fatu i te hoê hi‘o i teie anotau no te haamau faahou i to’na basileia i ni‘a i te fenua nei.19
Ua titiro amui Iosepha e o Hairamu Semita i to raua iteraa papû i to raua toto.
Te faateitei nei tatou i to tatou reo no te haamauruuru i te oraraa e i te tau ohiparaa o te peropheta Iosepha Semita, o Hairamu Semita te patereareha, e o te mau peropheta e te mau aposetolo e te mau tane e te mau vahine parau-ti‘a tei patu i ni‘a i te niu ta ratou i haamau.20
Te mau mana‘o tauturu no te tuatapaparaa e te haapiiraa
Uiraa
-
Ua paraparau mai te peresideni Smith no ni‘a i te mau melo o te utuafare tei tauturu i te faaamuraa i to’na iteraa papû tamarii no ni‘a i te misioni a Iosepha Semita (a hi‘o « No roto mai i te oraraa o Joseph Fielding Smith ») Eaha te ti‘a ia tatou ia rave no te tauturu i te mau tamarii ia noaa te hoê iteraa papû no ni‘a i te misioni a te peropheta Iosepha Semita ?
-
Mai te aha te huru i taatihia ai te i‘oa o Iesu Mesia e to Iosepha Semita ? (A hi‘o i te tuhaa 1.) Nahea te tau taviniraa a te peropheta Iosepha Semita i te faaûruraa i to outou iteraa papû no ni‘a i te Faaora e i Ta’na evanelia ?
-
A feruri na i te mau parau a te peresideni Smith no ni‘a i to te Fatu piiraa ia Iosepha Semita, aita i ma‘iti i « te hoê taata tei î i te ite e i te mau mea matarohia o te ao nei » (tuhaa 2). Nahea teie iteraa e nehenehe e tauturu mai i te taime tatou e mana‘o ana‘o ai e, aita tatou i tano no te amo i ta tatou mau hopoi‘a ?
-
I roto i te tuhaa 3, ua faahiti te peresideni Smith i Te Parau Haapiiraa e te Mau Parau Fafau 5:10 e te 135:3. Nahea outou i te tatara i teie mau irava i te hoê taata tei ore i mâtau maitai i te misioni a Iosepha Semita ?
-
Eaha te ti‘a ia outou ia apo mai i roto i te taamuraa i rotopu ia Iosepha Semita e to’na taea‘e Hairamu ? (A hi‘o i te tuhaa 4.)
-
Eaha to outou mau mana‘o a feruri ai outou no ni‘a ia Iosepha e ia Hairamu Semita i te titiroraa i to raua iteraa papû i to raua toto ? (A hi‘o i te tuhaa 5.) Nahea tatou e nehenehe ai e faatura i ta raua tusia ?
Te mau papa‘iraa mo‘a
Joseph Smith Translation, Genese 50:30–31 ; 2 Nephi 3:5–15 ; PH&PF 11:11–26 ; 76:22–24 ; 135
Tauturu haapiiraa
Te hoê rave‘a no te faaitoito i te haapiiraa maitai o te faarooraa ïa ma te haapa‘o maitai ia ui mai te hoê taata i te hoê uiraa e aore râ, ia horo‘a oia i te tahi mana‘o. « Te faarooraa, e faaiteraa te reira no te here. E titau pinepine te reira i te faatusiaraa. Ia faaroo mau ana‘e tatou i te tahi, e vaiiho tatou i te mea o ta tatou e hinaaro e parau ia nehenehe ratou ia faaite i to ratou iho mau mana‘o » ( Te Haapiiraa, Aita e Piiraa Teitei A‘e, [1999], 66).