Omuaraa

Ua faanaho te Peresideniraa Matamua e te Pŭpŭ no te Tino Ahuru Ma Piti Aposetolo i te apaparaa o Te mau haapiiraa a te mau Peresideni o te Ekalesia no te tauturu ia outou ia haafatata atu i to outou Metua i te Ao ra, e ia faahohonu i to outou ite i te evanelia a Iesu Mesia tei faaho‘ihia mai. Ia tuu mai te Ekalesia i te mau buka i roto i teie apaparaa, e roaa ïa ia outou te hoê haaputuraa buka evanelia no to outou utuafare. Ua faataahia te mau buka i roto i teie apaparaa, no te faaohipa i roto i te tuatapaparaa a te taata hoê, e no te haapiiraa i te Sabati. E tauturu atoa te reira ia outou ia faaineine i te tahi atu mau haapiiraa e aore râ mau a‘oraa, e ia pahono i te mau uiraa no ni‘a i te haapiiraa tumu a te Ekalesia.

Te vauvau nei teie buka i te mau haapiiraa a te peresideni Joseph Fielding Smith, tei tavini ei peresideni no te Ekalesia a Iesu Mesia i te Feia Mo‘a i te Mau Mahana Hopea Nei mai te 23 no tenuare 1970, e tae atu i te 2 no tiurai 1972.

Te tuatapaparaa a te taata hoê

A tuatapapa ai outou i te mau haapiiraa a te peresideni Joseph Fielding Smith, a titau i te faaûruraa a te Varua Maitai, na roto i te pure. E tauturu te mau uiraa i te pae hopea o te mau pene atoa ia outou ia maramarama i te mau haapiiraa a te peresideni Smith e ia faaohipa i te reira i roto i to outou oraraa. A tuatapapa ai outou i teie mau haapiiraa, e hinaaro paha outou ia feruri i te mau rave‘a no te faaite atu i te reira i te mau melo o te utuafare e i te mau hoa. E haapuai te reira i to outou haro‘aro‘araa no ni‘a i te mau mea ta outou e tai‘o ra.

Te haapiiraa mai roto mai i teie buka

Ua faataahia teie buka no te faaohipa i te utuafare e i te fare pureraa. I roto i te mau pŭpŭ tahu‘a rahi, te mau pŭpŭ peresibutero e te Sotaiete Tauturu, e haapiihia e piti haapiiraa i te Sabati i te ava‘e hoê mai roto mai i te mau pene i roto i teie buka. Eita e pau te mau pene atoa i te haapiihia i roto i te roaraa e 12 ava‘e, no reira, na te feia faatere o te paroisa e o te tĭtĭ e faaoti e, eaha te mau pene maitai a‘e e haapii no te pahono i te mau hinaaro o te mau melo ta ratou e tavini ra.

Na te mau arata‘iraa i muri nei e tauturu ia outou ia haapii atu mai roto mai i teie buka :

Faaineine no te haapii

A titau i te arata‘iraa a te Varua Maitai a faaineine ai outou no te haapii. A tuatapapa i te pene na roto i te pure, ia ti‘a ia outou ia papû maitai i to outou haro‘aro‘araa i te mau haapiiraa a te peresideni Smith. E haapii outou ma te aau tae e te puai rahi ia faaûru ana‘e ta’na mau parau ia outou iho (a hi‘o PH&PF 11:21).

Mai te mea e haapii outou i te haapiiraa na te Autahu‘araa a Melehizedeka e aore râ na te Sotaiete Tauturu, eiaha outou e tuu i teie buka i te hiti e aore râ e faaineine i te hoê haapiiraa mai roto mai i te tahi atu mau buka. Na roto i te pure a ma‘iti i roto i te pene o teie mau haapiiraa i te mea o ta outou e mana‘o ra, e riro ei tautururaa papû maitai no te mau taata ta outou e haapii ra. I roto i te tahi mau pene e mea rahi roa te mau haapiiraa eita e noaa i te haapii pauroa i roto i te hoê taime haapiiraa.

A faaitoito i te mau piahi ia tuatapapa i te pene hou te haapiiraa e ia afa‘i mai i ta ratou buka. Ia na reira ana‘e ratou, e ineine maitai a‘e ïa ratou no te tau‘araa parau e no te faatupu i te maitai i roto i te tahi e te tahi.

I roto i ta outou faaineineraa no te haapii, a haapa‘o maitai i te tuhaa ra « Te mau mana‘o tauturu no te tuatapapa e no te haapii » i te pae hopea o te pene tata‘itahi. I raro a‘e i teie upoo parau, e ite outou i te mau uiraa, te mau papa‘iraa mo‘a e te mau tauturu haapiiraa. E tu‘ati maitai te mau uiraa e te mau papa‘iraa mo‘a i ni‘a i te pene i reira ratou e itehia ai. E nehenehe i teie mau tauturu haapiiraa e arata‘i ia outou i roto i ta outou mau tautooraa atoa no te tauturu ia vetahi ê ia ite i te oaoa i roto i te haapiiraa mai e i te oraraa i te evanelia.

Omua i te pene

A omua ai outou i te pene, e i te roaraa o te haapiiraa, a ohipa no te faatupu i te hoê huru i reira ho‘i te Varua e nehenehe ai e haaputapû i te aau e i te mana‘o o te feia ta outou e haapii ra. No te haamata i te haapiiraa, a tauturu i te feia ta outou e haapii ra ia faatumu i te mana‘o i ni‘a i te mau haapiiraa o te pene. A feruri i te mau mana‘o i muri nei :

A tai‘o e a aparau i te tuhaa i parauhia « No roto mai i te oraraa o Joseph Fielding Smith » i te haamataraa o te pene.
A aparau i ni‘a i te hoê hoho‘a e aore râ, i te hoê irava no roto mai i te pene.
A himene amui i te hoê himene e tu‘ati atu.
A faaite poto noa i te hoê ohipa tei tupu i ni‘a ia outou iho no ni‘a i te tumu parau.

A faatere i te hoê aparauraa no ni‘a i te mau haapiiraa a te peresideni Smith

A haapii ai outou na roto mai i teie buka, a ani ia vetahi ê ia faaite mai i to ratou mau mana‘o, ia ui i te mau uiraa e ia haapii i te tahi e te tahi. Ia amui maitai ana‘e mai ratou i roto i te aparauraa, e hau atu â ïa to ratou ineine i te haapii mai e i te farii i te heheuraa no ratou iho. A vaiiho i te mau tau‘araa parau maitatai ia tere noa na, eiaha e tamata i te haapii i te taatoaraa o te mau haapiiraa. No te faaitoito i te aparauraa, a faaohipa i te mau uiraa i te pae hopea o te pene tata‘itahi. E nehenehe atoa ta outou e hamani i ta outou iho mau uiraa taa ê no te mau taata ta outou e haapii ra.

Teie te tahi mau rave‘a no te horo‘a ia outou i te tahi atu mau mana‘o :

A ani i te mau piahi ia faaite mai e, eaha ta ratou i haapii mai na roto mai i ta ratou iho tuatapaparaa i te pene. E mea maitai roa ia farerei i te tahi mau piahi i roto i te hepetoma e ia ani ia ratou ia haere ineine mai no te faaite mai i te mea ta ratou i haapii mai.
A faaue i te mau piahi no te tai‘o i te mau uiraa i ma‘itihia i te pae hopea o te pene (ei taata hoê anei e aore râ, ei pŭpŭ na‘ina‘i). A ani ia ratou ia imi i te mau haapiiraa i roto i te pene e tu‘ati i ni‘a i te mau uiraa. I muri iho a ani ia ratou ia faaite mai i to ratou mau mana‘o e ta ratou mau hi‘oraa i mua i te toe‘a o te pŭpŭ.
A tai‘o amui i te tahi mau parau a te peresideni Smith i roto i te pene. A ani i te mau piahi ia faaite mai i te mau hi‘oraa no roto mai i te mau papa‘iraa mo‘a e no roto mai i to ratou iho mau iteraa o te faahoho‘a ra i te mea ta te peresideni Smith i haapii.
A ani i te mau piahi ia ma‘iti i te hoê tufaa e ia tai‘o i te reira ma te mamu noa. A ani ia ratou ia amui ei pŭpŭ ta‘ipiti e aore râ ta‘itoru taata i roto, o tei ma‘iti i te hoê â tuhaa e ia aparau i te mea ta ratou i haapii mai.

Faaitoito i te faaiteraa e i te faaohiparaa

E faufaa rahi atu â te mau haapiiraa a te peresideni Smith no te mau piahi o te faaite i te reira ia vetahi ê e o te faaohipa i te reira i roto i to ratou oraraa. A feruri i te mau mana‘o i muri nei :

A ani i te mau piahi nahea ratou e nehenehe ai e faaohipa i te mau haapiiraa a te peresideni Smith i roto i ta ratou mau hopoi‘a i te utuafare e i roto i te ekalesia. Ei hi‘oraa, e ti‘a ia outou ia tauturu ia ratou ia feruri e ia aparau e nahea ratou e nehenehe ai e faaohipa i ta’na mau haapiiraa i roto i to ratou ti‘araa ei mau tane faaipoipo, ei mau vahine faaipoipo, ei mau metua, ei mau tamaiti, ei mau tamahine, ei mau taea‘e haapii utuafare, e aore râ, ei mau tuahine hahaere.
A faaitoito i te mau piahi ia faaite i te tahi o te mau haapiiraa a te peresideni Smith i te mau melo no te utuafare e i te mau hoa.
A ani i te mau piahi ia faaohipa i te mea ta ratou i apo mai e ia faaite i to ratou mau iteraa i te haamataraa o te haapiiraa i muri iho.

Faahope te aparauraa

A pu‘ohu poto noa i te haapiiraa e aore râ, a ani i te hoê e aore râ, e piti piahi ia pu‘ohu mai. A faaite i to outou iteraa papû no ni‘a i te mau haapiiraa ta outou i aparau. E hinaaro atoa paha outou e ani i te tahi ia faaite mai i to ratou iteraa papû.

Haamaramaramaraa no ni‘a i te mau materia i faahitihia i roto i teie buka

Te mau haapiiraa i roto i teie buka, e mau faahitiraa parau ïa no roto mai i te mau a‘oraa, te mau papa‘iraa, te mau buka, te mau rata e te mau buka aamu a te peresideni Joseph Fielding Smith. Ua tape‘a-maite-hia te mau faatomaraa, te papa‘iraa, te mau reta rahi e te mau paratarafa o te mau papa‘iraa tumu, maori râ, ua taui te mau reta i te nene‘iraa no te haamaitai i te tai‘oraa. No te reira tumu, e ite paha outou i te tahi mau tu‘atiraa ore i roto i te papa‘iraa. Ei hi‘oraa, te ta‘o ra evanelia e mea papa‘i-na‘ina‘i-hia i roto i te tahi mau faahitiraa parau e e mea papa‘i-rahi-hia i roto i te tahi.

Ua faaohipa pinepine atoa te peresideni Smith i te mau ta‘o mai te mau tane, te tane, e aore râ, taata nei no te parau i te mau taata atoa, te tane e te vahine atoa. Ua faaohipa pinepine oia i te mau ta‘o o’na, ta’na, e oia no te parau i na apeni e piti. E peu matarohia te reira i roto i te paraparau o to’na tau. Noa’tu râ te mau taa-ê-raa i roto i te faanahoraa o teie reo e te mau faaohiparaa, e tano te mau haapiiraa a te peresideni Smith na te mau vahine e na te mau tane.