Pene 19
I roto i teie nei ao, eiaha râ i to teie nei ao.
« Tei roto tatou i teie nei ao, e ere râ tatou i to teie nei ao. Ua titauhia ia tatou ia upooti‘a i ni‘a i teie nei ao e ia ora no te riro mai ei feia mo‘a ».
No roto mai i te oraraa o Joseph Fielding Smith
I te 29 no titema 1944, ua pohe te tamaiti a te peresideni Joseph Fielding Smith, o Lewis, a tavini ai oia i roto i te nuu o te mau Hau Amui no Marite. Noa’tu te pe‘ape‘a i farereihia e te peresideni Smith, ua mărû to’na pe‘ape‘a na roto i to’na haamana‘oraa i te oraraa maitai o Lewis. « Mai te mea e, ua rave e aore râ, ua parau o Lewis i te hoê mea au ore rii, aita ïa vau i faaroo i te reira », ta te peresideni Smith ïa i papa‘i i roto i ta’na buka aamu. « E mea viivii ore to’na mau mana‘o, na reira atoa ta’na mau ohipa i rave… Noa’tu te teimaha o teie parau apî, te vai nei te hau e te oaoa i roto ia matou ia ite e, e mea mâ oia e te ti‘amâ i te mau viivii e vai rahi nei i roto i te ao nei e i roto i te nuu. Ua haapa‘o maitai oia i to’na faaroo e e ti‘a ia’na ia farii i te hoê ti‘a-faahou-raa hanahana, ia tahoê-faahou-hia matou ».1
11 matahiti i muri mai, ua ite atu te peresideni Joseph Fielding Smith e ta’na vahine o Jessie i te reira huru i roto i te tahi atu mau ti‘a no te nuu. Ua ratere raua na roto i te mau misioni a te Ekalesia i te pae hitiaa o te râ no Asia, e ua farerei atoa i te Feia Mo‘a i te Mau Mahana Hopea Nei Marite e tavini ra i roto i te nuu. Ua faahiahia te peresideni e te tuahine Smith i te huru o teie mau taure‘are‘a, noa’tu te mau faahemaraa a to te ao nei, ua ora ratou i te hoê oraraa maitai e te mâ. I roto i te amuiraa rahi no atopa 1955, te parau ra te peresideni Smith e :
« Outou e te mau metua tane e te mau metua vahine e mau tamaiti ta outou e tavini nei i roto i te nuu, e nehenehe ta outou e haapeu no ratou. E mau taure‘are‘a maitai ratou. Te tahi pae o to tatou mau faehau e mau taata faafariuhia ïa, tei arata‘ihia mai i roto i te Ekalesia na roto i te mau haapiiraa, te mau ture e te hi‘oraa maitai—te hi‘oraa maitai ihoa râ o te mau melo o te Ekalesia o te tavini atoa nei i roto i te nuu.
« Ua farerei au i te tahi mau taure‘are‘a tei parau mai e, ‘Ua haere mai matou i roto i te Ekalesia na roto i te huru oraraa o teie mau taure‘are‘a, e no te mea atoa e, ua haapii mai ratou ia matou i te mau parau tumu o te evanelia’.
« E ohipa maitai roa ta ratou e rave nei. Te vai ra paha hoê e aore râ, e piti e ere i te mea tau‘a roa, tera râ, te feia apî ta’u i farerei, e ta’u i paraparau, te faaite ra ratou i to ratou iteraa papû no ni‘a i te parau mau e te haere ra ma te haehaa.
« E i to’u farereiraa i te mau ti‘a faatere e te mau orometua… ua hoê ratou i te parauraa e, ‘E mea au roa na matou to outou feia apî. E mea mâ ratou. E nehenehe e ti‘aturi ia ratou ».2
Ua faaitoito te peresideni Smith i te mau melo o te Ekalesia ia riro—mai teie mau taure‘are‘a faehau—« taa ê i te toe‘a o to teie nei ao ».3 I roto i teie mau huru a‘oraa, ua parau pinepine oia i te parau no te haamo‘araa i te mahana Sabati, te haapa‘oraa i te Parau Paari, te faaturaraa i te i‘oa o te Metua i te Ao ra e o Iesu Mesia, te ahuraa ma te tano, e te haapa‘oraa i te ture no te viivii ore. Ua faaite papû oia i te Feia Mo‘a i te Mau Mahana Hopea Nei e, mai te mea e, e faaru‘e ratou i te mau ino o teie nei ao, e e haapa‘o ho‘i i te mau faaueraa, e riro ïa te mau haamaitairaa ta ratou e farii ei mau haamaitairaa « tei hau roa i te mau mea e ore e ti‘a ia tatou ia maramarama i teie nei ».4
Noa’tu i te tau tama‘i, e nehenehe ta tatou e ora i roto i teie nei ao, eiaha râ ia riro i to teie nei ao.
Te mau haapiiraa a Joseph Fielding Smith
1
Te tia‘i nei te Fatu ia faaru‘e tatou i te mau ino o te ao nei e ia ora mai te au i te Feia Mo‘a.
Te ora nei tatou i roto i te hoê ao ino e te au ore. Tera râ, tei roto tatou i teie nei ao, e ere râ tatou i to teie nei ao. Ua titauhia ia tatou ia upooti‘a i ni‘a i teie nei ao e ia ora no te riro mai ei feia mo‘a… E maramarama rahi a‘e to tatou i ta to teie nei ao, e te titau rahi nei te Fatu ia tatou, hau atu i ta’na e titau i to teie nei ao.5
I roto i te pene ahuru ma hitu o Ioane—eita ta’u e nehenehe e tai‘o i teie pene ma te ore te roimata e tahe—a pure ai to tatou Fatu i to’na Metua i roto i te mărû o to’na varua atoa no te mea ua ite oia e, ua tae i te hora no’na ia pûpû ia’na iho ei tusia, e ua pure oia no ta’na mau pĭpĭ. Te na ô ra oia i roto i taua pure ra,
« Aore au i pure ia oe e ia hopoi ê atu oe ia ratou i teie nei ao, ia tiai mai râ oe ia ratou eiaha ei ino.
« E ere ratou i to teie nei ao, mai ia’u nei ho‘i e ere i to teie nei ao.
« E haamaitai oe ia ratou i te parau mau na oe : o to parau na te parau mau ». (Ioane 17:15–17.)
Mai te mea e, e ora tatou i te parau ta te Fatu i heheu mai, e ta tatou ho‘i i farii, aita ïa tatou e riro i to teie nei ao. Eiaha roa tatou e rave i te hoê noa a‘e o te mau ino o teie nei ao. Eiaha tatou e rave i ta’na mau hara e ta’na mau hapa—e mau hapa no te haapiiraa hohonu a te taata e e mau hapa no te haapiiraa tumu, e mau hapa no ni‘a i te faatereraa hau, e aore râ, te huru o te reira mau hapa—eiaha tatou e amui atu.
Hoê noa iho ohipa ta tatou e rave, oia ho‘i, te haapa‘oraa i te mau faaueraa a te Atua. Tira râ atu ai, haapa‘o maitai i te mau fafauraa atoa e te mau titauraa atoa ta tatou i tomo atu e i rave i ni‘a ia tatou iho.6
Eiaha râ outou e mana‘o e, te parau atu nei au e, e faaatea ê mai tatou i te mau taata atoa i rapae i te Ekalesia, e eiaha e tapiri atu ia ratou. Aita vau i parau i te reira parau, te hinaaro nei râ vau ia riro mau tatou ei Feia Mo‘a i te Mau Mahana Hopea Nei au maitai, e mai te mea e, e haere to teie nei ao na roto i te poiri e te hara e na rapae i te hinaaro o te Fatu, ei reira tatou e huti ai i te reni.7
Ia tomo tatou i roto i te Ekalesia… titauhia ia tatou ia faaru‘e i te mau haerea e rave rahi o te ao nei, e ia ora mai te au i te feia mo‘a. Aita tatou e ahu faahou e aore râ, e paraparau faahou e aore râ, e feruri faahou mai ia vetahi ê e na reira pinepine nei. E rave rahi i roto i teie nei ao te faaohipa nei i te tî, te taofe, te avaava e te inu taero, e te faaohipa nei i te mau raau taero. E rave rahi o te faahiti nei i te parau paieti ore, o te parau ino nei e o te faatura ore nei, o te rave nei i te peu faufau e te viivii i roto i to ratou oraraa, are‘a tatou ra, ia vai te reira mau mea ei ohipa mâtau ore no tatou. E Feia Mo‘a tatou no tei Teitei Roa ra…
Te ti‘aoro nei au i te Ekalesia e i to’na mau melo taatoa ia faaru‘e i te mau ino o teie nei ao. E faaatea ê tatou i te peu viivii e i te mau huru peu faufau atoa mai te ma‘i pee ra te huru…
Ei mau tavini no te Fatu, ta tatou opuaraa o te haere ïa na ni‘a i te e‘a ta’na i faataa no tatou. Eiaha tatou faatupu noa i te hinaaro ia rave e ia parau i te mea e au ai oia, e ora râ tatou i te hoê oraraa e riro ai to tatou oraraa mai to’na atoa ra te huru.8
Haamo‘a i te mahana Sabati
Te hinaaro nei au e parau i te tahi mau parau no ni‘a i te haapa‘oraa i te mahana Sabati e i te haamo‘araa i te reira. Ua horo‘ahia mai teie faaueraa mai te haamataraa mai â, e ua faaue a‘era te Atua i te Feia Mo‘a e i te mau taata atoa o te fenua nei ia haapa‘o i te mahana Sabati e ia haamo‘a i te reira—hoê mahana i ni‘a i te hitu. E faaea tatou i ta tatou mau ohipa i taua mahana ra, e haere tatou i te fare o te Fatu e e pûpû atu ai i ta tatou mau oro‘a i To’na ra mahana mo‘a. No te mea, teie te mahana i faataahia e faaea ai tatou i ta tatou mau ohipa e e haamori atu ai i tei Teitei Roa ra. [A hi‘o PH&PF 59:9–10.] E pûpû tatou Ia’na i taua mahana ra i ta tatou haamaitairaa e e faahanahana Ia’na na roto i te pure, te haapaeraa maa, te himene e te faateiteiraa e te haapiiraa te tahi i te tahi.9
Ua riro te mahana Sabati ei mahana faaanaanataeraa, ei mahana arearearaa, ei mahana no te huru mea atoa, eiaha râ no te haamoriraa… e te oto nei au ia parau atu e, ua rahi roa—hoê noa, ua rahi a‘ena—te mau melo o te Ekalesia a Iesu Mesia i te Feia Mo‘a i te Mau Mahana Hopea Nei tei apiti atu i taua faanahoraa ra, e no te tahi mau melo o te Ekalesia, ua riro te mahana Sabati ei mahana arearearaa, ei mahana faaanaanataeraa, eiaha râ ei mahana i reira tatou e nehenehe ai e tavini i te Fatu to tatou Atua ma to tatou aau atoa, to tatou itoito atoa, to tatou mana‘o atoa e to tatou puai atoa…
E teie nei, tera te ture i to te Ekalesia i teie mahana mai te ture i to Iseraela i tahito ra, e te tapitapi rii nei te mana‘o o te tahi pae o to tatou mau taata i te mea e, te feruri nei ratou e, ua riro te haapa‘oraa i te mahana Sabati ei faaitiraa i ta ratou mau faaoaoaraa.10
Eiaha tatou e ofati i te mahana Sabati… Te pe‘ape‘a mau nei au i te mea e, i rotopu i to tatou mau Feia Mo‘a i te Mau Mahana Hopea Nei, te vai nei te tahi pae aita e faariro nei i teie haapiiraa tumu mai te au i tei titauhia ; inaha, te vai ra te tahi pae o tatou o te feruri nei e, e ti‘araa mau to ratou ia pee i te peu o teie nei ao no ni‘a i te reira tumu parau. Te farii nei ratou i te mau mana‘o e i te mau haapiiraa a to te ao nei ma te ofati roa’tu i te mau faaueraa a te Fatu. Tera râ, mai te mea e, e na reira tatou, e hopoi‘a ta tatou i mua i te Fatu, e eita ta tatou e nehenehe e ofati i ta’na parau e e farii atu ai i te mau haamaitairaa o te haapa‘o maitai.11
Haapa‘o i te Parau Paari
E ture niu te ture o te Parau Paari. E faaite te reira i te e‘a, e na te reira e horo‘a mai ia tatou i te arata‘iraa rahi no ni‘a i te maa e te inu, ei maitai no te tino, e te ino atoa. Mai te mea e, e haapa‘o tatou ma te aau tae mau i tei papa‘ihia, na roto i te tauturu a te Varua o te Fatu, aita e faufaa te tahi atu a‘o. Teie te fafauraa e vai nei i roto i teie haapiiraa nehenehe roa :
« E te feia mo‘a atoa o te haamana‘o i te haapa‘o e i te rave i teie mau parau nei, ma te taahiraa i roto i te haapa‘o-maitai-raa i te mau faaueraa, e ora maitai te noaa i to ratou pito e te puo i to ratou mau ivi ;
« E e itea ho‘i ia ratou te paari e te mau tao‘a rahi no te ite, oia te mau tao‘a rahi i hunahia ra ;
« E e horo ho‘i e e ore roa e rohirohi, e e haere e e ore roa e fiu ». [PH&PF 89:18–20.]12
E rave rahi miria tara marite e haamau‘ahia nei i te matahiti hoê no te mau inu taero e no te avaava. Te taero e te viivii ta teie mau ino e hopoi mai i roto i te utuafare taata nei, ua riro ïa ei faainoraa, eiaha i te ea noa, i te paruru morare e te paruru varua atoa râ o te taata nei.13
Te amahamaha nei te mau utuafare na roto te faaohipa-rahi-raa i te mau raau taero e opanihia e te u‘anaraa o te faaohiparaa i te mau raau taero i haamanahia.14
Eiaha tatou e faaroo i te mau umeumeraa e te faatianiraa ino o te mau mea e tuino i te tino e o tei faahapahia e to tatou Metua i te Ao ra e ta’na Tamaiti o Iesu Mesia, e tei taa ê atoa ho‘i i te evanelia ta raua i horo‘a mai ia tatou…
Ia vai mâ ho‘i to tatou tino e ti‘a ai. Ia vai mâ ho‘i to tatou feruriraa e ti‘a ai. Ia vai ho‘i i roto i to tatou aau te hinaaro ia tavini i te Fatu e ia haapa‘o i ta’na mau faaueraa ; ia haamana‘o i to tatou mau pure, e ia imi na roto i te haehaa i te a‘o e tae mai na roto i te arata‘iraa a te Varua o te Fatu.15
Ua heheu mai te Fatu i te Parau Paari i te peropheta Iosepha Semita no te tauturu i te Feia Mo‘a ia farii i te puai pae tino e pae varua.
Faatura i te i‘oa o te Atua
E faariro tatou i te i‘oa o te Atua ei ohipa faaturahia ma te mo‘a e te hanahana. Aita e mea e oto rahi ai e aore râ e faahiti ma‘ue ai i te mana‘o o te hoê taata maitai, maori râ te faarooraa i te tahi mau taata ia faahiti i te mau parau iino, hairiiri e te faufau no ni‘a i te i‘oa o te Atua. No te huru paieti ore o te tahi mau taata, mai te mea ra e, fatata eita e ti‘a faahou ia ratou ia faahiti e piti e aore râ, e toru pereota ma te ore e tutuha—ia au i to ratou feruriraa—i te hoê tuhiraa faufau e te faatura ore. Te vai atoa ra te tahi mau taata, mai te mea ra e, te feruri nei ratou e… e tane mau ratou, e e faateitei te reira ia ratou i ni‘a a‘e i te tahi atu mau taata, mai te mea e, e nehenehe ta ratou e paraparau tuhi mai… Ua riro te viivii i roto i to’na mau huru faito atoa ei ohipa ino e te haamou, e e ti‘a ïa i te mau melo o te Ekalesia ia haapae i te reira mai te au i te hoê raau faataero.
E mea pinepine te mau aamu maitai i te ino roa, no te mea e, aita te mau taata papa‘i i maramarama i te faufaa no te faaohiparaa i te mau i‘oa mo‘a. Ia tuuhia te mau parau faaino i roto i te vaha o te mau taata ti‘araa tura, eita ïa te reira e haamaitai atu i te aamu, e faaino roa’tu râ i te faufaa e te maitai o te reira… E mea maere mau i te mea e, te vai ra te tahi mau taata, e taata aravihi iho i reira, o te feruri nei e, mai te mea e, e faaohipa ratou i te i‘oa o te Fatu i roto i ta ratou mau parau, e rahi atu ïa te au, te maramarama e te puai o ta ratou mau aamu !
Taa ê atu i te mau taata atoa i ni‘a i te fenua nei, titauhia i te Feia Mo‘a i te Mau Mahana Hopea Nei ia faaite i te faatura rahi i te mau mea mo‘a atoa. Aita to teie nei ao i haapiipiihia teie mau mea mai ia tatou i haapiihia na, noa’tu e, te vai ra te mau taata parau-ti‘a e rave rahi, te mau taata faaroo e te maitai i roto i teie nei ao. Teie nei, e Varua Mo‘a te arata‘i nei ia tatou, e tae noa’tu i te mau heheuraa a te Fatu, e ua haapii mai oia ia tatou i to tatou nei anotau i ta tatou ohipa no ni‘a i teie mau mea atoa.16
Te ahuraa ma te tano e te haapa‘oraa i te ture no te viivii ore
Eiaha te Feia Mo‘a i te Mau Mahana Hopea Nei e pee i te mau huru peu faanehenehe e te ahuraa tano ore o teie nei ao. E mau taata tatou no te Fatu. Te hinaaro nei oia ia ora tatou ma te mâ, e te viivii ore, ia tape‘a mâ noa i to tatou mau mana‘o e to tatou feruriraa, e ia haapa‘o maitai i te tahi atu mau faaueraa atoa na’na ra. No te aha tatou e pee ai i to te ao nei, no te aha aita ta tatou e nehenehe e ahu ma te tano, no te aha aita ta tatou e nehenehe e rave i te mau mea ta te Fatu e hinaaro ia rave tatou ?17
Ia haere au na ni‘a i te purumu no te haere i te fare no te mau piha toro‘a o te Ekalesia, e e ia ho‘i mai au, te ite nei au i te mau tamahine e te mau vahine, e rave rahi o ratou « e mau tamahine no te Ziona », i roto i te mau ahu au ore [a hi‘o Isaïa 3:16–24]. Te ite nei au e, te taui nei te tau e te peu faanehenehe… [Tera râ] aita te parau no te ahuraa au e te tura i taui… Ua faaite mai te mau Hui Mana Faatere Rahi i te mau faatureraa, ia ahu te mau vahine e te mau tane i te ahu ma te au maite e ti‘a ai. Ua haapiihia ratou i te peu maitai e te ahuraa i te ahu ma te au maite i te mau taime atoa.
I to’u mana‘oraa, e hoho‘a oto mau ia ahu ana‘e « te mau tamahine o Ziona » i te ahu au ore. Hau roa’tu i te reira, no te mau tane e te mau vahine teie parau. Ua horo‘a te Fatu i te mau faaueraa i to Iseraela i tahito ra e, titauhia i te mau tane e te mau vahine ia tapo‘i i to ratou tino e ia haapa‘o i te ture no te viivii ore i te mau taime atoa.
E reo taparu tei no te faaneheneheraa tano e te viivii ore, e i te mau melo atoa o te Ekalesia, te tane e te vahine, ia ora i te viivii ore, ia ora i te hoê oraraa mâ, e ia haapa‘o i te mau fafauraa e te mau faaueraa ta te Fatu i horo‘a mai ia tatou…
… E mana‘o paha tatou e, te ahuraa i te ahu au ore, e ohipa iti ha‘iha‘i roa ïa, are‘a râ, na te reira e iriti i te hoê mea i rapae i to tatou mau tamahine e aore râ, i to tatou mau tamaroa i roto i te Ekalesia. Na te reira atoa e faataupupu i te haapa‘oraa i te mau ture mure ore tei titauhia ia tatou paatoa ia haapa‘o mai te mea noa’tu, ua hinaaro tatou i te ho‘i faahou i mua i te aro o to tatou Metua i te ao ra.18
2
Te mau haamaitairaa i fafauhia i te feia haapa‘o maitai, e mau haamaitairaa ïa tei hau roa i te rahi i te mau faaanaanataeraa taime poto o to teie nei ao.
[I te hoê taime ua parau te hoê melo o te Ekalesia e,] aita oia e taa roa ra e, no te aha i titauhia ai ia’na ia aro itoito no te imi i te maitai no to’na oraraa, inaha, ua aufau ho‘i oia i ta’na tuhaa ahuru e ua haapa‘o i te Parau Paari, ua pure i to’na mau pure, e ua tamata i te haapa‘o i te mau faaueraa atoa ta te Fatu i horo‘a mai ia’na ; are‘a to’na hoa ra, noa’tu e, ua ofati oia i te ture no te mahana Sabati, e te feruri nei au e, ua puhipuhi i te avaava e ua inu i te ava ; ua fana‘o oia i ta teie nei ao e parau nei te taime au, e aita oia i tau‘a rii a‘e i te mau haapiiraa a to tatou Fatu e Faaora o Iesu Mesia, noa’tu râ i te reira, ua manuïa i to’na oraraa.
Ia ite mai outou e, e rave rahi to tatou mau melo no te Ekalesia o te feruri noa nei i te reira huru mana‘o e te uiui nei ratou e, no te aha. No te aha teie taata i farii ai i te mau mea maitai atoa o te fenua nei—e na reira atoa no te mau mea iino ta’na e mana‘o nei e, e mau mea maitai—are‘a no te mau melo e rave rahi o te Ekalesia, te tautoo nei ïa, e te rohi itoito nei no te tamata ia manuïa i roto i teie nei ao.
E mea ohie roa te pahonoraa. Ia haere rii au e mata‘ita‘i i te faahororaa popo, e aore râ, te ta‘iriraa popo, e aore râ, te tahi atu huru vahi faaoaoaraa, papû maitai e, e haatihia vau e te tane e te vahine puhipuhi avaava e aore râ, puhipuhi paipu pa‘o. E tae mai te fiu, e e fifi rii au. E fariu vau i ni‘a i te tuahine Smith ma te parau atu i te tahi parau ia’na, e e parau mai oia e, « Ua ite atura ïa oe i teie nei i te mea ta oe i haapii mai ia’u. Tei roto oe i to ratou ao. No ratou teie ao ». E na te reira e faaho‘i rii mai ia’u i ni‘a i to’u haro‘aro‘araa. Oia mau, tei roto tatou i to ratou ao, tera râ, aita i titauhia ia tatou ia riro no to ratou ao.
E, no te mea teie to ratou ao tei roto tatou i te oraraa, te manuïa ra ratou, tera râ, e au mau taea‘e e au mau tuahine maitai e, te tae mai nei te hopea o to ratou ao…
Te vai ra te mahana eita tatou e ite faahou i teie neiao. E tauihia te reira. E farii tatou i te hoê ao maitai a‘e. E farii tatou i te hoê ao parau-ti‘a, no te mea, ia haere mai te Mesia, e tamâ oia i te fenua nei.19
Mai te mea e, e imi itoito tatou, e pure tamau noa, e ti‘aturi, e e haere ma te parau-ti‘a, ua fafau mai te Fatu ia tatou e, e ohipa amui mai te mau mea atoa ei maitai no tatou [a hi‘o PH&PF 90:24]. E ere teie i te hoê fafauraa e, eita tatou e farerei i te mau tamataraa e te mau fifi o te oraraa, no te mea, ua faataahia teie oraraa tamataraa no te horo‘a mai i te iteraa e i te mau huru fifi e te pe‘ape‘a.
Aita te oraraa i faataahia ei taime ohie, ua fafau mai râ te Fatu e, e faariro oia i te mau tamataraa e te fifi atoa ei maitai no tatou. E horo‘a mai Oia ia tatou i te puai e te aravihi ia upooti‘a i ni‘a i teie nei ao e ia vai papû noa i roto i te faaroo noa’tu te mau pato‘iraa atoa. Ua fafauhia mai ia tatou e, e tupu te hau i roto i to tatou aau noa’tu te mau aehuehuraa e te mau ati o teie nei ao. Hau atu i te reira, ua fafauhia mai ia tatou e, ia hope ana‘e teie oraraa, e farii tatou i te hau mure ore i mua Ia’na, to’na ho‘i aro ta tatou i imi na, ta’na ho‘i mau ture ta tatou i haapa‘o na, e oia ho‘i ta tatou i faaoti e tavini atu.20
3
Mai te mea e, e tuu tatou i te basileia o te Atua i mua roa i roto i to tatou oraraa, e haa ïa tatou ei maramarama no to teie nei ao, e e faaite ïa tatou i te hi‘oraa maitai ia peehia e vetahi ê.
E au te Feia Mo‘a i te Mau Mahana Hopea Nei mai te hoê oire i faati‘ahia i ni‘a i te mou‘a o te ore e ti‘a ia hunahia, e mai te mori hinu e turama i te mau taata atoa i roto i te fare. E hopoi‘a na tatou ia vai anaana noa to tatou maramarama ei hi‘oraa no te parau-ti‘a, eiaha no te mau taata ana‘e i rotopu ia ratou tatou i te oraraa, no te mau taata atoa râ no te fenua taatoa. [A hi‘o Mataio 5:14–16.]21
Te hinaaro nei matou ia ite i te Feia Mo‘a i roto i te mau fenua atoa ia farii i te îraa o te mau haamaitairaa o te evanelia e ia ti‘a ei feia faatere pae varua i roto i to ratou mau fenua.22
E te mau taea‘e e te mau tuahine, e mata na tatou i te haapa‘o i te mau faaueraa a te Atua mai tei heheuhia mai. E mata na tatou i te faaite i te hi‘oraa maitai i mua i te taata o te fenua nei, e ia ite ho‘i ratou i ta tatou mau ohipa maitai ra, ei reira ratou e hinaaro ai e tatarahapa e e farii i te parau mau e e farii i te faanahoraa no te faaoraraa, ia roaa ho‘i ia ratou te faaoraraa i roto i te basileia tieretiera o te Atua.23
Te pure nei au ia ti‘a te Feia Mo‘a ma te papû i mua i te faaheporaa e i te mau umeraa a teie nei ao ; ia tuu ho‘i ratou na mua roa i roto i to ratou oraraa i te mau mea no te basileia o te Atua ; e ia haapa‘o maitai ratou i te mau ti‘aturiraa atoa e ia haapa‘o i te mau fafauraa atoa.
Te pure nei au no te feia apî e no te u‘i e ti‘a mai nei, ia ti‘a ia ratou ia tape‘a mâ noa i to ratou mau mana‘o e to ratou mau tino—ti‘amâ i te peu faufau, i te raau taero, e i te varua orurehau e te pato‘i i te peu maitai o te tu‘ino haere nei i te fenua.
E to matou Metua, a ninii mai oe i to oe Varua i ni‘a iho i ta oe mau tamarii, ia paruruhia ho‘i ratou i te mau ati o teie nei ao, e ia vai mâ noa ratou e te viivii ore, ia ti‘a ia ratou ia ho‘i faahou i mua i to oe aro e ia parahi i piha‘iho ia oe.
E ia vai mai ho‘i ta oe tia‘i faaherehere i ni‘a ia ratou atoa e imi nei i to oe aro, e o te haere nei i mua ia oe i roto i te paieti o to ratou varua, ia riro ho‘i ratou ei mau maramarama no to teie nei ao, ei mauhaa i roto i to rima no te faatupu i ta oe mau opuaraa i ni‘a i te fenua nei.24
Te mau mana‘o tauturu no te tuatapaparaa e te haapiiraa
Uiraa
-
Ia tai‘o outou « No roto mai i te oraraa o Joseph Fielding Smith », a feruri i te mau titauraa e farereihia nei e te feia apî i teie mahana aita ana‘e to ratou mau metua e aore râ, te mau ti‘a faatere paari i piha‘iho ia ratou. Eaha te ti‘a ia tatou ia rave no te tauturu i te feia apî ia vai haapa‘o maitai noa i roto i taua mau ohipa ra ?
-
Eaha te tahi mau haamaitairaa ta tatou e farii ia haapa‘o ana‘e tatou i te mau faaueraa i faahitihia i roto i te tuhaa 1 ?
-
Nahea e ti‘a ai ia outou ia faaohipa i te mau haapiiraa i roto i te tuhaa 2 no te tauturu i te hoê taata tei hahi i ni‘a i te mau mea o teie nei ao ? Nahea e itehia ai ia tatou « te hau i roto i to tatou aau noa’tu te mau aehuehuraa e te mau ati o teie nei ao » ?
-
Nahea to tatou hi‘oraa i te tauturu ia vetahi ê ia faaru‘e i te mau haerea o teie nei ao ? (A hi‘o i te tuhaa 3.) I nafea to outou iteraa i te mana o te hi‘oraa parau-ti‘a ? A feruri i te mea ta outou e nehenehe e rave no te faaite i te hoê hi‘oraa parau-ti‘a no to outou utuafare e no vetahi ê.
Te mau papa‘iraa mo‘a
Mataio 6:24 ; Mareko 8:34–36 ; Ioane 14:27 ; Philipi 2:14–15 ; Moroni 10:30, 32
Tauturu haapiiraa
« E nehenehe outou e faaite i te here i te feia o ta outou e haapii atu, na roto i te faaroo-maite-raa ia ratou e i te haafaufaaraa i to ratou oraraa. E mana to te here mai to te Mesia no te tamaruraa e no te tautururaa i te mau taata ia faaroo i te muhumuhuraa a te Varua » (Te Haapiiraa, Aita e Piiraa Teitei A‘e, [1999], 46).