Pene 1
To tatou Metua i te Ao ra
« Te hinaaro nei au e faahaamana‘o atu ia outou i te natura e i te huru o teie taata, o te Atua, ia ti‘a ho‘i ia outou ia haamori ia’na ma te varua e te parau mau, e na reira ho‘i, ia farii i te mau haamaitairaa atoa o ta’na evanelia ».
No roto mai i te oraraa o Joseph Fielding Smith
Ua faahiahia te peresideni Joseph Fielding Smith i te haereraa mua o te mau rave‘a aravihi o to’na tau. Te parau ra oia e, « E nuuraa rahi tei tupu i roto i te parau no te mau matini, te ihi himio (chimie) e te ihi tumu (physique), te tapuraa, e te tahi atu mau mea », « Ua hamani te taata i te hi‘o fenua puai tei faaite mai i te mau paraneta ite-ore-hia e te mata. Na roto i te tauturu o te hi‘o faarahi (microscope), ua itehia ia ratou te mau ao rarahi i roto i te mau mea rii ha‘iha‘i roa… Ua itehia ia ratou te mau rave‘a no te arai i te ma‘i… Ua hamani ratou i te mau matini hau atu te vanavana (sensibilité) i te vanavana o te rima taata, hau atu i te ite atea i te ite o te mata taata. Ua arai ratou i te mau mea o te natura, e ua hamani i te mau matini o te nehenehe e tura‘i i te mau mou‘a, e e rave rahi ana‘e atu â mau mea ta ratou i rave, eita e hope ia faahiti. Oia mau, e tau faahiahia mau teie ». Are‘a râ, ua mana‘ona‘o oia no te tahi atu peu ta’na i ite i roto i te ao nei. Ua oto oia i te mea e : « Aita teie mau ma‘imiraa atoa e teie mau mea i hamanihia no te haafatata atu i te taata i te Atua ra ! » Aita atoa i faatupu i roto i to ratou aau i te haehaa e i te varua o te tatarahapa, ua faatupu râ i to ratou faautu‘araa… Aita te faaroo i tupu i te rahi i roto i te ao nei, aita atoa te parau-ti‘a, aita atoa te haapa‘o i te Atua ».1
Taa ê noa’tu te tupuraa i te rahi o te tau‘a ore o te ao nei i te Atua, ua faaite te peresideni Smith i to’na vai fatataraa i to’na Metua i te Ao ra. Ua faahaamana‘o te hoê o ta’na mootua tamaroa e : « E vahine tunu maa maitai roa to’u mama, e e mea pinepine to’u papa ruau i te haere mai e tamaa i ô matou. E mea pinepine to’u papa i te ani ia’na ia haamaitai i te maa. Ua riro ta’na mau pure ei mau pure no roto roa mai i to’na aau—mai te huru e, te paraparau ra oia i te hoê hoa ».2
Te mau haapiiraa a Joseph Fielding Smith
1
Omuaraa na ni‘a i te orama matamua a Iosepha Semita, ua faaho‘ihia mai te iteraa mau no ni‘a i te Atua i to tatou nei anotau.
E mauruuru rahi to’u no te orama matamua, i reira ho‘i te Metua e te Tamaiti fâraa mai ai i te peropheta apî roa e ua faaho‘i faahou mai i te taata nei i te iteraa mau no ni‘a i te Atua.3
Na roto ia i te orama matamua a Iosepha Semita, ua faaho‘ihia mai « te iteraa mau no ni‘a i te Atua ».
E ti‘a ia haamana‘o e, ua mo‘e i te taatoaraa o te ao Keresetiano i te matahiti 1820, te haapiiraa tumu mau no ni‘a i te Atua. Te parau mau ohie roa tei ite-maramarama-hia e te mau aposetolo e te feia mo‘a i tahito ra, ua mo‘e ê ïa i roto i te mau parau ‘aro‘aro o te hoê ao taiva. Ua roaa i te mau peropheta atoa i tahito ra, e i te mau aposetolo a Iesu Mesia, te hoê iteraa maramarama e, e na taata taa ê te Metua e te Tamaiti, mai ta ta tatou mau papa‘iraa mo‘a e haapii maramarama mai nei. Na roto i te taivaraa ua mo‘e teie iteraa… Ua riro mai te Atua ei parau ‘aro‘aro, e ua faarirohia te Metua e te Tamaiti ei anaanaraa ite-ore-hia o te varua, aore e tino, aore e tuhaa, e aore e mana‘o. Na te taeraa mai o te Metua e te Tamaiti, i tuu i ni‘a i te ao nei i te hoê ite hanahana, o tei ti‘a, na roto i te ite, ia faaho‘i mai i te ao nei, i te huru mau o te Atua.4
Na te orama [matamua] o Iosepha Semita i faaite maramarama mai e, e na taata taa ê te tahi e te tahi te Metua e te Tamaiti, e e tino ho‘i to raua mai te au iho i to te taata nei te huru. I muri mai, ua heheuhia mai ia’na e, e taata Varua te Varua Maitai, tei taa ê i te tino o te Metua e te Tamaiti [a hi‘o PH&PF 130:22]. Ua maere to te ao i teie parau mau faufaa rahi ; e teie râ, ia hi‘o ana‘e tatou i te mau faahitiraa maramarama o te papa‘iraa mo‘a, e mea maere roa ïa e te fifi ho‘i ia feruri, ua roaa i te taata ia hahi ê roa. Na ô maira te Faaora e, « E rahi ho‘i tau Metua ia’u ; » [Ioane 14:28] e ua ani atura oia i ta’na mau pĭpĭ, i muri a‘e i to’na ti‘a-faahou-raa, ia fafa mai ia’na, e ia ite e, oia mau teie, i te mea e, na ô maira oia, « aita o te varua e i‘o e te ivi mai to’u nei ». [Luka 24:39.]Ua maramarama maitai i te mau aposetolo i te taa-ê-raa te Metua i te Tamaiti e i te Varua Maitai, ta ratou i faahiti tamau noa i roto i ta ratou mau episetole ; e ua faaara o Paulo i to Korinetia e, ia hope ho‘i te mau mea atoa i te tuuhia i raro a‘e i te Metua, « i raro atoa a‘e ïa te Tamaiti iho ia’na, i tei tuu i te mau mea atoa i raro a‘e ia’na ra, ia riro o te Atua i ni‘a iho i te mau mea atoa i te mau vahi atoa ra ». 1 Korinetia 15:28.]
Ua ite Iosepha Semita i te Metua e te Tamaiti ; no reira, ua ti‘a ia’na ia faaite papû na roto i to’na iho iteraa e, ua ti‘a te mau papa‘iraa mo‘a i reira ho‘i tatou e tai‘o ai e : « Hamani ihora ho‘i te Atua i te taata ma to’na ihora huru, i hamani oia ia’na ma te hoho‘a o te Atua ra ; i hamani oia ia raua, o te tane e te vahine ». [Genese 1:27.] Ia haro‘aro‘ahia teie mai tei papa‘ihia ra, eiaha râ i roto i te tahi mau auraa maere e aore râ, ei faahoho‘araa noa.5
2
No te faaite i te faaroo i te Atua e no te haamori Ia’na, titauhia ia tatou ia haro‘aro‘a i To’na mau huru.
Te faaite mai nei te hoê o ta tatou mau heheuraa ia tatou e, mai te mea e, e titauhia ia faahanahanahia tatou i roto i te Mesia, mai ia’na i roto i te Metua, e ti‘a ïa ia tatou ia haro‘aro‘a e ia ite e, nahea ia haamori, e eaha ta tatou e haamori. (A hi‘o PH&PF 93:19–20).
« Te hinaaro nei au e faahaamana‘o atu ia outou i te natura e i te huru o teie taata, o te Atua, ia ti‘a ho‘i ia outou ia haamori ia’na ma te varua e te parau mau, e na reira ho‘i, e farii i te mau haamaitairaa atoa o ta’na evanelia ».
Ua ite tatou e, na roto ana‘e i te heheuraa e itehia ai te Atua, e itehia oia, e aore râ, e vai ite-ore-hia oia e a muri noa’tu. Ia haere tatou i roto i te mau papa‘iraa mo‘a—eiaha i te aivanaa ra e aore râ, i te mau philotopho ra—mai te mea e, ua hinaaro tatou e haapii mai i te parau mau no ni‘a i te Atuaraa. Oia mau, te parau nei te tohuraa rahi a Ioane no ni‘a i te faaho‘iraa mai o te evanelia, na roto i te hoê melahi o te ma‘ue na roto i te reva e, e tupu mau te reira, ia ti‘a i te taata ia ite i te Atua mau ra e ia haapiihia : « A măta‘u i te Atua, e faahanahana’tu ia’na… e haamori outou ia’na, i tei hamani i te ra‘i, e te fenua, e te tai, e te mau pape pihaa ra ». (Apokalupo 14:7.) Te auraa ra, e haamata mai na ni‘a i te faaho‘iraa mai o te evanelia i roto i teie tau tuuraa, e pii-faahou-hia te taata ia haamori e ia tavini i to ratou Rahu Nui, eiaha râ i te mau haapiiraa hape no ni‘a i te Atuaraa o te ite-rahi-hia nei i roto i te ao nei.
I te mau anotau atoa ua titauhia te mau peropheta a te Fatu ia aro i te haamoriraa hape e ia poro i te parau mau no ni‘a i te Atua. I roto ia Iseraela i tahito ra, te vai ra te feia haamori i te mau faahoho‘araa e i te mau atua etene, e ua ui atura Isaïa e : « O vai ta outou e faafaito i te Atua ? e aore râ, eaha ta outou hoho‘a ia faaau ia’na ?
« Aita oe i ite ? aita oe i faaroo, e e parahiraa mure ore to te Atua, to Iehova, o tei hamani i te fenua e tae noa’tu i te hopea ra, e ore ho‘i oia e matapouri, e ore te rohirohi ? e to’na ite, e ore e noaa’tu ia titau ». (Isaïa 40:18, 28.)
E rave rahi to te ao nei aita i farii i teie iteraa no ni‘a i te Atua, e i roto roa atoa i [te Ekalesia] nei te vai ra o ratou o tei ore i haamaitai hope roa i to ratou haro‘aro‘araa i taua taata hanahana ra, oia ho‘i, to tatou Metua Mure ore. I te feia aore teie ite i roto ia ratou ra, e ti‘a ia tatou ia parau e : « Eaha oe i faaiti ai i te hanahana o te Atua ? E aore râ, eaha oe e mana‘o ai e, e iti a‘e oia i to’na ra huru ? Aita oe i ite ? Aita oe i faaroo, e e parahiraa mure ore to te Atua, to Iehova, o tei hamani i te fenua e tae noa’tu i te hopea ra, e huru mure ore to’na ; tei ia’na te mau mana’toa, te mau puai atoa, e te mau hau atoa ; ua ite oia i te mau mea atoa, e tei mua i to’na aro te mau mea atoa ra ? »
I roto i te tuhaa 20 o Te Parau Haapiiraa e te Mau Parau Fafau, tei faaue i te peropheta Iosepha Semita ia faati‘a faahou i te Ekalesia i roto i teie tau tuuraa, ua heheuhia mai ia tatou te hoê haapotoraa o te tahi o te mau haapiiraa no te faaoraraa. No ni‘a i te Atuaraa te na ô nei te heheuraa e : « … te vai nei te Atua i ni‘a i te ra‘i ra, e huru mure to’na, o te vai nei mai tahito mai â e a muri noa’tu o taua Atua huru-ê-ore ra oia, o tei faatumu i te ra‘i e te fenua hoi, e te mau mea atoa ho‘i o te vai nei i roto i taua na vahi ra ». (PH&PF 20:17.)…
O te Atua to tatou Metua ; i hamanihia te taata i to’na ra hoho‘a. E tino i‘o e te ivi to’na mai to te taata te huru (PH&PF 130:22), e o oia ho‘i te metua iho o te mau varua o te mau taata atoa. E mana hope e e ite hope to’na ; tei ia’na te mau mana atoa e te mau ite paari atoa ; to’na mau maitai hope ra, o te mauraa ïa oia i te mau ite atoa, te mau faaroo e aore râ, te mau mana atoa, te parau-ti‘a atoa, te mau haavâraa atoa, te mau aroha atoa, te mau parau mau atoa e te îraa o te mau huru atua atoa… Mai te mea e, e hinaaro tatou i taua faaroo maitai roa ra e ti‘a ai ia tatou ia tape‘a i te ora mure ore, e ti‘aturi ïa tatou i te Atua ei fatu no te îraa o teie mau huru e teie mau ti‘araa atoa. Te parau atoa nei au e, e taata hope ore e te mure ore oia, e mai te hoê taata taui ore ra, ua mau ia’na teie mau mana e mau huru ti‘a maitai roa ra, o te vai nei mai tahito mai â e a muri noa’tu, oia ho‘i, a muri e a muri noa’tu.6
Ua ite tatou e, e taata hanahana e te faateiteihia to tatou Metua i te Ao ra, tei ia’na te mau mana atoa, te mau puai atoa, e te mau hau atoa, e ua ite oia i te mau mea atoa. Te faaite papû nei tatou e, na roto i ta’na Tamaiti Fanau Tahi, na’na i hamani i teie fenua e i te mau ao numera-ore-hia.7
3
E taata iho te Atua e e Metua no to tatou varua.
E mau tamarii varua tatou na te Atua to tatou Metua i te Ao ra… E melo tatou no to’na utuafare… Ua noho na tatou i piha‘iho ia’na no te hoê tau maoro i roto i to tatou oraraa hou te tahuti nei… Ua opua oia i te hoê faanahoraa no te haereraa i mua e no te faaoraraa o te faati‘a ia tatou, mai te mea e, e mea haapa‘o e te haavare ore tatou i roto i te mau mea atoa, no te haere i mua e no te riro mai mai ia’na te huru.8
Ua haapiihia tatou i roto i te mau papa‘iraa mo‘a e, e Metua mure ore mau te Atua no tatou, e ere i te auraa parau noa. Te mau parau ta to tatou Faaora i parau atu ia Maria i piha‘iho i te menema na reira mai oia i te ti‘araa mai, e a noaa ai ia’na te rê i ni‘a i te pohe, e mau parau nehenehe ïa e tei î i te auraa hanahana : « Eiaha e tapea mai ia’u, aore â vau i tae i tau Metua ra : e haere râ oe i tau mau taea‘e ra, e parau atu ia ratou e, te haere nei au i tau Metua ra e to outou Metua ra, e i tau Atua ra e to outou Atua ra ». [Ioane 20:17.] Tei roto i teie mau parau i faahitihia ai te parau mau o te ti‘araa Metua o te Atua e ta’na Tamaiti fanau tahi, tei parau e, oia to tatou Taea‘e e hoê â to tatou Metua mure ore.9
Te oaoa nei au i te mea e, ua faaho‘ihia mai te iteraa no ni‘a i te Atua e ta’na mau ture i to tatou nei anotau, e o tatou te mau melo o te Ekalesia, ua ite tatou e, e taata iho oia eiaha râ mai ta te tahi mau taata e parau ra, « e haapu‘eraa [e haaputuraa huanane] o te mau ture i te pee-haere-raa mai te rupehu i roto i te ra‘i nui atea ». Te oaoa nei au i te mea e, ua ite tatou e, o oia to tatou Metua i te ra‘i ra, te Metua no to tatou varua, e na’na i haamau i te mau ture e ti‘a ai ia tatou ia haere i mua e ia riro mai mai ia’na ra te huru. E ua oaoa vau i te mea e, ua ite tatou e, e huru hopea ore, e e huru mure ore to’na, tei ite i te mau mea atoa, e tei ia’na te mau mana atoa, e to’na haereraa i mua, e ere ïa i te noaaraa te ite e aore râ, te mana hau atu, e ere i te haamaitairaa i to’na mau huru atua, i roto râ i te faarahiraa e i te faananearaa i to’na mau basileia.10
4
Ua here te Metua i te ao ia tatou e te mana‘ona‘o nei oia ia tatou tata‘itahi.
Haamana‘o atura vau i te hoê parau i roto i te Poe Tao‘a Rahi, i roto i te orama a Mose, tei horo‘ahia mai i te hoê taime a afa‘ihia ai o Mose i ni‘a i te hoê mou‘a teitei roa, e ua ite atura i te Atua, mata e mata, e ua paraparau ia’na. Ua faaite te Fatu ia Mose i te « ohipa a to’na rima », e ua ite o Mose i te ao, e i te mau tamarii atoa a te taata nei e tae roa’tu i te u‘i hopea. [A hi‘o Mose 1:1–8, 27–29.]
E na ô atura te Fatu ia Mose :
« E inaha hoi, e rave rahi te mau ao tei pau na roto i te parau o to’u ra mana. E rave rahi ho‘i te vai nei, aore e hope ia tai‘ohia e te taata, ua tai‘ohia râ te mau mea atoa e au nei, na’u ho‘i te reira, e ua ite au ia ratou.
« E i muri a‘era, ua parau atura Mose i te Fatu, na ô atura : E aroha mai i to tavini, e te Atua, e a faaite mai ia’u i te huru no teie nei ao, e te feia ho‘i e parahi i roto ra, e oia atoa i te mau ra‘i ra, e ei reira to tavini nei e mauruuru ai.
« E ua parau atura te Fatu te Atua ia Mose, na ô atura : E rave rahi te mau ra‘i, e ore te reira e hope ia tai‘ohia e te taata ; ua tai‘ohia râ te reira e au nei, na’u ho‘i taua mau mea atoa ra ». [Mose 1:35–37.]
… E tupu mai te mana‘o e, noa’tu te rahiraa ao e te aano rahi o te tahi pae e rave rahi, e rave‘a te reira no te hoê tumu, e ere râ i te hopearaa. Te hamani nei te Metua i te mau ao no te faaî i te taata—ma te tuu i ta’na mau tamaiti e ta’na mau tamahine i ni‘a iho. Ua faaitehia mai ia tatou i roto i te tuhaa 76 o Te Parau Haapiiraa e te Mau Parau Fafau e, na te Tamaiti a te Atua e na roto ia’na, « te mau ao e hamanihia nei, e i hamanihia na hoi, e te mau taata ho‘i no reira e mau tamaiti e e mau tamahine fanau ho‘i ratou no te Atua ra ». [PH&PF 76:24].
I roto i teie mau irava ta’u i tai‘o atu na, e i roto i te tahi atu mau heheuraa no ô mai i te Fatu ra, te haapii nei tatou e, o te taata te mea faufaa roa a‘e i roto i te mau mea atoa i hamanihia e to tatou Metua. I roto â i te orama tei horo‘ahia ia Mose, ua parau te Metua e : « E ia pau te hoê ao e to’na ra mau ra‘i, mai te reira atoa ïa te tae mai ; e aore e hopea to ta’u mau parau. Inaha, o teie ho‘i ta’u ohipa e to’u hanahana ho‘i—ia faatupu i te tahuti ore e te ora mure ore o te taata nei ». [Mose 1:38–39.]
Na roto i teie papa‘iraa mo‘a e i te tahi atu, te parau nei au e, te haapii mai nei tatou e, e te ohipa rahi a te Metua te faatupuraa i te faaoraraa o ta’na mau tamarii, ma te horo‘a ia ratou tata‘itahi i te utu‘a ia tano ia ratou, ia au i ta ratou mau ohipa. Ua papû maitai ia’u e, te mana‘ona‘o o to tatou Metua i te ao ra i te hoê varua—hoê o ta’na mau tamarii—ua rahi a‘e ïa i te ti‘a i te hoê metua i te tino nei i te mana‘ona‘o i te hoê o ta’na mau tamarii. Ua rahi a‘e to’na here ia tatou i te here o te hoê metua i te tino nei no ta’na mau tamarii.11
O Mose teie, hoho‘a mai te huru ra te hi‘o ra i te fenua i parauhia ra, ua farii i te hoê orama i roto i te reira ua haapii mai oia i te ohipa e te hanahana o te Atua.
5
Te oto nei te Metua i te Ao ra no ta’na mau tamarii haapa‘o ore.
Ua faaitehia mai ia tatou e, a paraparau ai te Fatu ia Enoha e a faaite atu ai ia’na i te mau nunaa o te fenua nei e a faataa atu ai ia’na i te huru o te faautu‘araa e topa mai i ni‘a ia ratou no to ratou ofatiraa i ta’na mau faaueraa, ua oto te Fatu e ua faaite mai i to’na pe‘ape‘a no to ratou haapa‘o ore. Na roto i te reira, ua maere Enoha e ua feruri e, e ohipa huru ê i te mea e, ua oto ho‘i te Fatu.
Teie te papa‘iraa :
« E i muri a‘era, ua hi‘o maira te Atua o te ra‘i i te toea o te mau taata, e oto ihora oia ; e ua faaite papû maira Enoha i te reira, i te na ôraa e ; Eaha ho‘i te mau ra‘i e oto ai, e e faatahe ai i to ratou roimata mai te ûa i ni‘a iho i te mau mou‘a ra ?
« E ua parau atura Enoha i te Fatu : Eaha ho‘i e tia‘i ia oe ia oto, no te mea e mea mo‘a oe, mai te tau mure ore e a muri noa’tu ?
« E ahiri e ti‘a i te taata ia tai‘o i te mau mea hu‘ahu‘a o te ao nei, oia ïa, i te mau ao e rave rahi milioni mai teie, e ere â ïa i te haamataraa o ta oe ra mau mea i hamanihia ; e te vai-faatoro-noa-hia’tura ta oe ra mau paruru, e tei reira â ïa oe, e tei reira atoa to ouma ; e ua ti‘a mau â ho‘i oe ; e te aroha ho‘i oe e te mărû e a muri noa’tu ». [A hi‘o Mose 7:28–30.]
E ua parau maira Iehova : «… A hi‘o i to mau taea‘e o ta’u ïa i hamani i to’u iho nei rima, e ua horo‘a vau ia ratou to ratou ite, i te mahana i hamani ai au ia ratou ; e i roto i te O i Edene i horo‘a’tu ai au i te taata to’na ti‘amâraa ;
« E ua parau atu vau i to mau taea‘e, e ua horo‘a atoa atu i te faaueraa ia aroha ratou ratou iho e ia ma‘iti ratou ia’u to ratou Metua ; area râ aore to ratou e aroha, e ua au ore ratou i to ratou iho ». [Mose 7:32–33.]
Teie te mau tumu i oto ai te Fatu e i oto ai to te ra‘i.
I te hoê taime ua ui mai te hoê taea‘e ia’u e, e hope anei te oaoa o te hoê taata i roto i te basileia tiretiera mai te mea e, aita hoê o ta’na mau tamarii e fariihia ia tomo i reira. Ua parau atura vau ia’na e, te mana‘o nei au e, te mau taata atoa o te tapu-ê-hia ta ratou mau tamarii i te basileia tiretiera, e mea papû maitai e, e oto roa ratou i taua huru ra ; tera ïa te ti‘araa o to tatou Metua i te Ao ra i teie nei. E ere te taatoaraa o ta’na mau tamarii o te farii i te hanahana tiretiera, e e rave rahi o te mauiui i to’na riri no ta ratou mau ofatiraa ture, e na te reira e faatupu i te pe‘ape‘a e te oto i roto i te Metua e i to te ra‘i taatoa. Te haa nei te Fatu ia au i te ture o te natura. E faaorahia te taata ia au i te ture, e ia niuhia ta’na utu‘a i ni‘a i te ture o te parau-ti‘a e ti‘a’i. Na roto i te reira, eita te Fatu e horo‘a i te taata nei i te mea e ore e ti‘a ia ratou ia farii, e faautu‘a râ oia i te mau taata atoa ia au i ta ratou mau ohipa
… Te oaoa nei au i te mea e, e faaora te Metua i te ao ra, mai te mea e nehenehe, i te mau taata atoa ma te horo‘a ho‘i ia ratou i te hanahana tiretiera, oia ho‘i, te îraa o te faateiteiraa. Tera râ, ua horo‘a oia i te taata i to’na ti‘amâraa, e tei raro a‘e te taata i te titauraa ia haapa‘o i te parau mau mai tei heheuhia mai, no te farii i te faateiteiraa o te feia parau-ti‘a.12
6
Ua horo‘a mai te Metua i te Ao ra i te e‘a faaora ia ti‘a ia tatou ia faaho‘ihia i mua i To’na aro.
A vai ai Adamu i roto i te O i Edene, tei mua oia i te aro o te Atua, to tatou Metua… I muri a‘e i to’na ti‘avaruraahia i rapae i te O i Edene ua taui te vahi. Ua tapu-ê-hia Adamu i te aro o te Metua no ta’na ofatiraa ture. Te parau ra te mau papa‘iraa mo‘a e, ua pohe oia i te pae varua—oia ho‘i, ua opanihia oia i rapae i te aro o te Atua.13
Ua ite au e, e Tamaiti Iesu Mesia na te Atua, e ua farii oia na roto mai i to’na Metua i te mana no te hoo faahou mai i te taata i te pohe varua e te pohe tino tei tae mai i te ao nei na roto i te hi‘araa o Adamu.14
Hoê ana‘e e‘a faaora, te e‘a ïa o te faatupu i te tataîraa, o te faaho‘i faahou te tino i te varua ra ; na roto ïa i te taraehara hope ore, e e ravehia te reira na te hoê taata hope ore, hoê e ere i raro a‘e i te mana o te pohe, e noa’tu râ, e taata tei mau i te mana ia pohe e tei mau atoa i te mana i ni‘a i te pohe. E no reira, ua tono mai to tatou Metua i te Ao ra i ta’na Tamaiti, o Iesu Mesia, i roto i te ao nei ma te ora i roto ia’na iho. No te mea ho‘i e toto to roto i te mau uaua o to’na [to Iesu Mesia] metua vahine, e mana ïa to’na no te pohe. Ua ti‘a ia’na ia horo‘a i to’na tino i te pohe e ia rave faahou mai. E tai‘o atu vau i ta’na iho mau parau : « I here mai ai tau Metua ia’u, o vau e horo‘a i to’u ora, e a rave faahou atu ai.
« Aore roa e taata e riro ai ia haru, na’u ihora e horo‘a noa’tu. E ti‘a ia’u ia horo‘a, e e ti‘a ho‘i ia’u ia rave faahou. O ta ta’u Metua ïa i faaue mai ia’u ». (Ioane 10:17–18.)15
Aita noa a‘e to tatou Metua i te ao ra i feruri e vaiiho noa i te taata ia imi i to ratou haerea i roto i te poiri ma te mori ore no te arata‘i, e ia titau ia ratou i roto i te reira huru ia imi i to ratou e‘a no te ho‘i mai i roto i to’na basileia e i mua i to’na aro mo‘a. E ere te reira i te raveraa a te Fatu. Mai mutaa iho mai ra te faaiteraa to tatou Metua i te ao ra i to’na maitai no ta’na mau tamarii, e ua hinaaro mau ia horo‘a i te avei‘a ia ratou. Mai te mau tau matamua a matara ai te mau ra‘i, ua tono mai te Fatu i te mau ve‘a mai mua mai i to’na aro, i te mau tavini i ma‘itihia, oia te mau taata tei mau i te mana o te autahu‘araa tei haamanahia no te haapii i te mau parau tumu o te Evanelia, no te faaara i te taata e no te haapii ia ratou i te parau-ti‘a ; e farii teie mau taata i teie iteraa, teie faaûruraa e teie arata‘iraa no ô mai i teie mau ve‘a mai mua mai i te aro o te Atua. Ua au atoa te reira no to tatou tau tuuraa. Aita e titauhia i te taata ia tapiri i to ratou mata no te ite noa e, aita e maramarama, mai te mea ra e, e nehenehe ta ratou e ti‘aturi i ni‘a i to ratou feruriraa, no te mea, ua hinaaro tamau noa te Fatu ia arata‘i, ia haapii e ia faaite i te e‘a. Mai ta’u i parau ra, ua tono mai oia i te mau ve‘a mai mua mai i to’na aro. Ua horo‘a mai oia i te heheuraa. Ua faaue mai oia ia papa‘ihia ta’na parau, ia nene‘ihia, ia ti‘a ho‘i i te mau taata atoa ia ite i te reira.16
Te parau nei au ia outou, e i to te Ekalesia taatoa, e e ere te reira ana‘e, te parau nei au i to te ao taatoa nei e, ua paraparau faahou mai te hoê Metua aroha e te here i teie mau mahana hopea nei mai te ra‘i mai i ta’na mau tavini peropheta.
Ua riro To’na reo ei reo pii i te mau taata atoa ia haere mai i ta’na Tamaiti Here ra, ia haapii mai roto mai ia’na, ia rave i to’na maitai, ia amo i ta’na tuto i ni‘a ia ratou e ia haa no to ratou faaoraraa na roto i te haapa‘oraa i te mau ture o ta’na evanelia. E reo hanahana e te tura to’na, e reo no te hau i roto i teie oraraa, e e reo no te ora mure ore i roto i te ao e tae mai.17
Te mau mana‘o tauturu no te tuatapaparaa e te haapiiraa
Uiraa
-
I to outou mana‘o, eaha te mea e arata‘i i te hoê taata ia pure i te Atua « mai te huru e, te paraparau ra oia i te hoê hoa » ? (« No roto mai i te oraraa o Joseph Fielding Smith ») A feruri i te mau rave‘a e ti‘a ai ia outou ia haapaari i to outou taamuraa i ni‘a i to outou Metua i te Ao ra.
-
Ua faaite te peresideni Smith i to’na mauruuru no te Orama matamua a Iosepha Semita, tei faaho‘i mai i « te iteraa mau no ni‘a i te Atua » (tuhaa 1). Eaha te tahi mau parau mau ta outou i ite no ni‘a i te Atua te Metua e ia Iesu Mesia na roto i te Orama Matamua ?
-
I roto i te mau huru o te Atua ta te peresideni Smith i faahiti i roto i te tuhaa 2, tei hea tei riro ei mea faufaa a‘e ia outou ? No te aha ? A faaite noa ai outou i te faaroo i roto i to outou Metua i te Ao ra, nahea te reira i te tauturu ia outou ia ite i To’na mau huru ?
-
Ua faaite papû te peresideni Smith e : « E mau tamarii varua tatou na te Atua to tatou Metua i te Ao ra… E melo tatou no to’na utuafare » (tuhaa 3). E mea nahea teie parau mau i te faaûruraa ia outou ?
-
I roto i te tuhaa 4 e te 5, eaha te mau faahitiraa parau e tauturu ia outou ia ite i te here o to outou Metua i te Ao ra no outou ? No te aha e mea faufaa ia ite e, ua here te Atua ia tatou e te mana‘ona‘o nei oia ia tatou tata‘itahi ? Nahea e ti‘a ai ia tatou ia tauturu i te mau melo o te utuafare e i te mau hoa ia putapu i To’na here ?
-
A feruri i te mau mea ta te Metua i te Ao ra i rave no te tauturu ia outou ia ho‘i i mua i To’na aro (a hi‘o i te tuhaa 6). Eaha to outou mau mana‘o ia feruri ana‘e outou i to te Metua i te Ao ra tonoraa mai i Ta’na Tamaiti Here ? E mea nahea to te Metua i te Ao ra tonoraa mai i « te mori no te arata‘i ia [outou] » ?
Te mau papa‘iraa mo‘a
Tauturu haapiiraa
« E rave rahi te mau haapiiraa e haapiihia nei i roto i te Ekalesia ma te huru etaeta mai te au i te hoê a‘oraa. Eita tatou e pahono maitai i te mau a‘oraa i roto i te mau piha haapiiraa. Te na reira nei tatou i roto i te pureraa oro‘a e i roto i te mau amuiraa, are‘a râ te haapiiraa, e piti ïa pae ia nehenehe ia outou ia ui i te mau uiraa. E nehenehe ta outou e tuu ohie noa i te mau uiraa i roto i te hoê piha haapiiraa » (Boyd K. Packer, « Principles of Teaching and Learning », Ensign, Tiunu 2007, 87).