Pene 25
Te fanauraa o Iesu Mesia : « E parau maitai… o te riro ïa ei oaoaraa »
« Eaha te parau no teie aamu maere ? Ua faati‘a anei tatou i te reira ia ô i roto i to tatou oraraa ma te faaûru mai ? Ua farii anei tatou i te reira i roto i to te reira auraa hopea e ma te oti‘a ore ? »
No roto mai i te oraraa o Joseph Fielding Smith
I te pu‘e tau Noela no te matahiti 1971, ua ti‘a i te hoê papa‘i ve‘a ia rave i te tahi taime i piha‘iho i te peresideni Joseph Fielding Smith e te mau melo o to’na utuafare. Ua faaite mai te papa‘i ve‘a i te tahi tuhaa iti no te oraraa o te peropheta :
« E taime taa ê te Noela no te peresideni Joseph Fielding Smith. E mahana ïa no te utuafare e e mahana no te haamana‘oraa. Hau atu râ, no te peresideni Smith, te Noela e mahana ïa no te mau tamarii.
« ‘Te mana‘o nei au e, te mea ta’u e au roa a‘e no ni‘a i te Noela, o te tamarii ïa’, te na reira ra te peresideni Smith, a tauahi mai ai oia i ta’na hina tamahine i piha‘iho ia’na.
« Te hoê Bibilia rahi i ni‘a i to’na na turi, ua hurihuri te peresideni Smith e e piti na hina tamahine ta’na, Shanna McConkie, 4 matahiti, e o Sherri, 2 matahiti, i te mau api o tei faaite mai i te parau no te fanauraa o te aiû Mesia. Maoro ratou i te faaea i ni‘a i te api o te hoho‘a o te vairaa maa. Mai te hoê fatataraa i rotopu i te peresideni Smith e te mau tamahine…
« Ua fana‘o te peresideni Smith e rave rahi taata tei haere mai e farerei i te utuafare i roto i te pu‘e tau Noela. ‘Te Noela, e taime ïa no te mau utuafare ia putuputu’, te na reira ra oia ».1
No te peresideni Smith, ua faatumuhia te mau peu Noela i ni‘a i te fanauraa, te taviniraa e te Taraehara o te Faaora. Ei pahonoraa i te mau parau faatau aroha no te Noela ta’na i farii na roto mai i te mau melo o te Ekalesia, ua parau oia e : « Te mauruuru nei au i te mana‘o maitai o te feia i hapono mai i te mau tareta Noela. Te faariro nei au i te reira ei faaiteraa no te here e ei haamana‘oraa i te fanauraa o te Faaora ta tatou ho‘i e faatura nei e e haamori nei ei upoo faatere no te Ekalesia. E poro‘i Ta’na no te hau e no te hinaaro maitai. Teie to’u hinaaro no to’u mau taata tupu i te mau vahi atoa ».2
I te ava‘e titema 1970, ua haaparare te peresideni Smith i te hoê parau poro‘i no te Noela i te mau melo o te Ekalesia na te ao atoa nei. Teie te tahi mau parau ta’na i parau :
« Te faatae atu nei au i te aroha ia outou i teie pu‘e tau Noela, i roto i te here e te autaea‘e, e ma te pure i te Metua Mure Ore ia hi‘o aroha mai Oia ia outou, e ia ninii mai i Ta’na mau haamaitairaa rahi i ni‘a ia outou.
« I teie anotau ino rahi, e te mau ati rahi i ni‘a i te fenua nei, e te mau tama‘i e te mau maniania tama‘i, tei roto tatou paatoa i te imiraa i te arata‘iraa e i te parururaa a te Fatu, aita â i itehia a‘enei.
« E ti‘a ia tatou ia ite e, noa’tu te mau fifi e te mau ati atoa ta tatou e faaruru nei, na te Fatu noa â e faatere nei i te mau ohipa o te fenua nei, e mai te mea e, e haapa‘o tatou i te mau faaueraa e e vai haavare ore e te haapa‘o i Ta’na mau ture, e haamaitai Oia ia tatou i ô nei e i teie nei, e e faautu‘a oia ia tatou i te ora mure ore i roto i To’na basileia i te taime mau ra…
« E i teie nei te pure nei au ia ti‘a ia tatou i teie pu‘e tau Noela, i te mau taime atoa, ia faatumu i to tatou faaroo i ni‘a i te Tamaiti e te Atua e ia roaa ia tatou taua hau ra o te hau atu i te haro‘aro‘araa ».3
Te aamu no te fanauraa o te Faaora, « eita te reira e tahito roa’tu e, e faahiti-pinepine-hia ».
Te mau haapiiraa a Joseph Fielding Smith
1
E mea nehenehe te aamu o te fanauraa o to tatou Faaora i roto i to’na haehaa rahi mau.
Aita e aamu nehenehe a‘e, e aore râ, aita e aamu o te haaputapû hohonu a‘e i te varua o tei haehaa, mai ta teie aamu hanahana e faatupu no ni‘a i te aamu o to tatou Faaora. Aore e ta‘o faahitihia e te taata e nehenehe e faaunauna e aore râ, e haamaitai atu e aore râ, e faarahi atu â i te nehenehe o to te reira haehaa rahi mau. Eita te reira e tahito noa’tu, e e faahiti-pinepine-hia, e e mea iti roa te taime e faahitihia te reira i roto i te mau utuafare o te taata. Tamata na tatou i te feruri ia tatou iho, tei rapae i piha‘iho i te mau tia‘i mamoe e te tia‘i ra i ta ratou nana i taua aru‘i rahi ra. E mau taata haehaa teie aore i mo‘ehia ia ratou te faaroo o to ratou hui metua, aita to ratou varua i etaeta mai to te mau haapii ture Ati Iuda i te anotau o te Fatu ra, e ore noa’tu te reira, eita ïa te mau melahi e fâ mai ia ratou e ta ratou parau poro‘i hanahana ra. E tai‘o faahou na tatou i teie aamu maere.
« E tiai mamoe tei taua fenua ra e ti‘a i roto i te mau aua, i te tia‘iraa i ta ratou mau nana i te mau araraa i te pô.
« E inaha, ua ti‘a maira te hoê melahi a te Fatu i piha‘i iho ia ratou, ua ati ihora ratou i te maramarama i te anaana o te Fatu, e rahi roa a‘era to ratou măta‘u.
« Ua parau maira râ te melahi ia ratou, eiaha e măta‘u inaha ho‘i e parau maitai ta’u e hopoi mai ia outou nei, o te riro ïa ei oaoaraa no te taata atoa.
« I na’u anei ho‘i i fanau ai te Ora no outou i te oire o Davida, oia ho‘i te Mesia ra o te Fatu.
« Teie ho‘i te tapa‘o e ite ai outou ia’na : e ite outou i taua tamaiti ra i te vai-noa-raa i roto i ta te puaa vairaa maa, ua vehihia i te ahu.
« E i reira ra atihia maira taua melahi ra e te hoê tiria rahi no te ra‘i i te haamaitairaa i te Atua, i te na ôraa e,
« Ia haamaitaihia te Atua i ni‘a i te ra‘i teitei, ei hau to teie nei ao, e ia ite auhia mai te taata nei.
« E reva’tura taua mau melahi ra i ni‘a i te ra‘i, ua parau ihora taua mau tiai mamoe ra ratou ratou iho, mai haere tatou i Bete-lehema e hi‘o i taua mea ra ta te Fatu i faaite mai ia tatou nei.
« Haere oi‘oi atura ratou e ite atura ia Maria raua o Iosepha, e i taua tamaiti iti ra i te vai-noa-raa i roto i te Phatene ». [Luka 2:8–16.]
E ti‘a anei i te hoê varua ia tai‘o i teie ma te ore e putapû i te varua haehaa e ia maere i te parau mau ohie o te aamu ?4
2
Noa’tu e, e Tamaiti Iesu Mesia na te Atua, ua haere mai Oia i roto i te ao nei mai te hoê aiû e ua haere noa mai te aroha i te aroha e tae noa’tu i te taime Oia i farii ai i te îraa.
I to’u mana‘o, ua maramarama tatou paatoa e, o Iesu Mesia ra, o Iehova ïa, tei arata‘i ia Iseraela i te anotau o Aberahama e o Mose, e tano roa ia parau e, mai te anotau mai o Adamu. Taua Iehova ra, e aore râ, Iesu Mesia, ua fâ atoa mai oia ei Varua i te taea‘e o Iareda, e ua fanau-aiû-hia mai i roto i teie ao e ua tupu i te paari i roto i teie nei ao.5
I to’na apîraa, ua roaa ia Iesu te ite, « te faaue na ni‘a iho i te faaue, te a‘o na ni‘a iho i te a‘o ».
E Atua to tatou Faaora hou a fanauhia mai ai oia i roto i teie ao, e ua ta‘ita‘i mai oia i taua ti‘araa ra i to’na haereraa mai i ô nei. E Atua oia i to’na fanauraahia mai i roto i te ao nei mai te au i to’na ra huru na mua ra. Tera râ, no teie oraraa, ua titauhia ia’na ia haamata mai te au i te taatoaraa o te tahi atu mau tamarii e ia farii i to’na ite, te faaue na ni‘a iho i te faaue. Te parau nei Luka e, « Tupu atura Iesu i te rahi e te paari, e te herehia mai e te Atua e te taata atoa ». [Luka 2:52.] Te papa‘i nei Ioane e, « E aore oia i farii i te îraa i te matamua, ua haere noa râ mai te aroha i te aroha, e tae noa’tu i te taime oia i farii ai i te îraa ». [PH&PF 93:13.]…
E mea papû maitai e, hou a ti‘a ai to’na matahiti i te 12—i taua ho‘i taime ra ua tupu te maere rahi i roto i te mau orometua e te mau taata paari i roto i te hiero—ua haapii oia i te mau mea e rave rahi no ni‘a i te ohipa a to’na Metua [a hi‘o Luka 2:46–49]. Ua nehenehe ihoa ïa i teie ite e tae mai ia’na na roto i te heheuraa, na roto i te fâraa mai te mau melahi, e aore râ, na roto i te tahi atu huru raveraa. Tera râ, i roto i teie oraraa, ua titauhia to’na ite ia tae te faaue na ni‘a iho i te faaue, te a‘o na ni‘a iho i te a‘o. Ua papû maitai e, i tera e tera taime, ua paraparau oia i to’na Metua i te Ao ra
… « Ua paari Iesu i piha‘i iho i to’na mau taea‘e, ua tupu i te puai, e ua tiaturi i te Atua no te taime e tae mai ai te taime no ta’na taviniraa. E ua tavini oia i raro a‘e i to’na metua, e aita oia i paraparau mai te tahi atu mau taata, e aita atoa e nehenehe e haapii ia’na ; no te mea, aita e titauhia ia haapiihia oia na te tahi atu taata. E rave rahi matahiti i muri a‘e, fatata maira ta’na tau ohiparaa ». [Iritiraa na Iosepha Semita, Mataio 3:24–26.]
Ua parau to tatou Fatu e, eita e ti‘a ia’na ia rave oia ana‘e ihora maori râ o ta’na i ite i te Metua i te raveraa ra ; te auraa ra, ua heheuhia mai ïa ia’na ta to’na Metua i rave ra [a hi‘o Ioane 5:19–20]. E mea papû maitai e, ua haere mai Iesu i roto i te ao nei ma te farii atoa i te mau titauraa i titauhia ia tatou tata‘itahi—ua mo‘ehia ia’na te mau mea atoa, e ua titauhia ia’na ia tupu i te paari mai te aroha i te aroha. Ta’na haamo‘eraa, e aore râ, te iriti-ê-raa-hia to’na ite tahito ra, e mea titauhia ïa, mai ia tatou tata‘itahi atoa nei, no te faati‘a hope roa i te oraraa tahuti o teie taime.
Aita te Faaora i farii i te îraa i te haamataraa, i muri a‘e râ i to’na fariiraa i to’na tino e i te ti‘a-faahou-raa, ua horo‘ahia maira ia’na te mau mana atoa i te ra‘i ra e i te fenua nei. Noa’tu e, e Atua oia, te Tamaiti iho na te Atua, ma te tura e te mana no te hamani i teie fenua e i te tahi atu mau fenua, te toe ra râ te tahi mau mea aita oia i farii e tae roa’tu i muri a‘e i to’na ti‘a-faahou-raa. Te auraa ra, aita oia i farii i te îraa e tae roa’tu i te taime a farii ai oia i te hoê tino ti‘afaahou.6
3
Ua haere mai Iesu Mesia i roto i te ao nei no te faaora ia tatou i te pohe tino e i te pohe varua.
Ua haere mai Iesu i ô nei no te faatupu i te hoê ohipa i faataahia na’na hou te faatumuraahia te fenua nei. Ua parauhia oia i roto i te mau papa‘iraa mo‘a mai « te Arenio i taparahihia ra mai te matamua mai â o teie nei ao ». [Apokalupo 13:8.] Ua ma‘iti oia ia haere mai, i te Afa ti‘a o te mau tau ra, no te faaora i te taata i te hi‘araa o te tae mai i ni‘a ia ratou na roto i te ofatiraa ture a Adamu
… O Iesu ana‘e te taata tei fanauhia i roto i teie ao aita to’na e metua tane tahuti. Te Metua o to’na tino, te Metua atoa ïa o to’na Varua, e te Metua o te mau varua o te mau taata atoa. Mai roto mai i to’na Metua tane ua roaa ia’na te ora mure ore ; mai roto mai i to’na metua vahine ua roaa ia’na te mana no te pohe, i te mea ho‘i, e vahine tahuti to’na metua vahine. Na roto i to’na metua vahine ua roaa ia’na to’na toto, e na roto i to’na Metua tane ua roaa ia’na to’na tahuti ore. No reira, na roto i to’na mana no te horo‘a i to’na ora e ia rave faahou, ua ti‘a ia’na ia aufau i te hoo o te ofatiraa ture a Adamu, e ia faaora i te mau taata atoa i te pohe.7
Te tumu mau i haere mai ai Iesu Mesia i roto i te ao nei… maori râ, a tahi, no te faaora i te mau taata atoa i te pohe tino e aore râ, i te pohe tahuti, ta Adamu i hopoi mai i roto i teie nei ao, e a piti, no te faaora i te mau taata atoa i te pohe varua e aore râ, i te ti‘avaruraa i mua i te aro o te Fatu, ma te titauraa ia tatarahapa ratou e ia matara ta ratou mau hara e ia haapa‘o noa e tae noa’tu i te hopea o te tamataraa tahuti nei.8
Te oaoa nei tatou i te fanauraa o te Tamaiti a te Atua i rotopu i te taata nei.
Te mauruuru nei tatou no te tusia taraehara ta’na i pûpû na roto i te haamaniiraa o To’na iho toto.
Te mauruuru nei tatou no To’na faaoraraa ia tatou i te pohe e te iritiraa i te uputa ia ti‘a ia tatou ia farii i te ora mure ore.
Te pure nei tatou ia vai te hau i ni‘a i te fenua nei, ia parare te evanelia, e ia upooti‘a te parau mau i te hopea.
Te ani haehaa nei matou i te mau tamarii a to tatou Metua i te mau vahi atoa ia amui mai ia matou no te rave i te mau mea e horo‘a mai i te hau ia tatou paatoa i roto i teie ao e i te hanahana mure ore i roto i te ao i muri nei [a hi‘o PH&PF 59:23].9
4
E vaiiho tatou i te aamu o te fanauraa o te Faaora ia tomo i roto i to tatou oraraa ma te faaûru mai.
Ia tae mai [te po‘ipo‘i Noela] e taupe te tahi pae i to ratou upoo i raro i roto i te taparuraa i te Metua o te mau Maramarama no te mau haamaitairaa ta ratou i farii na roto i te mau mamae o ta’na Tamaiti here, e e tai‘o ratou i te aamu nehenehe ma te mauruuru rahi. Te vahi oto râ, no te tahi pae, tei iti roa te ite, e aita roa’tu paha hoê iteraa, no ni‘a i ta ratou tarahu i te Tamaiti a te Atua, e faahanahana ratou, eiaha na roto i te arueraa e te pure haehaa, na roto râ te arearea i roto i te taero e te parau ino, ma te ore e feruri noa a‘e i te auraa o te fanauraa o te Taata no Galilea…
Nahea e nehenehe ai i te hoê taata ia tai‘o i teie aamu aroha o te fanauraa o Iesu Mesia ma te ore e hinaaro e faaru‘e i ta’na mau hara ? I teie pu‘e tau o te matahiti e mea maitai ïa no tatou paatoa—te arii i roto i to’na aorai, ia arii noa’tu i roto i te mau aorai nei, te taata faaapu i roto i to’na fare ha‘iha‘i, te taata tao‘a e te taata vĕvĕ—ia tuu i te turi i raro e ia faatura ia’na te taata hara ore, tei pûpû i to’na oraraa i roto i te tusia e te oto no te maitai o te mau taata atoa ; tei manii i to’na toto ei tusia no te hara…
Eaha te parau no teie aamu maere ? Ua faati‘a anei tatou i te reira ia ô i roto i to tatou oraraa ma te faaûru mai ? Ua farii anei tatou i te reira i roto i to te reira auraa hopea e ma te oti‘a ore ? Te ti‘aturi ra anei tatou e, teie aiû, o te Tamaiti fanautahi ïa a te Atua i te tino nei ? E faaroo tamau anei to tatou i roto i ta’na misoni, e e hinaaro anei to tatou ia pee ia’na ma te haapa‘o ? Ahiri te ao nei i ti‘aturi e i faaroo i ta’na mau haapiiraa, aita ïa e vai teie aroraa e teie ino rahi mai te tau e te tau… Ua rahi roa te parau vaha noa i rotopu i te mau taata e parau nei e, te pee nei ratou i te Tamaiti a te Atua, e mea iti roa tei haamori mau mai te au i te parau-ti‘a o ta’na mau haapiiraa.
Na ô atura te melahi i te mau tia‘i mamoe i taua aru‘i hanahana ra e, e parau maitai… o te riro ïa ei oaoaraa ta’na e hopoi mai nei no te mau taata atoa [a hi‘o Luka 2:8–10], tera râ, te rahiraa o te taata i te mau vahi atoa i ni‘a i te tino o te fenua nei, ua pato‘i ratou ia farii i te mau haamaitairaa o taua mau parau maitai ra. Aita ratou i hinaaro e faaru‘e i ta ratou mau hara, ia faahaehaa ia ratou e ia faaau i to ratou oraraa i ni‘a i te mau haapiiraa a te Fatu…
Te taparu faahou nei â vau i te mau taata atoa i te mau vahi atoa : A fariu ê atu i to outou mau haerea iino e a fariu mai i roto i te haamoriraa ti‘a i te Tamaiti a te Atua, ia faaorahia ho‘i to outou varua i roto i to’na ra basileia.10
Te mau mana‘o tauturu no te tuatapaparaa e te haapiiraa
Uiraa
-
Eaha ta outou e rave nei i roto i to outou utuafare no te haamana‘o i te Faaora i te pu‘e tau Noela ? Eaha ta tatou e nehenehe e apo mai na roto mai i te mau peu no te Noela a te peresideni Smith ? (A hi‘o « No roto mai i te oraraa o Joseph Fielding Smith ».)
-
I to outou mana‘o no te aha te aamu o te fanauraa o Iesu Mesia « eita te reira e tahito roa » ? (A hi‘o i te tuhaa 1.)
-
A tai‘o faahou i te mau parau a te peresideni Smith no ni‘a i te haereraa mai Iesu Mesia i te ao nei ei aiû e i te faaoroma‘iraa i te mau ati o te tahuti nei (a hi‘o i te tuhaa 2.) Eaha to outou mau mana‘o e te mau feruriraa ia feruri ana‘e outou i te hinaaro o te Faaora ia rave i te reira ?
-
A feruri na i te tu‘atiraa i rotopu i te fanauraa o te Faaora e i te Taraehara o te Faaora (a hi‘o i te tuhaa 3). Nahea e ti‘a ai i te mau metua ia tauturu i ta ratou mau tamarii ia noaa teie iteraa ? Nahea e ti‘a ai i teie iteraa ia faaûru i ta tatou mau peu matarohia no te Noela ?
-
Eaha te ti‘a ia tatou ia rave no te faati‘a i te aamu o te fanauraa o te Faaora « ia tomo i roto e ia faaûru i to tatou oraraa » ? (A hi‘o i te tuhaa 4.)
Te mau papa‘iraa mo‘a
Isaïa 53 ; Luka 1:26–35 ; 2 ; 1 Nephi 11:8–23
Tauturu haapiiraa
Na te mau aparauraa i roto i te mau pŭpŭ na‘ina‘i e « faafana‘o i te rahiraa o te mau piahi ia faaô i roto i te haapiiraa. Te feia e taiâ nei ia faaite i to ratou mana‘o i te taime haapiiraa, e nehenehe ratou e faaite atu i roto i te mau pŭpŭ iti, eita ïa ratou e haamâ ia faaite i to ratou mana‘o i mua i te taatoaraa » (Te Haapiiraa, Aita e Piiraa Teitei A‘e, [1999], 169).