Seminare ma Inisitituti
Lesona 11: Saunia mo le Faaipoipoga e Faavavau

Lesona 11

Saunia mo le Faaipoipoga e Faavavau

Folasaga

Ao ola le autalavou nofofua matutua i le talalelei a Iesu Keriso, e mafai ona latou tulimatai atu i le lumanai ma ola ai i o latou olaga ma le faamoemoe. O le a taialaina i latou e le Tama Faalelagi ia latou filifiliga e uiga i le faaipoipoga e faavavau ao latou saili le taitaiga mai ia te Ia. O lenei lesona o le a fesoasoani i tamaiti aoga e vaai atu i le faaipoipoga ma se mautinoa sili atu, i le iloaina e mafai ona latou maua le fesoasoani paia mai le Alii.

Faitauga Faaopoopo

Fautuaga mo le Aoaoina Atu

Mataupu Faavae ma Feagaiga 88:40

Saunia mo le faaipoipoga

Fesili i tamaiti aoga e sii mai o latou lima pe afai ua latou fatuina se lisi o uiga o loo latou sailia mo se toalua i le lumanai. Valaaulia ni nai tamaiti aoga e faasoa mai nisi o uiga i a latou lisi.

Faaali atu le saunoaga lenei a Elder David A. Bednar o le Korama a Aposetolo e Toasefululua, ma valaaulia se tamaitiiti aoga e faitau leotele:

Elder David A. Bednar

“O nisi o tagata talavou e foliga mai e i ai se lisi o faatau o uiga latou te mananao ia maua e se soa ma fuaina lo latou malosiaga: ‘Pe o ia te oe mea uma ou te manaomia?’ Afai e te faamoemoe ia maua se soa e faavavau o loo i ai ni uiga faaleagaga faapitoa, ona tatau lea ona e tauivi e atiina ae na uiga faaleagaga ia te oe lava ia. Ona tosina mai lea o se tasi o loo i ai na uiga ia te oe” (“Understanding Heavenly Father’s Plan,” LDS.org).

  • O le a le mataupu faavae tatou te aoaoina mai le saunoaga a Elder Bednar? (Ia mautinoa ua faailoa mai e tamaiti aoga le mataupu faavae lenei: “Afai e te faamoemoe e maua se soa faavavau o loo i ai ni uiga faaleagaga faapitoa, ona tatau lea ona e tauivi e atiina ae na uiga faaleagaga ia te oe lava ia.”

Fai i tamaiti aoga e faitau le Mataupu Faavae ma Feagaiga 88:40, ma vaavaai pe faapefea e lenei fuaiupu ona lagolagoina le mataupu faavae faatoa uma ona faailoaina.

  • E mafai faapefea e tagata o loo naunau e faaipoipo ona faaaoga upumoni ua faamaumauina i lenei fuaiupu?

  • Ua faapefea ona e vaai i upumoni i nei fuaiupu o faaaoga i filifiliga ua faia e tagata talavou e uiga ia latou uo?

Fesili i tamaiti aoga e mafaufau i uiga latou te mananao ia vaaia i o latou toalua i le lumanai. Valaaulia tamaiti aoga e mafaufau pe o latou mauaina na lava uiga e tasi. Fai ia i latou e mafaufau i le ala e mafai ona latou faaaogaina ai mataupu faavae i le Mataupu Faavae ma Feagaiga 88:40

Mareko 5:35–36; Mataupu Faavae ma Feagaiga 6:36

“Aua e te matau, tau lava ina e faatuatua”

Fesili atu i tamaiti aoga:

  • O a mea ua e tulimatai atu i ai e uiga i le faaipoipoga?

  • O a nisi o mea e mafai ona fefefe ai tagata talavou e faaipoipo? (Lisi tali i le laupapa.)

Valaaulia se tamaitiiti aoga e faitau leotele le saunoaga lenei a Jeffrey R. Holland o le Korama a Aposetolo e Toasefululua, ma fai i le vasega e faalogo mo mafuaaga e fefefe ai nisi tagata talavou e faaipoipo.

Elder Jeffrey R. Holland

“I tulaga matuia [o tagata talavou] e fefefe faapea o le a faaiuina le lalolagi i le toto ma faigata—o se mea lea latou te le mananao e oo i ai se toalua po o se tamaitiiti. I ni tulaga e itiiti le afaina, ma e sili atu le taatele, latou te fefefe o le a sili atu le faigata o le lalolagi, o le a sili atu le faigata ona maua ni galuega, ma o se tasi e tatau ona uma le aoga, leai ni aitalafu, maua se galuega, ma umiaina se fale ae lei mafaufau i le faaipoipoga. …

“Ma le isi, ua matuai toatele tagata talavou ou te talanoa i ai e fefefe afai latou te faaipoipo o le a avea i latou o se isi faaipoipoga tatala faamaumauina. … Tuufaatasi lena fefe e uiga i le faamanuiaina o se faaipoipoga ma le ulagia pepelo, palapala, ma e masani ona faatiapolo o le ola mama ma le faamaoni o le olaga faaleaiga lea e masani ona faaalia i tifaga ma televise ma e vaaia ai le faafitauli” (“Be Not Afraid, Only Believe” [afiafi faatasi ma Elder Jeffrey R. Holland, Fep. 6, 2015], lds.org/broadcasts).

  • E toafia outou e iloa se tasi e fefe e faaipoipo ona o se tasi o mafuaaga na taua e Elder Holland?

Valaaulia tamaiti aoga e faitau le Mataupu Faavae ma Feagaiga 6:36 ma mafaufau pe faapefea e le fautuaga a le Alii ia Oliva Kaotui ona faaaoga i le saunia mo le faaipoipoga e faavavau. Ona valaaulia lea o se tamaitiiti aoga e faitau leotele le Mareko 5:35-36. Faamatala atu o Iairo, le pule o le sunako, na sau ia Iesu ma le faamoemoe o le a Ia faamaloloina lona afafine. Fai i le vasega e mafaufau pe faapefea e le faamalosiau a le Faaola ia Iairo ona mafai ona tatou faaaogaina ia i latou o loo saunia mo le faaipoipoga.

  • E mafai faapefea e le vaai atu i le Alii “i manatu uma” ona fesoasoani ia i tatou ia “le masalosalo, le fefe” ao tatou mafaufau i lo tatou lumanai?

  • E mafai faapefea e le fautuaga a le Alii ia Oliva Kaotui ma Iairo ona fesoasoani i tagata o loo fefefe e faaipoipo? (Ao tali mai tamaiti aoga, tusi le mataupu faavae lenei i le laupapa: Ao tatou vaai atu ia Iesu Keriso i le faatuatua, e mafai ona tatou faatoilaloina le fefe ma maua le mautinoa i le lumanai. )

Faasoa atu le faamatalaga lenei mai ia Elder Jeffrey R. Holland. Fai i le vasega e faalogo mo le mafuaaga na manaomia ai e Elder ma Sister Holland le faatuatua e filifili ai e faaipoipo ina ua la faaipoipo.

Elder Jeffrey R. Holland

“Ina ua ma faaipoipo [ma Sister Holland] sa ma aooga uma i le BYU, e leai ni matua e mafai ona fesoasoani ia i maua i mea tautupe, e leai se auala e vaai faalemafaufau ai i le aoga ina ia faauu o loo i luma atu o maua, ma le $300 le ma tupe i le aso o le ma faaipoipoga! Atonu e le o se auala tonu lea e amata ai se faaipoipoga, ae oka se faaipoipoga na i ai ma mea semanu ma te misia pe ana faapea ma te faatali e tusa lava po o se aso se tasi na i lo le mea na ma faia i le taimi lava na ma iloa ai o lena faaipoipoga ua sao. … Ou te tetete pe a mafaufau i mea semanu ma te misia pe ana faapea ma te ‘usitai atu i lo ma fefefe,’ e pei ona tau mai e Peresitene James E. Faust ia te au pea lava pea lava pea faapea ua na o au ae leai lava se tasi e mafai ona faia” (“Be Not Afraid, Only Believe”).

  • E faapefea ona tutusa le tulaga o Elder ma Sister Holland ma le tulaga o le toatele o tagata talavou i aso nei?

  • O le a le uiga o le usitai i mea tatou te fefefe ai? Aisea e leaga ai lenei auala e fai ai filifiliga?

Valaaulia se tamaitiiti aoga e faitau leotele lenei molimau ma le folafolaga mai ia Peresitene Thomas S. Monson:

Peresitene Thomas S. Monson

“Ou uso e ma tuafafine pele, aua tou te fefefe. Ia outou lototetele. E i ai le faamoemoe i le lumanai, pei foi o o outou faatuatua” (“Ia Outou Lototetele,” Ensign po o le Liahona, Me 2009, 92).

  • O a ni manatu ma lagona e uiga i le lumanai ua e maua ao e mafaufau loloto i lenei uunaiga faaperofeta

Fesoasoani i tamaiti aoga e mafaufau pe faapefea ona latou faaaogaina lenei vaega o le lesona i le fesili atu ia i latou e mafaufau pe o latou fefefe e faaipoipo. Valaaulia i latou e mafaufau loloto pe faapefea ona latou ono suia soo se fefe e uiga i le lumanai i le faatuatua i le Alii.

Mataupu Faavae ma Feagaiga 6:22–23; 8:2–3; 9:7–9; 11:12–14

Sailia o le taitaiga paia i le filifiliga po o ai e faaipoipo i ai

Faaali atu le faamatalaga lenei mai ia Peresitene Gordon B. Hinckley (1910–2008), ma fai atu i se tamaitiiti aoga e faitau leotele:

Peresitene Gordon B. Hinckley

“O le filifiliga aupito sili lea ona taua i lou olaga, o le filifilia lea o le tagata e te faaipoipo i ai. E leai se mea e suia ai le faaipoipoga i le malumalu. … Faaipoipo i le tagata sao i le nofoaga sao ma le taimi sao” (“Matafaioi o le Olaga,” Liahona, Me 1999, 2).

  • E mafai faapefea ona e faia ia sao lenei filifiliga e sili ona taua e uiga i le tagata e tatau ona faaipoipo i ai?

Vaevae le vasega i ni paga. Tofi paga taitoatasi e faitau fuaitau o mau nei faatasi: Mataupu Faavae ma Feagaiga 6:22–23; 8:2–3; 9:7–9; 11:12–14. (O nei fuaiupu o ni faataitaiga o le autu e tupu soo pe faapefea ona maua faaaliga faaletagata, lea e maua i le tele o vaega muamua o le Mataupu Faavae ma Feagaiga. “O autu e taua, e ta’ua soo, ma o ni uiga po o manatu e tutusa” [David A. Bednar, “A Reservoir of Living Water” (Faigalotu o le Iunivesite a Polika Iaga, Fep. 4, 2007), 6, speeches.byu.edu].)

Fai i tamaiti aoga e mafaufau i le vaaiga lenei ao latou suesueina fuaiupu mai le Mataupu Faavae ma Feagaiga: Vaai faalemafaufau faapea o lau uo o loo tafafao faamasani mo se tami ma e sau ia te oe mo se fautuaga pe tatau ona ia faaipoipo i lena tagata. O le a sau fautuaga i lau uo i le mea e fai?

A uma se taimi e suesue ai tamaiti aoga i mau, fai i se tamaitiiti aoga se toatasi o paga taitasi e faatino le vaega o le uo lea o loo tafao faamasani. Fai i le isi tamaitiiti aoga o paga taitasi e faamatala mai pe faapefea e nei fuaiupu ona mafai ona fesoasoani i le uo ia faia ai se filifiliga. A uma lenei gaoioiga, ia mautinoa ua malamalama tamaiti aoga i mataupu faavae nei e uiga i le faiga o filifiliga: E tatau ona tatou “suesue i ai” i o tatou mafaufau, fai le filifiliga sili e mafai ona tatou faia, ona fesili lea i le Atua pe ua sao le filifiliga. Ona, afai e oo mai le filemu ma le olioli i o tatou loto ma mafaufau, ua lelei le filifiliga. Faamamafa atu le mataupu faavae lenei: Ao tatou saili le taitaiga a le Alii ao tatou faia a tatou filifiliga, o le a Ia fetalai mai i o tatou mafaufau ma faatumuina o latou agaga i le filemu ma le olioli pe a sao a tatou filifiliga.

  • Na faapefea ona e iloa le moni o mea ua aoaoina mai e nei fuaiupu e uiga i le mauaina o faaaliga patino?

Fai i tamaiti aoga e mafaufau pe faapefea ona latou tali atu i le vaaiga lenei: o le tagata sa e tafao faamasani i ai ua faamatala mai faapea na ia mulimuli i lenei faagasologa mo le faia o filifiliga ma ua maua se uunaiga faapea o oulua uma ua tatau ona faaipoipo.

Faaali atu le saunoaga lenei a Elder Dallin H. Oaks o le Korama a Aposetolo e Toasefululua, ma fai i se tamaitiiti aoga e faitau leotele:

Elder Dallin H. Oaks

“Ua ou faalogo i ni tulaga ua tau atu ai e le alii talavou i se tamaitai talavou ua tatau ona ia faaipoipo ia te ia ona ua ia maua se faaaliga o ia e tatau ona avea ma ana soa faavavau. Afai e moni lenei faaaliga, o le a faamautinoa sao lava i le tamaitai pe afai na te saili ia iloa. Ao le taimi lea, e le tatau lava ona ia faalogo atu i lena faaaliga. E tatau ona ia saili atu lana lava taitaiga ma fai lana lava filifiliga. E mafai ona maua e le alii le faaaliga e taitaia ai ana lava faatinoga, ae e le mafai ona ia maua se faaaliga sao e taitaia ai le tamaitai. O le tamaitai o loo i tua atu o lana tausimea” (“Revelation” [Faigalotu a le Brigham Young University, Set. 29, 1981], 6, speeches.byu.edu).

Molimau atu o tamaiti aoga o le a lagona le filemu ao latou tulimatai atu i le faaipoipoga e faavavau ma le faatuatua tele. Uunaia i latou e faaaoga mataupu faavae na talanoaina i lenei lesona e saunia ai mo le avanoa mamalu o le faaipoipoga e faavavau.

Faitauga a Tamaiti Aoga