O le tapuai i malumalu paia ua saunia ai i tatou ia avea atili ma soo o Iesu Keriso, ma ua “mafai i sauniga paia ma feagaiga ua maua [iina] ona toe foi atu ai tagata taitoatasi i le afioaga o le Atua” “O le Aiga: O se Folafolaga i le Lalolagi,” Ensign po o le Liahona, Nov. 2010, 129). Na uunaia e Peresitene Howard W. Hunter (1907–95) tagata o le Ekalesia ia faia malumalu ma “le faatusa sili o lo latou auai i le ekalesia” (“The Great Symbol of Our Membership,” Ensign, Nov. 1994, 2). I lenei lesona o le a aoao ai tamaiti aoga i auala e faaoaina ai lo latou tapuai i le malumalu, ona aumaia ai lea o faamanuiaga e sili atu i olaga o o latou aiga.
Faitauga Faaopoopo
Richard G. Scott, “Tapuaiga i le Malumalu: O Le Punavai i le Malosi ma le Mana i Taimi o Faigata,”Ensign po o le Liahona, Me 2009, 43–45.
L. Lionel Kendrick, “Faaleleia o o Tatou Aafiaga Faalemalumalusa,” Liahona, Iulai 2001, 94–96.
Saunia e Ulufale Atu i le Malumalu Paia (tamaitusi, 2002).
Faaali atu se ata o le malumalu e sili ona lata ane i lou aiga. Faasino atu o le fuaitau E Paia i le Alii ua vaneina i fafo o malumalu taitasi. Valaaulia tamaiti aoga e faitau le Ioane 2:13-16 ma mafaufau pe faapefea e lenei faamatalaga ona faaalia ai le natura paia o malumalu.
Ua mafai faapefea e lenei faamatalaga ona faaalia le uiga faaalia e tatau ona tatou maua i malumalu?
O a auala ua mafai ai e tagata i aso nei ona faaalia le le faaaloalo mo malumalu?
O le a se mataupu faavae e mafai ona tatou aoaoina mai i lenei fuaiupu? (O tali a tamaiti aoga e tatau ona aofia ai lenei mataupu faavae: Ua poloai mai le Atua e leai se mea eleelea e mafai ona faatagaina e ulufale atu i Lona maota. Faasino atu o totonu o tusitusiga paia, o malumalu e faaalia mai pea o ni nofoaga paia, mama aiai, paia atoatoa, ma agavaa. E mafai ona e uunaia tamaiti aoga e vaavaai mo lenei sootaga pe a latou faitau e uiga i malumalu.)
O a nisi o tulaga faatauaina o le agavaa e tatau ona maua e tagata ae latou te lei ulufale atu i le malumalu?
Tuu atu i tamaiti aoga ni nai minute e suesue ai le Mataupu Faavae ma Feagaiga 109:10–13, 21–22, ma le Salamo 24:3–5 ma faailoa mai faamanuiaga e fesootai ma le tapuai i le malumalu ma le agavaa. Atonu e te fautuaina tamaiti aoga e faailoga mea latou te mauaina.
O a folafolaga ua tuuina mai e nei fuaiupu ia i latou e ulufale atu i le malumalu ma le agavaa? (O le mamalu o le Alii o le a i ai i luga o Ona tagata; o i latou e ulufale atu i le malumalu o le a lagona le mana ma le malamalama o le Alii faapea o se nofoaga ua faapaiaina ma paia; i totonu o malumalu, o le a tuuina mai ai e le Alii Lona suafa i o tatou luga, ma o le a tatou tuua ua faaofuina i Lona mana; ma o totonu o malumalu e mafai ai ona tatou maua faamanuiaga ma le amiotonu mai le Alii.)
Aisea e te manatu ai o nei folafolaga e faalagolago i lo tatou agavaa?
O le a sau tala i se tasi o loo taumanatunatu pe o le agavaa mo se pepa faataga o le malumalu e aoga ai le taumafaiga?
Valaaulia se tamaitiiti aoga e faitau leotele le saunoaga lenei mai ia Peresitene Thomas S. Monson:
Ata
Peresitene Thomas S. Monson
“O i latou o ē malamalama i faamanuiaga e faavavau e maua mai i le malumalu, ua latou iloa e leai se taulaga e telē naua, leai se tau ua mamafa tele, leai se tauiviga ua faigata naua ia maua ai na faamanuiaga. … Latou te malamalama o sauniga faaola e maua i le malumalu e mafai ai i se aso ona tatou toe foi atu i lo tatou Tama Faalelagi i se mafutaga faaleaiga e faavavau, ma faaeeina ai i faamanuiaga ma le mana mai luga, e matuai aoga ai lava a tatou osigataulaga uma ma taumafaiga uma” (“O Le Malumalu Paia—O Se Sulu Taiala i le Lalolagi,” Ensign po o le Liahona, Me 2011, 92).
O a faamanuiaga ua e maua ao e auai i sauniga o le malumalu?
Uunaia tamaiti aoga ia maua ma tausia se pepa faataga aoga mo le vaega o totoe o o latou olaga. Faamamafa atu faapea ao latou tapuai ma le lotomaualalo i le Alii i Lona malumalu, o le a latou maua faamanuiaga e pau le mea e mafai ona maua ai mo e faatuatua o totonu o Lona maota paia.
Tusi le mea lenei i le laupapa ma fesili i tamaiti aoga pe faapefea ona latou faaumaina le fuaiupu:
O mea tatou te maua mai le malumalu o le a faalagolago i .
A maea ni nai tali, faaali atu le saunoaga lenei a Peresitene Boyd K. Packer o le Korama a Aposetolo e Toasefululua:
Ata
Peresitene Boyd K. Packer
“O mea tatou te maua mai le malumalu o le a faalagolago tele lava i mea tatou te ave i le malumalu i le auala o le lotomaualalo ma le migao ma se manao e aoao. Afai tatou te saunia e aoao o le a aoaoina i tatou e le Agaga, i le malumalu” (O le Malumalu Paia [1980], 42).
E faapefea i lou manatu ona faalagolago lou aafiaga i le malumalu pe afai na e malaga atu ma se agaga o le “lotomaualalo ma le migao ma se manao e aoao”? (Ao tali mai tamaiti aoga, tusi le mataupu faavae lenei i le laupapa: Afai tatou te o i le malumalu ma le agamaualalo, migao, ma se manao e aoao, o le a aoaoina i tatou e le Agaga.)
Faamatala i tamaiti aoga faapea ina ua asiasi atu le Faaola i sa Nifae, na Ia aoaoina i latou i se mamanu mo le malamalama i mea paia e mafai ona tatou mulimuli ai pe a tatou auai i le malumalu. Valaaulia se tamaitiiti aoga e faitau leotele le 3 Nifae 17:1-3.
O le a le mea na aoao atu e le Faaola i Ona tagata na faalogologo e fai ina ia fesoasoani ia i latou e saunia ia malamalama ai i mea paia?
E mafai faapefea ona tatou mulimuli i lenei mamanu ina ia faaleleia le malosi o a tatou aafiaga i le malumalu? (E tatau ona tatou mafaufau loloto i aafiaga tatou te maua i le malumalu, tatalo mo le malamalama, saunia e auai i le isi taimi, ma toe foi mai i le tele lava o taimi e mafai ai.)
Faitau leotele le saunoaga lenei a Elder L. Lionel Kendrick o le Fitugafulu, ma fai i tamaiti aoga e faalogo mo fuaitau na e fautuaina ai auala e mafai ona tatou faaleleia ai la tatou tapuai i le malumalu.
Ata
Elder L. Lionel Kendrick
“O loo i ai se eseesega i le na ona auai atu i le malumalu ma le i ai o se aafiaga tamaoaiga faaleagaga. O faamanuiaga moni o le malumalu e oo mai pe a tatou faaleleia atili o tatou aafiaga faalemalumalu. O le faia o lea tulaga, e tatau ona tatou lagonaina se agaga o le faaaloalo i le malumalu ma se agaga o tapuaiga. …
“O le faaaloalo e le na ona filemu. E aofia ai le malamalama i le mea o loo fai. E aofia ai se naunautaiga paia ina ia aoao ma taliaina musumusuga a le Agaga. E aofia ai le taumafai e sailia le malamalama ma le poto faaopoopo. O le le faaaloalao e le gata o se aga le migao i le Atua, ae e le mafai ai foi e le Agaga ona aoaoina i tatou i mea e tatau ona tatou iloa” (“Faaleleia o o Tatou Aafiaga Faalemalumalu,” Liahona, Iulai 2001, 95).
O a fuaitau i lenei saunoaga e sili ona taua ia te oe? Aisea?
Faitau le fautuaga lenei mai ia Elder Richard G. Scott o le Korama a Aposetolo e Toasefululua, ma fai i tamaiti aoga e faalogo mo fautuaga e mafai ona latou faaaoga ao latou asiasi atu i le malumalu:
Ata
Elder Richard G. Scott
“• Malamalama i aoaoga faavae e faatatau i sauniga o le malumalu, aemaise i le taua o le Togiola a Iesu Keriso.
“• Ao e auai atu i sauniga o le malumalu ia mafaufau i lo lua va ma Iesu Keriso ma Lona va ma lo tatou Tama Faalelagi. O lenei gaoioiga faatauvaa o le a maua ai se malamalamaaga sili atu i le natura faalelagi o sauniga o le malumalu.
“• Ia faaali atu i taimi uma ma le agaga tatalo le lotofaafetai mo faamanuiaga e le mafaatusalia o loo maua mai i sauniga o le malumalu. Ia ola i aso taitasi e pei o loo e tuuina atu se faamaoniga i le Tama oi le Lagi ma Lona Alo Pele i le matua taua o na faamanuiaga ia te oe.
“• Faatulaga ni malaga fai soo i le malumalu.
“• Ia faaavanoa se taimi ia lava ina ia le faanatinati ai i totonu o puipui o le malumalu.
“• Ia fesuisuiai gaoioiga ina ia mafai ona e auai i sauniga uma o le malumalu.
“• Aveese lau uati pe a e ulufale i se maota o le Alii.
“• Faalogo ma le totoa faatasi ma se mafaufau ma se loto matala i le aoaoga o vaega taitasi o le sauniga.
“• Ia e mataala mo le tagata o loo e faataunuuina ona sauniga sui. Ia i ai se taimi e te tatalo ai ina ia mafai ona ia iloa le taua tele o sauniga ma ia agavaa pe sauniuni ina ia agavaa e manuia ai” (“Tapuaiga i le Malumalu: O le Punavai o le Malosi ma le Mana i Taimi o Faigata,” Ensign po o le Liahona, Me 2009, 43–45).
O fea o nei manatu e mafai ona sili atu le aoga mo oe e faaaoga?
O a mea ua e faia pe ua faia foi e isi ina ia avea ai le tapuai i le maota o le Alii ia sili atu le aoga? O le a le eseesega o le a ia faia pe a e faia na mea? (O se vaega o le talanoaga, mafaufau e talanoaina le saunoaga lenei mai le Au Peresitene Sili: “Pe afai e maua e tagata o le Ekalesia igoa o o latou tuaa ma ave na igoa i le malumalu mo sauniga e fai ai, o le a faateleina le faaoaina o aafiaga i le malumalu” [First Presidency letter, Oct. 8, 2012].)
Uunaia tamaiti aoga e tusi i lalo mea na latou lagona ua musuia e fai ina ia faaleleia ai lo latou aafiaga i le malumalu. Uunaia i latou e mulimuli i mea na latou tusia.
Faamatala atu faapea o le tatalo o le faapaiaga mo le Malumalu o Katelani, na faamatalaina ai e le Perofeta o Iosefa Samita nisi o faamoemoega o malumalu. Fai i tamaiti aoga e faitau le Mataupu Faavae ma Feagaiga 109:8. Faasino atu faapea o se tasi o faamoemoega o le avea ma se “fale o le aoaoga.”
O a mea e mafai ona tatou faamoemoe e aoao i totonu o malumalu?
Faaali atu le saunoaga lenei a Gordon B. Hinckley (1910–2008), ma fai i se tamaitiiti aoga e faitau leotele:
Ata
Peresitene Gordon B. Hinckley
“O lenei malutaga paia ua avea ma faleaoga o aoaoga o mea matagofie paia a le Atua. O iinei ua faamatala mai ai mo tatou le fuafuaga a le Tama alofa mo ona atalii ma afafine o augatupulaga uma. O iinei ua tusia ai i o tatou luma le tala o le faigamalaga e faavavau a le tagata mai le muai olaga e oo mai i lenei olaga seia oo atu i le olaga a sau. O upumoni taua maoae ma upumoni faavae ua aoaoina lelei ma manino ma faigofie ona malamalama ai tagata uma e faalogo i ai” (“O le Malumalu o Sate Leki,” Liahona, Nov. 1993, 3–7).
E faapefea e le auai i sauniga o le malumalu ona fesoasoani ia i tatou e aoao ai upumoni autu maoae o le fuafuaga a le Tama Faalelagi?
E mafai faapefea e le mulimuli i le mamanu ua faamaumauina i le 3 Nifae 17:1–3 ona fesoasoani ia i tatou e aoao atili ao tatou i ai i totonu o le malumalu?
Faasoa atu le saunoaga lea a Peresitene Gordon B. Hinckley:
Ata
Peresitene Gordon B. Hinckley
“O leteona i latou o e, i taimi o faigata, pe a faia ni filifiliga faigata ma i ai ia i latou nai faafitauli lavelave e tatau ona taulimaina, e o mai i le malumalu i se agaga o le anapogi ma talosaga paia. E toatele ua latou tautino mai e moni sa lei faalogoina ni leo o faaaliga, peitai sa oo ia i latou ni lagona e uiga i se mea e tatau ona mulimuli ai i lena taimi po o se taimi muimuli ane foi, lea na avea ai ma tali ia latou tatalo” (“O le Malumalu o Sate Leki,” Liahona, Nov. 1993, 6).
Faaiu i le fesili atu i tamaiti aoga pe i ai se isi e fia faasoa mai a latou molimau e uiga i le malumalu. Faamamafa atu faapea o tamaiti aoga ua i ai nei i se taimi e sili ona taua i o latou olaga, lea e tele ai filifiliga e manaomia ona faia. Molimau atu faapea i totonu o le maota o le Alii, e mafai e tamaiti aoga ona lagona le Agaga o le Atua, faamafanafanaga, ma le taitaiga.