Lesona 24

Tagata Matutua Nofofua o le Ekalesia

Folasaga

Ua faamamafa mai e le talalelei a Iesu Keriso faamanuiaga faavavau e maua e ala mai le faaipoipoga ma sootaga faaleaiga. Ae e toatele tagata o le Ekalesia ua mauaina i latou lava i tulaga ua latou le maua ai le avanoa i le taimi nei mo le faaipoipoga ma le aiga. O lenei lesona ua faamamafaina ai faapea o tagata o le Ekalesia o loo nonofo fua ua faia ni saofaga taua i le malo o le Atua. Ao faatuai mai faamanuiaga o le faaipoipoga ma le aiga i nisi taimi, e le o teena lava faamanuiaga ia i latou o e tausia a latou feagaiga ma le Atua i le amiotonu.

Faitauga Faaopoopo

Gordon B. Hinckley, “O se Talanoaga ma le Au Nofofua Matutua,” Liahona, Nov. 1997, 58–63.
Spencer J. Condie, “Ia Maua Folafolaga Silisili Ese ma le Aoga,” Ensign po o le Liahona, Nov. 2007, 16–18.

Fautuaga mo le Aoaoina Atu

1 Korinito 12:12-20, 25-27

O tagata nofofua i se Ekalesia e faatauaina-aiga

Valaaulia tamaiti aoga e faasoa mai nisi o luitau o loo aafia ai tagata nofofua o le Ekalesia pe a auai i se uarota po o se paranesi o loo tele tagata ua faaipoipo ma ua i ai ni fanau. (O tagata nofofua o le Ekalesia e mafai ona lotovaivai, tuuatoatasi, ma le le amanaia i sauniga ma vasega lea e aoaoina ai faaipoipoga ma le aiga.)

E faapefea i lou manatu ona mafai ona fesoasoani isi tagata o le Ekalesia i tagata matutua nofofua ina ia lagona le taliaina ma le faatauaina i sauniga o le Ekalesia ma gaoioiga?

Faaali atu le faamatalaga lenei mai ia Peresitene Howard W. Hunter (1907–95), ma fai atu i se tamaitiiti aoga e faitau leotele:

“O le Ekalesia ua mo tagata uma o le Ekalesia. … O i tatou uma lava, pe nofofufa pe faaipoipo e tofu ma uiga ma mea e manaomia ma o loo i ai i na uiga se moomooga ia iloa o avea ma atalii po o se afafine aoga o le Atua. …

“O le ekalesia lenei a Iesu Keriso, e le o se ekalesia a tagata faaipoipo po o tagata nofofua po o se isi lava vaega po o se toatasi” (“O le Ekalesia ua mo Tagata Uma,” Liahona, Aok. 1990, 40).

Faamatala atu faapea na faatusatusa e le Aposetolo o Paulo le Ekalesia i se tino o se tagata ma tagata taitoatasi o le Ekalesia i vaega o le tino. Valaaulia ni nai tamaiti aoga e feauauai i le faitauina leotele o le 1 Korinito 12:12-20, ao vaavaai le isi vaega o le vasega pe na faapefea ona faatusatusa e Paulo vaega o le tino faaletino i tagata o le Ekalesia.

O a luitau o le a feagai mai tatou pe afai o se tasi pe sili atu o vaega o o tatou tino o loo misi?
O le a le mataupu faavae ua aoaoina ai i tatou e le tala a Paulo e uiga i le Ekalesia ma ona tagata? (E mafai e tamaiti aoga ona faailoa mai ni nai mataupu faavae taua. Ia mautinoa ua faamamafaina lenei mataupu faavae: O tagata uma o le Ekalesia e i ai tulaga faatauaina ma e mafai ona faia se saofaga taua i le Ekalesia.
O a saofaga ua e vaaia i tagata nofofua o lau uarota po o le paranesi ua faia i le Ekalesia?

Fai i se tamaitiiti aoga e faitau le 1 Korinito 12:25-27. Valaaulia le vasega e vaai mo mea e mafai e tagata o le Ekalesia ona fai ina ia lotogatasi ai.

O a mea e mafai e tagata uma o le Ekalesia, faaipoipo pe nofofua, ona fai e fesoasoani ai i isi e lagona le lotogatasi ma isi tagata o le uarota po o le paranesi?

Faaali atu le saunoaga lenei a Elder Robert D. Hales o le Korama a Aposetolo e Toasefululua:

“O i tatou uma o se vaega o le faalapotopotoga o le Au Paia, e taufai manaomia e le tasi le isi, ma o loo tatou taufai galulue agai i le sini e tasi. E mafai e soo se tasi o i tatou ona faaesea mai i tatou mai lenei aiga [tatou uarota po o le paranesi] ona o o tatou eseesega. Peitai e le tatau ona tapunia mai i tatou pe faaesea foi tatou lava mai avanoa ona o eseesega tatou te vaaia ia i tatou lava. Nai lo lena, ia tatou fetufaai ma isi a tatou meaalofa ma taleni ma aumaia ai le faamoemoe atoatoa lelei ia i latou, ma i le faia o lea mea o le a siitia ai o tatou lava agaga” (“O le Avea ma se Vaega o le Aiga Faale-uarota,” Liahona, Mat. 1999, 10).

Ua faapefea e au taumafaiga e talia valaauga ma auai i lau uarota po o le paranesi ona fesoasoani ia te oe e lagona le sili atu o le lotogatasi ma isi tagata?

Eperu 11:1, 6, 8–13, 16

Faatalitali mo faamanuiaga folafolaina

Faaali atu le saunoaga lenei a Elder Dallin H. Oaks o le Korama a Aposetolo e Toasefululua, ma fai i se tamaitiiti aoga e faitau leotele:

“O i latou o loo nofofua e tatau ona mananao i se faaipoipoga i le malumalu ma faia ni taumafaiga o mea e faamuamua ina ia ausia ai. E tatau i le autalavou ma talavou nofofua ona tetee atu i manatu faavae e sa’o i faiga faapolokiki ae sese i le faavavau ia e ta’ufaatauvaaina le taua o le faaipoipoina ma le mauaina o fanau” (“Manao,” Ensign po o le Liahona, Me 2011, 45).

Aisea i lou manatu e ono lagona ai e nisi o tagata nofofua le lotovaivai pe a latou mafaufau loloto i aoaoga faavae faapea “o le faaipoipoga i le va o le alii ma le tamaitai ua faauuina e le Atua ma o le aiga e totonugalemu i le fuafuaga a le Foafoa mo le taunuuga faavavau o Lana fanau”? (“O Le Aiga: O se Folafolaga i le Lalolagi,” Ensign po o le Liahona, Nov. 2010, 129).

Faamatala atu faapea e ui lava o le faaipoipoga ma le aiga e taua, e toatele tagata matutua nofofua o le Ekalesia ua le mautinoa pe o le a latou faaipoipo ea. O i latou ua tatala faaipoipoga pe ua feoti taitoalua e ono mafaufau pe o le a latou toe faaipoipo.

Faitau leotele le saunoaga lenei mai ia Elder D. Todd Christofferson o le Korama a Aposetolo e Toasefululua, ma fai i tamaiti aoga e vaavaai mo mea na faia e le Faaola ia maua ai ni faamanuiaga faavavau mo i latou ua le maua faamanuiaga o le faaipoipoga ma le aiga:

“Ina ia tautino atu ia upumoni faavae e tusa ai ma le faaipoipoga ma le aiga, e le o faaseloa ai le vaai pe tuuitiitia ai osigataulaga ma manuia o i latou e le i afea le tulaga lea i le taimi nei. O nisi o outou e le o maua faamanuiaga o le faaipoipoga ona o ni mafuaaga e aofia ai le leai o se vaai i le lumanai, tosina atu i le itupa e tasi, faaletonu o le tino po o le mafaufau, pe na o le fefe foi lava ne’i toilalo faapea, mo na o lea taimi pe ā, ua lamatia ai le faatuatua. Pe atonu foi sa e faaipoipo, ae ua faamutaina lena faaipoipoga, ma ua tuua ai na o oe e faafoeina mea e toetoe ina a le mafai e ni tagata se toalua ona taulimaina. O nisi o outou ua faaipoipo, e le mafai ona fanauina ni fanau e ui i le naunautaiga lofituina ma tatalo faatauanau.

“… Faatasi ai ma le mautinoa tatou te molimau atu o le Togiola a Iesu Keriso ua faamoemoeina, ma, i le iuga, o le a tauia ai mea uma na le’i mauaina, ma le toilalo o i latou na liliu atu ia te Ia. E leai se tasi na muai fuafuaina faapea e itiiti mea na te maua nai lo mea uma o i le Tama mo Ana fanau” (“Aisea e Faaipoipo Ai, Aisea e Fai ai se Aiga,” Ensign po o le Liahona, Me 2015, 52).

O le a le aoaoga faavae ua aoao mai e Elder Christofferson e uiga i le mauaina o faamanuiaga silisili a le Atua? (Tusi le aoaoga faavae lenei i luga o le laupapa: O le Togiola a Iesu Keriso e mafai ai e i tatou taitoatasi ona iu lava ina maua uma faamanuiaga ua folafolaina mai e le Tama oi le Lagi.)
O a mea e tatau ona fai e se tagata ina ia maua ai le faamoemoe ua faamatalaina i lenei aoaoga faavae?

Faaali atu le faamatalaga lenei mai ia Peresitene Spencer W. Kimball (1895–1985) ma fai atu i se tamaitiiti aoga e faitau leotele:

“Matou te folafola atu ia te outou faapea e tusa ai ma le tulaga faavavau, e leai se tasi e taofia mai faamanuiaga maoae ma maualuga ma faavavau mo soo se mea e le mafai e lena tagata ona fai, ma e le mafai e le Alii ona le faataunuuina ana folafolaga, ma o soo se tagata amiotonu o le a iu ina mauaina uma mea ua tatau ia te ia ma mea na te lei ositaulagaina ona e le o sona lava pona” { (“The Importance of Celestial Marriage,” Ensign, Oke. 1980, 5).

Molimau atu faapea o faamanuiaga a le Atua o nisi taimi e faatuai mai, e le taofia lava i le faavavau ia i latou o e ola amiotonu.

Fai i tamaiti aoga e mafaufau i faataitaiga ia Aperaamo ma Sarai, o e na mauaina folafolaga mai le Atua e faatatau i lo la aiga ia na tuai mai pe na le faataunuuina i o la olaga faitino (tagai Kenese 13:14–17; 15:4–7; 17:1–8, 15–16). Faamanatu i tamaiti aoga faapea, e pei o Aperaamo ma Sarai, o lo tatou faatuatua o le a tofotofoina i nisi taimi e ala i folafolaga na e tuai mai pe le faataunuuina i le olaga faitino.

Fai i se tamaitiiti aoga e faitau leotele le Eperu 11:1, 6, ao vaavaai le vasega mo se faamatalaina o le faatuatua.

O a ni mea o loo aoao mai e nei fuaiupu e uiga i le faatuatua? (Faamanatu i tamaiti aoga e vaavaai i le fuaiupu 1, vaefaamatalaga e, lea e faamatalaina ai faapea o mea e mafai foi ona faauigaina mautinoa, autu,po o faavae. Manatua e fesoasoani i tamaiti aoga e atiina ae tomai faalesuesuega i tusitusiga paia patino e ala i le faaaogaina o meafaigaluega mo suesuega i le taimi o le vasega.)
O le a le uiga o le fuaitau “mautinoa lea o mea e le o vaaia”? (O le faatuatua o le mautinoa po o le molimau o mea e le vaaia ae ua moni. O lenei mautinoa o mea e faamoemoe i ai ma mea e le vaaia e faatoa oo mai pe a tatou faatino ma usiusitai i mataupu faavae o le talalelei—ae maise lava pe a faigata ona faia. O le faatuatua o le faatinoga o le usiusitai lena e taunuu i le meaalofa faaleagaga o le molimau. O le talitonu ma le faalagolago i le Alii ua lava e usitai ai ia te Ia e aunoa ma le vaaia muamua o le taunuuga mulimuli.)

Valaaulia ni nai tamaiti aoga e feauauai i le faitauina leotele mai le Eperu 11:8–13, 16, ao vaavaai le isi vaega o le vasega mo le ala na faaaoga ai e Aperaamo ma Sarai le faatuatua i taimi o tulaga faigata. Fautuaina le vasega e mafai ona latou vaseina upu ma fuaitau e faaalia ai le ala na faaaoga ai e Aperaamo ma Sarai le faatuatua.

O le fuaiupu 13 ua faapea mai e ui lava o Aperaamao, ma Sarai, ma le toatele o isi na maliliu e lei “maua mea na folafolaina,” na latou vaaia folafolaga “ao mamao” ma na i ai le faatuatua i le mafaia e le Alii ona faataunuuina nei folafolaga. E mafai faapefea e le faataitaiga a nei Au Paia anamua ona fesoasoani i le Au Paia o aso nei o e ua luitauina le faatuatua ona ua latou le maua faamanuiaga na folafolaina i le olaga faitino? (E tatau ia i tatou uma lava ona aoao e faaaoga le faatuatua ma usitai i poloaiga a le Alii e tusa lava pe foliga mai o faamanuiaga ua tatou faamoemoe i ai e le oo mai pe a tatou manaomiaina.)
O le a sou manatu i le uiga faapea o nei Au Paia anamua na soifua o ni “tagata ese i latou ma aumau i le lalolagi”? (Na latou silafia o le olaga faitino e le tumau ma o lenei lalolagi e le o lo latou aiga tumau lea.)

Faaali atu le saunoaga lenei a Elder Jeffrey R. Holland o le Korama a Aposetolo e Toasefululua:

“E vave oo mai nisi faamanuiaga, o nisi e tuai, o nisi e le oo mai vagana le lagi; ae mo i latou e taliaina le talalelei a Iesu Keriso, e oo mai lava. Ou te molimauina lava lena mea” (“O se Faitaulaga Sili i Mea Atali,” Liahona, Ian. 2000, 38).

E mafai faapefea ona fesoasoani le iloaina faapea e leai se faamanuiaga o le a teena i tagata faatuatua o le Ekalesia o loo lagona le faanoanoa po o le lotovaivai ona ua le faaipoipo pe leai ni fanau?
E mafai ona e mafaufau i se taimi na e lagona ai le lotovaivai ae na filifili e faatino le faatuatua ma agai pea i luma i lou olaga?

Afai e lava le taimi, faasoa atu le fautuaga lenei mai ia Elder Dallin H. Oaks:

“Afai ua na o lou makaina o le taimi ma faatalitali mo se faaipoipoga, aua le toe faatali. Atonu o le a e le maua lava le avanoa mo se faaipoipoga tatau i lenei olaga, o le mea lea aua le toe faatali ae amata ona agai i luma. Saunia oe lava ia mo le olaga—e tusa lava po o se olaga toatasi—e ala i le aoga, poto masani, ma le fuafuaina. Aua le faatali mo le fiafia e na ona togi mai ia te oe. Saili i ai i le auauna atu ma le aoaoina mai. Ia faia se olaga mo oe lava ia. Ma faalagolago i le Alii” (“Dating versus Hanging Out,” Ensign,June 2006, 14).

Uunaia tamaiti aoga e mafaufau i mea e mafai ona latou faia e faateleina ai lo latou faatuatua ia Iesu Keriso ma faalagolago i Lona tomai e faataunuuina faamanuiaga folafolaina.

Faitauga a Tamaiti Aoga

1 Korinito 12:12–20, 25–27; Eperu 11:1, 6, 8–13, 16.
Gordon B. Hinckley, “O se Talanoaga ma le Au Nofofua Matutua,” Liahona, Nov. 1997, 16-21.