Lesona 6

O Le Aiga e Totonugalemu i le Fuafuaga a le Tama Faalelagi

Folasaga

Ua folafola mai e perofeta ma aposetolo o aso nei faapea “o le aiga o le totonugalemu lea o le fuafuaga a Le Foafoa, mo le taunuuga e faavavau o Lana fanau” (“O Le Aiga: O Se Folafolaga i le Lalolagi,” Ensignpo o le Liahona, Nov. 2010, 129). O le a fesoasoani lenei lesona i tamaiti aoga e vaai ai o le “filiga atili ma popole i le aiga” (MF&F 93:50) e mafai ai ona latou faia o latou aiga ia sili atu le totonugalemu i o latou olaga.

Faitauga Faaopoopo

Robert D. Hales, “O le Aiga e Faavavau,” Liahona, Ian. 1997, 75–78.
David A. Bednar, “Ia Matua Maelega ma Mafaufau i le Aiga,”Ensign po o le Liahona, Nov. 2009, 17–20.
Tusitaulima 2: Taitaiina o le Ekalesia [2010], 1.1.1, 1.1.4, ma le 1.4.1 (pe a maua).

Fautuaga mo le Aoaoina Atu

O Le Aiga e Totonugalemu i le Fuafuaga a le Tama Faalelagi

Tau atu i lau vasega faapea e mai autu uma lava ua laugaina i konafesi aoao talu ai, o le aiga o se tasi o autu ua sili ona talanoaina soo.

Aisea i lou manatu ua saunoa soo ai taitai o le Ekalesia e uiga i le aiga?

Tusi le upumoni lenei mai le folafolaga i le aiga i le laupapa, ma fai i tamaiti aoga e faasoa mai lona uiga ia i latou:

“O le aiga o le totonugalemu lea o le fuafuaga a le Foafoa mo le taunuuga e faavavau o Lana fanau.”

Ina ia fesoasoani i tamaiti aoga ia malamalama atili i le ala ua totonugalemu ai le aiga i lo tatou taunuuga faavavau, tufa atu kopi o pepa e tufa atu o loo maua i le faaiuga o lenei lesona. Vaevae le vasega i ni vaega toalaiti. Tofi vaega taitasi e faitau se tasi o vaega e tolu o pepa e tufa atu ma talanoaina fesili o loo i ai. Ia mautinoa o vaega taitasi ua tofiaina.

pepa e tufa atu, Lo Tatou Muai Olaga, Olaga Faitino, ma Aiga e Faavavau

A uma se taimi talafeagai, valaaulia ia le itiiti ifo ma le tasi se tamaitiiti aoga ua tofia i vaega taitasi o pepa e tufa atu e faasoa mai se aotelega o le talanoaga a le latou tamai vaega i le vasega. Molimau atu i le moni o lenei upumoni: O le aiga e totonugalemu i le fuafuaga a le Atua mo le muai olaga, olaga faitino, ma le ola e faavavau.

O a ni aafiaga na fesoasoani ia te oe e lagona ai le taua o le faatotonugalemu o le aiga i le fuafuaga a le Tama Faalelagi?

Mataupu Faavae ma Feagaiga 93:39-50

Faia ia faamuamua le aiga

Saunia tamaiti aoga e aoao mai le Mataupu Faavae ma Feagaiga 93 i le faamatalaina atu o lenei vaega ua faamaumauina ai, mai isi mea, o faatonuga a le Alii e uiga i le taua o le tausia o fanau i le “malamalama ma le upumoni” ma faamuamua o tatou aiga. Tusi mau fesootai nei i le laupapa:

Mataupu Faavae ma Feagaiga 93:39-43

Mataupu Faavae ma Feagaiga 93:44

Mataupu Faavae ma Feagaiga 93:45-48

Mataupu Faavae ma Feagaiga 93:50

Fai i tamaiti aoga e faitau ia le itiiti ifo ma le tasi le mau fesootai (ia mautinoa o mau fesootai taitasi e faitauina ia le itiiti ifo ma le tamaitiiti aoga e toatasi). Fai i tamaiti aoga e vaavaai po o ai o loo fetalai atu i ai le Alii ma po o le a le faatonuga na Ia tuuina atu. A uma se taimi talafeagai, fai i tamaiti aoga e lipoti mai mea na latou maua. Ia mautinoa ua iloa e tamaiti aoga o alii e toafa o loo taua o le Au Peresitene Sili ma le epikopo o le Ekalesia i Ohaio; o nei mau ua faamanatu ai i tagata uma o le Ekalesia, e oo lava ia i latou i tulaga taitai, ina ia faia o latou aiga ma faamuamua. E mafai ona e fautuaina tamaiti aoga latou te faailogaina upu e fai soo po o mamanu i nei fuaiupu—E tatau i tagata o le Ekalesia ona “faatulaga tatau” o latou aiga (tagai fuaiupu 43, 44, ma le 50).

E tusa ai ma fufaiupu 42, 48, ma le 50, o a mea e mafai ona tatou faia e fesoasoani ai e faatulaga tatau o tatou aiga? (E tatau i tamaiti aoga ona faailoa mai mea nei: aoao fanau i le malamalama ma le upumoni, salamo, lafoai mea leaga, ia filiga atili ma popole i le aiga, ma tatalo e le aunoa.)

Tusi le mataupu faavae lenei i le laupapa: Tatou te fesoasoani e faataunuu le poloaiga a le Alii e faatulaga tatau o tatou aiga pe a tatou filiga atili ma popole i le aiga.

O a mea e mafai e se tagata talavou ona fai ia filiga atili ai ma popole i le aiga?

Faaali atu le fuaitau lenei mai se tusi na tusia e le Au Peresitene Sili i le 1999, ma fai i se tamaitiiti aoga e faitau leotele:

O le aiga o le faavae lea o se ola amiotonu, ma e leai lava se isi auala e mafai ona suia lona tulaga pe faataunuu ai lana galuega taua i le tauaveina o lenei tiutetauave na tuuina mai e le Atua.

“Matou te fautua atu i matua ma fanau ina ia tuu atu le faamuamua aupito maualuga i tatalo faaleaiga, afiafi faaleaiga, suesuega ma aoaoga o le talalelei, ma gaoioiga lelei atoatoa faaleaiga. Peitai, tusa pe o le a le taua ma le talafeagai o isi faatonuga po o gaoioiga, e le tatau ona faatagaina e suitulaga i tiute ua faatonuina mai e le Atua, ia e na o matua ma aiga e mafai ona faatinoina lelei” (Tusi a le Au Peresitene Sili, Fep. 11, 1999, upu sii i Tusitaulima 2: Taitaiina o le Ekalesia [2010], 1.4.1).

I ou lava aafiaga, o a nisi o “galuega taua” ma “tiute paia ua atofaina” e sili le faataunuuina i le aiga?

Faaali atu le fuaitau lenei, ma uunaia tamaiti aoga e mafaufau i faamanuiaga e oo mai pe a sailia e tagata uma o le aiga le faataunuuina o tiute paia ua atofaina i ai:

“Po o fea lava e nonofo ai tagata o le Ekalesia, e tatau ona latou faatulagaina se aiga e maua ai le Agaga. …

“O se fale e i ai ni matua alolofa ma faamaoni o le nofoaga lea e aupito sili ona talileleia ai manaoga faaleagaga ma faaletino o le fanau. O se aiga e taulai atu ia Keriso e ofo atu ai i tagata matutua ma tamaiti se nofoaga o le puipuiga mai le agasala, malutaga mai le lalolagi, faamalologa mai tiga o lagona ma isi, ma le alofa tautino, faamaoni” (Tusitaulima 2: Taitaiina o le Ekalesia, 1.4.1).

E faapefea ona e fesoasoani e fatuina se aiga e totonugalemu ia Keriso mo lou aiga?
O le a se eseesega e na te faia i lou aiga?

Faaali atu le saunoaga lenei a Elder M. Russell Ballard o le Korama a Aposetolo e Toasefululua, ma fai i se tamaitiiti aoga e faitau leotele:

“Tuu uma lava mea e te faia i fafo atu o le aiga, e faalona lua ma ia lagolago ai mea e tutupu i totonu o lou aiga. Manatua le fautuaga a Peresitene Harold B. Lee e faapea ‘o le galuega e aupito sili ona taua … tou te faia i totonu lava o puipui o o outou lava aiga’ … ma le saunoaga e le suia a Peresitene Tavita O Makei ‘E leai se isi manuia e mafai ona suitulaga mo le toilalo i le aiga’” (“Ina ia Maua le Ua Leiloa,” Ensign po o le Liahona, Me 2012, 99).

Tuu atu i tamaiti aoga se taimi e tusi ai i lalo ni nai mea latou te faia ia filiga atili ai ma popole i le aiga ma faia o latou aiga ia sili atu le totonugalemu i o latou olaga. Uunaia tamaiti aoga e fai se sini e mulimuli i se tasi o manatu na latou tusia. Molimau atu faapea ao galulue tamaiti aoga ia latou sini, o le a faamalosia i latou faaleagaga e le Alii ma fesoasoani ia i latou ia vaai i le ala e faamalosia ai foi o latou aiga e a latou gaoioiga.

Faitauga a Tamaiti Aoga

Mataupu Faavae ma Feagaiga 93:39-50.
Robert D. Hales, “O le Aiga e Faavavau,” Liahona, Ian. 1997, 64–67.

handout, Our Premortal, Mortal, and Eternal Families

O o Tatou Aiga I le Muai Olaga, Olaga Faitino, ma le Faavavau

O Le Aiga e Faavavau —Lesona 6

O Lo Tatou Aiga I le Muai Olaga

“O le aiga ua faauuina e le Atua. O le iunite sili lea ona taua i le olaga nei ma le faavavau. E oo lava ae tatou te lei fananau mai i le lalolagi, sa avea i tatou ma vaega o se aiga. O i tatou taitoatasi ‘o se atalii po o se afafine agaga faapelepele o ni matua faalelagi’ ma ‘se natura paia ma se taunuuga’ (“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129]. O le Atua o lo tatou Tama Faalelagi, ma na tatou ola faatasi i Lona afioaga o se vaega o Lona aiga i le muai olaga. O iina na tatou aoao ai a tatou lesona muamua ma na saunia ai mo le olaga faitino (tagai MF&F 138:56)” (Tusitaulima 2: Taitaiina o le Ekalesia [2010], 1.1.1).

“Tatou te tapuai i le Atua sili na foafoaina le atulaulau. O Ia o lo tatou Tama i le lagi. Ua tatou i ai nei ona o ia; o i tatou o ana fanau agaga. Na tatou nonofo faatasi ma ia i se muai olaga i se sootaga faaleaiga. Na tatou iloa lelei o ia e pei lava ona tatou iloa o tatou tama faaletino i lenei lalolagi o loo tatou i ai” (Bruce R. McConkie, How to Worship, Brigham Young University Speeches of the Year [Iulai 20, 1971], 2).

Fesili e Talanoaina:

Na faapefea ona avea le aiga o se vaega totonugalemu o lo tatou olaga i le muai olaga?
E faapefea ona fesoasoani le iloa o le Atua o lo tatou Tama ma o oe o se tagata pele o Lona aiga i le muai olaga?
O le a lau vaaiga faalemafaufau pe na faapei la outou fegalegaleaiga ma ou matua Faalelagi?

O Lo Tatou Aiga Faaletino

“O se vaega o le fuafuaga a lo tatou Tama Faalelagi, na tatou fananau mai ai i ni aiga. Na ia faavaeina ia aiga ia tatou maua ai le fiafia, e fesoasoani ia i tatou e aoaoina mataupu faavae sa’o i se siosiomaga alofa, ma ia sauniuni ai i tatou mo le ola e faavavau.

“Ua i ai i matua le tiutetauave taua e fesoasoani i a latou fanau e sauniuni e toe foi atu i le Tama Faalelagi. E faataunuuina e matua lenei tiutetauave e ala i le aoaoina o a latou fanau e mulimuli ia Iesu Keriso ma ola ai i Lana talalelei” (Tusitaulima 2: Taitaiina o le Ekalesia, 1.1.4).

“O le Atua na fuafuaina le aiga. Na ia fuafuaina o le fiafiaga sili, o mea e sili ona faamalieina o le soifuaga, o le olioli e sili ona faalolotoina e tatau ona sau mai i a tatou fegalegaleaiga faatasi ma o tatou popolega mo le tasi ma le isi o ni tama ma ni tina ma le fanau” (Gordon B. Hinckley, “O E Ua Faatasia e le Atua,” Liahona, Iulai 1991, 80).

Fesili e Talanoaina:

O a auala e avea ai le aiga o se vaega totonugalemu o lo tatou olaga faitino?
E mafai faapefea ona ese le olaga i le lalolagi pe ana faapea e auina mai i tatou i le lalolagi o ni tagata e aunoa ma ni sootaga faaleaiga—e leai se tama, se tina, uso ma tuafafine, tuaa, po o fanau?
O a ni aafiaga na fesoasoani ia te oe e malamalama ai i le matafaioi ma le taua o le aiga i le olaga faitino?

O Lo Tatou Aiga e Faavavau

“O le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau” (“O le Aiga: O se Folafolaga I le Lalolagi,” Ensignpo o le Liahona, Nov. 2010, 129).

“Ao faalagolago lo tatou faaolataga patino i lo tatou usiusitai patino, e faapena foi le taua ona tatou malamalama o i tatou taitoatasi o se vaega taua ma tutotonu o se aiga, ma e mafai ona maua faamanuiaga maualuluga i na o totonu lava o se aiga e faavavau. Pe a faagaoioia aiga e pei ona fuafuaina ai e le Atua, o vafealoai e maua iina o ni vafealoai e sili ona taua i le olaga i la le tino. O le fuafuaga a le Tama ia faaauauina e faavavau le alofa ma le mafutaga faaleaiga. O le lotogatasi i le aiga e tauaveina ai ma se tiute maoae o le tausia, alofa, siitia ma faamalosia tagata taitasi o le aiga ina ia mafai e tagata uma i le amiotonu ona tumau e oo i le iuga i la le tino ma mau faatasi i le faavavau atoa. E le lava le tau na ona faaolaina o i tatou lava. E faapena foi le taua i matua, uso, ma tuafafine ona faaola i o tatou aiga. Afai tatou te foi atu taitoatasi i le Tama Faalelagi, o le a fesiligia i tatou ‘O fea o i ai isi o le aiga?’ O le ala lena tatou te aoao atu ai e faavavau aiga. O le uiga faavavau o se tagata, e avea ma se uiga faavavau o le aiga” (Robert D. Hales, “O le Aiga e Faavavau,” Liahona, Ian. 1997, 76).

Fesili e Talanoaina:

O a ni auala e avea ai le aiga o se vaega tutotonu o lo tatou taunuuga e faavavau?
O a ni faatinoga amiotonu e mafai ona faia e tagata o le aiga e aumaia ai le faaolataga o le tasi ma le isi?
O anafea na siitia ai pe na faamalosia ai e se tagata o le aiga oe i se ala na uunaia ai oe e tumau e oo i le uiga?