Lesona 12

Sauniga ma Feagaiga o le Malumalu

Folasaga

Ua folafola mai e perofeta o Aso e Gata Ai, “Ua mafai i sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua” “O le Aiga: O se Folafolaga i le Lalolagi,” Ensign po o le Liahona, Nov. 2010, 129). I lenei lesona, o le a aoao tamaiti aoga faapea o le mauaina o sauniga o le malumalu e mafai ona latou olioli ai i faamanuiaga paia i le olaga faitino ma maua ai le ola faavavau.

Faitauga Faaopoopo

Boyd K. Packer, “O le Malumalu Paia,” Liahona, Oke. 2010, 29–35.
D. Todd Christofferson, “O Le Mana o Feagaiga,” Ensign po o le Liahona, Me 2009, 19–23.

Fautuaga mo le Aoaoina Atu

Mataupu Faavae ma Feagaiga 97:10-17; 109:12-21; 124:37-40, 55

Faamoemoega o malumalu

Faaali i le vasega se ata o le malumalu e te fiafia i ai, ma faasoa atu pe aisea e sili ona e fiafia ai i lena malumalu.

Aisea ua fai ai a tatou malumalu?

Ina ia fesoasoani e taliina lenei fesili, tusi ia faamatalaga nei i luga o le laupapa. Valaaulia tamaiti aoga e faitau se tasi o fuaitau, ma vaavaai mo mafuaaga ua saunia ai e le Tama Faalelagi malumalu:

Mataupu Faavae ma Feagaiga 97:10-17

Mataupu Faavae ma Feagaiga 124:37-40, 55

E tusa ai ma nei fuaiupu, o a nisi o mafuaaga ua saunia ai e le Tama Faalelagi malumalu? (Ao tali mai tamaiti aoga, fesoasoani ia i latou ia malamalama i le mataupu faavae lenei: E saunia e le Tama Faalelagi malumalu ina ia mafai ai e Ana fanau ona maua sauniga taua ma le malamalama ma saunia ai e nonofo i Lona afioaga.)
O a fuaitau i nei fuaiupu ua aoao mai ai o malumalu e fesoasoani e saunia ai i tatou e ola i le afioaga o le Atua?

Tau i tamaiti aoga o le Mataupu Faavae ma Feagaiga 109 o loo i ai le tatalo o le faapaiaga mo le Malumalu o Katelani. Fai i tamaiti aoga e vaai faavave i le Mataupu Faavae ma Feagaiga 109:12-21 ma fai se lisi o auala lea e saunia ai i tatou e malumalu ia nonofo i le afioaga o le Atua.

E tusa ai ma nei fuaiupu, e faapefea e malumalu ona saunia i tatou e nonofo i le afioaga o le Atua? (E mafai e tamaiti aoga ona fautuaina mai mea nei: i malumalu tatou te lagona ai le mana o le Alii, aoao ai le poto, ma maua ai le atoatoa o le Agaga Paia; e uunaia ai i tatou ia salamo vave i le malumalu; ma e manaomia i tatou ina ia mama pe a tatou ulufale atu i le malumalu. A lava le taimi, e mafai ona e faasino tamaiti aoga i le Esoto 19:10-14, lea e faamatalaina mai le ala na saili ai Mose e saunia Isaraelu anamua faaletino ma le faaleagaga e o mai i le afioaga o le Alii.)

Faaali atu saunoaga nei a Elder Robert D. Hales o le Korama a Aposetolo e Toasefululua ma Peresitene Polika Iaga (1801-1877):

“O le faamoemoega autu o le malumalu o le tuuina mai ai lea o sauniga e manaomia mo lo tatou faaeaga i le malo selesitila. O sauniga o le malumalu e taitaiina atu ai i tatou i lo tatou Faaola ma tatou maua ai faamanuiaga ia e oo mai ia i tatou e ala mai i le Togiola a Iesu Keriso” (Robert D. Hales, “Faamanuiaga o le Malumalu,” Liahona, Oke. 2009, 12).

“O lou faaeega paia [o le malumalu], o le mauaina uma lea o sauniga na, i le maota o le Alii, lea e talafeagai ai mo oe, pe a e tuua lenei olaga, ina ia mafai ai ona e toe savali atu i le afioaga o le Tama, e pasi atu i luma o agelu o loo tutu e fai ma leoleo faitotoa” (Aoaoga a Peresitene o le Ekalesia: Polika Iaga [1997], 302).

E faapefea e nei fuaitau ona fesoasoani ia te oe ia talisapaia le taua o le mauaina o sauniga o le malumalu?

Mataupu Faavae ma Feagaiga 84:19-21

O sauniga o le perisitua e maua i malumalu e fesoasoani ia i tatou ia avea atili ai faapei o le Atua

Faaali atu le fuaitau lenei ma valaaulia se tamaitiiti aoga e faitau leotele:

“I le Ekalesia, o se sauniga, o se faatinoga paia ma aloaia e faatinoina i le pule o le perisitua. O nisi o sauniga e taua i lo tatou faaeaga. O nei sauniga ua taua o sauniga faaola. Latou te faaaofia ai le papatisoga, faamauga, faauuga i le Perisitua Mekisateko (mo alii), faaeega paia i le malumalu, ma le faamauga o le faaipoipoga” Faamaoni i le Faatuatua: O se Tusitaiala o le Talalelei[2004], 109).

E faapefea e “sauniga faaola” ona tulaga ese mai isi sauniga o le talalelei? (O isi sauniga, e pei o le faamanuiaina o pepe ma le faauuina o mai, e le manaomia mo le faaeaga.)

Ae lei faaauauina, faasino atu faapea o nisi o sauniga faaola, e pei o le papatisoga ma le faauuina i le Perisitua Mekisateko, e faia ae lei mauaina sauniga o le malumalu; ae ui i lea, o lenei vaega o le lesona e taulai atu i sauniga faaola e faia i le malumalu. Valaaulia se tamaitiiti aoga e faitau leotele le Mataupu Faavae ma Feagaiga 84:19-21. Fai i le vasega e vaai mo mea e mafai ona tatou maua ao tatou auai i sauniga e faia e le Perisitua Mekisateko.

O le a sou manatu i le uiga o le faaupuga “mana o le faaleatua”? (Mafaufau e faamatala atu faapea o le “mana o le faaleatua”o se mana e avea ai faapei o se atua po o le amioatua.)
E faapefea ona e aoteleina le aoaoga a le Alii i le Mataupu Faavae ma Feagaiga 84:20-21? (Ao tali mai tamaiti aoga, tusi le mea lenei i le laupapa: E ala mai i sauniga ma feagaiga o malumalu ona avea atili i tatou faapei o le Atua.

Tuu atu i tamaiti aoga taitasi se kopi o le saunoaga lenei a Elder Robert D. Hales o le Korama a Aposetolo e Toasefululua. Fai i tamaiti aoga e faailoga upu po o fuaitau ua aoaoina mai ai le ala e fesoasoani ai le auai i sauniga o le malumalu ia i tatou ia avea atili ai e faapei o se atua.

“O faamanuiaga pito sili o faamanuiaga o le perisitua e avanoa i [alii ma tamaitai talavou] i le malumalu. O iina, latou te maua ai se malamalama itiiti o le lagi. … O le olioli i le faavavau, lea e mafai ona foliga mai e mamao naua i tua atu o le malumalu, e faafuasei lava ona foliga mai ua mafai ona au atu i ai.

“I le malumalu, ua faamatala mai ai le ata o le faaolataga, ma osia ai feagaiga paia. O nei feagaiga, faatasi ma le ofuina o ofusa o le malumalu paia, e faamalosia ma puipui ai le tagata ua faia ona faaeega paia mai mana o le tiapolo. …

“I le sauniga faatumutumuina o le malumalu—o le faaipoipoga lea e faavavau—e folafola atu ai i le tamaitai ma le alii faaipoipo, afai e faamaoni i laua o le a la olioli i se mafutaga faaleaiga o le tasi ma le isi, faatasi ma a la fanau, ma le Alii i le faavavau atoa. Ua taua lea o le ola faavavau” (“O Faamanuiaga o le Perisitua,” Liahona, Ian. 1996, 42).

Talanoaina mau na faailoga e tamaiti aoga.

Ua faapefea e le auai i sauniga o le malumalu ona faamanuiaina oe i auala e tutusa lava i na auala o loo faamatalaina e Elder Hales?

Tuu atu i tamaiti aoga sina taimi e tusi ai i lalo mea latou te ono faia ina ia sili atu ai le taua o le tapuai i le malumalu ma sili atu ona taulai i le fesoasoani ia i latou ia avea atili ai e faapei o le Atua.

Esoto 19:3–6; Mataupu Faavae ma Feagaiga 109:22–26

Tausia o feagaiga o le malumalu

Tau atu i tamaiti aoga faapea o loo i ai se isi faamoemoega taua o le tapuai i le malumalu e vavalalata lava ma le mauaina o sauniga o le malumalu. Fai ia i latou e faalogo mo lena faamoemoega ao e faasoa atu le saunoaga lenei a Elder D. Todd Christofferson o le Korama a Aposetolo e Toasefululua:

“Ou te molimau atu O Le Ekalesia a Iesu Keriso o le Au Paia o Aso e Gata Ai, o loo i ai le pule o le perisitua e faataunuu ai sauniga ia e mafai ona tatou ulu atu ai i feagaiga tumau ma lo tatou Tama Faalelagi i le suafa o Lona Alo Paia. Ou te molimau atu o le a tausia e le Atua Ana folafolaga ia te oe pe a e faamamaluina au feagaiga ma Ia” (“O le Mana o Feagaiga,” Ensign po o le Liahona, Me 2009, 19).

Pe a tatou mauaina sauniga faaola o le talalelei, o le a le mea ua tatou ulufale i ai?

Faaali atu saunoaga nei a Elder David A. Bednar ma Jeffrey R. Holland o le Korama a Aposetolo e Toasefululua, ma valaaulia tamaiti aoga e vaai mo vaega taua o a tatou feagaiga ma le Alii:

“O se feagaiga o se maliega lea i le va o le Atua ma Lana fanau i luga o le fogaeleele, ma e taua le malamalama e fuafuaina e le Atua ia tuutuuga o feagaiga uma o le talalelei. E le faia e oe ma a’u se tonu o le natura po o elemene o se feagaiga. Ae, tatou te taliaina tuutuuga ma tulaga manaomia o se feagaiga e pei ona faia ai e lo tatou Tama Faavavau” (David A. Bednar, “Ina ia Tatou Maua Pea Lona Agaga e Faatasi ma i Tatou ,” Ensign po o le Liahona, Me 2006, 28–29).

“O se feagaiga o se maliega e fusia ai faaleagaga, o se tautoga faamaoni i le Atua lo tatou Tama o le a tatou ola ma mafaufau ma galulue i se ala faapitoa—o le ala a Lona Alo, le Alii o Iesu Keriso. A o le isi itu, e folafola mai e le Tama, le Alo, ma le Agaga Paia le matagofie uma o le ola e faavavau” (Jeffrey R. Holland, “Tausia o Feagaiga: O Se Savali mo i Latou O Le A Auauna Atu i se Misiona,” Liahona, Ian. 2012, 3).

O le a le mea e sili ona taua ia te oe i nei fuaitau e uiga i feagaiga?
Aisea e taua ai faapea o le Atua e fuafuaina tulaga o feagaiga uma o le talalelei? (Talu ai o Ia ua ofoina mai ia i tatou le ola faavavau, ua alagatatau ai ona Ia faatuina tulaga e tatau ona ia mauaina. Pau le ofo tatou te tuuina atu ia te Ia o lo tatou faitalia lea ao tatou filifili e usiusitai. O se vaega o lenei talanoaga, faamamafa atu le mea lenei: Ao tatou tausia a tatou feagaiga ma le Alii, e faamanuiaina i tatou i le olaga faitino ma e mafai ona tatou maua le ola e faavavau.

Fai i tamaiti aoga e fai paga. Fai i se tasi o tamaiti aoga i paga taitasi e suesue le Esoto 19:3-6 ma le isi e suesue le Mataupu Faavae ma Feagaiga 109:22-26. Valaaulia tamaiti aoga e vaavaai mo faamanuiaga ua avanoa ia i latou o e tausia a latou feagaiga, ae maise lava feagaiga o le malumalu. A uma se taimi talafeagai, valaaulia tamaiti aoga e faasoa mai mea na latou mauaina. (I le fesootai ma fuaiupu o le Esoto, e mafai ona e faamautinoa ua malamalama tamaiti aoga faapea o totonu o malumalu e amata ai ona tatou agavaa e avea ma tupu ma masiofo o e o le a mafai ona avea i se aso ma se malo paia ma nonofo i le afioaga o le Atua; tagai foi i le Faaaliga 1:6; 5:10; 19:16; MF&F 76:55–56.)

Ua faapefea e au feagaiga ma le Alii ona avea ma se faamanuiaga po o se puipuiga ia te oe?

Fai i se tamaitiiti aoga e faitau leotele le faamatalaga lenei mai ia Peresitene Iosefa Filitia Samita: (1876-1972):

“Afai tatou te malaga atu i le malumalu e sii o tatou lima ma osi feagaiga o le a tatou auauna i le Alii ma tausia ana poloaiga ma tausia i tatou ma le mama mai lenei lalolagi. Afai la tatou te malamalama i le mea ua tatou faia, ona avea lea o le faaeega paia o se puipuiga ia i tatou i o tatou olaga atoa— o se puipuiga e le maua ese tagata e le alu i le mamalu.

“Na ou faalogo i lou tama o [Peresitene Iosefa F. Samita] o fai mai faapea, i le itula o tofotofoga, i le itula o faaosoosoga, na te mafaufau ai i folafolaga, o feagaiga sa ia faia i le Maota o le Alii, sa avea ma puipuiga mo ia. … O lenei puipuiga o le aoga lena o nei sauniga, i se vaega. Ua latou faasaoina i tatou i le taimi nei ma e faaeaina ai i tatou i se taimi o mulimuli mai, pe afai tatou te faamamaluina” (Aoaoga a Peresitene o le Ekalesia: Iosefa Filitia Samita [2013], 235–36).

O a ni manatu po o ni lagona na e mauaina i lenei lesona e te manao e faasoa mai i le vasega?

Faaali atu le saunoaga lenei a Peresitene Boyd K. Packer o le Korama a Aposetolo e Toasefululua, ma valaaulia se tamaitiiti aoga e faitau leotele:

“O le olaga o se malaga agai i le aiga mo i tatou uma lava, e toe foi atu ai i le afioaga o le Atua i lona malo selesitila.

“O sauniga ma feagaiga e avea ma o tatou agavaa mo le taliaina i Lona afioaga. O le agavaa mo le mauaina o ia [sauniga ma feagaiga] o le tausinioga lea o le olaga atoa; o le tausia pe a mauaina, o le lui lea o le olaga nei” (“Covenants,” Ensign, Me 1987, 24).

Molimau atu o le mauaina o sauniga o le malumalu e moni lava “o se tausinioga o le olaga atoa.” O sauniga o le malumalu e fesoasoani ia i tatou e maua ai mea e manaomia mo le ulufale atu i le afioaga o le Tama Faalelagi.

Valaaulia tamaiti aoga e mafaufau loloto pe o avea le tapuai ma le mauaina o sauniga i le malumalu ma se faamuamua i o latou olaga. Fai ia i latou e tusi i lalo mea e mafai ona latou faia e taulai atili atu ai i feagaiga latou te osia pe o le a osia i le malumalu.

Faitauga a Tamaiti Aoga

Esoto19:3–6; Mataupu Faavae ma Feagaiga 84:19–21; 97:10–17; 109:12–26; 124:37–40, 55.
Boyd K. Packer, “O le Malumalu Paia,”Liahona, Oke. 2010, 29–35.