Lesona 4: O Le Aiga ma le Fuafuaga Sili o le Fiafia
Lesona 4
O Le Aiga ma le Fuafuaga Sili o le Fiafia
Folasaga
I le foafoaina o Atamu ma Eva, na faatulaga ai le aiga o le tagata i le lalolagi. O le pau o Atamu ma Eva na mafai ai ona aumai fanau i le lalolagi, ma o le Togiola lea e mafai ai ona tatou manumalo i taunuuga leaga o le Pau. O lenei lesona o le a fesoasoani i tamaiti aoga ia malamalama atili ai pe faapefea ona galulue faatasi le Foafoaga, Pau, ma le Togiola mo le faaolataga o aiga.
Na aoaoina e Mose le faamoemoega o le foafoaga o le lalolagi
Aumai se ipu oneone ma se ipu vai i le vasega. Valaaulia se tamaitiiti aoga e lolo se tamatamai lima i totonu o le vai ona sosoo ai lea ma totonu o le oneone. Ona fai lea i le tamaitiiti aoga e mate mai pe fia ni tamai oneone o loo pipii i le tamatamai lima.
E fia ni tamai oneone i lou manatu o loo i totonu o le ipu? I luga o matafaga o sami?
Fai i tamaiti aoga e sue le Mose 1, lea e faamaumau ai se faasologa o faaaliga na vaai i ai Mose. Fai i se tamaitiiti aoga e faitau leotele le Mose 1:27-29, ma valaaulia tamaiti aoga e vaavaai mo mea na faaali atu e le Alii ia Mose.
E tusa ai ma nei fuaiupu, o a mea na vaai i ai Mose i le faaaliga?
O a ni lagona atonu e oo ia te oe pe ana e aafia i lenei faaaliga?
Fai i se tamaitiiti aoga e faitau le Mose 1:30 ma faailoga fesili e lua na fesili atu ai Mose i le Alii (aisea ma na faapefea ona foafoaina le lalolagi ma mea o i ai). Fesoasoani i tamaiti aoga e atiina ae a latou tomai faalesuesuega o tusitusiga paia e ala i le uunaia o i latou e vaavaai mo fesili ma a latou tali i mau ao latou suesue.
Valaaulia tamaiti aoga e faitau le Mose 1:31-33 ma vaavaai pe na faapefea ona tali e le Alii fesili e lua a Mose.
E tusa ai ma le fuaiupu 31, aisea na foafoaina ai e le Atua le lalolagi?
O le a le aoaoga faavae ua aoao mai e fuaiupu 32–33 e uiga i le ala na foafoaina ai e le Tama Faalelagi lalolagi? (E tatau ona faailoa mai e tamaiti aoga le aoaoga faavae lenei: I lalo o le taitaiga a le Tama, na foafoaina ai e Iesu Keriso le lalolagi ma lalolagi e le ma faitaulia.)
Valaaulia tamaiti aoga e faitau le Mose 1:36-39 ma faailoa mai isi manaoga o Mose ma le tali a le Alii.
O le a le faamoemoega a le Tama Faalelagi i le foafoaina o le lalolagi ma e o nonofo ai? (O tamaiti aoga e tatau ona faailoa mai le aoaoga faavae lenei: Na foafoaina le lalolagi e fesoasoani e aumaia ai le tino ola pea ma le ola e faavavau o le tagata. Manatua o le tino ola pea o le ola lea faavavau i se tulaga toetu, ao le ola e faavavau o le ola lea e pei ona soifua le Atua, o lona uiga o le ola e faavavau o se vaega o se aiga e faavavau.)
E faapefea e le foafoaga o le lalolagi ona fesoasoani e faataunuu le galuega ma le mamalu a le Tama Faalelagi? (Faaaoga le Mataupu Faavae ma Feagaiga 49:15-17 e faaalia ai o le lalolagi na foafoaina o se nofoaga faaletino mo aiga.)
Molimau atu faapea o le lalolagi na foafoaina e fesoasoani ia aumaia ai le tino ola pea ma le ola e faavavau o fanau a le Atua. Ua fuafuaina le iunite o le aiga e fesoasoani ia i tatou ia maua le ola e faavavau, o lona uiga tatou te nonofo faavavau o se vaega o aiga e faavavau—o le soifuaga o loo soifua ai le Atua.
O le Pau o Atamu ma Eva o se vaega taua o le fuafuaga a le Atua
Faamatala atu faapea na tuuina atu e le Atua ia Atamu ma Eva ni faatonuga faapitoa i le Faatoaga o Etena. Fai i tamaiti aoga e faitau le leoa le Mose 3:16-17, ona fesili atu lea:
O le a le mea na tau atu e le Alii o le a tupu ia Atamu ma Eva pe a la aai i le fua o le laau faasaina?
Faamatala atu faapea ina ua aai Atamu ma Eva i le fua o le laau faasaina na la aumaia ai i tagata ni ituaiga oti se lua.
Tusi faamatalaga nei i le laupapa:
Oti faaleagaga = vavaeeseina mai le Atua
Oti faaletino = tuueseeseina o le agaga ma le tino faaletino
Valaaulia tamaiti aoga e suesue le 2 Nifae 2:19–25 ma fai se lisi o taunuuga faaopoopo o le Pau.
Na faapefea e le aiina o le fua faasaina ona mafai ai e Atamu ma Eva ma tagata ola uma ona avea atili e faapei o le Tama Faalelagi?
Faaali atu le saunoaga lenei a Elder Jeffrey R. Holland o le Korama a Aposetolo e Toasefululua:
“O le Pau o se vaega manaomia o le ata paia a le Tama Faalelagi. Ana leai lena, e leai ni fanau faaletino e fananau ia Atamu ma Eva, ma o le a leai se aiga o tagata e lagonaina le tuu faafeagai o mea ma le ola tuputupu ae, saolotoga lelei, ma le olioli i le toetutu, faaolataga, ma le ola e faavavau” (“O le Togiola a Iesu Keriso,” Liahona, Mat. 2008, 35).
Faitau le Alema 5:9-11 faatasi ma tamaiti aoga. Fesoasoani ia i latou e tau mai upumoni ua faamaumauina i nei fuaiupu e ala i le fesili atu:
O a upumoni na aoaoina e Atamu ma Eva ina ua tuliesea i laua mai le Faatoaga o Etena? (E tatau ona malamalama tamaiti aoga i upumoni nei: Ona o le Pau, ua mafai ai e Atamu ma Eva ona fanauina ni fanau ma mafai ai e a la fanau ona alualu i luma agai i le ola e faavavau.
Valaaulia se tamaitiiti aoga e faitau leotele le saunoaga lenei mai ia Elder Richard G. Scott o le Korama a Aposetolo e Toasefululua: Fai i tamaiti aoga e vaavaai mo mafuaaga na tatou fiafia ai e o mai i le lalolagi:
“O se tasi o taimi sili ona faatupumalosi o lou olaga—pe a faatumu oe i le naunau, fiafia, ma le faafetai—e le mafai ona e manatuaina. O lena aafiaga na tupu i le muai olaga ina ua tauina atu ia te oe, o le a oo mai lou taimi e tatau ai ona tuua le lalolagi o agaga ina ia e nofo ai i le lalolagi ma se tino faitino. Sa e iloaina e mafai ona e aoao mai aafiaga faaletagata ia lesona o le a aumaia ai le fiafia i le fogaeleele, lesona e taitaiina atu ai oe i le faaeaina ma le ola e faavavau e avea ai o se tagata mamalu, ua faaselesitilaina ai i le afioaga o lou Tama Paia ma Lona Alo Pele” (“Faamuamua Mea e Tatau Ona Faamuamua,” Liahona, Iulai 2001, 6).
E faapefea e le malamalama i faamoemoega o le Pau ma le olaga faitino ona aafia ai filifiliga e te faia i lenei olaga?
Faitau leotele le saunoaga lenei a Elder M. Russell Ballard o le Korama a Aposetolo e Toasefululua:
“O Ianuari na mavae atu nei na mafatia ai lo matou aiga ona o le maliu faafuasei o Nathan, le atalii o le ma atalii, i se vaalele na pa’u. Sa auauna atu ia Nathan i le Misiona a Baltic e faaaoga ai le gagana Rusia. Sa ia alofa i tagata ma na ia iloa o se faamanuiaga le auauna atu i le Alii. O le tolu masina talu ona mavae ona ou faatinoina lana faaipoipoga e faavavau i lana manamea o Jennifer, ae uma loa lona ola i lenei faalavelave” (“O le Togiola ma le Taua o le Agaga e Tasi,” Ensign po o le Liahona, Me 2004, 84).
Faamatala atu faapea ona o le Pau o Atamu ma Eva, ua tatou oo uma ai i aafiaga le lelei ma matautia e pei o le mea na tupu i le aiga o Elder Ballard. O le mea e lelei ai, na saunia e le Tama Faalelagi se ala ia faatoilalo ai taunuuga o le Pau.
Valaaulia tamaiti aoga e suesue le 2 Nifae 9:6–12, ma vaavaai pe na faapefea ona mafai ona fesoasoani le Togiola a Iesu Keriso ia i tatou taitoatasi e manumalo ai i le oti faaletino ma le faaleagaga. E mafai ona e uunaia tamaiti aoga e mafaufau e faailoga upu tatala ma fuaitau ia latou tusitusiga paia ao latou faitau. Ona valaaulia lea o tamaiti aoga e faasoa mai mea na latou mauaina.
O le a le aoaoga faavae ua aoaoina mai e nei fuaiupu e uiga i le sootaga i le va o le Pau o Atamu ma le Togiola a Iesu Keriso? (Ia mautinoa ua malamalama tamaiti aoga i le mea lenei:O le Togiola a Iesu Keriso ua saunia ai le ala mo fanau uma a le Tama Faalelagi e faatoilalo ai oti uma faaletino ma le faaleagaga. E mafai ona e uunaia tamaiti aoga e manatua le sootaga fai soo i le va o le Pau ma le Togiola ao latou suesueina a latou mau. Mafaufau e faasoa atu lenei upusii: “O se sootaga o se faia po o se sosooga i le va o manatu, tagata, mea po o gaoioiga. … O le faailoaina ma le agaga tatalo, aoao i ai, ma mafaufau loloto i na fesootaiga … e maua ai manatu musuia ma oa natia o le malamalama” [David A. Bednar, “A Reservoir of Living Water” (Faigalotu a le Church Educational System mo le au talavou matutua, Fep. 4, 2007), 4, lds.org/media-library].)
Fai i se tamaitiiti e faitau leotele le vaega lenei, o se faaauauina o le saunoaga a Elder M. Russell Ballard:
“O le faafuaseia ona aveesea o Nathan mai le matou mafutaga faalelalolagi na toe liliu uma atu ai o matou loto ma mafaufau i le Togiola a le Alii o Iesu Keriso. …
“O le taua o le soifua mai, soifuaga, Togiola i le Togalaau o Ketesemane, o le puapuagatia i luga o le Satauro, o le falelauasiga i le tuugamau o Iosefa, faapea ma le Toetu mamalu ua avea uma lava ma se mea moni faafouina mo i tatou. O le Toetu mai o le Faaola ua faamautinoa mai ai ia i tatou uma e faapea, o le a i ai foi se aso, o le a tatou mulimuli ai ia te Ia ma tatou oo foi i lo tatou toetutu. E maeu le filemu, e maeu le mafanafana lea e oo mai ia i tatou mai lenei meaalofa silisili e ala mai i le alofa tunoa o Iesu Keriso, le Faaola ma le Togiola o tagata uma. Talu ai ona o Ia, o lea ua matou iloa ai e mafai ona matou toe faatasia ma Nathan” (“O le Togiola ma le Taua o le Agaga e Tasi,” 84).
E faapefea ona faaalia i le tali atu a le aiga o Elder Ballard i le maliu o se tagata o le aiga le ala e mafai ai ona fesoasoani le Togiola a Iesu Keriso i aiga e onosaia taunuuga lautele o le Pau?
O le a le mea ua faia e le Togiola mo le aiga o Nathan ma mo tagata uma o o tatou aiga i le faavavau?
Faataga se taimi mo tamaiti aoga e mafaufau loloto ai i le fesili lenei ae lei valaau atu ia i latou e tali mai:
O a auala ua fesoasoani ai le Togiola a Keriso i lou aiga e faatoilalo nisi o taunuuga o le Pau? (O se vaega o le talanoaga, faamatala atu faapea na o i latou lava ua faaatoatoaina i le mana o le Togiola a Iesu Keriso o le a mafai ona ola faatasi faavavau i faaipoipoga ma aiga.)
Faaiu i le faaali atu ma valaaulia se tamaitiiti aoga e faitau lenei saunoaga a Sister Julie B. Beck, le peresitene aoao talu ai o le Aualofa:
“I totonu o Le Ekalesia a Iesu Keriso o le Au Paia o Aso e Gata Ai, e i ai so tatou talitonuga i le aiga, lea e faavae i le Foafoaga, le Pau, ma le Togiola. Ua saunia e le Foafoaga o le lalolagi se nofoaga e mafai ona nonofo ai aiga. Na foafoaina e le Atua se tane ma se fafine o ni afa tutusa taua se lua o se aiga. O se vaega o le fuafuaga a le Tama Faalelagi ina ia faamauina Atamu ma Eva, ma gaosia se aiga faavavau.
“O le Pau na saunia ai se ala mo le tuputupu ae o le aiga. Na avea Atamu ma Eva o ni taitai faaleaiga o e na filifili ina ia maua se aafiaga faaletino. Ona o le Pau ua mafai ai e i laua ona maua atalii ma afafine.
“O le Togiola e mafai ai e le aiga ona faamau faatasi e faavavau. Ua mafai ai ona tuputupu ma atoatoa le aiga e faavavau. O le fuafuaga mo le fiafia, ua taua foi o le ata o le faaolataga, o se fuafuaga na foafoaina mo aiga” (“Aoaoina o le Mataupu Faavae o le Aiga,” Liahona, Mat. 2011, 12).
Uunaia tamaiti aoga e mafaufau loloto ia latou molimau o le Foafoaga, le Pau, ma le Togiola ma mea e mafai ona latou faia e valaaulia ai le mana o le Togiola ia avea ma se mana sili atu i o latou olaga ma olaga o o latou aiga.