Seminare ma Inisitituti
Lesona 14: Avea ma Faaola i le Mauga o Siona

Lesona 14

Avea ma Faaola i le Mauga o Siona

Folasaga

E ala atu i le galuega o le malumalu, ua faia e le Alii ia mafai ai e i latou uma ua maliliu e aunoa ma le malamalama o le talalelei a Iesu Keriso “ona toe foi atu ai tagata taitoatasi i le afioaga o le Atua ma toe faatasia ai aiga e faavavau” (“O le Aiga: O se Folafolaga i le Lalolagi,” Ensign po o le Liahona, Nov. 2010, 129). I lenei lesona, o le a aoao ai tamaiti aoga pe faapefea e le agaga o Elia ona uunaia i tatou ia auai i le galuega o talafaasolopito o aiga ma avea ma “faaola … i le mauga o Siona” Opetaia 1:21).

Faitauga Faaopoopo

Fautuaga mo le Aoaoina Atu

Mataupu Faavae ma Feagaiga 138:27-37, 58-59

Galuega talai a Iesu Keriso i le lalolagi o agaga

Valaaulia tamaiti aoga e mafaufau i le tele o o latou tuaa ua maliliu e aunoa ma le faalogo i le talalelei po o le mauaina o sauniga faaola.

Faamanatu i tamaiti aoga faapea ina ua mavae le maliu o le Faaola, na Ia faaali atu i agaga o e ua maliliu. O faamatalaga o lenei asiasiga, e pei ona vaaia i le faaaliga e Peresitene Iosefa F. Samita (1838–1918), o loo faamaumauina i le Mataupu Faavae ma Feagaiga 138. (Matauina o se faataitaiga lenei o le fesoasoani i tamaiti aoga ia malamalama i le tusiga pe a suesueina tusitusiga paia.)

Valaaulia ni nai tamaiti aoga e feauauai i le faitauina leotele o le Mataupu Faavae ma Feagaiga 138:27-37. Valaaulia le vasega e mulimuli i le faitauga, ma vaai mo mea na faia e le Alii i Lana galuega talai i le lalolagi o agaga.

  • Na faapefea e le Faaola ona saunia le ala mo agaga ua maliliu ina ia faaolaina? (Faamamafa atu le upumoni lenei: Na faasafua atu, faatonutonu, ma saunia agaga amiotonu e talai atu le talalelei i e na i le falepuipui o agaga.

  • E tusa ai ma le fuaiupu 34, aisea e tatau ai ona talaiina atu mataupu faavae o le talalelei i e o i le falepuipui o agaga? (Faamatala atu o le “faamasino i latou e tusa ma tagata i le tino” o lona uiga o fanau uma a le Atua, ola pe oti, o le a maua le avanoa e talia ai le talalelei ma maua sauniga faaola ina ia mafai ona faamasinoina tagata uma i le tulaga lava e tasi. Tagai foi i le MF&F 137:7-9.)

Fai i tamaiti aoga e faitau le Mataupu Faavae ma Feagaiga 138:31, 58-59, ma vaai po o a mea e tatau ona fai e tagata ua aoaoina i le talalelei i le lalolagi o agaga ina ia avea ai ma “suli o le faaolataga.”

  • E tusa ai ma nei fuaiupu, o a mea e tatau ona fai e agaga o e ua maliliu ina ia avea ai ma “suli o le faaolataga”? (Fesoasoani e faamanino lenei mataupu faavae: A uma ona aoaoina tagata i le falepuipui o agaga i le savali o le talalelei, e mafai ona latou filifili e salamo ma talia sauniga sui o loo faia i malumalu.)

Faasoa atu le saunoaga lenei a Elder D. Todd Christofferson o le Korama a Aposetolo e Toasefululua:

Elder D. Todd Christofferson

“E i ai nisi ua le malamalama ma faapea o tagata ua maliliu ua ‘papatisoina i le faatuatuaga Mamona e aunoa ma lo latou malamalama i ai’ po o le faapea ‘o tagata sa auai i isi faatuatuaga e mafai ona tuu faamalosi i ai le faatuatuaga faaMamona mo i latou.’ Ua latou manatu ua tatou maua le mana e tuu faamalosi ai i se tagata mataupu o le faatuatua. O le mea moni lava, tatou te le faia faapea. Na tuuina mai e le Atua i le tagata lona saolotoga e filifili ai mai lava i le amataga. ‘O le tagata oti e salamo o le a togiolaina, e ala i le usiusitai i sauniga o le maota o le Atua’ [MF&F 138:58], ae sei vagana ua latou taliaina na sauniga” (“O le Togiolaina o e Oti ma le Molimau ia Iesu,” Liahona, Ian. 2001, 10).

Valaaulia tamaiti aoga e vaevae i ni pea ma faatino le faamatalaina i se tagata le lotu pe faapefea e le fuafuaga a le Atua ona mafai ai e tagata uma, o e ola ma e oti, ona maua le talalelei ma sauniga faaola.

Opetaia 1:21; Malaki 4:5–6; Mataupu Faavae ma Feagaiga 110:13–16; 128:18

E tatau ona avea i tatou ma “faaola … i le mauga o Siona” Opetaia 1:21)

Valaaulia tamaiti aoga e lisi ni auala e mafai ai ona tatou auai i le galuega o talafaasolopito o aiga. (O le sueina o igoa o aiga ma aveina i le malumalu, aoina mai ma faasaoina o ata ma tala o aiga, faasino igoa, ma isi foi mea.)

  • E faapefea e le auai i le galuega o talafaasolopito o aiga ona aafia ai o tatou lagona agai i tagata o aiga ua maliliu?

Ina ia fesoasoani i tamaiti aoga ia faailoa le mafuaaga o na lagona, faaali atu le saunoaga lenei a Elder David A. Bednar o le Korama a Aposetolo e Toasefululua, ma fai i se tamaitiiti aoga e faitau leotele:

Elder David A. Bednar

“Ua aoao mai Elder Russell M. Nelson ‘o se faaaliga mai le Agaga Paia o loo molimau i le uiga paia o le aiga’ (‘O le Taimi o se Seleselega Fou,’ Liahona, Iulai 1998, 39). O lenei uunaiga tupito a le Agaga Paia e ta’a’ina ai tagata ia iloa, faamaumau, ma faatauaina o latou augatuaa ma tagata o aiga—ua mavae ma le taimi nei. O le Agaga o Elia e aafia ai tagata i totonu ma fafo atu o le Ekalesia” (“O le a Liliu Atu Loto o Fanau I o Latou Tama,” Ensign po o le Liahona, Nov. 2011, 25).

Mafaufau e tusi le faamatalaga lenei o “le agaga o Elia” i le laupapa:

O le Agaga o Elia o se faaaliga o le Agaga Paia lea e uunaia i tatou ia iloa, faamatala, ma olioli i o tatou tagata o aiga i le tuanai ma le taimi nei.

Fai i se tamaitiiti aoga e faitau leotele le Malaki 4:5-6.

  • E tusa ai ma lenei fuaitau, o le a faapefea e le asiasiga folafolaina a le perofeta o Elia ona uunaia aiga o le lalolagi ma le galuega a le Alii o le faaolataga i aso e gata ai? (Faamanatu i tamaiti aoga faapea o Elia toetu na faaali atu ia Iosefa Samita ma Oliva Kaotui ia Aperila 3, 1836, i le Malumalu o Katelani ma tuuina atu ia i laua ki o le faamauga o le Perisitua Mekisateko [tagai MF&F 110:13-16].)

  • O le a le uiga o le liliu atu o loto o tama ma fanau i le tasi ma le isi?

Valaaulia se tamaitiiti aoga e faitau leotele faamatalaga o fuaiupu nei a le Perofeta o Iosefa Samita (1805-44):

Perofeta o Iosefa Samita

“O lenei, o le upu faaliliuinai i e tatau ona faaliliuina o le fusia po o le faamaufaailogaina. Ae o le a le faamoemoega o lenei misiona taua? pe o le a faapefea ona faataunuuina? E tatau ona auina mai ki, e tatau ona oo mai le agaga o Elia, … ma o mai i luga le Au Paia o ni faaola i le Mauga o Siona [tagai Opetaia 1:21].

“Ae e fapefea ona avea i latou ma faaola i luga o Mauga o Siona? E ala i le fausiaina o malumalu, faatuina o vai papatisoga, ma o agai atu i luma ma mauaina uma lava sauniga … e fai ma sui o o latou tuaa uma lava o e ua maliliu, ma faaolaina i latou … ; ma o i ua i ai le filifili e fusia faatasi ai loto o matua i fanau, ma fanau i o latou matua, lea e faataunuuina ai le misiona a Elia” (Aoaoga a Peresitene o le Ekalesia: Iosefa Samita [2007], 472–73).

  • O le a le saunoaga a Iosefa Samita i le mea o le a avea ai i tatou a o tatou mauaina sauniga o le malumalu e sui mo o tatou tagata ua maliliu? (Faaola i le Mauga o Siona.)

Faaali atu le faamatalaga lenei mai ia Peresitene Gordon B. Hinckley (1910–2008), ma fai atu i se tamaitiiti aoga e faitau leotele:

Peresitene Gordon B. Hinckley

“E avea moni lava i tatou ma faaola i le Mauga o Siona. O le a le uiga o lena mea? E pei lava ona ofoina atu e lo tatou Togiola Lona soifua e ositaulaga e fai ma sui o tagata uma, ma o le faia o lena mea ua avea ai ma o tatou Faaola, e faapena foi ia i tatou, i se auala itiiti lava, pe a tatou faia galuega e sui ai i totonu o le malumalu, e avea [i tatou] ma faaola ia i latou o loo i le isi itu, o ē ua leai se mea latou te toe mafaia e alualu ai i luma, vagana ua i ai se mea e fai mo i latou e i latou o loo i le fogaeleele” (“Tuleiga Faaiu,” Ensign po o le Liahona, Nov. 2004, 105).

Faamatala atu o Iesu Keriso na faia le Togiola e sui mo i tatou. Afai tatou te faia sauniga e sui mo i latou ua maliliu, ua avea i tatou ma “faaola i le mauga o Siona.” O le upu “Mauga o Siona” e mafai ona faatatau i ni nai nofoaga, e aofia ai le aai faalelagi o le Atua po o le aai o Ierusalema Fou (tagai Eperu 12:22; MF&F 76:66; 84:2–4; 1 Tupu 8:1).

  • O a auala e mafai ai e le malamalama i le fuaitau “faaola i le Mauga o Siona” ona uunaia i tatou ia sili atu mea e fai e fesoasoani ai i o tatou tagata o aiga i le tuanai ma le taimi nei ia maua faamanuiaga o le malumalu?

I le avea ai ma se vaega o le talanoaga, e mafai ona e faasoa atu le saunoaga lenei a Elder D. Todd Christofferson:

Elder D. Todd Christofferson

“O le sailia o o tatou augatuaa ma faia mo i latou o sauniga faaola ia latou te le mafai ona faia mo i latou lava, tatou te molimauina ai e le gata le Togiola a Iesu Keriso. Na ‘maliu Keriso mo tagata uma.’ [2 Korinito 5:15.]” “O le Faaolaina o e Oti ma le Molimau ia Iesu;” Liahona, Ian. 2001, 10).

Faamatala atu o le Mataupu Faavae ma Feagaiga 128 ua faamaumauina ai se tusi na tusia e le Perofeta o Iosefa Samita i le Au Paia lea na ia siiina mai ai Malaki 4:5-6ma saunia faamatalaga musuia i na fuaiupu.

Valaaulia tamaiti aoga e faitau filemu le Mataupu Faavae ma Feagaiga 128:18. Fai ia i latou e faailoga mafuaaga na tuuina mai e Iosefa Samita mo le auai i le galuega o le faaolaina o o tatou tagata o aiga ua maliliu. A uma ona talanoaina mea na faailoa mai e tamaiti aoga, talanoaina mea nei:

  • E mafai faapefea e a tatou taumafaiga ia saunia sauniga faaola mo o tatou tuaa ona aumaia foi le faaolataga mo i tatou?

I le laupapa, tusi upu nei: Saili, Ave, ma Aoao.

Fai i tamaiti aoga e faamatala mai pe faapefea e nei upu e tolu ona mafai ona faamatalaina laasaga ua uunaia i tatou e fai ao tatou faia galuega o le malumalu ma le talafaasolopito o aiga. (Ia mautinoa ua faailoa mai e tamaiti aoga mea nei: Sailima saunia igoa mo galuega o sauniga o le malumalu; ave na igoa i le malumalu ma faia sauniga sui i le malumalu mo na tagata;aoao isi ia faia foi na mea.)

video iconIna ia fesoasoani i tamaiti aoga ia malamalama i faamanuiaga e oo mai le mulimuli i nei laasaga, faaali atu ma fai i se tamaitiiti e faitau leotele le saunoaga lenei a Elder David A. Bednar, pe faaali le vitio “The Promised Blessings of Family History” (lds.org/topics/family-history/fdd-cook/blessings-video). A o faitau pe matamata tamaiti aoga, valaaulia i latou e vaai mo faamanuiaga folafolaina e oo mai i le auai i le galuega o talafaasolopito o aiga.

Elder David A. Bednar

“Ou te valaau atu i tupulaga talavou o le Ekalesia ina ia aoao ma ia iloa le Agaga o Elia. Ou te faamalosiau atu ia te outou ia suesue, ia sailia o outou augatama, ma ia sauniuni outou lava e faia papatisoga sui i le maota o le Alii mo o outou aiga ua maliliu (tagai i le MF&F 124:28–36). Ma ou te uunaia outou ia fesoasoani atu i isi tagata ia iloa talafaasolopito o o latou aiga.

“A outou tali atu ma le faatuatua i lenei valaaulia, o le a liliu atu o outou loto i tamā. … O le a faateleina lou alofa ma lou lotofaafetai mo ou augatama. O le a loloto ma mausali lau molimau ma lou liua i le Faaola. Ma ou te folafola atu ia te oe o le a puipuia oe mai uunaiga faateleina a le tiapolo. A o outou auai i le faatinoga ma outou fiafia i lenei galuega paia, o le a malupuipuia outou i lo outou talavou ma i o outou olaga” (“O le a Liliu Atu Loto o Fanau i o Latou Tama,” 26–27).

  • O a faamanuiaga e oo mai ia i latou e faia galuega faalemalumalu ma talafaasolopito o aiga?

Fesili atu pe i ai ni tamaiti aoga e mafai ona faasoa mai ni aafiaga patino i le mauaina o faamanuiaga i le auai i galuega o talafaasolopito o aiga.

  • Mo outou ua maua sauniga mo tuaa, o a ni lagona e mafai ona outou faasoa mai e uiga i le auai i nei aafiaga paia?

Valaaulia tamaiti aoga e suesue o latou talafaasolopito e faaoga ai punaoa ua maua i le FamilySearch.org ma ia saili le fesoasoani mai se fautua o talafaasolopito o aiga i la latou uarota po o le paranesi pe a manaomia. Uunaia tamaiti aoga e faia se fuafuaga e saili igoa o o latou tuaa,ave igoa o nei tuaa i le malumalu ma faia sauniga mo i latou, maaoao isi ia faia foi lena lava mea.

Faitauga a Tamaiti Aoga