Seminare ma Inisitituti
Lesona 27: O Valoaga Faaperofeta e Faatatau i le Aiga

Lesona 27

O Valoaga Faaperofeta e Faatatau i le Aiga

Folasaga

Ua lapatai mai perofeta o aso nei e faapea “o le faamalepeina o le aiga o le a aumai ai i tagata taitoatasi, alaalafaga, ma malo, faafanoga ia na ulua’i ta’u mai e perofeta anamua ma aso nei” “O le Aiga: O se Folafolaga i le Lalolagi,” Ensign po o le Liahona, Nov. 2010, 129). O lenei lesona ua faamamafaina ai faapea o aiga o le a puipuia pe afai latou te usiusitai i poloaiga a le Atua. Ua folafolaina mai le mana faaleagaga e fesoasoani i matua amiotonu e tausia a latou fanau i aso e gata ai.

Faitauga Faaopoopo

Fautuaga mo le Aoaoina Atu

2 Timoteo 3:1-7, 13

O taunuuga o le a oo mai pe a tuulafoaia le aiga

Valaaulia ni nai tamaiti aoga e faasoa mai ni nai faataitaiga o tulaga po o nofoaga e mafai ona vaaia ai lapataiga (o faataitaiga e ono aofia ai faailoilo o taavale, fagu vai faafomai, po o fagu vailaau oona.)

  • O a ni taunuuga e ono tulai mai pe a le amanaiaina nei lapataiga?

  • O a nisi o lapataiga ua tuuina mai e perofeta e uiga i tulaga pagatia faaletino ma faaleagaga ua i ai i o tatou aso?

Fai i se tamaitiiti aoga e faitau leotele le 2 Timoteo 3:1–7 ma le 13 a o vaavaai le vasega mo tulaga lamatia na lapatai mai ai le Aposetolo o Paulo o le a i ai i aso e gata ai.

  • O fea o tulaga lamatia ua faamatalaina e Paulo ua e vaaia pe faalogo i ai?

  • O a aafiaga o nei tulaga lamatia i tagata, faaipoipoga, ma aiga?

Fai i se tamaitiiti aoga e faitau le saunoaga lenei a Elder Robert D. Hales o le Korama a Aposetolo e Toasefululua. Valaaulia le vasega e faalogo mo mafuaaga ua matuai tulimatai atu ai Satani i le faaumatiaina o aiga.

Elder Robert D. Hales

“Ona o le taua o le aiga i le fuafuaga e faavavau o le fiafia, ua taumafai ai faapitoa Satani e lepetia le tulaga paia o le aiga, uunaia amioga le mama ma solia le tulafono paia o le legavia, ma faalotovaivai matua mai lo latou avea o le fanauina ma tausia o fanau o se mea e aupito sili ona faamuamua.

“E taua naua le iunite faaleaiga i le fuafuaga o le faaolataga, na tuuina mai e le Atua se lapataiga … o le faamalepeina o le aiga o le a aumai ai i tagata taitoatasi, alalafaga, ma malo, ma perofeta anamua ma aso nei” (“O Le Aiga e Faavavau,” Liahona, Ian. 1997, 65).

Faamamafa atu le mataupu faavae lenei: “O le faamalepeina o le aiga o le a aumai ai i tagata taitoatasi, alaalafaga, ma malo, faafanoga ia na ulua’i ta’u mai e perofeta anamua ma aso nei” (“O Le Aiga: O se Folafolaga i le Lalolagi,” Ensign po o le Liahona, Nov. 2010, 129). Faamanatu i tamaiti aoga faapea o lenei lapataiga e sau mai le folafolaga i le aiga.

Tusi le faamatalaga lenei i le laupapa:

Faamalepeina o le aiga

Taunuuga

Valaaulia tamaiti aoga e mafaufau e uiga i faataitaiga ua latou vaaia faapea o le “faamalepeina o le aiga” o loo tupu i le salafa o le lalolagi. (E mafai ona aofia ai mea nei: faateleina o faaipoipoga tatala, faapau pepe, ma le sauaina; faaitiitia faaipoipoga ma faaitiitia fanau e fananau i ulugalii faaipoipo; ma ua tele atu aiga ua le manuia.) Fai ia i latou e lisi i le laupapa i lalo o le autu “Faamalepeina o le aiga.”

Valaaulia tamaiti aoga e mafaufau e uiga i faataitaiga o taunuuga faaletagata ma faalealaalafaga na e mafai ona oo mai o se taunuuga o le faamalepeina o le aiga. (E mafai ona aofia ai mea nei: le maua le Agaga, faanoanoa ma le le fiafia, faateleina le aofai o soligatulafono, nofosala o talavou, ma le le maua o le filemu ma le mautu lelei i le alaalafaga.) Fai ia i latou e lisi faataitaiga i le laupapa i lalo o le autu “Taunuuga.”

Ona fai atu lea o fesili nei:

  • E mafai faapefea e le tumau i le aoaoga ma mataupu faavae i le folafolaga i le aiga ona fesoasoani i tagata, aiga, alaalafaga, ma nuu ia aloese ai mai nei taunuuga?

1 Nifae 14:14–17; 22:16–17; Mataupu Faavae ma Feagaiga 97:22–28

E i ai le faamoemoe mo aiga

Faamatala i tamaiti aoga e ui lava i le amioleaga ua faatumuina ai le lalolagi i le aso, e le o tuai tele lava le faamalosia o aiga. E mafai ona latou faia se eseesega i o latou lava aiga, uarota po o paranesi, ma alaalafaga. Molimau atu faapea o loo i ai le faamoemoe mo tagata ma aiga o e usiusitai i poloaiga a le Alii.

Fai i tamaiti aoga e faitau le leoa le Mataupu Faavae ma Feagaiga 97:22–28, ma vaavaai mo mea e tatau ona tatou faia e aloese ai mai le tauimasui o le Alii ma taunuuga na e oo mai ona o le agasala. (Faamanino atu faapea i nei fuaiupu o Siona e faatatau i Le Ekalesia a Iesu Keriso o le Au Paia o Aso e Gata Ai ma ona tagata.) Atonu e te manao e fautua atu i tamaiti aoga e faailoga le upu afai i soo se taimi e ta’ua ai i nei fuaiupu. (Fesoasoani i tamaiti aoga ia malamalama faapea o le faailoaina o fuaitau mafuaaga-ma-le taunuuga po o le afai/ona o se tomai aoga tau suesuega faaletusitusiga paia.)

  • E mafai faapefea ona e aoteleina nei fuaiupu i se fuaitau faigofie o le mataupu faavae? (E tatau ona atagia mai tali a tamaiti aoga le mataupu faavae lenei: Afai tatou te usiusitai i poloaiga uma, e mafai ona tatou maua faamanuiaga silisili ma sosola ese mai le tauimasui a le Alii.

Faitau le saunoaga lenei a Elder Bruce R. McConkie (1915-85) o le Korama a Aposetolo e Toasefululua:

Elder Bruce R. McConkie

“Matou te le fai atu o le Au Paia uma o le a saogalemu ma faasaoina mai le aso e oo mai ai le faatafunaga. Ae tatou te faapea atu e leai se folafolaga o le saogalemu ma e leai se folafolaga o le puipuiga sei vagana mo i latou e alolofa i le Alii ma o loo saili e fai mea uma ua ia poloai mai ai. …

“Ma tatou te sii ae le leo o le lapataiga ma faapea atu: Ia faalogo; sauniuni; matau ma ia saunia. E leai se saogalemu i soo se ala sei vagana ai le ala o le usiusitai ma le gauai ma le amiotonu.

“Aua ua fetalai mai ai le Alii: ‘O le a oo mai le sasa a le Alii i le po ma le ao, ma o le tala o lea sasa o le a faaatuatuvale ai tagata uma; ioe, o le a lē taofia seia afio mai le Alii; …

“‘E ui i lea, e sao Siona pe afai e vaai o ia ia fai mea uma o soo se mea ua Ou poloaiina ai o ia’ [MF&F 97:23, 25]” (“Stand Independent above All Other Creatures,” Ensign, Aug po o le Oct 1979, 93–94).

  • E mafai faapefea e lenei fuaitau ona fesoasoani e uunaia se aiga e usiusitai i poloaiga a le Alii?

Faamanatu i tamaiti aoga na vaai Nifae i ni nai faaaliga o aso e gata ai. I na faaaliga, na ia vaai ai o le a puipuia e amiotonu.

Fai i tamaiti aoga e faitau le 1 Nifae 14:14–17 ma le 22:16–17, ma vaavaai mo auala o le a puipuia ai le Au Paia. (Manatua: O nei fuaitau ua faatumutumuina le autu faatusipaia masani faapea e aumaia e le usiusitai le folafolaga a le Alii o le puipuiga. Ua faamamafa mai e Elder David A. Bednar le taua o le suesue mo na “fesootaiga, mamanu, ma autu” faaletusitusiga paia [“A Reservoir of Living Water” (Faigalotu a le Church Educational System mo talavou matutua, Fep. 4, 2007), 3, lds.org/media-library]. O lenei autu po o le mamanu e faapitoa lava le taatele i le Tusi a Mamona.)

  • E faapefea ona tuuina atu e tusitusiga a Nifae le faamoemoe ia te oe?

Faasoa atu le saunoaga lenei a Elder Bruce D. Porter o le Fitugafulu. Valaaulia tamaiti aoga e faalogo mo faamanuiaga o le a tuuina atu i matua faamaoni i aso e gata ai:

Elder Bruce D. Porter

“E tusa lava po o le a le tulaga o le lumanai, ua faauuina e le Atua faapea i le tisipenisione o le atoatoa o taimi, o matua o le Ekalesia o le a tuuina atu i ai le mana e fesoasoani ai e faaolaina a latou fanau mai le pogisa o siomia ai i latou. A o liliu atu loto o tama ma tina ia latou fanau, ma loto o fanau i o latou matua, o le a iu lava ina tatou molimauina le tupu ae o se tupulaga ua faamamaina ma saunia e faafetaiai le Faaola i Lona afio mai. O le manumalo i le malo o le Atua i aso e gata ai o le a avea ma manumalo e le gata o le Ekalesia o se faalapotopotoga ae o le tai sefulu o afe o aiga taitasi o e na manumalo i le lalolagi e ala i le faatuatua” (“Defending the Family in a Troubled World,” Ensign, June 2011, 18).

  • O le a le faamanuiaga ua folafolaina i matua o lenei tisipenisione o e o loo saili e tausia a latou fanau i le amiotonu?

  • Ua faapefea ona e vaaia le Alii o faamanaina matua ia latou taumafaiga e faamalosia ma puipuia a latou fanau mai le pogisa o le lalolagi?

Valaaulia tamaiti aoga e mafaufau po o a uunaiga po o malosiaga ua galulue e faaumatia o latou aiga, ma pe faapefea e Satani ona taumafai e taofia i latou mai le galulue agai i le mauaina o o latou lava aiga i le lumanai. Uunaia tamaiti aoga e mafaufau loloto i mea e mafai ona latou faia ina ia maua ai le fesoasoani a le Alii e faamalosia ai i latou lava ma puipuia ai o latou aiga.

Faitauga a Tamaiti Aoga