Seminare ma Inisitituti
Lesona 9: O Matafaioi ma Tiutetauave Paia o Alii

Lesona 9

O Matafaioi ma Tiutetauave Paia o Alii

Folasaga

O se vaega taua o Lana fuafuaga o le fiafia, ua tofia ai e le Tama Faalelagi alii ia avea ma tane ma tama. O lenei lesona e taulai atu i o latou matafaioi: “I le fuafuaga paia, e tatau ona pulefaamalumalu tama i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga” “O le Aiga: O se Folafolaga i le Lalolagi,” Ensign po o le Liahona, Nov. 2010, 129).

Faitauga Faaopoopo

Fautuaga mo le Aoaoina Atu

Efeso 5:25

O alii e tatau ona faaipoipo ma ia olioli ia latou ava

Amata le vasega i le fesili atu:

  • O ai ni alii na avea ma ni uunaiga i lou olaga? Aisea na latou matuai aafia ai lava oe?

Faamatala atu faapea o lenei lesona o le a talanoaina matafaioi paia ua atofaina atu i alii. E leai lava nisi matafaioi e sili atu le taua mo se alii nai lo le matafaioi o se tane ma se tama. Ao saili e alii le faataunuuina ma le amiotonu o nei matafaioi, latou te avea atili e faapei o le Tama i le lagi.

Fai i se tamaitiiti aoga e faitau leotele le Efeso 5:25.

  • O le a le mataupu faavae ua e aoaoina mai i lenei mau e uiga i le ala e tatau ona amioai ai tane? (E ui atonu latou te faaaogaina ni upu eseese, e tatau ona faailoa mai e tamaiti aoga lenei mataupu faavae: O tane e tatau ona alolofa i a latou ava e pei ona alofa Iesu Keriso i le Ekalesia.)

  • O a nisi o auala ua faaalia ai e Iesu Keriso Lona alofa mo le Ekalesia?

  • O a mea e mafai ona fai e tane e mulimuli ai ia Iesu Keriso i le ala latou te taulimaina ai a latou ava?

Faaali atu le faamatalaga lenei mai ia Peresitene Spencer W. Kimball (1895–1985), ma fai atu i se tamaitiiti aoga e faitau leotele:

Peresitene Spencer W. Kimball

“Na matua alofa lava Keriso i le ekalesia ma ona tagata lea na ia onosaia ai ma le loto i ai puapuaga mo i latou, puapuagatia i le faalumaina matautia mo i latou, na tatalia ma le filemu tiga ma le sauaina faaletino mo i latou, ma mulimuli lava ona tuuina atu lona soifua pele mo i latou.

“Pe a saunia le tane e taulimaina lona aiga i lena auala, e le gata i le ava ae o le aiga atoa o le a tali mai i lana taitaiga” (“Home, the Place to Save Society,” Ensign, Ian. 1975, 5).

  • O a ni manatu ua e maua ao e mafaufau i le saunoaga a Peresitene Kimball?

  • O a ni auala e ono faia ai e se tama ni osigataulaga mo lona aiga i o tatou aso?

Molimau atu e finagalo le Tama Faalelagi ia tauivi alii ia avea ma ni tane amiotonu.

Efeso 5:23; Mataupu Faavae ma Feagaiga 121:36–46

O tama e tatau ona pulefaamalumalu i le amiotonu

Fai i tamaiti aoga e suesue le parakalafa lona fitu o “O le Aiga: O se Folafolaga i le Lalolagi” e aoao ai i mea ua faamoemoe le Tama Faalelagi i tama e fai.

  • O le a le uiga o le upu pulefaamalumalu? (E tuuina atu le taiala ma le taitaiga i isi.)

  • E faapefea ona fesoasoani i se alii le manatua o le fuaitau “i le fuafuaga paia” e faataunuu ai tiutetauave ua tuuina mai e le Atua i tama?

Ina ia fesoasoani i tamaiti aoga ia malamalama atili pe faapefea e se tama ona pulefaamalumalu i le aiga, fai i se tamaitiiti aoga e faitau leotele le Efeso 5:23. Ona fai atu lea i se isi tamaitiiti aoga e faitau le saunoaga lea a Peresitene Ezra Taft Benson (1899-1994):

Peresitene Ezra Taft Benson

“Ua faailoa mai e le Aposetolo o Paulo ‘o le tane o le ulu ia o le ava, pei o Keriso foi o le ulu ia o le ekalesia’ Efeso 5:23; faaopoopo le faamamafa). O le faataitaiga lena e tatau ona tatou mulimuli i ai i lo tatou matafaioi o le pulefaamalumalu i le aiga. Tatou te lei tau i se mea na taitai ai e le Faaola le Ekalesia ma se aao saua ma le faalealofa. Tatou te lei tau i se mea na taulimaina ai e le Faaola Lana Ekalesia ma le le faaaloalo po o le tuulafoai. Tatou te lei tau i se mea e faapea na faaaoga ai e le Faaola le pule malosi po o le fai faamalosi ina ia ausia ai Ona faamoemoega. E leai lava se mea na tatou tau i ai e faapea na faia ai e le Faaola soo se mea sei vagana ai mea faagaeetia, siitia, faamafanafana, ma faaea ai le Ekalesia. … O Ia o le faataitaiga e ao ona tatou mulimuli ai ao tatou taimuaina le faaleagaga i o tatou aiga” (Aoaoga a Peresitene o le Ekalesia: Ezra Taft Benson [2014], 196).

  • O le a faapefea ona e faamatalaina se mataupu faavae na aoaoina e le Aposetolo o Paulo ma Peresitene Benson? (E tatau i tamaiti aoga ona faamatala se mataupu faavae e pei o lenei:Pe a faaaoga e se alii le perisitua ma le agavaa i lona aiga, e mafai ona ia faatosinaina i le amiotonu lana ava ma le fanau. Ma le isi foi, faasoa atu lenei mataupu faavae i tamaiti aoga: Ao saili alii e faataunuu ma le amiotonu ia matafaioi o se tane ma se tama, e avea atili i latou faapei o lo latou Tama i le Lagi.

Ina ia faamatalaina atili le ala e pule faamalumalu ai se tane ma se tama i le aiga, mafaufau e faasoa atu le saunoaga lenei a Peresitene Howard W. Hunter (1907–95):

Peresitene Howard W. Hunter

“E ala i se tofiga mai le lagi, o le tiutetauave e pulefaamalumalu i le aiga ua i ai lea i e umia le perisitua (tagai Mose 4:22). Na faamoemoeina e le Alii ia avea le ava ma se fesoasoani i le tane, o le upu (meet o lona uiga o le tutusa)—o lona uiga, o se soa e tutusa ma tatau ai ina ia avea ma se soa atoatoa. O le pulefaamalumalu i le amiotonu, e manaomia ai se tiutetauave fetufaai i le va o le tane ma le ava; lua te galulue faatasi ai i le malamalama ma auai i mataupu uma uma faaleaiga. O le faia toatasi e se tane po o lona faia foi e aunoa ma se manatu i lagona ma fautuaga a lana ava i le puleaina o le aiga, o le faaaogaina lea ma le le tonu o le pule” (“Avea ma Tane ma Tama Amiotonu,” Liahona, Nov. 1994, 59–60).

Fai atu i tamaiti aoga e sue i le Mataupu Faavae ma Feagaiga 121:36-46. Fautua atu ia latou faafesootai le Efeso 5:23, 5 ma nei fuaiupu. (Fesoasoani ia i latou e atiina ae le tomai o le suesuega faaletusitusiga paia o le faafesootai o mau e ala i le valaauliaina o i latou e fatu ni mau fesootai i soo se taimi lava talafeagai.)

Tuu atu i tamaiti aoga ni nai minute e suesue ai le Mataupu Faavae ma Feagaiga 121:36-39 ma mafaufau pe faapefea e le taitaiga ua faamatalaina i nei fuaiupu ona feteenai i le ituaiga o taitaiga ua faataitaia e Iesu Keriso.

  • O le a sou manatu i le uiga o le fuaitau “o aia a le perisitua”? (Pe a maua e se alii le perisitua, e tuuina atu e le Atua ia te ia ni aia ma pule faapitoa. E faatoa mafai e le alii ona faaaoga nei aia pe a ia faatinoina i le amiotonu.)

  • O le a le mea e tupu pe a le ola amiotonu se e umia le perisitua? (E aveese e le Atua mana o le lagi mai lena alii, ma e le toe mafai ona faaaoga e le alii le pule o le perisitua; ua faanoanoa le Agaga Paia.)

Ina ia malamalama i le ala e tatau ona taitai ai e se tama lona aiga, fai i ni nai tamaiti aoga e feauauai i le faitauina leotele o le Mataupu Faavae ma Feagaiga 121:41-46.

  • O a nisi o uiga faaKeriso ua faamatalaina i nei fuaiupu? Aisea i lou manatu e mafai ai e se tama o loo i ai nei uiga ona maua mai mana o le lagi?

  • O le a mafai faapefea e nei uiga faaKeriso ona fesoasoani i tama ia pulefaamalumalu i o latou aiga? (Atonu e mafai ona e faamanino atu o nei uiga faaKeriso e tatau foi ona atiina ae e tamaitai.)

  • Faamatala le lagona e ono maua e le toalua po o se atalii a se alii e saili e mulimuli i le faataitaiga a le Tama Faalelagi ma Iesu Keriso i le ala na te taitaia ai lona aiga.

Faaali atu ma faasoa atu le saunoaga lenei na tusia e le Korama a Aposetolo e Toasefululua i le 1973:

“O le tulaga faatama o se taitaiga, o le ituaiga sili ona taua o taitaiga. Sa faapea lava i le taimi muamua; ma o le a faapea lava ona i ai. Tama, faatasi ai ma le fesoasoani ma le fautuaga a lau soa faavavau, e te pule faamalumalu i le aiga. E le taua po o oe e sili ona agavaa pe sili ona atoatoa, ae o se mataupu o le tulafono ma le tofiga [paia]” (“Father, Consider Your Ways,” Ensign, June 2002, 16).

  • Tuafafine, o le a le mea e mafai ona outou faia e uunaia ai alii talavou e faalautele o latou matafaioi paia ma tiutetauave i o latou aiga i le lumanai?

  • O a mea e mafai ona outou faia taitoatasi—alii ma tamaitai foi—i le taimi nei ia sili atu ai ona saunia e taitai i lou aiga i le lumanai?

Mataio 2:13–16; 1 Timoteo 5:8; Mataupu Faavae ma Feagaiga 75:28; 83:2, 4

E ao i tama ona tausia ma puipuia o latou aiga.

Fai atu i tamaiti aoga e faitau le 1 Timoteo 5:8 ma le Mataupu Faavae ma Feagaiga 75:28; 83:2, 4, ma faailoa mai se isi tiute taua o tama. (Atonu e te fautua atu i tamaiti aoga e faafesootai nei fuaitau.

  • Aisea e te manatu ai e faamoemoe le Alii i tama ina ia saunia mea e manaomia o le olaga mo o latou aiga? (Ao tali mai tamaiti aoga, faasino atu faapea i totonu o aiga o loo i ai se tina nofofua, o le tina e mafai ona saunia [mea e manaomia] mo lona aiga.)

  • O a ni uiga e ono i ai i nei fuaitau mo se alii talavou e lei faaipoipo?

Fai i se tamaitiiti aoga e faitau le faamatalaga lenei mai ia Peresitene Gordon B. Hinckley (1910–2008):

Peresitene Gordon B. Hinckley

“Galue ina ia maua aoaoga. Ia maua mai uma aoaoga e te mafaia. O le a totogia oe e le lalolagi e tusa ai ma le mea latou te manatu ai ia te oe. … O sou tiute faapitoa le tausia o lou aiga” (“Ola Agavaa mo le Teine Aupito Lalelei O Le a E Faaipoipo I ai I se Aso ,” Liahona, Iulai 1998, 57).

Faamamafa atu i tamaiti aoga faapea mo le saogalemu o le lumanai o o latou aiga, e taua tele mo alii ma tamaitai talavou uma ona faaaoga lelei lenei taimi o o latou olaga ina ia maua le tele o le aoaoga ma le aoaoina o galuega e mafai ona latou maua.

Faasino atu faapea i le folafolaga i le aiga, na aoao mai taitai o le Ekalesia e faapea o tama e tatau ona tausia ma puipuia o latou aiga.

  • O a nisi o faigata o loo lamatia ai aiga i aso nei?

  • O faapefea ona e vaaia tama amiotonu o puipuia o latou aiga?

Faaali atu le faamatalaga lenei mai ia Peresitene Howard W. Hunter, ma fai atu i se tamaitiiti aoga e faitau leotele:

Peresitene Howard W. Hunter

“O se tama amiotonu e puipui i lana fanau i lona taimi ma auai ia latou gaoioiga faalefiafiaga, faaleaoaoga ma faaleagaga ma o latou tiutetauave” (“Avea ma Tane ma Tama Amiotonu,” Liahona, Ian. 1995, 59).

  • E mafai faapefea ona e faaaogaina lenei fautuaga i lou aiga i le lumanai po o lou aiga i le taimi nei?

Valaaulia tamaiti aoga e mafaufau pe o le a faapefea ona latou saili ia faamalosia ma puipuia o latou aiga ona faamaumau lea o o latou manatu.

Faamatala atu faapea e mafai ona tatou aoao se mataupu faavae taua mai i le tausiga a Iosefa o Iesu ao laitiiti. Fai i se tamaitiiti aoga e faitau le Mataio 2:13-16, ma vaai mo mea na fai e Iosefa e puipui ai le tamaitiiti o Keriso mai le lamatia.

Tau atu i tamaiti aoga faapea e ui lava e le foliga mai o le a latou manaomia le toe malaga ese ina ia puipuia ai o latou aiga, e mafai ona latou faatusatusa pe faaaoga nei fuaiupu ia i latou lava i le faauigaga o nisi o faamatalaga taua:

  • O le a le mea o loo tau atu e le Alii ia Iosefa i le fuaiupu 13?

  • O le a le taimi ma na faapefea ona tali atu Iosefa i lenei lapataiga?

  • O a auala e mafai ai e tama ona mulimuli i le faataitaiga a Iosefa i le puipuia o o latou aiga? (Ia mautinoa ua malamalama tamaiti aoga i lenei mataupu faavae: Ao saili tama ma mulimuli i le taitaiga mai le Alii, e mafai ona sili atu lo latou puipuia o o latou aiga. )

O Alii ma Tamaitai e Tatau Ona Faataunuuina le Fuafuaga a le Alii

Faaali atu le saunoaga lenei a Elder Richard G. Scott o le Korama a Aposetolo e Toasefululua, ma fai i se tamaitiiti aoga e faitau leotele:

Elder Richard G. Scott

“Afai o oe o se alii talavou o tausaga tatau ai ma e lei faaipoipo, aua le maimauina le taimi e tulimatai ai mea le aoga. Ia faagasolo le olaga ma taulai atu i se faaipoipoga. Aua nei ola i le olaga e aunoa ma ni taumafaiga ia alualu i luma. Alii talavou, fai se misiona tauaogaina. Ona avea lea ma au faamuamua aupito maualuga le sailia o sau soa agavaa e faavavau. …

“… O le faaipoipoga e maua ai se faatulagaga silisili mo le faatoilaloina o soo se tulaga e manatu faapito pe manatu ifo na o oe lava. Ou te manatu o se tasi o mafuaaga ua fautuaina ai i tatou ina ia faaipoipo vave i le olaga, ina ia aloese ai mai le atiina ae o ni uiga lē talafeagai e faigata ona toe suia” (“O Faamanuiaga e Faavavau o le Faaipoipoga,” Ensign po o le Liahona, Me 2011, 95–97).

  • I le lalolagi i aso nei, o a ni faigata o i ai i alii ma tamaitai talavou ua faatuai ai ona faaipoipo?

  • Aisea e saili ai le fili e faatosina ese alii ma tamaitai mai le faaauauina o sootaga na e mafai ona taitai atu i le faaipoipoga ma le fanauina o fanau?

  • Aisea e te manatu ai e fautua mai ai pea taitai o le Ekalesia i alii ina ia saili malosi mo sootaga na e taitai atu i le faaipoipoga?

(Manatua: I lenei talanoaga, ia faaeteete i le mea moni faapea o nisi alii talavou i lau vasega atonu e le faaipoipo lava pe avea ma tama ona o tulaga e le mafai ona latou taulimaina.)

Ao e faaiu, mafaufau i tulaga o au tamaiti aoga. O a mea e mafai ona e luitauina ai au tamaiti aoga alii e fai e faataunuu ai o latou tiute ia avea ma tane po o tama? E mafai ona e valaaulia au tamaiti aoga e taulai atu i le atiina ae o se uiga mama faaKeriso faapitoa, e pei o le onosai po o le faaalia o le alofa i isi, lena o le a manuia ai o latou aiga.

Faitauga a Tamaiti Aoga