Ia Tatou Faatamatane

Elder D. Todd Christofferson

O Le Au Peresitene o le Au Fitugafulu

O i tatou o e o loo umia le perisitua a le Atua … e ao ona tatou tulai ese mai le efuefu o le faaloloto ma ia faatamatane!

I tausaga ua mavae, a o matou laiti ma o’u uso, sa faia ai se taotoga tele o lo matou tina ona o le kanesa. Sa toetoe lava a maliu ai o ia. O le tele o musele o lona ua ma le tauau sa aveeseina, ma sa umi se taimi sa matuai tiga ai o ia pe a faaaoga lona lima taumatau.

I se tasi taeao pe tusa ma se tausaga talu ona maea le taotoga, sa ave ai e lo’u tama ia Tina i se faleoloa ma talosaga atu i le pule ina ia faaali atu i lo’u tina le auala e faaaoga ai se masini sa ia te ia mo le auliina o lavalava. O le igoa o le masini o le Ironrite. Sa faagaoioia mai se nofoa e ala lea i le oomiina o vae o le masini i tulivae o se tasi ina ia tuutuu ifo ai i lalo le lola i le uamea vevela ma feliuai, e tuu ai i totonu ofutino, ofuvae, ofu o tamaitai, ma isi lavalava. E mafai ona outou iloaina ai o le a matuai faigofie ai lava le auliga (lea sa matuai tele lava i totonu o lo matou aiga e toalima tama), aemaise lava mo se tamaitai sa faatapulaa le faaaogaina o lona lima. Sa te’i Tina ina ua ta’u atu e Tama i le pule o le faleoloa o le a latou faatauina le masini ona totogi lea i tinoitupe. E ui i le lelei o le totogi o tama i le avea ai ma se fomai manu, ae o le taotoga o Tina ma ana vai sa oo ai i laua i se tulaga faigata o mea tau tupe.

I le agai atu i le fale, sa le fiafia lo’u tina: “E mafai faapefea ona tatou faatauina? O fea na aumai ai le tupe? O le a faapefea nei la ona tatou ola?” Na iu ina ua ta’u atu e Tama ia te ia faapea, na toeitiiti atoa le tausaga o alu e aunoa ma le faatauina o sana meaai ina ia lava ai se tupe e teu. “A fai la lau auli,” sa ia fai atu ai, “e te le toe tuua ma e alu i totonu o le potumoe ma e tagi ai seiloga e uma le tiga o lou lima.” Na te le iloaina o loo iloa e tama lena mea. Sa ou le malamalama i le osigataulaga a lo’u tama ma le faatinoga o le alofa mo lo’u tina i lena taimi, ae ua ou iloaina nei, sa ou faapea ifo ia te au lava, “O se tamalii le la.”

Na aioi atu le perofeta o Liae i ona atalii faatautee, i le faapea atu, “Ina tulai mai ia ai le efuefu, o’u atalii e, ma ia faatamatane” (2 Nifae 1:21; faaopoopo le faamamafa). Ona o o la tausaga, sa avea ai Lamana ma Lemuelu o ni tamatane, ae i le tulaga o uiga faaalia ma le matutua faaleagaga sa avea pea i laua o ni tamaiti. Sa la tomumumu ma faitio pe a talosagaina e fai se mea faigata. La te lei taliaina le pule a se tasi e faasa’oina ai i laua. La te lei faatauaina mea faaleagaga. Sa faigofie ona la liliu atu i le faamimisa, ma e lelei tele i le tautuuai i e na aafia.

O loo tatou vaai i nisi o na lava uiga i aso nei. O isi o loo faia e pei o le sini maualuga a le tagata lava ia o le faamalieina o ia lava. O le faapalepale masani i amioga e le taliaina ua “faanoiina mai ai isi tagata mai faasalaga” e pei ona i ai, ua manatu ai le toatele faapea e taliaina le fanauina o fanau i fafo o le faaipoipoga ma ia nonofo faapouliuli ai nai lo le faaipoipo.¹ O le aloese mai tautinoga ua manatu i ai o se mea atamai, ae o le ositaulaga mo le lelei o isi, ua manatu i ai e faaletaua. O nisi, o se olaga galue ma le ausia o se mea e tuu i le faitalia. O se fomai o le mafaufau o loo suesueina le faatupulaia o le vaega lenei ua ia taua o “alii talavou e le o agai i luma” o loo faamatalaina i le vaaiga lenei:

“Na alu atu Justin e aoga i le kolisi mo se tausaga e tasi pe lua, na faamaimau ai le fiaafe tala a ona matua, ona le fiafia lea i ai ma toe foi mai i le fale ma toe nofo i lona potu tuai, o le potumoe lava lea sa nofo ai a o aoga i le aoga maualuga. O loo faigaluega nei mo le 16 itula i le vaiaso i a Kinko pe galue faavaitaimi i le Starbucks.

“Ua leiloa e ona matua le mea o le a fai. ‘Justin, ua 26 ou tausaga. E te le o aoga. E le o i ai sau galuega. E le o i ai sau uo teine. O le a le fuafuaga? O a fea o le a faasagatonu ai lou olaga?’

“ ‘O le a le faafitauli?’ sa fesili atu ai Justin. ‘E lei molia lava au i se mea. Ou te lei fai atu foi ia te oulua i se tupe. E a pe a sei oulua to’a mai?’”²

E a lena mo le naunau?

O i tatou o e o loo umia le perisitua a le Atua e le mafai ona tatou ola faasamasamanoa. O loo i ai la tatou galuega e fai (tagai i le Moronae 9:6). E ao ona tatou tulai ese mai le efuefu o le faaloloto ma ia faatamatane! O se faanaunauga matagofie mo se tamaitiiti le avea ma se tamatane—e malosi ma gafatia; o se tasi e mafai ona fausia ma fatufatua’i ni mea, faagaoioia ni mea; o se tasi e faia se suiga i le lalolagi. O se faanaunauga matagofie mo i tatou o e ua matutua le ausiaina o le tulaga moni o le avea ma tamatane ma avea ma faataitaiga mo i latou o e o loo vaavaai mai ia i tatou mo se faataitaiga.

I lona aoao tetele, o le faatamatane moni o loo faauigaina lea i lo tatou sootaga i tamaitai. Ua tuuina mai e le Au Peresitene Sili ma le Korama a le Toasefululua le tulaga sili lenei e ao ona sailia i upu nei:

“O le aiga ua faauuina e le Atua. O le faaipoipoga i le va o le alii ma le tamaitai e taua i Lana fuafuaga e faavavau. E tatau ona fanauina fanau i totonu o feagaiga o le faaipoipoga, ma ia tausia e se tama ma se tina o e ua faamamaluina ma le faatuatua atoatoa feagaiga faaleulugalii… . I le fuafuaga paia, e tatau ona pulefaamalumalu tama i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga.”³

I le tele o tausaga, sa ou feiloai ai i tagata o le Ekalesia i le tele o atunuu, ma e ui i eseesega i tulaga ma aganuu, ae sa faagaeetia lava au i soo se mea i le faatuatua ma le malolosi o o tatou tamaitai, e aofia ai nisi o e talavou. E toatele i latou o loo i ai se faatuatua maoae ma le lelei. Latou te iloa ia tusitusiga paia. E mautu ma mautinoa i latou. Ou te fesili ifo ia te au lava, Pe o i ai ea ni o tatou alii e faafetauia nei tamaitai? Pe o atiina ae ea o tatou alii talavou ina ia avea ma ni soa agavaa e mafai e ni tamaitai faapea ona vaavaai atu i ai ma faaaloalo i ai?

Na saunoa Peresitene Gordon B. Hinckley, i le sauniga lava lenei ia Aperila 1998, ma tuuina atu ai se fautuaga patino mo alii talavou:

“O le teine e te faaipoipo i ai o le a talia e ia se avanoa matautia e te avatu… . O le a [e] fuafuaina le tele o aso o totoe o lona olaga… .

“Galue ia maua aoaoga. Ia maua mai uma aoaoga e te mafaia. O le a totogia oe e le lalolagi i se mea latou te manatu ua tusa ma oe. Sa matuai manino lava upu a Paulo ina ua ia tusi atu ia Timoteo, ‘A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faalogo’ (1 Timoteo 5:8).”⁴

O le amio sao o le faavae lea o le tulaga faatamatane. O le amio sao o lona uiga o le faamaoni, ae o le isi foi uiga o le taliaina o le tiutetauave ma le faamamaluina o tautinoga ma feagaiga. O Peresitene N. Eldon Tanner, o le sa avea muamua ma fesoasoani i le Au Peresitene Sili ma o ia lava o se faataitaiga o le amio sao, sa ia faamatala i se tasi na oo atu ia te ia mo se fautuaga:

“Na oo mai se alii talavou ia te au i se taimi ua leva ma faapea mai, ‘Sa ou faia se maliliega ma se tasi alii lea e moomia ai ona ou totogiina atu se aofaiga o tupe i tausaga taitasi. O loo i ai ni tupe ua tuai ona ou totogiina, ma e le mafai ona ou totogiina atu, aua afai ou te faia, o le a aveesea loa lo’u fale. O le a le mea e tatau ona ou faia?’

“Na ou tilotilo atu ia te ia ma faapea atu, ‘Tausi le lua maliliega.’

“‘E tusa lava pe aveesea ai lo’u fale?’

“Sa ou fai atu, ‘Ou te le o talanoa e uiga i lou fale. O lea ou te tautala atu e uiga i le lua maliliega; ma ou te manatu o le a sili atu i lou faletua ona i ai sona toalua o le na te tausia lana upu, ausia ona matafaioi, … ma mautotogi i se fale nai lo le mauaina o se fale e i ai se toalua o le na te le tausia ana feagaiga ma ana folafolaga.’”⁵

O nisi taimi e faia ai e alii lelei ni mea sese. O se tagata amio sao o le a faafeagai ma faasaoina ma le faamaoni ana mea sese, ma o se faataitaiga lena e mafai ona tatou faaaloalogia. O nisi taimi e taumafai ai tagata ae faatoilaloina. E le o faamoemoega lelei uma e ausiaina e ui lava i taumafaiga faamaoni ma le sili a se tasi. O le tamatane moni e le fuatiaina pea lava i fua o ana galuega ae o galuega lava latou ia—i tauiviga a se tasi.⁶

E ui o le a ia faia ni ositaulaga ma teenaina nisi o mea e fiafia i ai i le taumafai e faamamaluina ana tautinoga, o le faatamatane faamaoni lava ia e ola faamalieina. E tele mea na te tuuina atu, ae sili atu ona tele mea na te mauaina mai, ma e ola faamalieina o ia i le faamaoniga a lona Tama Faalelagi. O le olaga faatamatane moni lava ia, o le olaga lelei.

O le mea e sili atu ona taua, afai tatou te manatunatu i le apoapoaiga ina ia faatamatane, e ao ona tatou mafaufau ia Iesu Keriso. Ina ua aumaia e Pilato ia Iesu i fafo ua pale i se pale tuitui, sa ia folafola atu, “Faauta i le tagata!” (tagai i le Ioane 19:4–5). E lei mafai e Pilato ona malamalama atoatoa i le taua o ana lava upu, ae na tulai lava le Alii i luma o tagata i lena taimi, e pei ona Ia tu ai i aso nei, o le faataitaiga sili o tagata—Faauta i le tagata!

Na fesili le Alii i Ona soo pe faapefea la outou amio e tatau ai ona tali atu lea, “E moni, ou te fai atu ia te outou, e pei lava o au nei” (3 Nifae 27:27; tagai foi 3 Nifae 18:24). O la tatou tausinioga sili lena. O a mea na Ia faia e mafai ona tatou faataitai i ai o ni tamatane?

Na teena e Iesu faaosoosoga. Ina ua fetaiai ma le faaosooso sili lava ia, “ua le [gauai] Iesu i tofotofoga” (Mosaea 15:5). Sa ia tali atu i le mau: “E le na o mea e ai e ola ai le tagata, a o afioga uma e tulei mai i le fofoga o le Atua” (Mataio 4:4). O poloaiga ma faatulagaga o le talalelei o lo tatou puipuiga foi lea, ma e pei foi o le Faaola, e mafai ona tatou maua le malosi mai tusitusiga paia e tetee ai faaosoosoga.

Sa usiusitai le Faaola. Sa ia lafoaia atoatoa le “tagata o le lalolagi” (Mosaea 3:19) ma gauai atu Lona finagalo i le Tama (tagai Mosaea 15:7). Sa papatisoina o Ia ina ia faaalia ai “na te faamaulaloina o ia lava i le tino i luma o le Tama, ma ia molimau atu i le Tama e usiusitai o ia ia te ia i le tausiga o ana poloaiga” (2 Nifae 31:7).

Sa “femaliuai [Iesu] ma agalelei” (Galuega 10:38). Sa Ia faaaogaina mana paia o le perisitua paia e faamanuia ai i latou o e sa le tagolima, “e pei o le faamaloloina o e mamai, toe faatuina mai o e ua oti, faasavavali o e pipili, ma faapupula mata o e tauaso, e faafaalogo foi o e tutuli, ma faamalolo i ma’i uiga eseese uma” (Mosaea 3:5). Na ta’u atu e Iesu i Ana Aposetolo: “O se fia muamua foi ia te outou, ia fai o ia ma auauna a outou uma. Aua foi o le Atalii o le tagata na le sau o ia ina ia auauna tagata ia te ia, a e peitai ia auauna o ia, ma foaiina atu lona ola o le togiola e sui a’i tagata e toatele” (Mareko 10:44– 45). I le avea ai ma Ana auauna, e mafai ona avea i tatou ma e sili i Lona malo e ala i le alofa ma le auauna atu.

Sa le fefe le Faaola i le tetee atu i le tiapolo ma mea sese. “Ua ulufale atu Iesu i le malumalu o le Atua, ona ia tulia uma lea i fafo o e na fefaatauai i le malumalu … ua faapea atu o ia ia te i latou, Ua tusia, E ta’ua lo’u fale o le fale tatalo; a ua faia e outou ma ana o e fao mea” (Mataio 21:12–13). Sa Ia valaau atu i tagata uma ina ia salamo (tagai Mataio 4:17) ma ia faamagaloina (tagai Ioane 8:11; Alema 5:33). Ia tatou tutu mausali i le puipuia o mea paia ma ia sii atu le leo o le lapataiga.

Na Ia tuuina atu Lona soifua e togiola ai tagata. E mautinoa lava e mafai ona tatou taliaina le tiutetauave mo i latou ua Ia tuuina mai i la tatou tausiga.

Uso e, ia tatou faatamatane, e faapei foi o Ia. I le suafa o Iesu Keriso, amene.